ဢပုမ်ႇပွတ်းလႄႈၵႂၢမ်းၵပ်းထုၵ်ႇ/မေးပိူၼ်ႈယႃႇၵဝ်း မေးႁဝ်းၸင်ႇဢံႇႁၢႆႉ

လုင်သႅ်ဝၢဝ်း ဢႃႇယုၸံတေလႆႈ သၢမ်သၢဝ်း ၵွႆးယွမ်းသိပ်းသွင်ပီၵူၺ်းယဝ်ႉ၊ ပုင်ႇမၼ်းတႄႉ ၵူၼ်းသုင်ၸၢပ်ႇၶၢပ်ႇ ဢႅင်ႈၵိဝ်ႇဢူၵ်းဝၢတ်ႇ ယွမ်သိူဝ် မီးၼူတ်ႇၸွႃလူင်ဝႆႉ ၵႆႉၵႆႉႁေႃႈၵႃးၽႃမၢၼ်ႇဢွၼ်မၼ်း မႃးပၼ်ႇလဵပ်ႈႁိမ်းပီႈၼၢင်းသေး ဢၼ်ၶၢႆတၢင်းၶၢႆယွႆႈ ဢွႆႈဢွၼ်ႇမၢၵ်ႇဢွၼ်ႇလႂ် ၸိူဝ်းၼၼ်ႉ ၶႂ်ႈၵိၼ်ဢံႇၶႂ်ႈၵိၼ်ၵေႃႈ မႃးသိုဝ်ႉၵိၼ်သိုဝ်ႉၼင်ႈ ထင်ႉၶႅၵ်ႇႁၼ်တႆးၵေႃႈတႆးသေႈ ၽူႈလႂ်ၽႂ်မႃးၵေႃႈဝႃႈ - ၵိၼ်လႄႈ ၵိၼ်တူၺ်းလႄႈ ဝၢၼ်ႈဢိူဝ်ႈၼႆႉ ပေႃးၵႃႈမၼ်းပႅၼ်ႈႁႃႈပျႃး ထူၵ်းဢွၵ်ႇမႃးၶႅပ်းၸိတ်ႉ ဢံႇလူဝ်ႇဢၢၼ်းယဝ်ႉ ဢဝ်ဝႆႉလႄႈ ႁဵတ်းၼႆၵူႈဝၼ်းၵူႈဝၼ်း။

မေးမၼ်းတႄႉ ပိူဝ်ႈပဵၼ်ၵူၼ်းသိုဝ်ႈ ၵူၼ်းယူဝ်း သိူဝ်ႈၶူဝ်းၵေႃႈ ဢံႇပေႃးၼုင်ႈ ဢၼ်ၶိုၵ်ႉဢၼ်ၶံႇ ဢမ်ႇတွၼ်ႉႁဵတ်းႁၢင်ႈႁဵတ်းၽၢင်ၼင်ႇပိူၼ်ႈ လွင်ႈတၢင်းၼပ်ႉယံၽူဝ် - ၵူဝ်ယံ ပေႃႈထဝ်ႈမႄႈၵႄႇ မေႃႁၵ်ႉပီႈႁၵ်ႉၼွင်ႉတႄႉထူၼ်ႈယဝ်ႉ ဢံႇတွၼ်ႉလႄႇႁိူၼ်းဢွၵ်ႇႁိူၼ်းတူၵ်း - မူၵ်းယူႇၼႂ်းၵၢၼ် တင်းဝၼ်းတင်းဝၼ်း ၵၢင်ၼႂ်ၼံႉသုၵ်ႈၼႃႈ ၵၢင်ၶံႈၼံႉသုၵ်ႈတိၼ် - တၢင်းၵိၼ်ၶဝ်ႈၽၵ်းၵေႃႈ လဵင်ႉပၼ် ဢၼ်ဢုၼ်ႇဢၼ်မႆႈတႃႇသေႇ၊ လၢတ်ႈသင်ၵေႃႈ ဢံႇတွပ်ႇဢံႇထဵင် - ဢံႇပေႃးတၵ်းသငေ် ၸႂ်ႈၸင်ႇလၢတ်ႈ လေႃးၵဝၢတ်ႈ ပေႃႈမႄႈလႄႈ ၸဝ်ႈၽူဝ် တိုၼ်းဢံႇပၼ်လုတ်ႈပၼ်ယွမ်း ယူႇၸွမ်းၵၼ်မႃး ပေႃးလႆႈသွင်ၶူပ်ႇသၢမ်ပီ ၸႃႉဢံႇမီး လီဢံႇသဵင်ႈသေပွၵ်ႈ။

လုင်းသႅင်ဝၢဝ်းတႄႉ ၵႆႉလႄႇၵႆႉလၢဝ်း ဢုပ်ႇၽၢဝ်းတီႈယဝ်ႉတီႈ ႞ ဢၼ်မၼ်းၵႆႉၵႂႃႇ ၵူႈဝၼ်းၵူႈဝၼ်းတႄႉ - ပဵၼ်တီႈ ပီႈၼၢင်းသေယဝ်ႉ - ပီႈၼၢင်းသေၶဝ်သံႉမေႃၸွႆႉ ဢႃးၼႃႇၶႃႈ ယႃႇမႃးပၼ် ၶႅပ်းၸိတ်ႉတိၵ်းတိၵ်း ပၢႆလိူဝ် ႁဝ်းဢံႇမီးငိုၼ်းယွႆႈယဝ်ႉ။

ဢံႇလူဝ်ႇဢႃးၼႃႇ ဢဝ်တိၵ်းတိၵ်းလႄႈ ၶႂ်ႈလႆႈၶႅပ်းၸွႆႉၵေႃႈမီးၼႄႈဢဝ်ႁိုဝ်ႉ... ႁိူဝ်ႈ။

ႁိ - ႁိ - ယႃႇပေမႃးပၼ်ႁဝ်းၶႃႈ ပႆႇတွၼ်ႉႁၼ် ဢံႇယၢမ်းယိပ်း ၵူဝ်တူၵ်းၸႂ်ဢေႃႈ သူၸဝ်ႈၼႆႉ ၵိုင်ၸိုဝ်ႈသံႉပေႃးႁွင်ႉဝႃႈ ပီႈသႅင်ဝၢဝ်း - ပီႈသၢဝ်ဝႅင်းယဝ်ႉၼေႃ - ဝၢႆးၼႆႉသံႉလူဝ်ႇႁွင်ႉဝႃႈ ပီႈၵၢဝ်သွတ်ႇ ၼႆၵွၼ်ႇၶႃႈယူဝ်ႉ။

ၽိူဝ်ႇၼၢင်းသေၶဝ် ပွႆႇငိူၼ်ႈၵႂၢမ်းမႃးပၼ် ၸိူဝ်ႉၼၼ်ယဝ်ႉၵေႃႈ လေႃႈသႂ်ႇလေႃႈသႂ်ႇ ပေႃးၼင်ႇတေႃႇမႃႈၽႆးယဝ်ႉ - ၼၢင်းသေၶဝ်ၵေႃႈ ၸွႆႉဢဝ် ၸွႆႉဢဝ် ၶႅပ်းၸိတ်ႉၶႅပ်းၸွႆႉၵွႆးဢံႇၵႃး - ပႃးတင်းသိူဝ်ႈ တၵႃႉသိူဝ်ႈ - သိၼ်ႈတၵႃႉသိၼ်ႈ ၸဵမ်ၶံးၸဵမ်သႅင် - ၵွင်ၵႅင်တေႃႉထွၵ်ႇတေႃႉထွၵ်ႇ ဢွၵ်ႇမႃးပူၵ်ႉယႂ်ႇပူၵ်ႉလူင် ဢံႇၶႂ်ႈသူင်ၵေႃႈယိူၼ်ႉၸႂ်ၸူမ်း ဢံႇၶႂ်ႈၸူမ်းၵေႃႈ ယိူၼ်ႉၸႂ်လၢတ်ႈဢိူဝ်ႈ - မိူဝ်ႈၼၼ်ႉ ၼၢင်းသေၶဝ်သံႉပေႃးပီး... ဢူႈမႄႈၶဝ်သံႉပေႃးမီးၵွႆးဢံႇၵႃး ပႃးတင်းၸပ်းၶႅၼ်းဝႆႉ ၼႆႉယဝ်ႉတၢင်းၵတ်ႉ ၼၢင်းသေးဢေးမႄႈႁၢင်ႉသၢမ်ၽူဝ်ပၢႆလႅမ်ႈ - ယၢမ်ႈမေႃယွမ်ႉပၼ်သႆႈၵူၼ်းၸၢႆး ပေႃးလႆႈ တီႇၵရီႇၼၢႆးၸွႆႉယဝ်ႉလူင်။

လုင်သႅင်ဝၢဝ်းၶဝ်တႄႉ ၵႃႈပဵၼ်ၼိူဝ်ႉယႂ်ႇပႃလူင် ၶဝ်ႈသၢၼ်ဢၢၼ်ႇထူင် ၼံႉမၼ်းဢၢၼ်ႇပုင်း ၼိူဝ်ႉၵွၵ်းပႃၵွၵ်း ဢဝ်တိူၵ်ႈမၼ်းဝႃႈ ၵႃႈဢၼ်ၶဝ်မၵ်ႉၼၼ်ႉ တေႃႉသူင်ႇတေႃႉသူင်ပဵၼ်ၵၢၼ်ႇထရႅၵ်ႉဝႆႉ ဝၢႆးၼႆႉဢံႇပေႃးႁိုင်ပေႃးၼၢၼ်း ၼႂ်းၵႃးၽႃမၢၼ်ႇဢွၼ်ႇမၼ်းၼၼ်ႉ ပႃးၵဵၼ်ၽႃႈၵဵၼ်ၶူဝ်မႃးယဝ်ႉႁေး။

မေးလူင်မၼ်းတႄႉ ဝူၼ်ႉဝႃႈ ဢေႃးႁဝ်းႁဵတ်းလီၵေႃႈ ပိူၼ်ႈဢံႇႁၼ်လီ ပီၼႆႉတေဢဝ်ၽူဝ်ၼွႆႉႁိုဝ် ဢေႃး - ဢံႇလူဝ်ႇၶဝ်ႈလၢႆးတိုဝ်ယဝ်ႉ၊ ၸွမ်းလူၺ်ႈၵုသူလ်ႇၵဝ်ႁွတ်ႈဢိူဝ်ႈ မိူဝ်ႈၼႆႉဝႆႉပႅတ်ႈၶူဝ်းလံ ၶူဝ်းလၢႆး ၵႂႃႇႁဵတ်းၼၢႆးၶၢဝ်မႂ်ႇမႂ်ႇ သႂ်ႇလႄႈၵံးၼႆႉ ယဵၼ်ယဝ်ႉ ၵတ်းယဝ်ႉဢိူဝ်ႈပိူၼ်ႈတႄႉ။

ၵွႆးၵိုတ်းလုင်းသႅင်ဝၢဝ်း ၶၢဝ်းမၼ်းႁိုင်မႃးလွႆးလွႆး ၸွႆးထိူဝ်ၸွႆးထိူဝ် သွင်ပီလိူဝ်လိူဝ် သၢမ်ပီယွမ်းယွမ်း ငိုၼ်းႁႃႈသဵင်ႈၸွမ်းမူတ်းၸွမ်းလိူမ်ႈယဝ်ႉ ၼႃႈပိူၼ်ႈဢံႇမိူၼ်ၵဝ်ႇ - ဢံႇလၢတ်ႈမိူင်ၵူႈၽဝ်ႇၵူႈပွၵ်ႈ ၵႆႉၵႆႉဝႃႈတွၵ်ႈဝႃႈတံ ဢႃႇယုႁႃးဢံႇမိူၼ်ၵၼ် ဢံႇၶႂ်ႈႁၼ် ၶၢၼ်ႉၼွၼ်းႁိမ်း မဵၼ်ၸေႈၵႅၼ်း ၸႂ်ႉႁႅၼ်း ၶဝ်ႈၽၵ်းၵေႃႈ ဢံႇႁႅၼ်း ၽႂ်ၶႂ်ႈတႅၵ်ႇၵေႃႈ ႁႃၵိၼ်လႃႈ ၸႂ်ႉမႄးၽႃႈၵေႃႈ သမ်ႉဝႃႈၽႂ်ၶႂ်ႈၼွၼ်းမၼ်းမႄး ၽႂ်ဢံႇပဵၼ်ၶႃႈၽႂ် ၸႂ်ဢံႇမူၼ်ႈ ဢိမ်ႇ-ၸၢၼ်ႈ-ၸင်း-ၸၢင်- ၶႂၢင်ႁူၶႂၢင်တႃၼႃႇၼႃႇ ဢွၵ်ႇၵႂႃႇၵေႃႈ ဢံႇသေးလၢႆ ၸဵတ်းတၢႆယေႈၶႅၼ်းၸူမ်း ဢမ်ႇမႅၼ်းလူမ်း ဢံႇထုၵ်ႇလိူတ်ႈ ဢမ်ႇၺႃးထၢတ်ႈ ယႃႇမႃးလၢတ်ႈတေႃႇၵဝ် ႁၵ်ႉလႄႈဢဝ်ဢံႇၸႂ်ႈ ႁဵတ်းၼႆ မႃးတိၵ်းတိၵ်း မိူဝ်ႈၵွၼ်ႇၶူဝ်ႈၶိၵ်းၶိၵ်း မိူဝ်ႈလဵဝ်ပွင်ႉတုၼ်ႈတုၼ်ႈ လုၼ်ႈယဝ်ႉ လုၼ်ႈယဝ်ႉ ဢေႃး "မေးပိူၼ်ႈယႃႇၵဝ်း မေးႁဝ်း ၸင်ႇဢံႇႁၢႆႉ" ဢၼ်ဝႃးၼႆႉ ၺႃးယဝ်ႉ - ပိူၼ်ႈပႅတ်ႈဢံႇၶၢတ်ႇ ႁႃးၵႂႃႇပၢတ်ႇဢဝ်လူင် ၸိူင်ၵိၼ်သႆႈၶူင်းၼႂ်းႁႃး ယင်းပၢႆၺႃးတိၼ်ပိတ်ႉၵွၼ်ႇဢိူဝ်ႈ... ပွင်ႇၸႂ်ယဝ်ႉ ပွင်ႇၸႂ်ယဝ်ႉ ယွင်ႇယူႇ ပူႇယွင်ႇ႟ ပွင်ႇပွင်ႇသံႉပေႃးယွၵ်းယဝ်ႉ ၽိတ်းသွင်လၢမ်း ႁၢမ်းသွင်ၽၢႆႇဢိူဝ်ႈၵံးၼႆႉ။