ၸၢတ်ႈၸဝ်ႈမႁႃႇၸၼၵ/ၼေႃႇၶမ်းၸဝ်ႈ ထတ်းႁွႆးလိၼ်ႁႄႉ
ၼၢင်းၸုမ်လူင် သီႇဝလိၵေႃႈ ပႃးတင်း ၽွင်းမိူင်းလူင်ၶဝ်၊ သိုၵ်းႁၢၼ်ၶဝ်တင်းၼမ် ဢွၼ်ၵၼ်ၵႂႃႇၸွမ်းလင် ၼေႃႇၶမ်းၸဝ်ႈယဝ်ႉ။
ၵမ်းၼၼ်ႉ ၼေႃႇၶမ်းၸဝ်ႈႁူႉဝႃႈ ၼၢင်းၸုမ်ႈၶဝ် ၵူၼ်းဝၢၼ်ႈၵူၼ်းမိူင်းၶဝ် ဢမ်ႇၶႂ်ႈပွၵ်ႈၼႆလႄႈ ဝူၼ်ႉၼႂ်းၸႂ်ဝႃႈ "ပေႃးၶဝ်ၵုမ်ႇ ၸွမ်းၵဝ်ႇၵႂႃႇတိၵ်းတိၵ်းၸိုင် တေပဵၼ်ၽေးဢၢၼ်းတရၢႆး တႃႇၵဝ်ႇလႆႈႁဵတ်းရႁၢၼ်းၼၼ်ႉယဝ်ႉ။ ၵွပ်ႈၼႆ ၼင်ႇႁိုဝ် ၶဝ်ပေႃးတေဢမ်ႇၸွမ်းၵဝ်မႃးလႆႈၼၼ်ႉ ၵဝ်တေႁၢမ်ႈႁႄႉၶဝ်ၵွၼ်ႇ" ၼႆ။ မိူဝ်ႈပူၼ်ႉ မိူင်းမိထိလႃႇၵႂႃႇ မွၵ်ႈသီႇသိပ်းၸူဝ်ႈဝူဝ်း (ဢုသၽ)ႁွင်ႉၼၼ်ႉ မၼ်းၸဝ်ႈၶိုၼ်းဝၢႆႈၼႃႇတေႃႇၶဝ်သေ ထၢမ်ၽွင်းမိူင်းၶဝ်ဝႃႈ "ၽွင်းမိူင်းလူင်ၶဝ်ဢိူၺ်း မိူင်းလူင်မိထိလႃႇၼႆႉ ပဵၼ်မိူင်းၽႂ်ၼေႃး" ၼႆယူႇ။ ၵမ်းၼၼ်ႉ ၽွင်းမိူင်းၶဝ်ၸင်ႇတွပ်ႇဝႃႈ "ၸဝ်ႈႁဝ်းၶႃႈၼေႃႈ မိူင်းမိထိလႃႇၼႆႉ ပဵၼ်မိူင်းၸဝ်ႈႁဝ်းတီႈၶႃႈၼေႃး" ၼႆယဝ်ႉ။ ၼေႃႇၶမ်းၸဝ်ႈၵေႃႈ ၸင်ႇဝႃႈ "ၽွင်းမိူင်းလူင်ၶဝ်ဢိူၺ်း မိူင်းၼႆႉ သင်ဝႃႈ ပဵၼ်မိူင်းၵဝ် ၸိူင်ႉၼင်ႇသူဝႃႈၸိုင် ၵဝ်ၸဝ်ႈတေတ်းၶၼ်ႇႁွႆးဝႆႉ တီႈၼိူဝ်သဵၼ်ႈတၢင်းၼႆႉၵွၼ်ႇ။ ၽႂ်တေဢမ်ႇလႆႈၶၢမ်ႈပူၼ်ႉလႅၼ်လိၼ်ၼႆႉသေ ၸွမ်းၵဝ်မႃး။ ပေႃးဝႃႈ ၶၢမ်ႈပူၼ်ႉလႅၼ်လိၼ်ၼႆႉသေ ၸွမ်းမႃးၼႆၸိုင် တေလႆႈၺႃးတၢမ်ႇၶုၼ်ဢိူဝ်ႈ" ၼႆ။ ပေႃးဝႃႈမၼ်းၸဝ်ႈ လၢတ်ႈၸိူင်ႉၼၼ်ယဝ်ႉၵေႃႈ ၸင်ႇဢဝ်ၶွၼ်ႉတဝ်ႉမၼ်းၸဝ်ႈ တတ်းၶၼ်ႇသေ ႁၢမ်ႈဝႆႉယဝ်ႉ။ ဝၢႆးၼၼ်ႉ မၼ်းၸဝ်ႈၸင်ႇ ၵွင်လင်ပႅတ်ႈၶဝ်သေ ၵႂႃႇယူႇယဝ်ႉ။ ၽွင်းမိူင်းလူင်ၶဝ်ၵေႃႈ ယွၼ်ႉပိူဝ်ႈ ၵူဝ်ဢၢမ်းၼၢတ်ႈ ၼေႃႇၶမ်းၸဝ်ႈလႄႈ ၽႂ်ၵေႃႈ ဢမ်ႇႁတ်းၶၢမ်ႈပူၼ်ႉ ႁွႆးမၢႆၼေႃႇၶမ်းၸဝ်ႈ တတ်းဝႆႉၼၼ်ႉ။ ၵူၺ်းလႆႈႁွင်ႉႁႆႈသေ ၵိုတ်းဝႆႉတီႈ ႁွႆးၼၼ်ႉယဝ်ႉ။ ၵမ်းၼၼ်ႉ ၼၢင်းၸုမ်ႈလူင်သီႇဝလိ တူၺ်းၸွမ်း ၼေႃႇၶမ်းၸဝ်ႈသေ ၵွပ်ႈဢမ်ႇဢူတ်းယိူၼ်ႉလႆႈယဝ်ႉလႄႈ ၵိင်ႈၵုၼ်းတီႈႁွႆးထတ်းၼၼ်ႉသေ ဢဝ်တူဝ်မၼ်းၼၢင်းပူၼ်ႉၷႂႃႇ တီႈဢၼ် ၼေႃႇၶမ်းၸဝ်ႈတတ်းၶၼ်ႇဝႆႉၼၼ်ႉ လူၺ်ႈတၢင်းဢမ်ႇႁူႉတူဝ်ၼၼ်ႉယဝ်ႈ။ မိူဝ်ႈဝူႉဝႃႈ ႁဵၼ်းၼၼ်သေ ပူၼ်ႉၵႂႃႇၼၼ်ႉ ၸင်ႇသမ်ႉလုၵ်ႉသေ ဢႅၼ်ႇၸွမ်းၼေႃႇၶမ်းၸဝ်ႈယဝ်ႈ။ ၽွင်းမိူင်းလူင်ၶဝ်တၢင်းလၢႆၵေႃႈ ၶဝ်သွၼ်ႇဝႃႈ ႁွႆးၶၼ်ႇၼၼ်ႉ ဢမ်ႇၸႂ်ႈၽႂ်မႃးမွတ်ႇ။ ၵူၺ်းပဵၼ်ၸဝ်ႈၼၢင်းၸုမ်ႈလူင်မွတ်ႇလႄႈ ဢမ်ႇမီးတၢမ်ႇသင်ယဝ်ႉ ဝႃႈၼႆသေ ဢွၼ်ၵၼ် လႅၼ်ႈၸွမ်းၸဝ်ႈၼၢင်းယဝ်ႈ။
ၵမ်းၼၼ် ၼေႃႇၶမ်းၸဝ်ႈၼႆႉ ႁၼ်ၶဝ်ၸွမ်းမႃးယူႇသေတႃႉၵေႃႈ ဢမ်ႇၸၢင်ႈႁၢမ်ႈတၢပ်ႈလႆႈယဝ်ႉလႄႈ သိုပ်ႇၶၢဝ်းတၢင်းၵႂႃႇ ဢမ်ႇၸမ်ဢမ်ႇၵႆၶဝ်သေ ၵႂႃႇၸူးႁိမဝၼ်ႇတႃႇ ဢၼ်ၵႆယူႇ (60) ယူႇၸၼႃႇၼၼ်ႉယဝ်ႉ။ ၼၢင်းၸုမ်ႈလူင်လႄႈ ၽွင်းမိူင်းၶဝ်ႈၵေႃႈ ပဵၼ်ဢၼ်ၸႂ်လဵၵ်ႉၶေႃးၶူမ်ဝႆႉသေ ဢမ်ႇၶႂ်ႈၽၢတ်ႇယၢၼ်ၼေႃႇၶမ်းၸဝ်ႈ လႄႈ ႁွင်ႉႁွင်ႉႁႆႈႁႆႈသေယဝ်ႉ ဢွၼ်ၵၼ်ၸွမ်းၵႂႃႇတိၵ်းတိၵ်းယဝ်ႉ။ ပေႃးထိုင်မႃး ၵၢင်ၶမ်ႈမိူဝ်ႈလႂ်ဢမ်ႇဝႃႈ ၸဝ်ႈၼၢင်းၸုမ်ႈလူင် ၸႂ်ႉႁဵတ်းသုမ်ႉၵူႈပွၵ်ႈယဝ်ႉ။ ၵူၺ်းၼႃႇ ၼေႃႇၶမ်းၸဝ်ႈၼႆႉ ဢမ်ႇၼွၼ်းၼႂ်းသုမ်ႉၼၼ်ႉသေပွၵ်ႈ။ ၵႂႃႇၼွၼ်းႁင်းၵူၺ်းမၼ်း တီႈဢၼ်ဢမ်ႇၸမ် ဢမ်ႇၵႆၶဝ် သေတီႈတီႈၵူၺ်းယဝ်ႉ။ ႁဵတ်းၼႆသေ ၵႂႃႇၸူး ႁိမဝၼ်ႇတႃႇယူႇ ၵူႈဝၼ်းယဝ်ႈ။