ၸၢတ်ႈၸဝ်ႈမႁႃႇၸၼၵ/မွင်းၶႂ်ႈႁဵတ်း ရႁၢၼ်း

ယူႇၸိူင်ႉၼၼ်သေ မိူဝ်ႈထိုင်ႁိုင်မႃး သီႇလိူၼ်ပၢႆ ၸႂ်ၼေႃႈၶမ်းၸဝ်ႈ ဢၼ်ၶႂ်ႈပဵၼ်ရႁၢၼ်းၼၼ်ႉ ႁႅင်းယႂ်ႇလိူဝ်မႃးလႄႈ ထၢင်ႇဝႃႈႁၢင်ႈႁေႃၸေးၸိမ်ႇၼၼ်ႉ မိူၼ်ၸိူင်ႉၼင်ႇငရၢႆး လေႃးၵၼ်တရိၵယဝ်ႉ။ ၵူၼ်းႁဝ်းၼႆႉ ပေႃးဝႃႈၾႆးၽဝ ႁုပ်ႇမႆႈမႃးၼႆ မီးၸႂ်ၶႂ်ႈလႅၼ်ႈၸူး တီႈဢၼ်ဢမ်ႇမီးၽေးၾႆးၼၼ်ႉလႄႈ ၼေႃႇၶမ်းၸဝ်ႈ ၶႆႈၸႂ်ဝူၼ်ႉဝႃႈ "မိူဝ်ႈလႂ်ၵွၼ်ႇ ၵဝ်ၸင်ႇတေပွႆႇၽႃႈဝၢင်းပႅတ်ႈလႆႈ မိူင်းမိထိလႃႇ ဢၼ်ႁၢင်ႈၶိူင်ႈပေႃးမိူၼ်ၼင်ႇ မိူင်းၽီတႃႇဝတိင်ႇသႃႇ တီႈၶုၼ်ဢိၼ်းယူႇ ၼၼ်ႉသေ လႆႈၵႂႃႇႁဵတ်းရႁၢၼ်း တီႈႁိမဝၼ်ႇတႃႇၼေႃး” ၼႆ။

ၵွပ်ႈသမ်ႉၶႂ်ႈယွင်ႈယေႃးဝဵင်းလူင်သေ ႁႃလွင်ႈတၢင်း တႃႇတေလႆႈႁဵတ်းရႁၢၼ်း "မိူင်းမိထိလႃႇ ဢၼ်ၵဝ်ယူႇသဝ်းၼႆႉ မီးတင်း သီၶူဝ်းဢၼ်ၵူၼ်းၸၢႆး ၵူၼ်းယိင်းၶဝ်ၼုင်ႈသေ ၵႂႃႇမႃးတီႈၼိူဝ်သဵၼ်ႈတၢင်းလူင်၊ သဵၼ်ႈတၢင်းဢွၼ်ႇ၊ ထႅဝ်ၵၢတ်ႇ ၵူႈသၢႆသၢႆ။ ၶိူင်ႈၶူဝ်းဢၼ်ႁၢင်ႈၶိူင်ႈပၼ် တီႈၸၢင်ႉမႃႉရထႃး၊ သီသိူဝ်ႈၶူဝ်း ဢၼ်သိူဝ်ႇၵင်ႈၸွမ်း သႅင်ႇထႅဝ်ၵၢတ်ႇတႃႇသေႇ၊ သီသိူဝ်ႈၶူဝ်း ဢၼ်ၽွင်းမိူင်း ၵူၼ်းဝၢၼ်ႈၵူၼ်းမိူင်း ၵူၼ်းပၢႆႉၼွမ်းၶုၼ်ၶဝ်ၼုင်ႈသေ ၶဝ်ဢွၵ်ႇၶိုၼ်ႈလူင်း ပွႆးၸဝ်ႈပွႆးၶုၼ်ၶဝ် ႁိူဝ်ႈသွင်ႇသႂ်ႇဝႆႉတႃႇသေယဝ်ႈ။ တီႈၼႆႈၼႆႉ ပဵၼ်တီႈတင်ႈဝႆႉႁေႃၶမ်း၊ တီႈၼႆႈၼႆႉ ပဵၼ်တီႈႁဵတ်း ပၢင်ၵုမ်၊ တီႈၼႆႈၼႆႉ ပဵၼ်တီႈတင်ႈဝႆႉ ဝဵင်းၼႂ်းႁေႃ၊ တီႈၼႆႈၼႆႉ ပဵၼ်တီႈတင်ႈဝႆႉ ဝဵင်းထၢပ်ႈၼွၵ်ႈႁေႃ၊ တီႈၼႆႈၼႆႉ ပဵၼ်တီႈတင်ႈဝႆႉၽၵ်းတူ၊ ထႅဝ်ၵၢတ်ႇ၊ သဵၼ်ႈတၢင်းလူင်၊ ၸရွပ်ႈ၊ သွင်းတၢၼ်း၊ တီႈၼႆႈၼႆႉ ပဵၼ်တီႈယူႇၸဝ်ႈၵႅမ်မိူင်း တီႈယူႇႁူဝ်သိုၵ်းလူင်၊ တီႈယူႇၸိူဝ်ႉၶိူဝ်းၶုၼ်ၶဝ်၊ တီႈယူႇၽွင်းမိူင်းတႄႇၵႂႃႇၸိူဝ်းၼၼ်ႉ ၽူႈမီးပၺ်ၺႃႇၶဝ် မိူဝ်ႈဢွၼ်တၢင်း ၽႅၼ်ၵၢၼ်ၶပ်ႉၶိုင်မႃး ႁႂ်ႈၶႅမ်ႉလႅပ်ႈလီယဝ်ႉလႄႈ ဝဵင်းၵေႃႈ ပဵၼ်ဢၼ်ယႂ်ႇၵႂႃႇႁၢင်ႈလီတႄႉယဝ်ႉ။

ၽၵ်းတူလူင် ၽၵ်းတူဢွၼ်ႇ၊ ဢွင်ႈယိုဝ်း၊ ၶဵင်ႇယိုဝ်း၊ သွင်းတၢၼ်း၊ တီႈယူႇၵူၼ်းလီ ၵူၼ်းမႅတ်ႈၶဝ် ဝၢင်းႁေႃၵူႈလင်ၸိူဝ်းၼၼ်ၵေႃႈ ႁၢင်ႈလီတႄႉ၊ တီႈၽၵ်းတူဝဵင်း သဵၼ်ႈတၢင်းလူင် ၸိူဝ်းၼၼ်ႉၵေႃႈ လေႃႉမႃႉ၊ လေႃႉဝူဝ်း၊ လေႃႉပႄႉၶဝ် ၵႂႃႇမႃးၶဝ်ႈဢွၵ်ႇလေႃးလႄးၵၼ်ဝႆႉယဝ်ႉ။ တီႈႁိမ်းႁွမ်းဝဵင်းၵေႃႈ မီးသူၼ်မွၵ်ႇ သူၼ်မၢၵ်ႇ ဢၼ်လီမူၼ်ႈသိူဝ်းၸႂ်ၼၼ်ႉ လွမ်ႉႁွပ်ႈဝႆႉ၊ ပူႇၵဝ် ၶုၼ်လူင်သေႃးမၼသ်သ ဢၼ်ၽွင်းငၢမ်းမိူင်းဝိတေႇႁရႃႇၸ မိူဝ်ႈဢွၼ်တၢင်းၼၼ်ႉ ဢဝ်ဝဵင်းႁွပ်ႈႁေႃ တင်းတမ်ႇတိူင်းဝဵင်းသၢမ်ထၢပ်ႈ၊ ႁွင်ႈၼမ်ႉၼွင်သၢမ်ထၢပ်ႈသေ တႄႇတင်ႈမိူင်းမိထိလႃႇၼႆႉမႃးလႄႈ ပဵၼ်ဢၼ်ႁၢင်ႈလီတႄႉတႄႉ။ တီႈဝဵင်းတၢင်းၼႂ်းသၢမ်ထၢပ်ႈၼၼ်ႉ ႁိူၼ်းယႂ်ႇႁိူၼ်းလူင် တီႈလုၵ်ႈၶုၼ်၊ ၼွင်ႉၶုၼ်၊ လုင်းၶုၼ် ပီႈၼွင်ႉၶိူဝ်းၸဝ်ႈၶိူဝ်းၶုၼ်ၶဝ် ယူႇၼၼ်ႉၵေႃႈ ပေႃးတဵမ်တွမ်၊ လွင်ႁေႃတေႃႁိူၼ်း ၶပ်ႉၶၢင်းယႆ ဢဝ်သၢႆတႃတူၺ်း ပေႃးဢမ်ႇၸၢင်ႈဢိမ်ႇလႆႈ၊ မၼ်းၶႅမ်ႉႁၢင်ႈလီ ၼင်ႇသႅင်တႆႈတႄႉလႄႈ မိူဝ်ႈလႂ်ၵဝ်ၸင်ႇတေ ပွႆႇပႅတ်ႈလႆႈၼၼ်ႉသေ ႁဵတ်းရႁၢၼ်းလႆႈၼေႃး“ ၼႆယဝ်ႉ။

ဝၢႆးၼၼ်ႉ ၵွပ်ႈၶႂ်ႈႁဵတ်းရႁၢၼ်းလႄႈ သိုပ်ႇဝူၼ်ႉဝႃႈ “တိူင်းတေႇႁရႃႇၸ ဢၼ်ဢႃႇၼႃႇၵဝ်ၸဝ်ႈႁူမ်ႇငမ်းဝႆႉၼႆႉ မီးဝႆႉၶဝ်ႈၼမ်ႉၶူဝ်းၶွင် လိူင်မၢၵ်ႈတဵမ်ထူၼ်ႈ၊ ၵူၼ်းမၢၵ်ႈမီးၵေႃႈၼမ်၊ ဝၢၼ်ႈဢွၼ်ႇၸွၵ်ႉၸဵင်ႇၵူၺ်းၵေႃႈ တၢင်ႇမိူင်းၶဝ် ယင်းဢမ်ႇႁတ်းမႃးယႃႉႁိမ်ဢဝ်၊ ၼႂ်းတိူင်းၵေႃႈ ဢမ်ႇမီးၶဵၼ် ဢမ်ႇမီးၽူႈလၵ်ႉၵူၼ်းၸူၼ်လႄႈ ပဵၼ်ဢၼ်ၵိုၼ်းလီဝႆႉတႄႉတႄႉ။ ၸၢဝ်းၶိူဝ်းသီႇမဵဝ်းၵေႃႈ ဢွၼ်ၵၼ်ႁဵတ်းၸွမ်းၼင်ႇ တြႃးဢၼ်ၸဝ်ႈၵဝ်ႇသင်ႇသွၼ်ယူႇ။ ဢၼ်ၼႆႉ မိူဝ်ႈလႂ်ၵဝ်ၸဝ်ႈၸင်ႇတေၽႃႈဝၢင်းပႅတ်ႈလႆႈ တိူဝ်းဝိတေႇႁၼႆႉသေ ၵႂႃႇႁဵတ်းရႁၢၼ်းလႆႈၼေႃး“ ၼႆယဝ်ႉ။

ဝၢႆးၼၼ်ႉ ယွင်ႈယေႃးဝဵင်းတၢင်းၼႂ်း ဢၼ်ႁွပ်ႈႁေႃသေ မွင်းၶႂ်ႈႁဵတ်းရႁၢၼ်းဝႃႈ “ တီႈႁိမ်းႁွမ်ႁေႃၵဝ်ၸဝ်ႈၼၼ်ႉ တီႈၼႆႈၼႆႉ ပဵၼ်တီႈ ႁေႃႈယွတ်ႈတင်ႈဝႆႉ၊ တီႈၼႆႈၼႆႉ ပဵၼ်တီႈ ႁွင်ႈၵူၼ်းတၢင်းၼႂ်းၶဝ်ၵုမ်ၵၼ်၊ တီႈၼႆႈၼႆႉ ပဵၼ်တီႈဢွင်ႈပၢင်ၵုမ်၊ တီႈၼႆႈၼႆႉ ပဵၼ်တီႈ ၽွင်းမိူင်းၶဝ်ၼွမ်းမုၼ်၊ တီႈၼႆႈၼႆႉ ပဵၼ်တီႈဝႆႉၸၢင်ႉ၊ မႃႉ၊ လေႃႉ၊ ရထႃး၊ တီႈၼႆႈၼႆႉ ပဵၼ်ဢွင်ႈတီႈႁဵတ်းပွႆးၼႆ ၵွပ်ႈပိူဝ်ႈဝႃႈ တႅၵ်ႈလီလီသေ ၶပ်ႉၶိုင်ႁႂ်ႈၶႅမ်ႉလႅပ်ႈလီလႄႈ ပဵၼ်ဢၼ်လီ မီးတၢင်းမူၼ်ႈသိူဝ်းၸႂ်တႄႉ။ ဝဵင်းႁိမ်းႁွမ်းႁေႃၼၼ်ႉၵေႃႈ ဢဝ်လိၼ်ၼဵဝ်ၼရပတေႉသေ ႁဵတ်းဝႆႉၶႅမ်ႉၶႅမ်ႉလႅပ်ႈလႅပ်ႈလႄႈ လီၶႂ်ႈယဵမ်ႈၶႂ်ႈတူၺ်းတႄႉတႄႉ။ ဢၢႆသႅဝ်ႁွမ်မွၵ်ႇႁွပ်ႈႁေႃး ဢၼ်လူမ်းထွင်းမႃးၼၼ်ႉလႂ်၊ ဢၢႆသႅဝ်ၼမ်ႉႁွမ် ဢၼ်ၵူၼ်းၼႂ်းႁၢင်ႈႁေႃၶဝ် ၸႂ်ႉတိုဝ်းၼၼ်ႉလႂ်၊ သမ်ႉပေႃးႁွမ်ၸွတ်ႇတူဝ်ႈၵႂႃႇတင်းႁေႃလႄႈ ပဵၼ်ဢၼ်လီမီးတၢင်းသိူဝ်းၸႂ်တႄႉတႄႉ။ တၢင်းၶႅမ်ႉၸိူဝ်းၼႆႉ ႁဵတ်းႁႂ်ႈၵဝ်ၸဝ်ႈ ပေႃးဢမ်ႇၸၢင်ႈၽၢတ်ႇလႆႈယဝ်ႉ။ မိူဝ်ႈလႂ် ၵဝ်ၸဝ်ႈၸင်ႇတေ ၽႃႈဝၢင်းပႅတ်ႈလႆႈ ႁၢင်ႈႁေႃၸေးၸိမ်ႇၼႆႉသေ ႁဵတ်းရႁၢၼ်းလႆႈၼေႃး“ ၼႆယဝ်ႉ။

ဝၢႆးၼၼ်ႉ ယွင်ႈယေႃးႁေႃယွတ်ႈသေ မွင်းၶႂ်ႈႁဵတ်းရႁၢၼ်းသေ ဝႃႈ “လင်ႁေႃယွတ်ႈၵဝ်ၸဝ်ႈၼႆႉ ဢဝ်ပီသႅင်၊ လူင်ႇသႅင် တုမ်ႇသႅင်၊ ပေသႅင်၊ မွၵ်ႇပၢၼ်းသွၼ်းတင်းၼမ်သေ ႁၢင်ႈၶိူင်ႈဝႆႉလႄႈ ပဵၼ်ဢၼ်ႁၢင်ႈလီတႄႉတႄႉ။ တိူၵ်ႈငိုၼ်း၊ တိူၵ်ႈၶမ်း၊ တိူၵ်ႈဝႆႉတၢင်းၵိၼ် ဢၼ်ဢဝ်လိၼ်ၼဵဝ်ဢၢင်းၵတေႇသေ ႁဵတ်းဝႆႉႁႂ်ႈၶႅမ်ႉလႅပ်ႈလီယဝ်ႉ သမ်ႉဢဝ်ငိုၼ်းၶမ်းၵႅဝ်ႈသႅင်ႈႁၢင်ႈၶိူင်ႈၸွမ်းလႄႈ ပဵၼ်ဢၼ်ႁၢင်ႈလီတႄႉတႄႉ။ လင်ႁေႃႈယွတ်ႈၸဵတ်းပၢၵ်ႇ မီးသွႆႈမွၵ်ႇမၢၵ်ႇငူင်းငႃး ၸိူဝ်းၼၼ်ႉၵေႃႈ ၸိူဝ်းသြႃႇလူင်မေႃမိုဝ်းၶဝ် တႅၵ်ႈဝႆႉလီလီ သမ်ႉပူၵ်းတင်ႈၶပ်ႉယႆဝႆႉ ၸွမ်းလွၵ်းမၼ်းလႄႈ ႁၢင်ႈလီပေႃးမိူၼ်ၼင်ႇ ၶူင်းႁေႃၽီမိူင်းၼိုင်ႈယဝ်ႉ။ ဢၢႆႁွမ်မွၵ်ႇဢၼ်ႁွပ်ႈႁေႃ တင်းသႅဝ်ဢၢႆႁွမ်ၸၼ်ႇတၵူးၸိူဝ်းၼၼ်ႉ ႁဵတ်းႁႂ်ႈႁေႃယွတ်ႈၵူႈလွင် ပေႃးႁွမ်ဝႆႉႁူၺ်းႁူၺ်းလႄႈ ပဵၼ်ဢၼ်လီမီးတၢင်းသိူဝ်းၸႂ်တႄႉတႉ။ ၸိူဝ်းၼႆႉ မိူဝ်ႈလႂ်၊ တေႁဵတ်းႁိုဝ်သေ ႁႂ်ႈပေႃးၽၢတ်ႇလႆႈပႅတ်ႈလႆႈ ႁေႃႈယွတ်ႈႁၢင်ႈလီၼႆႉသေ ၶဝ်ႈႁဵတ်းရႁၢၼ်းလႆႈၼေႃး" ၼႆယဝ်ႉ။

ဝၢႆးၼၼ်ႉ သမ်ႉယွင်ႈယေႃးၵူႇၶမ်း ပလၢင်ႇတႅၼ်ႈၵႅဝ်ႈသေ မွင်းၶႂ်ႈႁဵတ်းရႁၢၼ်းလႄႈ ဝႃႈ “ပလၢင်ႇတႅၼ်ႈၵႅဝ်ႈ ၵူႇၶမ်း ဢၼ်ဝႆႉၼႂ်းႁေႃဢွၼ်ႇ ႁေႃလူင်ၸဵတ်းပၢၵ်ႇၸိူဝ်းၼၼ်ႉ မင်ဢၼ်ဢဝ်ၶမ်းႁဵတ်း၊ မၢင်ဢၼ်ဢဝ်ၵႅဝ်ႈသႅင်ႁဵတ်းမူတ်းမူတ်းယဝ်ႉ။ ၼင်သိူဝ်ႇမၼ်းၼၼ်ႉၵေႃး ဢဝ်ၶူၼ်သတ်း ၶူၼ်ၼူၵ်ႉသေ သၢၼ်ႁဵတ်းၶိုၵ်ႉၶၢႆး လၢၵ်ႇလၢႆး ႁႂ်ႈတၢင်းၼႃမၼ်း မီးလိူဝ်သီႇၶၵ်ႉမိုဝ်းလႄႈ ပဵၼ်ဢၼ်ယိၼ်းထုၵ်ႇၸႂ်တႄႉတႄႉ။ မိူဝ်ႈလဝ် ၵဝ်ၸင်ႇ တေ ၽႃႈဝၢင်ႈပႅတ်ႈလႆႈ ပလၢင်ႇၵိုၵ်းတႅၼ်ႈၵႅဝ်ႈၸိူဝ်းၼၼ်ႉသေ ပဵၼ်ႁဵတ်းရႁၢၼ်းလႆႈၼေႃး“ ၼႆယဝ်ႉ။

ဝၢႆးၼၼ်ႉ သမ်ႉယွင်ႈယေႃး သိူဝ်ႈၶူဝ်းၸဝ်ႈ ၸိူဝ်းၼုင်ႈယူႇ တေႃးလဵဝ်ႈၼႆႉ တင်း ၶူဝ်းတႃႇပုတ်ႇလၢႆႈ ဢၼ်ဢဝ်မႆၵုၺ် မႆလၢႆႈ ဢၼ်ဢူၼ်ႈၼူၼ်းလီသေ တေႃးႁဵတ်းႁႂ်ႈ ႁၢင်ႈလီၶႅမ်ႉလႅပ်ႈၼၼ်ႉလႂ်၊ ပိၵ်ႉၽႃႈဢၼ်ဢူၼ်ႈၼူၼ်းၼႃႇ ဢွၵ်ႇတီႈ တိူင်းၵေႃးတူမ်ႇပၼၼ်ႉလႂ် ပဵၼ်ဢၼ်ၸၼ်ၸႂ်တႄႉတႄႉယဝ်ႉ။ မိူဝ်ႈလႂ်ၵွၼ်ႇ ၵဝ်ႇၸင်ႇတေ ၽႃႈဝၢင်ႈပႅတ်ႈလႆႈ သိူဝ်ႈၶူဝ်း ၸိူဝ်းဢၼ် ဢူၼ်ႈၼူၼ်းလီၼႃႇၼၼ်ႉသေ ၼုင်ႈမႆၽႃႈသၢင်ႇၵၢၼ်းပေႃ၊ ၽႃႈသၢင်ႇၵၢၼ်းယႃႈၽႅတ်ႈ၊ ၽႃႈၼင်သိူဝ်လမ်ၸိူဝ်းၼၼ်ႉသေ လႆႈယူႇလွတ်ႈလွတ်ႈလႅဝ်းလႅဝ်းၼေႃး“ ၼႆယဝ်ႉ။

ဝၢႆးၼၼ်ႉ သမ်ႉယွင်ႈယေႃးၼွင်ၼမ်ႉၸဝ်ႈသေ မုင်ႈမွင်းၶႂ်ႈႁဵတ်းရႁၢၼ်းသေလႄႈဝႃႈ “ၼွင်ၼမ်ႉမင်ႇၵလႃႇ ဢၼ်ပဵၼ်တီႈၵဝ်ၸဝ်ႈ ဢွၵ်ႇလဵၼ်ႈၼၼ်ႉ ၵွပ်ႈမူဝ်ႁႃႈယိူင်ႈ ႁၢင်ႈၶိူင်ႈမုင်ႈႁူမ်ႇဝႆႉလႄႈ ပဵၼ်တီႈ ႁၢၼ်ႇ၊ ၼူၵ်ႉႁၢင်းသႃႇ၊ ၵႆႇၼမ်ႉ၊ ၼူၵ်ႉၼမ်ႉ တူဝ်ပေႃႈ တူဝ်မႄႈၶဝ် မႃးလဵၼ်ႈမူၼ်ႈလႄႈ ပဵၼ်ဢၼ်လီယဵမ်ႈလီတူၺ်းတႄႉတႄႉ။ မိူဝ်ႈလႂ်ၵွၼ်ႇ ၵဝ်ႇၸင်ႇတေ ၽႃႈဝၢင်ႈပႅတ်ႈလႆႈ ၼွင်ၼမ်ႉၼၼ်ႉသေ ႁဵတ်းရႁၢၼ်ႈလႆႈၼေႃး“ ၼႆယဝ်ႉ။

ဝၢႆးၼၼ်ႉ သမ်ႉယွင်ႈယေႃးၸၢင်ႉ၊ မႃႉ၊ ရထႃးတင်းလူင်သေ မွင်းၶႂ်ႈႁဵတ်းရႁၢၼ်းလႄႈဝႃႈ “ၸၢင်ႉၸိူဝ်းဢၼ် ၸိုဝ်ႈ မႃႇတိင်ႇၵၼၼ်ႉ တင်ႈဢဝ်ငူင်းတေႃႇထိုင်ႁၢင် တင်ႈဢဝ် ၽႃႇတိၼ်ႇတေႃႇထိုင် ၵွင်းလင် ၸဵမ်တီႈၶုၼ်ႈၼင်ႈ တူဝ်တင်းသဵင်ႈၼၼ်ႉ ဢဝ်ၸိူၵ်ႈၶမ်းပၢတ်ႈၼၢင်ႈ ႁၢင်ႈၶိူင်ႈပၼ် ဢဝ်ယႅင်ႉၶေၶမ်းသုမ်ႇၸိၵ်းႁူဝ်ၸၢင်ႉလႂ်၊ ၸဝ်ႈၸၢင်ႉဢၼ်လူင်ႉလႅၼ်ႇၽၢႆႇၶီႇၸၢင်ႉ ဢၼ်ယိပ်းႁွၵ်ႇၶၢၼ်ပၢႆလႅမ်ႈၸိူဝ်းၼၼ်ႉၵေႃႈ ပဵၼ်ဢၼ်ႁၢင်ႈလီတႄႉတႄႉယဝ်ႉ။

မႃႉၵဝ်ၸိူဝ်ႉဢႃႇၸႃႇၼီႇ ၸိူဝ်ႉသိင်းထေႃး ဢၼ်ဢဝ်ၵွပ်းၶမ်းႁၢင်ႈၶိူင်ႈပၼ်၊ ၸဵမ်တၢင်းသိုၵ်းႁၢၼ်ၶီႇမႃႉ ဢၼ်လူင်ႉလႅင်ႉၽၢႆႇၶီႇမႃႉ ဢၼ်ယိပ်းၵၢင်ႇၶႃၶဝ်၊ လွင်ႈတၢင်းမႃႉၶဝ် ဢႅၼ်ႇလႅၼ်ႈၽႂ်ၸိူဝ်းၼႆႉၵေႃႈ ပဵၼ်ဢၼ်လီလူလီတူၺ်းယူႇတႄႉယဝ်ႉ။ ရထႃးၸိူဝ်းၼၼ်ႉၵေႃႈ မၢင်ဢၼ်ဢဝ်ၶမ်းႁဵတ်း မၢင်ဢၼ်ဢဝ်ငိုၼ်းႁဵတ်း မၢင်ဢၼ်ဢဝ်ၵႅဝ်ႈသႅင်ၵဝ်ႈပႃးသေႁဵတ်းယဝ်ႉ၊ ရထႃးငိုၼ်းၶမ်းၵႅဝ်ႈသႅင် ဢၼ်ဢဝ်မႃႉပႄႉတႄႇၵႂႃႇႁၢင်ႈဝႆႉသေ လၢၵ်ႈၼၼ်ႉၵေႃႈ မီးဝႆႉယူႇတင်းၼမ်တင်းလၢႆယဝ်ႈ။ မိူဝ်ႈလႂ်ၵွၼ်ႇ ၵဝ်ၸင်ႇ တေပွႆႇဝၢင်းပႅတ်ႈလႆႈ ရထႃးၸိူဝ်းၼၼ်ႉသေ ႁဵတ်းရႁၢၼ်းလႆႈၼေႃး" ၼႆယဝ်ႉ။

ဝၢႆးၼၼ်ႉ သိုပ်ႇယွင်ႈယေႃးသိုၵ်းႁၢၼ်ၶီႇၸၢင်ႉ၊ ၶီႇမႃႉ မေႃၵၢင်ႇၶဝ်သေ မွင်းၶႂ်းႁဵတ်းရႁၢၼ်းလႄႈဝႃႈ “သိုၵ်းႁၢၼ်ၶီႇၸၢင်ႉၶဝ်ၸိူဝ်းၼၼ်ႉ ၼုင်ႈၶူဝ်းလဵၵ်း၊ ၶူဝ်းတွင်း၊ ယိပ်းႁွၵ်ႇၶွၼ်ႉလဵၵ်းသေ မီးဝႆႉ တၢင်းႁတ်းႁၢၼ်တႄႉယဝ်ႉ။ သိုၵ်းႁၢၼ်ၶီႇမႃႉၵဝ် ၸိူဝ်းၼၼ်ႉၵေႃႈ ႁတ်ႉသၢႆႁၢင်ႉ ၶိူင်ႈၶူဝ်းသိုၵ်းသေ ႁၢင်ႈၶိူင်ႈ၊ ၵမ်တင်းၶွၼ်ႉၸိူၵ်ႈၽႅၼ်းဝႆႉလႄႈ မီးတၢင်းႁတ်းႁၢၼ်ဝႆႉယူႇတႄႉယဝ်ႉ။ ၸဝ်ႈၵၢင်ႇၵဝ်ၸိူဝ်းၼၼ်ႉၵေႃႈ ၼုင်ႈၶူဝ်းလဵၵ်းတွင်း ပႃးမူၵ်ႇပိုၼ်ၵၢင်ႇ ယိပ်းၵၢင်ႇထိုၵ်းဝႆႉလႄႈ မီးတၢင်းႁတ်းႁၢၼ်ယူႇတႄႉယဝ်ႈ။ မိူဝ်ႈလႂ် ၵဝ်ၸင်ႇတေပွႆႇပႅတ်ႈလႆႈ သိုၵ်းႁၢၼ်ၶီႇၸၢင်ႉ၊ ၶီႇမႃႉ၊ ၸဝ်ႈၵၢင်ႇၸိူဝ်းၼၼ်ႉသေ လႆႈႁဵတ်းရႁၢၼ်းၵႂႃႇ လွတ်ႈလွတ်ႈလႅဝ်းလႅဝ်းၼေႃး“ ၼႆယဝ်ႉ။

ဝၢႆးၼၼ်ႉ ၵွပ်ႈၶႂ်ႈယွင်ႈယေႃးၸဝ်ႈၸၢႆးၶဝ်၊ မၢဝ်ႇပုၼ်ႇၼႃးၶဝ်ၸိူဝ်းၼၼ်ႉသေ ဢိၼ်းၶႂ်ႈႁဵတ်းရႁၢၼ်းဝႃႈ “ၸဝ်ႈၸၢႆး ၸိူဝ်းပဵၼ်ၼွင်ႉၵဝ်၊ လၢၼ်ၵဝ်၊၊ လိၼ်ၵဝ်တၢင်းလၢႆ ၼုင်ႈၶူဝ်းတုၺ်ႇၵၼ် ဢၼ်ဢဝ်မႆၶမ်း၊ မႆလၢႆႈ တေႃးႁဵတ်းဝႆႉၶိုၵ်ႉၶၢႆး လၢၵ်ႇလၢႆးၼၼ်ႉသေ တိုဝ်းပေႇႁူၶမ်း ဝႅၼ်ၶမ်း လႄႈ ပဵၼ်ဢၼ်ႁၢင်ႈလီ ပေႃးမိူၼ်ၼင်ႇမၢဝ်ႇၽီယဝ်ႉ။ ပရေႃးႀဵတ်ႉပုၼ်ႇၼႃးၵဝ်ၸိူဝ်းၼၼ်ႉၵေႃႈ ႁၢင်ႈၶိူင်ႈတႃးၼမ်ႉႁွမ်ၼၢမ်ႇသႃႇသေ ၼုင်ႈၶူဝ်းပိၵ်ႉၽႅၼ်ႇဢူၼ်ႈၼူၼ်း ဢၼ်ဢွၵ်ႇမိူင်းၵႃႇရသိရႃႇၸႃႇလႄႈ ပဵၼ်ဢၼ်ႁၢင်ႈလီတႄႉယဝ်ႉ။ မိူဝ်ႈလႂ် ၵဝ်ၸင်ႇတေ ပွႆႇပႅတ်ႈလႆႈ မၢဝ်ႇၸဝ်ႈၸၢႆးမၢဝ်ႇပုၼ်ႇၼႃးၸိူဝ်းၼၼ်ႉသေ ၵႂႃႇႁဵတ်းရႁၢၼ်းလႆႈၼေႃး“ ၼႆယဝ်ႉ။

ဝၢႆးၼၼ်ႉ ၵွပ်ႈၶႂ်ႈယွင်ႈယေႃးၼၢင်းႁေႃၶမ်း ၸဵတ်းပၢၵ်ႇၶဝ်သေ ဢဵၼ်းတေ ႁဵတ်းရႁၢၼ်းသေ ဝႃႈ “ၼႂ်းၵႃႈၼၢင်းႁေႃၶမ်းလူင် ၼၢင်းႁေႃၶမ်းဢွၼ်ႇ ၶႃႈၸႂ်ႉၸိူင်ႉၼၢင်းၶဝ်ၸိူဝ်းၼၼ်ႉ ၼၢင်းႁေႃၶမ်းဢၼ်မီးၼမ်ႉၸႂ် မိူၼ်ၸိူင်ႉၼင်ႇ ၼၢင်းၽီသီႇဝလိသေ မေႃႁဵတ်းႁႂ်ႈၵဝ်မူၼ်ႈသိူဝ်းလႆႈၸႂ်ၼၼ်ႉ တင်းၼမ်မီးၸဵတ်းပၢၵ်ႇယဝ်ႉ။ ၼၢင်းၸုမ်ႈလူင်ၵဝ်လႄႈ တင်းၼၢင်းႁေႃၶမ်းဢွၼ်ႇ ၸဵတ်းပၢၵ်ႇၸိူဝ်းၼၼ်ႉ ႁၢင်ႈၵေႃႈႁၢင်ႈလီ၊ မီးဢိၼ်ႇတရေႇဢူၼ်ႈဢွၼ်ႇ၊ မီးၽၢင်ႁၢင်ႈယဵၼ်ႇငႄႈၼႃႈယုမ်ႉယၢႆႈ၊ မေႃလၢတ်ႈၵႂၢမ်းဝၢၼ်ႁူ၊ ပေႃးႁၢင်ႈၶိူင်ႈၼုင်ႈၶူဝ်း ဢၼ်ၼႂ်းႁၢင်ႈႁေႃယဝ်ႉၼႆ ႁၢင်ႈလီပေႃးမိူၼ်ၸိူင်ႉၼင်ႇၼၢင်းၽီယဝ်ႉ။ ၸိူဝ်းၶဝ်တေႃႈၵူၺ်းလႆႈငိၼ်းငိူၼ်ႈၵႂၢမ်း၊ ငၢႆးၼႃႈငၢႆးတႃၵူၺ်းၵေႃႈ မေႃႁူႉၵၢင်ၸႂ်ၸဝ်ႈၽူႈယဝ်ႉ။ မၢင်ပွၵ်ႈမၢင်လႂ် မိူဝ်ႈၵဝ်လႆႈဝႃႈၵႂႃႇ ၵႂၢမ်းဢမ်ႇမႅၼ်ႈလွင်ႈမႅၼ်ႈတၢင်းမႃးၵေႃႈ မေႃဝႆႉၸႂ်ယိူၼ်ႉၶၢမ်ႇ၊ ဢမ်ႇမေႃၸႂ်လမ်၊ ဢမ်ႇႁွၼ်ႇထဵင်တွပ်ႇၵဝ်မႃးသေပွၵ်ႈ။ ၵူၺ်းမေႃၼပ်ႉယမ်ၼွမ်းၸူး၊ မေႃလၢတ်ႈၵႂၢမ်းလီႁၵ်ႉ၊ မေႃႁဵတ်းၸွမ်းၼင်ႇ ၵၢင်ၸႂ် ၸဝ်ႈၽူဝ်မၵ်ႉၵူႈလွင်ႈယဝ်ႈ။ ၸိူဝ်းၼႆႉ ႁဵတ်းႁႂ်ႈၵဝ် ပေႃးဢ်ႇၸၢင်ႈၽၢတ်ႇလႆႈ ပေႃးၼင်ႇယၢင်မၢၵ်ႇလၢင်းၵဝ်ႈတူၼ်ႈ ၸပ်းတိတ်းဝႆႉယဝ်ႈ။ မိူဝ်ႈလႂ် ၵဝ်ၸင်ႇတေ ပွႆႇပႅတ်ႈလႆႈ ၼၢင်းႁေႃၶမ်းၵဝ်ၸိူဝ်းၼၼ်ႉလႆႈၼေႃး“ ၼႆယဝ်ႉ။

ဝၢႆးၼၼ်ႉ ၵွပ်ႈၶႂ်ႈယွင်ႈယေႃးပၢၼ်ႉၶမ်း ဢၼ်ဢဝ်ႁႅၼ်းတမ်းၽိူၼ်ၶဝ်ႈၸဝ်ႈ ၵူႈဝၼ်းၼၼ်ႉသေ ဝႃႈ “ပၢၼ်ႉၶမ်းဢၼ်ဢဝ်ႁႅၼ်းၽိူၼ်ၶဝ်ႈ တၢင်းၵိၼ်ၵဝ်ၼၼ်ႉ ၼမ်ႉၼၵ်းၶမ်းမၼ်း မီးၼိုင်ႈပၢၵ်ႇ၊ သမ်ႉႁဵတ်းႁွႆးၶွပ်ႇၶိုၵ်ႉၶၢႆး လၢၵ်ႇလၢႆးဝႆႉ တီႈၵၢမ်းပၢတ်ႈလႄႈ ပဵၼ်ဢၼ်ႁၢင်ႈလီတႄႉယဝ်ႈ။ မိူဝ်ႈလႂ် ၵဝ်ႇၸင်ႇတေ ပွႆႇပႅတ်ႈလႆႈ ပၢၼ်ႉၶမ်းၼၼ်ႉသေ ၶဝ်ႁဵတ်းရႁၢၼ်းလႆႈၼေႃး“ ၼႆယဝ်ႉ။

ဝၢႆးၼၼ်ႉ ၵွပ်ႈၶႂ်ႈယွင်ႈယေႃးၸၢင်ႉမႃးတႄႇၵႂႃႇ ၽုင်ပရိသၢတ်ႈၶဝ် ၸိူဝ်းၸွမ်းလင်ထႅင်ႈလႄႈ ဝႃႈ “ၵဝ်ဢွၵ်ႇလႄႇ မိူဝ်ႈလႂ်ၵေႃႈ ၸၢင်ႉမႃႉ၊ ရထႃး၊ သိုၵ်းႁၢၼ်ၶီႇၸၢင်ႉ၊ သိုၵ်းႁၢၼ်ၶီႇမႃႉ၊ သိုၵ်းႁၢၼ်ၶီႇရထႃး၊ မေႃၵၢင်ႇ၊ ၸဝ်ႈၸၢႆးတင်းလၢႆ၊ ပုၼ်ႇၼႃးၶဝ်၊ မေႃမိူင်းၶဝ်၊ ၼၢင်းႁေႃၶမ်းၸဵတ်းပၢၵ်ႇၶဝ် မူႇၽုင်ၸိူင်ႉၶုၼ် ၸိူင်ႉၼၢင်းၸိူဝ်းၼႆႉတင်းသဵင်ႈ ၸွမ်းလူင်ယူႇယဝ်ႈ။ မိူဝ်ႈလႂ်ၵွၼ်ႇ ၵဝ်တေ ဢမ်ႇႁႂ်ႈၶဝ်လႆႈၸွမ်းလင်ၵဝ်သေ ၵႂႃႇလႆႈလွတ်ႈလွတ်ႈလႅဝ်းလႅဝ်းႁင်းၶေႃၼေႃး“ ၼႆယဝ်ႉ။

ဝၢႆးၼၼ်ႉ ၵွပ်ႈၶႂ်ႈႁဵတ်းရႁၢၼ်းၼႃႇလႄႈ ဝႃႈ “မိူဝ်ႈလႂ်ၵွၼ်ႇ ၵဝ်ၸင်ႇတေလႆႈထႃႁူဝ် ၼုင်ႈမႆၽႃႈသၢင်ႇၵၢၼ်းယွမ်ႉၼမ်ႉၽၢတ်ႇ ပႃးတင်းသီႇပိတ်ႈသေ ႁႃတုင်းသွမ်းၵိၼ်ၼေႃး။ မိူဝ်ႈလႂ်ၵွၼ်ႇ ၵဝ်ၸင်ႇ တေလႆႈၵဵပ်းဢဝ်ၽႃႈပမ်ႉသၵူႇသေ ယဵပ်ႉယွမ်ႉႁဵတ်းသၢင်ႇၵၢၼ်းၵူပ်ႉသေ ဝႆၼေႃး။ မိူဝ်ႈလႂ်တေလႆႈတုင်းသွမ်း ၼႂ်းၽူင်လူင် ဢၼ်တူၵ်းယူႇဝၼ်းဝၼ်းၶိုၼ်းၶိုၼ်းၼၼ်ႉၼေႃး။ မိူဝ်ႈလႂ်ၵွၼ်ႇ ၵဝ်ၸင်ႇတေလႆႈၶဝ်ႈထိူၼ်ႇၼိုင်ႈယဝ်ႉ ဢွၵ်ႇထိူၼ်ႇၼိုင်ႈ၊ လိုဝ်ႈတႂ်ႈႁူမ်ႈမႆႉတူၼ်ႈၼိုင်ႈယဝ်ႉ ၵႂႃႇၸူးတူၼ်ႈၼိုင်ႈသေ ယူႇၵႂႃႇ ယႃႇႁႂ်ႈမီးလွင်ႈမႆႈၸႂ်သင်၊ ဢမ်ႇလႆႈထွၵ်ႈတေႃႇၼႃႈၽႂ်သေ ယူႇႁင်းၵူၺ်းၵေႃႉလဵဝ်သေ ၽႄႈတိုၼ်းတၢင်းတိုဝ်းၵမ် ဢၼ်ၽိူၵ်ႇၸိုၼ်ႈၶၢဝ်သႂ်ၼၼ်ႉၼေႃး။ မိူဝ်ႈလႂ်ၵွၼ်ႇ ၵဝ်ၸင်ႇတေ ဢမ်ႇလႆႈၵူဝ်ၽေးၶဵၼ်သင်သေ ၶိုၼ်ႈႁူၺ်ႈလူင်းလွႆ တီႈၼႂ်းထိူၼ်ႇ ႁိမဝၼ်ႇတႃႇၼၼ်ႉၵေႃႉလဵဝ်ၼေႃး။ တေႃႈလဵဝ် ၵွပ်ႈတၢင်းမႆႈၸႂ်ၵူႈပိူင်ပိူင် ယႃႉၵဝ်းၸႂ်ၵဝ် ပေႃးသုၵ်ႉယုင်ႈဝႆႉလႄႈ မိူဝ်ႈလႂ်ၵွၼ်ႇ ၵဝ်ၸင်ႇတေတတ်းၶၢတ်ႇပၢတ်ႇပႅတ်ႈလႆႈ ၸႂ်ၸိူဝ်းၼၼ်ႉသေ မႄးႁဵတ်းႁႂ်ႈၽဵင်ႇပဵင်း ဝႆႉလႆႈတီႈလဵဝ်ၵၼ် မိူၼ်ၸိူင်ႉၼင်ႇ ၸဝ်ႈတိင်ႇၵတ်ႉၶႅၼ်ႇၼႃႇၼၼ်ႉ ၶဵင်ႈသၢႆတိင်ႇမၼ်းၸဵတ်းသဵၼ်ႈ ပေႃးၶဝ်ႈၽဵင်ႇၵၼ်သေ ဝၢၼ်ႁူလီထွမ်ႇငိၼ်းမႃးၼၼ်ႉၼေႃး။ တၢင်းၽွတ်ႈၼွင်ႇၵႃႇမ ဢၼ်မတ်ႉၶွတ်ႇၸုင်ၸၼ် ၽီၵူၼ်းႁဝ်းၸိူဝ်းၼၼ်ႉၵေႃႈ မိူဝ်ႈလႂ် ၸင်ႇတေလႆႈဢဝ်ၺၢၼ်ႇသေ တႅပ်းၶၢတ်ႇပၢတ်ႇပႅတ်ႈ ပေႃးပုတ်းပင်းၶၢတ်ႇၵႂႃႇ ၸိူင်ႉၼင်ႇၵူၼ်းႁဵတ်းၼင်ၶဝ် ဢဝ်ႁဵတ်းၶႅပ်းတိၼ် ဢဝ်သိဝ်ႇဢၼ်ၽၢႆၽၢႆသေ တတ်းပၢတ်ႇၼင် ႁႂ်ႈၽဵင်ႇပဵင်းၵၼ်ၼၼ်ႉသေလႄႈ ႁွတ်ႈထိုင်ၵႂႃႇ တီႈၶႅမ်ႉလီၼၼ်ႉၼေႃး“ ၼႆ။