ၸၢတ်ႈၸဝ်ႈမႁႃႇၸၼၵ/ၸဝ်ႈၵႅမ်မိူင်း တိူင်ႇၵၢဝ်ႇသၸ်ႉၸႃႇ
ၸဝ်ႈၵႅမ်မိူင်းၼႆၵေႃႈ ပေႃးဝႃႈလႆႈၶၢမ်ႇၺွပ်းၶင်ဝႆႉယဝ်ႉၸိုင် ၸင်ႇဝူၼ်ႉဝႃႈ "ဝၢႆးသေ ၸဝ်ႈပေႃႈႁေႃၶမ်းဢမ်ႇမီးယဝ်ႉ၊ ၸႄႇၸဵမ်ၸဝ်ႈပီႈႁုပ်ႈသိမ်းၼင်ႈႁေႃသေ ယုၵ်ႉယွင်ႈၵဝ်ပဵၼ် ၸဝ်ႈၵႅမ်မိူင်း မႃးတေႃႇမိူဝ်ႈလဵဝ် ၼႂ်းႁူဝ်ၸႂ်ၵဝ် တေႃႈၵႃႈ မွၵ်ႈသဵၼ်ႈၶူၼ်ႁူဝ်ၵေႃႈ ၵဝ်ဢမ်ႇတွၼ်ႉဝႆႉၶဵၼ်တေႃႇ ၸဝ်ႈပီႈမႃးသေပွၵ်ႈ။ ၵဝ်ႁဵတ်းလီထၢၼ်ႇၼႆႉၵေႃႈ ႁဵတ်းသင်လႄႈ မၼ်းဢဝ်ၵဝ် ၶင်သႂ်ႇၶွၵ်ႈယူႇလႃႇၼႆႉ" ၼႆ။ ၵမ်းၼၼ် မၼ်းၸင်ႇ တိူင်ႇၵၢဝ်ႇသၸ်ႉၸႃႇဝႃႈ "ၵဝ်ၼႆႉ သင်ၸိူဝ်ႉဝႃႈ ပဵၼ်ၽူႈၶဵၼ် ၸဝ်ႈပီႈၸႅတ်ႈၸၢင်ႇတႄႉတႄႉၼႆၸိုင် ၽၵ်းတူၶွၵ်ႈႁိူၼ်းၼႆႉၵေႃႈ ယႃႇႁႂ်ႈပိုတ်ႇ၊ တူင်ႇလဵၵ်းဢၼ်သုပ်းဝႆႉၼႆႉၵေႃႈ ယႃႇႁႂ်ႈငၢၵ်ႈသေၵမ်းတႃႉ။ ပေႃးဝႃႈ ဢမ်ႇၸႂ်ႈၸိူင်ႉၼၼ် ႁႂ်ႈဢၼ်ၽၵ်းတူၶွၵ်ႈ တင်းၽွၵ်ႇလဵၵ်းဢၼ်သုပ်းဝႆႉၼႆႉ ငၢၵ်ႈဢွၵ်ႇပိုတ်ႇၵႂႃႇ ယၢမ်းတေႃႈလဵဝ်သေၵမ်း" ၼႆယဝ်ႉ။
ၵမ်းၼၼ် ၵွပ်ႈၼမ်ႉၵတ်ႉ ၵႂၢမ်းၵၢဝ်ႇသၸ်ႉၸႃႇၸဝ်ႈလႄႈ ၽွၵ်ႇလဵၵ်းဢၼ်ဢဝ်လၢပ်ႇတႅပ်း ယင်းဢမ်ႇၶၢတ်ႇလႆႈၼၼ်ႉၵေႃႈ ပဵၼ်ပွတ်းပဵၼ်ပႅတ်းၵႂႃႇၵမ်းလဵဝ်ယဝ်ႉ။ ၽၵ်းတူၶွၵ်ႈႁိူၼ်းၼႆၵေႃႈ ပိုတ်ႇၵႂႃႇၵမ်းလဵဝ်ယဝ်ႉ၊ ယၢမ်းၼၼ် ၸဝ်ႈၸၢႆးပေႃးလꩡၼၵၼႆႉ ၵွပ်ႈမီးၵၢမ်ႇမီးမုၼ် ထုၵ်ႇပဵၼ်ၶုၼ်ၼၼ်ႉၵေႃႈပိူင်ၼိုင်ႈ ၵွပ်ႈမီးႁူဝ်ၸႂ်သိုဝ်ႈယူဝ်းၼၼ်ႉၵေႃႈပိူင်ၼိုင်ႈလႄႈ ဢမ်ႇမီးၽူႈလႂ် ႁတ်းတိၺွပ်းမၼ်းၸဝ်ႈသေ လႆႈလွတ်ႈဢွၵ်ႇၶွၵ်ႈၵႂႃႇ ပေႃးမိူၼ်ၼင်ႇ ၸၢင်ႉတူၵ်းၼမ်ႉၼၼ်ႉယဝ်ႉ။ ၸဝ်ႈၸင်ႇပႆဢွၵ်ႇဝဵင်းၵႂႃႇသေ ၵႂႃႇယူႇတီႈဝၢၼ်ႈထိူၼ်ႇဝၢၼ်ႈၶိူဝ်းဢွၼ်ႇတီႈၼိုင်ႈယဝ်ႉ။ ၵူၼ်းဝၢၼ်ႈၵူၼ်းသူၼ်ၸိူဝ်းၼၼ်ႉၵေႃႈ ႁူႉဝႃႈပဵၼ်ၸဝ်ႈၵႅမ်မိူင်းလႄႈ ၸင်ႇဢွၼ်ၵၼ်ၼွမ်းၸူးမၼ်းၸဝ်ႈယူႇယဝ်ႉ။ ၸဝ်ႈၶုၼ်ဢရိတ်ႉထꩡၼၵၵေႃႈ တႃႇတေၺွပ်းလႆႈ ၸဝ်ႈၵႅမ်မိူင်းၼၼ်ႉ ဢမ်ႇၸၢင်ႈႁဵတ်းႁိုဝ်။
ၶုၼ်ၸၢႆးပေႃးလꩡၼၵၼႆၵေႃႈ ႁုပ်ႈသိမ်းဝၢၼ်ႈဢွၼ်ႇတင်းၼမ်သေလႄႈ ႁဵတ်းၵူၼ်းၸွမ်းလင်သေယဝ်ႉ ၸင်ႇဝူၼ်ႉဝႃႈ "ဢွၼ်တၢင်း ၵဝ်ဢမ်ႇၸႂ်ႈၽူႈၶဵၼ်ၵၼ် တင်းၸဝ်ႈပီႈႁဝ်းသေတႃႉၵေႃႈ ယၢမ်းလဵဝ်ၼႆႉၸမ်ႉ တေလႆႈႁဵတ်းၶဵၼ်တေႃႇယဝ်ႉ" ၼႆသေ ပူၵ်းတင်ႈတပ်ႉသေလႄႈ ၶိုၼ်ႈၸူးမိူင်းမိထိလႃႇသေယဝ်ႉ ၵႂႃႇတင်ႈတပ်ႉဝႆႉတီႈဢၼ် ဢမ်ႇၸမ်ဢမ်ႇၵႆဝဵင်းၼၼ်ႉယူႇယဝ်ႉ။