ၸၢတ်ႈၸဝ်ႈမႁႃႇၸၼၵ/ၼၢင်းၸုမ်ႈတင်း ၽွင်းမိူင်းသိုၵ်းၶဝ် ပွၵ်ႈၶိုၼ်းမိူင်း

ၸဝ်ႈၼၢင်းၸုမ်ႈလူင်ၼႆၵေႃႈ လုၵ်ႉတီႈထိူၼ်ႇ ၸွမ်းသဵၼ်ႈတၢင်းမိူဝ်းၵႂႃႇသေ မိူဝ်ႈၵႂႃႇထိုင် ဝဵင်းထူႇၼၼၼ်ႉၵေႃႈ ၵေႃႇၵွင်းမူးဝႆႉသူႇၼိုင်ႈ၊ တီႈၸဝ်ႈၵၢင်ႇလႄႈ ၼေႃႇၶမ်းၸဝ်ႈ လၢတ်ႈတေႃႇၵၼ် သူႇၼိုင်ႈ၊ တီႈလၢတ်ႈတေႃႇ ၼၢင်းယိင်းဢွၼ်ႇ သူႇၼိုင်ႈ၊ တီႈဝဵင်းထူႇၼၼၼ်ႉ ႁဵတ်းဝႆႉ ၵွင်းမူး သၢမ်သူႇသေ ဢဝ်မွၵ်ႇယႃႈၼမ်ႉႁွမ်ၸႃႉၵႂႃႇ ဝႆႈပူႇတေႃႇယဝ်ႈ။ မိူဝ်ႈပွၵ်ႈၶၢဝ်းတၢင်းမႃး မိူဝ်ႈထိုင်တီႈ ၼေႃႇၶမ်းၸဝ်ႈ လႆႈထူပ်း ၸဝ်ႈရသေးမိၵႃႇၸိၼ်ႇလႄႈ တီႈလႆႈထူပ်း ရသေးၼႃႇရတၼၼ်ႉ ၵေႃႇတင်ႈၵွင်းမူး ၼိုင်ႈတီႈၼိုင်ႈသူႇ၊ မိူဝ်ႈထိုင်တိႈ ၼေႃႇၶမ်းၸဝ်ႈ ဢဝ်ၶွၼ်ႉတဝ်ႉသေ ထတ်းသဵၼ်ႈတၢင်းၶၢတ်ႇၼၼ်ႉ ၼိုင်ႈသူႇ၊ မိူဝ်ႈၸမ်ထိုင် မိူင်းမိထိလႃႇ တီႈဢၼ်ႁဵတ်းႁၢင်ႈ ၵူၼ်းမိူၵ်ႈၵူၼ်းလိူင်း ၵူၼ်းလၵ်ႉၶဝ် မႃးယႃႉၵဝ်းၼၼ်ႉ ၵေႃႇတင်ႈဝႆႉ ၵွင်းမူး ၼိုင်ႈသူႇ၊ တီႈဢၼ်တၢင်ႇလဝ်ႈဝႃႈ ၽႆႈမႆႈၼႂ်းဝဵင်းၼႆၼၼ်ႉ ၵေႃႇတင်ႈ ၵွင်းမူးဝႆႉ သူႇၼိုင်ႈသေ ဢဝ်မွၵ်ႇယႃႈဢၢႆႁွမ်ၵူႈယိူင်ႈ ပူႇၸေႃႇသေယဝ်ႉ ႁွတ်ႈၽႅဝ်မႃး မိူင်းမိထိလႃႇယဝ်ႉ။

ဝၢႆးၼၼ်ႉ ၼၢင်းၸုမ်ႈလူင် ပႃးၸဵမ်ၸဝ်ႈၵႅမ်မိူင်းလႄႈ ၽွင်းမိူင်းသိုၵ်းႁၢၼ် တင်းၼမ်တင်းလၢႆသေ ဢွၵ်ႇၵႂႃႇတီႈ သူၼ်သိူဝ်းသေယဝ်ႉ ႁပ်ႉၸဝ်ႈၵႅမ်မိူင်း ယူႇၼိူဝ် မၢၵ်ႇႁိၼ် ဢၼ်မီးမၢင်ႇၵလႃႇယဝ်ႈ။ ယူႇတီႈ မၢၵ်ႇႁိၼ်မင်ႇၵလႃႇသေ ယွင်ႈယေႃးၶိုၼ်ႈပဵၼ် ၶုၼ်မိူင်းယဝ်ႉသေ ပဵၼ်ၵႂႃႇ ၸဝ်ႈၶုၼ် ၼိူဝ် ၽွင်းမိူင်း သိုၵ်းႁၢၼ် တင်းလူင်လႄႈ ပႃးၸဵမ်ၶူဝ်းငိုၼ်းၶူဝ်းၶမ်းတင်းလူင်ယဝ်ႈ။ ဢိၵ်ႇသမ်ႉသင်ႇသွၼ်ဝႃႈ "လုၵ်ႈၸၢႆးႁၵ်ႉဢိူၺ်း တေႃႈဢုပ်ႉပိူင်ႇ ဝၢၼ်ႈမိူင်းၵႂႃႇ ၸွမ်းထမ်းလီလီ မိူၼ်ၼင်ႇ ၸဝ်ႈပေႃႈမႂ်းၸၢႆး ဢုပ်ႉပိူင်ႇမႃးၼၼ်ႉတႃႉ။ ယႃႇပေလူင်လိုမ်းတႃႉ" ဝႃႈၼႆသေ သမ်ႉသိုပ်ႇဝႃႈ "ႁဝ်းၵေႃႉပဵၼ် ၸဝ်ႈမႄႈတႄႉ တေႁဵတ်း ၸဝ်ႈရႁၢၼ်းၵႂႃႇ ၸိူင်ႉၼင်ႇ ပေႃႈၸဝ်ႈသူ သင်ႇသွၼ်မႃးၼၼ်ႉသေ တေယူႇၵႂႃႇၼႂ်းသူၼ်သိူဝ်းၼႆႉၵူၺ်းယဝ်ႉ" ဝႃႈ ၼႆသေ ပေႃးသင်ႇသွၼ် လုၵ်ႈမၼ်းၸဝ်ႈၶုၼ်ယဝ်ႉၵေႃႈ ၸႂ်ႉၶိုၼ်းမိူင်းၵႂႃႇယဝ်ႉ။ ၸဝ်ႈၸၢႆးတီႇၶႃႇဝုၼႆၵေႃႈ ပႃးၸဵမ်ၽွင်းမိူင်း သိုၵ်းႁၢၼ်တင်းလၢႆသေ ၶဝ်ႈၵႂႃႇၼႂ်းဝဵင်းသေယဝ်ႉ ဢုပ်ႉပိူင်ႇႁၢင်ႈႁေႃ ဝၢၼ်ႈမိူင်းၵႂႃႇယဝ်ႉ။

ဝၢႆးသေ ၸဝ်ႈၸၢႆးတီႇၶႃႇဝု ၶဝ်ႈၼႂ်းဝဵင်းၵႂႃႇယဝ်ႉၵေႃႈ ၸဝ်ႈၼၢင်းၸုမ်ႈလူင်ၼႆႉ ႁွင်ႉၵူၼ်းလုမ်းလႃးၵေႃႉၼိုင်ႈသေ ၸႂ်ႉမၼ်းၵႂႃႇသိုဝ်ႉ သၢင်ႇၵၢၼ်း၊ သီႇပိတ်ႈ၊ ပရိၵ်ႈၶရႃႇ၊ တီႈၵၢတ်ႇမႃးသေ ထႃႁူဝ်ယဝ်ႉၵေႃႈ ႁဵတ်းၸဝ်ႈရႁၢၼ်းသေ ယူႇတီႈၼႂ်းသူၼ်သိူဝ်းၼၼ်ႉယူႇယဝ်ႉ။ တႅပ်းၶၢတ်ႇပႅတ်ႈ ၼႃႈၵၢၼ်ဢွၼ်ႇ ၼႃႈၵၢၼ်လဵၵ်ႉယႂ်ႇ ၵူႈပိူင်ပိူင်သေ ႁဵတ်းၵၢၼ်သမထၽႃႇဝၼႃႇ (ၵသိၼပရိၵၢမ်ႇ)သေ ဢမ်ႇႁိုင်ဢမ်ႇၼၢၼ်း လႆႈသၢၼ်ႇပထမၵႂႃႇယဝ်ႉ။ ၸဝ်ႈၼၢင်းၸုမ်ႈၼႆႉ ၸၢမ်ႇပူၺ်ႈသၢၼ်ႇသမႃႇပၢတ်ႈ တီႈသူၼ်သိူဝ်းသေ မိူဝ်ႈထိုင်ပီပွင်းသၢမ်ႁဵင်ပီၼၼ်ႉ ၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇယဝ်ႉ။ ၵွပ်ႈသၢၼ်ႇတြႃးလႄႈ လႆႈႁွတ်ႈထိုင်ၵႂႃႇ မိူင်းသၢင်ႇပရႁ်မပရိသၸ်ၸႃႇယဝ်ႉ။ ၼေႃႇၶမ်းၸဝ်ႈၼႆႉၵေႃႈ ၸၢမ်ႇပူၺ်ႈဢꧤိၺ်ၺႃႇသမႃႇပၢတ်ႈသေ ပေႃးထိုင်ပီပွင်း သၢမ်ႁဵင်ပီၼႆ ၶဝ်ႈသူၼ််မၢၵ်ႇႁၢၵ်ႈၶမ်း ၵႂႃႇတီႈ ႁိမဝၼ်ႇတႃႇၼၼ်ႉယဝ်ႉ။ ၵွပ်ႈသၢၼ်တြႃးလႄႈ လႆႈၵႂႃႇႁွတ်ႈထိုင် မိူင်းသၢင်ဝေႇႁပ်ႉၽူလ်ႇယူႇယဝ်ႉႁေႃး။