ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ၸၢင်ႈပဵၼ်ၸၢင်ႈဝႃႈ လႆႈၼႃႈၺႃးၵံးသၢင်ႇတေႃႇ

"ၶွပ်ႇၼံႉလႅၼ်လိၼ်ႁိမ်းမၢၼ်ႈႁိမ်းမိူင်းႁဝ်း ၽူႈဢူၼ်ၵူၼ်းၵဝ်း မီးဢံႇမီးဢၼ်ဝႃႈၼၼ်ႉ ပဵၼ်ပုၼ်ႈၽွၼ်းတွၼ်ႈပူဝ်ႇလူင်ႁူဝ်ႁၢၼ်ၶဝ် ထုၵ်ႇလႆႈၵႆႉၵႆႉၵႂႃႇပၼ်ႇလဵပ်ႈတူၺ်းဢိူဝ်ႈ - မိူဝ်ႈၽုၵ်ႈၼႆႉ ၵူၼ်းႁႃႈသိပ်း၊ မႃႉႁႃႈသိပ်းပႃးၶိူင်ႈယိပ်း ၸေႉမိုဝ်းၵူႈၵေႃႉ ၵႂႃႇတၢင်းဝၼ်းဢွၵ်ႇၸဵင်ႇၸၢၼ်း မၢၼ်ႈပၢၼ်း မၢၼ်ႈၶူင်ႈ တီႈတူင်ႈၼိူဝ်လွႆ ၸဵမ်ႁိမ်းၶွပ်ႇပႅၼ် လႅၼ်မိူင်းႁဝ်း ႁႂ်ႈႁွပ်ႈဝဵင်ႈသဵင်ႈဢိူဝ်ႈ ငိၼ်းႁိုဝ်ႉ ႁူဝ်ႁၢၼ်ၵၢၼ်းမိူင်းၶမ်း"

"ၼေႃးတီႈၶႃႈ ၸဝ်ႈတူၼ်ႈပဵၼ်ၸဝ်ႈတၢင်ႇၸွမ်ၵဝ်ႈတီႈၶႃႈၼေႃႈ... တႃႇဝူၼ်ႇပုၼ်ႈၽွၼ်းတွၼ်ႈၶႃႈ'ၸဝ်ႈႁဝ်းၶဝ်တႄႉ ၸႂ်ႈယူႇ ၵႂႃႇၵေႃႈ ထုၵ်ႇလီၵႂႃႇယူႇ ၵွႆးၼႃႇ...

"ႁႃႉ - မႂ်းဝႃႈ ၵႂၢမ်းမဵဝ်းၼႆႉ ႁူဝ်ႁၢၼ်ၵၢၼ်းမိူင်းၶမ်း မႂ်းထုၵ်ႇလႆႈ ဢွၼ်ႁူဝ် ထူဝ်းၼႃႈပိူၼ်ႈတင်းလၢႆ ၵွႆပၢႆႁၢင်ႈၵႂၢမ်း မႂ်းသံႉဝႃႈ ၵွႆးၼႃႇ မႂ်းဢံႇႁတ်းၵႂႃႇႁႃႉ?

"ၼေႃးတီႈၶႃႈ... ဢံႇႁတ်းတႄႉဢံႇဝႃႈ ၶႃႈၸဝ်ႈၵေႃႈ ဢၢင်ႈတေထၢမ်ဝႃႈ ၸဝ်ႈႁဝ်းတေၸႂ်ၽႂ်ဢွၼ်ႁူဝ်ၼႆတီႈၶႃႈၼေႃႈ"

ၸႂ်ႉမႂ်းဢွၼ်ႁူဝ်ၵံးလဵဝ်ယဝ်ႉ ဢံႇလူဝ်ႇႁေႃးလၢႆထႅဝ်ဢမ်ႇလူဝ်ႇလၢတ်ႈလၢႆၵံး - လိူၵ်ႈလႄႈ ၵွင်းႁႃႈသိပ်း မႃႉႁႃႈသိပ်း ၵူၼ်းယိပ်းၶိူင်ႈမိုဝ်းၸွမ်းလင်မႂ်း သီႇသိပ်းပၢႆၵဝ်ႈ ၵဝ်ၸဝ်ႈပူင်ၵႂၢမ်းၼၵ်းမႃးၼင်ႇၼႆ"

ၸင်ႇမႃးလိူၵ်ႈ ၵူၼ်းယႂ်ႇၵူၼ်းလူင် လွၼ်ႉလွၼ်ႉလိုဝ်ႉဝိုဝ်ႉလင်းသင်း ၵူၼ်းႁၢႆႉလၢႆလၢႆ ၵူၼ်းဢမ်ႇၵူဝ်တၢႆၵွႆးၵွႆး ၵွႆးၶႂ်ႈထၢမ်သွႆးထၢမ်ထိူမ် သုင်ပိူဝ်ပိူဝ်ၵေႃႈမီး ပီးဢုၵ်းပုၵ်းဢၢၵ်းပၢၵ်းၵေႃႈပႃး ထိုင်မႃး မိူဝ်ႈၽုၵ်ႈၵၢင်ၼႂ် မိူင်းသႂ်ၸဵမ်ၸဝ်ႉ ၶဝ်ၵေႃႈ ဢွၼ်ၵၼ် ၶီႇမႃႉ ၽႅၼ်တိၼ်လူင်ဢွၵ်ႇၵႂႃႇတၢင်းၶွပ်ႇပႅၼ်လႅၼ်မိူင်းပုၼ်ႉယဝ်ႉ။

"လုင်းၵႄႇ႟... ႁိမ်းႁွမ်းမၢၼ်ႈသူၸိူဝ်းၼႆႉ ၽူႈလၵ်ႉၵူၼ်းၸူၼ် ၽူႈဢူၼ်ၵူၼ်းၵဝ်း ၸွင်ႇမီးႁႃႉ၊ ပေႃးမီး ဢွၼ်ၵၼ်မႃးပွင်ႇၶၢဝ်ႇငၢဝ်းတီႈႁဝ်းလႄႈ"

ဢေႃးတီႈၶႃႈ - ႁူဝ်ႁၢၼ်ၵၢၼ်းမိူင်းၶဝ်ၸဝ်ႈ ၶႃႈတေလဝ်ႈၼႄ မိူင်ႈဝူင်ႈပူၼ်ႉၼႆႉ မီးယူႇ ၵူၼ်းႁႃႈႁူၵ်းသိပ်း၊ ယိပ်းၵွင်ႈဢေႃႇတေႃႇလၢႆလၢႆ၊ မႃးယွၼ်းၶဝ်ႈ ယွၼ်းငိုၼ်း ယွၼ်းမူ ယွၼ်းၵႆ တီႈႁဝ်းယူႇဢေႃႈ၊ ၵွႆးၵႃႈ ဢၼ်ၶႂ်ႈႁႂ်ႈသူၸဝ်ႈ ၵႂႃႇသိမ်းပႅတ်ႈဝႆးဝႆးၼႆႉ မီးမီလူင်တူဝ် ႞ ၶႃႈၼႄႈ၊ ၵႆႉၵႆႉမႃးႁႃယၵ်း ႁႃယၢႆး ဢွၼ်ႇၸၢႆးဢွၼ်ႇယိင်းၶဝ် ၵႂႃႇႁႆႈပွၵ်ႈၼႃး မႃးၺႃးမၼ်းတႃႇသေႇၶႃႈၼေႈ..."

" ဢိူဝ်ႈ မီးတီႈလႂ် ၵႂႃႇၼႄႁဝ်းမိူဝ်ႈလဵဝ်လႄႈ " ပူႇၵႄႇၵေႃႈ ၼႅတ်ႈႁွင်ႉလုၵ်ႈၼွင်ႉၵူၼ်းမၢၼ်ႈၵူၼ်းသူၼ်မၼ်းလၼ်းၵၼ်း ၽူႇၽီႈၽူႇၽႃႇၵႂႃႇၼႄပၼ်ၶဝ် မီးလူင်ၼၼ်ႉၵေႃႈ ဝႅၼ်ဝူင်ဝႅၼ်ဝၢင်လူင်မႃးၸူးၵံးလဵဝ်၊ ႁူဝ်ႁၢၼ်ၵၢၼ်းမိူင်းၶံးတႄႉ ၼႃႈပေႃးၶဵဝ် - ယဵဝ်ႈပေႃးလၼ် ၶီႈပေႃးလၼ်သႂ်ႇၵူၼ်မၼ်း - ၵတ်ႉၵႃႈ မီးၵူၼ်းလၼ်းၵၼ် ပူဝ်ႇၾႃႉၽႃႇယုၵ်ႉၵွင်ႈယွင်ႈတူပ်ႇသႂ်ႇ မီတူဝ်ၼၼ်ႉ မူပ်ႇထူဝႆႉထင်တီႈ - ပီႈၶုၼ်ၵၢၼ်းမိူင်းၶမ်းသံႉဝႃႈ -

"ဢလူဝ်ႉ မႂ်းၼႅတ်ႈယိုဝ်းၼႃႇလူင် ဢဝ်ဢၢင်ႈဢဝ်ၶီႈၸွပ်ႇဢဝ် တဵၵ်းၵၼ်ႉ တူဝ်လိပ်းမၼ်း မိူဝ်းၼႄ ၸဝ်ႈၸွမ်ႁဝ်းၼႆဢိူဝ်ႈၼႆႉ..." ပိူၼ်ႈၸင်ႇဢွၼ်ၵၼ် တၢင်ႇပၼ်ၸိုဝ်ႈမၼ်းဝႃႈ ပူဝ်ႇလူင်ႁၢၼ်မီၼႆယဝ်ႉ။

ထိုင်မႃးထႅင်ႈဝၼ်း ႞ လႆႈငိုၼ်းၶၢဝ်ႇငၢဝ်း ၵူၼ်းႁၢႆႉၵူၼ်းၵျၢမ်းၶပ်ႉၶၢမ်းၶဝ်မႃးတင်းမၢၼ်ႈ ဝၼ်းဢွၵ်ႇ ပိူၼ်ႈလႅၼ်ႈမႃးမွၵ်ႇၶၢဝ်ႇငၢဝ်းတီႈၶဝ် မၼ်းၵေႃႈ ႁွင်ႉဢဝ်လုၵ်ႈမူႇလုၵ်ႈသႃးမၼ်း =

"လုၵ်ႉလႄႈ႟... ဢၢႆႈၸိူဝ်းၼႆႉ ယိပ်းၵွင်ႈ ယွင်ႈမၢၵ်ႇမတ်ႉၸပ်းဢႅဝ် ၶဝ်ႈထႅမ်ၵံးလဵဝ်၊ ၼိုင်ႈ - သွင် - သၢမ် ၶီႇမႃႉၽႂ်မႃႉမၼ်း လၼ်းၵၼ်းဢွၵ်ႇၸင်ႇၼႆႈ "

ၼႆႉပဵၼ်ၵႂၢမ်းၶေႃႈပူင် ပူဝ်ႇလူင်ႁၢၼ်မီ ပီႈၶုၼ်ၵၢၼ်းမိူင်းၶမ်းယဝ်ႉ။

မၼ်းၵူဝ်တူၵ်းမႃႉလႄႈ ၵၼ်ႉဢဝ်ၸိူၵ်ႈမတ်ႉတိၼ်မၼ်းၸပ်းၽၢင်ယၼ်သံႉမတ်ႉၽၢင်ယၼ်သွင်ဢၼ်ၸပ်းပိုၼ်ႉတွင်ႉမႃႉသေယဝ်ႉ ဢွၼ်ႁူဝ်ထူဝ်းၼႃႈၵႂႃႇၸူး တီႈ ၽူႈႁၢႆႉၵူၼ်းၵျၢမ်းၶဝ်ယူႇၼၼ်ႉ။

"ႁႃႉ ယႃႇပေတူင်ႉ၊ ဝၢင်းၶိူင်ႈသူမူတ်းမူတ်း " ပူဝ်ႇလူင်ႁၢၼ်မီ ႁိုတ်းႁၢတ်ႇၸၢတ်ႇဝတ်ႉ ၊ ပိူၼ်ႈၵေႃႈ ၵွင်ႈပတ်ႉ တရၢင်ႉ... တၢင်ႉ... တၢင်ႉ... ယိုဝ်းမႃး၊ မႃႉၵေႃႈ ပႃးပူဝ်ႇလူင် ဝႅၼ်ဝူင်ၶုၼ်ႇၵႂႃႇ ထႃႇၼၼ်ႉႁူဝ်မၼ်းၶိတ်းပူၵ်း တူၵ်းလူင်ၽၢႆႇတႂ်ႈတွင်ႉမႃႉ၊ မႃႉၵေႃႈပႃးလႅၼ်ႈလူင်ၵႂႃႇၽႃႇၽီႇ တိုဝ်ယုမ်းၸုမ်းၵူၼ်းႁၢႆႉ ၶဝ်လႆႈႁၼ်ဢွၼ်ၵၼ်ႁွင်ႉဝႃႈ... "ပၢႆႈလႄႈ႟ ပၢႆႈလႄႈ႟ - ပူဝ်ႇလူင်ႁၢၼ်မီ ၶီႇမႃႉတၢင်းတွင်ႉမႃးယဝ်ႉ" ၼႆလႄႈ ပၢႆႈၽူင်ႉတိုၼ်ႇ ႁူးၽႂ်တၢင်းမၼ်း - ဝၼ်းၼၼ်ႉၵေႃႈ ပဵၼ်ဢၼ်လႆႈၸိုဝ်ႈလႆႈသဵင်တႄႉတႄႉဝႃႈဝႃႈ - ၵတ်ႉၵႃႈ ဢလူဝ်ႉ ၸၢင်ႈပဵၼ်ၸၢင်ႈဝႃႈ လႆႈၼႃႈ ၺႃးၵံးသင်ႇတေႃႇယဝ်ႉ။