ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ဢီႇၸၢင်ႈႁၢႆႉ ၺႃးဢၢႆႈၸၢင်ႈႁႅမ်

ဢၢႆႈဝင်း ဢၢႆႈဝင်း ၵူၼ်းလံၵံႇပိုတ်းပိုင်ႈ ၶူလင်ႈႁံႉမႅပ်ႇမႅပ်ႇ ၼႃႈၽၢၵ်ႇၵွပ်ႈၵၢင်းပိူၼ်း - တႃလုၵ်းဢူင်ႈၶူင်ႈ - ႂ်ႇႁူသံႉလဵၵ်ႉ - ၶူၼ်ႁူဝ်ၵျၢမ်းသဝ်ႇႁဝ်ႇ - မီးမွႆၼူတ်ႇမွႆၵၢင်း - ႁူၵ်ႉႁူၵ်ႉႁၢမ်းႁၢမ်းလူင်ဝႆႉ ၊ ၵွႆးၵႃႈတၢင်းၵတ်ႉမၼ်း မီး လွင်ႈမေႃလၢတ်ႈမေႃၸႃ - လၢတ်ႈဝႃႈ ၸဝ်ႈပႃႈၸဝ်ႈလုင်း ၸဝ်ႈၼႃႉၸဝ်ႈဢႃ - ၸဝ်ႈပီႈၸဝ်ႈၼွင်ႉ - ၸဝ်ႈလုၵ်ႈၸဝ်ႈလၢၼ် - သူပ်းဝၢၼ် ဢူၼ်ႈဢွၼ်ႇ တေႃႇပိူၼ်ႈၵူႈၵေႃႉ ဢႃႇယုမၼ်းတႄႉ သၢမ်သိပ်းလိူဝ် - သီႇသိပ်းယွမ်း ၽွ်င်းတိုၵ်ႉမီးႁႅင်းတဵမ်တူဝ်ဝႆႉယဝ်ႉ။

မေးမၼ်း သံႉပဵၼ် ၵူၼ်းသၢင်ႇတေႃႇဢွၼ်ႇ - ၽႂ်ႁၼ်ၵေႃႈ ပေႃးၸွမ်းဢၢမ်း - ၼၢင်းယိင်းၶဝ်ႈၵျၢမ်းဢဵၵ်ႉထိသတ်ႉတရ - ၼႃႈၽၢၵ်ႇဝၢတ်ႈ ၵၢင်းလႅမ် - တႃလံၵွမ်းငွမ်း - ၶူၼ်ႁူဝ်ငေႃး ဢႅဝ်ၶႅဝ်ႉ - ၵူၼ်ႈတုင်ႇဢူၵ်းဝၢတ်ႈ - ပွင်ႈတိၼ်ပွင်ႈမိုဝ်း ၵူမ်သွႆႇလဝ်းလီ - ၼိဝ်ႉတိၼ်ၼိဝ်ႉမိုဝ်း သဵမ်ႈၸွတ်ႈလွတ်ႈ - ၼႃႈၵူမ်ၵွင်း - သီႇသူပ်းလႅင်ၸွင်းႁွင်း - ၶဵဝ်ႈၶၢဝ်ၽဵင်ႇပႅင်းလီ - သဵင်လၢတ်ႈၵေႃႈ လီထွမ်လီၽၢင်း - ဢံႇလဵၵ်းဢံႇယႂ်ႇဢံႇယွမ်ဢံႇပီး မီးၼႃႈမဵတ်ႃႇ ပိူၼ်ႈတႄႉတႄႉ။

ၵွႆးၵႃႈ မၼ်းဢံႇပေႃးမေႃလၢတ်ႈ မီးထၢတ်ႈၸႂ် ၶႂ်ႈသၢၼ်ၶတ်းပိူၼ်ႈတိၵ်းတိၵ်းဢိူဝ်ႈ။

ၸဵမ်မိူဝ်ႈမၼ်း ၵေႃႉလဵၵ်ႉၼၼ်ႉ ပေႃႈပေႃႈမႄႈမႄႈဝႃႈ ယႃႇပေၵႂႃႇ မၼ်းသံႉဝႃႈၵႂႃႇဢိူဝ်ႈ - ယႃႇပေၵဝ်း - ၵဝ်းဢိူဝ်ႈ - ယႃႇပေႁႆႈ သံႉႁႆႈ တိၵ်းတိၵ်း - သင်သံႉၶိုၼ်းဝႃႈ ပေႃးၼၼ်ၵေႃႈ ႁႆႈ လႄႈ ႁႆႈလႄႈ ၼႆသံႉတဵတ်ႇၵႂႃႇၵံးလဵဝ်၊ ၸၢင်ႈမေႃႇထီႇၼဵဝ် - သံႉလီႁင်ႈ ဢဵတ်ႇသဵတ်ႇပိူၼ်ႈ - ဢံႉႇပေႃးမီးတႆးၵေႃႉ။

ဢၢႆးဝင်းၵႆႉၵႆႉ သင်ႇသွၼ်ႇပၼ်မေးမၼ်း -

သူ႟ - သူယႃႇၵႆႉလႄႇႁိူၼ်းပိူၼ်ႈၼႃႇၽႅဝ်လႄႈ ၽႆးႁိူၼ်းတႂ်ႈ ယႃႇႁႂ်ႈလၢမ်းၸပ်းႁိူၼ်းၼိူဝ် - ၽႆးႁိူၼ်းၼိူဝ် ယႃႇဢဝ်မိူဝ်းႁိူၼ်းႁွင်ႇ။ ၽႆးၼႂ်းယႃႇႁႂ်ႈဢွၵ်ႇ - ၽႆးၼွၵ်ႈယႃႇဢဝ်ၶဝ်ႈၼႂ်းႁိူၼ်း - ၵႂၢမ်းၸိူ်ဝးၼႆႉ မီးၼႂ်းတြႃးဢိူဝ်ႈ - ပေႃးၵႆႉလႄႇ ဢံႇပေႃးလီ - သူ႟။

ႁဝ်းၵႂႃႇလႄႇ သိုဝ်ႈသိုဝ်ႈယူဝ်းယူဝ်းလူင် ဢမ်ႇလူဝ်ႇႁေႃးတြႃးပၼ်ႁဝ်း၊ ၵူၼ်းထဝ်ႈၵွႆးဢိူဝ်ႈ ၵႆႉထွမ်ႇတြႃး။

ဢံႇထဝ်ႈၵေႃႈ လီႁုဢိူဝ်ႈ၊ တြႃးဢၼ်ဝႃႈၼႆႉ ပဵၼ်ယႃႈယႃၸႂ်လီလူင်။

ဢူဝ်း... ၸႂ်ႁဝ်းတိုၼ်းလီတႃႇသေ ဢံႇလူဝ်ႇယႃႈယႃသင်။

ဢိူဝ်ႈ - တြႃးဢၼ်ဝႃးၼႆႉ ထုၵ်ႇလႆႈထွမ်ႇ - ထုၵ်ႇလႆႈသွၼ် - ထုၵ်ႇလႆႈမေႃ - ၵူႈၵေႃႉဢိူဝ်ႈ

တြႃးမီးၼႂ်းၸႂ်ၼႆဢံႇၸႂ်ႈႁႃႉ - လူဝ်ႇၵႂႃႇႁႃထွမ်ႇတၢင်ႇတီႈ ႁဵတ်းသင်

တၢင်းႁုႁဝ်း ဢဝ်လႅၵ်ႈတၢင်းႁုပိုၼ်ႈဢိတ်း႞ၵႂႃႈ သူၵေႃႈ

ဢမ်ႇလႅၵ်ႈ ဢမ်ႇလႅၵ်ႈ - တၢင်းႁုပိူၼ်ႈ ႁဝ်းဢံႇၶႂ်ႈလႆႈ - တၢင်းႁုႁဝ်းၼႆႉ - ၽႂ်ၶႂ်ႈဢဝ်ဢံႇဢဝ်ၵေႃႈယဝ်ႉ။

ႁဵတ်းၼႆ သၢၼ်ၶတ်းၵၼ်မႃးလွႆးလွႆး - ထိုင်ပွႆးလိူၼ်သီႇမႃး - ၶဝ်ၽူဝ်မေးၵေႃႈ ႁၢင်ႈၶိူင်ႈႁႅၼ်းၶူဝ်း ၸူဝ်းၵၼ်ၵႂႃႇပွႆးယဝ်ႉ - ၵူၼ်းၼႂ်းပွႆးၼၼ်ႉ ဢွၼ်ၵၼ်လွမ်တူၺ်း သွင်ၶႃၽူဝ်မေး -

ဢၢႆႈဝင်းတႄႉ မီးဢရသႃႇၵျ၊ မၼ်းဝူၼ်ႉဝႃႈ -

ပိူၼ်ႈတူၺ်းမေးၵဝ်ႇ ႁၢင်ႈလီ ဢိူဝ်ႈၼႆႉ...

ဢဝ်မေးႁၢင်ႈလီ ၶီၸႂ်မိူဝ်ႈၵႂႃႇၵႃႉ - ဢဝ်မေးႁၢင်ႈၸႃႉ ၶီၸႂ် မိူဝ်ႈၵႂႃႇပွႆး - ၵဝ်ၵေႃႈ ၶၢၼ်ႉၶဝ်ႈပွႆးၸွမ်း ၽူဝ်ႁၢင်ႈၸႃႉလူင်ၵဝ်ၼႆႉ - ပိူၼ်ႈတေဝႃႈ ထၢၼ်ႇမီႈတူၵ်းသႂ်ႇၵုၺ်ၽူင်းၼႆယဝ်ႉ။

ဢၢႆႈဝင်းသမ်ႉ ၵႆႉယုမ်ႉၵႆႉလၢတ်ႈတေႃႇ မေးမၼ်း ၶႂ်ႈႁႂ်ႈမေးမၼ်း ယုမ်ႉတွပ်ႇၶွပ်ႈၶိုၼ်းမႃး မေးမၼ်းသမ်ႉ ၵူဝ်ပိူၼ်ႁၼ် - ပဵၼ်ဢၼ်ၶၢၼ်ၸႂ်တုၵ်ႉၶလူင်ဝႆႉယဝ်ႉ။

ၵမ်းၼၼ်ႉ ၽိူဝ်ႇထိုင်ဝၢႆးပွႆး- ႁိုင်မႃးလွႆးလွႆး ၵွႆႈယူၵွႆႈမေးမၼ်း ဢမ်ႇပေႃးမူၼ်ႈပေႃးသိူဝ်း ဢဝ်ၽူဝ်ၸၢတ်ႈၼႆႉ ဢမ်ပေႃးႁၢၼ်ႉၸႂ်ၼႆလႄႈ - ၸင်ႇၵႂႃႇႁႃၵဝ်း ဢၢႆႈႁၢင်ႈလီဢွၼ်ၵေႃႉၼိုင်ႈ...

ယူႇယူႇဢၢႆ မၼ်းမဵၼ်မႃးယဝ်ႉ - ဢၢႆႈဝင်းလႆႈႁုလႆႈငိၼ်းယဝ်ႉ၊ တႃတႄႉဢမ်ႇပႆႇႁၼ် ယၢမ်းၼၼ် မၼ်းထၢမ်တူၺ်း မေးမၼ်း -

ဢလူဝ်ႉလူဝ်ႉ ၾႃႉၽႃႇလိၼ်ဢိုၼ်လႃႈ ၵဝ်ဢမ်ႇတွၼ်ႉႁဵတ်းမဵဝ်းၼႆႉ ၽႂ်ဝႃႈ ၽႂ်ဝႃ...

ထိုင်မႃးပွၵ်ႈၼိုင်ႈ - ဢၢႆႈဝင်းၵႂႃႇၽၼ်းၽိုၼ်း ႁဵတ်းၵႅင်ႈ ပႅတ်ႈၽႃႉပႅတ်ႈၵၢၼ်းသေယဝ်ႉ ဢဝ်မႆႉပွတ်းဢွၼ်ႇ ၵုၵ်းၵႂႆ ၵုၵ်းၵႂႆလူင် ပွၵ်ႈမႃးႁိူၼ်း -

မေႈသူ႟ ၵဝ်ၵႂႃႇၽႃႇၺႃး ယဵဝ်ႈမႃၼႆးလႄႈ တႃမွတ်ႇလိပ်းပႅတ်ႈယဝ်ႉ မႃးႁပ်ႉၵဝ်ႈလႄႈ။

တႄႉႁႃ...

မေးမၼ်းၵေႃႈ လႅၼ်ႈလူင်းႁိူၼ်းမႃး ၸုင်မၼ်းၶိုၼ်ႈႁိူၼ်းၵႂႃႇ...

မေးမၼ်း ႁႅꧣ်းၶဝ်ၽၵ်းမႃးတမ်း မၼ်းၵေႃႈ ငုမ်းငမ်းတၢဝ်းႁႃတႄႉတႄႉဝႃႈဝႃႈ - မေးမၼ်းၼင်ႈတေႃႇၼႃႈသေယဝ်ႉ ဢဝ်ၼိဝ်ႉမိုဝ်းယိုဝ်ႈသႂ်ႇယိုဝ်ႈသႂ်ႇ တႃႇမၼ်း သမ်ႉဢမ်ႇၽႅမ်ႉ၊ သမ်ႉၸၢမ်းဢဝ် ၶေႃႈၶႄႈမိုဝ်း ငႃတူၺ်းၵေႃႈ ဢမ်ႇတူင်ႉဢမ်ႇၼိုင်...

ၼႆႈလႄ ႁွင်ႉမၢဝ်ႇၼွႆႉမႃး ၵိၼ်ၶဝ်ႈႁူမ်ႈမူႇ သႂ်ႇသႂ်ႇသမ်ႉ ႁွင်ႉၼွၼ်းယူႇလုၵ်းလဵဝ် ႁဵတ်းၼႆမႃးလွႆးလွႆးယဝ်ႉ။

ထိုင်မႃးၼႂ်ၼိုင်ႈ မေးမၼ်းလုၵ်ႉၸဝ်ႉၵႂႃႇၵၢတ်ႇ ဢၢႆႈဝင်းလုၵ်ႉမႃး ငႅၼ်းၶေႃး ၽူဝ်ၼွႆႉတၢႆသေ ၶိုၼ်ႈႁူမ်ႇၽႃႈပၼ်ဝႆႉလီလီ - မေးမၼ်းပွၵ်ႈၵၢတ်ႇမႃးႁၼ်ယဝ်ႉ..

ၵူၼ်းသင် မႃးတၢႆၼႂ်းလုၵ်းၼွၼ်းႁဝ်းၼႆႉ... ႁႃးတေႁဵတ်းႁိုဝ်..

ၶိုၵ်ႉဢိူဝ်ႈၼႆႉ သူယႃႇပေမေႃး.. ပေႃးပိူၼ်ႈငိၼ်း ပိူၼ်ႈထၢင်ႇသူဢွႆႇတၢႆၵွၼ်ႇဢိူဝ်ႈ၊ ၸူဝ်ႈၶမ်ႈ ႁႃးၸင်ႇဢဝ်ၵႂႃႇလွင်ႈၼမ်ႉပႅတ်ႈ။

ထိုင်ၵၢင်ၶမ်ႈမႃး...

ၸႂ်ႉမေးမၼ်း ၸေးတူဝ်တၢႆသေ - ၸုင်မိုဝ်းမၼ်း ဢွၵ်ႇဝၢၼ်ႈၵႂႃႇထိုင်ၼမ်ႉလူင် - ၸေးၶဝ်ၼမ်ႉၵႂႃႇ - ၼမ်ႉထိုင်ႁူဝ်ၶဝ်ႇ ဢမ်ႇပႆႇပွႆႇလႆႈ၊ ၵူဝ်မၼ်းပၢၼ်ႉႁၢတ်ႇ - ၼမ်ႉထိုင်ၵၢင်ၶႃ - ၼမ်ႉထိုင်ဢူၵ်း - ၼမ်ႉထိုင်ၶေႃး - ပေႃးယဝ်ႉၵမ်းၼႆႉ - သွင်ၶိူဝ်ၽူဝ်မေး ၵႂႃႇၸွမ်းၵၼ်ႁႂ်ႈထိုင်မိူင်းမႁႃႇ သမ်ႇမုၵ်ႉတရႃႇပုၼ်ႉတႃႉ ဢီႇ႟ ဢီႇ - ဢႃးလႃးဝူး ထိုင်ႈထိုင်ႈထိုင်ႈ။

ၸင်ႇဝႃႈ ဢီႇၸၢင်ႈႁၢႆႉ - ၺႃး ဢၢႆႈၸၢင်ႈႁႅမ်ယဝ်ႉ။