ၸၢတ်ႈၸဝ်ႈမႁႃႇၸၼၵ/ဢွၵ်ႇလႄႇတီႈသူၼ်သိူဝ်း

မိူဝ်ႈယၢမ်းၼၼ် ၼႂ်းဝၼ်းၼိုင်ႈ ၵူၼ်းႁဵတ်းၵၢၼ်လုမ်းလႃးသူၼ်မွၵ်ႇၼႆႉ ၸင်ႇဢဝ်မၢၵ်ႇဝၢၵ်ႈတၢင်းၵိၼ်သႅၼ်ႈသႂ် ဢၼ်ဢွၵ်ႇတီႈၼႂ်းသူၼ်ၼၼ်ႉ လဵၵ်ႉလဵၵ်ႉယႂ်ႇယႂ်ႇ ဢၼ်မီးၼမ်ႉၸဵမ်းဝၢၼ်သိင်ႉလီလႂ်၊ မွၵ်ႇဢၼ်မီး ဢၢႆႁွမ်ႁိုၼ်းႁၢင်ႈလီ ႁၢင်ႈသီလၢၵ်ႇလၢႆး ၵူႈပိူင်ပိူင်လႂ် သၢၵ်ႈသူင်ႇထိုင် ၸဝ်ႈၶုၼ်လူင် မႁႃႇၸၼၵယဝ်ႉ။ ပေႃးဝႃႈၸဝ်ႈၶုၼ်လူင်မႁႃႇၸၼၵ လႆႈႁၼ်မွၵ်ႇႁၢင်ႈလီ၊ မၢၵ်ႇဢၼ်လီၵိၼ်သႅၼ်ႈသႂ်ၸိူဝ်းၼၼ်ႉယဝ်ႉၵေႃႈ ပဵၼ်ဢၼ်ယိၼ်းၸူမ်းလႆႈၸႂ်ၼႃႇလႄႈ ၸင်ႇပၼ် သူးလၢပ်ႈငိုၼ်းၶမ်းတီႈမၼ်း ပေႃးၵိုင်ႇတၢၼ်ႇယဝ်ႈ။ ၸင်ႇသမ်ႉပူဝ်ဝႃႈ "ၸၢႆးပႂ်ႉသူၼ်မွၵ်ႇဢိူၺ်း ၵဝ်ၸဝ်ႈၶႂ်ႈၵႂႃႇလႄႇတူၺ်းသူၼ်ႇမွၵ်ႇဢိူဝ်ႈ။ ပေႃးထိုင်မိူဝ်ႈၽုၵ်ႈမႃး၊ မႂ်းႁၢင်ႈႁႅၼ်းဝႆႉတီႈသူၼ်မွၵ်ႇၼၼ်ႉ ႁႂ်ႈတူဝ်တၼ်းထႃႈဝႆႉတႃႉ” ၼႆယူႇယဝ်ႉ။ ၸဝ်ႈသူၼ်မွၵ်ႇၵေႃႈ ၸင်ႇမိူဝ်းႁၢင်ႈႁႅၼ်းၶပ်းၶိုင်ဝႆႉထႃႈ ၸွမ်းၼင်ႇၸဝ်ႈၶုၼ်လူင် သင်ႇလၢတ်ႈဝႆႉၼၼ်ႉယဝ်ႉ။ ဝၢႆးၼၼ်ႉ ၸင်ႇၸႂ်ႉၵေႃႉၼိုင်ႈ မိူဝ်းတၢင်ႇလဝ်ႈတီႈၸဝ်ႈၶုၼ်ယဝ်ႉ။ ထိုင်ၵၢင်ၼႂ်ၽႃႉပၢင်ႇသႂ်လႅင်းမႃး ၶုၼ်လူင်မႁႃႇၸၼၵ ၸင်ႇၶီႇၸၢင်ႉၽိူၵ်ႇ ဢၼ်ဢဝ်ၵႅဝ်ႈသႅင်ငိုၼ်းၶမ်း ႁၢင်ႈၶိူင်ႈဝႆႉၼၼ်ႉသေ ႁွင်ႉဢဝ် သိုၵ်းႁၢၼ်ၶဝ်လႄႈ ၵူၼ်းလုမ်းလႃး ပဵၼ်မူႇပဵၼ်ၽုင် လွမ်ႉၶႅပ်ႇၶၢင်ႈသေ ဢွၵ်ႇၶၢဝ်းတၢင်းၵႂႃႇတီႈသူၼ်သိူဝ်းယဝ်ႉ။ တီႈၼႃႈတူဝၢင်းၶဝ်ႈသူၼ်မွၵ်ႇၼၼ်ႉၸမ်ႉ မီးဝႆႉတူၼ်ႈမၢၵ်ႇမူင်ႈသွင်တူၼ်ႈ၊ တူၼ်ႈၼိုင်ႈၸမ်း မႆမၼ်းၵေႃႈၶဵဝ်ၸမ်ႉလီ သမ်ႉပေႃးမိူၼ်င်ႇ ဢဝ်ၼမ်ႉသႅင်ၶဵဝ်တႃးဝႆႉသေ ပဵၼ်ဢၼ်လီလူလီတူၺ်း သပ်းပၢႆႇဝႆႉယူႇတႄႉယဝ်ႈ။ ၵူၺ်းၵႃႈ တူၼ်ႈၼၼ်ႉဢမ်ႇမီးမၢၵ်ႇ။ တူၼ်ႈၼိုင်ႈၸမ်း မၢၵ်ႇပေႃးတဵမ်တူၼ်ႈဝႆႉၵႂႃႇၵူႈၵိင်ႇသေ သၢႆဝၢၼ်မၼ်းၵေႃႈ ၸဵမ်းသိင်ႉလီ ပေႃးၵတ်းငႅၼ်းငႅၼ်းယူႇယဝ်ႉ။ ဢဝ်မၢၵ်ႇမူင်ႈတူၼ်ႈၼႆႉ မႃးသၢၵ်ႈထိုင်ၸဝ်ႈၶုၼ်ၶဝ်ဢွၼ်တၢင်းသေယဝ်ႉ။ ၵူၼ်းတၢင်ႇၵေႃႉ ၸင်ႇတေလႆႈဢဝ်ၵိၼ်ယဝ်ႉ။ မိူဝ်ႈယၢမ်းၶဝ်ၽႅဝ်မႃးၼၼ်ႉ ၵွပ်ႈဝႃႈပႆႇလႆႈဢဝ်မၢၵ်ႇမူင်ႈၼၼ်ႉ သၢၵ်ႈဢၢပ်ႈၵၢပ်ႈထိုင်ၸဝ်ႈၶုၼ်လႄႈ ၽႂ်ၵေႃႈ ဢမ်ႇႁတ်းပိတ်းဢဝ်ၵိၼ်၊ ၶုၼ်လူင်မႁႃႇၸၼၵ ၸင်ႇလႆႈႁၼ် တူၼ်ႈမၢၵ်ႇမူင်ႈၼၼ်ႉ တူၺ်းမၢၵ်ႇမၼ်းပူင်းသမ်ႉပေႃးတဵမ်ၵႂႃႇၵူႈၵိင်ႇဝႆႉလႄႈ ၸင်ႇဝႃႈ "ၵဝ်တေၵိၼ်ၸၢမ်းတူၺ်း သၢႆဝၢၼ်မၢၵ်ႇမူင်ႈၼၼ်ႉၵွၼ်ႇ” ၼႆ။ ၸင်ႇၸႂ်ႉႁႂ်ႈဢဝ်ၸၢင်ႉမၼ်း ၵႂႃႇၸမ်ႁိမ်း ငဝ်ႈတူၼ်ႈမၢၵ်ႇမူင်ႈၼၼ်ႉသေ မိတ်းၵိၼ်ၸၢမ်းတူၺ်းလုၵ်ႈၼိုင်ႈယူႇယဝ်ႉ။ မၢၵ်ႇမူင်ႈၼၼ်ႉ တေႃႉတႄႉဢဝ်မႃးတၢင်ႇသႂ်ႇၼိူဝ်လိၼ်ႉၵူၺ်းၵေႃႈ သၢႆဝၢၼ်မၼ်း ၸဵမ်းသိင်ႉၵတ်းလီငႅၼ်းငႅၼ်း ပေႃးတိတ်းၸႂ်လႄႈ ၶုၼ်မႁႃႇၸၼၵဢဝ်ၸႂ်ၸပ်းမၢၵ်ႇမူင်ႈၼၼ်ႉၵႂႃႇသေ ၸင်ႇဝူၼ်ႉၼႂ်းၸႂ်ဝႃႈ "ၵဝ်ႇတေၶဝ်ႈလႄႇၸွၼ်ႇတူၺ်း တီႈၼႂ်းသူၼ်မွၵ်ႇဢွၼ်တၢင်းၵွၼ်ႇ။ ပေႃးၶိုၼ်းဢွၵ်ႇသူၼ်မႃး ၸင်ႇၵွႆႈၶိုၼ်းမႃးၵိၼ် ႁႂ်ႈပေႃးဢိမ်ႇဢိမ်ႇၵွၼ်ႇ” ၼႆသေ ၶဝ်ႈၵႂႃႇၼႂ်းသူၼ်မွၵ်ႇၼၼ်ႉယူႇယဝ်ႉ။

ဢၼ်ပဵၼ်ၸဝ်ႈၵႅမ်မိူင်းၵေႃႈ ဢဝ်ၵိၼ်မၢၵ်ႇမူင်ႈၼၼ်ႉ လုၵ်ႈၼိုင်ႈ ၸိူင်ႉၼင်ႇၶုၼ်မႁႃႇၸၼၵၼၼ်ႉသေ ၶဝ်ႈၵႂႃႇၸွမ်းၽၢႆႇလင်မၼ်းယူႇယဝ်ႉ။ ဝၢႆးသေ ၶူၼ်လူင်မႁႃႇၸၼၵ လႄႈ ၸဝ်ႈၵႅမ်မိူင်းၶဝ် ၵိၼ်ယဝ်ႉ ၸိူဝ်းပဵၼ်ၽွင်းမိူင်း၊ ၸွမ်သိုၵ်း၊ သိုၵ်းႁၢၼ် ပရိသၢတ်ႈၶဝ်တႄႇၵႂႃႇၸိူဝ်းၼၼ်ႉၵေႃႈဝႃႈ "မၢၵ်ႇမူင်ႈၼႆႉ သမ်ႉပေႃးလႆႈဢဝ်ၵႂႃႇသၢၵ်ႈထိုင် ၸဝ်ႈၶုၼ်လူင်ယဝ်ႉယဝ်ႈ။ ၶႂ်ႈၵိၼ်ၵႃႈႁိုဝ်ၵေႃႈ ၵမ်ႈၸႂ်ဝႃႈလႃႈ” ဝႃႈၼႆလႄႈ ဢွၼ်ၵၼ်ႁိမ်ပိိတ်းၵိၼ် မၢၵ်ႇမူင်ႈၼၼ်ႉယူႇယဝ်ႉ။ ၵွပ်ႈပိူဝ်ႈၵူၼ်းၼမ်လိူဝ်မၢၵ်ႇမူင်ႈလႄႈ ဢဝ်မၢၵ်ႇမူတ်းၵႂႃႇသေ ၸိူဝ်းပဵၼ် ၵူၼ်းထိင်းၸၢင်ႉ၊ ၵူၼ်းထိင်းမႃႉ၊ ၵူၼ်းထိင်းပႄႉၶဝ်တႄႇၵႂႃႇ မူႇၸုမ်းၵူၼ်းၸၼ်ႉတႅမ်ႇၶဝ် ၸိူဝ်းမႃးၽၢႆႇလင်ၼၼ်ႉ ဢမ်ႇတၼ်းလႆႈၵိၼ်။ ၵွပ်ႈၼၼ်လႄႈ ၸွမ်းၼင်ႇသၽႃႇဝၾိင်ႈထုင်း ၵူၼ်းၸႂ်ႁၢႆႉ ၵူၼ်းၸၼ်ႉတႅမ်ႇ ဢမ်ႇလၵ်းလႅမ်ၶဝ်မီးၼၼ်ႉ ၶဝ်ဢွၼ်ၵၼ် ဢွၵ်ႇတေႃးသၸႂ်လမ်သေ ဢဝ်မၢၵ်ႇၵွၼ်ႈႁိၼ်၊ ဢဝ်ၶွၼ်ႉ၊ ဢဝ်မႆႉတႄႇၵႂႃႇ ၽတ်ႉၵိင်ႇၶႃႈမၢၵ်ႇတူၼ်ႈၼၼ်ႉလႄႈ မႂ်မၼ်းပေႃးဢမ်ႇၵိုတ်းသင် တေႃႉတႄႉၵိုတ်းၵိင်ႇမၼ်းၵူၺ်းယဝ်ႉ။

ၶုၼ်လူင် မႁႃႇၸၼၵၵေႃႈ ၸွၼ်ႇလႄႇလဵပ်ႈတူၺ်း ၼႂ်းသူၼ်မွၵ်ႇ၊ သူၼ်သိူဝ်းၼၼ်ႉ ဢိမ်ႇတိူၵ်ႈၼင်ႇၵၢင်ၸႂ်သေ ၸမ်ထိုင်ၶၢဝ်းယၢမ်းၶိုၼ်းပွၵ်ႈမိူဝ်းၸူး ႁၢင်ႈႁေႃယဝ်ႉလႄႈ ၸင်ႇဢွၵ်ႇသူၼ်မွၵ်ႇမႃးယဝ်ႈ။ မိူဝ်ႈထိုင်တူၼ်ႈမၢၵ်ႇမူင်ႈ ဢၼ်ဢဵၼ်းဝႃႈ တေၵိၼ်မၢၵ်ႇမၼ်းၼႆၼၼ်ႉ လႆႈႁၼ် ပိူင်ပဵၼ်တူၼ်ႈမၢၵ်ႇမူင်ႈၼၼ်ႉလႄႈ ၸင်ႇထၢမ်ၽွင်းမိူင်းၶဝ်ဝႃႈ "ၽွင်းမိူင်းၶဝ်ဢိူၺ်း တူၼ်ႈမၢၵ်ႇမူင်ႈၼႆႉ ၵွပ်ႈသင်လႄႈ ဢမ်ႇမိူၼ်မိူဝ်ႈၵဝ်တႄႇၶဝ်ႈၵႂႃႇ ၼႂ်းသူၼ်မွၵ်ႇၼၼ်ႉၼေႃး။ ႁဵတ်းႁိုဝ်လႄႈ လႆႈပဵၼ်ၵႂႃႇၸိူင်ႉၼင်ႇၼႆၼေႃး” ၼႆယူႇယဝ်ႉ။

ၼေႃႇၶမ်းၸဝ်ႈ လႆႈငိၼ်းၶေႃႈၵႂၢမ်း ဢၼ်ၽွင်းမိူင်းၶဝ်သပ်းလႅင်းၼႄ လွင်ႈတူၼ်ႈမၢၵ်ႇမူင်ႈ လႆႈပဵၼ်ၵႂႃႇၸိူင်ႉၼင်ႇၼၼ်ယဝ်ႉၵေႃႈ ပဵၼ်ဢၼ်တူၵ်းၸႂ် လႆႈသင်ႇဝေႇၵၵႂႃႇတႄႉယူႇယဝ်ႈ။ မၼ်းၸင်ႇၶိုၼ်းလၢတ်ႈဝႃႈ "တူၼ်ႈမၢၵ်ႇမူင်ႈတူၼ်ႈၼႆႉၸမ်ႉ ၵွပ်ႈပိူဝ်ႈမၼ်းဢမ်ႇမီးမၢၵ်ႇ လႄႈ ၵိင်ႇၶႃႇမႂ်းၵေႃႈၶဵဝ်ၸမ်ႉလီ ပဵၼ်ဢၼ်လီယဵမ်လီတူၺ်းဝႆႉယူႇယဝ်ႉ။ ထႅင်ႈတူၼ်ႈၼႆႉသမ်ႉ ၵွပ်ႈမၼ်းမီးမၢၵ်ႇပူင်းလီသေ သမ်ႉလႆႈ ၵပ်းသိုပ်ႇၵၼ် တင်းၵူၼ်းမိူၵ်ႈမႂ်ႈမေႃယႃႉၵဝ်းၶဝ်လႄႈ ဢမ်ႇယူႇသဝ်းၵိုတ်းလႆႈ မိူၼ်ပၵ်းၵဝ်ႇပိူင်ၵဝ်ႇသေ ၸင်ႇလႆႈႁၵ်းၵၢၼ်ႉ၊ လူႉလႅဝ်ၼၼ်ႉယဝ်ႉ။ တေႃႈတေမိူၼ်ၼႆ ဢၼ်ပဵၼ် ၸေးၸိမ်ႇၶူဝ်းၶွင်ငိုၼ်းၶမ်း ဝၢၼ်ႈမိူင်းတိူင်းၵႃးၸိူဝ်းၼၼ်ႉၵေႃႈ ၵွပ်ႈလႆႈၵပ်းသိုပ်ႇၵၼ်ဝႆႉ တင်းၽူႈၶဵၼ်ၶဝ်လႄႈ မိူၼ်ၵၼ်တင်းတူၼ်ႈမၢၵ်ႇမူင်ႈ ဢၼ်မီးမၢၵ်ႇပူင်းလီၼႆႉယဝ်ႉ။ ၸေးၸိမ်ႇတၢင်းၵတ်းယဵၼ် ဢၼ်ဢမ်ႇလႆႈၵပ်းသိုပ်ႇၵၼ်တင်း ၽူႈၶဵၼ်ၶဝ်တႄႉၸမ်း ပဵၼ်ၽဝၸဝ်ႈရႁၢၼ်း ရသေၶဝ်ၸဝ်ႈသေ မၼ်းမိူၼ်ၵၼ်တင်း တူၼ်ႈမၢၵ်ႇမူင်ႈ ဢၼ်ဢမ်ႇမီးမၢၵ်ႇ၊ ဢၼ်မႂ်မၼ်းၶဵဝ်ၸမ်ႉႁၢင်ႈလီသေလႄႈ ၵိုတ်းဝႆႉယူႇၼႆႉယဝ်ႉ။ ၵူၼ်းၵေႃႉဢၼ် ပိုင်ႈဢိင်ၶူဝ်းၶွင်ငိုၼ်းၶမ်း လႄႈ လုၵ်ႈလၢင်းၼၢင်းမေး ဢိၵ်ႇပႃးပီႈၼွင်ႉၸိူဝ်ႉၶိူဝ်းၶဝ်ၸိူဝ်းၼၼ်ႉတႄႉ မီးၸႂ်တိတ်းၸႂ်ႁွႆႈသေ လႆႈထူပ်းၽေးၶဵၼ်ယဝ်ႈ။ ၵေႃႉဢၼ်ဢမ်ႇမီးၸႂ်တိတ်းၸႂ်ႁွႆႈ တီႈၼိူဝ်ၶူဝ်းၶွင်ငိုၼ်းၶမ်း လုၵ်ႈလၢင်းၼၢင်းမေး ပီႈၼွင်ႉၸိူဝ်ႉၶိူဝ်းတႄႉၸမ်း ဢမ်ႇမီးၽေးၶဵၼ်သင်။

ယွၼ်ႉၵွပ်ႈၸိူင်ႉၼႆႉလႄႈ ၼႂ်းတူၼ်ႈမၢၵ်ႇမူင်ႈသွင်တူၼ်ႈၼႆႉ ၵဝ်တေဢဝ်တူၼ်ႈမၢၵ်ႇမူင်ႈ ဢၼ်ဢမ်ႇမီးမၢၵ်ႇၼၼ်ႉ ႁဵတ်းပဵၼ်ပိူင်တႅၵ်ႈ၊ ပိူင်သွၼ်ၵဝ်သေ တေၸုၼ်ႉပႅတ်ႈ လွင်ႈၸႂ်တိတ်းၸႂ်ႁွႆႈ ၵူႈလွင်ႈလွင်ႈသေယဝ်ႉ တေၵႂႃႇႁဵတ်းရႁၢၼ်းၵွၼ်ႇ” ဝူၼ်ႉၼင်ႇၼႆ။ ႁဵတ်းၼၼ် ၸင်ႇႁွင်ႉဢဝ် ၽွင်းမိူင်းၶဝ်လႄႈ သိုၵ်းႁၢၼ် ဢိၵ်ႇၵူၼ်းလူႁၼ်လုမ်းလႃးတင်းသဵင်ႈသေ ဢွၼ်ၵၼ်ပွၵ်ႈမိူဝ်းၶိုၼ်းၼႂ်းဝဵင်းယူႇယဝ်ႉ။ မိူဝ်ႈထိုင်တီႈၼႃႈတူဝၢင်းႁေႃၼၼ်ႉ ၸင်ႇမိူဝ်းယူႇတီႈၼၼ်ႈသေ ႁွင်ႉဢဝ်ၸွမ်သိုၵ်းလူင်မၼ်းမႃးၸူးယဝ်ႉၵေႃႈ ပူင်ဝႃႈ "ၸွမ်သိုၵ်းလူင်ဢိူၺ်း ၵေႃႉဢၼ်တေဢဝ်ပုၼ်ႈၽွၼ်း တႃႇတေၸႅၵ်ႇၽႄဢုပ်ႉပိူင်ႇၽွင်းငၢမ်းဝၢၼ်ႈမိူင်း၊ တႅပ်းတတ်းတြႃးၽဵၼ်ႈၽဵၼ်ႈသေ ယိပ်းၵမ်ၵၢၼ်မိူင်းၵႂႃႇလႆႈၼၼ်ႉ ပေႃးမီးလုၵ်ႈၸၢႆးၵဝ်ႇ ၸဝ်ႈၵႅမ်မိူင်းယဝ်ႉ။ မႂ်းတႄႉၸမ်း တေလႆႈပႂ်ႉပႃးႁူမ်ႇလူမ်ႈပၼ်ၵဝ် ၸွမ်းၼင်ႇၵၢင်ၸႂ်ၵဝ်ၶႂ်ႈပဵၼ်ၼၼ်ႉယဝ်ႉ။ ဢၼ်ၵၢင်ၸႂ်ၵဝ်မီးၼႆႉတႄႉ တႄႇဢဝ်မိူဝ်ႈၼႆႉၵႂႃႇမိူဝ်းၼႃႈ ၵဝ်ၶႂ်ႈယူႇၵူၺ်းၵေႃႉလဵဝ် တီႈၼႂ်းႁေႃယွတ်ႈၼၼ်ႉ ၵတ်းၵတ်းယဵၼ်ယဵၼ်ယဝ်ႉ။ တႄႇဢဝ် မိူဝ်ႈၼႆႉၵႂႃႇ ၸူဝ်ႈၵႃႈၵၢင်ၸႂ်ၵဝ် ပႆႇတဵမ်ထူၼ်ႈၼၼ်ႉ လိူဝ်သေၵူၼ်းၸၢႆး ၸိူဝ်းဢၼ်တေမႃးသူင်ႇဢႃးႁၢရ်၊ ၶဝ်ၼမ်ႉတၢင်းၵိၼ်ၼၼ်ႉသေ ၵႃႈပဵၼ်ၼၢင်းၸုမ်ႈလူင်၊ ၸိူင်ႉၼၢင်းၼႂ်းႁၢင်ႈႁေႃတင်းသဵင်ႈ၊ ၽွင်းမိူင်းၶဝ်၊ ၸိူဝ်းမႃးၼွမ်းမုၼ်ၵဝ်ႇ ၸဝ်ႈသိုၵ်းၶဝ် ယႃႇႁႂ်ႈၽႂ်ၶဝ်ႈမႃးသေၵေႃႉ၊ မႂ်းပႂ်ႉတူၺ်းႁႂ်းႁူမ်ႇလူမ်ႈလႆႈလီလီတႃႉ” သင်ႇလၢတ်ႈဝႆႉၼင်ႇၼႆယဝ်ႉ။

ၶုၼ်လူင်မႁႃႇၸၼၵ ဢၢပ်ႈလွင်ႈၼႃႈၵၢၼ်ၼႂ်းႁၢင်ႈႁေႃၶုၼ်ႁႂ်ႈႁူဝ်သိုၵ်းလူင် ၸိူင်ႉၼင်ႇၼႆယဝ်ႉၵေႃႈ ၸင်ႇၶိုၼ်းႁွင်ႉဢဝ် ၽွင်းမိူင်းလူင် ဢၼ်ယိပ်းၵမ်ၼႃႈၵၢၼ် ၽၢႆႇတႅပ်းတတ်းတြႃးၼၼ်ႉသေ သင်ႇလၢတ်ႈဝႆႉၸိူင်ႉၼင်ႇ မၼ်းသင်ႇလၢတ်ႈ တီႈၶုၼ်သိုၵ်းလူင်ၼၼ်ႉယဝ်ႈ။ သမ်ႉသိုပ်ႇပူင်ဝႃႈ "ၽွင်းမိူင်းလူင်ဢိူၺ်း တႄႇဢဝ်ဝၼ်းမိူဝ်ႈၼႆႉၵႂႃႇ ၵဝ်တေပွႆႇပႅတ်ႈ လွင်ႈၸႂ်ႁွႆႈၸႂ်တိတ်း ၼိူဝ်ၶူဝ်းၶွင်ငိုၼ်းၶမ်း၊ ဝၢၼ်ႈမိူင်းတိူင်းၵႃးယဝ်ႉသေ တေယူႇသဝ်းၵႂႃႇ ၵတ်းၵတ်းယဵၼ်ယဵၼ်ယဝ်ႈ။ ၵွပ်ႈၼၼ် မႂ်းတႅပ်းတတ်းတြႃး လွင်ႈသင်သေဢမ်ႇဝႃႈ ယႃႇပေႁႂ်ႈၽိတ်းပိူင်ႈ၊ ႁႂ်ႈမၢၼ်ႇမႅၼ်ႈၸွမ်းလွၵ်းမၢႆမီး ပၵ်းပိူင်မၼ်းလီလီတႃႉ။ ႁႂ်ႈမီးတင်းသတိ ၵိုၵ်းၵပ်းၸပ်းတူဝ်ယူႇတႃႇသေႇသေ သင်ႇသွၼ်ဢွၼ်လီ ၽွၼ်းမိူင်းၶဝ်လႄႈ ၵူၼ်းဝၢၼ်ႈၵူၼ်းမိူင်းၶဝ်ၵႂႃႇ မိူဝ်းၼႃႈတႃႉ” ၼႆယဝ်ႉၵေႃႈ ၶိုၼ်ႈမိူဝ်းတီႈၼိူဝ်ႁေႃယွတ်ႈၼၼ်ႉသေ ၽိုၵ်းၵမ်တြႃးရႁၢၼ်းၶဝ်ၵႂႃႇယူႇယဝ်ႉ။

မိူဝ်ႈယၢမ်းၼင်ႇၼၼ် ၽွင်းမိူင်းၶဝ်ၵမ်ႈၽွင်ႈလႄႈ ပရိသၢတ်ႈၶဝ် ၸိူဝ်းဢၼ်မႃးၼွမ်းမုၼ် ၸဝ်ႈၶုၼ်ယူႇတႃႇသေၼၼ်ႉ ၵွပ်ႈဢမ်ႇလႆႈႁၼ်မႅၼ်ႈၸဝ်ႈၶုၼ်လူင်လႄႈ ၸင်ႇႁွင်ႉၵူၼ်းၸိူဝ်းဢၼ်လုမ်းလႃးသူင်ႇၶဝ်ႈၼမ်ႉတၢင်းၵိၼ်တၢင်းယႅမ်ႉလႄႈ သူင်ႇပၼ်ၼမ်ႉသုၵ်ႈၼႃႈၸိူဝ်းၼၼ်ႉ ၵႂႃႇတီႈသၢင်ႇတေႃႇသေ ထၢမ်တူၺ်းဝႃႈ “ၸၢႆးၶဝ်ဢိူၺ်း ၸိူဝ်းသူလႆႈၶဝ်ႈၸူး ၸဝ်ႈၶုၼ်လူင်ယူႇၵူႈဝၼ်း။ ၸဝ်ႈၶုၼ် ပဵၼ်ၸိူင်ႉႁိုဝ်။ ဢမ်ႇလၢတ်ႈသင်ႁိုဝ်” ၼႆ။ ၸိူဝ်းလုမ်းလႃးႁဵတ်းၵၢၼ်ပၼ် ၸဝ်ႈၶုၼ်ၸင်ႇတွပ်ႇဝႃႈ “ၵေႃႉၶဝ်ဢိူၺ်း ၸိူဝ်းႁဝ်းၼႆႉ ပေႃးဝႃႈ ထိုင်ၶိင်ႇၶၢဝ်းၵိၼ်ယႅမ်ႉၵေႃႈ ႁဝ်းၵႂႃႇသူင်ႇပၼ်ၶဝ်ႈၼမ်ႉတၢင်းၵိၼ်သေ ပေႃးထိုင်ၶၢဝ်းသုၵ်ႈၼႃႈဢၢပ်ႇၼမ်ႉၵေႃႈ ၵႂႃႇသူင်ႇပၼ်ၼမ်ႉသေ ဢွၵ်ႇမႃးၶိုၼ်းၵူၺ်းၶႃႈ၊ ၵႂၢမ်းၼိုင်ႈၶေႃႈၼိုင်ႈၵမ်းၵေႃႈ မၼ်းၶုၼ်ဢမ်ႇလၢတ်ႈသင်တေႃႇႁဝ်း၊ ၵူၺ်းယူႇယဵၼ်ယဵၼ် ဢမ်ႇတူင်ႉဢမ်ႇၼိုင်သေ ပွင်ၽႄတြႃးယူႇဢိူဝ်ႈ” ၼႆ။ မူးမၢတ်ႈၽွင်းမိူင်းလႄႈ ပရိသၢတ်ႈၶဝ် လႆႈငိၼ်းၵႂၢမ်းၶေႃႈၼၼ်ႉယဝ်ႉၵေႃႈ ၸင်ႇၶင်းဝႃႈ "ၸဝ်ႈၶုၼ်လူင်ႁဝ်းၼႆႉ ဢမ်ႇမိူၼ်မိူဝ်ႈဢွၼ်တၢင်းယဝ်ႉ။ မိူဝ်ႈလဵဝ်ၼႆႉ ပဵၼ်ၸိူင်ႉႁိုဝ်ၵႂႃႇၵေႃႈ ဢမ်ႇႁူႉ” ၼႆသေယဝ်ႉ သိုပ်ႇဝႃႈ “ၵေႃႉၶဝ်ဢိူၺ်း ၸဝ်ႈၶုၼ်လူင်ႁဝ်း ဢၼ်ဢုပ်ႉပိူင်ႇပႅတ်ႇၼႃႈၽႃႉ သီႇၼႃႈမိူင်းၼႆႉ မိူဝ်ႈပူၼ်ႉမႃး ၵူႈပွၵ်ႈတႄႉ ၸွမ်းၼင်ႇ ၶိင်ႇလႂ်ၶၢဝ်းၼၼ်ႉ မၼ်းၵုမ်ႇယူႇသဝ်းမူၼ်ႈသိူဝ်း ၸွမ်းၸိူင်ႉၼၢင်းႁၢင်ႈလီၶဝ်လႄႈ ၼၢင်းၸုမ်ႈလူင်မၼ်းၵူၺ်း၊ ယူႇၸွမ်းၼႂ်းၵႄႈတၢင်းၵႃႈ၊ လွင်ႈႁႆႇတိုင်ႈ၊ ၸွမ်းပၢင်ႁွင်ႉၵႂၢမ်း၊ ၵျေႃႇၸွမ်းပၢင်ၸၢင်ႉ တေႃးၵၼ်လေႃႇၵၼ်၊ ပၢင်ဝူဝ်း၊ ၵႂၢႆး၊ ပႄႉတေႃးၵၼ် မင်လေႃႇၵၼ်၊ ဢွၵ်ႇလႄႇၼႂ်းသူၼ်မွၵ်ႇ သူၼ်သိူဝ်း၊ တူၺ်းၼူၵ်ႉႁၢင်းသႃႇ၊ ၵိင်ႇၼရီႇ ၵိင်ႇၼရႃႇသွင်ၽူဝ်မေး ဢၼ်မႃးၵႃႈတီႈၼႂ်းၼွင်မူဝ် ဢၼ်မီးမွၵ်ႇမူဝ်ႁႃႈယိူင်ႈ တႄႇၵႂႃႇၸိူဝ်းၼၼ်ႉမႃးလူင်ယူႇယဝ်ႉ။ မိူဝ်ႈလဵဝ်ၼႆႉၸမ်း ဢမ်ႇမိူၼ်မိူဝ်ႈဢွၼ်တၢင်းယဝ်ႉ။ ဢမ်ႇဝၢႆႇတူၺ်းလွင်ႈၵျေႃႇတၢင်းမူၼ်ႈသင်ယဝ်ႉ ပွႆႇပႅတ်ႈသဵင်ႈသဵင်ႈသေ ယူႇသဝ်းမိူၼ်ၼင်ႇ ၵူၼ်းဢႃႉၼၼ်ႉယဝ်ႉ။ ၵႂၢမ်းၵေႃႈဢမ်ႇလၢတ်ႈသင်၊ ဢမ်ႇလၢတ်ႈတေႃႇၽႂ်ယဝ်ႉ၊ ၵႂၢမ်းသင်ႇသွၼ်ဢွၼ်လီၵေႃႈ ဢမ်ႇလၢတ်ႈဢမ်ႇပၼ်သင်ယဝ်ႉလႃႇ” ၼႆ ဢွၼ်ၵၼ်ၶင်းလူင်ယူႇယဝ်ႈ။

ၼေႃႇၶမ်းၸဝ်ႈ ၶုၼ်လူင်မႁႃႇၸၼၵၵေႃႈ ယူႇသဝ်းၼိူဝ် ႁေႃယွတ်ႈထၢပ်ႈၼိူဝ်သုတ်းၼၼ်ႉ ၵေႃႉလဵဝ်သေ ဢဝ်ၸႂ်ပေႇပၢၵ်ႈပႅတ်ႈ လွင်ႈၸႂ်ၸပ်းပႅၼ်းၼိူဝ် ဢႃႇရုင်ႇၵႃႇမၵုင်ႇယဝ်ႉ။ ဢိၵ်ႇသမ်ႉၶုၵ်းၶူၼ်ႉဝူၼ်ႉၵုၼ်းမုၼ် ၸဝ်ႈပၸ်ႉၸေႇၵပုတ်ႉထႃႇ ယူႇၼႂ်းၸႂ်ဝႃႈ “သြႃႇၵဝ်ၸဝ်ႈပၸ်ႉၸေႇၵပုတ်ႉထႃႇၶဝ်ၸဝ်ႈ ၸိူဝ်းဢၼ်ယေႃးမႃး သုင်းသွမ်းတီႈႁေႃၵဝ် ၵူႈဝၼ်းၼၼ်ႉ ၸူဝ်ႈပၢၼ်ၶဝ်ၸဝ်ႈၼႆႉ မီးဝႆႉပၢၼ်ဢွၼ်ႇ ပၢၼ်ၵၢင်(ႁၢတ်ႈ) ပၢၼ်ယႂ်ႇ တႅမ်ႇသုင်ၵႄႇၵႂႃႇၸိူဝ်းၼႆႉယဝ်ႉ။ ပေႃးဢဝ်ၵုၼ်းမုၼ်ၵျေးၸူးမၼ်းဝႃႈၸိုင် ၽဵင်ႇပဵင်းမိူၼ်ၵၼ်မူတ်းယဝ်ႉ။ ဢၼ်ပဵၼ်ၸဝ်ႈမႅတ်ႈၸိူဝ်းၼႆႉ ၵူၺ်းၶႂ်ႈလႆႈလွင်ႈၵတ်းယဵၼ်ၼိပ်ႉပၢၼ်ႇၼၼ်ႉပိူင်လဵဝ်ၵူၺ်းလႄႈ ၶဝ်ၸဝ်ႈၵူၺ်းၵႆႉယူႇသဝ်း တီႈၽိတ်ႇတီႈယဵၼ်ယဝ်ႈ။ ၵုၼ်းမုၼ်သီႇလ၊ သမႃႇထိ ဢၼ်မီးယူႇတဵမ်ထူၼ်ႈတီႈတူဝ်ၶဝ်ၸဝ်ႈၸိူဝ်းၼၼ်ႉၵေႃႈ ဢမ်ႇမွၵ်ႇလၢတ်ႈၼႄပိူၼ်ႈသေ သိူင်ႇသိမ်းဝႆႉႁင်းၶဝ်ၸဝ်ႈလူင်ယူႇယဝ်ႈ။ ဢမ်ႇၶႃႈႁႅမ်ပိူၼ်ႈ၊ ဢမ်ႇၸႂ်ႁွႆႈၸပ်းပႅၼ်းၼိူဝ် ဢႃႇရုင်ႇၵႃႇမၵုင်ႇ၊ ၵႃႈပဵၼ်ၵၢၼ်ဢမ်ႇလီ ဢၵုသူဝ်ႇတုၸရိူၵ်ႈတင်းလူင်ၵေႃႈ ၶဝ်ၸဝ်ႈၵၢင်းလွတ်ႈသေယဝ်ႉ မီးသမႃႇထိ ၸႂ်ၼိမ် ၸႂ်ၵတ်းယဵၼ်ဝႆႉယူႇ။ ယၢမ်းလဵဝ် သြႃႇသမႃးၵဝ် ၸဝ်ႈပၸ်ႉၸေႇၵပုတ်ႉထႃႇၸိူဝ်းၼၼ်ႉ ယူႇသဝ်းဝႆႉယူႇ တီႈၵျွင်းလႂ်ၼေႃး၊ သြႃႇသမႃးၵဝ် ၸဝ်ႈပၸ်ႉၸေႇၵပုတ်ႉထႃႇၸိူဝ်းၼၼ်ႉ ၵွပ်ႈပိူဝ်ႈၶဝ်ၸဝ်ႈမီးပၺ်ႇၺႃႇတၢင်းမေႃဝႆႉ တဵမ်ထူၼ်ႈလႄႈ လူမ်းလႅင်ႉတၼ်ႁႃၵိလေႇသႃႇလူင် ၶႂ်ႈပဝ်ႇထွင်းၵႃႈႁိုဝ်ၵေႃႈယဝ်ႉ တိုၼ်းဢမ်ႇႁိူင်း ဢမ်ႇၵိူင်းသင်သေ ၶိူင်ႇၶမ်ႈမၼ်ႈၵိုမ်းလီ ပေႃးမိူၼ်ၼင်ႇလၵ်းသဝ်ႁိၼ်ဝႆႉယူႇယဝ်ႉ။ ဢမ်ႇမီးလွင်ႈၸႂ်ႁွႆႈၸပ်းပႅၼ်းၼိူဝ် ဢႃႇရုင်ႇၵႃႇမၵုင်ႇ ဢၼ်မေႃမူၵ်းထင်ဝႆႉ ၼႂ်းဢူၵ်းၼႂ်းၸႂ် သတ်ႉတဝႃႇၶဝ်ၼၼ်ႉသေ ၶဝ်ၸဝ်ႈဢွၵ်ႇပူၼ်ႉမူၼ်ႉလွတ်ႈၵႂႃႇယဝ်ႈ။ ဢမ်ႇမီးတၢင်း ၸႂ်ႁွႆႈၸပ်းပႅၼ်းၶူဝ်းၶွင် လႄႈ လွင်ႈမႆႈၸႂ်လိူတ်ႇၸႂ်ႁွၼ်ႉၸႂ် ၸႂ်ၽူင်ႉပိဝ်ဢၼ်ပဵၼ်ယူႇ ၼႂ်းၵူၼ်းႁဝ်းၼၼ်ႉၵေႃႈ ၶဝ်ႈၸဝ်ႈပူၼ်ႉလွတ်ႈလႆႈသဵင်ႈသေ ယူႇသဝ်းယူႇယဝ်ႉ။ ၵဝ်ၶႃႈၶုပ်ႉဝႆႈ တီႈ ပၸ်ႉၸေႇၵပုတ်ႉထႃႇၶဝ်ၸဝ်ႈ ဢၼ်ႁႃႁွမ်ၵေႃႇၵွင်သိၼ်ထမ်းၼၼ်ႉယဝ်ႈ။ ၶုၼ်တၢႆၼႆႉ ၸၢင်ႈမေႃဢဝ် တင်းတူင်ႇႁဵဝ်ႉ ဢၼ်ဝႃႈ တၼ်ႁႃ ဢၼ်ၸၢင်ႈမေႃၽၢမ်းလႅၼ် ႁႂ်ႈသူၵဝ်ႁဝ်းႁႃး ထၢင်ႇၽိတ်းၼိူဝ် ဢၼ်ဢမ်ႇႁၢင်ႈလီ (ဢသုၽ)ၼၼ်ႉ ၵိူဝ်းဝႃႈပဵၼ် ဢၼ်ႁၢင်ႈလီ (သုၽ)၊ ဢၼ်ႁၢင်ႈလီသမ်ႉ ထၢင်ႇဝႃႈပဵၼ် ဢၼ်ဢမ်ႇႁၢင်ႈလီ (ဢသုၽ) ၼႆသေ တီႉၺွပ်းဢဝ်ႁဝ်းဝႆႉလူင်ယူႇယဝ်ႈ။

ဢၼ်ပဵၼ်သြႃႇသမႃးၵဝ် ၸဝ်ႈပၸ်ႉၸေႇၵပုတ်ႉထႃႇၸိူဝ်းၼၼ်ႉၸမ်း ဢွၵ်ႇပူၼ်ႉမူၼ်ႉလွတ်ႈလႆႈ တူင်ႇႁဵဝ်ႉၶိုမ်းလူင် ၶုၼ်တၢႆမရၼၼ်ႉယဝ်ႉသေ ဢွၼ်ၵၼ်ယေႃးၵႂႃႇ တီႈၵတ်းတီႈယဵၼ် တီႈဢမ်ႇပဵၼ်ဢမ်ႇလူႉ ဢၼ်ၸိုဝ်ႈဝႃႈ မိူင်းၶမ်းမႁႃႇၼိပ်ႉပၢၼ်ႇၼၼ်ႉသဵင်ႈယဝ်ႉ။ မိူဝ်ႈလဵဝ်ၼႆႉ ၽႂ်သမ်ႉတေသူင်ႇၵဝ်ၵႂႃႇလႆႈ တီႈၵတ်းတီႈယဵၼ် တီႈဢမ်ႇပဵၼ်ဢမ်ႇလူႉ မိူင်းၶမ်းမႁႃႇၼိပ်ႉပၢၼ်ႇ တီႈသြႃႇသမႃးၵဝ် ၸဝ်ႈပၸ်ႉၸေႇၵပုတ်ႉထႃႇ ယူႇသဝ်းဝႆႉၸိူဝ်းၼၼ်ႉၼေႃး” ၼႆ၊ ၸဝ်ႈၶုၼ်ဢၼ် ၶုၵ်းၶူၼ်ႉဝူၼ်ႉထိုင် ၵုၼ်းမုၼ်ငဝ်းသီႇလ၊ သမႃႇထိ၊ ပၺ်ႇၺႃႇၸဝ်ႈပၸ်ႉၸေႇၵပုတ်ႉထႃႇၶဝ်ၸဝ်ႈၸိူဝ်းၼၼ်ႉ ၵွပ်ႈမီးမႃးပီႇတိ တၢင်းၸူမ်းလူင်လႄႈ မၢင်ပွၵ်ႈပေႃးၽုတ်းလုၵ်ႉၸုၵ်းသေ ၽၢႆႈပႆတၢင်းၵႂႃႇ ၸုၵ်းယူႇတီႈႁိမ်းၽၵ်းတူႁူးလႅင်းသေ ႁွမ်းမိုဝ်းယိူင်းၸူး ၸဝ်ႈပၸ်ႉၸေႇၵပုတ်ႉထႃႇၶဝ်ႈၸဝ်ႈ ဢၼ်ယူႇတီႈလွႆႁိမဝၼ်ႇတႃႇ တီးၽၢႆႇၼႃႈတၢင်းႁွင်ႇမိူင်းၼၼ်ႉသေ ယွင်ႈယေႃး ၵုၼ်းမုၼ်ၶဝ်ၸဝ်ႈ ၸိူင်ႉၼင်ႇဝႃႈမႃး မိူဝ်ႈၵႆႈၼၼ်ႉယဝ်ႈ။ ႁဵတ်းၼၼ်သေ ပွင်ၽႄၵၢၼ်ထမ်းရႁၢၼ်းၶဝ်သေ ယူႇသဝ်းႁိုင်ၵႂႃႇ ပေႃးထူၼ်ႈသီႇလိူၼ်တဵမ်ယဝ်ႈ။

←  ၶၢၼ်ပၢၵ်ႇ  ●  မွင်းၶႂ်ႈႁဵတ်း ရႁၢၼ်း →