ၸၢတ်ႈၸဝ်ႈမႁႃႇၸၼၵ/တႃႇၶိုၼ်းသိုပ်ႇပုတ်ႈတၢင် ဢင်ႈသဝ်းထင်ပေႃႈ
မိူဝ်ႈၼေႃႇၸဝ်ႈ ထိုင်ၸူဝ်ႈၶူပ်ႇသိပ်းႁူၵ်းလိူဝ်မႃး မီးတူဝ်ၶိင်းၶိူင်ႇလီ တႃႇပိုင်ႈဢိင်ႁင်းတူဝ်ၵဝ်ႇၵေႃႈ ပေႉတူဝ်ယဝ်ႉလႄႈ မၼ်းၸင်ႇဝူၼ်ႉဝႃႈ "ၵဝ်တေဢဝ်လွင်ႈတၢင်းၶတ်းၸႂ်သႂ်ႇႁႅင်းသေ ၼႄလွင်ႈၵတ်ႉၶႅၼ်ႇၵူၼ်းၸၢႆး၊ ၶိုၼ်းသိုပ်ႇတႅၼ်းတၢင် ဢဝ်ၶိုၼ်းတီႈယူႇၸဝ်ႈပေႃႈႁဝ်း တီႈမိူင်းလူင်မိတ်ႉထိလႃႇၼၼ်ႉၵွၼ်ႇ" ၼႆယဝ်ႉ။ မၼ်းၸင်ႇၵႂႃႇၸူးတီႈမႄႈမၼ်းသေ ထၢမ်ဝႃႈ "မႄႈၸဝ်ႈဢိူၺ်း ၶူဝ်းၶွင်ငိုၼ်းၶမ်း တီႈၸဝ်ႈမႄႈႁဝ်း ဢမ်ႇမီးသေဢိတ်းၶႃႈႁႃႉ။ ပေႃးဢမ်ႇမီးၵေႃႈ လုၵ်ႈၸၢႆးတေဢွၵ်ႇၵႂႃႇၵႃႉ သိုဝ်ႉသိုဝ်ႉၶၢႆၶၢႆႁွမ်ငိုၼ်းသေ ပေႃးဝႃႈလႆႈၼမ်မႃး လုၵ်ႈၸၢႆးတေသိမ်းဢဝ်ၶိုၼ်း မိူင်းလူင်မိတ်ႉထိလႃႇ ဢၼ်ပဵၼ်ဢွင်ႈတီႈ ပေႃးႁဝ်းၼၼ်ႉၶႃႈဢေႃႈ" ၼႆယူႇယဝ်ႉ။
မႄႈမၼ်းၸင်ႇဝႃႈ “လုၵ်ႈၸၢႆးႁၵ်ႉဢိူၺ်း မႄႈလႆႈဢွၵ်ႇမႃး မိူင်းလူင်မိထိလႃႇ လူၺ်ႈတၢင်းယၢပ်ႇယဵၼ်းၶၢၼ်ၸႂ်ဢိူဝ်ႈ။ ဢမ်ႇၸႂ်ႈဝႃႈဢွၵ်ႇမႃးတိၼ်လၢႆမိုဝ်းပဝ်ႇ။ ၸဝ်ႈမႄႈဢဝ်မႃး ရတၼႃႇ ဢၼ်ၵႃႈၶၼ်မၼ်းယႂ်ႇၼမ် ဢၼ်ပႃးလႆႈမဝ်ငၢႆႈၸႂ်ၼၼ်ႉဢိူဝ်ႈ။ တီႈၼႂ်းမိုဝ်းၸဝ်ႈမႄႈၼႆႉ မီးဝႆႉရတၼႃႇၵႅဝ်ႈလီလုၵ်ႈၼိုင်ႈ၊ သႅင်ၶဵဝ်လုၵ်ႈၼိုင်ႈ၊ သႅင်ၽိူၵ်ႇလီလုၵ်ႈၼိုင်ႈယဝ်ႉ။ ၼႂ်းၵႃႈ ၵႅဝ်ႈသႅင်ရတၼႃႇလီသၢမ်လုၵ်ႈၼၼ်ႉ လုၵ်ႈၼိုင်ႈ လႄႈ လုၵ်ႈၼိုင်ႈ ၵႃႈၶၼ်မၼ်း မီးၵႃႈႁိုဝ်၊ ၵိုင်ႇထိူၵ်ႈၵႃႈႁိုဝ်ၼႆ ၵူၼ်းတႅပ်းတတ်းၵႃႈၶၼ်သႅင်ၶဝ် ယင်းဢမ်ႇလၢတ်ႈလႆႈ၊ ဢမ်ႇၸၢင်ႈတႅပ်းတတ်းလႆႈ။ ရတၼႃႇလီ သၢမ်လုၵ်ႈၼႆႉ ဢမ်ႇၸႂ်ႈဝႃႈ ပေႃႇမႃး၊ မီးမႃးၸူဝ်ႈပၢၼ်ပေႃႈသူၼႆႉၵူၺ်း။ မၼ်းပဵၼ် ရတၼႃႇသႅင်လီ ဢၼ်ၵိုၵ်းႁၢင်ႈ၊ ၵိုၵ်းႁေႃသေ မီးမႃး ၸဵမ်မိူဝ်ႈပၢၼ်ပူႇ၊ ပၢၼ်မွၼ်ႇသူၼၼ်ႉယဝ်ႉ။ ၶဝ်သၢမ်လုၵ်ႈၼၼ်ႉ လုၵ်ႈလႂ်သေဢမ်ႇဝႃႈ ၵႃႈၶၼ်မၼ်းၵိုၵ်ႇထိူၵ်ႈယႂ်ႇသေ မိူင်းၼိုင်ႈမိူင်း ယင်းဢမ်ႇၵႃးၵွၼ်ႇယဝ်ႉ။ ၵွပ်ႈၼၼ်လႄႈ လုၵ်ႈၸၢႆးၵဝ် ဢဝ်သႅင်ၼႆႉ လုၵ်ႈၼိုင်ႈသေ ၵႂႃႇသိမ်းဢဝ်ၶိုၼ်း မိူင်းမိထိလႃႇၼၼ်ႉတႃႉ။ ဢမ်ႇတၢပ်ႈလူဝ်ႇၵႂႃႇၵႃႉသိုဝ်ႉၶၢႆသင်ယဝ်ႉ“ ၼႆယူႇ။ ပေႃးၼေႃႇၶမ်းၸဝ်ႈ လႆႈငိၼ်းၵႂၢမ်းတီႈမႄႈမၼ်းယဝ်ႉၵေႃႈ ၸင်ႇဝႃႈ “ၸဝ်ႈမႄႈဢိူၺ်း မိူဝ်ႈလဵဝ်ၼႆႉ ၶူဝ်းၶွင်ဢၼ်မီးၼႂ်းမိုဝ်းၸဝ်ႈမႄႈၼၼ်ႉ ၽႄပၼ်လုၵ်ႈၸၢႆးၶိုင်ႈၼိုင်ႈၶႃႈလႄႈ၊ လုၵ်ႈၸၢႆးတေဢဝ်ၶိုင်ႈၼိုင်ႈသေ ၵႂႃႇၵႃႉတၢင်းမိူင်းသုဝၼ်ႇၼၽူႇမိသေ ႁဵတ်းႁႂ်ႈမၼ်းၽႄႈတိုၼ်းမႃးထႅင်ႈၼမ်ၼမ်ဢေႃႈ။ ပေႃးလႆႈမႃး ၶူဝ်းၶွင်တင်းၼမ်ၼႆ လုၵ်ႈၸၢႆးတေၵႂႃႇသိမ်းဢဝ်ၶိုၼ်း မိူင်းမိထိလႃႇ ႁႂ်ႈလႆႈဢေႃႈ“ ၼႆယဝ်ႉ။
မႄႈၸဝ်ႈၵေႃႈ ၸွမ်းၼင်ႇလုၵ်ႈၸၢႆးယွၼ်းၼၼ်ႉ ၽႄပၼ်ၶိုင်ႈၼိုင်ႈယူႇယဝ်ႉ။ ၼေႃႇၶမ်းၸဝ်ႈ ၸင်ႇဢဝ်ၶူဝ်းၶွင်ၼၼ်ႉ ႁေႃႇသိမ်းလီယဝ်ႉၵေႃႈ ၵႂႃႇထၢမ်ႁႃတႃႈႁိူဝ်းသၢင်းၽေႃး ဢၼ်တေၵႂႃႇတၢင်း မိူင်းသုဝၼၽူႇမိၼၼ်ႉယဝ်ႈ။ ပေႃးလႆႈႁူႉယဝ်ႉၵေႃႈ ၸဝ်ႈႁိူဝ်းၶဝ် ၸင်ႇဝႃႈႁင်းမၼ်းဝႃႈ "ၵႂႃႇၸွမ်းႁိူဝ်းႁဝ်းၼႆႉလႄႈ” ၼႆယူႇယဝ်ႉ။ ၼေႃႇၶမ်းၸဝ်ႈၵေႃႈ ဢဝ်ထူင်ၶူဝ်းတၢင်ႇၼိူဝ်ႁိူဝ်းယဝ်ႉသေ ၶိုၼ်းမႃးဝႆႈသႃ ယွၼ်းၶႂၢင်ႉတီႈ ၸဝ်ႈမႄႈမၼ်းဝႃႈ "ၸဝ်ႈမႄႈဢိူၺ်း တေႃႈလဵဝ် ၶႃႈလုၵ်ႈၸၢႆးတေၵႂႃႇၸွမ်းၵၼ် တင်းၵူၼ်းၵႃႉၸဝ်ႈႁိူဝ်းၶဝ် ၵႂႃႇမိူင်းသုဝၼ်ႇၼၽူႇမိပုၼ်ႉဢေႃႈ။ ၸဝ်ႈမႄႈႁဝ်း ၶႅၼ်းတေႃႈဝၢင်းၶႂၢင်ႉပၼ် ၶႃႈလုၵ်ႈၸၢႆးသေၵမ်းၶႃႈ"ၼႆယူႇယဝ်ႉ။
မႄႈမၼ်းၸင်ႇၶိုၼ်းဝႃႈ “လုၵ်ႈႁၵ်ႉဢိူၺ်း ၶၢဝ်းတၢင်းၼမ်ႉသမုတ်ႉတရႃႇဢၼ်ဝႃႈၼၼ်ႉ မၼ်းမီးၽေးၶဵၼ်ၼမ်တႄႉတႄႉ၊ ၵူၼ်းၵႃႉၸဝ်ႈႁိူဝ်းၶဝ် ဢမ်ႇလႃႈလီႈၵႂႃႇႁွတ်ႈလႆႈ တီႈဢၼ်ၶဝ်ၶႂ်ႈႁွတ်ႈၼၼ်ႉၵူၺ်း။ ယွၼ်ႉၼၼ်လႄႈ လုၵ်ႈၸၢႆးၵဝ် ယႃႇပေၶႆႈၵႂႃႇၸွမ်းတၢင်းၼမ်ႉသမုတ်ႉတရႃႇၼၼ်ႉလႃႈ၊ တေလႆႈၶူဝ်းၶွင်ငိုၼ်းၶမ်း ၼမ်ၵႃႈႁိုဝ်ၵေႃႈယဝ်ႉ ယႃႇပေၵႂႃႇ၊ မိူဝ်ႈလဵဝ်ၼႆႉ ၶူဝ်းၶွင်ရတၼႃႇလီလီ ဢၼ်မီးဝႆႉယူႇတီႈ မႄႈၼႆႉၵူၺ်းၵေႃႈ ပေႃးၸႂ်ႉတႃႇတေသိမ်းလႆႈ မိူင်းမိထိလႃႇတင်းမိူင်းၵူၺ်းဢမ်ႇၵႃး ပႃးသိုဝ်ႉလႅၵ်ႈဢဝ်လႆးမိူင်းတင်းၼမ်ၵွၼ်ႇယဝ်ႉ၊ ၵွပ်ႈၼၼ်လႄႈ လုၵ်ႈၸၢႆးဢဝ်ၶူဝ်းၶွင် ဢၼ်မီးဝႆႉယူႇ ယၢမ်းလဵဝ်သေ ၵႂႃႇႁုပ်ႈသိမ်းဢဝ်ၶိုၼ်း ဢွင်ႈတီႈယူႇပေႃႈသူ မိူင်းမိထိလႃႇၼၼ်ႉတႃႉ” ဝႃႈၼႆသေ ႁၢမ်ႈသီးၼေႃႇၶမ်းၸဝ်ႈ ၼင်ႇႁိုဝ်မၼ်းပေႃး တေဢမ်ႇၶႂ်ႈၵႂႃႇ တၢင်းၼမ်ႉသမုတ်ႉတရႃႇၼၼ်ႉယူႇယဝ်ႉ။