ၸၢတ်ႈၸဝ်ႈမႁႃႇၸၼၵ/ဢွၵ်ႇၶၢဝ်းတၢင်းမိူဝ်း ၸွမ်းၸဝ်ႈႁိူဝ်း
ၼေႃႈၶမ်းၸဝ်ႈၶၢၼ်ဝႃႈ “မႄႈဢိူၺ်း လုၵ်ႈၸၢႆးတေၸွမ်းၵႂႃႇဢေႃႈ။ လုၵ်ႈၸၢႆးသမ်ႉပေႃး လႆႈဢဝ်ၶူဝ်းတၢင်ႇၼိူဝ်ႁိူဝ်းယဝ်ႉယဝ်ႈ၊ မႄႈႁဝ်းယႃႇႁၢမ်ႈသီးၶႃႈလႃႈ၊ ႁႂ်ႈၶႃႈလုၵ်ႈၸၢႆးလႆႈၸွမ်းၵႂႃႇသေၵမ်း၊ ဝၢင်းၶႂၢင်ႉပၼ်လုၵ်ႈၸၢႆးသေၵမ်းၶႃႈ” ၼႆ။ ၸင်ႇဝႆႈသႃမႄႈၸဝ်ႈယဝ်ႉၵေႃႈ လူင်းႁိူၼ်းၵႂႃႇၸူးတႃႈႁိူဝ်းသေ ၸွမ်းၵၼ်တင်း ၸဝ်ႈႁိူဝ်းၶဝ် ၸဵတ်းပၢၵ်ႇၵေႃႉ ဢွၵ်ႇၶၢဝ်းတၢင်းၵႂႃႇ မိူင်းသုဝၼ်ႇၼၽူႇမိပုၼ်ႉယူႇယဝ်ႉ။
မိူဝ်ႈဝၼ်းဢၼ်ၼေႃႇၶမ်းၸဝ်ႈ ၶီႇႁိူဝ်းဢွၵ်ႇၶၢဝ်းတၢင်းၼၼ်ႉၼင်ႇၵဝ်ႇ ဢၼ်ပဵၼ်ဢၢဝ်မၼ်း ၶုၼ်ပေႃးလၸၼၵ တီႈမိူင်းမိထိလႃႇၼၼ်ႉၵေႃႈ ပဵၼ်တၢင်းပဵၼ်ၵိၼ်းၸႂ်ဝႆႉယူႇယဝ်ႉ။ ၸွမ်းႁိူဝ်းသေ မိူဝ်ႈထိုင်မႃးၶၢဝ်းတၢင်းမီးမႃးၸဵတ်းဝၼ်း
မိူဝ်ႈယၢမ်းၼၼ် လူမ်းလႅင်ႉလူင်ၵိုင်ႉၵၢင်ႉပဝ်ႇမႃး၊ ႁွၼ်လႅင်းၼမ်ႉၵေႃႈ သုင်ႁႅင်းၼႃႇလႄႈ ပႅၼ်ႈႁိူဝ်းၶဝ် ဢဝ်တႅၵ်ႇၸတ်ႉႁၵ်းၵႂႃႇၵမ်ႈၽွင်ႈသေ ၼမ်ႉၵေႃႈၶဝ်ႈၼႂ်းႁိူဝ်းသေ ၵိူင်းၸူမ်ၵႂႃႇလွႆးလွႆး တီႈၵၢင်ၼမ်ႉပၢင်ႇလၢႆႇၼၼ်ႉယူႇယဝ်ႉ။
မိူဝ်ႈယၢမ်းၼၼ် ၵူၼ်းႁဵတ်းၵၢၼ်ႁိူဝ်းၸဵတ်းပၢၵ်ႇ ႁူႉဝႃႈၶဝ်တေဢမ်ႇလွတ်ႈလႆႈ တေလႆႈတၢႆၸူမ်ၼမ်ႉယဝ်ႉၼႆလႄႈ ဢွၼ်ၵၼ်ၵူဝ်ၵူဝ်ႁေႁေ ႁွင်ႉႁွင်ႉႁႆႈႁႆႈ။ ၵမ်ႈၽွင်ႈၵေႃႈ ၵၢဝ်ႇႁႃဢူႈႁႃမႄႈ။ ၵမ်ႈၽွင်ႈၵေႃႈ ၵၢဝ်ႇႁႃၽီ ၸွမ်းၼင်ႇၶဝ်ၼပ်ႉထိုဝ်ၼၼ်ႉသေ ဢူၼ်ဢူၼ်မေႃးမေႃး သမ်ႉပေႃးသူၼ်ႈသိၼ်းသၢၼ်ၵႂႃႇသဵင်ႈယူႇယဝ်ႉ။
ၼေႃႇၸဝ်ႈတႄႉ လႆႈႁၼ်ၽေးဢၼ်ၽႅဝ်မႃးၼၼ်ႉသေ ၸင်ႇဝူၼ်ႉဝႃႈ "ပေႃးတေၵုမ်ႇႁွင်ႉႁွင်ႉႁႆႈႁႆႈယူႇၸိူင်ႉၼၼ် တေလွတ်ႈၽေးလႆႈၵေႃႈဢမ်ႇၸႂ်ႈ။ ၽိူဝ်ႇတေၵုမ်ႇႁွင်ႉႁွင်ႉႁႆႈႁႆႈယူႇၸိူင်ႉၼၼ် တႃႉဢဝ်လွင်ႈတၢင်းၶတ်းၸႂ်သႂ်ႇႁႅင်းၵူၼ်းၸၢႆးႁဝ်းသေ ၶတ်းၸႂ်လုၺ်းၵႂႃႇၼၼ်ႉ ယင်းတေၸၢင်ႈပူၼ်ႉလႆႈၽေးၼႆႉၵွၼ်ႇဢိူဝ်ႈ” ဢဝ်သႂ်ႇၸႂ်ၸိူင်ႉၼႆသေ ဢမ်ႇႁွင်ႉဢမ်ႇႁႆႈသင်။ ႁူႉဝႃႈမၼ်းတေဢမ်ႇလွတ်ႈၽေးလႄႈ ၽီၼမ်ႉသမ်ႇမုတ်ႉတရႃႇၵေႃႈ ဢမ်ႇၵၢဝ်ႇႁႃသင်သေ မိူဝ်ႈယၢမ်းႁိူဝ်းၸမ်တေၸူမ်ၼၼ်ႉ ၼေႃႈၶမ်းၸဝ်ႈ ၸင်ႇၵိၼ်ထေႃးပၢတ်ႇလေႃးၵိူဝ်ဝၢၼ်ဝႆႉ ႁႂ်ႈဢိမ်ႇဢိမ်ႇယဝ်ႉ။ ၸင်ႇဢဝ်ၽႅၼ်ႇဢၼ်ၶႅမ်ႉၶႅမ်ႉသွင်ၽိုၼ် ၸုပ်ႉၼမ်ႉမၼ်းသေ ဢဝ်ႁတ်ႉတူဝ်မၼ်းၵႅၼ်ႇၵႅၼ်ႇ ၼင်ႇႁိုဝ် ၼမ်ႉပေႃးတေဢမ်ႇၶဝ်ႈလႆႈၼၼ်ႉယဝ်ႈ။ ဝၢႆးၼၼ်ႉ ၶိုၼ်ႈလၵ်းသဝ်ႁိူဝ်းၵႂႃႇ တေပၢႆၸိၵ်းသဝ်ၼၼ်ႉယူႇယဝ်ႈ။
ၵူၼ်းႁဵတ်းၵၢၼ်ႁိူဝ်းၸဵတ်းပၢၵ်ႇတႄႉၸမ်း ဢမ်ႇဢဝ်တင်းလွင်ႈၶတ်းၸႂ်သႂ်ႇႁႅင်းၵူၼ်းၸၢႆးသင်သေ ၽွင်းမိူဝ်ႈႁွင်ႉႁႆႈယူႇၼၼ်ႉ လႆႈပဵၼ်ယိူဝ်ႇပႃ၊ တဝ်ႈ၊ ငိူၵ်ႈၶဝ်ၵႂႃႇမူတ်းယဝ်ႉ။ ႁိမ်းႁွမ်းႁိူဝ်းၶဝ် ယၢၼ်မွၵ်ႈပၢၵ်ႇသီႇသိပ်းသွၵ်ႇၼၼ်ႉ သမ်ႉပေႃးပဵၼ်လိူတ်ႈလႅင်ၵႂႃႇသဵင်ႈယူႇယဝ်ႉ။
ၼေႃႇၶၸဝ်ႈၸင်ႇၶိုၼ်ႈမိူဝ်းၸုၵ်း တီႈၼိူဝ်ပၢႆလၵ်းသဝ်ႁိူဝ်းၶဝ်ၼၼ်ႉသေ လွမ်လၢမ်းမုင်ႈတူၺ်းဝႃႈ "ၼႃႈတၢင်းၼႆႉ မီးမိူင်းမိထိလႃႇဢိူဝ်ႈ” ဝူၼ်ႉၼင်ႇၼႆယဝ်ႉၵေႃႈ ၸင်ႇဢဝ်ဢဵၼ်ဢဝ်ႁႅင်းသေ ဝႅၼ်တူၵ်းၵႂႃႇၼႂ်းၼမ်ႉသမုတ်ႉတရႃႇၼၼ်ႉယဝ်ႉ။ ၵွပ်ႈၼေႃႇၸဝ်ႈ မီးဢဵၼ်ႁႅင်းယႂ်ႇတဵမ်ထူၼ်ႈလႄႈ တူၵ်းၵႂႃႇတီႈၼမ်ႉ ဢၼ်ယၢၼ်ႁိူၼ်းမွၵ်ႈ ပၢၵ်ႇသီႇသိပ်းသွၵ်ႇပၢႆပၢႆသေ လွတ်ႈပဵၼ်ယိူဝ်ႇတၢင်းၵိၼ်ပႃ၊ တဝ်ႇ၊ ငိူၵ်ႈၶဝ်ၵႂႃႇယူႇယဝ်ႉ။ ဝၼ်းဢၼ်ႁိူဝ်းၼေႃႇၶမ်းၸဝ်ႈ ၸူမ်ၼၼ်ႉၵူၺ်းၼင်ႇၵဝ်ႇ ဢၢဝ်ၶဝ်ၶုၼ်လူင်ပေႃးလၸၼၵ ဢၼ်မီးတီႈမိူင်းမိထိလႃႇၼၼ်ႉၵေႃႈ သဵင်ႈၵၢမ်ႇသုတ်းမုၼ်ၵႂႃႇယူႇယဝ်ႉ။
ၼေႃႇၸဝ်ႈၼႆႉ ဢဝ်တင်းဢဵၼ်ႁႅင်းၼမ်ႉၸႂ်တဵမ်ထူၼ်ႈသေ လုၺ်းၶၢမ်ႈႁွၼ်လႅင်းၼမ်ႉ ပေႃးၸူမ်ၽုတ်းၸူမ်ၽုတ်းလူင်ယူႇ။ ႁဵတ်းၼၼ် ဝၼ်းၼိုင်ႈယဝ်ႉဝၼ်းၼိုင်ႈ တေႃႇပေႃးမႃးၸဵတ်းဝၼ်း ဢမ်ႇလိုဝ်ႈဢမ်ႇသဝ်းသေလႄႈ ဝူၼ်ႉသႂ်ႇၸႂ်ဝႃႈ “ဢၢၼ်းႁႂ်ႈမၼ်းႁွတ်ႈ တီႈၶႂ်ႈၽႅဝ်ၼၼ်ႉလႆႈယူႇ” ၼႆယဝ်ႉ။ ဢၼ်လႆႈလုၺ်းမႃး ၼႂ်းၶၢဝ်းတၢင်းၸဵတ်းဝၼ်းၸဵတ်းၶိုၼ်းၼၼ်ႉ တၢင်းၵိၼ်တၢင်းယႅမ်ႉတႄႇၵႂႃႇ ၵူႈပိူင်ႈၵူႈလွင်ႈလႆႈမႃးၸူးႁိမ်းၼေႃႇၸဝ်ႈသေတၵေႃႈ ပေႃးဢမ်ႇၸႂ်ႈၶိင်ႇၶၢဝ်းၵိၼ်ဢမ်ႇၵိၼ်။ ၵွပ်ႈဝႃႈၵမ်သိၼ်ဢုပေႃးသထဝႆႉၼၼ်ႉယဝ်ႈ။ မိူဝ်ႈၶၢဝ်းဝၢႆးဝၼ်း ၵူၺ်းဢဝ်ၼမ်ႉၵိူဝ်ၸဵမ်းပၢင်ႇလၢႆႇၼၼ်ႉ သုၵ်ႈလၢင်ႉသူပ်းသေ ပႂ်ႉသိၼ်ၵႂႃႇယူႇယဝ်ႉ။