ပပ်ႉတူမ်ႈႁုင်:ၼိူဝ်ႉမူဢုပ်ႉမေႃႈလိၼ်

ပပ်ႉတူမ်ႈႁုင် | မီႇၵီး | လၢႆးမိုဝ်ႉႁုင် | လၢႆးႁဵတ်း ဢၼ်ဢုပ်ႉ

ပေႃးဝႃႈ ၼိူဝ်ႉမူၼႆ ၵူၼ်းမၢင်ၸိူဝ်းၼႆႉ တိုၼ်းငွၵ်ႈႁူဝ်မႃးၵမ်းလဵဝ်ယဝ်ႉ။ မၢင်ၸိူဝ်းၵေႃႈ ယွၼ်ႉပၢႆးယူႇလီႇလႄႈသင်၊ ယွၼ်ႉလွင်ႈၵိူဝ်းယမ်လႄႈသင် ဢွၼ်ၵၼ်ဝႄႈသေတႃႉ မၢင်ၸိူဝ်းတႄႉ လႆႈၸႂ်ၵိၼ်ထူၼ်ႈ။ ၼိူဝ်ႉမူၼႆ ဢၼ်ၶူဝ်ႈႁႃႉ၊ ဢၼ်ၸီႇႁႃႉ ဢၼ်ဢုပ်ႉႁႃႉ မၵ်ႉထူၼ်ႈ။ ဢၼ်ၶႂ်ႈလၢတ်ႈၼႄ ယၢမ်းလဵဝ်တႄႉ ပဵၼ် ၼိူဝ်ႉမူဢုပ်ႉ ဢၼ်ဢုပ်ႉတင်း မေႃႈလိၼ် (Clay pot pork recipe) ဢၼ်ဝႃႈၼၼ်ႉယဝ်ႉ။ ယွၼ်ႉမၼ်း လၢၼ်ႈလီလႄႈ ပဵၼ် ဢၼ်ၵိၼ်ဝၢၼ်ယူႇတႄႉတႄႉ။ ပေႃးၼၼ် ပေႃးပႆႇမီး မေႃႈလိၼ်ၵေႃႈ ဢွၼ်ၵၼ်သိုဝ်ႉမေႃႈလိၼ်သေ ဢုပ်ႉၵိၼ်တူၺ်းၶႃႈလႄႈ။

လၢႆးႁဵတ်း ၼိူဝ်ႉမူဢုပ်ႉမေႃႈလိၼ်

ၼိူဝ်ႉမူဢုပ်ႉမေႃႈလိၼ်
ပိူင်ထၢၼ်ႈ	လၢႆးႁဵတ်း ဢၼ်ဢုပ်ႉ
ႁဵတ်းတႃႇ	2
တၢင်းႁိုင်	75 မိတ်ႉၼိတ်ႉ
လွင်ႈႁဵတ်းယၢပ်ႇ

မီႇၵီႇၸိူဝ်းၶဝ်ႈပႃး

1. ၼိူဝ်ႉမူသၢမ်ထၢပ်ႈ 20 ၵျၢပ်ႈ (သုၵ်ႉလၢင်ႉလီယဝ်ႉ)
2. ၽွင်ၼိူဝ်ႉၵႆႇ ၸေႃႉၼမ်ႉၼဵင် 1 ၸေႃႉ
3. ၼမ်ႉထူဝ်ႇမွင် ၸေႃႉၵိၼ်ၶဝ်ႈ 2 ၸေႃႉ
4. ၵျႃႇၺု ၸေႃႉၵိၼ်ၶဝ်ႈ 1 ၸေႃႉ
5. ၼမ်ႉမၼ်း ၸေႃႉၵိၼ်ၶဝ်ႈ 1 ၸေႃႉ
6. ၽၵ်းမီႇႁေႃ 4 ၵိပ်ႇ (တမ်ဝႆႉ)
7. ၶိင် 2 သႅၼ်ႇတီႇမီႇတႃႇပၢႆၶိုင်ႈ (တမ်ဝႆႉ)
8. ႁဵပ်းသဵၼ်ႈၶဵမ် 100 ၵရမ်ႇ
9. ၽၵ်းၵၢတ်ႇလုင်း 1 မတ်ႉ
10. မၼ်းႁွႆ ၶိုင်ႈ ၸေႃႉၵိၼ်ၶဝ်ႈ
11. ပႃႈၵေႃႈ 5 လူင်ႇ
12. ၼမ်ႉ 700 မီႇလီႇလီႇတႃႇ
13. ၼမ်ႉမၼ်း ၸေႃႉၼမ်ႉၼဵင်ႈ 5 ၸေႃႉ

လၢႆးႁၢင်ႈႁႅၼ်း တူမ်ႈႁုင်

1. ဢွၼ်တၢင်းသုတ်း ဢဝ်ၼိူဝ်ႉမူ ၼူတ်ႈၵဝ်လေႃးတင်း ၽွင်ၼိူဝ်ႉၵႆသေၵေႃႈ ယႅၼ်ႈဝႆႉပၼ် မွၵ်ႈ 1 ၸူဝ်ႈမူင်း - 2 ၸူဝ်ႈမူင်း ၼၼ်ႉလႄႈ။ တႃႇႁႂ်ႈၼမ်ႉဝၢၼ်မၼ်း ၸိုမ်းၶဝ်ႈလႆႈၼႂ်းၼိူဝ်ႉၼၼ်ႉ ဢဝ်ၸေႃႉငႅမ်ႈသၵ်းပၼ်တီႈ ၼင်မၼ်းၼၼ်ႉ တိူဝ်းလီယဝ်ႉ။
2. ဢဝ်မေႃႈတင်ႈၼိူဝ် ၽႆး ႁႂ်ႈမႆႈတၢၼ်ႇတၢၼ်ႇသေၵေႃႈ ဢဝ် ၼမ်ႉမၼ်း ၸေႃႉၼမ်ႉၼဵင်ႈ 5 ၸေႃႉၼၼ်ႉသႂ်ႇ။ ဢဝ် ၽၵ်းမီႁေႃ ဢၼ်တမ်ဝႆႉၼၼ်ႉ သႂ်ႇသေ ၶူၼ်းပၼ် မွၵ်ႈ 1 မိတ်ႉၼိတ်ႉ 2 မိတ်ႉၼိတ်ႉ။ ဢဝ် ၼိူဝ်ႉမူ ဢၼ်ယႅၼ်ႈဝႆႉ မိူဝ်ႈၵႆႈၼၼ်ႉ သႂ်ႇသေ ဢဝ်ၼမ်ႉ 450 မီႇလီႇမီႇတႃႇသႂ်ႇယဝ်ႉသေၵေႃႈ တင်ႈပၼ် ႁႂ်ႈၼမ်ႉမၼ်းပေႃးၸမ်ႁႅင်ႈ။
3. တႃႇႁႂ်ႈၼိူဝ်ႉမူမၼ်း ပူၺ်ႇမႃးၼၼ်ႉ တင်ႈပၼ် မွၵ်ႈ 20-30 မိတ်ႉၼိတ်ႉသေၵေႃႈ ဢဝ် ၼမ်ႉထူဝ်ႇ၊ ၵျႃႇၺု၊ ၼမ်ႉမၼ်း၊ မၼ်းႁွႆ ၸိူဝ်းၼႆႉသေသေ တဝ်သဝ် ၶိုၼ်းတင်ဝႆႉလႄႈ။
4. ဢဝ်ၼိူဝ်ႉမူသၢမ်ထၢပ်ႈၼၼ်ႉ ဢွၵ်ႇတီႈၼႂ်းမေႃႈဝေၵေႃႈ သွႆးပၼ်ၵွၼ်ႈ ႁႂ်ႈမီးတၢင်းၼႃ မွၵ်ႈ 4 သႅၼ်ႇတီႇမီႇတႃႇၼၼ်ႉလႄႈ။
5. ပေႃးၼၼ် ဢဝ်တင်း ၼိူဝ်ႉမူ ၶၢႆႉသႂ်ႇတီႈၼႂ်းမေႃႈလိၼ်သေၵေႃႈ သႂ်ႇပၼ် ပႃႈၵေႃႈ၊ ႁဵပ်းသဵၼ်ႈၶဵမ်၊ ၽၵ်းၵၢတ်ႇလုင်း လႄႈ ၼမ်ႉ မွၵ်ႈ 250 မီႇလီႇလီႇတႃႇသေၵေႃႈ တင်ႈပၼ် မွၵ်ႈ 10 မိတ်ႉၼိတ်ႉၼၼ်ႉလႄႈ။
6. ပေႃးယဝ်ႉတႄႉၵေႃႈ ၼိူဝ်ႉမူဢုပ်ႉလၢၼ်ႈလၢၼ်ႈ ဢၼ်ပႃးၼမ်ႉဢိတ်းဢွတ်းသေၵေႃႈ ၵိၼ်ၵပ်းၶဝ်ႈလႆႈယဝ်ႉ။