ၸၢတ်ႈၸဝ်ႈမႁႃႇၸၼၵ/ၼၢင်းၸုမ်ႈလူင် ႁွတ်ႈထိုင် မိူင်းၵႃႇလၸမ်ႇပႃႇၼၵူဝ်ႇ

လုၵ်ႉတီႈ ဝီႇၶီႇပပ်ႉ မႃး

ၸဝ်ႈၶုၼ်ဢိၼ်းၵေႃႈ ဢဝ်လေႃႉမႃႉရထႃးမၼ်းၸဝ်ႈ တၢင်ႇဢဝ်ၼၢင်းၸုမ်ႈလူင်သေ ၵႅပ်ႉၼိုင်ႈၵူၺ်း သမ်ႉပေႃးႁွတ်ႈထိုင်ၵႂႃႇ တီႈႁွင်ႈၼမ်ႉႁွင်ႈၼိုင်ႈ ဢၼ်ယၢၼ်ၵႆၵၼ် တင်းၸိုင်ႈမိူင်းမိထိလႃႇ သၢမ်သိပ်းယူႇၸၼႃႇၼၼ်ႉယူႇယဝ်ႉ။ ပေႃးဝႃႈ ႁွတ်ႈထိုင်တီႈၼၼ်ႉယဝ်ႉၵေႃႈ ၸင်ႇၵိုတ်းလေႃႉမႃႉရထႃးမၼ်းၸဝ်ႈသေ ပူၵ်းၼၢင်းၸုမ်ႈလူင်သေယဝ်ႉ လၢတ်ႈဝႃႈ "လုၵ်ႈယိင်းဢိူၺ်း လူင်းၵႂႃႇဢၢပ်ႇၼမ်ႉ ၼႂ်းႁွင်ႈၼႆႉလႄႈ။ ပေႃးဝႃႈ ဢၢပ်ႇၼမ်ႉယဝ်ႉၵေႃႈ ဢဝ်ၼုင်ႈၶူဝ်းလဵင်း ဢၼ်မီးဝႆႉတီႈႁူဝ်ၼွၼ်းမႂ်းၼၢင်းၼၼ်ႉသေ ၵိၼ်ၶဝ်ႈၽၵ်းတၢင်းၵိၼ် ဢၼ်မီးဝႆႉယူႇ တီႈၼႂ်းလေႃႉမႃႉရထႃးၼႆႉလႄႈ" ၼႆယဝ်ႉ။

ၼၢင်းၸုမ်ႈလူင်ၵေႃႈ လုၵ်ႉသေႁဵတ်းၸွမ်းၼင်ႇ ဢၼ်ၸဝ်ႈၶုၼ်ဢိၼ်းလၢတ်ႈၼၼ်ႉတင်းသဵင်ႈသေယဝ်ႉ ၶိုၼ်းမႄးၼွၼ်းၶိုၼ်းတီႈ ၼိူဝ်ၵူႇ ဢၼ်မၼ်းၼၢင်းၼွၼ်းလႄႈ ဢဝ်ၼွၼ်းလပ်းၵႂႃႇထႅင်ႈယဝ်ႉ။ ၸဝ်ႈၶုၼ်ဢိၼ်းၵေႃႈ ႁေႃႈလေႃႉမႃႉရထႃးမၼ်းၵႂႃႇလွႆးလွႆးသေ မိူဝ်ႈထိုင်မႃးၶၢဝ်းယၢမ်းတၢမ်းၶမ်ႈၼၼ်ႉ လေႃႉမႃႉရထႃးၼၼ်ႉ ႁွတ်ႈထိုင်ၵႂႃႇ တီႈၽၵ်းတူဝဵင်း မိူင်းၵႃႇလၸမ်ႇပႃႇၼၵူဝ်ႇ ၽၢႆႇတၢင်းၸၢၼ်းယဝ်ႉ။ ၵမ်းၼၼ် မၼ်းၸဝ်ႈၸင်ႇပူၵ်း ၼၢင်းၸုမ်ႈလူင်လုၵ်ႉယဝ်ႉ။ မိူဝ်ႈၼၢင်းၸုမ်ႈလူင် တိုၼ်ႇမႃးသေ ငွၵ်ႈတူၺ်းတၢင်းၼွၵ်ႈလေႃႉမႃႉရထႃးၼၼ်ႉ ၵွပ်ႈလႆႈႁၼ်ဝဵင်း၊ ၽၵ်းတူဝဵင်း တီႈၵူၼ်းပႂ်ႉယၢမ်း၊ တီႈပိူၼ်ႈႁၢင်ႈဝႆႉ ၶိူင်ႈလၢၵ်ႈၼၢၵ်ႈ တႄႇၵႂႃႇၸိူဝ်းၼႆႉလႄႈ ၸင်ႇထၢမ်ဝႃႈ "ၸဝ်ႈပူႇၶႃႈ ဝဵင်းတၢင်းၼႃႈၼႆႉ ပဵၼ်ဝဵင်းသင်ၶႃႈ" ၼႆယဝ်ႉ။

ၸဝ်ႈၶုၼ်ဢိၼ်း ဢၼ်ပွမ်ႁဵတ်းၸဝ်ႈပူႇၼၼ်ႉၵေႃႈ ၸင်ႇလၢတ်ႈဝႃႈ "လုၵ်ႈယိင်းဢိူၺ်း မိူင်းၵႃလၸမ်ႇပႃႇၼၵူဝ်ႇဢၼ်ဝႃႈၼၼ်ႉ ပဵၼ်ဝဵင်းၼႆႉယဝ်ႉ" ၼႆ။

ၸၢင်းၸုမ်ႈလူင်ၼႆႉ ပေႃးလႆႈငိၼ်းၵႂၢမ်း ၸဝ်ႈၶုၼ်ဢိၼ်းယဝ်ႉၵေႃႈ ၸင်ႇလၢတ်ႈဝႃႈ "ၸဝ်ႈပူႇၶႃႈ ၸဝ်ႈပူႇႁဝ်းလၢတ်ႈၸိူင်ႉႁိုဝ်ၶႃႈၵေႃ၊ ၶႃႈၼၢင်းႁဝ်းယၢမ်ႈလႆႈငိၼ်းဝႆႉဝႃႈ မိူင်းၶႃႈၼၢင်းႁဝ်းၶဝ်လႄႈ တင်းမိူင်းၵႃႇလၸမ်ႇပႃႇၼၵူဝ်ႇၼႆႉ ယၢၼ်ၵၼ်ဝႆႉ ႁူၵ်းသိပ်းယူႇၸၼႃႇၼႆၶႃႈဢေႃႈ။ ႁဝ်းၶႃႈၶီႇလေႃႉမႃႉရထႃးမႃးၼႆႉ တိုၵ်ႉၸင်ႇႁႃမီးဝၼ်းၼိုင်ႈၵူၺ်း သမ်ႉပေႃးၽႅဝ်ထိုင်ယဝ်ႉၶႃႈႁႃႉ ၸဝ်ႈပူႇ" ၼႆယဝ်ႉ။

ၸဝ်ႈၶုၼ်ဢိၼ်း ဢၼ်ပွမ်ႁဵတ်းၸဝ်ႈပူႇၼၼ်ႉၵေႃႈ ၸင်ႇတွပ်ႇဝႃႈ "မႅၼ်ႈယဝ်ႉ။ ယၢၼ်ၵႆၵၼ်ႁူၵ်းသိပ်းယူႇၸၼႃႇယူႇတႄႉယဝ်ႉ။ ၵူၺ်းၵႃႈ ပူႇသူတႄႉ ၵွပ်ႈပိူဝ်ႈဝႃႈ ႁူႉသဵၼ်ႈတၢင်းလတ်းမၼ်းလီလီသေ လတ်းမႃးတၢင်းသိုဝ်ႈလႄႈ ၸင်ႇၽႅဝ်မႃးလႆႈဝၼ်းလဵဝ်ၵူၺ်းၼၼ်ႉယဝ်ႉ လုၵ်ႈယိင်းဢိူၺ်း" ၼႆယဝ်ႉ။

ၸဝ်ႈၶုၼ်ဢိၼ်း ဢၼ်ပွမ်ႁဵတ်းၸဝ်ႈပူႇၼၼ်ႉ ပေႃးဝႃႈမၼ်းတွပ်ႇၵႂႃႇၸိူင်ႉၼၼ်ယဝ်ႉၵေႃႈ ၸင်ႇသိုပ်ႇလၢတ်ႈထႅင်ႈဝႃႈ "လုၵ်ႈယိင်းဢိူၺ်း တီႈဢၼ်လုၵ်ႈယိင်းၶႂ်ႈထိုင်ၼၼ်ႉတႄႉ တေႃႈလဵဝ်ႁွတ်ႈထိုင်ယဝ်ႉ။ ၵူၺ်းၵႃႈ ပူႇသူၼႆႉတႄႉ တေလႆႈသိုပ်ႇၵႂႃႇၶၢဝ်းတၢင်းထႅင်ႈၵွၼ်ႇ။ လုၵ်ႈယိင်းလူင်းတီႈၼႆႈသေ ၶဝ်ႈၵႂႃႇၼႂ်းဝဵင်းလႄႈၼႃႈ" ၼႆသေ ႁႂ်ႈၼၢင်းၸုမ်ႈလူင် လူင်းလေႃႉယဝ်ႉ။ မၼ်းႁဵတ်းၵဵင်ႈႁေႃႈလေႃႉမႃႉရထႃးမၼ်းၵႂႃႇ။ မိူဝ်ႈသုတ်းသၢႆတႃၼၢင်းၸုမ်ႈလူင်ၼၼ်ႉ မိူဝ်းၶိုၼ်းတီႈၼႂ်း မိူင်းၽီတႃႇဝတိင်ႇသႃႇပုၼ်ႉယဝ်ႉ။ ၼၢင်းၸုမ်ႈလူင်ၵေႃႈ ၵႂႃႇလိုဝ်ႈတီႈၼႂ်းသႃလႃးဢၼ်ဢမ်ႇပေႃးၸမ်ပေႃးၵႆတင်း ၽၵ်းတူဝဵင်းၼႃႈတၢင်းၸၢၼ်းၼၼ်ႉယူႇယဝ်ႈ။