ပိုၼ်းၽြႃး ၸဝ်ႈၵေႃးတမ/တွၼ်ႈ 4/ဢွၵ်ႇထိူၼ်ႇၵႃႇမႃႇ ၶဝ်ႈထိူၼ်ႇပႃႇ

ၸီးၸိမ်ႇၶုၼ်ၶမ်း တီႈၼႂ်းငမ်းႁေႃ

သၢႆဝၼ်းပိူင်းထွင်ႇ ပွင်ႇလႅင်းၶၢႆႉလတ်းၸွမ်းလူၺ်ႈ ၼၵ်ႈၶၢတ်ႈ လိူၼ်လၢဝ်ၵၢင်ႁၢဝ် တွင်ႉၾႃႉၼၼ်ႉသေ ၼီႈပႅင်ႈၾႃႉၵေႃႈ လႅၵ်ႈလၢႆႈယဝ်ႉ လႅၵ်ႈလၢႆႈထႅင်ႈ ၶၢဝ်းႁႅင်ႈယဝ်ႉၶၢဝ်းၽူၼ်၊ ၶၢဝ်းၽူၼ်ယဝ်ႉၶၢဝ်းၵတ်း၊ ၶၢဝ်း ၵတ်းယဝ်ႉ ၶိုၼ်းလတ်းၶဝ်ႈ ၶၢဝ်းမႆႈ ပုတ်ႈလၢႆႈ ၶၢႆႉပၢႆႈ ပၼ်ႇၵၼ်ၵႂႃႇ ၼင်ႇ ၼၼ်ယူႇ၊ ဢိင်ပိုင်ႈၼိူဝ် ဢုတုသၢမ်ၶၢဝ်းၼႆႉသေ တူၼ်ႈမႆႉတူၼ်ႈတွၵ်ႇ မွၵ်ႇမၢၵ်ႇႁၢၵ်ႈႁူဝ် ၸဵမ်ၵႃႈ ဢၼ်မီးတူဝ်ၸႂ် ၽႂ်ၽႂ်မၼ်းမၼ်း မူၼ်ႈပၼ်းၸွမ်း ၼင်ႇ ၶၢဝ်းယၢမ်းၶဝ်ၼၼ်ႉယူႇ။ ၽွင်းၶၢဝ်းၵတ်း ၸမ်တေမူတ်း ၼမ်ႉၼၢႆးၸမ်တေယူတ်းၼၼ်ႉ တူၼ်ႈမႆႉ တူၼ်ႈတွၵ်ႇ မွၵ်ႇမွၵ်ႇမႂ်မႂ် ဢၼ်ၶဵဝ်သႂ်ယူႇၼၼ်ႉ ဢွၼ်ၵၼ်ႁဵဝ်ႇ ႁႅင်ႈ ပိဝ်တူၵ်း လႅင်ႈၼိူဝ်လိၼ်သေ မွၵ်ႇလၢတ်ႈၼႄဝႃႈ ၸမ်တေထိုင်မႃး ၶၢဝ်းမႆႈၼႆယူႇ။ တီႈဢၼ် မႂ်ၵဝ်ႇမႂ်ႁႅင်ႈ ႁူင်ႈလႅင်ႈတူၵ်းလုတ်ႈၵႂႃႇၼၼ်ႉ ယွတ်ႈၼုမ်ႇ မႃးပုတ်ႈတႅၼ်းတၢင်ပၼ် ႁႂ်ႈဢၼ်ၶိုၼ်းႁုၼ်ႈ ထႅင်ႈမႂ်ႇမႂ်ႇ ၼၼ်ႉယူႇ။ ဢမ်ႇၸိုဝ်ႈလႄႈဝႃႈ ၽူႈမီးၽုင်းယႂ်ႇၶဝ် မႃးၽၢၼ်ႇသၢင်ႈပဵၼ်၊ မၼ်းပဵၼ်လူၺ်ႈၸွမ်း ၵိုၵ်းႁွမ်းရႃႇသီႇဢုတု ဢၼ်ၸၢင်ႈဢဝ်လု ဢဝ်ပဵၼ် ယူႇသေႇသေႇၼၼ်ႉယဝ်ႉ။

ပေႃးဝႃႈ ထိုင်ၶၢဝ်းမႆႈၼႆၸိုင် သၢႆလႅတ်ႇၶို်င်ၶႅင်ထွင်ႇသႂ်ႇလႄႈ ၼင်ႇႁိုဝ် တေဝႄႈလႆႈ လွင်ႈတၢင်းမႆႈလႅတ်ႇၼၼ်ႉ ၵႃႈပဵၼ်သတ်ႉတဝႃႇတူဝ်မီးၸႂ် ၵူႈၽႂ်ၶိင်းမၼ်း ဢွၼ်ၵၼ်ၶႄၵႅတ်ႇ လွင်ႈတၢင်းမႆႈလႅတ်ႇ လၢႆးၽႂ်လၢႆးမၼ်း။ ၸဝ်ႈသီႇထၢတ်ႈတႄႉ ၽွင်းမိူဝ်ႈသၢႆလႅတ်ႇဢၢႆလႅတ်ႇ ၶႅၼ်ႇၽၢႆၼၼ်ႉ မၼ်းၸဝ်ႈ ၶဝ်ႈယူႇသဝ်း တီႈၼႂ်းႁေႃသုရမ်ႇမၼၼ်ႉသေႇသေႇ။ ၸိူင်ႉၸႅင်ႈ ၽုင်ၼၢင်း ႁွမ်းၶၢင်းတၢင်းၼမ် သဝ်းဢိူမ်ႈႁိမ်းၸမ်သေ ႁူမ်ႁူမ်ၸူမ်းၸူမ်း ဢဝ်ဝီး ဝႆလူမ်းပၼ်ၸဝ်ႈယဝ်ႉ။ ဢၢႆလႅတ်ႇသၢႆလႅတ်ႇ ၶႅင်ၽၢႆလႆႈ တီႈၼိူဝ် တၢင်ႇၵေႃႉသေတႃႉ ႁိုဝ်တေမႃးၵၢႆလႆႈ တီႈၸဝ်ႈသီႇထၢတ်ႈလႃးလႃး။

တူဝ်ၼၢင်းယိင်းမျၢတ်ႈ ဢၼ်ဝႃႈၼၼ်ႉ လွင်ႈထိတိူဝ်ႉၼိူဝ်ႉၼင်ၵေႃႈ ပဵၼ်ဢၼ်ထူးလၢၵ်ႇဝႆႉ။ ၼၢင်းယသေႃႇထရႃႇ ဢၼ်ႁၢင်ႈလီ မိူၼ်ႁုၼ်ႇႁၢင်ႈ ၽီသွၼ်းၼႆႉ လၵ်ႈၶၼႃႇ လွင်ႈလီလွင်ႈၶႅမ်ႉ တဵမ်ထူၼ်ႈၵူႈပိူင်ပိူင်။ တူဝ် မၼ်းၼၢင်းၼႆႉ ပေႃးၶၢဝ်းမႆႈၼႆ ပဵၼ်ဢၼ်ၵတ်းယဵၼ်ဝႆႉသေ ပေႃးၶၢဝ်းၵတ်း ပဵၼ်ဢၼ် ဢုၼ်ႇဝႆႉသေႇသေႇယူႇ။ ၵွပ်ႈၼႆ ဢူဢၢႆသၢႆလႅတ်ႇ ၶႂ်ႈမႆႈတၢၼ်ႇ ႁိုဝ်မႆႈ ၽွင်းမိူဝ်ႈ ၼေႃႇၶမ်ႈၸဝ်ႈ လႆႈယူႇသဝ်းၸွမ်း ၼၢင်းယသေႃႇၼၼ်ႉ ႁူႉတေပဵၼ် ဢၼ်ၵတ်းယဵၼ်ယူႇ။

လွင်ႈပၢႆးမၢၵ်ႈမီးၵေႃႈ တဵမ်ထူၼ်ႈ၊ ဝၢၼ်ႈမိူင်းတိူင်းၵႃးၵေႃႈ ဢမ်ႇသုၵ်ႉ ဢမ်ႇၵဝ်းသေၵူၺ်းဢမ်ႇၵႃး ၵေႃႉၶႅပ်ႇၶၢင်ႈ ဢၼ်ႁၢင်ႈလီ၊ ဢၼ်မီးသတ်ႉၸႃႇ၊ ဢၼ်မေႃလၢတ်ႈမေႃၸႃ၊ ဢၼ်မေႃႁႃႁၼ်လုမ်းလႃး၊ ဢၼ်မေႃပႃး ၽၢႆႇ ၸဝ်ႈၽၢႆႇၽူဝ်၊ ဢၼ်တိုၵ်ႉၼုမ်ႇ... ၸိူဝ်းၼႆႉ ၵုမ်ႇလႆႈၸၢမ်ႇပူၺ်ႈလူၺ်ႈယူႇ လႄႈ ၵႄႈၵၢင်ၸႂ် ၼေႃႇၶမ်ႈၸဝ်ႈ ပဵၼ်ဢၼ်ၵတ်းၸိုၼ်ႈယဵၼ်ၸႂ် မိူၼ် ၼင်ႇၼမ်ႉတိုင်းသႂ်ယဝ်ႈ။

ၽွင်းမိူဝ်ႈသၢႆလႅတ်ႇ ၶႅင်ႁႅင်းၼၼ်ႉ ဢၢႆၼမ်ႉသမ်ႉၶိုၼ်းႁုပ်ႇၶိုၼ်ႈ တႃႉၶဵင်ႇ လႅတ်ႇယူႇၼင်ႇၼၼ်သေတႃႉ ပေႃးဝႃႈ ဢၢႆၼမ်ႉဢၢႆမွၵ်ႇ လႆႈမႃး တိူဝ်ႉၺႃးသႂ်ႇ လူမ်းၵတ်းလူမ်းယဵၼ်ၼႆ လႆႈယဵၼ်းပဵၼ်ၼမ်ႉၽူၼ်ၵႂႃႇယူႇ။

တူၼ်ႈမႆႉတူၼ်ႈတွၵ်ႇ မွၵ်ႇမၢၵ်ႇႁၢၵ်ႈႁူဝ်ၶဝ်ၼႆႉ ဢမ်ႇၵူဝ်ၽူၼ်သေ ဢမ်ႇၵႃး ပေႃးၼမ်ႉၽူၼ်တူၵ်းမႃးၼႆ ပဵၼ်ဢၼ်ယဵၼ်ၸႂ် ၸိုၼ်ႈသႂ် သိူဝ်း လၢၼ်းယူႇသေတႃႉ ၵႃႈပဵၼ်တူဝ်သတ်း ၼူၵ်ႉၼႆၼူၵႆ ၸိူဝ်းသတ်ႉတဝႃႇ ဢၼ်ယူႇသဝ်း ၼႂ်းထိူၼ်ႇၼၼ်ႉ ၵၼ်ႉဢွၼ်ၵၼ်ပၢႆႈမူၵ်း တီႈဢၼ်လွတ်ႈ ၽူၼ်တူၵ်းၼၼ်ႉဝႆႉသေ ၽွင်ႈၵႂႃႇႁႃၵိၼ်ႁႃယႅမ်ႉၵေႃႈ ႁူႉတေႃႈ လႆႈသေႃႉ မူၵ်းဝႆႉယူႇ ၼႂ်းႁူးၼႂ်းႁၢင်းၶဝ်ယဝ်ႉ။ ၵူၼ်းလုမ်ႈၾႃႉၶဝ်တႄႉ ယၵ်ႉတူၺ်း ၽူၼ်ၵူမ်ႈသွၼ်းလေႃႇၼၼ်ႉသေ ႁူႉၵႃႈတေလႆႈ ႁႃလဵင်ႉၼဵင် လဵင်ႉသႆႈ ယႃလွင်ႈတၢင်းမႆႈ ၽႂ်မၼ်းယူႇ။

ၽွင်းယၢမ်းၶုၼ်ၽူၼ် ၶိုင်သိုၵ်း သဵင်တိုၵ်းၵၼ် ပေႃးမေႃးၶရိုင်ႈၶရိုင်ႈ ၼမ်ႉႁွင်ႈၼမ်ႉၼွင် ယိုင်ႈၶိုၼ်ႈ ပေႃးလူၼ်ႉ ပေႃးပူၼ်ႉၶွပ်ႇ ပူၼ်ႉလႅၼ် ပေႃးၽိူၵ်ႇၽိူၵ်ႇၽႅၼ်ၽႅၼ် ၶဵတ်ႇဢွၼ်ႇၵျွၵ်းဝႅၼ် ၸွမ်းလႅၼ်တႄးၼႃး ႁွင်ႉႁႂ်ႈၽူၼ်မႃး သမ်ႉပေႃးမေႃးပၼ်းဢူၼ် ၽွင်းမိူဝ်ႈၶၢဝ်းၽူၼ် သွၼ်းယမ်း ၼင်ႇၼၼ် ၼေႃႇၶမ်းၸဝ်ႈသီႇထၢတ်ႈတႄႉ ၺႃးမိူဝ်ႈမၼ်းၸဝ်ႈ ယၢမ်ႈၶဝ်ႈ ယူႇသဝ်း တီႈၼႂ်းႁေႃၶၢဝ်းၽူၼ် ႁေႃသုၽၼၼ်ႉယဝ်ႉ။ ၽွင်းမိူဝ်ႈ သဵင်လူမ်း သဵင်ၽူၼ် ဢူၼ်ဢူၼ်ပၼ်းပၼ်း မေႃးၼၼ်းယူႇ ၽွင်းမိူဝ်ႈၼႃႈၾႃႉ ၵမ်ႇလမ်သဝ်ႈၼၼ်ႉ တီႈႁိမ်း ၼေႃႇၶမ်းၸဝ်ႈတႄႉ ယိင်းၼွင်ႉယသေႃႇ ၶဝ်ႈၸူးႁိမ်းၸမ် မိူၼ်ႁၢင်ႈ ၵူဝ်ၾႃႉလမ်သဝ်ႈသေ ၶဝ်ႈမႃးၸူးၸမ်ဝႆႉယူႇလႄႈ ပဵၼ်တီႈ ၵႄႈလိတ်ႈယႃၸႂ် ႁႂ်ႈပေႃးယဵၼ်ဢုၼ်ႇ ပဵၼ်တီႈ ၸႂ်ၶုၼ်ႇၶိုၼ်းသႂ် ၼၼ်ႉယူႇ။

ပေႃးဝႃႈ ၽူၼ်ၶိုင်ႁႃယူတ်း ၶိုင်ႁႃမူတ်းယဝ်ႉၼႆ လူမ်းယဵၼ်လူမ်းၵတ်း လုၵ်ႉၽၢႆႇႁွင်ႇလတ်းမႃးသေ ၽူၼ်ဢၼ်ၵိုတ်း တေယိုတ်း ဢမ်ႇယိုတ်း ၼၼ်ႉ လူမ်းၽၢႆႇႁွင်ႇ ဢဝ်ၸွင်ႇ ၵႂႃႇၵႂႃႇၶိုၼ်းၶိုၼ်းလႄႈ ဢမ်ႇပဵၼ်ႁႃႇၽူၼ် လႆႈသေ ၵူၺ်းလႆႈပဵၼ် ၽွင်ၼၢႆးဢွၼ်ႇ ၸၢႆးယွၼ်ႇတူၵ်းၽွၵ်း ဢဝ်ၵူၺ်း။

ၶၢဝ်းၽူၼ်လတ်းပူၼ်ႉယဝ်ႉ ၽွင်းထိုင်ႁွတ်ႈၶၢဝ်းၵတ်းၼင်ႇၼၼ် လႆႈ မုင်ႈႁၼ် ဢႃႇၵႃႇတွင်ႉၾႃႉ ပဵၼ်ဢၼ်ၸိုၼ်ႈၸၢင်ႇ ပၢင်ႇၵျႃႉသႂ်ႇလီဝႆႉလႄႈ ၵႃႈပဵၼ် လိူၼ်လၢဝ် ၼိူဝ်ၵၢင်ႁၢဝ်ၵေႃႈ ဢွၵ်ႇၸေႃႈယႆၵၼ် ပဵၼ်ဢၼ်လႆႈ ႁၼ် ၸုင်ႇၸုင်ႇၸေးၸေးဝႆႉယူႇ။

ၽူၼ်ၵေႃႈၸမ်ယူတ်း၊ ၼၢႆးၵေႃႈၶိုင်ႁူတ်း၊ ဢၢႆလႅတ်ႇသၢႆလႅတ်ႇၵေႃႈ ဢမ်ႇပေႃးႁႅင်း ဢမ်ႇပေႃးၶႅၼ်ႇ တီႈၽႅၼ်ႇလႅၼ်လိၼ် မတ်ႉသိမၼၼ်ႉ ပဵၼ်ဢၼ်သႃႇယႃႇႁၢင်ႈလီ ပဵၼ်ဢၼ်မႄးတၢင်ႇသီၼမ်ႉယႃႈ လုမ်ႈၾႃႉၶူင်း ၵၢင်ၼႆႉဝႆႉယူႇ။ ၼႃႈၾႃႉၸိုၼ်ႈသႂ် မႂ်မွၵ်ႇလွၼ်ႉၵီႈ လူမ်းဝီႈထွင်းပဝ်ႇ မၢင်ၽဝ်ႇငိၼ်းၵတ်း လူင်ထိူၼ်ႇပတ်းပိုၼ်ႉ ၶိုၼ်ႉၵၼ်ၶဵဝ်ဢွၵ်ႇ ၼႄမွၵ်ႇ လွင်ႈတၢင်းလီႁၵ်ႉလီႁၼ် လႄႈ ပဵၼ်တီႈၵႄႈၸႂ် ယႃၸႂ် ပဵၼ်တီႈ သႄႈၸႂ် တႃသႂ် ၵူႈၽႂ်မၼ်းဝႆႉယူႇ။ ၽွင်းမိူဝ်ႈ ၽွင်ၼၢႆးတူၵ်းဢွႆ ၼိူဝ်သၼ်လွႆၼင်ႇၼႆ ၼေႃႇၶမ်းၸဝ်ႈ ၶၢႆႉၶဝ်ႈ မႃးယူႇသဝ်း တီႈၼႂ်း ႁေႃရမ်ႇမ။ မၢင်ပွၵ်ႈမၢင်ပွၵ်ႈ ဢွၵ်ႇၼွၵ်ႈႁေႃသေ ၵႆႉမိူဝ်း ဢွၵ်ႇလႄႇ တီႈၼႂ်းသူၼ်သိူဝ်း သူၼ်မင်ႇၵလႃႇၼၼ်ႉယူႇ။ မၢင်ပွၵ်ႈ ၵေႃႈ ၼၢင်းၼွင်ႉယသေႃႇ ပႆၸွမ်းႁွမ်းၸွမ်းၵေႃႉလဵဝ်သေ မၢင်ပွၵ်ႈမႃး ၸိူင်ႉ ၸႅင်ႈၽုင်ၼၢင်း ၶဝ်ပႃးၵႂႃႇၸွမ်း လူၺ်ႈယဝ်ႉ။

ၼေႃႇၶမ်းၸဝ်ႈ ၸၢမ်ႇပူၺ်ႈၸီးၸိမ်ႇ ၵိုၵ်းႁွမ်းၸွမ်း ၼၢင်းယသေႃႇ လႄႈ ၸိူင်ႉၸႅင်ႈၽူင်ၼၢင်း သီႇမိုၼ်ႇ ပေႃးတၢၼ်ႇၸီးၸိမ်ႇၶုၼ်ၸၵျဝတေး ႁဵတ်းၼၼ် ဝၼ်းၼိုင်ႈယဝ်ႉဝၼ်းၼိုင်ႈ လိူၼ်ၼိုင်ႈယဝ်ႉလိူၼ်ၼိုင်ႈ ပီၼိုင်ႈယဝ်ႉ ပီၼိုင်ႈ တႄႇဢဝ်ၽွင်း ဢႃႇယုလႆႈ 16 ပီ ၸၢမ်ႇပူၺ်ႈ ၵႃႇမၵူင်ႇ လီလီငၢမ်းငၢမ်း တဵမ်တဵမ်ထူၼ်ႈထူၼ်ႈသေ ယၢမ်းလဵဝ် ဢႃႇယုၸဝ်ႈ ၶဝ်ႈမႃး ၼႂ်း 28 ပီယူႇယဝ်ႉ။ ၼႂ်းၵႃႈ 12 ပီ ၼႆႉ ၼၢင်းယသေႃႇၵေႃႈ ပႆႇမီးလုၵ်ႈမီး လၢင်းလႄႈ ၼေႃႇၶမ်းၸဝ်ႈ လႆႈပျေႃႇယႃႇသႃႇၸွမ်း ၵိုၵ်းႁွမ်းၼၢင်းယသေႃႇ ၵႂႃႇ ႁၵ်ႉႁူမ်ၸူမ်းပႅင်း လိူဝ်ႁႅင်းတေႉတေႉ။

ပေႃႈၸဝ်ႈႁေႃၶမ်း သုတ်ႉထေႃးတၼၵေႃႈ ယွၼ်ႉပိူဝ်ႈ ၶႂ်ႈႁႂ်ႈ လုၵ်ႈၸၢႆး ၶမ်းႁၢႆးမၼ်း ပဵၼ်ၶုၼ်ၸၵျဝတေးလႄႈ လႆႈႁၼ်လုၵ်ႈမၼ်းၸဝ်ႈ ၶဝ်ႈယူႇ တႂ်ႈႁူမ်ႈ ၸီးၸိမ်ႇၵႃႇမၼင်ႇၼႆ မၼ်းပဵၼ်ဢၼ် လွမ်ၸူမ်းဝႆႉ တၢင်းၼိုင်ႈ ယူႇ။ “ဝၼ်းလႂ် လုၵ်ႈၵဝ်တေပဵၼ် ၶုၼ်ၸၵျဝတေး”ၼႆ လွမ်ၼပ်ႉၶပ်ႉယႆ ပႂ်ႉမၢႆ မုင်ႈမွင်း ဝၼ်းမၼ်းဝႆႉယူႇ။ ၵူၺ်းၵႃႈ သဵင်ၶေႃႈၵႂၢမ်း ပုၼ်ႇၼႃး ၵွၼ်းတၺ်ႇၺ ဢၼ်ၸီႉမိုဝ်း ၼိဝ်ႉလဵဝ်သေ ႁေႃးလၢဝ်ႈဝႃႈ “တေပဵၼ် မုၼ်ၶမ်းၽြႃး ဢမ်ႇႁၢင်ႉ” ဢၼ်ဝႃႈၼၼ်ႉၵေႃႈ လႆႈၾင်ႉသတိဝႆႉ ၼင်ႇၵဝ်ႇ လႄႈ လုၵ်ႈသိုၵ်းၵူၼ်းပႂ်ႉၵေႃႈ ၸႂ်ႉႁႂ်ႈပႂ်ႉဝႆႉ ၼမ်ၼမ်သေဢမ်ႇၵႃး ၼင်ႇႁိုဝ် လုၵ်ႈၸၢႆးမၼ်းၸဝ်ႈ ပေႃးတေ ဢမ်ႇလႆႈႁၼ် ၵူၼ်းထဝ်ႈ၊ ၵူၼ်းပဵၼ်၊ ၵူၼ်းတၢႆ၊ ရႁၢၼ်းၼၼ်ႉၼႆၵေႃႈ တေႃႈၶိုင် သၢင်ႈႁၢင်ႈပွင်ဝႆႉယူႇၽၢႆႇၼိုင်ႈ။ တီႈတိူၵ်ႈသုတ်းမၼ်း ၶေႃႈၵႂၢမ်း ဢၼ်ဝႃႈ “ၵူၼ်းထဝ်ႈ၊ ၵူၼ်းပဵၼ်၊ ၵူၼ်းတၢႆ၊ ရႁၢၼ်း”ဢၼ်ဝႃႈၼၼ်ႉ တိုၼ်းဢမ်ႇပၼ် ၽုတ်းလၢတ်ႈ ထိုင်ႁူ ၼေႃႇ ၶမ်းၸဝ်ႈၼႆၼၼ်ႉၵေႃႈ လွမ်တွႆႇသွႆႇဝႆႉ ၵူၼ်းလုမ်းလႃး မၼ်းၸဝ်ႈ သဵင်ႈ သဵင်ႈယူႇ။

ၽၵ်းတူၶူးဝဵင်းၵေႃႈ မႄးၶိုင်ႁဵတ်းဝႆႉမႂ်ႇမႂ်ႇ ၵူၼ်းႁႅင်းယႂ်ႇ ႁဵင်ၼိုင်ႈ ပိုတ်ႇပၢၵ်ႈ ဢီးငၢၵ်ႈ တေႃႉတႄႉပိုတ်ႇလႆႈ ဢိတ်းဢိတ်းၵူၺ်းၼႆယဝ်ႉ။

ၼေႃႇၶမ်းၸဝ်ႈၵေႃႈ ၵျေႃႇသိူဝ်းၸွမ်း ၸိူဝ်းၸိူင်ႉၸႅင်ႈၽုင်ၼၢင်းၼုမ်ႇ ပၢၼ်လဵဝ်ၵၼ်ၼၼ်ႉယူႇလႄႈ ၵႄႈၵၢင်ၸႂ်မၼ်းၸဝ်ႈ ပဵၼ်ဢၼ်လိုမ်းႁူႉ လိုမ်းႁၼ် ပၢၼ်ၵူၼ်းထဝ်ႈၵူၼ်းၵႄႇၼၼ်ႉယူႇ၊ ၽူႈဢၼ်ယႂ်ႇသေ မၼ်း ၸဝ်ႈၼႆ ၵူၺ်းလႆႈ ႁူႉႁၼ်ထိုင် ၸဝ်ႈပေႃႈလႄႈ မႄႈၼႃႉၵေႃးတမီႇၵူၺ်း။

ၼိမိတ်ႉႁၢင်ႈၶိူင်ႈ ၸႂ်ၸဝ်ႈပိူင်ႈ

ၸူဝ်ႈယိုၼ်း ဢႃႇယုၸဝ်ႈ ၶဝ်ႈမႃး 28 ပီ ၼႃႈႁိူၼ်းၸဝ်ႈ ၶဝ်ႈမႃး 12 ပီ မႁႃႇသၵ်ႉၵရၢတ်ႉ 96 ၼီႈ ဝၼ်းလိူၼ်ပႅတ်ႇမူၼ်းၼၼ်ႉ ၸႂ်ၼေႃႇၶမ်း ၸဝ်ႈ ၶႂ်ႈမိူဝ်းလႄႇတူၺ်း တီႈသူၼ်သိူဝ်းလႄႈ ၸင်ႇၸႂ်ႉ ၵူၼ်းႁေႃႈလေႃႉမႃႉ ၸဝ်ႈ ၶိုင်သၢင်ႈႁၢင်ႈပွင်လေႃႉယူႇ။

ပဵၼ်လေႃႉမႃႉ ၼႂ်းႁၢင်ႈၼႂ်းႁေႃလႄႈ ပဵၼ်ဢၼ် ယဵၼ်ႇငႄႈၶႅမ်ႉလႅပ်ႈ လီ တူၺ်းတႄႉတႄႉ။ ဢဝ်ရတၼႃႇၵႅဝ်ႈသႅင် ၵူႈပိူင် ႁၢင်ႈၶိုင်ဝႆႉသေ တႃႇ တေတိုတ်ႉလၢၵ်ႈလေႃႉၼၼ်ႉ ဢဝ်မႃႉ ဢႃႇၸႃႇၼီႇသီႇတူဝ် တိုတ်ႉလၢၵ်ႈ ဢဝ်ယဝ်ႉ။ မႃႉဢႃႇၸႃႇၼီႇသီႇတူဝ်ၼၼ်ႉ ပဵၼ်မႃႉၽိူၵ်ႇတင်းသီႇတူဝ် တၢၼ်ႇၵၼ် လီလီ၊ ႁၢင်ႈၵေႃႈႁၢင်ႈလီ၊ ပီးၵေႃႈပီးလီ၊ တၢင်းၵႂႃႇတၢင်းပႆၶဝ်ၵေႃႈ မေႃယႆမေႃပႆ ဝႆႉတိၼ်ၽဵင်ႇၵၼ်။ လွင်ႈဢႅၼ်ႇလႅၼ်ႈ တိုတ်ႉလၢၵ်ႈလေႃႉၵေႃႈ ပေႃးတၢၼ်ႇ တေမိၼ်၊ လွင်ႈဝႆႉဝၢင်း ႁူဝ်ၶဝ်သီတူဝ်ၼႆၵေႃႈ ၸၢႆႉၸိူၼ်းၽၢႆႇၼႃႈ မိူၼ် ၼင်ႇ ဢဝ်လႅဝ်းတႅပ်းၽၢႆႉ ပွင်ႈမႆႉဢေႃႈၼၼ်ႉယူႇ။ ႁၢင်ၶဝ်သီႇတူဝ်ၼႆၵေႃႈ ပူင်းလီဝႆႉ တၢင်းသီႇတူဝ်။

ၼေႃႇၶမ်းၸဝ်ႈၵေႃႈ ၶီႇၼိူဝ်လေႃႉမႃႉဢႃႇၸႃႇၼီႇ သီႇတူဝ် တိုတ်ႉလၢၵ်ႈ ၼၼ်ႉသေ ဢွၼ်ဢဝ် ပရိတ်ႈသတ်ႈၸဝ်ႈ ၶဝ်ႈၼႂ်းသူၼ်သိူဝ်းၵႂႃႇယူႇ။ သူၼ်သိူဝ်းၸဝ်ႈၼၼ်ႉ မီးၼွၵ်ႈဝဵင်းလႄႈ ၽုၵ်ႇသွမ်ႈဝႆႉ တူၼ်ႈမွၵ်ႇတူၼ်ႈ မၢၵ်ႇ ၵူႈသမ်ႇသႅၼ်ပိူင်သေ တီႈလိုဝ်ႈသဝ်း သေႃႉႁူမ်ႈၵေႃႈ ႁဵတ်းသၢင်ႈႁၢင်ႈပွင် မီးဝႆႉ တင်းၼမ်။ ဢွၵ်ႇယၢၼ်ဝဵင်းသေ မိူဝ်ႈၸမ်တေၶဝ်ႈ ၼႂ်းသူၼ်သိူဝ်း ၼၼ်ႉ ၼေႃႇၶမ်းၸဝ်ႈ လႆႈႁၼ် ၵူၼ်းလၢၵ်ႇလၢၵ်ႇလၢႆးလၢႆး ၵေႃႉၼိုင်ႈ။ ၵူၼ်းၵေႃႉၼၼ်ႉ ၶူၼ်ႁူဝ်မၼ်းႁွၵ်ႇ ၶဵဝ်ႈမၼ်းမၢင်ႈဢွၵ်ႇ ဢမ်ႇမီးသေသိၵ်ႈ လႄႈ ၵႅမ်ႈမၼ်းႁၢမ်ႉတုပ်ႇတုပ်ႇ။ လုပ်ႇၶီႈၶၢင်ႈမၼ်းပႅၼ် ပႆတၢင်းဢမ်ႇႁႅၼ် လႆႈ ၵူမ်ႈၵွမ်း လင်ငွမ်း ၼိူဝ်ႉယွမ်း ၼင်ႁူႇ ပႆယူႇၵေႃႈသၼ်ႇတိၼ်းတိၼ်း ပဵၼ်ဢၼ်ၵိၼ်းၸႂ်ၶိၼ်ၸႂ်ဝႆႉလႄႈ ၼေႃႇၶမ်းၸဝ်ႈ လႆႈႁၼ်ၼင်ႇၼၼ် ၸူဝ်ႈပၢၼ်ၵူၼ်းမၼ်းၸဝ်ႈ ဢမ်ႇပႆႇတွၼ်ႉယၢမ်ႈႁၼ်သေပွၵ်ႈ သေၽဝ်ႇ ဢုၵ်းဢဝ်ႇၸႂ်ၸဝ်ႈ ပဵၼ်လွင်ႈ ၸႂ်သဝ်ႈဝႆႉသေ

“ၵူၼ်းႁေႃႈလေႃႉ... ၵူၼ်းၵေႃႉၼၼ်ႉ မၼ်းပဵၼ်ၵူၼ်းမဵဝ်းသင်” ထၢမ်ၵႂႃႇၼင်ႇၼႆ။ တီႈတေႉမၼ်း မၼ်းၸဝ်ႈ တိုၼ်းဢမ်ႇႁူႉလႄႈ ထၢမ်ၵႂႃႇ ၼင်ႇၼႆယူႇ။ ပေႃႈမၼ်းၸဝ်ႈ ၵူဝ်မၼ်းၸဝ်ႈ ပၢႆႈၶဝ်ႈထိူၼ်ႇလႄႈ ၸဵမ်မိူဝ်ႈ လဵၵ်ႉ တိုၼ်းဢမ်ႇပၼ်ႁၼ်လႃးလႃး၊ ဢမ်ႇပၼ်ႁူႉလႃးလႃးလႄႈ ထိုင်မႃး ၽွင်းယၢမ်း လႆႈႁၼ်ၼင်ႇၼႆ ၸင်ႇလႆႈထၢမ် ၵူၼ်းႁေႃႈလေႃႉယဝ်ႉ။

“ၸဝ်ႈႁဝ်းၶႃႈ... ၵူၼ်းၵေႃႉၼႆႉ ၶဝ်ႈပဵၼ်ၵူၼ်းထဝ်ႈ တီႈၶႃႈဢေႃႈ”

ပေႃးဝႃႈ တွပ်ႇလၢတ်ႈၵႂႃႇၼင်ႇၼႆယဝ်ႉ ၼေႃႇၶမ်းၸဝ်ႈၵေႃႈ ၸင်ႇသိုပ်ႇ ဝူၼ်ႉလၢမ်းတၢမ်သေ ထၢမ်ဝႃႈ

“မၼ်းပဵၼ်ၵူၼ်းထဝ်ႈၼႆႁႃႉ? ပေႃးၼႆၵဝ်ၵေႃႈ တေႃႈတေလႆႈထဝ်ႈ ၸိူင်ႉၼင်ႇမၼ်းၼႆႉဢိူဝ်ႈၼေႃ?”

“ၸႂ်ႈယူႇတီႈၶႃႈ၊ ၵူၼ်းၵူႈၵေႃႉၼႆႉ တေလႆႈထဝ်ႈ ၸိူင်ႇၼင်ႇမၼ်းၼႆႉ ယူႇၶႃႈဢေႃႈ”

ပေႃးဝႃႈ လႆႈႁၼ် လႆႈငိၼ်းၼင်ႇၼႆ ၵၢင်ၸႂ်ၼေႃႇၶမ်းၸဝ်ႈ ပဵၼ်ဢၼ် သၼ်ႇဝႆ တိုၼ်ႇၽၢၼ်ႈၵႂႃႇတႄႉတႄႉလႄႈ ၵႄႈၸၢင်ၸႂ်ၸဝ်ႈ ဢမ်ႇသိူဝ်း၊ တႃႇတေ မိူဝ်းလဵၼ်ႈ ၼႂ်သူၼ်မွၵ်ႇၵေႃႈ ဢမ်ႇဢွၵ်ႇၸႂ်ယဝ်ႉ။

“ၵူၼ်းႁေႃႈလေႃႉ... ၵဝ်ၸဝ်ႈပဵၼ် ၸႂ်ဢမ်ႇယဵၼ် ဢမ်ႇၸိုၼ်ႈၸၢင်ႇ ဢမ်ႇပၢင်ႇသႂ်လႄႈ ၶိုၼ်းႁေႃႈလေႃႉ မိူဝ်းၸူးတီႈႁေႃလႃႈ”

လၢတ်ႈၼင်ႇၼႆသေ ၶိုၼ်းပွၵ်ႈမႃးၶိုၼ်းယဝ်ႉ။ ပေႃႈၸဝ်ႈၵေႃႈ လႆႈငိၼ်း ၶၢဝ်ႇလုၵ်ႈၸၢႆးၸဝ်ႈ ၵႂႃႇႁၼ်ၵူၼ်းထဝ်ႈသေ ၶိုၼ်းဝၢႆႇၶဝ်ႈမႃး ၼႂ်းႁေႃၼႆ ပဵၼ်ဢၼ် မႆႈၸႂ်ၸွမ်း လုၵ်ႈၸၢႆးၸဝ်ႈလႄႈ ၵူၼ်းပႂ်ႉၵူၼ်းသိုၵ်းၼႆၵေႃႈ တိုၵ်းသူၼ်း ႁႂ်ႈပႂ်ႉ ၼမ်သေၵဝ်ႇၵဝ်ႇယူႇ။ လွင်ႈၸႂ်ႉႁႂ်ႈၵူၼ်းသိုၵ်းၶဝ် ပႂ်ႉၼမ် ၼင်ႇၼႆ ပဵၼ်ဢၼ်လၢၵ်ႇလၢႆး ပုၼ်ႈတႃႇ ၼေႃႇၶမ်းၸဝ်ႈထႅင်ႈယူႇ။

ၶုၼ်ႁေႃၶမ်းလူင် လႆႈႁူႉဝႆႉဝႃႈ လုၵ်ႈၸၢႆးမၼ်းၸဝ်ႈ တေႁၼ် ၼိမိတ်ႈ သီႇပိူင် “ၵူၼ်းထဝ်ႈ၊ ၵူၼ်းပဵၼ်၊ ၵူၼ်းတၢႆ ၊ ရႁၢၼ်း”သေ တေၸၢင်ႈဢွၵ်ႇ ယၢၼ် ဝၢၼ်ႈမိူင်းတိူင်းၵႃးၵႂႃႇ ၼႆလႄႈ ပေႃးဢမ်ႇၵႅတ်ႇၶႄ ႁၢမ်ႈတၢပ်ႈဝႆႉၵေႃႈ သမ်ႉဢမ်ႇပဵၼ်လႄႈ ယၢပ်ႇၸႂ်ဝႆႉ ပိူင်ၼိုင်ႈယူႇ။

ပေႃးဝႃႈ ၼေႃႇၶမ်းၸဝ်ႈ တဝ်ႈႁွတ်ႈၽႅဝ်ထိုင် ၼႂ်းႁၢင်ႈၼႂ်းႁေႃၼႆ ၵၢင် ၸႂ်ၸဝ်ႈ ဢမ်ႇၸိုၼ်ႈသႂ်လႆႈ။ လႆႈႁူႉဝႃႈ ၵၢင်ၸႂ်ၸဝ်ႈ ဢမ်ႇၸိုၼ်ႈသႂ်ၼႆ ၼၢင်းယသေႃႇလႄႈ ၸိူင်ႉၸႅင်ႈၽုင်ၼၢင်းၶဝ် ဢွၼ်ၵၼ် လူႁၼ်လုမ်းလႃး ၼေႃႇၶမ်းၸဝ်ႈ လိူဝ်တွၼ်းသေၵူႈၽဝ်ႇ လိူဝ်တွၼ်းသေၵဝ်ႇၵဝ်ႇ။ ၼၢင်းယ သေႃႇၵေႃႈ ဝွၼ်းလဝ်ႇၸႂ်ၸဝ်ႈ ႁႂ်ႈတၢင်းသဝ်ႈပေႃးႁၢႆ ႁႂ်ႈသၢႆၸႂ် ၶိုၼ်းၸိုၼ်ႈ ပၢင်ႇၼင်ႇၼၼ် ၵၢင်ၸႂ်ၸဝ်ႈၵေႃႈ ၶိုၼ်းမူၼ်ႈသိူဝ်းမႃး မိူၼ်ၼင်ႇၵူႈပွၵ်ႈယူႇ။

ၽွင်းမိူဝ်ႈၼင်ႇၼၼ် ဢႃႇယုၸဝ်ႈ ၶဝ်ႈလႆႈမႃးၼႂ်း 29 ပီယဝ်ႉလႄႈ ၼၢင်းယသေႃႇၵေႃႈ ပႃးသၼ်ႇထေႇ ၸပ်းတွင်ႉမႃး။ ၶၢဝ်းတၢင်း ၼႃႈႁိူၼ်း တႃယေး လႆႈပဵၼ်ၽူဝ်မေးၵၼ်မႃး 12 ပီ လီလီလႄႈ ယၢမ်းလဵဝ်လႆႈႁူႉဝႃႈ မီးၸိူဝ်ႉမီးသၢႆ တေလႆႈမီး လုၵ်ႈငဝ်ႈလုၵ်ႈပၢႆၼႆလႄႈ ၵႄႈဢူၵ်းၵၢင်ၸႂ် လွမ် ၸိုၼ်ႈသႂ်ဝႆႉ။ ႁေႃၶမ်းလူင် သုတ်ႉထေႃးတၼၵေႃႈ ဝူၼ်ႉဝႆႉ ပေႃးဝႃႈ မၼ်းမီး လုၵ်ႈမီးလၢၼ်ၼႆ တႃႇတေပႆၶဝ်ႈထိူၼ်ႇ ၵႂႃႇႁဵတ်းရႁၢၼ်းၼၼ်ႉ ဢမ်ႇၸၢင်ႈ ႁဵတ်းႁိုဝ်ၵႂႃႇလႆႈယဝ်ႉၼႆသေ ပဵၼ်ဢၼ်ႁၢၼ်ႉၸႂ်ဝႆႉလႄႈ တီႈၼိူဝ်လုၵ်ႈပႂ်ႉ မၼ်းၵေႃႈ ၶႅၼ်းဝႆႉပဵၼ်ပိူင်လူင်သေ လူႁၼ်လုမ်းလႃးယဝ်ႉ။

ဝၢႆးသေ ၼေႃႇၶမ်းၸဝ်ႈ လႆႈႁၼ်ၵူၼ်းထဝ်ႈယဝ်ႉ ယူႇႁိုင် ထိုင်မႃးထႅင်ႈ သီႇလိူၼ် ဝၼ်းလိူၼ် 12 မူၼ်းၼၼ်ႉ ၸဝ်ႈၶိုၼ်းၵႂႃႇမိူဝ်း ဢႅဝ်ႇလႄႇ တီႈသူၼ်သိူဝ်း မိူၼ်ၼင်ႇၵူႈပွၵ်ႈ ၶႂ်ႈမိူဝ်းငွၵ်ႈ ၶႂ်ႈမိူဝ်းႁၼ် ၶႂ်ႈယႃလွင်ႈၸႂ်တၼ် ၼႆလႄႈ ဢွၼ်ဢဝ်လုၵ်ႈၼွင်ႉတပႄးသေ ၶီႇလေႃႉမႃႉ ဢွၵ်ႇမႃးတၢင်းသူၼ် သိူဝ်း။ ပွၵ်ႈၼႆႉ ဢလိူၵ်ႈဢလႄႇ သမ်ႉလႆႈမႃး ငွၵ်ႈႁၼ် ဢၼ်ပဵၼ် ၵူၼ်း ၶႆႈၵူၼ်းပဵၼ်ၼၼ်ႉယူႇ။

ၵူၼ်းပဵၼ်ၵေႃႉၼၼ်ႉ တၢင်းပဵၼ်ယႂ်ႇၼႃႇ ရေႃးၵႃႇၼိၵ်ႈၸၢၵ်ႈ လႆႈယၢပ်ႇ ယၢၵ်ႈၶၢၼ်ၸႂ် ဢမ်ႇမီးၽႂ် လုမ်းလႃးလူႁၼ် ပဵၼ်ဢၼ်မေႃးၶၢင်း သဵင်လင် ႁိုဝ်းႁိုဝ်း တိၼ်မိုဝ်းၼၵ်းၼႃ ၼႃႈတႃဢမ်ႇၸိုၼ်ႈဢမ်ႇပၢင်ႇ ဢမ်ႇၸၢင်ႈယၢင်ႈ ႁၢင်ႇ လုၵ်ႉၵႂႃႇလႂ်လႆႈ ပဵၼ်ၸဵပ်းပဵၼ်ၶႆႈ လႆႈၼွၼ်းလႅၼ်းယူႇ တီႈၼိူဝ်ၽႃႈ ၼၼ်ႉ ၵူၼ်းပဵၼ်ၼင်ႇၼႆ ၼေႃႇၶမ်းၸဝ်ႈ ဢမ်ႇတွၼ်ႉယၢမ်ႈႁၼ် ဢမ်ႇ တွၼ်ႉလႆႈထူပ်းသေပွၵ်ႈလႄႈ ပေႃးဝႃႈ လႆႈႁူႉလႆႈႁၼ်ၼႆ ၵိုင်ႉၵၢင်ႉ တိုၼ်ႇ ၽၢၼ်ႈၵူဝ်ႁႄ သၢင်ႇဝေႇၵသေ “ၵဝ်ၵေႃႈ တေႃႈတေလႆႈပဵၼ် ၸိူင်ႉၼင်ႇ မၼ်းၼႆႉ ဢမ်ႇလွတ်ႈ”ၼႆ ပဵၼ်လွင်ႈတိပ်ႇၸႂ် ႁိပ်ႇၸႂ်ဝႆႉလႄႈ ၶိုၼ်းပွၵ်ႈ သၢႆႇဝၢႆႇမႃး မိူဝ်းၶိုၼ်းၵမ်းလဵဝ် ၼင်ႇပွၵ်ႈပူၼ်ႉယဝ်ႉ။ ၸဝ်ႈႁေႃၶမ်းလူင်ၵေႃႈ ပူင်ၶေႃႈပူင် မႂ်ႇမႂ်ႇ ၸႂ်ႉသႂ်ႇထႅင်ႈ ၵူၼ်းပႂ်ႉၼမ်ၼမ်ယူႇ။ ၼၢင်းမိူင်းယသေႃႇ ၶဝ်ၵေႃႈ ၽွမ်ႉၵၼ်ဢုမ်ႇလွမ်ႉ လူႁၼ်လုမ်းလႃး ၼေႃႇၶမ်းၸဝ်ႈ လိူဝ်သေ ၵူႈပွၵ်ႈၵူႈၽဝ်ႇ ၽွမ်ႉၵၼ်ဝွၼ်းလဝ်ႇ ၸႂ်ၸဝ်ႈ တွၼ်းတႄႉတႄႉလႄႈ ၵႄႈ ၵၢင်ၸႂ် ၼေႃႇၶမ်းၸဝ်ႈၵေႃႈ တေႃႈၶိုၼ်းမိုၼ်းပၢင်ႇၸၢင်ႇသႂ် မိူၼ်ၵူႈပွၵ်ႈမႃးယူႇ။

ယူႇႁိုင်ထႅင်ႈ ထိုင်မႃး လိူၼ်သီႇမူၼ်း တူၼ်းၸႂ်ၸဝ်ႈဢမ်ႇဝဝ်းသဝ်ႈ ၶႂ်ႈၶိုၼ်းၶဝ်ႈမိူဝ်း ပျေႃႇလူၺ်ႈ သူၼ်သိူဝ်းသူၼ်မွၵ်ႇ ၵၢင်ၸႂ်ၸဝ်ႈ ဢွၵ်ႇမႃး ၼင်ႇၼႆ ၸဝ်ႈၸင်ႇၶပ်းၶၢဝ်းပႆၶိုၼ်း ၼင်ႇၵူႈပွၵ်ႈ၊ ၸဝ်ႈၸင်ႇလႆႈမႃးငွၵ်ႈႁၼ် ဢၼ်ပဵၼ်ၵူၼ်းတၢႆ မဵၼ်တူႇၼဝ်ႈလၢၼ်ႈ ၸဝ်ႈပဵၼ် ဢၼ်ငိၼ်းၸၢၼ်ႈ ငိၼ်းမိူဝ်ႇသေ “ၵဝ်ၵေႃႈ တေႃႈတေလႆႈတၢႆ ၼင်ႇၼႆဢမ်ႇႁၢင်ႉ”ၼႆ ၵၢင်ၸႂ် ၸဝ်ႈ ႁၼ် တၢင်းလမ်သဝ်ႈၵႃႇမ ၵူမ်ႇဢုင်ၼဝ်ႈတႄႉတႄႉဝႃႈဝႃႈ။ ၵူၺ်းၵႃႈ ယသေႃႇထရႃႇၶဝ်သမ်ႉ ဢွၼ်ၵၼ် လူႁၼ်လုမ်းလႃး တွၼ်းဢႃးၼႃႇလႄႈ ၵႄႈၵၢင်ၸႂ်ၸဝ်ႈ ဢၼ်ၶုၼ်ႇသဝ်ႈၼၼ်ႉၵေႃႈ ၶိုၼ်းသႂ်၊ ၸႂ်ၸဝ်ႈၵေႃႈ ၶို်ၼ်း လီ မၢင်ပွၵ်ႈမၢင်ၽဝ်ႇ ယၢၼ်လွတ်ႈတၢင်းၶီတႄႉယဝ်ႉ။

ၶတ်းၸႂ်ဢွၵ်ႇယၢၼ် ပၢၼ်ၵူၼ်းႁိူၼ်း

မႁႃႇသၵ်ႉၵရိတ်ႉ 97 ၼီႈ ဝၼ်းလိူၼ်ပႅတ်ႇမူၼ်း ႁွတ်ႈၽႅဝ်ထိုင်မႃး ၼေႃႇၶမ်းၽြႃးၸဝ်ႈ ပႃးဢဝ်ဢလုမ်းဢရၢင်း ၶပ်ႉၶၢဝ်းတၢင်း၊ ၽွင်းမိူဝ်ႈ ၸမ် ၽႅဝ်သူၼ်သိူဝ်းၼၼ်ႉ ယူႇၼိူဝ်လေႃႉမႃႉသေ ၸဝ်ႈလႆႈမုင်ႈႁၼ် ဢၼ်ပဵၼ် ရႁၢၼ်း မႆသၢင်ႇၵၢၼ်းလိူင် ဢမ်ႇမိူၼ်ပိူင် ဢၼ်ႁၼ်မႃး ၵူႈပွၵ်ႈ ၸိူင်ႉၼင်ႇ ၵူၼ်းထဝ်ႈ၊ ၵူၼ်းပဵၼ်၊ ၵူၼ်းတၢႆၼၼ်ႉ။

ၽွင်းမိူဝ်ႈပၢၼ်ၼၼ်ႉ ဢမ်ႇၸပ်းသဵၼ်ႈသၢႆတၢင်း ဢၼ်ၸိုဝ်ႈဢၼ် ၸႂ်ႈသေတႃႉ ၽူႈဢၼ်ပွႆႇၽႃႈ ၶူဝ်းၵူၼ်းႁိူၼ်းသေ ၼုင်ႈမႆၽႃႈလိူင်ၵေႃႈ မီးတင်းၼမ်ယူႇ။ ပိူဝ်ႈၼၼ် ပွၵ်ႈၼႆႉ ၼေႃႇၶမ်းၸဝ်ႈ ၸင်ႇလႆႈမႃးႁၼ် ၼင်ႇၼႆ “ၵေႃႉၼႆႉ ပိူၼ်ႈႁွင်ႉဝႃႈ ၵူၼ်းၼင်ႇႁိုဝ်?” ၵူၼ်းႁေႃႈလေႃႉ ၸင်ႇတွပ်ႇဝႃႈ

“ၵူၼ်းၵေႃႉၼႆႉ ႁွင်ႉဝႃႈ ရႁၢၼ်းၼႆၶႃႈဢေႃႈ။ ရႁၢၼ်းဢၼ်ဝႃႈၼႆႉ ၶဝ်ၸဝ်ႈ ပိုတ်ႇပၢၵ်ႈငၢၵ်ႈယၢၼ် ၸႂ်ၽၢၼ်ၵိလေႇသႃႇ ၵႃႇမၵုင်ႇသေ တိုဝ်းၵမ် လွင်ႈမျၢတ်ႈ ႁႃတြႃး လွင်ႈၵတ်းလွင်ႈယဵၼ်ၼၼ်ႉၶႃႈဢေႃႈ” လဝ်ႈလၢတ်ႈ ထိုင်ၸဝ်ႈၼင်ႇၼႆ။

ပေႃးဝႃႈ လႆႈႁၼ် ၸဝ်ႈရႁၢၼ်း မႆလိူင်ၵၢၼ်းၶမ်းၼင်ႇၼႆ ၵၢင်ၸႂ်ၸဝ်ႈ ၵူႈပွၵ်ႈ ဢၼ်လႆႈလမ်သဝ်ႈ မိူဝ်ႈလႆႈႁၼ် ၵူၼ်းထဝ်ႈ ၵူၼ်းပဵၼ် ၵူၼ်းတၢႆ သေ လႆႈသမ်ႇဝေႇၵၼၼ်ႉ ပဵၼ်ဢၼ်ၶိုၼ်းယိုင်ႈၶိုၼ်ႈသုင် လိူဝ်တွၼ်းမႃး သေၵဝ်ႇၵဝ်ႇ လႅၵ်ႈလၢႆႈမႃးသေ ၵူႈၽဝ်ႇၵူႈပွၵ်ႈလႄႈ ၸဝ်ႈၸင်ႇတႅပ်းတတ်း လတ်းၸႂ်ၸဝ်ႈဝႃႈ

“ၵဝ်ၵေႃႈ တေႃႈတေ ၸုၼ်ႉပႅတ်ႈလွင်ႈလူၺ်ႈ ၵႃႇမၵုင်ႇ ထူင်ႇထဵဝ်ႈၼႆႉ သေ ႁႃတြႃး ဢၼ်ၵတ်းဢၼ်ယဵၼ် ၸိူင်ႉၼင်ႇၶဝ်ၸဝ်ႈၼၼ်ႉၵွၼ်ႇ” ၼႆယဝ်ႉ။

“လေႃးၵီႇၸီးၸိမ်ႇ ဢၼ်ႁဝ်းၸၢမ်ႇပူၺ်ႈယူႇ ဢမ်ႇဢိမ်ႇ ဢမ်ႇတိူၵ်ႈ လႆႈၼႆႉ မိူၼ်ၼင်ႇလုပ်ႇလၢႆလၢႆ ဢမ်ႇမီးၼိူဝ်ႉၼၼ်ႉလႄႈသင်၊ မိူၼ်ၼင်ႇ ၵူၼ်းယိပ်းၵၢၼ်ႈၶႄႈ ၾႆးလုၵ်ႉယူႇႁုၼ်ႈႁုၼ်ႈ မႆႈၸမ်မိုဝ်းမႃးတိၵ်းတိၵ်း ၼၼ်ႉလႄႈသင်၊ မိူၼ်ၼင်ႇ လုၵ်းထၢင်ၾႆးလႅင်သေ ဢဝ်ၽွင်တဝ်ႈ ၵူမ်ဝႆႉ ၼၼ်ႉလႄႈသင်၊ မိူၼ်ၼင်ႇ ၾၼ်သေ ဢမ်ႇၸၢင်ႈယိပ်းၼႄ ၵမ်ၼႄ ၼၼ်ႉလႄႈသင်၊ မိူၼ်ၼင်ႇ ၶူဝ်းၶွင်ယိမ်ပိူၼ်ႈသေ မႃးသုပ်းတိုဝ်း ၵႅပ်ႉၼိုင်ႈ ၵမ်းၼိုင်ႈ ၼၼ်ႉလႄႈသင်၊ မိူၼ်ၼင်ႇ ၵူၼ်းၶိုၼ်ႈၼိူဝ်တူၼ်ႈမႆႉသေ တိုၵ်ႉပိတ်းၵိၼ် မၢၵ်ႇယူႇၼၼ်ႉ ၵေႃႉၼိုင်ႈသမ်ႉမႃး ပွမ်ႈငဝ်ႈမၼ်းပႅတ်ႈ တူၼ်ႈမႆႉလူမ်ႉသေ တူၵ်းတၢႆၼၼ်ႉၼင်ႇၵဝ်ႇ ၽွင်းၵုမ်ႇၸၢမ်ႇပူၺ်ႈ ၵႃႇမၵုင်ႇ ဢမ်ႇဢိမ်ႇဢမ်ႇတိူၵ်ႈၼၼ်ႉ ဢမ်ႇၶႂ်ႈတၢႆၵေႃႈ လႆႈတၢႆၵႂႃႇလူၺ်ႈ တၢင်းၼႅင် ၸႂ်ၼၼ်ႉလႄႈသင်၊ လိူဝ်သေၼၼ်ႉ ဢႃႇယူင်ႇၵႃႇမၵုင်ႇ ဢၼ်ဝႃႈၼႆႉ မိူၼ်ၼင်ႇၶဵင် ဢၼ်ပိူၼ်ႈၽၵ်ႉၼိူဝ်ႉၼၼ်ႉ ၸၢင်ႈမေႃၸုပ်ႇၵိၼ်လိူတ်ႈ ၵေႃႉဢၼ်မိုတ်ႈမၵ်ႉမၼ်း ၼၼ်ႉလႄႈသင်၊ မိူၼ်ၼင်ႇ ၶူမ်းလၢပ်ႇ ၶူမ်းမိတ်ႈ ၼၼ်ႉ ပေႃးၵႂႃႇထိတိူဝ်ႉၼႆ မေႃမၢတ်ႇသေ ၸၢင်ႈပၼ်တုၵ်ႉၶၼၼ်ႉလႄႈ သင်၊ မိူၼ်ၼင်ႇႁူဝ်ငူး ဢၼ်မီးၵွင်ႉယႂ်ႇ တဵမ်ပိၵ်းဝႆႉၼၼ်ႉလႄႈသင်၊ ၵႃႇမၵုင်ႇ ဢၼ်ဝႃႈၼႆႉ ပဵၼ်တီႈလီၵူဝ် တၢင်းပိုၵ်းယဝ်ႉ”

ၵၢင်ၸႂ်ၼေႃႇၶမ်းၸဝ်ႈ ဝူၼ်ႉႁၼ်ပွင်ႇလႅင်း လွင်ႈတၢင်းၽိတ်း ၵႃႇမၵုင်ႇ ၼင်ႇၼႆသေ ပဵၼ်ဢၼ်ငိၼ်းၸဵပ်းၸႂ်မႃး ငိၼ်းတိူဝ်ႉၸႂ်မႃးယဝ်ႉ။ ၵူၼ်း ဢၼ်ဝႃႈၼၼ်ႉ ပေႃးတေလုၵ်ႉတီႈၼိုင်ႈ ၶၢႆႉၵႂႃႇတီႈၼိုင်ႈၼႆ ႁၼ်ထိုင်တၢင်း ၽိတ်းၸဵပ်းၸႂ်ၼိူဝ် ဢွင်ႈတီႈၵဝ်ႇၼၼ်ႉ ပဵၼ်ထမ်ႇမတႃႇလႄႈ ပေႃးဝႃႈ ၸဵပ်းၸႂ် လူႉၸႂ်ၼိူဝ် ဢွင်ႈတီႈၵဝ်ႇမႃးယဝ်ႉၼႆ ပဵၼ်သဵၼ်ႈတၢင်း တႃႇတေႁႃ တီႈမႂ်ႇၼၼ်ႉယဝ်ႉ။

ၼေႃႇၶမ်းၸဝ်ႈၼႆႉ ယွၼ်ႉပိူဝ်ႈ ၶႂ်ႈသွၵ်ႈႁႃ ပူၵ်းပွင် ၼိပ်ႉပၢၼ်ႇသိူဝ်းသႃႇ ဢၼ်ၸႅတ်ႈဢၼ်မၢၼ်ႇလႄႈ မၼ်းၸဝ်ႈ ၸင်ႇငိၼ်းမိူဝ်ႇငိၼ်းၸၢၼ်ႈ လီၽၢၼ်ႈ လွင်ႈလူၺ်ႈ ၸီးၸိမ်ႇၶူင်းၵၢင်ၼႆႉယူႇ။ ၵူၼ်းဢၼ်ပႆႇႁွတ်ထိုင် ၼိူဝ်ၸိၵ်းလွႆ ပၢႆလွႆၼၼ်ႉ လွမ်မၢတ်ႈမၢင်ႇထၢင်ႇဝႃႈ ၼိူဝ်လွႆၼၼ်ႉ တေမီး သေမဵဝ်းမဵဝ်း သေဢၼ်ဢၼ်ၼႆယူႇ။ ၵေႃႉဢၼ်ႁွတ်ႈၽႅဝ် ၼိူဝ်လွႆၼၼ်ႉ တႄႉ ၼိူဝ်လွႆၼၼ်ႉ ဢၼ်လႂ်လၢၵ်ႇလၢႆး ဢၼ်လႂ်ဢမ်ႇလၢၵ်ႇလၢႆးၼႆ မၼ်းႁူႉႁၼ်ထိုင် ၵူႈဢၼ်လႄႈ တၢင်းမုင်ႈမွင်း တီႈၼိူဝ်လွႆ မိူဝ်းၼႃႈၼၼ်ႉ ႁူႉတေ ဢမ်ႇမီးသင်ထႅင်ႈ။

ၼေႃႇၶမ်းၸဝ်ႈၼႆႉ ၸၢမ်ႇပူၺ်ႈလေႃးၵၸီးၸိမ်ႇ ၵႄႈၵၢင်ယသေႃႇထရႃႇ လႄႈ ၸိူင်ႉၸႅင်ႈၽုင်ၼၢင်းၶဝ် သီႇမိုၼ်ႇႁွမ်းၶၢင်းယူႇ တဵမ်တဵမ်ထူၼ်ႈ ထူၼ်ႈလႄႈ လွင်ႈလူၺ်ႈ လေႃးၵၸီးၸိမ်ႇၼၼ်ႉ ၵႅၼ်ႇၸဝ်ႈ ထိုင်ၸိၵ်း ထိုင်ၸွမ် မိူၼ်ၼင်ႇ ထိုင်ၼိူဝ်ၸိၵ်းလွႆၼၼ်ႉယဝ်ႉ။ ပိူဝ်ႈၼႆ ပုၼ်ႈမၼ်း ၸဝ်ႈၼႆႉ လွင်ႈလူၺ်ႈၵႃႇမၼၼ်ႉ ပဵၼ်ဢၼ်လူင်ႉလႅၼ်ႇယဝ်ႉလႄႈ မၼ်း ၸဝ်ႈလူဝ်ႇႁႃ ဢၼ်ၶႅမ်ႉလႅပ်ႈသေ ၵႃႇမသုၶၼၼ်ႉၵူၺ်းယဝ်ႉ။ တႄႇဢဝ် မိူဝ်ႈလိူၼ်ပႅတ်ႇ ပီပူၼ်ႉမႃး ႁၢၼ်ႉတေႃႇႁွတ်ႈထိုင် လိူၼ် ပႅတ်ႇပီၼႆႉ ဢၼ်လႆႈႁၼ် ၵူၼ်းထဝ်ႈ ၵူၼ်းပဵၼ် ၵူၼ်းတၢႆဝႆႉၼၼ်ႉ ၼႂ်းၵႄႈၵၢင်ၸႂ်ၸဝ်ႈ ပဵၼ်ဝႆႉ ဢိုၼ်ဢမ်ႇၶဝ်ႈ ၶၢႆးဢမ်ႇဢွၵ်ႇယူႇ၊ ၽိူဝ်ႇလႆႈမႃး ႁၼ် ရႁၢၼ်းၼႆ ၸဝ်ႈတႅပ်းတတ်း လတ်းၸႂ်ၸဝ်ႈယဝ်ႉလီလီ “ၵဝ်တေၵႂႃႇ ႁႃၵၢၼ်လီ”ၼႆလႄႈ ပဵၼ်ဢၼ် မဝ်တူဝ်မဝ်ၸႂ်ဝႆႉတႄႉတႄႉသေ

“ၸဝ်ႈလေႃႉ... ႁေႃႈလေႃႉႁႃး သိုပ်ႇၵႂႃႇ တီႈသူၼ်သိူဝ်းတႃႉ”

ၸႂ်ႉၼင်ႇၼႆသေ မဝ်တူဝ်မဝ်ၸႂ် ပျေႃႇယႃႇသႃႇတိူဝ်း တီႈၼႂ်းသူၼ် သိူဝ်းၼၼ်ႉ တင်းဝၼ်း ဢၢပ်ႈၼမ်ႉလၢႆႈၶူဝ်းသေ ယူႇသဝ်းဝႆႉယဝ်ႉ။

လုၵ်ႈမူၼ်းလိူၼ်သႂ် မႂ်မွၵ်ႇၵုမ်ႈသုမ်ႇ

ၸဝ်ႈႁေႃၶမ်းလႄႈ ၼၢင်းႁေႃၶမ်း ဢၼ်ဝႃႈၼၼ်ႉ ယူႇႁူမ်ႈၵၼ် ၵိၼ် ႁူမ်ႈၵၼ်ဢမ်ႇၸႂ်ႈလႄႈ ၼၢင်းႁေႃၶမ်းၼႆႉ လႆႈယူႇသဝ်းဝႆႉ ႁေႃႁင်းၶေႃ ၼၼ်ႉသေႇသေႇယဝ်ႉ။ ၼၢင်းယသေႃႇၵေႃႈ ဝၢႆးသေၸပ်းတွင်ႉ ပႃးသၼ်ႇ ထေႇမႃးၼႆ မၼ်းၼၢင်းၵေႃႈ လူင်းၶၢႆႉယူႇႁေႃတႂ်ႈလႄႈ ၼေႃႇၶမ်းၸဝ်ႈ ၶဝ်ႈမိူဝ်း လဵၼ်ႈၼႂ်းသူၼ်သိူဝ်းၵေႃႈ မၼ်းၼၢင်း ဢမ်ႇလႆႈႁူႉၸွမ်း။ ပုၼ်ႈ တႃႇၼၢင်းယသေႃႇၼၼ်ႉ ၸဝ်ႈပေႃႈ ဢိၵ်ႇ မႄႈၼႃႉၸဝ်ႈလႄႈ ၶႃႈၸႂ်ႉၵူၼ်း သွႆ မီးဝႆႉတင်းၼံ။ ယွၼ်ႉပိူဝ်ႈၼႆ ပုၼ်ႈတႃႇ မၼ်းၼၢင်းၼၼ်ႉ ၼေႃႇၶမ်း ၸဝ်ႈ ဢမ်ႇတပ်ႉလႆႈမႆႈၸႂ်သင်။ ဝၼ်းၼႆႉၼႆ သၢႆငၢႆၼၢင်းယသေႃႇ တေပဵၼ် မႃး ၼင်ႇႁိုဝ်ၼႆၵေႃႈ ၸဝ်ႈတေႃႈဢမ်ႇတၼ်းဝူၼ်ႉထိုင်လႄႈ ၸင်ႇဢွၵ်ႇမႃး တီႈသူၼ်သိူဝ်း ၸဵမ်ၸဝ်ႉယူႇ။ ပေႃးဝႃႈ ၼေႃႇၶမ်းၸဝ်ႈ ၶဝ်ႈထိုင်ၼႂ်းသူၼ်သိူဝ်းယဝ်ႉ ဢမ်ႇႁိုင်ဢမ်ႇ ၼၢၼ်း ၼၢင်းယသေႃႇၵေႃႈ ႁၼ်ၼႃႈ လုၵ်ႈၸၢႆးၸဝ်ႈယဝ်ႉ။ ၸဝ်ႈႁေႃၶမ်း လူင်ၵေႃႈ ယွၼ်ႉပိူဝ်ႈ လႆႈလၢၼ်ၸႂ်ၶမ်းၸၢႆးလႄႈ ၸူမ်းသိူဝ်းၼၼ်ႉပိူင် ၼိုင်ႈ၊ လုၵ်ႈၸၢႆးၵဝ်ၵေႃႈ မၼ်းတေၸႂ်ၸပ်းပႅၼ်း ႁၵ်ႉႁႅင်း ၼိူဝ်လုၵ်ႈၸၢႆး မၼ်းသေ တေဢမ်ႇၸၢင်ႈ ပၢႆႈဢွၵ်ႇထိူၼ်ႇလႆႈယဝ်ႉ ဝူၼ်ႉႁၼ်ထိုင်ၼင်ႇ ၼႆ ပိူင်ၼိုင်ႈ ဢမ်ႇပႂ်ႉလႆႈ ႁၢၼ်ႉတေႃႇ လုၵ်ႈၸၢႆးမၼ်း ပွၵ်ႈမႃး၊ ၸင်ႇႁွင်ႉ ၵူၼ်းသိုၵ်းၵေႃႉၼိုင်ႈမႃးသေ “မႂ်း... ၵႂႃႇတီႈသူၼ်သိူဝ်းသေ ၵႂႃႇမိူဝ်းလၢတ်ႈ တီႈၸဝ်ႈသီႇထၢတ်ႈ ၽႂ်းၽႂ်း လွင်ႈလူၺ်ႈ ၼၢင်းယသေႃႇ ႁၼ်ၼႃႈလုၵ်ႈၸၢႆးယဝ်ႉၼၼ်ႉလူး” ၼႆယဝ်ႉ။ ၵူၼ်းသိုၵ်းၼၼ်ႉၵေႃႈ ၶီႇမႃႉသေ ၸွမ်းၵႂႃႇ တီႈသူၼ်သိူဝ်း မိူဝ်းတီႈ ၼေႃႇၶမ်းၸဝ်ႈ ဢၼ်တိုၵ်ႉၼင်ႈၼိူဝ် ၶႅပ်းမၢၵ်ႇႁိၼ်၊ ၸင်ႇလဝ်ႈလၢတ်ႈထိုင် ၸဝ်ႈဝႃႈ

“ၼၢင်းယသေႃႇ ႁၼ်ၼႃႈ လုၵ်ႈၸၢႆးယဝ်ႉတီႈၶႃႈၼေႃႈ” ပေႃးဝႃႈ လႆႈငိၼ်းၼင်ႇၼႆ ၵၢင်ၸႂ်ၸဝ်ႈ ဢၼ်တႅပ်းတတ်းဝႆႉဝႃႈ တေပၢႆႈၶဝ်ႈထိူၼ်ႇ ၼႆၼၼ်ႉ ပုၼ်ႈတႃႇၸဝ်ႈ ပဵၼ်မႃး လွင်ႈၸႂ်တိပ်ႇၸႂ်တၼ် ဢမ်ႇပျေႃႇဢမ်ႇ သိူဝ်းလႄႈ ၵုမ်ႇထူၺ်ႈၸႂ်ယႂ်ႇ ၸႂ်လူင်ယူႇ တိၵ်းတိၵ်းသေ

“လုၵ်ႈလိူၼ်မူၼ်း ဢၼ်ၶၢဝ်ၸိုၼ်ႈသႂ်ဝႆႉယူႇၼၼ်ႉ ၵမ်းၼႆႉ မီးမႂ်မွၵ်ႇ ရႃႇႁူႉ ဢၼ်တေၵုမ်ႈသုမ်ႇ ဢဝ်မၼ်းသဝ်ႈၼၼ်ႉယဝ်ႉ။ ပုၼ်ႈၵဝ် ပဵၼ် တၢင်းၶွင်ႈၶမ်ၸႂ်လူင်ဝႆႉယူႇ” ၵႅၼ်ႇၸဝ်ႈ မေႃးၶၢင်းၵႂႃႇၼင်ႇၼႆ။

ႁေႃၶမ်းလူင် သုတ်ႉထေႃးတၼၵေႃႈ ပေႃးဝႃႈ ၵူၼ်းသိုၵ်းၵေႃႉၼၼ်ႉ ၶိုၼ်းၽႅဝ်မႃးၼႆ ၸင်ႇထၢမ်ဝႃႈ “လုၵ်ႈၸၢႆးၵဝ်ၸဝ်ႈ ဝႃႈႁိုဝ်မႃး”ၼႆလႄႈ ၵူၼ်းသိုၵ်းၼၼ်ႉ ၸင်ႇဝႃႈ လႆႈငိၼ်း “တႃႇတေမႃးတပ်ႉ မႃးလပ်ႉ လိူၼ် သႂ်ၼၼ်ႉ ရႃႇႁူႉပေႃႇမႃးယဝ်ႉ”လဝ်ႈလၢတ်ႈထိုင် ၼင်ႇၼႆလႄႈ ႁေႃၶမ်းလူင် ပဵၼ်ဢၼ်ၸႂ်တၼ် ၸႂ်လူႉၵႂႃႇတႄႉတႄႉ။ ဢၼ်ႁေႃၶမ်းလူင် မုင်ႈမွင်းထၢင်ႇ ဝႃႈ လုၵ်ႈၸၢႆးမၼ်း တေငိၼ်းၸူမ်ႈသေ ပွၵ်ႈသၢႆႇဝၢႆႇမႃး ၵမ်းလဵဝ်ၼႆသေတႃႉ မိူဝ်ႈလဵဝ် လႆႈငိၼ်း သမ်ႉဝႃႈ “ဢၼ်တေမႃးတပ်ႉလပ်ႉ ၺွပ်းၵိၼ်ၵဝ် ရႃႇႁူႉ ပေႃႇယဝ်ႉ” ၼႆလႄႈ ၸင်ႇလႆႈပဵၼ် တၢင်းၸႂ်မႆႈ ၸႂ်လူႉယူႇ။ လွင်ႈဝႃႈ ၼေႃႇၶမ်းၸဝ်ႈ တေပၢႆႈၶဝ်ႈထိူၼ်ႇၼၼ်ႉ ႁေႃၶမ်းလူင်တႄႉ ဢမ်ႇႁူႉထိုင်၊။ ႁေႃၶမ်းလူင်ပဵၼ်ဢၼ် ႁၵ်ႉႁႅင်းပႅင်ယႂ်ႇ တီႈၼိူဝ်လုၵ်ႈၸၢႆးမၼ်းသေ ၸင်ႇ ဝႃႈ“ဢိူဝ်ႈ... ၸွမ်းၼင်ႇ လုၵ်ႈၸၢႆးၵဝ် မေႃးၶၢင်းၼၼ်ႉ လၢၼ်ၵဝ်ၼႆႉၵေႃႈ ၵဝ်တေတၢင်ႇၸိုဝ်ႈပၼ်ၼင်ႇၼၼ်။ လၢၼ်ၸၢႆးၵဝ် ႁႂ်ႈၸိုဝ်ႈဝႃႈ‘ရႃႇႁူႉလႃႇ’ သေတႃႉ”

ၼေႃႇၶမ်းၸဝ်ႈၵေႃႈ ဝၼ်းၼၼ်ႉ ယူႇသဝ်း တမ်ႈတီႈ သူၼ်သိူဝ်း တင်းဝၼ်းသေ ထိုင်မႃးတၢမ်းၶမ်ႈ ၸင်ႇၶိုၼ်းၶဝ်ႈၸူး တီႈႁေႃယဝ်ႉ။ ၽွင်း မိူဝ်ႈ ၼေႃႇၶမ်းၸဝ်ႈ ၶဝ်ႈဝဵင်းဢွၵ်ႇဝဵင်းၼၼ်ႉ ၵူၼ်းၼႂ်းဝဵင်း ၵူၼ်းမိူင်းၶဝ် တိုၼ်းဢွၼ်ၵၼ် ဢွၵ်ႇတူၺ်းၼပ်ႉယမ် ယူႇသေႇသေႇလႄႈ တၢမ်းၶမ်ႈ ၼႆႉ ဢၼ်ပဵၼ်ငိူၼ်ႈၶိူဝ်းသႃႇၵီႇ ဢၼ်ၸိုဝ်ႈဝႃႈ ၵိသႃႇၵေႃးတမီႇ ၼၢင်းယိင်း သၢဝ်ဢွၼ်ႇၵေႃႉၼိုင်ႈ ယူႇတီႈၼိူဝ်ပျသၢတ်ႈသေ ယဵမ်ႈတူၺ်းၼေႃႇၶမ်းၸဝ်ႈ ၵၢင်ၸႂ်မၼ်းၼၢင်း မီးတၢင်းႁၵ်ႉပႅင်းသေ ၸင်ႇလၢတ်ႈၵႂၢမ်းၶိတ်ႉ ၼင်ႇၼႆ

“မႄႈၸဝ်ႈ ဢၼ်မီးလုၵ်ႈၸၢႆး ၶမ်းႁၢႆးၸိူင်ႉၼႆ တေပဵၼ် ဢၼ်ငိမ်း ယဵၼ်ၸႂ် တၢၼ်ႇလႂ်၊ ပေႃႈၸဝ်ႈ ဢၼ်မီးလုၵ်ႈၸၢႆး ၶမ်းႁၢႆး ၸိူင်ႉၼႆ တေ ပဵၼ် ဢၼ်ငိမ်းယဵၼ်ၸႂ် တၢၼ်ႇလႂ်။ ၼၢင်းယိင်း ဢၼ်မီးၸဝ်ႈမီးၽူဝ် လီႁၵ်ႉႁႅင်း ပႅင်းယႂ်ႇၼင်ႇၼႆ တေပဵၼ် ဢၼ်ငိမ်းယဵၼ်ၸႂ်တၢၼ်ႇလႂ်”

ၼေႃႇၶမ်းၸဝ်ႈၵေႃႈ ပေႃႈလႆႈငိၼ်းၵႂၢမ်းမၼ်းၼၢင်း ၵိသႃႇၵေႃးတမီႇ ၼၼ်ႉၼႆ ၶေႃႈၵႂၢမ်း တၢင်ႇဢၼ်ၼၼ်ႉ မၼ်းၸဝ်ႈ ဢမ်ႇၶဝ်ႈၸႂ်၊ မၼ်း ၸဝ်ႈၶဝ်ႈၸႂ် ၶေႃႈဢၼ်ဝႃႈ ငိမ်းယဵၼ်(ၼိပ်ႉပူႇတ) ၼၼ်ႉၵူၺ်း။ ၸႂ်ႈယူႇ။ တၢင်းမုင်ႈမွင်း ၼေႃႇၶမ်းၸဝ်ႈ ယၢမ်းလဵဝ် ပဵၼ်လွင်ႈငိမ်းယဵၼ် ၼိပ်ႉပူႇတႃႇ ၼၼ်ႉၵူၺ်း ဢမ်ႇၸႂ်ႈႁႃႉ။ ပေႃးဝႃႈ လႆႈငိၼ်းၼင်ႇၼၼ် ၼေႃႇၶမ်းၸဝ်ႈ ၸင်ႇပွင်ႇၸႂ်ဝႃႈ

“ဢိုဝ်ႈ... ၼင်ႇႁိုဝ် ၵဝ်ပေႃးတေမီး သတိၶုၵ်းၶူၼ်ႉဝူၼ်ႉထိုင် လွင်ႈ ငိမ်းယဵၼ် ၼိပ်ႉပူႇတႃႇၼၼ်ႉ မၼ်းၼၢင်း မေႃပၢၵ်ႈတၢင်းပၼ်လႄႈ ၵဝ်ၸဝ်ႈ တေဢဝ် သၢႆၶႅပ်းၶေႃးၵဝ်ၼႆႉ ႁဵတ်းပဵၼ်ၶွင်ၽၢၵ်ႇ မၼ်းၼၢင်းၵွၼ်ႇ” ၼႆ သေ ၸင်ႇပူတ်းဢဝ် ၶႅပ်းသၢႆၶေႃးၸဝ်ႈ ဢၼ်ၵိုင်ႇတၢၼ်ႇ သႅၼ်ၼိုင်ႈၼၼ်ႉ တွၼ်ႈပၼ်သူး ၼၢင်းၵိသႃႇၵေႃးတမီႇယဝ်ႉ။

ၸွမ်းၼင်ႇဢၼ် ၼေႃႇၶမ်းၸဝ်ႈ ဢဝ်သူးၽၢၵ်ႇထိုင်မႃးၼၼ်ႉ ၼၢင်းၵိ သၵေႃးတမီႇ သမ်ႉမၢတ်ႈမၢင်ႇထၢင်ႇဝႃႈ ၼေႃႇၶမ်းၸဝ်ႈ ၵျိူၵ်ႈမၼ်းၼၢင်းသေ လႄႈ ပၼ်ၶွင်ၽၢၵ်ႇ လွင်ႈတၢင်းႁၵ်ႉတီႈမၼ်ၼႆယူႇ။

သမ်ႇယေႃးၸိၼ်ႇလႄႈ သမ်ႇဝေႇၵ တိုတ်ႉၶဵင်ႇတႃႉၵၼ်

ၶမ်ႈၶိုၼ်းၼႆႉ ယွၼ်ႉပိူဝ်ႈ မီးၸႂ် ဝၢင်ႇဝိူဝ်ႈ လၢႆၽၢႆႇလၢႆတၢင်းလႄႈ ၼေႃႇၶမ်းၸဝ်ႈ ပႆႇၼွၼ်းလပ်းလႆႈငၢႆႈငၢႆႈ။ ၸႂ်ၼႆႉ ၵမ်းၵမ်း ၵႂႃႇၶူၵ်းၶူၼ်ႉထိုင် လွင်ႈတႃႇတေၶိုင် ပၢႆႈၶဝ်ႈထိူၼ်ႇၼၼ်ႉယူႇတိၵ်းတိၵ်း၊ ၵူၺ်းၵႃႈ တေလီပၢႆႈၵႂႃႇ ဝၼ်းလႂ်ၼေႃးၼႆၵေႃႈ ၵမ်းၵမ်းဝူၼ်ႉမႅၼ်ႈယူႇ။ ယွၼ်ႉပိူဝ်ႈ တၢင်းဝူၼ်ႉ တၢင်းၶႆႈၸႂ် ၼမ်လႄႈ ၵၢင်ၶိုၼ်းလိုၵ်းမႃးတၢၼ်ႇတၢၼ်ႇ ၸင်ႇတေ ၼွၼ်း လပ်းၵႂႃႇသေ ၸိူင်ႉၸႅင်ႈၽုင်ၼၢင်းၶဝ် ၸိူဝ်းဢၼ်တူၵ်းပုၼ်ႈၽွၼ်း ၵၢင်ၶမ်ႈ ၼၼ်ႉ ပဵၼ်ဢၼ်ၶႂ်ႈၼွၼ်းၼႃႇ ဢမ်ႇတၼ်းၵႂႃႇ တီႈၼွၼ်းၶဝ် ၵေႃႉၼိုင်ႈ လႄႈၵေႃႉၼိုင်ႈ ဢဝ်ႁူဝ်ဢိင်ၵၼ်သေ ၼွၼ်းၵႂႃႇ ၵႃႈပွင်ႇၵႃႈပဵၼ်ယူႇ။

ၵၢင်ၸႂ် ၼေႃႇၶမ်းၸဝ်ႈ မိူဝ်ႈၽွင်းတိုၵ်ႉႁႃ ၸိုတ်ႇၸၢၼ်ႈၸၢင်ၸၢႆႇ ၵပ်း ၵၢႆႇလူၺ်ႈ ၸီးၸိမ်ႇၶုၼ်သေ တိုၵ်ႉတေၽႄႁႃ တၢင်းထိူၼ်ႇယဵၼ်ငႅဝ် ၽွင်း တိုၵ်ႉ ဢဝ်ၸႂ်ဝူၼ်ႉၽႅဝ်ထိုင်ယူႇၼၼ်ႉ ၼွၼ်းၵေႃႈ လပ်းၵႂႃႇပဵၼ်သွပ်ႉပဵၼ် သႅပ်ႉၵူၺ်း။ ၵၢင်ၶိုၼ်း ၽွင်းၸဝ်ႈ မိုၼ်းတႃတိုၼ်ႇမႃးၼၼ်ႉ ယူႇတီႈၼိူဝ် ၵူႇၼွၼ်း ၸႂ်ၸဝ်ႈမွၼ်းလႆႈႁၼ် ဢၼ်ပဵၼ် ၸိူင်ႉၸႅင်ႈၽုင်ၼၢင်း ၼွၼ်း ၶၢင်းယႆၵၼ် ပဵၼ်ၼၼ်ပဵၼ်ၼႆ တႂ်ႈသၢႆငၢဝ်းၾႆးၼၼ်ႉယူႇ။ လိူၵ်ႈဢမ်ႇ လႄႇ ၶိုၼ်းၼႆႉ ၸိူင်ႉၸႅင်ႈၽုင်ၼၢင်း ဢၼ်တူၵ်းပုၼ်ႈၽွၼ်း သမ်ႉပဵၼ် ၼၢင်းဢၼ်ၼွၼ်းႁၢႆႉ ၵူၺ်းၵူၺ်းလႄႈ ၸဝ်ႈတူၺ်းလႆႈႁၼ် မၢင်ၼၢင်း ၼွၼ်းၵတ်းၶႅဝ်ႈ မၢင်ၼၢင်း ဢၢႆယဵဝ်ႈမဵၼ်ၶိုၼ်ႇ မၢင်ၼၢင်း ၼွၼ်းၸိုၼ်ႇ ၸိုၼ်ႇမိတ်းမိတ်း မၢင်ၼၢင်း ၼွၼ်းၶိတ်းၼွၼ်းၶႂၢင် ၵမ်ႈၽွင်ႈ ၼမ်ႉလၢႆး ယၢင်ဢွၵ်ႇ ၵမ်ႈၽွင်ႈ ၼွၼ်းမွၵ်ႇၼွၼ်းလတ်ႈ ၵမ်ႈၽွင်ႈၼွၼ်းတူတ်း ဢၢတ်ႈဢၢတ်ႈမဵၼ်တူႇ မၢင်ၼၢင်း ၼွၼ်းႁူႇသူပ်းၸူ မၢင်ၼၢင်းၼွၼ်းထူ ၼွၼ်းဝူၺ်ႇ မၢင်ၼၢင်း ၼွၼ်းၶူၺ်ႇဢပြ မၢင်ၼၢင်း ၼွၼ်းပျၼွၼ်းပွႆႇ မၢင်ၼၢင်း ၼွၼ်းၶွႆႇၵူၼ်ႈၶိတ်း ၽိတ်းၽိတ်းၽူၼ်ၽူၼ် ပေႃးမိူၼ် ၵူၼ်းၸူၼ် ထူပ်းၺႃး ၼေႃႇၶမ်းၽြႃး လႆႈႁၼ်ၼင်ႇၼၼ် ပဵၼ်ဢၼ် ငိၼ်းမိူဝ်ႇ ငိၼ်းၸၢၼ်ႈ ပဵၼ်ဢၼ်လီယၢၼ်ႈၸၢင်ၸၢႆႇ ပဵၼ်ဢၼ် ဢမ်ႇၶႂ်ႈ ၶိုၼ်းဝၢႆႇတူၺ်းထႅင်ႈလႄႈ

“ဢိုဝ်း... မိူဝ်ႈၶဝ် ဢမ်ႇပႆႇၼွၼ်းတဵတ်ႇၼွၼ်းယဵၼ်ၼၼ်ႉ ပဵၼ် ဢၼ်လီတူၺ်းလီႁၼ် ၵွပ်ႈဢၼ် တၢင်းႁၢင်ႈၶိူင်ႈ မႃႇယႃႇၶဝ်ၼၼ်ႉလႄႈ ပဵၼ်ဢၼ်လီႁၵ်ႉ ၶွတ်ႇတၵ်ႉဝႆႉယူႇသေတႃႉ မိူဝ်လဵဝ် ၽွင်းၶဝ်ၼွၼ်းလပ်း ဢမ်ႇႁူႉႁၢင်ႈ ဢမ်ႇႁူႉတူဝ်ၶဝ်ၼႆႉ ပဵၼ်ဝႆႉၼိုင်ႈလၢႆး မိူၼ်ၼင်ႇၸႃႇတိ ၼၢင်း ၽၢႆး ဢွၵ်ႇၼႄႁၢင်ႈၼၼ်ႉလႄႈ... ဢေႃႈ... ၵဝ်ၼႆႉ ၵုမ်ႇမိုတ်ႈမၵ်ႉ ႁၵ်ႉ လူၺ်ႈ ႁၢင်ႈၽၢင် ဢၼ်ဢမ်ႇၸိုဝ်ႈသင် ၵုမ်ႇၵႂၢင်ၸႂ်ယူႇၼင်ႇၼႆ တေမီးၼမ်ႉ တွၼ်း လွၼ်ႉမွၼ်းသင်မႃးထႅင်ႈ ပေႃးပဵၼ်ၼႆ သင်ၵဝ်ပၢႆႈၶဝ်ႈထိူၼ်ႇ ၶိုၼ်း ၼႆႉ ပဵၼ်ဢၼ် လီသေပိူၼ်ႈယဝ်ႉ”

ၼေႃႇၶမ်းၸဝ်ႈ တႅပ်းတတ်း လတ်းၸႂ်ၼင်ႇၼႆ ၸင်ႇလုၵ်ႉပၢႆႈၵႂႃႇၸူး တီႈ ဢၢႆႈသၢၼ်ႈ ဢၼ်ပဵၼ် ၽူႈၵိူတ်ႇၽၢၵ်ႈမၼ်းသေ ၸင်ႇပူၵ်းမၼ်း

“ဢၢႆႈသၢၼ်ႈ... မႂ်းတေႃႈ ၵႂႃႇႁၢင်ႈၸိူၵ်ႈမႃႉ ၵၼ်ႇတၵသေ ပႂ်ႉဝႆႉတႃႉ”

ဢၢႆႈသၢၼ်ႈၵေႃႈ လႆႈငိၼ်း ၶေႃႈၵႂၢမ်း ၼေႃႇၶမ်းၸဝ်ႈ ၼင်ႇၼႆ ၼႂ်းၸႂ် မၼ်း ၸင်ႇဝူၼ်ႉဝႃႈ~

“ဢိုဝ်း... ၶၢဝ်ႇငၢဝ်းႁူင်လိုဝ်းမႃး ၸဵမ်လဵၵ်ႉဝႃႈ တေပၢႆႈၶဝ်ႈထိူၼ်ႇ ဢၼ် ဝႃႈၼၼ်ႉ တေပဵၼ်ပွၵ်ႈၼႆႉယဝ်ႉယူဝ်ႉ... ၵဝ်တေ ႁၢမ်ႈသီးမၼ်းၼႆၵေႃႈ တေႃႈဢမ်ႇႁတ်း တေလတ်းမိူဝ်းလဝ်ႈလၢတ်ႈ တီႈၼႂ်းႁေႃၵေႃႈ တေႃႈဢမ်ႇ ႁတ်းၼင်ႇၵဝ်ႇ၊ ဢူဝ်... ပဵၼ်ႁိုဝ်ပဵၼ် ၵႂႃႇၸွမ်းၸဝ်ႈၼႆ တေလီယူႇ” ဝူၼ်ႉၼင်ႇၼႆ ၸင်ႇၵႂႃႇႁၢင်ႈၸိူၵ်ႈမႃႉ ဢႃႇၸႃႇၼီႇ ၵၼ်ႇတၵၼၼ်ႉသေ ပႂ်ႉဝႆႉယူႇ။

မိူဝ်ႈၽွင်း ဢၢႆႈသၢၼ်ႈ ၵႂႃႇႁၢင်ႈမႃႉ ပႂ်ႉဝႆႉယူႇၼၼ်ႉ ၵၢင်ၸႂ်ၸဝ်ႈ ၶႂ်ႈမိူဝ်း ယဵမ်ႈတူၺ်း ၼႃႈလုၵ်ႈၸၢႆးဢွၼ်ႇၸဝ်ႈ ဢၼ်ၵိူတ်ႇၼႂ်ၼႆႉၼၼ်ႉလႄႈ ၸင်ႇယုၵ်ႉယၢင်ႈတိၼ်ၸဝ်ႈ ပႆၶဝ်ႈၸူးႁေႃ တီႈလုၵ်ႈလၢင်းလႄႈ မေးၼၢင်း ၸဝ်ႈၼၼ်ႉယူႇ။ ပေႃးဝႃႈ ၽႅဝ်ထိုင် တီႈလုၵ်းၼွၼ်း ၼၢင်းယသေႃႇ ၸဝ်ႈၸင်ႇ လွမ်ပၢၵ်ႈ ငၢၵ်ႈၽႃႈၵင်ႈ လွႆးလွႆးသေ ယဵမ်ႈတူၺ်း ၼႃႈလုၵ်ႈၸၢႆးဢွၼ်ႇ ဢၼ်ၼွၼ်း ယူႇၽၢႆၶႂႃမႄႈမၼ်း ၼၢင်းယသေႃႇၼၼ်ႉယူႇ။ ပေႃးလႆႈႁၼ် လုၵ်ႈၸၢႆးၼႆ ၸႂ်ၸဝ်ႈ ႁေႈႁၢႆးႁူဝ်ႇႁႃႇ ႁၵ်ႉလိူဝ်ပူၼ်ႉၼႃႇလႄႈ ၼေႃႇၸဝ်ႈဢၢင်ႈၵႂႃႇ ဢုမ်ႈ ႁွပ်ႇ ၵွပ်ႇသႂ်ႇၼႂ်းၵႄႈဢူၵ်းၼႆသေတႃႉ သမ်ႉၵူဝ် ယသေႃႇတူၵ်းၸႂ် တိုၼ်ႇ သေႁူႉ ၵူဝ်လႆႈလူႉတၢင်းၵႂႃႇၸဝ်ႈလႄႈ ၸဝ်ႈၸင်ႇသတိ ယိုတ်းၶိုၼ်း ၵမ်းလဵဝ်။

ၸဝ်ႈၸင်ႇ တႅပ်းတတ်းလတ်းၸႂ်ဝႃႈ “ထႃႈႁႂ်ႈတၢင်းဢဵၼ်းဢၢၼ်းၵဝ် တဵမ်ထူၼ်ႈၵွၼ်ႇ ၵဝ်ၸင်ႇၵွႆႈတူၺ်း ၼႃႈလုၵ်ႈၸၢႆးဢွၼ်ႇၵဝ် ဢိမ်ႇဢိမ်ႇ” ၵၼ်ႈၸႂ်ထိမ်ႇဝႆႉ ၼင်ႇၼႆသေ ဝၢႆႇၼႃႈၵွင်လင်ပၼ် လုၵ်ႈမေးၸဝ်ႈၵႂႃႇယဝ်ႉ။ၽွင်းမိူဝ်ႈၼင်ႇၼၼ် ၼၢင်းယသေႃႇၼႆႉတေႉ ပိူဝ်ႈပဵၼ် ဢၼ်ႁိူဝ်ႉတူဝ် ႁိူဝ်ႉၸႂ်လႄႈ ၼွၼ်းလပ်းယူႇၽေႃႉၽေႃႉ ၵေႃႉပဵၼ်ၸဝ်ႈပဵၼ်ၽူဝ် မႃးလၵ်ႉ လွမ် ယဵမ်ႈတူၺ်းၵႂႃႇၼႆၵေႃႈ မၼ်းၼၢင်းတေႃႈဢမ်ႇတၼ်းႁူႉထိုင်။

ပုၼ်ႈပၢင်ႈၵူၼ်းၼမ် ၶဵၼ်သီးဢမ်ၵေႃႈ

ပေႃးဝႃႈ ၼေႃႇၶမ်းၸဝ်ႈ ဢွၵ်ႇမႃး ၽႅဝ်ထိုင် တီႈႁိမ်း တိၼ်ၶူဝ်လႆၼႆ လႆႈမႃးႁၼ်ၺႃး ဢၢႆႈသၢၼ်ႈလႄႈ မႃႉလူင်ၵၼ်ႇတၵ ပႂ်ႉဝႆႉယူႇ။ မႃႉၵၼ်ႇတၵ ၼႆႉ ပဵၼ်မႃႉ ဢၼ်ၵိူတ်ႇမိူဝ်ႈ ဝၼ်းၼေႃႇၶမ်းၸဝ်ႈၵိူတ်ႇၼၼ်ႉလႄႈ ပဵၼ် မႃႉဢႃႇၸႃႇၼီႇ မႃႉၵိူတ်ႇၽၢၵ်ႈၸဝ်ႈယဝ်ႉ။ မႃႉတူဝ်ၼႆႉ... ပဵၼ်မႃႉႁႅင်းယႂ်ႇႁႅင်း လူင် တႄႉတႄႉ။ ႁၢင်မၼ်းၵေႃႈ ပူင်းလီယၢဝ်းလီ ၶူၼ်တူဝ်မၼ်း ပဵၼ်သီ ၽိူၵ်ႇသေ ႁူမၼ်းၼႆၵေႃႈ မိူၼ်ၼင်ႇပိူၼ်ႈဢဝ်ၽႃႉ သိၼ်မႆႉဢေႃႈဝႆႉ ၽၢႆႉၽၢႆႉလႄႈ လႅမ်သဵမ်ႈသေ တင်ႈဝႆႉယူႇ။ မၢၵ်ႇတႃသႂ်မၼ်းၵေႃႈ ႁၢင်ႈလီ မိူၼ်ၼင်ႇ တႃၼူဢွမ်ႈဝႆႉ၊ မႃႉတူဝ်ၼႆႉ ဢဵၼ်ႁႅင်းယႂ်ႇဝိုၼ်း တိုၼ်းပဵၼ် တီႈမီး သရေႇလီတႄႉတႄႉ။ လိူဝ်သေၼၼ်ႉဢမ်ႇၵႃး ပဵၼ်မႃႉဝႃႈငၢႆႈ လၵ်း လႅမ် ႁူႉၶေႃႈလီလီ။ ၼေႃႇၶမ်းၸဝ်ႈၵေႃႈ တိုတ်ႉယိပ်းဢဝ် ၸိူၵ်ႈမႃႉၵၼ်ႇတၵသေ...

“ၵၼ်ႇတၵ... ယၢမ်းလဵဝ် ၵဝ်ၸဝ်ႈ တေပၢႆႈၶဝ်ႈထိူၼ်ႇ ႁႃတၢင်းလီ လႄႈ မႂ်းၶႅၼ်းတေႃႈ ၸွႆႈထႅမ် ပႃႇရမီႇၵဝ်သေၵမ်း”

မႃႉၵၼ်ႇတၵၵေႃႈ ပေႃးဝႃႈ လႆႈငိၼ်း ၶေႃႈၵႂၢမ်း ၼေႃႇၶမ်းၸဝ်ႈၼင်ႇၼႆ ပဵၼ်ဢၼ်ပွင်ႇၸႂ် ငိၼ်းသိူဝ်းတႄႉတႄႉလႄႈ မၼ်းၸင်ႇႁွင်ႉႁီႇသေ ၵျွၵ်း ၵျွၵ်း ဝႅၼ်ဝႅၼ်ယူႇ။ ၼေႃႇၶမ်းၸဝ်ႈၵေႃႈ ၵျွၵ်းၶိုၼ်ႈၶီႇၼိူဝ်မႃႉသေ ၸႂ်ႉႁႂ်ႈ ဢၢႆႈသၢၼ်ႈ ၸၼ်ႁၢင်မႃႉ ၸွမ်းလင်ၸဝ်ႈယဝ်ႉ။ မႃႉၵၼ်ႇတၵၵေႃႈ ၶတ်းၸႂ် ယဵပ်ႇယၢင်ႈ ၼင်ႇႁိုဝ် ပိူၼ်ႈပေႃးတေဢမ်ႇႁူႉ ဢမ်ႇတိုၼ်ႇၼၼ်ႉယူႇ။

ႁူဝ်ႉၽၵ်းတူလူင်ၶူးဝဵင်းၼၼ်ႉ ပေႃႈၸဝ်ႈ ႁဵတ်းသၢင်ႈႁၢင်ႈပွင်ဝႆႉ ၶိူင်ႇၶိူင်ႇ ၵိုမ်းၵိုမ်းလႄႈ ပေႃးဝႃႈ ၽုၺ်ႇယၢပ်ႇၼႆ ဝူၼ်ႉဝႆႉ ဢဵၼ်းဢၢၼ်းဝႅၼ်ၶၢမ်ႈ ဢဝ်ၼႆယူႇ။ ၵူၺ်းၵႃႈ ၽၵ်းတူဝဵင်း သမ်ႉၽုၺ်ႇလႆႈ ငၢႆႈငၢႆႈလူမ်လူမ်လႄႈ ၶဝ်ဢွၵ်ႇပၢႆႈလႆႈငၢႆႈငၢႆႈၵူၺ်း။ ပေႃးႁွတ်ႈထိုင် ၼွၵ်ႈဝဵင်းၼႆၸိုင် ၵၢင်ၸႂ်ၸဝ်ႈ ၶႂ်ႈမုင်ႈႁၼ် ဝဵင်းၵပိလ ဢၼ်ၸဝ်ႈလႆႈယူႇ သဝ်းမႃးၸဵမ်လဵၵ်ႉ၊ ဢၼ်ပေႃႈၽ ၸဝ်ႈလႄႈ ယိင်းၼွင်ႉယသေႃႇ ၵိုတ်းသဝ်းဝႆႉၼၼ်ႉ ၸဝ်ႈၸင်ႇလဵဝ်လင် ယၵ်ႉတူၺ်းၶိုၼ်း ၵမ်းၼိုင်ႈသေ ဢၢင်ႈသိုပ်ႇၶၢဝ်းတၢင်းလႄႈ ၽွင်းမိူဝ်ႈၼၼ်ႉ ၶုၼ်သူင်လူင် ႁွတ်ႈၽႅဝ်မႃးသေ

“ၼေႃႇၶမ်းၸဝ်ႈ... ၸဝ်ႈယႃႇပေၽူမ်ႈပၢႆႈၶဝ်ႈထိူၼ်ႇၵွၼ်ႇ ဢဝ်ၼႆႉၵႂႃႇ ထႅင်ႈၸဵတ်းဝၼ်း ၸၵျႃႇရတၼႃႇ တေၽႅဝ် တီႈၸဝ်ႈယူႇ။ ၵွပ်ႈၼႆ ယႃႇ ၽူမ်ႈ ပၢႆႈၶဝ်ႈထိူၼ်ႇၵွၼ်ႇ ၶိုၼ်းၶဝ်ႈမိူဝ်း ၼႂ်းဝဵင်းသေတႃႉ” ၶုၼ်သူင်လူင် ပူင်ၶေႃႈၵႂၢမ်း ဢဝ်ၸီးၸိမ်ႇၸၵျႃႇဝတေး လႅၼ်ၽၢမ်းၸဝ်ႈၼင်ႇၼႆ။ ၵမ်း ၼၼ်ႉ ၼေႃႇၶမ်းၸဝ်ႈ ၸင်ႇၶိုၼ်းတွပ်ႇဝႃႈ

“မႃႇၼၢတ်ႈၶုၼ်သူင်လူင်၊ ၸီးၸိမ်ၸၵျႃႇဝတေးၼၼ်ႉ ၵဝ်ဢမ်ႇလူဝ်ႇ ႁဵတ်းသင်- ယၢမ်းလဵဝ် ၵဝ်တေႁႃ ႁႂ်ႈပေႃးလႆႈ ၺၢၼ်ႇသပ်ႉပၺ်ႇၺုသေ ဢၢၼ်းတေ ၶိုင်သၢင်ႈႁၢင်ႈပွင်ပၼ် ပုၼ်ႈၽွၼ်းၼမ်ႉတွၼ်း ၵူၼ်းတင်း ၼမ်ၼႆဢိူဝ်ႈ။ မႃႇၼၢတ်ႈၶုၼ်သူင်လူင် မႂ်းတေႃႈပၢႆႈလႃႈ ယႃႇမႃးႁၢမ်ႈတၢပ်ႈ ၵဝ်ယူႇ ၵဝ်ဢမ်ႇၶိုၼ်းမိူဝ်း ၼႂ်ဝဵင်းယဝ်ႈ”

ၼေႃႇၶမ်းၸဝ်ႈ လၢတ်ႈၼင်ႇၼႆ တီႈၶုၼ်သူင်သေ သိုပ်ႇၶၢဝ်းတၢင်းၵႂႃႇ ၼႃႈယဝ်ႉ။ ၶိုၼ်းၼၼ်ႉ ၵႂႃႇၶၢဝ်းတၢင်း 30 ယူႇၸၼႃႇ ႁွတ်ႈၽႅဝ်ထိုင် ၼမ်ႉႁွင်ႈ ဢၼေႃႇမႃႇ ၶၢမ်ႈႁွတ်ႈၵႂႃႇ ၽင်ႇပုၼ်ႉလႄႈ မိူဝ်ႈႁွတ်ႈထိုင် ႁၢတ်ႇ သၢႆး ၽၢႆႇပုၼ်ႉၼၼ်ႉ ပဵၼ်ၽွင်းၵၢင်ၼႂ် ႁူဝ်မိူင်းၼႃႈၾႃႉ ပၢင်ႇသႂ်ဝႆႉလႄႈ ၵၢင်ၸႂ် ၼေႃႇၶမ်းၸဝ်ႈ ၸင်ႇတႅပ်းတတ်း မၵ်းမၼ်ႈဝႃႈ “တီႈၼႆႉယဝ်ႉ ထုၵ်ႇလီႁဵတ်း ရႁၢၼ်း”ၼႆသေ ၸင်ႇလူင်းမႃႉၵမ်းလဵဝ်။

တီႈၼိူဝ်ၵုၼ်ႁၢတ်ႇသၢႆးၼၼ်ႉ ၼေႃႇၶမ်းၸဝ်ႈ ဢဝ်မိုဝ်းၽၢႆႇၶႂႃ ငမ်ဢဝ် လၢပ်ႇလႅဝ်းၸဝ်ႈ၊ မိုဝ်းၶွၼ်သၢႆႉ ငမ်ၵမ်ဢဝ် ၶူၼ်ႁူဝ်ၸဝ်ႈသေ ထိူဝ်ပၢတ်ႇ ၶူၼ်ႁူဝ်ၸဝ်ႈ တီႈၼၼ်ႈ။

ဢႃႇယုၸဝ်ႈလႆႈ 29 ပီ ပဵၼ်ၽွင်း ၶူၼ်ႁူဝ်ၸဝ်ႈ တိုၵ်ႉလမ်လိူမ်ႈလီ မိူၼ်ၼင်ႇ သီတေႃႇလမ်ၼၼ်ႉလႄႈ ၶူၼ်ႁူဝ်ၸဝ်ႈ ဢၼ်ၵႆႉဢဝ် ၶွတ်ႇၵဝ်ႈ ႁဵတ်းၸွၵ်းၼၼ်ႉ ယၢမ်းလဵဝ် လႆႈႁၼ် ပႃးမႃးၼႂ်းၵမ်မိုဝ်း ၽၢႆႇသၢႆႉၸဝ်ႈလႄႈ ဢၢႆႈသၢၼ်ႈ လႆႈႁၼ်ၼင်ႇၼၼ် ပဵၼ်ဢၼ်ၸႂ်ဢမ်ႇလီ မိုင်ၶီၵႂႃႇၵမ်းလဵဝ်။

ၼေႃႇၶမ်းၸဝ်ႈၵေႃႈ သၢင်ႇထုၵ်ႇလီလီ ႁပ်ႉဢဝ်သၢင်ႇၵၢၼ်း ဢၼ်ၶုၼ် သၢင်လူင် “ၶတိၵႃႇရ” မႃးလူႇပၼ်ၼၼ်ႉသေ ဢဝ်ၼုင်ႈမႆၶၢမ်ႇပဵၼ်ပိူင် ရႁၢၼ်း ၼုင်ႈလိူင်ၵူၺ်းၸဝ်ႈယဝ်ႉ။ လိူဝ်သေၼၼ်ႉၵေႃႈ ၸဝ်ႈၸင်ႇ တိၵ်ႉ ထၢၼ်ႇၶၢၼ်ၵၢမ်းဝႃႈ

“ၵဝ်ၼႆႉပေႃးဝႃႈ တေပဵၼ်ၽူႈဢၼ် ပၼ်ၽွၼ်းလီ ၵူၼ်း ၼႂ်းၵမ်ႇၽႃႇ ၼႆႉယူႇဢမ်ႇႁၢင်ႉ တေပဵၼ်ၽြႃးယူႇ ဢမ်ႇႁၢင်ႉၼႆၸိုင် ၶူၼ်ႁူဝ်ၵဝ်လႄႈ သိူဝ်ႈၶူဝ်းၵဝ်ၼႆႉ ႁႂ်ႈၸိူဝ်းၶဝ်ၽူႈပဵၼ် ၽူႈလီၽူႈမျၢတ်ႈ မႃးႁပ်ႉဢဝ်ၵႂႃႇ သေၵမ်း” ၼႆသေ ၸဝ်ႈၶုၼ်ဢိၼ်း ၵေႃႉမႃးတုင်းႁပ်ႉဢဝ် ၶူၼ်ႁူဝ်ၸဝ်ႈ ဢၼ်ၸဝ်ႈ ဢဝ်ဝိုတ်ႉၶိုၼ်ႈၾႃႉၵႂႃႇၼၼ်ႉ။ ၶုၼ်သၢင်လူင်သမ်ႉမႃး ဢဝ်သိူဝ်ႈ ၶူဝ်းၼုင်ႈၸဝ်ႈၵႂႃႇ။ ၶုၼ်ဢိၼ်းၵေႃႈ မိူဝ်းတႄႇတင်ႈၵွင်းမူး ၸူႇလႃႇမုၼိ တီႈတႃႇဝတဵင်ႇသႃႇ မိူင်းၽီသေ ဢဝ်ၶူၼ်ႁူဝ်ၸဝ်ႈ ထႃႇပၼႃႇဝႆႉယဝ်ႉ။

ၶုၼ်သၢင်လူင်ၸမ်း မိူဝ်းတႄႇတင်ႈၵွင်းမူး တုတ်ႉသ တီႈမိူင်းသၢင် ဢၵၼိထသေ ဢဝ်သိူဝ်ႈၶူဝ်းၸဝ်ႈ ထႃႇပၼႃႇဝႆႉယဝ်ႉ။ ဢၢႆႈသၢၼ်ႈၼႆႉ ၵၢင်ၸႂ်မၼ်း မၼ်းမၢတ်ႈထၢင်ႇဝႃႈ ဝၢႆးသေ ၼေႃႇၶမ်းၸဝ်ႈ ၼုင်ႈလိူင် ၶၢမ်ႇ ႁဵတ်းပိူင်ရႁၢၼ်းယဝ်ႉ မၼ်းၵေႃႈ ထၢင်ႇတေလႆႈၼုင်ႈလိူင် ၸွမ်းၸဝ်ႈၼႆ ယူႇ။ ၵူၺ်းၵႃႈ ဢမ်ႇပဵၼ် ၸိူင်ႉၼင်ႇမၼ်းထၢင်ႇဝႆႉၼၼ်ႉ။ ဢမ်ႇမုင်ႈဢမ်ႇ မွင်း ၼေႃႇၶမ်းၸဝ်ႈ ၸင်ႇပူင်လၢတ်ႈဝႃႈ

“ဢၢႆႈသၢၼ်ႈ... မႂ်းလႄႈ တင်းမႃႉၵၼ်ႇတၵ ဢဝ်ၶိူင်ႈၶူဝ်း ၼႂ်းႁၢင်ႈ ၼႂ်းႁေႃၼႆႉသေ ပွၵ်ႈမိူဝ်းၸူးၶိုၼ်း ဝၢၼ်ႈမိူင်းတိူင်းၵႃးႁဝ်းလႃႈ။ ပေႃးဝႃႈ ႁွတ်ႈၽႅဝ်ထိုင်ၼႆၸိုင် လွင်ႈဝႃႈ လုၵ်ႈၸၢႆးၸဝ်ႈ ယူႇလီၸိုၼ်ႈသႂ်ယူႇၼၼ်ႉ မိူဝ်းလဝ်ႈလၢတ်ႈပၼ် ပေႃႈၽၸဝ်ႈတႃႉ”

ၼေႃႇၶမ်းၸဝ်ႈ ၸႂ်ႉႁႂ်ႈဢၢႆႈသၢၼ်ႈလႄႈ မႃႉၵၼ်ႇတၵပွၵ်ႈၶိုၼ်းယဝ်ႉ။ ဢၢႆႈသၢၼ်ႈၵေႃႈ လဝ်ႈလၢတ်ႈတွင်းပၢၼ်ႇ ႁႂ်ႈလႆႈယူႇသဝ်း လူႁၼ်လုမ်းလႃး ၸဝ်ႈၼႆသေတႃႉ ဢမ်ႇလႆႈလႄႈ လႆႈႁႆႈဢဝ်ၼမ်ႉတႃမႆႈ လႆမၢႆႇၵႅမ်ႈမၼ်း သေ ၸုင်ဢဝ်မႃႉၵၼ်ႇတၵ ပွၵ်ႈမႃးမိူဝ်းယူႇ။

မႃႉၵၼ်ႇတၵ ဢမ်ႇမေႃလၢတ်ႈၵႂၢမ်းသေတႃႉ

ပဵၼ်ဝၼ်းလိူၼ်ပႅတ်ႇလွင်ႈၶမ်ႈၼိုင်ႈ။ ၼႃႈၾႃႉၵၢင်ႁၢဝ် ပဵၼ်ပလၢဝ် ၽူင်ႉၽၢႆး ႁေႈႁၢႆးႁူဝ်ႇႁႃႇဝႆႉလႄႈ ပုၼ်ႈတႃႇ ၽူႈဢၼ်ၸႂ်တိပ်ႇၸႂ်တၼ် ၶဝ်တႄႉ ၶႅၼ်းပဵၼ် လွင်ႈတိပ်ႇတၼ်ၸႂ် လိူဝ်ႁႅင်းဝႆႉဢၼ်ၼိုင်ႈယူႇ။

မႃႉလၵ်းလႅမ်ၵၼ်ႇတၵၼႆႉ ယွၼ်ႉပိူဝ်ႈ လႆႈၽၢတ်ႇယၢၼ် ၸဝ်ႈမၼ်း သေ ပဵၼ်လွင်ႈတၢင်း ၸႂ်သဝ်ႈဢမ်ႇပၢင်ႇ ႁၢင်ႇႁၢင်ႇႁၢႆးႁၢႆးဝႆႉလႄႈ ၵႄႈၵၢင် ၸႂ်မၼ်း ပဵၼ်ဢၼ်တိပ်ႇတၼ် ပိူဝ်ႈတေ ဢမ်ႇလႆႈႁၼ် ၼေႃႇၶမ်းၸဝ်ႈ ထႅင်ႈၼၼ်ႉ ဢၢႆႈသၢၼ်ႈ ၸုင်ၸၼ်မၼ်းၵႂႃႇၼႆသေတႃႉ ၵၢင်ၸႂ်မၼ်း ဢမ်ႇၶႂ်ႈၽၢတ်ႇယၢၼ်ၵႃး တမ်ႈတီႈ ၼေႃႇၶမ်းၸဝ်ႈလႃးလႃး။ ၼႂ်းတႃမၼ်း ၵႂႃႇႁၼ်မႅၼ်ႈ မိူဝ်ႈၽွင်ႈၼေႃႇၶမ်းၸဝ်ႈ လၢႆႈၶူဝ်းလၢႆႈပိူင် ၼုင်ႈလိူင်သေ ၵိုတ်းဝႆႉ တမ်ႈတီႈ ၵုၼ်ႁၢတ်ႇသၢႆးၼၼ်ႉ မၼ်းဝူၼ်ႉႁၼ်ၼင်ႇၼႆ ၼမ်ႉတႃ မၼ်း လႆတူၵ်းလႆတူၵ်းယူႇ။ တွၼ်းသေ မၼ်းဢမ်ႇမေႃလၢတ်ႈၵႂၢမ်း ၵူၺ်း ယဝ်ႉ။

ဢၢႆႈသၢၼ်ႈၵေႃႈ ဢမ်ႇၶီႇမႃႉ၊ သွင်ၶႃႁူမ်ႈၵၼ် ပႆမႃးၼင်ႇၼၼ် ဢၢႆႈ သၢၼ်ႈ သတိႁၼ်ၺႃး မႃႉၵၼ်ႇတၵ ၶႂ်ႈဢိူင်ႇဢၢင်ၸိူင်ႇၸၢင်ဝႆႉၼၼ်ႉယူႇ။ ဢၢႆႈသၢၼ်ႈၵေႃႈ ၽွင်းလႆႈႁၼ် ၼေႃႇၶမ်းၸဝ်ႈ လၢႆႈပိူင် ၼုင်ႈလိူင်ၼၼ်ႉ ၼမ်ႉတႃမၼ်း လႆႈလႆႁူဝ်ႈတူၵ်း ၸွမ်းၼင်ႇ ၽူၼ်လိူၼ်ပႅတ်ႇ ဢမ်ႇၵႅတ်ႇ သီးလႆႈၼၼ်ႉယူႇ။

ဢၢႆႈသၢၼ်ႈၼႆႉ မၼ်းၸၢႆးပဵၼ်ၵေႃႉၸႂ်ၵႅၼ်ႇ ၵေႃႉၸႂ်လႅၼ်ႇ ၵေႃႉဢၼ် မီး တၢင်းႁူႉ တၢင်းၶႆႈၸႂ်ၵေႃႉၼိုင်ႈလႄႈ ၵႄႈၵၢင်ၸႂ်မၼ်း ပဵၼ်ၽႆး သေႃးၵ ႁုပ်ႇႁုမ်းသေတႃႉ ဢဝ်သတိသေ ႁၢမ်ႈသီးလႆႈ လွင်ႈတၢင်းၸႂ်မႆႈမၼ်း ၼၼ်ႉယူႇ။ ၵူၺ်းၵႃႈ မႃႉၵၼ်ႇတၵတႄႉ ၼိုင်ႈၵႆယၢၼ်ၸဝ်ႈမၼ်း ၼိုင်ႈၶႅၼ်း ပဵၼ်ဢၼ်ငိၼ်းၽၢၼ် ၶၢၼ်ၸႂ်လႄႈ ဢမ်ႇမီး လွင်ႈတၢင်းသီးၸႂ်ၵႄႈၸႂ်လႆႈ ပဵၼ်ဢၼ်ၸႂ်လိူတ်ႇမႆႈ ပူၼ်ႉလူၼ်ႉလိူဝ်သေ ၼွၼ်းလူမ်ႉတၢႆ ၼိူဝ်ၵုၼ် ႁၢတ်ႇသၢႆးၼၼ်ႉၵႂႃႇယဝ်ႉ။ ဢၢႆႈသၢၼ်ႈ ၶတ်းၸႂ်လူႁၼ်လုမ်းလႃး ယႃပၼ် ပႅင်ႈၼင်ႇ ဢၼ်မၼ်းမေႃၼၼ်ႉသေတႃႉ မႃႉၵၼ်ႇတၵၼႆႉ ပဵၼ်တၢင်းၶီ ၼႅင် ပိူဝ်ႈလႆႈၽၢတ်ႇယၢၼ် ၼေႃႇၶမ်းၸဝ်ႈလႄႈ မၢၵ်ႇႁူဝ်ၸႂ်မၼ်း တႅၵ်ႇငၢၵ်ႈ သေ တၢႆၵႂႃႇယဝ်ႉ။ မႃႉၵၼ်ႇတၵ တၢႆၵႂႃႇလႄႈ ဢၢႆႈသၢၼ်ႈၵေႃႈ ၶၢဝ်းတၢင်းပွၵ်ႈ မိူဝ်း ႁိုဝ်တေငိၼ်းသိူဝ်းတီႈၸႂ် တီႈၼႂ်းထိူၼ်ႇၽူၺ်းမႂ်ၼၼ်ႉ ဢမ်ႇမီး ဢူၺ်းၵေႃႉ ဢူၺ်းသေႈ၊ မႆႈတၢင်ႇၼိူဝ်မႆႈ ႁႆႈသိုပ်ႇႁႆႈသေ ၵႃႈလႆႈ ၶွၼ်ႈဢဵၼ် ႁႅင်း ပွၵ်ႈမႃး ငွၵ်ႈမႃး တၢင်းလင်ယူႇ။ ၶေႃႈၵႂၢမ်း ဢၼ်ၼေႃႇၶမ်းၸဝ်ႈ သင်ႇလၢတ်ႈဝႃႈ “လုၵ်ႈၸၢႆးၸဝ်ႈ ယူႇလီၸိုၼ်ႈသႂ်ယူႇ”ၼႆႁႂ်ႈလၢတ်ႈပၼ် တီႈႁေႃၶမ်းလူင်ၼၼ်ႉ“ဢိုဝ်းႉႉႉ ပေႃး ၵဝ်တေၵုမ်ႇ ၶီၶီ ငဝ်ငဝ် ႁႆႈႁႆႈ မႆႈမႆႈလိူတ်ႇလိူတ်ႇ ယူႇၼႆၸိုင်ဢမ်ႇပႆႇ ပဵၼ်ၵွၼ်ႇ။ ပေႃးၵဝ် ဢမ်ႇၶတ်းၸႂ်မိူဝ်းၼႆ ၸိူဝ်းၶဝ် ဢၼ်ယူႇၵိုတ်းဝႆႉ တီႈႁၢင်ႈတီႈႁေႃ တေဢမ်ႇလႆႈႁူႉ ၶၢဝ်ႇငၢဝ်းႁဝ်းသၢမ်ၵေႃႉ။ ပဵၼ်ႁိုဝ်ပဵၼ် ၶီၶဵၼ်ထၢၼ်ႇႁိုဝ်ၵေႃႈ ၵဝ်တေႃႈ တေၶတ်းၸႂ်မိူဝ်းယဝ်ႉ” ဢၢႆႈသၢၼ်ႈ တႅပ်းတတ်းၸႂ် ၼင်ႇၼႆ သိုပ်ႇလတ်းပႆ ၶၢမ်ႈထိူၼ်ႇ ၶၢမ်ႈၶိူဝ်း မႃးယူႇ။

တၵ်းတေမုင်ႈမွင်း သူးတွင်းပၼ်ယူႇ

ၽွင်းယၢမ်းၵၢင်ၼႂ် ၶၢဝ်းယၢမ်း ၼေႃႇၶမ်းၸဝ်ႈ ၼွၼ်းလုၵ်ႉ၊ ၸိူဝ်းဢၼ် လွမ််လွမ်ၸူမ်းသိူဝ်း တေလႆႈမိူဝ်းမိပ်ႇမိူ်ဝ်းၽၼ်ႉ တေလႆႈထုၵ်းတႃးၼမ်ႉႁွမ် ပၼ် ၼေႃႇၶမ်းၸဝ်ႈၼၼ်ႉလႄႈသင် ၸိူင်ႉၸႅင်ႈၽုင်ၼၢင်း ဢၼ်တူၵ်း ပုၼ်ႈၽွၼ်း ၵၢင်ၼႂ်ၼၼ်ႉဢွၼ်ၵၼ်မႃး ၶႃးၸႃးပႂ်ႉထႃႈ ၼေႃႇၶမ်းၸဝ်ႈ ယူႇ။ ၸိူဝ်းဢၼ် တူၵ်းပုၼ်ၽွၼ်း ၵၢင်ၶမ်ႈၼၼ်ႉၵေႃႈ ဢွၼ်ၵၼ် လုၵ်ႉ မိူဝ်းၵႂႃႇ ၸဵမ်ၸဝ်ႉ။

ထိုင်ၶၢဝ်းယၢမ်း ဢၼ်ၼေႃႇၶမ်းၸဝ်ႈ ၵႆႉလုၵ်ႉၼၼ်ႉၵေႃႈ ၼႂ်ၼႆႉပႆႇ ႁၼ်လုၵ်ႉ။ လႃႈသေၼၼ်ႉၵေႃႈ ဢမ်ႇပႆႇႁၼ် ၼေႃႇၶမ်းၸဝ်ႈ လုၵ်ႉၼင်ႇ ၵဝ်ႇလႄႈ ၶဝ်ၸင်ႇပၢၵ်ႈၽႃႈၵင်ႈ လွမ်တူၺ်း ၼေႃႇၶမ်းၸဝ်ႈ ၼိူဝ်ၵူႇၼွၼ်း ၵေႃႈ ဢမ်ႇလႆႈႁၼ်၊ ဢွၼ်ၵၼ်ႁႃတူၺ်း ၵူႈလုၵ်းၵူႈႁွင်ႇ ပေႃးၸွတ်ႇပေႃး ၸေးၵေႃႈ ဢမ်ႇႁၼ်လႄႈ ၶဝ်ၸင်ႇၵႂႃႇမိူဝ်း လဝ်ႈလၢတ်ႈထိုင် ၼၢင်းႁေႃၶမ်း လူင် မႄႈၼႃႉၵေႃးတမီႇၼၼ်ႉယဝ်ႉ။ မႄႈၼႃႉၵေႃးတမီႇၵေႃႈ ၸွႆႈထႅမ်ႁႃ ပေႃးၸွတ်ႇ တင်းႁေႃသီႇလင်သေတ ဢမ်ႇႁၼ်၊ ပဵၼ်ဢၼ်ၸႂ်မႆႈ ႁိပ်ႈႁိပ်ႈ ၼႅတ်ႈၼႅတ်ႈ ၸင်ႇၵႂႃႇလဝ်ႈလၢတ်ႈထိုင် တီႈႁေႃၶမ်းလူင်။ ႁေႃၶမ်းလူင်ၵေႃႈ ၸင်ႇပူင်ၶေႃႈၵႂၢမ်း ၸႂ်ႉႁႂ်ႈၶုၼ်ႁၢၼ် ၽွင်းမိူင်းၶဝ် တဝ်ႁႃၼႂ်းဝၢင်းႁေႃ ဢိၵ်ႇ ၸိမ် ၼွၵ်ႈႁေႃလႄႈ လိူဝ်သေ ၼေႃႇၶမ်းၸဝ်ႈၼၼ်ႉ ဢၢႆႈသၢၼ်ႈ လႄႈ မႃႉၵၼ်တၵၵေႃႈ ႁၢႆၼႆ ၸင်ႇတေႁူႉထိုင်ယဝ်ႉ။

ၵမ်းၼၼ်ႉ ႁေႃၶမ်းလူင် ၸင်ၶၢင်းဝႃႈ

“ႁဵတ်းႁိုဝ်ၵေႃႈ လုၵ်ႈၸၢႆးၵဝ်ၸဝ်ႈ ပၢႆႈၶဝ်ႈထိူၼ်ႇၵႂႃႇ ဢမ်ႇႁၢင်ႉယဝ်ႉ။ ၵဝ်ၶႂ်ႈႁႂ်ႈမၼ်း ပဵၼ်ၶုၼ်လူင် ၸၵျႃႇဝတေးသေလႄႈ ၶိုင်သၢင်ႈႁၢင်ႈပွင်ဝႆႉ ၸိူဝ်းၼၼ်ႉၼႆ ဢမ်ႇပွင်ႇလွင်ႈသင်ယဝ်ႉ” ပဵၼ်လွင်ႈတၢင်းမႆႈၸႂ် ၼင်ႇၼႆ သေ “ယိင်းၼွင်ႉၵေႃးတမီႇ... လုၵ်ႈပႂ်ႉႁႃႈ ၸဝ်ႈၼၢင်းယသေႃႇၼၼ်ႉ တိုၵ်ႉ ပဵၼ် ၽွင်းလိူတ်ႈၼုမ်ႇယူႇလႄႈ လွင်ႈဝႃႈ ၸဝ်ႈပီႈမၼ်း ပၢႆႈၽၢတ်ႇ ယၢၼ် ယၢတ်ႇမၼ်းၵႂႃႇ ႁဵတ်းလူင်ႁဵတ်းလၢင် ၼင်ႇၼႆၼႆႉ ပေႃးမၼ်းၼၢင်း ႁူႉ ထိုင်ၼႆၸိုင် တေဢမ်ႇယၢပ်ႇ ဢမ်ႇၶိုၵ်ႉဝႆႉႁႃႉ?”

“ပုၼ်ႈတႃႇ လုၵ်ႈပႂ်ႉႁႃးၸဝ်ႈၼႆႉ လွင်ႈတႃႇတေ ၶွင်ႈၶမ်မႆႈၸႂ်ၼၼ်ႉ ထၢင်ႇတေဢမ်ႇမီးၶႃႈၼေႃႈ။ ယွၼ်ႉပိူဝ်ႈသင်ၼႆ မၼ်းၼၢင်းၼႆႉ ပဵၼ်ၼၢင်း ဢၼ်ႁူႉၶေႃႈ လၵ်းလႅမ် ပဵၼ်ၼၢင်း ဢၼ်မီးပၺ်ႇၺႃႇ မေႃဝူၼ်ႉမေႃၶူၼ်ႉ ၵေႃႉၼိုင်ႈတီႈၶႃႈၼေႃး။ လုၵ်ႈၸၢႆးၸဝ်ႈ ပၢႆႈၶဝ်ႈထိူၼ်ႇၼႆၵေႃႈ တေႃႈပဵၼ် လွင်ႈလီၵူၺ်းၼင်ႇၵဝ်ႇၶႃႈ။ ပဵၼ်လွင်ႈတႃႇတေမႃး ၸုင်ၸၼ်ဝေႇၼေႇယ သတ်ႉတဝႃႇ ဢွၵ်ႇမူၼ်ႉပူၼ်ႉလွတ်ႈလႄႈ မၼ်းၸဝ်ႈၸင်ႇၽႃႈပႅတ်ႈ ၸီး ၸိမ်ႇၶုၼ်ၼၼ်ႉၼႆ လုၵ်ႈပႂ်ႉႁႃး ၸဝ်ႈၼၢင်းယသေႃႇ တေဝူၼ်ႉႁၼ်ထိုင် ၼင်ႇၼႆယူႇၶႃႈ။ လုၵ်ႈၸၢႆးၸဝ်ႈၼႆၵေႃႈ ႁူႉႁၼ်လွင်ႈဢၼ် ၼမ်ႉၸႂ် လုၵ်ႈ ပႂ်ႉၸဝ်ႈယူႇလႄႈ ၸင်ႇဢွၵ်ႇပၢႆႈၵႂႃႇၼင်ႇၼႆၵူၺ်းၶႃႈ။ လုၵ်ႈလၢင်းလႄႈမေး ၼၢင်း ၶႂ်ႈပဵၼ်ႁိုဝ်ၵေႃႈပဵၼ် ၶႂ်ႈၶဵၼ်ႁိုဝ်ၵေႃႈၶဵၼ် ပေႃးၵဝ်ၵေႃႉလဵဝ် လီၵေႃႈ ယဝ်ႉယဝ်ႈၼႆ လုၵ်ႈၸၢႆးၸဝ်ႈ ဢမ်ႇမီးၸႂ်ၼင်ႇၼႆတီႈၶႃႈ။ တီႈတေႉမၼ်း လုၵ်ႈၸၢႆးၸဝ်ႈ ဢိတ်းလူၵရုၼႃႇၼိူဝ် ဝူၺ်ႇၼေႇယ သတ်ႉတဝႃႇလႄႈ ၸင်ႇပၢႆႈၶဝ်ႈထိူၼ်ႇ ႁႃတြႃးၶႃႈယဝ်ႉ။ ၵွပ်ႈပိူဝ်ႈၼႆ လွင်ႈၼႆႉ ထုၵ်ႇလီၵႂႃႇ ပွင်ႇလၢတ်ႈထိုင် လုၵ်ႈပႂ်ႉၸဝ်ႈ ၽႂ်းၽႂ်းယူႇၶႃႈဢေႃႈ”

လွင်ႈဢၼ်ႁေႃၶမ်းလူင် ပဵၼ်ၸႂ်ဢမ်ႇလီ ၵွပ်ႈပိူဝ်ႈလုၵ်ႈၸၢႆးမၼ်း ပၢႆႈ ၶဝ်ႈထိူၼ်ႇၵႂႃႇ၊ လုၵ်ႈၸၢႆးမၼ်း ဢမ်ႇပဵၼ်မႃး ၸွမ်းၼင်ႇ မၼ်းၶိုင်သၢင်ႈ ႁၢင်ႈပွင်ဝႆႉၼၼ်ႉၼႆ ၼၢင်းႁေႃၶမ်းလူင် ၵေႃးတမီႇႁူႉထိုင်လႄႈ ဢဝ်လုၵ်ႈ ပႂ်ႉမၼ်းၸဝ်ႈ ႁဵတ်းပဵၼ် လွင်ႈတၢင်ႈသေ ၼေတၢင်းၸိုဝ်ႈၸႂ်ႈပၼ် ႁေႃၶမ်း လူင်ၵႂႃႇယဝ်ႉ။ ႁေႃၶမ်းလူင်ၵေႃႈ ပဵၼ်ဢၼ်ႁူႉႁၼ် တၢင်းၸိုဝ်ႈတၢင်းၸႂ်ႈသေ ဢွၼ်ဢဝ်ၼၢင်းႁေႃၶမ်းလူင် ၶဝ်ႈၵႂႃႇၸူး တမ်ႈတီႈႁေႃ ၼၢင်းယသေႃႇယူႇ။

ၼႃႈၵၼ်ၼႂ်းႁေႃ ဢၼ်ပေႃႇမႂ်ႇၼၼ်ႉ ၼၢင်းယသေႃႇ ဢမ်ႇပႆႇႁူႉထိုင် လႄႈ ဢဝ်ၼႃႈလုၵ်ႈၸၢႆးဢွၼ်ႇမၼ်း ဢၼ်တိုၵ်ႉလႆႈ သွင်ဝၼ်းၼၼ်ႉ သေ ႁဵတ်းတီႈယႃၸႂ်ယူႇ။ ပေႃးဝႃႈ လႆႈႁၼ် ၸဝ်ႈပေႃႈ ႁေႃၶမ်းလူင်လႄႈ ၸဝ်ႈမႄႈၼၢင်းႁေႃၶမ်းလူင် ၶဝ်ႈမႃး ၼႂ်းလုၵ်းၼႆ ၵၢင်ၸႂ်မၼ်းၼၢင်း မၢတ်ႈ မၢင်ႇထၢင်ႇဝႃႈ ၶဝ်မႃးတူၺ်း လၢၼ်ဢွၼ်ႇၶဝ်ၼႆလႄႈ ႁူမ်ႁူမ်ၸူမ်းၸူမ်းသေ ၸင်ႇဢဝ်လုၵ်ႈၸၢႆးဢွၼ်ႇမၼ်း ယိုၼ်ႈပၼ်ၼႂ်းမိုဝ်း မႄႈၼႃႉၵေႃးတမီႇယူႇ။ ႁေႃၶမ်းလူင်လႄႈ ၼၢင်းႁေႃၶမ်းလူင်ၵေႃႈ တူၺ်းၼႃႈလၢၼ်ဢွၼ်ႇၶႃယဝ်ႉ ၶိုၼ်းလွမ်ယၵ်ႉတူၺ်း ၼႃႈလုၵ်ႉပႂ်ႉၶႃသေလွမ်ဝႃႈ ၼႂ်းၸႂ်

“ဢိုဝ်း... လုၵ်ႈယိင်းႁႃးၼႆႉ ပႆႇႁူႉထိုင် လွင်ႈၸဝ်ႈပီႈမၼ်းၵွၼ်ႇ” ၼႆသေ ဢမ်ႇလၢတ်ႈၵေႃႈ ဢမ်ႇပဵၼ်လႄႈ ၸင်ႇလႆႈလၢတ်ႈဝႃႈ “ၶမ်ႈဝႃး ၸဝ်ႈပီႈလုၵ်ႈယိင်း ပၢႆႈၶဝ်ထိူၼ်ႇၵႂႃႇယဝ်ႉ” ၼႆယူႇ။

ၼၢင်းယသေႃႇၵေႃႈ ပေႃးလႆႈငိၼ်းဝႃႈ “ၸဝ်ႈပီႈ ပၢႆႈၶဝ်ႈထိူၼ်ႇၵႂႃႇယဝ်ႈ” ၼႆၸိုင် တူၺ်းႁၼ်ထိုင် ၼႃႈတႃ လုၵ်ႈၸၢႆးဢွၼ်ၶႃသေ ပဵၼ်လွင်ႈတၢင်း ၵပ်ႉတိပ်ႇႁိပ်ႇၸႂ်မႃးလႄႈ မၼ်းၼၢင်း ၶိုၼ်းလွမ်ဝႆႉသတိ မႄးၸႂ် မၼ်းၼၢင်း သေ ဝူၼ်ႉတူၺ်းယူႇ။ ၼၢင်းႁေႃၶမ်းလူင် ယိပ်းၽႃႈၸဵတ်ႉ ဢၢင်ႈတေ ၸဵတ်ႉပၼ် ၼမ်ႉတႃ လုၵ်ႈပႂ်ႉမၼ်းၼႆလႄႈ ၸင်ႇဝႃႈ

“လုၵ်ႈယိင်း...လုၵ်ႈယိင်း” ၼႆယဝ်ႉ။ ၵူၺ်းၵႃႈ ဢမ်ႇပဵၼ်ၸိူင်ႉၼင်ႇ ၼၢင်းႁေႃၶမ်းလူင် ထၢင်ႇဝႆႉၼၼ်ႉ။ ၼၢင်းယသေႃႇ မႄးႁႅၼ်ၼႃႈ မၼ်း ၼၢင်း တူၺ်းၼႃႈ ၸဝ်ႈႁေႃၶမ်းလူင်လႄႈ ၸဝ်ႈမႄႈၼၼ်ႉသေ လွမ်ဝႆႉ ၼႃႈယုမ်ႉမႃးလွႆးလွႆး “ၸဝ်ႈမႄႈတီႈၶႃႈ... ယႃႇပေမႆႈၸႂ် ပုၼ်ႈတႃႇလုၵ်ႈယိင်းသေၵမ်းၶႃႈ လုၵ်ႈယိင်းႁူႉၶေႃႈ လၵ်းလႅမ်ယူႇၶႃႈ”ဝႃႈၵႂႃႇၼင်ႇၼႆ။

တီႈတေႉမၼ်း ပုၼ်ႈပၢင်ႈ ၵေႃႉဢၼ် တေမႃႈႁဵတ်းပၼ် ၵၢၼ်ပရႁိတ မိူၼ်ၸိူင်ႉၼင်ႇၼေႃႇၶမ်းၸဝ်ႈၼႆႉ ၶၢမ်ႇၸုၼ်ႉလူင်ၸုၼ်ႉလၢင် ဢၼ် ဢမ်ႇမီး ဢီႈသင် မႃးၼၢင်တႅၵ်ႈလႆႈၼၼ်ႉ ဢမ်ႇၸိုဝ်ႈဝႃႈ တေလႆႈဢဝ် ၼမ်ႉတႃဢွၵ်ႇသေ ဢဝ်ၵုင်ႇဢဝ်မုၼ်။ လူဝ်ႇလႆႈဢဝ် တၢင်းယုမ်ႉသေ ဢဝ် ၵုင်ႇမုၼ်ပၼ်ႁႅင်းၵႂႃႇ ဢမ်ႇၸႂ်ႈႁႃႉ။ ၵူၺ်းၵႃႈ ယသေႃႇထရႃႇၼႆႉ ပဵၼ်ၼၢင်း ယိင်း ပုထုၸၼ်ႇၵေႃႉၼိုင်ႈ ၼင်ႇၵဝ်ႇလႄႈ လႆႈၽၢတ်ႇယၢၼ် ၸဝ်ႈပီႈမၼ်း ၼႆ ၵႄႈဢူၵ်းၵၢင်ၸႂ်မၼ်းၼၢင်း မႆႈလိူတ်ႇ မိူၼ်ၼင်ႇၾႆးႁၢင်းဝႆႉယူႇ။ လႆႈ ၽၢတ်ႇယၢၼ် ၸဝ်ႈပီႈၵေႃႉ မၼ်းၼၢင်းႁၵ်ႉလႄႈ ပေႃးတေႁႆႈသေ ဢဝ် ၼမ်ႉတႃ ၸိုမ်းယွတ်ႇၼႆၸိုင် ၼမ်ႉတႃ ဢၼ်တေယွႆႉတူၵ်းၼၼ်ႉ ႁိုဝ်တေ ၵုမ်ထူၼ်ႈလႆႈ။ ၾႆးတၢင်းႁၵ်ႉ သေႃးၵပရိတေႇဝ မႆႈလူၼ်ႉပူၼ်ႉတီႈၼႃႇ လႄႈ ပေႃးဢၢင်ႈတေႁႆႈ ဢဝ်ၼမ်ႉတႃ ၸိုမ်းဢွၵ်ႇၼႆ ၼမ်ႉတႃမၼ်းၼၢင်း ပေႃးႁႅင်ႈဝႆႉထႃႈယဝ်ႉ။

ၸိူဝ်းဢၼ်ပဵၼ် ၸိူင်ႉၸႅင်ႈၽုင်ၼၢင်းၶဝ်ၼၼ်ႉ ပေႃးဝႃႈလႆႈႁူႉ “ၼေႃႇၶမ်းၸဝ်ႈ ပၢႆႈၶဝ်ႈထိူၼ်ႇပႅတ်ႈႁဝ်းယဝ်ႉ” ၼႆၸိုင် ဢွၼ်ၵၼ်ႁႆႈ ထိုင်ၸႂ် ထိုင်ၶေႃး ပေႃးဢမ်ႇမီးတီႈဝႃႈ။

ငိူၼ်ႈၶိူဝ်းသႃႇၵီႇ ၸိူဝ်းဢၼ် ၶႂ်ႈႁႂ်ႈၼေႃႇၶမ်းၸဝ်ႈ ပဵၼ်ၶုၼ်လူင် ၸၵျႃႇ ဝတေးၼၼ်ႉတႄႉ လွင်ႈၸဝ်ႈပၢႆႈၶဝ်ထိူၼ်ႇၵႂႃႇၼႆႉ ၶဝ်ဢမ်ႇႁၢၼ်ႉၸႂ်သေ တ ၸိူဝ်းဢၼ် ပႃးၸႂ်တြႃးၼၼ်ႉတႄႉ ဢွၼ်ၵၼ်ႁူမ်ၸူမ်း ပႂ်ႉထႃႈယူႇ တၢင်းၼိုင်ႈ။ သဵင်ႁႆႈပၼ်းမေႃး ပေႃးၸွတ်ႇၵႂႃႇတၢင်းႁေႃ ၽွင်းပႆႇထၢတ်ႇ ၵိုတ်း ပႆႇယိုတ်းလႆႈၼၼ်ႉ ထိုင်မႃးဝၼ်းၼို်င်ႈ ဢၢႆႈသၢၼ်ႈ ဢဝ်တင်းၸိူၵ်ႈမႃႉ ၶိူင်ႈမႃႉ ၶူဝ်းၶွင်ရတၼႃႇသေ ၶဝ်ႁွတ်ႈၽႅဝ်ထိုင် ၼႂ်းႁေႃမႃး ၼႃႈတႃမၼ်းၵေႃႈ ဢူၼ်ႈဢူၼ်ႈဢွၼ်ႇဢွၼ်ႇဝႆႉလႄႈ လႆႈႁၼ်ၼင်ႇၼၼ် ၵဝ်ထၢမ်ၼိုင်ႈ မႂ်းထၢမ်သွင် ဢွၼ်ၵၼ်ဢွမ်ႇလွမ်ႉ ၽွမ်ႉၵၼ်ထၢမ်မၼ်းသေတႃႉ မၼ်း ဢမ်ႇၸၢင်ႈတၼ်းတွပ်ႇလႄႈ ၸင်ႇၶဝ်ႈမိူဝ်းၸူး တီႈႁေႃၶမ်းလူင်သေ လဝ်ႈ လၢတ်ႈၵႂႃႇ လွင်ႈၼေႃႇၶမ်းၸဝ်ႈၼင်ႇၼႆ

“လုၵ်ႈၸၢႆးၸဝ်ႈ ယူႇလီၸိုၼ်ႈသႂ်ယူႇၼႆ ၸႂ်ႉမႃးတၢင်ႇလဝ်ႈထိုင် ၸဝ်ႈ ပေႃႈ မီးၼင်ႇၼႆၶႃႈ” သဵင်လၢတ်ႈ ဢၢႆႈသၢၼ်ႈ ၵိုၵ်းပႃး သဵင်ႁႆႈသေ လၢတ်ႈၵႂႃႇ လႄႈ ႁေႃၶမ်းလူင်ၵေႃႈ ၵမ်းၵမ်းထူၺ်ႈၸႂ်ယႂ်ႇၸႂ်လူင် သူပ်းၵူင် ထိပ်ႇလူမ်း ယူႇသေ “လီယဝ်ႈ... ဢၢႆႈသၢၼ်ႈ ၵႂႃႇႁဝ်းဢွၼ်ၵၼ်ၵႂႃႇတီႈ ၸဝ်ႈၼၢင်းယသေႃႇ ၵွၼ်ႇ” ၼႆသေ ၸူဝ်းၵၼ်ပႆၶဝ်ႈၵႂႃႇ တီႈၼၢင်းယသေႃႇယူႇ။ ဢၢႆႈသၢၼ်ႈၵေႃႈ လဝ်ႈလၢတ်ႈထိုင် ၵူႈၸိူဝ်ႉၵူႈဢၼ်ယဝ်ႉသေ... ၼၢင်းယသေႃႇ လႆႈႁူႉထိုင် လႄႈ “ပေႃးၼႆ- ၸဝ်ႈပီႈဢမ်ႇၼုင်ႈ ၶူဝ်းႁၢင်ႈၶူဝ်းႁေႃယဝ်ႈၼႃ? ၸဝ်ႈပီႈ ၼုင်ႈလိူင် ႁဵတ်းပိူင်ရႁၢၼ်းယဝ်ႈၼႃ?” ၼၢင်းယသေႃႇ ထၢမ်ၵႂႃႇၽႂ်းၽႂ်း ၼင်ႇၼႆ

“ၸႂ်ႈတီႈၶႃႈဢေႃႈ... တီႈၽင်ႇၼမ်ႉဢၼေႃႇမႃႇၼၼ်ႉ ၼေႃႇၶမ်း ၸဝ်ႈ ထိူဝ်ၶၢတ်ႇပၢတ်ႇပႅတ်ႈ ၶူၼ်ႁူဝ်ၸဝ်ႈသေ ၼုင်ႈမႆၽႃႈလိူင်သၢင်ႇၵၢၼ်း ႁဵတ်းပိူင်ရႁၢၼ်း ယူႇၵိုတ်းဝႆႉ တီႈၼၼ်ႈၶႃႈဢေႃႈ” ဢၢႆႈသၢၼ်ႈ လဝ်ႈ လၢတ်ႈၵႂႃႇ ၼင်ႇၼႆယူႇ။

“ဢိုဝ်း... ၸဝ်ႈပီႈ ပွႆႇၽႃႈ ၶူဝ်းႁၢင်ႈၶူဝ်းႁေႃသေ ၼုင်ႈၽႃႈလိူင်သၢင်ႇ ၵၢၼ်း ႁဵတ်းပိူင်ရႁၢၼ်းယဝ်ႉလႄႈ တႄႇဢဝ် မိူဝ်ႈၼႆႉၵႂႃႇၼႃႈ ၵဝ်ၵေႃႈ တေႃႈတေၽႃႈပႅတ်ႈ ၶူဝ်းႁၢင်ႈၶူဝ်းႁေႃသေ ၼုင်ႈၽႃႈလိူင် ၸိူင်ႉၼင်ႇ ၸဝ်ႈပီႈ ယဝ်ႉ။ တႄႇဢဝ်မိူဝ်ႈၼႆႉၵႂႃႇ လွင်ႈလူၺ်ႈ သိၼ်သီႇလမျၢတ်ႈၼၼ်ႉၵေႃႈ ၵဝ်ၼၢင်း တေတိုဝ်းၵမ် ႁပ်ႉဢဝ်ၵႂႃႇယူႇ။ ၼင်ႇႁိုဝ် ၸဝ်ႈပီႈ တေဢမ်ႇမီး ၽေးၶဵၼ် ဢၼ်ၵိတ်ႇဢၼ်ၶွင်ႈသင်သေ ႁႂ်ႈယိူင်းဢၢၼ်း ၸဵဝ်းတဵမ်ထူၼ်ႈ ၼၼ်ႉ ၵဝ်ၼၢင်း တေမုင်ႈမွင်း သူးတွင်းပၼ် ၵူႈၸဝ်ႉၼႂ် ဝၼ်းၶမ်ႈယူႇ” ၼၢင်းယသေႃႇ တႅပ်းတတ်းလတ်းၸႂ်ၼၢင်း ၼင်ႇၼႆ ၶူဝ်းၼႂ်းႁၢင်ႈ ၼႂ်းႁေႃ ၼၼ်ႉ မၼ်းၼၢင်း ဢမ်ႇၼုင်ႈဢမ်ႇမႆ မၼ်းၼၢင်း ဢဝ်မုၼ်ယွင်ႈယေႃး ပုၼ်ႈတႃႇ ၸဝ်ႈပီႈမၼ်း ၶၢမ်ႇယၢပ်ႇႁႃတြႃး ပုၼ်ႈတႃႇ ပရႁိတၼၼ်ႉ ၼႆ လႄႈ မၼ်းၼၢင်းၼုင်ႈမႆ ၽႃႈၽႅၼ်ႇလိူင်သေ ယူႇသဝ်းပႂ်ႉထႃႈၵႂႃႇ ၼႂ်းႁေႃ ၼင်ႇၼၼ်ယဝ်ႉ။