ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ၼၢင်းယိင်းမေႃလၢတ်ႈ မႅၼ်ႈထၢတ်ႈၸႂ်လီ

ၵူၼ်းမိူဝ်ႈၵွၼ်ႇ ၵေႃႉ ႞ - ၵႂႃႇႁႃၽိုၼ်းၼႂ်းထိူၼ်ႇ မၼ်းၽၼ်းမႆႉတူၼ်ႈ ႞ တႅပ်းပဵၼ်သွင်ပွတ်း မႄးလၢၼ်းၵိင်ႇလၢၼ်းၶႃႈယဝ်ႉလီလီ ယုၵ်ႉမႅၵ်ႇတၢင်ႇမႃႇ ပွၵ်ႈမႃးၸွမ်းတၢင်း - ၵွႆႈမႃးၵွႆႈၼၵ်း ႁူဝ်မႃႇၵေႃႈၸဵပ်း တိၼ်ၵေႃႈၸဵပ်း လႅတ်ႇမႆႈႁိူဝ်ႇၼႆႈ ပင်းတူၵ်းပင်းတူၵ်း ဢလူဝ်ႉ႟... ၵဝ်ၼႆႉ ပေႃးၸၢင်ႈယူႇ ၼိူဝ်ဝတ်ႉၼိူဝ်ၵျွင်း - ၼုင်ႈၽႃႈလိူဝ်သၢင်ႇၵၢၼ်း ႁဵတ်းၵၢၼ်ၵမ်ႇမထၢၼ်း ၽႃႇဝၼႃႇယူႇလီလီယဝ်ႉ - သမ်ႉထႂၢၵ်ႈလူင်းမႃးႁဵတ်းသင် - ၵမ်းၼႆႉမႃးၶတ်း ၼႃႈႁိူၼ်းလူင်လင် ႞ - လူဝ်ႇႁႃၶဝ်ႈႁႃငိုၼ်းႁႃၽိုၼ်းႁႃၼမ်ႉ - သံႉလႆႈပဵၼ်လုၵ်ႈမၢၼ်ႈၶုၼ် - ပဵၼ်တၵႃႇၸဝ်ႈမုၼ် - ပီႈႁွင်ႉၼွင်ႉႁႃ - ၶႅၵ်ႇလီပၢင်ၸႃႉၼႃႈမၢၼ်ႈ ၵၢၼ်မိူင်းၵေႃႈလူဝ်ႇထၢမ်း - ၵဝ်ၼႆႉႁႃတုၵ်ႉၶႃႉသႂ်ႇတူဝ်ၵူၺ်းလူင်...

ၽိတ်းယဝ်ႉ ၽိတ်းယဝ်ႉ ပေႃးပဵၼ်ၼႆႉ လူဝ်ႇမိူဝ်းၽိတ်းၵၼ်တင်း မႄႈယိင်းသေယဝ်ႉ ပႅတ်ႈၵၼ်ၶၢတ်ႇၶၢတ်ႇ ၽၢတ်ႇၵၼ်လၼ်သွင်ႉ ၶိုၼ်းမိူဝ်း ႁဵတ်းတပႄး ၸဝ်ႈမုၼ်ထႅင်ႈလီယဝ်ႉ - ဝူၼ်ႉလူင်မႃးၸွံးတၢင်း ၽိူဝ်ႇထိုင်ႁိူၼ်းမႃး - ၸွႆႉၶၢင်းၼၢင်းမေးဢွၼ်ႇမၼ်း သမ်ႉမေႃႁဵတ်းလေႃးၵဝၢတ်ႈ လၢတ်ႈယုမ်ႉယုမ်ႉ ဢလူဝ်ႉ... ၸဝ်ႈတီႈႁၵ်ႉၼၢင်းပႅင်း - ပႄႉမႃးႁႅင်းထၢၼ်ႇၼႆႉ - မႅၵ်ႇမႆႉၵေႃႈပႄႉမႃးဢဝ်လႅမ်ႈယႂ်ႇလႅမ်ႈလူင် - ၼၢင်းၼွင်ၵူဝ် ဢဵၼ်တွင်ႉပီႈလူႉဢိူဝ်ႈ ဢဝ်မႃးဝၼ်းဢိတ်းဢိတ်းလႄႈ - မႃးမႃး ႁဝ်းသုၵ်ႈပၼ်တိၼ်သူၸဝ်ႈ - ႁဝ်းၵၼ်ႁုင်ၶဝ်ႁုင်ၽၵ်း ဝၢၼ်ဝၢၼ်သေ ပႂ်ႉမုင်ႈမွင်းတၢင်းသူဝႆႉ တင်းၼႂ်ၵေႃႈၼႆႉ... တၢင်ႇပွၵ်ႈယႃႇပေမႅၵ်ႇမႃးလႅမ်ႈယႂ်ႇၼႃႇ - ယႃႇပေမႃးလႃႈလႃႈ ၸိူင်ႉၼႆၼႃႈသူ႟။

ၵူၼ်းၸၢႆးလူင်တၼ်ႇႁဝ်းၼႆႉ သူဢမ်ႇတၢပ်ႈမႆႈၸႂ်ၸွမ်း ပေႃးၵွမ်ႉမႆႉဢွၼ်ႇ တၢၼ်ႇၼႆႉၵွႆး - ဢမ်ႇပွင်ႇၶရႃႇသင် - မိူဝ်ႈၽုၵ်ႈ ယင်းတေၵႂႃႇမႅၵ်ႇမႃး ပွတ်းငဝ်ႈမၼ်းၼၼ်ႉ ၼၵ်းသေၼႆႉ သွင်ပုၼ်ႈၵွၼ်ႇဢိူဝ်ႈသူၶႂ်ႈႁု - တႃႇဝူၼ်ႇပုၼ်ႈၽွၼ်း တွၼ်ႈႁႃႈလဵင်ႉလုၵ်ႈမေးၼႆႉ ပဵၼ်ၵၢၼ်ႁဝ်းလူင်သူၵေႃႈ - ဝႃႈၼႆ ဢုပ်ႇၵၼ် ယၢမ်းဢၼ်သုၵ်ႈတိၼ်သီမိုဝ်း ပၼ်မၼ်းၼၼ်ႉ -

ၽိူဝ်ႇထိုင် မိူဝ်ႈၵိၼ်ၶဝ်ႈပႃးၵေႃႈ တေႃႈယင်းဢမ်ႇတၼ်းၶုၵ်းၸႂ်လႆႈ - တၢင်းၶႆႈၸႂ် ဢၼ်မၼ်းဝူၼ်ႉမႃးၸွမ်းတၢင်းၼၼ်ႉ ၵၼ်ႉၼႅတ်ႉယိပ်းဢဝ်ၶဝ်ႈ ဢဝ်ၽၵ်းသႂ်ႇသူပ်းၶူပ်းယႅမ်ႉ ထွမ်ႇဢရသႃႇမၼ်းသေလႄႈဝႃႈ - မႄႈၸဝ်ႈႁိူၼ်းႁဝ်းၼႆႉ ၵႆႉၵေႃႈၵႆႉ ပၢၵ်ႈၵေႃႈၸၢင်ႈ - ႁၢင်ႈၵေႃႈငၢမ်း - လၢတ်ႈၵႂၢမ်းၵေႃႈမေႃၼႃႇ ႁုင်ၶဝ်ႈႁုင်ၽၵ်းၵေႃႈ ဢရသႃႇမၼ်းၶႅမ်ႉဝႃႈၶႅမ်ႉ - ႁဝ်းသမ်ႉပေႃး ဢမ်ႇၶႂ်ႈၽၢတ်ႇ ဢမ်ႇၶႂ်ႈယၢၼ်သူ သေဢိတ်းယဝ်ႉ - "ဢေႃး... ၼၢင်းယိင်းမေႃလၢတ်ႈ - မႅၼ်ႈထၢတ်ႈၸႂ်လီ တႄႉတႄႉယဝ်ႉ။"