ၸၢတ်ႈၸဝ်ႈမႁႃႇၸၼၵ/တွပ်ႇၶေႃႈထၢမ်

မိူဝ်ႈၼၼ် ၶုၼ်လူင်မႁႃႇၸၼၵၼႆႉ ထၢမ်ၽွင်းမိူင်းၶဝ်ဝႃႈ "ၽွင်းမိူင်းဢိူၺ်း ၸွင်ႇယင်းမီး ဢၼ်ၸဝ်ႈၶုၼ်လူင်သူ ပူင်သင်ႇသွၼ်ဝႆႉ သေၸိူဝ်ႉသေပိူင်ယူႇႁိုဝ်ၼေႃး။ သင်ဝႃႈမီး မၼ်းၸဝ်ႈဢဝ်ၶေႃႈၵႂၢမ်းဢၼ်လႂ်သေ သင်ႇသွၼ်ဝႆႉၼေႃး" ၼႆယဝ်ႉ။ ၽွင်းမိူင်းၶဝ်ၵေႃႈ ၸင်ႇတၢင်ႇလဝ်ႈဝႃႈ "ၸဝ်ႈၶုၼ်လူင်တီႈၶႃႈ ဢၼ်ၸဝ်ႈၶုၼ်လူင်ႁဝ်းသင်ႇဝႆႉၼၼ်ႉတႄႉ မၼ်းၸဝ်ႈၵူၺ်းသင်ဝႆႉဝႃႈ "ပေႃးဝႃႈ လုၵ်ႈယိင်းၵဝ်ၸဝ်ႈ ထုၵ်ႇမႅၼ်ႈၸႂ်ယူႇၼႆတႄႉ ပဵၼ်ၽႂ်ၵေႃႈယဝ်ႉ ဢဝ်ႁေႃဝၢၼ်ႈမိူင်းၼႆႉ ဢၢပ်ႈပၼ်မၼ်းလႃႈၼႆဢေႃႈ။ မၼ်းၸဝ်ႈသင်ႇလၢတ်ႈၵႂႃႇယူဝ်းယူဝ်းၵူၺ်းၶႃႈ။ ၵွပ်ႈပိူဝ်ႈဝႃႈ မၼ်းၸဝ်ႈယုမ်ႇယမ်ဝႆႉဝႃႈ လုၵ်ႈယိင်းမၼ်းၸဝ်ႈၼႆႉ မီးတၢင်းမေႃဝူၼ်ႉလႆႈၶႆႈၸၢင်ႈၼႆလႄႈ မၼ်းၼၢင်းတေလိူၵ်ႈႁႃလႆႈ ၵေႃႉဢၼ်ၵိုင်ႇတၢၼ်ႇပဵၼ်ၸဝ်ႈပဵၼ်ၸွမ်ၼၼ်ႉယူႇ ၼႆၶႃႈဢေႃႈ။ မိူဝ်ႈလဵဝ်တႄႉ လုၵ်ႈယိင်းၸဝ်ႈၶုၼ်ၼႆႉ ယွၼ်ႉပိူဝ်ႈမိုဝ်းမၼ်းၼၢင်း ပေႃးယိုၼ်းမႃးၸူး ၸဝ်ႈၶုၼ်ႁဝ်းယဝ်ႉလႄႈ ၶေႃႈသင်ႇဝႆႉဢၼ်ၼႆႉ ပဵၼ်ဢၼ်ယဝ်ႉတူဝ်ႈၵႂႃႇယဝ်ႉၶႃႈ" ဝႃႈၼႆ။ ၶုၼ်လူင်မႁႃႇၸၼၵၵေႃႈ ၶိုၼ်းထၢမ်ထႅင်ႈၵမ်းၼိုင်ႈဝႃႈ "ၽွင်းမိူင်းၶဝ်ဢိူၺ်း လွင်ႈတၢင်ႇဢၼ်ၸွင်ႇမီးထႅင်ႈယူႇႁိုဝ်" ၼႆ။ ၽွင်းမိူင်းၶဝ်ၵေႃႈ ၸင်ႇတၢင်ႇလဝ်ႈထႅင်ႈၵမ်းၼိုင်ႈဝႃႈ "ၸဝ်ႈၶုၼ်လူင်ႁဝ်းတီႈၶႃႈ ထႅင်ႈဢၼ်ၼိုင်ႈတီႈၶႃႈၸမ်ႉ မၼ်းၶုၼ်သင်ဝႃႈ ပေႃးလုၵ်ႈယိင်းၽွမ်ႉလႆႈၸႂ်ယူႇတႄႉၸိုင် တႃႇတေဢၢပ်ႈပၼ်ႁၢင်ႈႁေႃၼၼ်ႉ တိုၼ်းလႆႈယူႇၵူၺ်း။ ဢိၵ်ႇသမ်ႉ ပလၢင်ႇဢၼ်ၼႆႉ ႁူဝ်မၼ်းဝၢႆႇဝႆႉၽၢႆႇတၢင်းလႂ်ၼႆ ႁႂ်ႈတၵ်ႉလၢတ်ႈလႆႈမႅၼ်ႈ ဝႃႈၼႆၶႃႈဢေႃႈ" ၼႆ။ ၵမ်းၼၼ် ၶုၼ်လူင် မႁႃႇၸၼၵၼႆႉ ဝူၼ်ႉဝႃႈ "လွင်ႈပလၢင်ႇဢၼ်ၼႆႉတႄႉ ႁၼ်ယူႇၼႆၵေႃႈ သမ်ႉႁူႉလႆႈယၢပ်ႇ လႄႈ ၼင်ႇႁိုဝ်ပေႃးတေႁူႉလႆႈၼၼ်ႉ ၸင်ႇၸႂ်ႉလၢႆးပရိယႄႇသေ ႁဵတ်းၵဵင်ႈလၢတ်ႈၵႂၢမ်းတေႃႇၼၢင်းသႅင်သေ ပူတ်းဢဝ် ၵုမ်းၶမ်းမၼ်းပၼ်ႁႂ်ႈၼၢင်းသႅင် တႃႇတေတမ်းဝႆႉၼၼ်ႉယဝ်ႈ။ ၼၢင်းသႅင်ၵေႃႈ တေဝႃႈ ယိပ်းၵုမ်းၶမ်းဝႆႉယူႇၵေႃႈ ပႆသၢင်ႇထုၵ်ႇ၊ တေဝႆႉၼႂ်းၵႄႈဢူၵ်းၵေႃႈ ပႆႇသၢင်ႇထုၵ်ႇ၊ တေဝႃႈ ဢဝ်ဝႆႉတီႈတၢင်ႇၵေႃႉၵေႃႈ ပႆႇသၢင်ႇတေႃႇလႄႈ ၸင်ႇတမ်းဝႆႉတီႈႁိမ်း ႁူဝ်ပလၢင်ႇၼၼ်ႉယူႇယဝ်ႉ။

ဝၢႆးသေၼၢင်းသႅင်တမ်းဝႆႉ ၵုမ်းၶမ်းၼၼ်ႉႁိုင်ၵႂႃႇယဝ်ႉတၢၼ်ႇတၢၼ်ႇ ၼေႃႇၶမ်းၸဝ်ႈ ႁဵတ်းၵဵင်ႈဢမ်ႇတွင်းၵႂၢမ်းၽွင်းမိူင်းသေ ၸင်ႇၶိုၼ်းထၢမ်ဝႃႈ "ၽွင်းမိူင်းၶဝ်ဢိူၺ်း ၵႂၢမ်းဢၼ်ႁဝ်းၵုမ်ၵၼ်ဝႆႉမိူဝ်ႈၵႆႈၼၼ်ႉ ဝႃႈႁိုဝ်ၵေႃ" ၼႆ။ ၵမ်းၼၼ် ပေႃးၽွင်းမိူင်းၶဝ် ၶိုၼ်းတၢင်ႇလဝ်ႈၶေႃႈၵႂၢမ်း မိူဝ်ႈၵႆႈၼၼ်ႉယဝ်ႉၸိုင် ၸဝ်ႈၶုၼ်ၸင်ႇပူင်ဝႃႈ "ၽွင်းမိူင်းၶဝ်ဢိူၺ်း လွင်ႈဢၼ်ၼႆႉ ပဵၼ်ဢၼ်ႁူႉလႆႈယၢပ်ႇတႄႉယဝ်ႉ။ ၵွပ်ႈၵဝ်ပဵၼ်ၽူႈၵိုင်ႇထူၵ်ႈႁၢင်ႈႁေႃလႄႈ ၵဝ်ၸဝ်ႈဝူၼ်ႉတူၺ်းဢဝ်ၵူၺ်းၵေႃႈ ၵဝ်ပေႃးႁူႉႁၼ် ဢၼ်မၢၼ်ႇမႅၼ်ႈမၼ်းယဝ်ႉ။ တၢင်းၼႆႉၸမ်း ပဵၼ်ႁူဝ်ပလၢင်ႇယဝ်ႉၼႆသေ ၸိၼႄတီႈဢၼ်ၼၢင်းသႅင် တမ်းဝႆႉၵုမ်းၶမ်းၼၼ်ႉယဝ်ႉ။

ဝၢႆးလင်ၼၼ်ႉ ၸင်ႇထၢမ်ထႅင်ႈဝႃႈ "ၽွင်းမိူင်းၶဝ်ဢိူၺ်း ပေႃးမီးထႅင်ႈ တၢင်ႇဢၼ်ၼႆၵေႃႈ တၢင်ႇလဝ်ႈမႃးထႅင်ႈလႄႈ" ၼႆ။ ၽွင်းမိူင်းၶဝ်ၵေႃႈ ၸင်ႇတၢင်ႇလဝ်ႈဝႃႈ "ၸဝ်ႈၶုၼ်ႁဝ်းတီႈၶႃႈ ယင်းမီး ၵၢင်ႇၶႃသႅင်ဝႆႉၼႂ်းႁေႃဢေႃႈ။ ပေႃးႁႅင်းၵူၼ်းႁဵင်ၼိုင်ႈၵွၼ်ႇ ၸင်ႇတေတၢင်ႇသၢႆလႆႈဢေႃႈ။ ပေႃးတၢင်ႇလႆႈသၢႆၵၢင်ႇၶႃသႅင်ၼႆႉၵွၼ်ႇ ၸင်ႇတေဢၢပ်ႈပၼ်ႁၢင်ႈႁေႃမၼ်းၼႆ သင်ႇလၢတ်ႈဝႆႉၼင်ႇၼႆၶႃႈဢေႃႈ" ၼႆ။ ယၢမ်းၼၼ် ၶုၼ်လူင်မႁႃႇၸၼၵၼႆႉ ၸင်ႇပူင်ဝႃႈ "ၽွင်းမိူင်းၶဝ် ပေႃးၸိူင်ႉၼၼ်ႉ ၵဝ်တေယွင်ႈတၢင်ႇတေႃႈလဵဝ်ၼႆႉယဝ်ႉ" ၼႆသေ ၸင်ႇၸႂ်ႉႁႂ်ႈဢဝ်မႃး ၵၢင်ႇၶႃသႅင်ယဝ်ႉ။ ပေႃးဝႃႈဢဝ်မႃးယဝ်ႉၸိုင် ၸင်ႇၼင်ႈယူႇၼိူဝ်ပလၢင်ႇ ၸဝ်ႈႁဝ်းၼင်ႈယူႇၼၼ်ႉသေ ယိင်းၵမ်ဢဝ်ၵၢင်ႇၶႃသႅင်ယဝ်ႈ။ ၵမ်းၼၼ် ၸၼ်တၢင်ႇၶိုၼ်ႈတၢင်ႇလူင်းၼႄ ပရိသၢတ်ႈၽွင်းမိူင်းၶဝ်တူၺ်းသေယဝ်ႉ ၶိုၼ်းတမ်းဝၢင်းဝႆႉ ၵၢင်ႇၶႃသႅင်ယဝ်ႉ။ သမ်ႉၶိုၼ်းထၢမ်ထႅင်ႈဝႃႈ "ၽွင်းမိူင်းၶဝ်ဢိူၺ်း ပေႃႈသၢးမီးထႅင်ႈတၢင်ႇဢၼ်ၼႆ တၢင်ႇလဝ်ႈၼႄမႃႈထႅင်ႈလႄႈ" ၼႆယဝ်ႉ။ ၽွင်းမိူင်းၶဝ်ၵေႃႈ ၸင်ႇလဝ်ႈဝႃႈ "ပေႃးဝႃႈၽူႈလႂ် ၽႂ်ဢဝ်ဢွၵ်ႇလႆႈ မေႃႈၶမ်းလူင် သိပ်းႁူၵ်ႈလုၵ်ႈၼႆၸိုင် ၸင်ႇဢဝ်ႁၢင်ႈႁေႃႈဢၢပ်ႈမၼ်းတႃႉ" သင်ဝႆႉၼင်ႇၼႆဢေႃႈ။ ၼေႃႇၶမ်းၸဝ်ႈၵေႃႈ ၸင်ႇထၢမ်ဝႃႈ "ၽွင်းမိူင်းၶဝ် တီႈဝႆႉမေႃႈၶမ်းလူင်ၼၼ်ႉ ဢမ်ႇသင်ႇဝႆႉလွင်ႈသင်သေဢိတ်းႁႃႉ" ၼႆလႄႈ ၽွင်းမိူင်းၶဝ်ၵေႃႈ ၸင်ႇတၢင်ႇလဝ်ႈဝႃႈ "ဢၼ်ၸဝ်ႈၶုၼ်လူင်သင်ႇဝႆႉၼၼ်ႉ မီးၶႃႈဢေႃႈ" ၼႆယဝ်ႉ။ ၵမ်းၼၼ် ၽွင်းမိူင်းၶဝ်ၵေႃႈ တၢင်ႇလဝ်ႈၵႂႃႇသိပ်းႁူၵ်းၵႃႇထႃႇ "သုရိယုၵ်ႉ ၵမၼေႇၼိထိ" ၼႆႉ ၸိူင်ႉၼင်ႇ ဢၼ်ၶုၼ်လူင်ပေႃးလၸၼၵ သင်ႇလၢတ်ႈဝႆႉၼၼ်ႉယဝ်ႈ။

ပေႃးဝႃႈလႆႈငိၼ်းၵႂၢမ်းၶဝ်ယဝ်ႉၼႆ ၼေႃႇၶမ်းၸဝ်ႈႁူႉႁၼ်ၵႂႃႇတီႈပွင်ႇၵႃႇထႃႇ ပေႃးတၢၼ်ႇလိူၼ်မူၼ်းယူႇၼိူဝ်ၵၢင်ႁၢဝ် လွတ်ႈမွၵ်ႇၵုမ်ႈၼၼ်ႉ တႅၵ်ႇတႅၵ်ႇလႅင်းလႅင်းယဝ်ႉ။ ၵမ်းၼၼ် ၶုၼ်လူင်မႁႃႇၸၼၵၸင်ႇလၢတ်ႈဝႃႈ "ၽွင်းမိူင်းၶဝ်ဢိူၺ်း မိူဝ်ႈၼႆႉတႄႉ ဢမ်ႇမီးၶၢဝ်းမၼ်း တေႃတေဢဝ်ဢွၵ်ႇမေႃႈၶမ်းလူင်ယဝ်ႈ။ ပေႃးမိူဝ်ႈၽုၵ်ႈၵၢင်ၼႂ်မႃး ၸင်ႇၵွႆႈၶိုင်" ဝႃႈၼႆသေ ၽွင်းမိူင်းၶဝ်ၵေႃႈ လၢတ်ႈဝႃႈ "လီယဝ်ႉၶႃႈ ၸဝ်ႈႁဝ်း" ၼႆသေ ႁပ်ႉတုင်းၵႂၢမ်းၸဝ်ႈယဝ်ႉ။ ဝၢႆးၼၼ်ႉ ၼေႃႇၸဝ်ႈၸင်ႇလၢတ်ႈၼႄ ၽွင်းမိူင်းၶဝ် လွင်ႈၸိူဝ်းၼၼ်ႉယဝ်ႉသေ မိူင်ႈၽွင်းမိူင်းၶဝ် လူလွမ်ၸွမ်းတၢင်းၼၼ်ႉ ၶဝ်ႈသူႇၼႂ်းႁွင်ႈႁေႃ ၵျေႃႇမူၼ်ႈသိူဝ်းၸွမ်းၵၼ်တင်းၼၢင်းသႅင် မိူဝ်ႈၶိုၼ်းယဵၼ်တင်းၶိုၼ်းယဝ်ႉ။ မိူင်ႈၵၢင်ၼႂ်မိူင်းလႅင်းမႃး ဢၼ်ပဵၼ် ၽွင်းမိူင်းၶဝ် ၸင်ႇဢွၼ်ၵၼ်မႃးၼွမ်းမုၼ် တီႈၸဝ်ႈၶုၼ်လူင်ယဝ်ႉ။

ၵမ်းၼၼ် ၶုၼ်လူင်မႁႃႇၸၼၵ ထၢမ်ၽွင်းမိူင်းၶဝ်ဝႃႈ "ၽွင်းမိူင်းၶဝ်ဢိူၺ်း ၸဝ်ႈၶုၼ်လူင်သူ လွင်းသွမ်းတီႈၸဝ်ႈပၸ်ႉၸေႇၵပုတ်ႉထႃႇ ၼႂ်းႁေႃယူႇၵူႈဝၼ်းဢမ်ႇၸႂ်ႈႁႃႉ" ၼႆႆယဝ်ႉ။ ၽွင်းမိူင်းၶဝ်ၵေႃႈ ၸင်ႇတၢင်ႇလဝ်ႈဝႃႈ "မႅၼ်ႈယဝ်ႉၶႃႈ ၸဝ်ႈၶုၼ်" ၼႆ။ ၵမ်းၼၼ် ၼေႃႇၶမ်းၸဝ်ႈဝူၼ်ႉၶႆႈၸႂ်ဝႃႈ "ၽြႃး၊ ပၸ်ႉၸေႇၵပုတ်ႉထႃႇၶဝ်ႈၸဝ်ႈၼႆႉ မိူၼ်ၼင်ႇၶုၼ်ဝၼ်းယဝ်ႈ။ ယၢမ်းမိူဝ်ႈၸဝ်ႈပၸ်ႉၸေႇၵပုတ်ႉထႃႇၶဝ်ယေႃးမႃးၼၼ်ႉ တီႈဢၼ်ၶုၼ်ႁေႃၶမ်းလုၵ်ႉမႃးသေ ပႂ်ႉႁပ်ႉတွၼ်ႈၼၼ်ႉၵေႃႈ ပဵၼ်တီႈလႅတ်ႇဢွၵ်ႇယဝ်ႉ" ၼႆ။ ပေႃးၶႆႈၸႂ်ယဝ်ႉၵေႃႈ တၵ်ႉမွၵ်ႇဝႃႈ "တီႈၼႆႈ ၽင်မေႃႈၶမ်းဝႆႉလုၵ်ႈၼိုင်ႈ" ၼႆ။ ဝၢႆးၼၼ်ႉ သိုပ်ႇထၢမ်ၽွင်းမိူင်းၶဝ်ဝႃႈ "ၽွင်းမိူင်းၶဝ်ဢိူၺ်း မိူဝ်ႈၸဝ်ႈပၸ်ႉၸေႇၵပုတ်ႉထႃႇၶဝ် ယေႃးမႃးတီႈႁေႃၼၼ်ႉ ၶုၼ်ႁေႃၶမ်းသူ လုၵ်ႉတီႈမၼ်းပႂ်ႉၼၼ်ႉသေ ၵႂႃႇႁပ်ႉတွၼ်ႈၸူမ်းၸဝ်ႈ ထိုင်တီႈလႂ်" ၼႆယဝ်ႉ။ ၽွင်းမိူင်းၶဝ်ၵေႃႈ ၸင်ႇလဝ်ႈဝႃႈ "ၸဝ်ႈၶုၼ်တီႈၶႃႈ ၸဝ်ႈၶုၼ်ႁဝ်းၼႆႉ ၵႂႃႇပႂ်ႉႁပ်ႉတွၼ်ႈၸူမ်း တေႃႇထိုင်တီႈၼၼ်ႈဢေႃႈ" ၼႆ။

ၸဝ်ႈၶုၼ်ၶိုၼ်းလၢတ်ႈဝႃႈ "ၽွင်းမိူင်းၶဝ်ဢိူၺ်း တီႈၼႆႈၵေႃႈ ပဵၼ်တီႈဝၼ်းဢွၵ်ႇတီႈၼိုင်ႈယဝ်ႈ။ တီႈၼၼ်ႈ မီးမေႃႈၶမ်းလူင်လုၵ်ႈၼိုင်ႈဢိူဝ်ႈ၊ ၶုတ်းလႄႈ" ၼႆ။ ဝၢႆးၼၼ်ႉၸင်ႇထၢမ်ဝႃႈ "ၽွင်းမိူင်းၶဝ်ဢိူၺ်း ဝၢႆးသေၸဝ်ႈပၸ်ႉၸေႇၵပုတ်ႉထႃႇၶဝ် သုင်းသွမ်းတီႈႁေႃယဝ်ႉၼၼ်ႉ ၸဝ်ႈၶုၼ်လူင်သူ ၸွမ်းသူင်ႇၸဝ်ႈပၸ်ႉၸေႇၵပုတ်ႉထႃႇၶဝ် ထိုင်တီႈလႂ်" ၼႆယဝ်ႉ။ ပေႃးဝႃႈ ၽွင်းမိူင်းၶဝ် တၢင်ႇလဝ်ႈဝႃႈ "ၸဝ်ႈၶုၼ်လူင်ႁဝ်း ၸွမ်းသူင်ႇတေႃႇထိုင် တီႈၼၼ်ႈၶႃႈဢေႃႈ" ၼႆယဝ်ႉၵေႃႈ ၸဝ်ႈၶုၼ်လူင်ၸင်ႇလၢတ်ႈဝႃႈ "ၽွင်းမိူင်းၶဝ် တီႈၵၢင်ဝၼ်းတူၵ်း ဢၼ်ဝႃႈၼၼ်ႉ ပွင်ႇဝႃႈတီႈၼၼ်ႈယဝ်ႈ၊ တီႈၼၼ်ႈၼၼ်ႉ မီးမေႃႈၶမ်းလုၵ်ႈၼိုင်ႈဢိူဝ်ႈ၊ ၶုတ်းလႄႈ" ဝႃႈၼႆသေ ၸႂ်ႉႁႂ်ႈၶုတ်းယူႇယဝ်ႉ။ ယၢမ်းၼၼ် ၽွင်းမိူင်းၶဝ်ဝူၼ်ႉဝႃႈ "ၵၢင်ဝၼ်းတူၵ်း၊ ၵၢင်ဝၼ်းဢွၵ်ႇ ဢၼ်ဝႃႈၼၼ်ႉ ႁဝ်းၶႃႈထၢင်ႇပဵၼ်လုၵ်ႈဝၼ်းသေယဝ်ႉ တေႁဵတ်းႁိုဝ်သေ ၶုတ်းတီႈလွႆဝၼ်းဢွၵ်ႇ၊ တီႈလွႆဝၼ်းတူၵ်းၼႆ ဝူၼ်ႉလူင်ယူႇ ပေႃးဢမ်ႇၸႂ်ႈလၢႆးမၼ်းယဝ်ႈ။ ပေႃးဝူၼ်ႉတိုၼ်ႈမိူၼ်ၸိူင်ႉၼင်ႇႁဝ်းႁႃၶုတ်းမေႃႈၶမ်းယူႇၸိုင် ၵူၺ်းတေႁဵတ်းႁႂ်ႈ ၼႃႈလိၼ်မိူင်းလူႉလႅဝ်လၢႆလၢႆၵူၺ်းယဝ်ႉ။ ပေႃးမိူၼ်ၸိူင်ႉၼင်ႇ ၸဝ်ႈၶုၼ်ႁဝ်း ၵေႃႉမီးၽုင်းပၺ်ၺႃႇယႂ်ႇၼႆႉတႄႉၸိုင် ပၼ်သၢႆငၢႆဢိတ်းဢွၼ်ႇၼိုင်ႈၵူၺ်းၵေႃႈ ဢမ်ႇႁႂ်ႈပိူၼ်ႈလႆႈယၢပ်ႇသင်သေ ၶုတ်းႁႃလႆႈမႃးငၢႆႈငၢႆႈလူမ်လူမ်ၵမ်းလဵဝ်ယူႇ" ၼႆသေ ဢွၼ်ၵၼ်ယွင်ႈယေႃးဢၢမ်းဢေႃး ၸဝ်ႈၶုၼ်လူင် သဵင်ပေႃးၼၼ်ႈပၼ်းလူင်ၵႂႃႇသဵင်ႈယဝ်ႉ။

ဝၢႆးၼၼ်ႉ ၼေႃႇၶမ်းၸဝ်ႈ ၸင်ႇပူင်ၶေႃႈၽွင်းမိူင်းၶဝ်ဝႃႈ "ၽွင်းမိူင်းၶဝ်ဢိူၺ်း တၢင်းၼႂ်းၼႆႉ လုၵ်ႈၼိုင်ႈ၊ တၢင်းၼွၵ်ႈၼႆႉလုၵ်ႈၼိုင်ႈ၊ ဢၼ်ဝႃႈ ဢမ်ႇၸႂ်ႈတၢင်းၼွၵ်ႈတၢင်းၼႂ်းလုၵ်ႈၼိုင်ႈၼၼ်ႉ ဢမ်ႇၸႂ်ႈတၢင်ႇၸိူဝ်ႉတၢင်ႇပိူင်။ မၼ်းၶႂ်ႈဝႃႈ တီႈၽၵ်းတူၼႃႈတၢင်းဢွၵ်ႇႁၢင်ႈႁေႃ ၽၢႆႇတႂ်ႈၶူဝ်လႆၼၼ်ႉၵေႃႈ မီးမေႃႈၶမ်းလုၵ်ႈၼိုင်ႈ၊ ႁိမ်းၽၢႆႇတၢင်းၼွၵ်ႈၽၵ်းတူၼၼ်ႉၵေႃႈ မီးမေႃႈၶမ်းလုၵ်ႈၼိုင်ႈ၊ တႂ်ႈၽၵ်းတူၼၼ်ႉၵေႃႈ မီးမေႃႈၶမ်းလုၵ်ႈၼိုင်ႈ၊ ၶုတ်းဢဝ်ယၢမ်းတေႃႈလဵဝ်ၼႆႉတႃႉ" ဝႃႈၼႆသေ ၸႂ်ႉၶုတ်းဢဝ်မေႃႈၶမ်းသၢမ်ႁူၺ်ႇယဝ်ႈ။

ဝၢႆးၼၼ်ႉ ၸဝ်ႈၶုၼ်ၸင်ႇထၢမ်ထႅင်ႈဝႃႈ "ၽွင်းမိူင်းၶဝ်ဢိူၺ်း မိူဝ်ႈယၢမ်းၸဝ်ႈၶုၼ်လူင် ၶီႇၸၢင်ႉမင်ႇၵလႃႇၼၼ်ႉ ၶူဝ်လႆၶိုၼ်ႈၸၢင်ႉၼၼ်ႉ တမ်းဝႆႉတီႈလႂ်၊ မိူင်ႈယၢမ်းဢၼ်လူင်းၸၢင်ႉၼၼ်ႉ ၶူဝ်လႆႈတမ်းတီႈလႂ်" ၼႆယဝ်ႉ။ ၽွင်းမိူင်းၶဝ်ၸင်ႇလဝ်ႈဝႃႈ "ၸဝ်ႈၶုၼ်ႁဝ်းတီႈၶႃႈ မိူဝ်ႈၶိုၼ်ႈၸၢင်ႉၼၼ်ႉ ၶူဝ်လႆတမ်းဝႆႉတီႈၼႆႈသေ မိူဝ်ႈလူင်းသမ်ႉ ဢဝ်ၶူဝ်လႆတမ်းဝႆႉတီႈၼႆႈဢေႃႈ" ၼႆယဝ်ႉ။ ၼေႃႇၶမ်းၸဝ်ႈၵေႃႈ ပေႃးဝႃႈလႆႈငိၼ်းၶေႃႈၵႂၢမ်းၼၼ်ႉယဝ်ႉၸိုင် ၸင်ႇလၢတ်ႈဝႃႈ "ၽွင်းမိူင်းၶဝ်ဢိူၺ်း တီႈၶိုၼ်ႈၼၼ်ႉလုၵ်ႈၼိုင်ႈ၊ တီႈလူင်းၼၼ်ႉလုၵ်ႈၼိုင်ႈ ဢၼ်ဝႃႈၼၼ်ႉ ပဵၼ်တီႈဢဝ်ၶူဝ်လႆတမ်းသေ ၶိုၼ်ႈလူင်းၸၢင်ႉၼၼ်ႉယဝ်ႉ။ တေႃႈၶုတ်းဢဝ်လႄႈ" ၼႆ ၸႂ်ႉႁႂ်ႈၶုတ်းယူႇယဝ်ႉ။

ဝၢႆးသေၼၼ်ႉ ၸဝ်ႈၶုၼ်ၸင်ႇထၢမ်ဝႃႈ "ၽွင်းမိူင်းၶဝ်ဢိူၺ်း တီႈတူၼ်ႈမႆႉပဝ်းလူင်သီႇတူၼ်ႈ မီးဝႆႉ ၼိုင်ႈႁူၺ်ႇၼိုင်ႈႁူၺ်ႇဢၼ်ဝႃႈၼၼ်ႉ ဢမ်ႇၸႂ်ႈတၢင်ႇၸိူဝ်ႉတၢင်ႇပိူင်၊ မၼ်းၶႂ်ႈဝႃႈ တီႈၼႃႈလိၼ်ၽၢႆႇတၢင်းဢွၵ်ႇႁေႃ တီႈဢၼ်ၽွင်းမိူင်းၶဝ်ႁဵတ်းပၢင်ၵုမ်ၼၼ်ႉ မီးဝႆႆႉ ၵူႇၼွၼ်းဢၼ်ၼိုင်ႈသေ တိၼ်ၵူႇသီႇဢၼ်ၼၼ်ႉ ဢမ်ႇၸႂ်ႈဢဝ်မႆႉပဝ်းႁဵတ်းဝႆႉႁႃႉ၊ တႂ်ႈတိၼ်ၵူႇသီႇဢၼ်ၼၼ်ႉ မီးမေႃႈၶမ်းၼိုင်ႈတီႈၼိုင်ႈလုၵ်ႈဢိူဝ်ႈ၊ ၶုတ်းဢဝ်ဢွၵ်ႇမႃးလႄႈ" ဝႃႈၼႆ။

ဝၢႆးသေၼၼ်ႉ ၸဝ်ႈၶုၼ်ၸင်ႇလၢတ်ႈဝႃႈ "ၽွင်းမိူင်းၶဝ်ဢိူၺ်း ဢၼ်ဝႃႈ ႁိမ်းႁွမ်းပႅတ်ႇၼႃႈမိူင်း ၼိုင်ႈယူႇၸၼႃႇ ၼိုင်ႈယူႇၸၼႃႇ မီးမေႃႈၶမ်းၼႆၼၼ်ႉ မၼ်းဢမ်ႇပွင်ႇဝႃႈ လၵ်းၶၢဝ်းတၢင်းယူႇၸၼႃႇ ဢၼ်မီးသီႇၵႃႇဝုတ်ႉၼၼ်ႉ။ မၼ်းၵူၺ်းတေပဵၼ်ႁူဝ်ၵွၼ်လေႃႉ ဢၼ်မႃႉသီႇတူဝ်လၢၵ်ႈၼၼ်ႉ ၼိုင်ႈဢၼ်ဝႃႈၼိုင်ႈယူႇၸၼႃႇယဝ်ႈ။ ၵွပ်ႈၼၼ်လႄႈ တီႈႁိမ်းႁွမ်းပၼ်ႇႁွပ်ႈႁေႃၼွၼ်းၸဝ်ႈၶုၼ် ယၢၼ်ၵၼ် ၼိုင်ႈၵွၼ်ႁူဝ်လေႃႉ ၼိုင်ႈလၵ်းၼၼ်ႉ တိုၼ်းတေမီးမေႃႈဢုမ်ၶမ်း ၼိုင်ႈႁူၺ်ႇၼိုင်ႈႁူၺ်ႇယဝ်ႈ၊ တေႃႈၶုတ်းဢဝ် မေႃႈဢုမ်ၶမ်းပႅတ်ႇႁူၺ်ႇတႃႉ" ဝႃႈၼႆ။

ၵမ်းၼၼ်ႉ ၸဝ်ႈၶုၼ်လူင်ပူင်ဝႃႈ "ၽွင်းမိူင်းၶဝ်ဢိူၺ်း ဢၼ်ဝႃႈမေႃႈၶမ်းမီးတီႈပၢႆငႃးၼႆၼၼ်ႉၼႆႉ ဢမ်ႇၸႂ်ႈတၢင်ႇၸိူဝ်ႉတၢင်ႇပိူင်၊ မၼ်းၵူၺ်းၶႂ်ႈဝႃႈ တီႈၼႂ်းသိုင်ႇၸၢင်ႉ တီႈဢၼ်ၸၢင်ႉပၢႆးလူင်ၸုၵ်းသေႇသေႇ တီႈသိုဝ်ႈပၢႆငႃးၸၢင်ႉထိုင်ၼၼ်ႉ မီးဝႆႉမေႃႈၶမ်းၼိုင်ႈလုၵ်ႈ ၼိုင်ႈလုၵ်ႈယဝ်ႉ၊ တေႃႈၶုတ်းဢဝ် မေႃႈၶမ်းသွင်ႁူၺ်ႇၼၼ်ႉလႄႈ" ၼႆ။

ဝၢႆးၼၼ်ႉ ၸဝ်ႈၶုၼ်ၸင်ႇလၢတ်ႈဝႃႈ "ၽွင်းမိူင်းၶဝ်ဢိူၺ်း ဢၼ်ဝႃႈ မီးထႅင်ႈတီႈတႂ်ႈႁၢင်ၸၢင်ႉၼၼ်ႉၵေႃႈ တီႈဝႆႉၸၢင်ႉၼႂ်းသိုင်ႇ ဢၼ်သိုဝ်ႈႁၢင်ၸၢင်ႉၼၼ်ႉၵေႃႈ မီးမေႃႈၶမ်းလုၵ်ႈၼိုင်ႈယဝ်ႉ" ဝႃႈၼႆသေ ၸႂ်ႉၶုတ်းယူႇယဝ်ႉ။ ဝၢႆးၼၼ်ႉ ၸင်ႇၶိုၼ်းလၢတ်ႈဝႃႈ "ၽွင်းမိူင်းၶဝ်ဢိူၺ်း မီးၼႂ်းၼမ်ႉလုၵ်ႈၼိုင်ႈ ဢၼ်ဝႃႈၼၼ်ႉ ဢမ်ႇၸႂ်ႈၼႂ်းၼမ်ႉတၢင်ႇဢၼ်၊ ၶႂ်ႈဝႃႈ မီးၼႂ်းၵၢင်ၼွင်ၼမ်ႉမင်ႇၵလႃႇၼၼ်ႉယဝ်ႉ။ ပေႃးဝႃႈသူၶႂ်ႈႁၼ်ၼႆ ၽူၺ်ႇႁူးၼမ်ႉၵူႈၽၢႆႇသေ ဢွၼ်ၵၼ်တူၺ်းမေႃႈၶမ်း ၼႂ်းၵၢင်ၼွင်ၼၼ်ႉလႄႈ" ၼႆသေ ၼႄပၼ်ယူႇယဝ်ႉ။

ဝၢႆးၼၼ်ႉ ၸဝ်ႈၶုၼ်ၸင်ႇလၢတ်ႈဝႃႈ "ၽွင်းမိူင်းၶဝ်ဢိူၺ်း ပၢႆတူၼ်ႈမႆႉဢၼ်ဝႃႈၼၼ်ႉ ဢမ်ႇၸႂ်ႈတၢင်ႇဢၼ်။ ၶႂ်ႈဝႃႈပဵၼ်တူၼ်ႈမႆႉပဝ်း တီႈဢၼ်ၶပ်းၶိုင်မင်ႇၵလႃႇ တီႈၼႂ်းသူၼ်မႆႉပဝ်းယဝ်ႈ။ မိူင်ႈၵၢင်ဝၼ်းတဵင်ႈမႃး တီႈဢၼ်ႁူမ်ႈတူၼ်ႈမႆႉပဝ်းတူၵ်းထိုင်ၼၼ်ႉ ပဵၼ်ပၢႆတူၼ်ႈမႆႉယဝ်ႉ။ ႁိမ်းႁွမ်းပႅတ်ႇၼႃႈ တီႈႁူမ်ႈမႆႉပဝ်းၼၼ်ႉ မီးဝႆႉမေႃႈၶမ်းပႅတ်ႇလုၵ်ႈယဝ်ႉ။ ၶုတ်းဢဝ်လႄႈ” ဝႃႈၼႆသေ ၸႂ်ႉႁႂ်ႈၶုတ်းဢဝ်ယူႇယဝ်ႉ။ ပေႃးဝႃႈႁဵတ်းၸိူင်ႉၼႆသေ ႁႂ်ႈၶုတ်းဢွၵ်ႇမေႃၶမ်း သိပ်းႁူၵ်းလုၵ်ႈၸိူဝ်းၼၼ်ႉယဝ်ႉၸိုင် ၶုၼ်လူင်မႁႃႇၸၼၵ ၸင်ႇပူင်ဝႃႈ “ၽွင်းမိူင်းၶဝ်ဢိူၺ်း သင်ၶေႃႈသင်ႇၸဝ်ႈၶုၼ်သူ မီးထႅင်ႈၼႆၸိုင် တၢင်ႇလဝ်ႈမႃးလႄႈ” ၼႆယဝ်ႉ။ ၽွင်းမိူင်းၶဝ်ၵေႃႈ ၸင်ႇလဝ်ႈဝႃႈ "ၸဝ်ႈႁဝ်းတီႈၶႃႈ လိူဝ်သေၸိူဝ်းၼႆႉ ဢမ်ႇမီးသင်ယဝ်ႉၶႃႈ” ၼႆ။

ၵမ်းၼၼ် တႄႇဢဝ်ၽွင်းမိူင်းၶဝ် ပရေႃးႁိတ်ႉၶဝ် ၵူၼ်းၼႂ်းႁေႃၶဝ် တင်းၵူၼ်းဝၢၼ်ႈၵူၼ်းမိူင်းၶဝ် လႆႈႁၼ်ၼမ်ႉၵတ်ႉပၺ်ႇၺႃႇၽုင်းမုၼ်ၼေႃႇၶမ်းၸဝ်ႈၼၼ်ႉသေ ဢၢမ်းဢေႃးပေႃးဢမ်ႇသုတ်းဢမ်ႇသဵင်ႈ၊ မီးတၢင်းၸူမ်းသိူဝ်းယႂ်ႇၼမ်သေယဝ်ႉ ဢွၼ်ၵၼ်ႁၢင်ႈၶိူင်ႈတူၼ်ႈၵူၺ်ႈ၊ တူၼ်ႈဢွႆႈ၊ တုင်းၶွၼ်ႇၶဝ်တႄႇၵႂႃႇ တင်းသဵင်ႈၼၼ်ႉသေ ႁဵတ်းပွႆးယႂ်ႇလၢမ်းလူင်ၵူႈတီႈတီႈယဝ်ႈ။

တီႈၼိူဝ်သဵၼ်ႈတၢင်းလူင် ႁိမ်းႁွမ်းႁၢင်ႈႁေႃၸိူဝ်းၼၼ်ႉၵေႃႈ သိူဝ်ႇဝႆႉၸဵၼ် ၵူႈသမ်ႇၵူႈပိူင်၊ ႁွႆႈဝႆႉသွင်းၼၢမ်ႇသႃႇ၊ သွင်းမွၵ်ႇ၊ ပိုၼ်မွၵ်ႇၶဝ်ႈတႅၵ်ႇဝႆႉသေ ႁႂ်ႈႁႅၼ်းဝႆႉ ဢၼ်ပဵၼ်ၼမ်ႉႁွမ်၊ ၼၢမ်ႇသႃႇ၊ ၽွင်ၼၢမ်ႇသႃႇ၊ ဢဝ်တၢင်းၵိၼ်တၢင်းယႅမ်ႉ၊ ၼမ်ႉၸဵမ်းဝၢၼ် ယွင်ႈယေႃးပူႇၸေႃႇၵၼ်ယဝ်ႈ။ ၽွင်းမိူင်းပရေႃးႁိတ်ႉ၊ ၽူႈမၢၵ်ႈၽူႈမီးၶဝ် ပႃးဢဝ်ၵွၵ်းငိုၼ်းၵွၵ်းၶမ်း သႂ်ႇမႃးတၢင်းၵိၼ်ၽေႃးၸၼ်ႇ ၸတုမတူႇသေ သၢၵ်ႈသူင်ႇပူႇၸေႃႇပၼ် တီႈၸဝ်ႈၶုၼ်ယဝ်ႈ။ ၸဵမ်ဢၼ် ၽွင်းလူင်၊ ၽွင်းၵၢင်၊ ၽွင်းဢွၼ်ႇ၊ ၸိူင်ႉၼၢင်းၼႂ်းႁေႃၶဝ်၊ ၽူႈထၢမ်းၵၢၼ်ၶုၼ်၊ ၶႃႈၸႂ်ႉၼႂ်းႁေႃၸိူဝ်းၼၼ်ႉၵေႃႈ ယူႇတီႈဢၼ်သၢင်ႇထုၵ်ႇၼၼ်ႉသေ ၼပ်ႉယမ်ၼွမ်းမုၼ်ယူႇယဝ်ႉ။

ဢၼ်ပဵၼ် ပုၼ်ႇၼႃးပရေႃးႁိၼ်ၶဝ်ၵေႃႈ ၽွမ်ႉၵၼ်ယူႇတီႈၼိုင်ႈသေ ယိပ်းဢဝ်မွၵ်ႇ၊ ၼမ်ႉၵိၼ်၊ ၼၢမ်ႇသႃႇ၊ ႁွႆတိုင်ႈ ဢၼ်ၶပ်းၶိုင်ႁၢင်ႈႁႅၼ်းဝႆႉၼၼ်ႉ ၵေႃႉဢၼ်ဢၼ်သေ ပူႇၸေႃႇပၼ်တီႈၸဝ်ႈၶုၼ်လူင်ယဝ်ႉ။ ၽူႈမၢၵ်ႈ သထေး၊ သိုၵ်းႁၢၼ်ၽၢႆႇတပ်ႉၸၢင်ႉ၊ တပ်ႉမႃႉ၊ တပ်ႉရထႃး၊ တပ်ႉလိၼ်တႄႇၵႂႃႇ ၵူၼ်းဝၢၼ်ႈၵူၼ်းမိူင်းၶဝ်ၵေႃႈ ၽွမ်ႉၵၼ်တီႈၼိုင်ႈသေ ဢဝ်ၶူဝ်းတွၼ်ႈ ပူႇၸေႃႇယွင်ႈယေႃးပၼ်ၸဝ်ႈၶုၼ်ယဝ်ႉ။

မၢဝ်ႇၼုမ်ႇ ဢၼ်ၵတ်ႉၶႅၼ်ႇၽၢႆႇၵႃႈ ၽၢႆႇႁွင်ႉႁႆႇတိုင်ႈၸိူဝ်းၼၼ်ႉၵေႃႈ ၽွမ်ႉၵၼ်ယူႇတီႈၼိုင်ႈသေ မူၼ်ႈသိူဝ်းယွင်ႈယေႃးပၼ် တႃႇႁႂ်ႈမီးတၢင်းၵျေႃႇမူၼ်ႈၸႂ်ယဝ်ႉ။ ဢၼ်ပဵၼ်ၼၢင်းသၢဝ်ႁၢင်ႈလီ ၼႂ်းႁေႃတင်းလၢႆၵေႃႈ ယူႇၶႅပ်ႇၶၢင်ႈၸွမ်းၼၢင်းသႅင်သီႇဝလိသေ ၼွမ်းမုၼ်ႁိမ်းၸမ် ၸဝ်ႈၶုၼ်ယူႇယဝ်ႉ။ ဢၼ်ပဵၼ်ၸိူင်ႉၼၢင်းၵတ်ႉၶႅၼ်ႇ ၽၢႆႇၵႃႈႁႆႇတိုင်ႈၸိူဝ်းၼၼ်ႉၵေႃႈ ၵႃႈႁႆႇတိုင်ႈပူႇၸေႃႇၶုၼ်လူင်ယူႇယဝ်ႉ။ သဵင်ႁႆႇတိုင်ႈလီၵျေႃႇမူၼ်ႈသိူဝ်းၼႂ်းပွႆးၼၼ်ႉ ပေႃးယွၼ်ႈလိုဝ်းလင်ၸွတ်ႇတူဝ်ႈၵႂႃႇ ၼႂ်းႁၢင်ႈႁေႃယူႇယဝ်ႉ။

ၶုၼ်လူင်မႁႃႇၸၼၵၵေႃႈ ဢဝ်ဢိၼ်ႇတရေႃႇၶုၼ်ႁတ်းႁၢၼ်သေ ၼင်ႈၼိူဝ်ပလၢင်ႇ ဢၼ်ၵင်ႈၸွင်ႈၽိူၵ်ႇသေလႄႈ ႁပ်ႉၶၢမ်ႇဢဝ် ၶူဝ်းတွၼ်ႈ ပူႇၸေႃႇၵၼ်တေႃးယဝ်ႉသေ သိမ်းဢဝ်ႁၢင်ႈႁေႃ တင်း မိူင်းမိထိလႃႇယဝ်ႉ။ ၵူၼ်းလူင်ၶဝ် ၸိူဝ်းဢၼ်ဢုပ်ႉပိူင်ႇၽွင်းငမ်း ဝဵင်းဢွၼ်ႇ၊ ဝဵင်းတင်းလၢႆ ၼႂ်းတိူင်းတေႇႁၸႃႇၸၼၼ်ႉလႄႈ ၵူၼ်းဝၢၼ်ႈၵူၼ်းမိူင်းၶဝ်ၵေႃႈ ၸင်ႇလၢတ်ႈဝႃႈ "မိူင်းလူင်မိထိလႃႇႁဝ်းၼႆႉ ပဵၼ်ဝဵင်းႁၢင်ႈလီသေ ႁႃတီႈဝႃႈပေႃးဢမ်ႇမီးယဝ်ႉ။ ပေႃးဝႃႈၸဝ်ႈၶုၼ်ႁဝ်း သဵင်ႈၵၢမ်ႇသုတ်းမုၼ်ၵႂႃႇယဝ်ႉၸိုင် ၵေႃႉတေသိုပ်ႇယိပ်းၵုမ်းငမ်း ႁၢင်ႈႁေႃၸဝ်ႈၶုၼ်ႁဝ်းၼၼ်ႉ ပေႃးဢွၵ်ႇမႃးယဝ်ႉ။ ၸဝ်ႈဢၼ်မႃးၸၢမ်ႇႁၢင်ႈႁေႃၼႆႉတႄႉ ဢမ်ႇၸႂ်ႈပဵၼ်ၽႂ်၊ ၵူၺ်းပဵၼ်လုၵ်ႈၸၢႆး ၸဝ်ႈၶုၼ်လူင်ႁဝ်း ဢရိတ်ႉထၸၼၵၼၼ်ႉၵမ်းလဵဝ်ယဝ်ႉ။ မိူဝ်ႈလဵဝ် ၸူဝ်ႈပၢၼ်ဢႃႇယုမၼ်းၵေႃႈ တိုၵ်ႉပဵၼ်ပၢၼ်ပထမယူႇ၊ ၽၢႆႇပၺ်ႇၺႃႇ၊ ၽၢႆႇဢဵၼ်ႁႅင်း၊ ၽၢႆႇလွၵ်းပရိယႄႇၶုၼ်ၶဝ်တင်းသဵင်ၸိူဝ်းၼၼ်ႉၵေႃႈ ၵုမ်ႇတဵမ်ထူၼ်ႈဝႆႉယူႇ။ ၵွပ်ႈၼႆ ၽႂ်ၵေႃႈ ဢွၼ်ၵၼ်ဢဝ်ၶူဝ်းတွၼ်ႈတင်းၼမ် တင်းလၢႆသေ ဢွၼ်ၵၼ်မႃးပူႇၸေႃႇသၢၵ်ႈထိုင် ၸဝ်ႈၶုၼ်လူင်လႄႈ မိူင်းမိထိလႃႇတင်းသဵင်ႈ သမ်ႉပေႃးပဵၼ်ဢၼ်ပွႆးၵိုၼ်းဝႆႉ ဢိုၵ်ႉဢိုၵ်ႉယူႇယဝ်ႉ” ၼႆ။

ၶုၼ်လူင်မႁႃႇၸၼၵၵေႃႈ ဢဝ်ၼၢင်းသႅင်သီႇဝလိ ဝႆႉပဵၼ်ၼၢင်းၸုမ်ႈလူင်ၽၢႆႇၶႂႃသေ ဢၢပ်ႈပၼ်ႁၢင်ႈႁေႃႈမၼ်းယူႇယဝ်ႉ။ မႄႈၸဝ်ႈ ဢၼ်ယူႇမိူင်းၵႃႇလၸမ်ႇပႃႇၼၵူဝ်ႇ တင်း ၶူးဝႃးတိသႃႇပႃႇမွၵ်ႉ ပႃးၸဵမ်ၼၢႆးသြႃႇလႄႈ လုၵ်ႈယိင်းလုၵ်ႈၸၢႆးၶူးဝႃးတင်းသဵင်ႈ ဢၼ်မီးယူႇ မိူင်းၵႃႇလၸမ်ႇပႃႇၼၵူဝ်ႇၼၼ်ႉၵေႃႈ ႁွင်ႉမႃးတီႈမိူင်းလူင်မိထိလႃႇသေယဝ်ႉ ႁဵတ်းႁေႃဢၢပ်ႈပၼ်သေဢမ်ႇၵႃး တီႈမႄႈၸဝ်ႈၵေႃႈ ဝႆႉပဵၼ်တီႈ ပူႇၸေႃႇၼပ်ႉထိုဝ်ဝႆႉယူႇယဝ်ႉ။ ၶူးဝႃးတိသႃႇပႃႇမွၵ်ႉၶၼၼ်ႉၵေႃႈ တမ်းဝႆႉပၼ် ၸၼ်ႉထၢၼ်ႈၽူႈယႂ်ႇၵေႃႉၼိုင်ႈ ဢၼ်တွၼ်းလိူဝ်ပိူၼ်ႈ ၼႂ်းၽူႈမၢၵ်ႈမီးပုၼ်ႇၼႃးၶဝ် ၼႂ်းမိူင်းမိထိလႃႇၼၼ်ႉ ၸႄႈဝဵင်းၼိုင်ႈသေ ႁႂ်ႈပဵၼ် ၽူႈဢုပ်ႉပိူင်ႇၽွင်းငမ်းယဝ်ႉ။

ၵမ်းၼၼ် ၶုၼ်လူင်မႁႃႇၸၼၵၼႆႉ ၸင်ႇဝူၼ်ႉဝႃႈ "ဢၼ်ပဵၼ်ပူႇႁဝ်း၊ ပေႃႈႁဝ်း၊ ပေႃႈသိုပ်ႇၸိူဝ်းလူႉႁၢႆႉတၢႆၵႂႃႇၼၼ်ႉ ၶူဝ်းၶွင်ၶဝ်ၵေႃႈ ဢမ်ႇဢဝ်ပႃးၵႂႃႇ၊ ၶေးၶဝ်ၶဝ်တေၶႂ်ႈႁႂ်ႈၵဝ်ပႃးဢဝ်ၵႂႃႇလႄႈ ၸင်ႇဝႆႉပၼ်ၵေႃႈဢမ်ႇႁူႉၼႆ။ မေႃႈၶမ်းလူင်သိပ်းႁူၵ်းႁူၺ်ႇ ၶူဝ်းမွၼ်ႇပူႇႁဝ်းၸိူဝ်းၼၼ်ႉၵေႃႈမီး။ ၶူဝ်းၶွင်ၸိူဝ်းပိူၼ်ႈမႃး ပူႇၸေႃႇဝႆႉ ၸူဝ်ႈပၢၼ်ၵဝ်ၼႆႉၵေႃႈ မီးၼမ်ၼႃႇ ၸႂ်ႉတိုဝ်းၵေႃႈ ပေႃးဢမ်ႇမူတ်းသဵင်ႈလႆႈယဝ်ႈ။ ၶူဝ်းၶွင်ၸိူဝ်းၼၼ်ႉ ၼင်ႇႁိုဝ်ပေႃးတေပႃးၵႂႃႇၸွမ်းၵဝ်လႆႈၼၼ်ႉ ၵဝ်ႇတေႁဵတ်းၵၢၼ်တၢင်းလီလူးၵွၼ်ႇ” ဝူၼ်ႉၼင်ႇၼႆသေ ၸင်ႇၸႂ်ႉႁႂ်ႈႁဵတ်း သႃလႃး (ၸလွပ်ႈ) တီႈၽၵ်းတူဝဵင်း တင်းသီႇၼႃႈလႄႈ ၼႂ်းၵၢင်ဝဵင်းႁႃႈလင်ယဝ်ႉၵေႃႈ ႁဵတ်းတၢင်းလူႇတၢင်းတၢၼ်းပၼ်ၵူႈမိူဝ်ႈၵူႈဝၼ်း ပေႃးဢမ်ႇပၼ်ထၢတ်ႇယဝ်ႈ။