ၸၢတ်ႈၸဝ်ႈမႁႃႇၸၼၵ/ၵဵပ်းလႆႈ ပွတ်းၼိူဝ်ႉပိင်ႈ

ယၢမ်းၼၼ် မီးၵူၼ်းၼႂ်းဝဵင်းၵေႃႉၼိုင်ႈ ၵႂႃႇသိုဝ်ႉၼိူဝ်ႉတီႈၵၢတ်ႇမႃး ပွတ်းၼိုင်ႈသေယဝ်ႉ ဢဝ်မႆႉသဵပ်ႇပဵင်ႈလၢမ်ၾႆးယဝ်ႉ။ ပေႃးသုၵ်းယဝ်ႉၵေႃႈ ဢဝ်တၢင်ႇတီႈၼိူဝ်မႆႉ ပႅၼ်ႈတီႈၼိုင်ႈသေ ဝႆႉႁႂ်ႈမၼ်းၵတ်းယဵၼ်ၼႆယဝ်ႈ။ မိူဝ်ႈမၼ်းတိုၵ်ႉဝၢႆႇတူၺ်းတၢင်ႇတီႈယူႇၼၼ်ႉ မႃတူဝ်ၼိုင်ႈ မႃးၵၢပ်ႈဢဝ်ပွတ်းၼိူဝ်ႉမၼ်းသေ ဢႅၼ်ႇၵႂႃႇတၢင်းၽၵ်းတူဝဵင်း ၽၢႆႇၸၢၼ်းၼၼ်ႉယဝ်ႉ။ ၵမ်းၼၼ် မၼ်းၸင်ႇႁူႉဝႃႈ မႃၵၢပ်ႈဢဝ်ၵႂႃႇၼႆသေ မၼ်းလမ်းၸွမ်းပႃႈလင် မႃ ၼၼ်ႉသေတႃႉၵေႃႈ ၵွပ်ႈဢမ်ႇၶိုတ်းယဝ်ႉလႄႈ မၼ်းၸင်ႇဝႃႈ ၶႂ်ႈသုမ်းၵေႃႈသုမ်းလႃႈၼႆသေ ဝၢႆႇပွၵ်ႈမႃးၶိုၼ်းယူႇယဝ်ႉ။

မိူဝ်ႈၼၼ်ႉ မႅၼ်ႈၽွင်းမိူဝ်ႈ ၼေႃႇၶမ်းၸဝ်ႈလႄႈ တင်း ၼၢင်းၸုမ်ႈၶဝ် မႃးၽႅဝ်တီႈၽၵ်းတူဝဵင်းသေ ႁူပ်ႉၺႃးၵၼ်လႄႈ မႃတူဝ်ၼၼ်ႉၵေႃႈ တူၵ်းၸႂ်တိုၼ်ၽၢၼ်ႈၵႂႃႇသေယဝ်ႉ၊ ပွႆႇပႅတ်ႈပွတ်းၼိူဝ်ႉပိင်ႈ ဢၼ်မၼ်းၵၢပ်ႈမႃးၼၼ်ႉသေ လႅၼ်ႈပၢႆၵႂႃႇပႅတ်ႈတၢင်ႇတီႈယဝ်ႉ။ ၵမ်းၼၼ်ႉ ပေႃးၼေႃႇၶမ်းၸဝ်ႈ လႆႈႁၼ်ပွတ်းၼိူဝ်ႉ ဢၼ်မႃပွႆႇဝၢင်းပႅတ်ႈၼၼ်ႉၸိုင် ဝူၼ်ႉဝႃႈ "ပွတ်းၼိူဝ်ႉဢၼ်ၼႆႉ မႃပေႃးပွႆႇပႅတ်ႈၵႂႃႇသေ ဢမ်ႇၸႂ်ဝၢႆႇတူၺ်းယဝ်ႉ။ ၸဝ်ႈၶွင်မၼ်းၵေႃႈဢမ်ႇမီးယဝ်ႉ။ ၵွပ်ႈၼႆလႄႈ ပွတ်းၼိူဝ်ႉဢၼ်ၼႆႉ ပဵၼ်ၽၵ်းပဵၼ် ပပ်ႉသုၵူႇၸႅတ်ႈၸႅတ်ႈယဝ်ႉ" ၼႆသေ ၵဵပ်းဢဝ် ပွတ်းၼိူဝ်ႉၼၼ်ႉ သႂ်ႇၼႂ်းသီႇပိတ်ႈလိၼ်မၼ်းၸဝ်ႈသေ ဢၢင်ႈတေၵႂႃႇၵိၼ် တီႈႁိမ်းၽင်ႇၼမ်ႉယူႇယဝ်ႉ။

ၵမ်းၼၼ်ႉ ၼၢင်းၸုမ်ႈလူင် လႆႈႁၼ်ၼေႃႇၶမ်းၸဝ်ႈႁဵတ်းၼင်ႇၼၼ်လႄႈ မၼ်းၼၢင်းၸင်ႇဝူၼ်ႉၼႂ်းၸႂ်မၼ်းဝႃႈ "ၸဝ်ႈၶုၼ်လူင်ႁဝ်းၼႆႉ ပေႃးဢမ်ႇမီးၸႂ်ၸပ်းပႅၼ်း ၶူဝ်းလဵင်းၸေးၸိမ်ႇ ဝၢၼ်ႈမိူင်းသင်သေ သမ်ႉဢမ်ႇမီးၼမ်ႉၸႂ်ၵႅၼ်ႇၶႅင် ၶႂ်ႈႁဵတ်းရႁၢၼ်းတႄႉၸိုင် မိူဝ်ႈလဵဝ်ၼႆႉ ႁဵတ်းႁိုဝ်ၵေႃႈ မၼ်းၸဝ်တေဢမ်ႇၵိၼ်လႆႈသၢၵ်ႈမႃ။ ပေႃးဝႃႈ မၼ်းၸဝ်ႈ ၵိၼ်သၢၵ်ႈမႃၼၼ်ႉၸိုင် ပွင်ႇဝႃႈမၼ်းၸဝ်ႈ ဢမ်ႇမီးၸႂ်ၶႂ်ႈဢုပ်ႉပိူင်ႇၼိူဝ်ႁဝ်းသင်သေဢိတ်းယဝ်ႉ" ၼႆသေ ၸင်ႇတၢင်ႇလဝ်ႈဝႃႈ "ၸဝ်ႈၶုၼ်လူင်ဢိူၺ်း သၢၵ်ႈမႃၼႆႉ လီဢဵတ်ႇသဵၼ်ႇၼႃႇၶႃႈ ၸဝ်ႈႁဝ်းဢၢၼ်းတေၵိၼ်သုင်ၼႆၶႃႈႁႃႉ၊ မၼ်းဢမႇၸႂ်ႈတၢင်းၵိၼ် မဵဝ်းၸဝ်ႈမဵဝ်းၶုၼ် ၼႂ်းႁေႃၶဝ်ၵိၼ်သုင်း ဢမ်ႇၸႂ်ႈၶႃႈႁိုဝ်ၼေႃး" ၼႆ။ ပေႃးဝႃႈ ၼေႃႇၶမ်းၸဝ်ႈ လႆႈငိၼ်းၵႂၢမ်း ၸဝ်ႈၸုမ်ႈၸိူင်ႉၼၼ်ႉယဝ်ႉၵေႃႈ မၼ်းၸဝ်ႈပူင်ဝႃႈ "ၸဝ်ႈၼၢင်းၸုမ်ႈလူင်ဢိူၺ်း မႂ်းၼၢင်းၼႆႉ ယွၼ်ႉပိူဝ်ႈဝႃႈ ဢမ်ႇမီးလွင်ႈတၢင်းလၵ်းလႅမ်လႄႈ မႂ်းၼၢင်းဢမ်ႇႁူႉ တီ လွင်ႈဝႃႈၼႆႉ ပဵၼ်ဢႃးႁၢရ်လီ" ၼႆႉသေ ၵႂႃႇၼင်ႈတီႈ ဢၼ် သၢင်ႇတေႃႇ တီႈဢၼ်မီးၼမ်ႉၼၼ်ႉသေ ၵိၼ်ၼိူဝ်ႉဢၼ်လွတ်ႈတၢင်းၽိတ်းၼၼ်ႉသေယဝ်ႉ ၵိၼ်ၼမ်ႉ၊ လၢင်ႉသီႇပိတ်ႈ၊ လၢင်ႉမိုဝ်း မၼ်းၸဝ်ႈယဝ်ႉ။ ၵမ်းၼၼ်ႉ ၸဝ်ႈၼၢင်းလူင်သီႇဝလိၼႆႉ ၵွပ်ႈၶႂ်ႈသႄႉၼေႃႇၶမ်းၸဝ်ႈလႄႈ ၸင်ႇလၢတ်ႈဝႃႈ "ၶုၼ်လူင်မႁႃႇၸၼၵဢိူၺ်း ပေႃးပဵၼ်ၵူၼ်းလီ ၵူၼ်းၸၢႆးၸႅတ်ႈၸၢင်ႇၼႆ ပိၵ်ႉဝႃႈဢမ်ႇလႆႈၵိၼ်သင် သွင်သၢမ်ဝၼ်းၵေႃႈ ပိူၼ်ႈဢမ်ႇၵိၼ် တၢင်းၵိၼ် ၺၢမ်ႉတမ်ႇၸိူင်ႉၼႆသေ ၵူၺ်းတေၶၢမ်ႇဢိုပ်းသေ တၢႆဢဝ်ၵူၺ်း ဢမ်ႇၸႂ်ႈႁိုဝ်ၼေႃး။ ပေႃးၵိၼ် ဢၼ်လီဢဵတ်ႇသဵတ်ႇၼႆႉၸိုင် ဢမ်ႇလႆႈဝႃႈပဵၼ်ၵေႃႉၸၢႆးငၢၼ် ၵေႃႉၼိုင်ႈယဝ်ႉ ဢမ်ႇၸႂ်ႈႁိုဝ်ၼေႃး။

ၼေႃႇၶမ်းၸဝ်ႈ လႆႈငိၼ်းၵႂၢမ်း ၼၢင်းၸုမ်ႈသေ ၵွပ်ႈၶႂ်ႈလၢတ်ႈၼႄ လွင်ႈပွတ်းၼိူဝ်ႉၼၼ်ႉ လွတ်ႈတၢင်းသႄႉၼႄးၼၼ်ႉလႄႈ ၸင်ႇလၢတ်ႈဝႃႈ "ၼၢင်းသီဝလိဢိူၺ်း မႂ်းၼၢင်းၵူၺ်းထၢင်ႇဝႃႈ တၢင်းၵိၼ် ဢၼ်ႁဵတ်းဝႆႉ ၶႅမ်ႉလႅပ်ႈသႅၼ်ႈသႂ်လီ ပႃးၵိရိယႃႇတဵမ်ထူၼ်ႈၼၼ်ႉၵူၺ်း ပဵၼ်တၢင်းၵိၼ်ၽူႈၵူၼ်းလီၼႆယူႇ။ ၵူၺ်းၵႃး ပွတ်းၼိူဝ်ႉပိင်ႈဢၼ်လွတ်ႈတၢင်းၼႄးၼႆႉ မႂ်းၼၢင်းယင်းပႆႇႁူႉ လွင်ႈဝႃႈမၼ်းၶႅမ်ႉမၼ်းလီ။ ၵွပ်ႈသင်ဢၼ်ဝႃႈၼၼ်ႉၸမ်း ၵွပ်ႈဝႃႈ ပွတ်းၼိူဝ်ႉပိင်ႈၼႆႉ ၸဝ်ႈၶွင်ၼ်း လႄႈ တင်းမႃးပႅတ်ႈယဝ်ႉသေ ပဵၼ်ပမ်ႉသုၵူႇၸႅတ်ႈၸႅတ်ႈယဝ်ႉ။ ၵွပ်ႈၼႆ ပေႃးၵိၼ်ၸိုင်ႈ ပဵၼ် သမ်ႇမႃႇဢႃႇၸီႇဝၵၢၼ်လဵင်ႉတွင်ႉၶႅမ်ႉလီယဝ်ႉ။ ဢၼ်ၼႆႉ ႁွင်ႉဝႃႈ တၢင်းၵိၼ် ၽူႈၵူၼ်းမႅတ်ႈၶဝ်ယဝ်ႈ။ ၼၢင်းသီႇဝလိဢိူၺ်း ၵႃႈပဵၼ်တၢင်းၵိၼ်၊ ၶူဝ်းၼုင်ႈတၢင်းမႆ၊ ငိုၼ်းၶမ်းတႄႇၵႂႃႇ ၸိူဝ်းဢၼ်ၵူၼ်းႁဝ်း ယိပ်းတိုဝ်းၸိူဝ်းၼၼ်ႉတင်းလူင် ၵႃႈၶၼ်မၼ်းၼမ်ဢေႇဢမ်ႇဝႃႈ ႁၢင်ႈလီႁၢင်ႈၸႃႉဢမ်ႇဝႃႈ ဢမ်ႇၸၢင်ႈတႅပ်းတတ်းလႆႈဝႃႈ မၼ်းၶႅမ်ႉ၊ မၼ်းတမ်ႇယေႃႈၼႆ။

ဢၼ်ႁဝ်းၸၢင်ႈ မၵ်းမၼ်းလႆႈတႄႉၸိုင် မၼ်းပဵၼ် ၶူဝ်းလဵင်း ဢၼ်ႁဝ်းလႆႈမႃး ၵွပ်ႈၸွမ်းထမ်း ဢမ်ႇၸွမ်းထမ်းၼၼ်ႉၵူၺ်း။ ပိၵ်ႉသမ်ႉဝႃႈ ပဵၼ်ၶူဝ်းလဵင်းၸေးၸိမ် မီးၵႃႈၶၼ်ၼိုင်ႈပေးၵူၺ်းၵေႃႈ ပေႃးလႆႈမႃးၸွမ်းထမ်းၼႆၸိုင် ပဵၼ်ၶူဝ်းဢၼ်ၽူႈၵူၼ်းလီၶဝ် ၵိုင်ႇႁပ်ႉတိုဝ်းၵိၼ်ယဝ်ႈ။ ပေႃးဢမ်ႇၸွမ်းထမ်းၸိုင် ပိၵ်ႉသမ်ႉဝႃႈ ၵိုင်ႇၵႃႈမီးၶၼ်တၢၼ်ႇမိုၼ်ႇလၢၼ်ႉ ပၢၼ်ႉသႅၼ်ၵေႃႈယဝ်ႉ မၼ်းဢမ်ႇၸႂ်ႈ ၶူဝ်းလဵင်းဢၼ်ၶႅမ်ႉလႅ ပုၼ်ႈတႃႇ ၽူႈၵူၼ်းလီၶဝ်။ ၵူၺ်းပဵၼ် ပုၼ်ႈတၢႇ ၵူၼ်းမိူၵ်ႈၶဝ် ယိပ်းတိုဝ်းၵိၼ်ၵူၺ်းယဝ်ႉ ဢၼ်ဝႃႈၼႆႉ မႂ်းၸဝ်ႈၼၢင်း တေႃႈတွင်းဝႆႉ ထုင်းၵႂၢမ်းဢၼ်ပူႇမွၼ်ႇႁဝ်းၶဝ် လၢတ်ႈဝႆႉၼၼ်ႉတႃႉ။ ပွတ်းၼိူဝ်ႉဢၼ်ၵဝ်လႆႈမႃးၼႆႉ တေႁိုဝ်ၵႂႃႇၺၢမ်ႉတမ်ႇၼေႃး" ၼႆ။