ၸၢတ်ႈၸဝ်ႈမႁႃႇၸၼၵ/သွင်ပီႈၼွင်ႉ တိုၵ်းသိုၵ်း
မိူဝ်ႈၵွၼ်ႇပူၼ်ႉမႃးၼၼ်ႉ တီႈၼႂ်းမိူင်းတေႇႁရႃႇၸ ယင်းမီးၸဝ်ႈၶုၼ်ႈ ဢၼ်လႆႈၸိုဝ်ႈဝႃႈ ၸဝ်ႈမႁႃႇꩡၼၵ ႁဵတ်းၶုၼ်ဝႆႉယူႇယဝ်ႉ။ ၶုၼ်လူင်ၼၼ်ႉ မီးလုၵ်ႈသွင်ၵေႃႉ ဢၼ်ၸိုဝ်ႈဝႃႈ ၸဝ်ႈၸၢႆးဢရိၻ်ႉꩪꩡၼၵ လႄႈ ၸဝ်ႈၸၢႆးပေႃးလꩡၼၵ ၼႆယူႇ။ ၼႂ်းၵႃႈ ၶဝ်သွင်ၸဝ်ႈၼႆႉ ဝႆႉပၼ်ၵေႃႉပီႈ ၸဝ်ႈၸၢႆး ဢရိၻ်ꩪꩡၼၵၼၼ်ႉ ပဵၼ်ၸၼ်ႉ ၸဝ်ႈၵႅမ်မိူင်းသေယဝ်ႉ ဝႆႉၵေႃႉၼွင်ႉ ၸၢႆးပေႃးလꩡၼၵ ပဵၼ်ၸၼ်ႉ ၸဝ်ႈသိုၵ်းလူင်သေႇၼႃႇပတိယူႇယဝ်ႈ။
ၶုၼ်လူင်မႁႃႇꩡၼၵၼႆႉ ႁဵတ်းၶုၼ်မႃးပီယၢဝ်းၶၢဝ်းႁိုင်သေယဝ်ႉ မိူဝ်ႈထိုင်မႃး ၶၢဝ်းဢူမုၼ်ၽုင်းၵၢမ်ႇသုတ်းသဵင်ႈၼၼ်ႉ သဵင်ႈၵၢမ်ႇၼွၼ်းၽေးၵႂႃႇယဝ်ႉ။
ၵေႃႉပဵၼ်ၸဝ်ႈၵႅမ်မိူင်း ၸဝ်ႈၸၢႆးဢရိၻ်ꩪꩡၼၵၵေႃႈ ၸုတ်ႇၽဝ်သၢင်းၵျူဝ်ႇ ၶၢပ်ႈတူဝ်ပေႃႈၸဝ်ႈမၼ်းၸၢႆးသေယဝ်ႉ ႁႂ်ႈပတ်းၽဵဝ်ႈႁၢင်ႈၶိူင်ႈဝဵင်းသေ ပုတ်ႈတိၼ်တၢင်မိုဝ်း ဢုပ်ႉထိင်းႁၢင်ႈႁေႃယူႇ၊ ပေႃးဝႃႈ မၼ်းၸဝ်ႈ ၶိုၼ်ႈပဵၼ်ၶုၼ်ယဝ်ႉၵေႃႈ ၸင်ႇယုၵ်ႉယွင်ႈဢဝ်ၼွင်ႉမၼ်း ၸဝ်ႈၸၢႆးပေႃးလꩡၼၵ ၶိုၼ်ႈပဵၼ် ၸဝ်ႈၵႅမ်မိူင်းယဝ်ႉ။
ၽွင်းမိူဝ်ႈၵေႃႉဢၼ်ပဵၼ်ၵူၼ်းတၢမ်းၸႂ် ၸဝ်ႈၵႅမ်မိူင်းၵေႃႉၼိုင်ႈ ၵွပ်ႈဢမ်ႇလႆႈသုၼ်ႇမၢၼ် ဢၼ်ဢၢၼ်းလႆႈၼၼ်ႉလႄႈ ၸင်ႇဝႆႉၸႂ်ၶဵၼ်ၼိူဝ်ၸဝ်ႈၶုၼ်မႂ်ႇ ၸဝ်ႈဢရိၻ်ꩪꩡၼၵယဝ်ႉ။
ယွၼ်ႉၼၼ် ၽွင်းမိူင်းၼၼ်ႉ ၸင်ႇၶဝ်ႈၸူးတီႈမၼ်းၸဝ်ႈသေ လဝ်ႈမွၵ်ႇသေႃႇသူၼ်းဝႃႈ "ၸဝ်ႈၶုၼ်လူင်ႁဝ်းၶႃႈ ၼွင်ႉၸၢႆးၸဝ်ႈ ဢၼ်ပဵၼ်ၸဝ်ႈၵႅမ်မိူင်းၼႆႉ ဢဵၼ်းၶိုင်ႁဵတ်းၶဵၼ်ၼိူဝ်ၸဝ်ႈႁဝ်းလႄႈ ၸေးၸိမ်ႇလွင်ႈၵတ်းယဵၼ်ၸဝ်ႈၶုၼ်ႁဝ်းယူႇဢေႃႈ၊ ၶႅၼ်းတေႃႈၸဝ်ႈႁဝ်း ဝႆႉသတိသေသေႇၶႃႈ။ ၶႃႈႁဝ်းၸမ်ႉ ၵွပ်ႈပဵၼ်ၵေႃႉဢိင်ပိုင်ႈၼိူဝ်ၸဝ်ႈႁဝ်းၶႃႈလႄႈ ၶႂ်ႈႁႂ်ႈၸဝ်ႈၶုၼ်ၸဝ်ႈၵဝ်ႇ လႆႈလွင်ႈသၢင်ႇထုၵ်ႇတၢၼ်ႇႁိုဝ်သေတႃႉၵေႃႈ ၵွပ်ႈဝႃႈပဵၼ်ၵေႃႉဢၼ်လႆႈပႂ်ႉပႃး ရႃႇꩡဝတ်ႈၸဝ်ႈၶုၼ်လႄႈ ပေႃးပဵၼ်လွင်ႈၶဵၼ်ၸဝ်ႈႁဝ်း မၢၼ်ႇမႅၼ်ႈၸိုဝ်ႈၸႂ်ယူႇၼႆ ဢမ်ႇသိူဝ်းႁူမ်ႇသိမ်းသိူင်ႇဝႆႉ ၸင်ႇလႆႈဢဝ်မႃးလဝ်ႈထိုင် ၸဝ်ႈႁဝ်းယူႇၶႃႈ" ၼႆယဝ်ႉ။
ပေႃးဝႃႈ လႆႈငိၼ်း ၶေႃႈၵႂၢမ်းၽွင်းမိူင်းယဝ်ႉၼႆ ၸဝ်ႈၶုၼ်လူင် ဢရိၻ်ꩪꩡၼၵၼႆႉ လွမ်ဝူၼ်ႉဝႃႈ "ပဵၼ်ၸိူင်ႉႁိုဝ်ၵေႃႈယဝ်ႉ ပုၼ်ႈတႃႇၼွင်ႉၸၢႆးၵဝ်ႇ တေၶိုင်ၵျၢမ်ႇလွင်ႈဢမ်ႇလီၼိူဝ်ၵဝ်ႈၸဝ်ႈ မၼ်းတေဢမ်ႇၸႂ်ႈ၊ မၼ်းဢမ်ႇပဵၼ်လႆႈ" ၼႆယူႇ။
ဢဝ်လၢႆးၸိူင်ႉၼင်ႇၼႆသေ ပေႃးထိုင်မိူဝ်ႈသၢင်ႇထုၵ်ႇမႃး ၽွင်းမိူင်းၼၼ်ႉ ဢဝ်ၶေႃႈၵႂၢမ်းၼႆႉသေ လဝ်ႈထိုင်ၸဝ်ႈၶုၼ်ထႅင်ႈယူႇယဝ်ႉ၊ ပေႃးၵမ်းမၼ်းၼမ်မႃးၼႆ ၸဝ်ႈၶုၼ်ၸင်ႇဝူၼ်ႉဝႃႈ "ၽွင်းမိူင်းၵေႃႉၼႆႉ မႃးတၢင်ႇလဝ်ႈထိုင်ၵဝ်ၸဝ်ႈလၢႆးပွၵ်ႈယဝ်ႉ၊ လွင်ႈဢၼ်ဝႃႈ ၼွင်ႉၸၢႆးၵဝ် ၶိုင်ၵျၢမ်ႇႁဵတ်းၶဵၼ်ၼိူဝ်ၵဝ်ၼၼ်ႉ ၶေးၸႂ်ႈယူႇ" ၼႆသေ ထၢင်ႇထိူမ်ၵႂႃႇၼိူဝ် ၼွင်ႉၸၢႆးမၼ်းယဝ်ႉ။
ႁဵတ်းၼၼ် မၼ်းတတ်းၶၢတ်ႇပႅတ်ႈ တၢင်းႁၵ်ႉ တီႈၼိူဝ်ၼွင်ႉၸၢႆးၼၼ်ႉသေ ဝူၼ်ႉဝႃႈ "ၼွင်ႉၵဝ်ၸၢႆးပေႃးလꩡၼၵၼႆႉ ယင်းပႆႇမီးၵျေးၸူးသင်ၼိူဝ်ၵဝ် မၼ်းယင်းဢမ်ႇႁူႉၵျေးၸူးၵဝ် ဢၼ်ဝႃႈၵဝ်မၢတ်ႈယိုၼ်မၼ်းပဵၼ်ၼွင်ႉၸၢႆး" ၼႆသေ ဢွၵ်ႇတေႃးသလူင်ယူႇယဝ်ႉႈ။ ၵွပ်ႈတေႃးသၼၼ်ႉလႄႈ ဢမ်ႇႁူႉႁၼ်ၽွၼ်းလီ၊ လမ်တၼ်မိူၵ်ႈမႂ်ႈသေ ဢမ်ႇဝူၼ်ႉထတ်းသၢင် ဢမ်ႇၸွပ်ႇတူၺ်း၊ ၵူၺ်းထွမ်ႇဢဝ် ၶေႃႈၵႂၢမ်းၽၢႆႇလဵဝ်သေ ပူင်ၵႂၢမ်းၼၵ်း ထိုင်ၽွင်းမိူင်းထိင်းဝဵင်းၶဝ်ဝႃႈ "ၺွပ်းၸဝ်ႈၸၢႆးပေႃးလꩡၼၵ ယၢမ်းလဵဝ်၊ လူတ်းပႅတ်ႈၸၼ်ႉထၢၼ်ႈၸဝ်ႈၵႅမ်မိူင်းသေ ဢဝ်ၽွၵ်ႇလဵၵ်းသုပ်းတိၼ်မၼ်းသေ ဢဝ်ၵႂႃႇၶမ်ၶွၵ်ႈတႃႉ" ၼႆယဝ်ႉ။
ၽွင်းမိူင်းထိင်းဝဵင်းၶဝ်ၵေႃႈ ၸွမ်းၼင်ႇၸဝ်ႈၶုၼ်ပူင်ၵႂၢမ်းသင်ႇမႃးၼၼ်ႉ ၺွပ်းၸဝ်ႈၵႅမ်မိူင်းသေယဝ်ႉ ၶင်ဝႆႉၼႂ်းၶွၵ်ႈ တီႈဢၼ်ဢမ်ႇၸမ်ဢမ်ႇၵႆႁၢင်ႈႁေႃႈၼၼ်ႉသေဢမ်ႇၵႃး ပႃးဢဝ်တင်းၽွၵ်ႇလဵၵ်းသုပ်းတိၼ်သေယဝ်ႉ ဝႆႉၵူၼ်းပႂ်ႉတူၺ်းဝႆႉယူႇယဝ်ႉ။