ၸၢတ်ႈၸဝ်ႈမႁႃႇၸၼၵ/လၢတ်ႈၼႄသပ်းလႅင်း လုၵ်ႈႁၵ်ႉပႅင်း
ပေႃးၼေႃႇၶမ်းၸဝ်ႈ လႆႈငိၼ်းၶေႃႈၵႂၢမ်းၼၼ်ႉယဝ်ႉၵေႃႈ မၼ်းၸင်ႇဝူၼ်ႉဝႃႈ "ၸၢႆးဢွၼ်ႇၶဝ်ၸိူဝ်းၼႆႉ ဝႃႈႁင်းၵဝ်ၵႂၢမ်းၸိူင်ႉၼင်ႇၼႆ။ ၶေႃႈၵႂၢမ်းၶဝ်ၸိူဝ်းၼၼ်ႉ လႅပ်ႈတေၸႂ်ႈယူႇႁိုဝ်ၵေႃႈဢမ်ႇႁူႉ၊ မႄႈႁဝ်းၼႆႉ ဢဝ်မႃႇယႃႇၼၢင်းယိင်းၶဝ်သေလႄႈ ဢမ်ႇႁတ်းလၢတ်ႈၼႄၵဝ် ဢၼ်မၢၼ်ႇမႅၼ်ႈတႄႉမၼ်းယူဝ်း။ ၵဝ်တေႁဵတ်းႁႂ်ႈမႄႈႁဝ်း လၢတ်ႈၼႄလွင်ႈတႄႉမၼ်းၵွၼ်ႇ" ဝူၼ်ႉၼင်ႇၼႆယူႇ။ ဝၢႆးၼၼ်ႉ ထိုင်မႃးဝၼ်းၼိုင်ႈ ၼေႃႇၶမ်းၸဝ်ႈၸင်ႇဢူမ်တိၼ်ႇၼူမ်းမႄႈမၼ်းသေ ထၢမ်ဝႃႈ "ၸဝ်ႈမႄႈဢိူၺ်း ပေႃးၶဝ်ၶႃႈၼႆႉ ပဵၼ်ၽႂ်ၼႆ လၢၼ်ႈၼႄၶႃႈ ဢၼ်ၸိုဝ်ႈၸႂ်ႈမၢၼ်ႇမႅၼ်ႈမၼ်းလႄႈ၊ ပေႃးဢမ်ႇၼၼ်တႄႉ လုၵ်ႈၸၢႆးတေၶူပ်းတိၼ်ႇၼူမ်းမႄႈႁဝ်းၶၢတ်ႇပႅတ်ႈဢေႃႈ" ၼႆယူႇ။ မႄႈမၼ်းၵေႃး ဢမ်ႇႁတ်းသိူင်ႇယဝ်ႉလႄႈ မၼ်းၸင်ႇမွၵ်ႇဝႃႈ "လုၵ်ႈၸၢႆးႁၵ်ႉဢိူၺ်း မႂ်းၼႆႉ ပဵၼ်လုၵ်ႈၸၢႆး ၸဝ်ႈၶုၼ်လူင်ဢရိထၸၼၵ ဢၼ်ဢုပ်ႉပိူင်ႇၽွင်းငမ်း မိူင်းလူင် မိတ်ႉထိလႃႇၼၼ်ႉဢိူဝ်ႈ" ၼႆ သိုပ်ႇၶႆႈၼႄ လွင်ႈတၢင်း ဢၼ်ၶႃမႄႈလုၵ်ႈ လႆႈႁွတ်ႈၽႅဝ်မႃးတီႈမိူင်းၼႆႉယဝ်ႉ။
တႄႇဢဝ်ယၢမ်းၼၼ်ႉမႃး ၼေႃႇၶမ်းၸဝ်ႈၼႆႉ ပေႃးၸၢႆးဢွၼ်ႇၶဝ်ၸိူဝ်းၼၼ်ႉ ဝႃႈမၼ်းပဵၼ် လုၵ်ႈမႄႈမၢႆႈၸိုင် ဢမ်ႇဢွၵ်ႇတေႃးသၸႂ်လမ် ၸိူင်ႉၼင်ႇဢွၼ်တၢင်း။ ၵူၺ်းသွၼ်ႇဝႃႈ "ပွႆႇၶဝ်ဝႃႈလႄႈ" ၼႆယူႇ။ ႁဵတ်းၼၼ်သေ လဵၼ်ႈမူၼ်ႈမူၼ်ႈသိူဝ်းသိူဝ်း ယႂ်ႇမႃႈၵႃႈသုင် ထိုင်ပၢၼ်မႃးယဝ်ႉၵေႃႈ ၸင်ႇၵႂႃႇသွၼ်ႁဵၼ်းဢဝ် လွင်ႈႁူႉတၢင်းမေႃ ပေႇတၢင်ႇ၊ ထမ်ႇမသၢတ်ႈ၊ သၢၼ်း၊ လင်ႇၵႃႇ၊ သတ်ႉတႃႇ၊ ၼီႇတိ တႄႇၵႂႃႇ တီႈသြႃႇၶူးဝႃးလူင် ၻိသႃႇပႃႇမွၵ်ႉၶၼၼ်ႉသေ ထိုင်မႃး ၸူဝ်ႈၶူပ်ႇလႆႈသိပ်းႁူၵ်းၵူၺ်း ပေႃးမေႃပၺ်ႇၺႃႇၵူႈပိူင် သမ်ႉပေႃးယဝ်ႉတူဝ်ႈထိုင်တီႈၵႂႃႇယူႇယဝ်ႉ။