ၸၢတ်ႈၸဝ်ႈမႁႃႇၸၼၵ/ႁၼ်ၸဝ်ႈၵၢင်ႇ
ၼေႃႇၶမ်းၸဝ်ႈၼႆၵေႃႈ ဢမ်ႇၽၢတ်ႇဢမ်ႇယၢၼ်လႆႈ ၼၢင်းႁေႃၶမ်းသေ ၸွမ်းၵၼ်ၶဝ်ႈၵႂႃႇ တုင်းသွမ်းၼႂ်းဝဵင်းယဝ်ႈ။ ၸွၼ်ႇတုင်းသွမ်းသေ ၵႂႃႇၸုၵ်းတီႈ ၼႃႈၽၵ်းတူႁိူဝ်းၸဝ်ႈၵၢင်ႇ ၵေႃႉၼိုင်ႈယဝ်ႉ။ ၸဝ်ႈၼၢင်းသီႇဝလိၵေႃႈ ၵိုတ်းယူႇတီႈ သၢင်ႇထုၵ်ႇယူႇယဝ်ႉ။ ၵမ်းၼၼ် ၺႃးမႅၼ်ႈမိူဝ်ႈၸဝ်ႈၵၢင်ႇ ၼင်ႈတီႈႁိမ်း မုၵ်ႉၽႆးဢွၼ်ႇသေ ဢဝ်ပိုၼ်ၵၢင်ႇ မၼ်းႁၢင်းၽႆးသေယဝ်ႉ သမ်ႉဢဝ်တႃမၼ်း လပ်းၶွၼ်ၼိုင်ႈသေလႄႈ တူၺ်း၊ သမ်ႉဢဝ်ၼမ်ႉၸႅဝ်ႈထူဝ်ႇတႃးပိုၼ်ၵၢင်သေ လတ်းႁႂ်ႈမၼ်း သိုဝ်ႈလူင်ယူႇယဝ်ႈ။
ၼေႃႇၶမ်းၸဝ်ႈ ႁၼ်ၸဝ်ႈၵၢင်ႇသေ ဝူၼ်ႉဝႃႈ "သင်ဝႃႈ ၸဝ်ႈၵၢင်ၼႆႉ ပဵၼ်ၽူႈမီးပၺ်ႇၺႃႇၼႆၸိုင် တေဝႃႈတီႈႁင်းၵဝ် လွင်ႈတၢင်းသေၸိူဝ်ႉသေပိူင်ယူႇ။ တေႃႈလဵဝ်ၵဝ် တေတွင်ႈထၢမ် ၸဝ်ႈၵၢင်လူးၵွၼ်ႇ" ၼႆသေ ၵႂႃႇထၢမ်ၸဝ်ႈၵၢင်ႇဝႃႈ "ၸဝ်ႈၵၢင်ႇဢိူၺ်း ႁႂ်ႈၵဝ်လႆႈထၢမ် မႂ်းဢိတ်းၼိုင်ႈလူး။ တေႃႈလဵဝ် မႂ်းလပ်းတႃၽၢႆႇၼိုင်ႈ သမ်ႉဢဝ်တႃၽၢႆႇၼိုင်ႈတူၺ်းသေ လတ်းလႅမ်ႈၵၢင်ႇ ႁႂ်ႈမၼ်းသိုဝ်ႈယူႇ။ ပေႃးဢဝ်တႃသွင်ၶွၼ်တူၺ်းသေလတ်းၸိုင် ယိုင်ႈၶႅၼ်းတေငၢႆႈၸႂ်တိူဝ်း မိူၼ်ၸိူင်ႉၼင်ႇ ႁဝ်းတႆႈၾႆးသွင်လႅမ်ႈ ဢမ်ႇၸႂ်ႈႁႃႉ။ ၵွပ်ႈပိူဝ်းဝင်လႄႈ သမ်ႉလပ်းတႃၽၢႆႇၼိုင်ႈသေၵူၺ်း ဢဝ်မၢၵ်ႇတႃၶွၼ်ၼိုင်ႈသေတူၺ်းၼႆႉ မၼ်းႁၼ်လီတိူဝ်းႁႃႉ" ၼႆယူႇယဝ်ႉ။
ပေႃးလႆးငိၼ်း ၵႂၢမ်းၼေႃႇၶမ်းၸဝ်ႈၵေႃႈ ၸဝ်ႈၵၢင်ႇၼႆႉ ၵွပ်ႈပိူဝ်ႈမီးဝႆႉ ပႃႇရမီႇပၢၼ်ဢွၼ်လႄႈ ပဵၼ်ၽူႈမီးပၺ်ႇၺႃႇ ၵေႃႉၼိုင်ႈသေ ၸင်ႇတွပ်ႇလၢတ်ႈဝႃႈ "ၸဝ်ႈႁဝ်းၶႃႈ ပေႃးမီးဢူၺ်းၵေႃႉၼမ်ၸိုင် ဢမ်းဢမ်ႇလီလႆႈသေႇသေႇၶႃႈ။ ပေႃးဢဝ် မၢၵ်ႇတႃသွင်ၽၢႆႇတူၺ်းသေလတ်းၸိုင် ၵွပ်ႈၸႂ်တေၼမ်လႄႈ မၼ်းတေဢမ်ႇၸၢင်ႈႁၼ်လႆႈ တီႈၶူင်ႈတီႈယၢၼ်း တီႈငွၵ်းဢိတ်းငွၵ်းဢွတ်းဢွၼ်ႇမၼ်းလီလီၶႃႈ။ သင်လပ်းတၢႆၽၢႆႇၼိုင်ႈသေ လတ်းပေႃးၼႆၸိုင် ၵွပ်ႈမီးၸႂ်သဵၼ်ႈလဵဝ်ၵူၺ်းလႄႈ သမႃႇထိတၵ်းၼိမ်လီသေ တေႁၼ်လႆႈ တီႈၶူင်ႈတီႈယၢၼ်းတီႈငွၵ်းဢိတ်းငွၵ်းဢွတ်းဢွၼ်ႇ ပိုၼ်ၵၢင်ႇသေလႄႈ ၸင်တေလတ်းပိုၼ်ၵၢင်ႇ သိုဝ်ႈလႆႈလီဢေႃႈ။
ၸဝ်ႈႁဝ်းၶႃႈ ဢမ်ႇၸႂ်ႈၵူၺ်းမိူဝ်ႈူႁဝ်းလတ်း ပိုၼ်ၵၢင်ႇၵူၺ်းၶႃႈ။ ၵၢၼ်ဢၼ်လူဝ်ႇလႆႈႁဵတ်း သိုဝ်ႈသိုဝ်ႈတၢင်းလူင်ၵေႃႈ ပေႃးပဵၼ်သွင်ၸႂ်သွင်ပၺ်ႇၺႃႇၼႆၸိုင် တေမီးဢၼ်ယႃႉ၊ ဢၼ်ၵဝ်း၊ ၸၢင်ႈထဵင်ၵၼ်သေ ၵွပ်ႈဢမ်ႇလႆႈ သမႃႇထိလီလႄႈ မၼ်းယၢပ်ႇတႄႉဢေႃႈ။ လီႁႂ်ႈမီးသတိပၺ်ႇၺႃႇ ၸဝ်ႈၵဝ်ႇၵႄႇယဝ်ႉသေ မိူဝ်ႈလႂ်ပဵၼ်ၼိုင်ႈၵေႃႉ ၼမ်ႉၼိုင်ႈၸႂ်ၼိုင်ႈပၺ်ႇၺႃႇၵွၼ်ႇ ၸင်ႇတေလႆႈသမႃႇထိလီသေလႄႈ မၼ်းသၢင်ႇတေႃႇ တႃႇတေႁဵတ်းႁႂ်ႈမၼ်းသိုဝ်ႈၼၼ်ႉဢေႃႈ။ ၸဝ်ႈႁဝ်းၵေႃႈ ၼုင်ႈၽႃႈသၢင်ႇၵၢၼ်း ဢၢၼ်းတႃႇလႆႈမိူင်းၽီၼႆႉ ၵွပ်ႈသင်လႄႈ သမ်ႉႁွင်ႉ ၽူႈယိင်းၸွမ်းဝႆႉၼေႃး။ ၼၢင်းယိင်းၵေႃႉၼႆႉ မီးႁၢင်ႈၽၢင်၊ ႁၢင်ႈလီ မိူၼ်ၼၢင်းႁေႃၶမ်းဝႆႉယူႇယဝ်ႉ။ မၼ်းပဵၼ် ၼွင်ႉယိင်း ၸဝ်ႈရႁၢၼ်းႁႃႉ။ ဢမ်ႇၼၼ် ပဵၼ်မေး ၸဝ်ႈႁဝ်းႁႃႉ။ ပဵၼ်ၼွင်ႉယိင်းတႄႉၵေႃႈယဝ်ႉ ပေႃးၵႂႃႇၸွမ်းၵၼ်ၸိူင်ႉၼႆ မၼ်းဢမ်ႇလီတူၺ်းၶႃႈဢေႃႈ။
ၸဝ်ႈရႁၢၼ်းဢၼ်ဝႃးၼႆႉ ယူႇၵေႃႉလဵဝ်သေ ႁႃၵျင်ႉၵမ်တြႃးလႆႈသမႃႇထိလီသေ ၽွၼ်းလီဢၼ်ႁဝ်း ၶႂ်ႈပဵၼ်ၼၼ်ႉ ၸင်ႇတေၵုမ်ႇထူၼ်ႈလႆႈ ဢမ်ႇၸႂ်ႈၶႃႈႁိုဝ်ၼေႃး။ သင်ဝႃႈ ၼၢင်းယိင်းၵေႃႉၼႆႉ ယူႇၸွမ်းၸဝ်ႈရႁၢၼ်းၼႆၸိုင် ဢမ်ႇႁိုင်ဢမ်ႇၼၢၼ်း သိၼ်ထမ်းၸဝ်ႈႁဝ်း တေလႆႈလူႉလႅဝ်ယူႇယဝ်ႉ။ ၵွပ်ႈၼႆ ပွႆႇပႅတ်ႈၼၢင်းယိင်းၼႆႉသေ ယူႇၵေႃႉလဵဝ် ၵတ်းၵတ်းယဵၼ်ယဵၼ်သေယဝ်ႉ ၵျၢင်ႉၵမ်တြႃးၸဝ်ႈရႁၢၼ်း ႁႂ်ႈသိုဝ်ႈသိုဝ်ႈၵႂႃႇတႃႉ" ဝႃႈၼႆယူႇယဝ်ႉ။ ပေႃးဝႃႈ သင်ႇသွၼ်ၼေႃႇၶမ်းၸဝ်ႈၸိူင်ႉၼႆယဝ်ႉၵေႃႈ ၸဝ်ႈၵၢင်ႇၼႆႉ ဢမ်ႇဝူၼ်ႉဝႃႈ ၼေႃႇၶမ်းၸဝ်ႈမႃး တုင်းၶဝ်ႈသွမ်းတီႈႁိူၼ်းမၼ်းၼႆလႄႈ သိုပ်ႇလတ်းပိုၼ်ၵၢင်ႇမၼ်းယူႇယဝ်ႉ။ ဝၢႆးသေ ထၢမ်တွပ်ႇၵၼ် တင်းၸဝ်ႈၵၢင်ႇယဝ်ႉၼႆ ၵႂႃႇတုင်းသွမ်းထႅင်ႈ ႁိူင်းၼိုင်ႈယဝ်ႉႁိူၼ်းၼိုင်ႈသေ လႆႈမႃး ၶဝ်ႈဢူၼ်ႈၶဝ်ႈၶႅင်လေႃးလႄးၵၼ်၊ ပေႃးလႆႈၵုမ်ႇၵိၼ်ယဝ်ႉၵေႃႈ ဢွၵ်ႇဝဵင်းၵႂႃႇသေ ၵႂႃႇသုင်းသွမ်းတီႈ ဢၼ်မီးၼမ်ႉသႅၼ်ႈသႂ်လီၼၼ်ႉ တီးၼိုင်ႈယူႇယဝ်ႉ။
ၸဝ်ႈၼၢင်းသီႇဝလိၼႆၵေႃႈ ၸွမ်းတၢင်းလင် ၼေႃႇၶမ်းၸဝ်ႈ ဢမ်ႇပေႃးၸမ်ပေႃးၵႆသေ မိူဝ်ႈယၢမ်းသုင်းသွမ်းၼၼ်ႉၵေႃႈ ပႂ်ႉဝႆႉတီႈႁိမ်းၸမ်သေ တူၺ်းဝႆႉယူႇယဝ်ႉ။ ၼေႃႇၶမ်းၸဝ်ႈၼႆႉ သုင်းသွမ်းယဝ်ႉ သုၵ်ႈသူပ်း သုၵ်ႈမိုဝ်း လၢင်ႉသီႇပိတ်ႈသေယဝ်ႉ ဢဝ်သီႇပိတ်ႈမၼ်း သႂ်ႇထူင်ပႃးသေ ႁွင်ႉၸဝ်ႈၼၢင်းသီႇဝလိသေယဝ်ႉ မွၵ်ႇလၢတ်ႈဝႃႈ "သီႇဝလိဢိူၺ်း ဢဝ်ၸဝ်ႈၵၢင်ႇ မွၵ်ႇလၢတ်ႈမႃးၼၼ်ႉ မႂ်းၼၢင်းငိၼ်းယူႇႁိုဝ်ၼေႃး။ ၸဝ်ႈၵၢင်ႇၼႆႉ ယင်းဢမ်ႇၶိုတ်းၸၼ်ႉၶႃႈၸႂ်ႉၵဝ်ႇၼႆႉၵေႃႈ ယင်းတၢင်ႇတၢင်းၽိတ်းၵဝ်ယူႇယဝ်ႉ။ ဢၼ်ၸဝ်ႈၵဝၢင်ႇတၢင်ႇတၢင်းၽိတ်းၵဝ်ႇၼႆႉ ၵွပ်ႈၵဝ်မီးတၢင်းၽိတ်းလႄႈ လႆႈၶၢမ်ႇဢမ်ႇၸႂ်ႈ။ ၵွပ်ႈမႂ်းပႆၸွမ်းလင်ၵဝ် လႄႈ ၸင်ႇလႆႈၶၢမ်ႇယူႇယဝ်ႉ" ၼႆယဝ်ႉ။
ၼၢင်းယိင်းဝႃႈလီဢိူၺ်း သင်ဝႃႈ မႂ်းၼၢင်းႁၵ်ႉၵဝ်တႄႉၼႆၸိုင် ႁႂ်ႈၵဝ်လႆႈၵျၢင်ႉၵမ်တြႃး ၸဝ်ႈရႁၢၼ်းသေၵမ်း။ မႂ်းၼၢင်း ယႃႇပေမႃးၸွမ်းလင်ၵဝ်ယဝ်ႉ။ မႂ်းၼၢင်းၶႂ်ႈၵႂႃႇတၢင်းလႂ်ၵေႃႈ ၵႂႃႇတႃႉ။ သဵၼ်ႈတၢင်း ဢၼ်မႂ်းၼၢင်း ဢမ်ႇၶႂ်ႈၵႂႃႇၼၼ်ႉ ၵဝ်တေၵႂႃႇဢိူဝ်ႈ။ ၼၢင်းယိင်းလီဢိူၺ်း တေႇဢဝ်ဝၼ်းၼႆႉၵႂႃႇ ယႃႇဝႃႈၵဝ်ပဵၼ်ၸဝ်ႈၽူဝ်မႂ်းယဝ်ႉသေ ႁဵတ်းၵၢၼ်ၵုသူလ်ႇၵႂႃႇ တႃႇႁွတ်ႈၽႅဝ်မိူင်းၽီတႃႉ။ မႂ်းၼၢင်းၵျၢင်ႉၵမ်လီလီတႃႉ။ ၵဝ်ၵေႃႈ ဢမ်ႇဝႃႈ မႂ်းၼၢင်းပဵၼ်မေးသေယဝ်ႉ တေႁဵတ်းၵုသူလ်ႇၵႂႃႇၵေႃႉလဵဝ်သေ တေၵျၢင်ႉၵမ်တြႃးၸဝ်ႈရႁၢၼ်းၵႂႃႇၵွၼ်ႇ" ၼႆ။ ပေႃးဝႃႈ လႆႈငိၼ်းၵႂၢမ်း ၼေႃႇၶမ်းၸဝ်ႈယဝ်ႉၼႆ ၸဝ်ႈၼၢင်းသီႇဝလိၼႆႉ ႁပ်ႉယိုၼ်းတၢင်းၽိတ်းသေ ယွၼ်းတွင်းပၢၼ်ႇ ၼေႃႇၶမ်းၸဝ်ႈယူႇယဝ်ႉ။
တေၽၢတ်ႇသေၵႂႃႇၵေႃႈ မီးတၢင်းမႆႈၸႂ်ဝႆႉလႄႈ ဢမ်ႇလၢတ်ႈၵႂၢမ်းသင်သေ ၵူၺ်းတွပ်ႇဝႃႈ "ၸဝ်ႈၶုၼ်လူင်ဢိူၺ်း ၸဝ်ႈႁဝ်းပဵၼ်ၵူၼ်းၸၢႆးမႅတ်ႈၶႃႈလႄႈ ယေႃးၵႂႃႇသဵၼ်ႈတၢင်း ၽၢႆႇၶႂႃမိုဝ်းၶႃႈတႃႉ။ ၶႃႈႁဝ်းတေၵႂႃႇ သဵၼ်ႈတၢင်း ၽၢႆႇသၢႆႉမိုဝ်းၶႃႈဢေႃႈ" ဝႃႈၼႆ။ မိူဝ်ႈၽၢတ်ႇၵႂႃႇၵမ်းၼိုင်ႈၼၼ်ႉ မၼ်းၼၢင်းလၢတ်ႈဝႃႈ "ၵဝ်ၶႃႈတေ ၽၢတ်ႇယၢၼ်ၸဝ်ႈႁဝ်းၵႂႃႇၵေႃႈ ဢမ်ႇၸူႉၸၵ်းတၢင်းလႄႈ ဢမ်ႇမေႃၵႂႃႇၶႃႈ" ဝႃႈၼႆသေ ၵႂႃႇၸွမ်းလင် ၼေႃႇၶမ်းၸဝ်ႈထႅင်ႈယူႇယဝ်ႉ။ ၼေႃႇၶမ်းၸဝ်ႈၼႆႉ ၵွပ်ႈဢမ်ႇၸၢင်ႈႁဵတ်းႁိုဝ်လႆႈလႄႈ ၵႃႈတၵ်းလႆႈ ပႃးၼၢင်းၸုမ်ႈၸွမ်းသေယဝ်ႉ သိုပ်ႇၶၢဝ်းတၢင်းၵႂႃႇ တီႈ လွႆႁိမဝၼ်ႇတႃႇယဝ်ႈ။ ယၢမ်းၼၼ် ၽွင်းမိူင်းၶဝ်ၼႆႉၵေႃႈ ၶိုၼ်းၼေႃႇၶမ်းၸဝ်ႈသေ ပႃးၸွမ်းၵၼ်ၵႂႃႇယူႇယဝ်ႈ။