ၸၢတ်ႈၸဝ်ႈမႁႃႇၸၼၵ/ၶုၼ်ဢိၼ်း လူင်းမႃးၸွႆႈထႅမ်ႈ ၼၢင်းၸုမ်ႈလူင်

လုၵ်ႉတီႈ ဝီႇၶီႇပပ်ႉ မႃး

ယၢမ်းၼၼ် ၵွပ်ႈၽုင်းၵၢမ်ႇၼေႃႇၶမ်းၸဝ်ႈႁဝ်း ဢၼ်တိုၵ်ႉယူႇသဝ်းဝႆႉယူႇ တီႈၼႂ်းတွင်ႉၼၢင်းၸုမ်ႈလူင်ၼၼ်ႉလႄႈ တႅၼ်ႈၵႅဝ်ႈပလၢင်ႇ ဢၼ်မီးယူႇတီႈငဝ်ႈမႆႉတွင်း ၼႂ်းမိူင်းၽီတႃႇဝတဵင်ႇသႃႇ ဢၼ်ၼႃႈယၢဝ်းမၼ်းမီး ႁူၵ်းသိပ်းယူႇၸၼႃႇ၊ ၼႃႈပွတ်းမၼ်းမီး ႁႃႈသိပ်းယူႇၸၼႃႇ၊ တၢင်းသုင်မၼ်းမီး သိပ်းႁႃႈယူႇၸၼႃႇသေ မီးသီလႅင်ဝႆႉ မိူၼ်ၸိူင်ႉၼင်ႇ မွၵ်ႇသိပ်းသွင်ၵီႈယူႇၼၼ်ႉ ဢဝ်ၶဵင်ႈလူင်မႃး မိူၼ်ၸိူင်ႉၼင်ႇ ၼႃႈၵွင်သေ ႁဵတ်းႁႂ်းၸဝ်ႈၶုၼ်ဢိၼ်း ပေႃးလႆႈတူၵ်းၸႂ်ၵႂႃႇ၊ ပဵၼ်ၸႂ်ဢမ်ႇလီဢမ်ႇငၢမ်းၵႂႃႇယဝ်ႉ။ (သင်ဝႃႈၸဝ်ႈၶုၼ်ဢိၼ်း မႃးၼင်ႈၼိူဝ်ပလၢင်ႇၼၼ်ႉၸိုင်ႈ ၵွပ်ႈမၼ်းဢူၼ်ႈၼႃႇလႄႈ ယူပ်ႈလူင်းၵႂႃႇ ပေႃးပဵင်းဢႅင်ႈမၼ်းၸဝ်ႈယဝ်ႈ)။

ၵွပ်ႈၼၼ် ၶုၼ်ဢိၼ်းမႆႈၸႂ်သေဝႃႈ "ၸၢၼ်ႈပၢၼ်ၸဝ်ႈၶုၼ်ဢိၼ်းၵဝ်ၼႆႉ တေသုတ်းသဵင်ႈယဝ်ႉႁိုဝ်ၼေႃး၊ ၵွပ်ႈလွင်ႈသင်လႄႈ ပလၢင်ႇႁူင်းသႅင်ၵဝ် လႆႈပဵၼ်ၸိူင်ႉၼႆၵႂႃႇၼေႃး" ၼႆယဝ်ႉ။ ဝၢႆးၼၼ်ႉ ပေႃးဝႃႈမၼ်းတူၺ်းမႃး ၼႂ်းမိူင်းၵူၼ်းၼႆ ၸင်ႇလႆႈႁူႉႁၼ်မႅၼ်ႈ လွင်ႈဝႃႈ "ၸဝ်ႈၼၢင်းၸုမ်ႈလူင် ၸဝ်ႈၶုၼ်ဢရိတ်ႉထၸၼၵၼၼ်ႉ လႆႈပၢႆးဢွၵ်ႇၵွပ်ႈသုမ်းသိုၵ်း၊ လႆႈတူၵ်းတၢင်းယၢပ်ႇၽိုတ်ႇၶၢၼ်ၸႂ်သေယဝ်ႉ ဢမ်ႇႁၼ်သဵၼ်ႈတႃႈသၢႆတၢင်း တႃႇတေပႆ သမ်ႉမီးသၼ်ႇထေႇ ၵေႃႉဢၼ်မီး ၽုင်းၵၢမ်ႇယႂ်ႇမႃးတႄႇလႄႈ ပလၢင်ႇႁူင်းသႅင်ၵဝ် ၸင်ႇလႆႈပဵၼ်ၸိူင်ႉၼႆယဝ်ႉ"။ ပေႃးဝႃႈမၼ်းၸဝ်ႈ လႆႈႁူႉႁၼ်ထိုင် လွင်ႈတၢင်းမၼ်းလီလီယဝ်ႉၵေႃႈ ၸင်ႇဝူၼ်ႉဝႃႈ "ဢေႃး ၵေႃႉၸၢႆးဢၼ်မီးၽုင်းမီးၵၢမ်ႇ ထုၵ်ႇလီလႆႈပဵၼ်ၸဝ်ႈပဵၼ်ၶုၼ်ၸိူင်ႉၼႆၼႆႉ ဢမ်ႇထုၵ်ႇလီႁႂ်ႈမၼ်းၸၢႆး လႆႈထူပ်းၺႃး တၢင်းယၢပ်ႇၽိုတ်ႇၸိူင်ႉၼႆ။ ၸၢႆးဢွၼ်ႇၵေႃႉၼႆႉ ဢႃႇယုမၼ်းတေယိုၼ်းယၢဝ်းသေ သမ်ႉပဵၼ်ၵေႃႉဢၼ် တေႁဵတ်းႁႂ်ႈ ၵူၼ်းတင်ၼမ်တင်းလၢႆ ပေႃးတေမၢၵ်ႈမီးလီပဵ် ၵတ်းယဵၼ်သိူဝ်းသႃႇၵႂႃႇလႆႈၼၼ်ႉယဝ်ႉ။ ၵေႃႉၸၢႆး ဢၼ်မီးၼမ်ႉၸႂ်လီသေ မီးတၢင်းႁတ်းႁၢၼ်ၵတ်ႉၶႅၼ်ႇၸိူင်ႉၼႆၼႆႉ ၵဝ်ဢမ်ႇထုၵ်ႇလီႁႂ်ႈမၼ်း လႆႈထူပ်းၺႃးၽေးၶဵၼ်။ ၵဝ်ထုၵ်ႇလီလႆႈ လူင်းၵႂႃႇၸွႆႈထႅမ်မၼ်းၸၢႆးယူႇယဝ်ႉ" ၼႆသေ မၼ်းၸဝ်ႈၸင်ႇလူင်းမႃး တီႈၼႂ်းမိူင်းၵူၼ်းသေယဝ်ႉ ပူင်သၢင်ႈႁဵတ်းလေႃႉမႃႉရထႃး ဢၼ်ပႃးႁိူၼ်းၼၼ်ႉသေ တူဝ်မၼ်းၸဝ်ႈၵေႃႈ ပွမ်ႁဵတ်း ပူႇထဝ်ႈသေလႄႈ ႁေႃႈလေႃႉမႃႉရထႃးမၼ်းၵႂႃႇၸူး သႃလႃး တီႈဢၼ် ၼၢင်းၸုမ်ႈလူင်ယူႇသဝ်းဝႆႉၼၼ်ႉယူႇယဝ်ႉ။

ပေႃးႁွတ်ႈထိုင်တီႈ သႃလႃးၼၼ်ႉယဝ်ႉၵေႃႈ ၸင်ႇၵိုတ်းလေႃႉမႃႉရထႃးမၼ်းၸဝ်ႈသေ ႁဵတ်ႈၵဵင်ႈလၢမ်းလိမ်းထၢမ်ဝႃႈ "တီႈၼႂ်းသႃလႃးၼႆႉ ၵေႃႉဢၼ်ၶႂ်ႈၵႂႃႇတီႈ မိူင်းၵႃႇလၸမ်ႇပႃႇၼၵူဝ်ႇၼၼ်ႉ မီးယူႇႁႃႉ" ၼႆယဝ်ႉ။ ၸဝ်ႈၼၢင်းၸုမ်ႈလူင်ၵေႃႈ ပေႃးဝႃႈ လႆႈငိၼ်းၵႂၢမ်းၼၼ်ႉၸိုင် ၸင်ႇလၢတ်ႈဝႃႈ "ၸဝ်ႈပူႇၶႃႈ ၶႃႈၼၢင်းႁဝ်းၶႂ်ႈၵႂႃႇၸွမ်းၶႃႈဢေႃႈ" ၼႆယဝ်ႉ။

ၸဝ်ႈၶုၼ်ဢိၼ်း ဢၼ်ပွမ်ႁဵတ်းပူႇထဝ်ႈၼၼ်ႉၵေႃႈ ၸင်ႇလၢတ်ႈဝႃႈ "လုၵ်ႈယိင်းဢူၺ်း ပေႃးဝႃႈ ၶႂ်ႈၵႂႃႇၸွမ်းၸဝ်ႈပူႇၼႆၵေႃႈ ၶိုၼ်ႈမႃးၼိူဝ်လေႃႉမႃႉရထႃးၼႆႉလႄႈ။ ႁဝ်းတေၵႂႃႇတေႃႈလဵဝ်ယဝ်ႉ" ၼႆယဝ်ႉ။

ၸဝ်ႈၼၢင်းၸုမ်ႈလူင်ၵေႃႈ ၸင်ႇလၢတ်ႈထႅင်ႈဝႃႈ "ၸဝ်ႈပူႇဢိူၺ်း ၵွပ်ႈပိူဝ်ႈဝႃႈ တွင်ႉၶႃႈၼၢင်းႁဝ်းၼႆႉ ပႃးသၼ်ႇထေႇၵေႇဝႆႉၶႃႈလႄႈ ၶႃႈၼၢင်းဢမ်ႇႁတ်းၶီႇလေႃႉမႃႉရထႃးၶႃႈ။ ပေႃးဝႃႈ ၶႃႈၼၢင်းႁဝ်း လႆႈဢဝ်သွင်းဢၼ်ၼႆႉ တၢင်ႇၼိူဝ်လေႃႉမႃႉရထႃးၸဝ်ႈပူႇႁဝ်းၵေႃႈ ပေႃးယဝ်ႉၶႃႈ၊ ၶႃးၼၢင်းႁဝ်း တေပႆၵႂႃႇၸွမ်းလင် လေႃႉမႃႉရထႃးၸဝ်ႈပူႇႁဝ်းလွႆးလွႆးၵူၺ်းၶႃႈယဝ်ႉ" ၼႆယဝ်ႉ။

ၸဝ်ႈၶုၼ်ဢိၼ်း ဢၼ်ပွမ်ႁဵတ်းပူႇထဝ်ႈၼၼ်ႉ ၸင်ႇလၢတ်ႈဝႃႈ "လုၵ်ႈယိင်းဢိူၺ်း ပေႃးဝႃႈမႂ်းၼၢင်း ပႆၵႂႃႇၸွမ်းလင် လေႃႉမႃႉရထႃးၵူၺ်းၼႆ တေႁဵတ်းႁိုဝ်ၽႅဝ်လႆႈ တီႈမိူင်းၸမ်ႇပႃႇၼၵူဝ်ႇ။ မႂ်းၼၢင်းထၢင်ႇဝႃႈ ၸဝ်ႈပူႇၼႆႉ မိူၼ်ၸဝ်ႈလေႃႉမႃႉရထႃးတၢင်ႇၸိူဝ်းၼၼ်ႉႁႃႉ။ ၵူၼ်းၵေႃႉ ဢၼ်မေႃႁေႃႈလေႃႉမၵတ်ႉၶႅၼ်ႇ မိူၼ်ၸိူင်ႉၼင်ႇၸဝ်ႈပူႇၼႆႉ ဢမ်ႇမီးသေၵေႃႉၵူၺ်း။ ၼၢင်းယႃႇပေၵူဝ်၊ ၶိုၼ်ႈမႃးတီႈၼိူဝ် လေႃႉမႃႉရထႃးၼႆႉလႃႈ" ၼႆယဝ်ႉ။

ၸဝ်ႈၼၢင်းၸုမ်ႈလူင်ၵေႃႈ ပေႃးဝႃႈ လႆႈငိၼ်းၵႂၢမ်းၸဝ်ႈပူႇ ဢၼ်ၶုၼ်ဢိၼ်းပွမ်ႁဵတ်းဝႆႉၼၼ်ႉၸိုင် မၼ်းၼၢင်းၸင်ႇမႃးၸူး တၢင်းလင်လေႃႉမႃႉရထႃးယဝ်ႉ။ ပေႃးဝႃႈမၼ်းၼၢင်းႁွတ်ႈထိုင်ၽၢႆႇလင် လေႃႉမႃႉရထႃးယဝ်ႉသေ ဢၢင်ႈတေၶိုၼ်ႈၶီႇလေႃႉမႃႉရထႃးၼၼ်ႉၼႆ ယွၼ်ႉပိူဝ်ႈ ဢူမုၼ်ၸဝ်ႈၶုၼ်ဢိၼ်းလႄႈ ၶိုၼ်ႈလႆႈၵႂႃႇတီႈၼိူဝ် လေႃႉမႃႉရထႃးၼၼ်ႉမဝ်မဝ်ယဝ်ႉ။

မၼ်းၼၢင်းၵေႃႈ ၵႂႃႇမီးယူႇ တီႈၼိူဝ် လေႃႉမႃႉရထႃးၼၼ်ႉယဝ်ႉ။ ပေႃးဝႃႈမၼ်းၼၢင်းၵႂႃႇၼွၼ်း တီႈၵူႇၼိူဝ် လေႃႉမႃႉရထႃးၼၼ်ႉယဝ်ႉၵေႃႈ မၼ်းၼၢင်းၸင်ႇတေႁူႉလႆႈဝႃႈ "ၸဝ်ႈပူႇၵေႃႉၼႆႉ တေဢမ်ႇၸႂ်ႈၵူၼ်း။ ႁဵတ်းႁိုဝ်ၵေႃႈ တေပဵၼ်ၸဝ်ႈၶုၼ်ၽီၵူၺ်းယဝ်ႉ" ၼႆသေ ၵွပ်ႈပိူဝ်ႈဝႃႈ မၼ်းၼၢင်းၵေႃႈ ႁိူဝ်ႉၸႂ်ႁိူဝ်းၶေႃးၼႃႇၵေႃႈၽွင်ႈ၊ သမ်ႉလႆႈၼွၼ်းဝႆႉ တီႈၼိူဝ်ၵူႇ ဢၼ်ၸဝ်ႈၶုၼ်ဢိၼ်းပူင်သၢင်ႈ ႁဵတ်းဝႆႉၼၼ်ႉၵေႃႈပိူင်ၼိုင်ႈလႄႈ ဢဝ်ၼွၼ်းလပ်းၵႂႃႇယဝ်ႉ။