ၸၢတ်ႈၸဝ်ႈမႁႃႇၸၼၵ/ပွင်ႇၶၢဝ်ႇထိုင်
ၽွင်းမိူင်း ၶုၼ်သိုၵ်းၶဝ် ဢၼ်ယၢပ်ႇႁၢပ်ႇၵၢၼ် ၽၢႆႇတႂ်ႈ ၸဝ်ႈၸၢႆးပေႃးလꩡၼၵလႄႈ ၽွင်းမိူင်း ၶုၼ်သိုၵ်း ၸိူဝ်းဢၼ်ႁၵ်ႉပႅင်း ၸဝ်ႈၸၢႆးပေႃးလꩡၼၵၸိူဝ်းၼၼ်ႉ ပေႃးဝႃႈ လႆႈႁူႉငိၼ်းၶၢဝ်ႇငၢဝ်း ၶိူင်ႈသိုၵ်းၶိုၼ်ႈမႃးယဝ်ႉၼႆၵေႃႈ ၸင်ႇပႃးဢဝ် ၶိူင်ႈယိပ်းတင်းၸၢင်ႉမႃႉ ဢွၵ်ႇဝဵင်းၵႂႃႇသေ ဢွၼ်ၵၼ် ၼွမ်းၸူး ၶုၼ်ပေႃးလꩡၼၵယူႇယဝ်ႉ၊ ပေႃးလႆႈႁူႉ ၽွင်းမိူင်းၶဝ် ၶုၼ်သိုၵ်းၶဝ် ႁဵတ်းၼၼ်ၸိုင် ၵူၼ်းမိူင်းၵမ်ႈၽွင်ႈၵေႃႈ ဢွၼ်ၵၼ် ၵႂႃႇၶဝ်ႈႁူမ်ႈႁွမ်းမၼ်းၸဝ်ႈယူႇယဝ်ႉ။
ၶုၼ်ပေႃးလꩡၼၵၵေႃႈ ပေႃးမီးဢဵၼ်ႁႅင်းပဵၼ်ၵွၼ်ႈ ၵူၼ်းၶွၼ်ႈၼမ်မႃးၸိုင် ယူႇတီႈတပ်ႉၼၼ်ႉသေ ၸင်ႇတႅမ်ႈလိၵ်ႈသူင်ႇထိုင် ၸဝ်ႈၶုၼ်လူင် ဢရိၻ်ႉꩪꩡၼၵယူႇယဝ်ႉ။ သူင်ႇထိုင်ဝႃႈ "ၸဝ်ႈပီႈႁဝ်း ၶုၼ်ဢရိၻ်ႉꩪꩡၼၵဢိူၺ်း မိူဝ်ႈၵဝ်ၶႃႈ ႁဵတ်းၸဝ်ႈၵႅမ်မိူင်းယူႇလူၺ်ႈၸွမ်းၸဝ်ႈၼၼ်ႉ ဢမ်ႇတွၼ်ႉဝႆႉၸႂ်ႁဵတ်းၶဵၼ်တီႈၼိူဝ် ၸဝ်ႈပီႈႁဝ်းမႃးသေပွၵ်ႈၶႃႈ။ တေႃႈလဵဝ်ၼႆႉၸမ်ႉ ဢမ်ႇၶႂ်ႈႁဵတ်းၶဵၼ်ၼိူဝ်ၸဝ်ႈပီႈႁဝ်းသေတႃႉၵေႃႈ ၵွပ်ႈၸဝ်ႈပီႈႁဝ်း ႁဵတ်းၶဵၼ်မႃးလႄႈ တေႁဵတ်းၶဵၼ်တိုၵ်းတေႃႇ ၸဝ်ႈပီႈႁဝ်းယဝ်ႉ။ တေပၼ်ႁၢင်ႈႁေႃႁႃႉ၊ ဢမ်ႇၼၼ်ၵေႃႈ တေတေႃႇသူႈတိုၵ်းသိုၵ်းၶဵင်ႇၵၼ်ႁႃႉ၊ မွၵ်ႇမႃးလႅင်းလႅင်းလႄႈ" ၼႆသေ ၸႂ်ႉၵေႃႉႁတ်းႁၢၼ်ၵႂႃႇသူင်ႇလိၵ်ႈၼၼ်ႉယဝ်ႉ။
ပေႃးဝႃႈ ၶုၼ်ဢရိတ်ႉꩪꩡၼၵ လႆႈငိၼ်းယဝ်ႉၼႆ ဢွၵ်ႇၸႂ်လမ်ဝႃႈ "ၸိူင်ႉၼင်ႇမႂ်းၼႆႉ ႁတ်းဢူဝ်းတႃႉတေႃႇၵဝ်ၶုၼ်ယူႇႁႃႉ" ၼႆသေ ၶိုၼ်းတႅမ်ႈၵႂႃႇဝႃႈ "ဢၢႆႈပေႃးလꩡၼၵဢိူၺ်း ၸွင်ႇမႂ်းၵိုင်ႇထိူၵ်ႈ တင်းႁၢင်ႈႁေႃယူႇႁႃႉ။ တေႃႈလဵဝ်ၼႆႉၵူၺ်း ၵဝ်တေမႃးတိုၵ်းမႂ်းလႄႈ တင်းၸုမ်းမႂ်းယဝ်ႉသေ တေဢဝ်ႁူဝ်မႂ်းၵွၼ်ႇ" ၼႆယဝ်ႉ။
မိူင်ႈယၢမ်းၼင်ႇၼၼ် ၼၢင်းၸုမ်ႈ ၶုၼ်ဢရိတ်ႉꩪꩡၼၵၼႆႉ မီးဝႆႉသၼ်ႇထေႇ ဢၼ်ၼေႃႇၸဝ်ႈမႃးတႄႇၼၼ်ႉယဝ်ႉ။
ၸဝ်ႈၶုၼ်ဢရိတ်ႉꩪꩡၼၵၵေႃႈ ပေႃးဝႃႈ လႆႈလၢတ်ႈဢွၵ်ႇၵႂၢမ်းၶေႃႈၼၼ်ႉယဝ်ႉၸိုင် ၸင်ႇႁွင်ႉဢဝ်မေးၼၢင်းမၼ်းၸဝ်ႈ ၼၢင်းလူင်သေ သင်ႇၵႂၢမ်းဝႃႈ "လွင်ႈတိုၵ်းသိုၵ်းၼႆႉ တေပႄႉႁႃႉ၊ တေသုမ်းႁိုဝ် ၼႆဢမ်ႇႁူႉလႆႈ။ မိူဝ်ႈလဵဝ် ၵွပ်ႈၵဝ်တေဢွၵ်ႇတိုၵ်းသိုၵ်းယဝ်ႉလႄႈ တေႃႈပႂ်ႉထႃႈထွမ်ႇၶၢဝ်ႇငၢဝ်းသိုၵ်းသေ လုမ်းလႃးတူၺ်းထိုင် သၼ်ႇထေႇသူ လီလီငၢမ်းငၢမ်းၼႃႉ" ၼႆ။ ဝၢႆးၼၼ်ႉ ပေႃးမူႇၽုင်သိုၵ်းမၼ်း လႃႈႁႅၼ်းတၼ်းယဝ်ႉၸိုင် ၸင်ႇပႃးဢဝ်ၶိူင်ႈယိပ်း၊ သိုၵ်းႁၢင်၊ ၵေႃႉႁၢၼ်၊ ႁူဝ်ႁၢၼ်၊ ႁူဝ်သိုၵ်း၊ ၸၢင်ႉ၊ မႃႉ၊ ရထႃး ပဵၼ်မုၵ်ႉ ပဵၼ်ၽုင်သေ ဢွၵ်ႇဝဵင်းၵႂႃႇယဝ်ႉ။
ၶုၼ်ပေႃးလꩡၼၵၵေႃႈ မီးဢဵၼ်ႁႅင်းၶိူင်ႇၵိုမ်းသေ ႁၢင်ႈႁႅၼ်းဝႆႉယူႇ။ ပေႃးဝႃႈၶုၼ်သွင်ပီႈၼွင်ႉ လေႃႇသိုၵ်းတိုၵ်းၵၼ်ၵေႃႈ တပ်ႉသိုၵ်းလူင် ၸဝ်ႈပေႃးလꩡၼၵၼႆႉ ၽၼ်းတိုၵ်းဢရိၻ်ႉထꩡၼၵ လႄႈ ဢဝ်မၼ်းၶုၼ် သဵင်ႈၵၢမ်ႇသုတ်းမုၼ်ၵႂႃႇယဝ်ႉ။ ပေႃးဝႃႈ ၸဝ်ႈၶုၼ်ဢရိၻ်ႉထꩡၼၵ တူၵ်းသုမ်းယဝ်ႉၼႆၵေႃႈ သိုၵ်းၸုမ်းၽၢႆႇ ၶုၼ်ပေႃးလꩡၼၵၶဝ် ၸင်ႇႁုပ်ႈသိမ်းဢဝ် ၶိူင်ႈယိပ်းၶိူင်ႈတိုဝ်းတင်းသဵင်ႈယဝ်ႉ။ တီႈၼႂ်းမိူင်းလူင် မိထိလႃႇၵေႃႈ ၶၢဝ်ႇငၢဝ်းတူဝ်ႈၸွတ်ႇၵႂႃႇဝႃႈ "ၸဝ်ႈၶုၼ်လူင်တူၵ်းသုမ်းယဝ်ႉ" ၼႆယူႇ သဵင်ပေႃးၼၼ်ႈပၼ်းလူင်ယူႇယဝ်ႉ။