တူဝ်သွမ်ၼူမ်း/ပုမ်ထွင်းႁၢင်ၼူ

ပုမ်ထွင်းႁၢင်ၼူ ယူႇဝႆႉၼိူဝ် ၵိင်ႇမႆႉ။

ပုမ်ထွင်းႁၢင်ၼူ ပဵၼ်တူဝ်သွမ်ၼူမ်း ဢၼ်မီးထူင်ထွင်းဢွၼ်ႇသေ တိူဝ်းႁူႉၸၵ်းၵၼ် ဝႃႈပဵၼ် တူဝ်ႊထူင် မႃးသုပ်းပိလ်း ဢၼ်ယူႇတီႈ ဢမႄးရီးၵႂ်းႁွင်ႇ တင်း ၸၢၼ်းဝႆႉၼၼ်ႉယဝ်ႉ။ ပုမ်ထွင်းႁၢင်ၼူ ဢမ်ႇၼၼ် ဢွပ်းပွသ်းသမ်း ၶဝ်ၼႆႉ တေလႆႈႁၼ် တႄႇဢဝ် ၵႂ်ႇၼေႇတႂ်ႇ တေႃႇပေႃးထိုင် ပၢႆၸၢၼ်းသုတ်း ဢမႄးရီးၵႂ်းၸၢၼ်းယဝ်ႉ။ မိူၼ်ၼင်ႇ ပုမ်ထွင်း (ၵႅၼ်းၵရူးသ်)ၶဝ်ယဝ်ႉ။ ပုမ်ထွင်းႁၢင်ၼူ တူဝ်မႄႈၶဝ်ၵမ်ႈၼမ်ၼမ်ၼႆႉ ပႃးဢဝ်လုၵ်ႈဢွၼ်ႇလဵၵ်ႉၶဝ် သႂ်ႇတီႈၼႂ်း ထူင်ထွင်းမၼ်းသေ လဵင်ႉလူယဝ်ႉ။ ပုမ်ထွင်းႁၢင်ၼူၶဝ်ၼႆႉ မီးၶူၼ်ၼင်ၽိူၵ်ႇ တင်း သီမူၼ်၊ မီးၼႃႈၽိူၵ်ႇသဵမ်ႈလႅမ်ႈ ဢိၵ်ႇတင်း ႁၢင်ယၢဝ်း ၼင်ႇႁၢင်ၼူၼၼ်ႉယဝ်ႉ။ ၶဝ်ၸႂ်ႉတိုဝ်းႁၢင်ယၢဝ်းၶဝ် တႃႇၽႅၼ်ၸပ်းတီႈ ၵိင်ႇမႆႉလႂ်၊ တႃႇတေႃႉပႃးမႂ်ႊမႆႉလႂ်ၶဝ်ယဝ်ႉ။

ပုမ်ထွင်းႁၢင်ၼူၶဝ် ဢွၵ်ႇႁႃၵိၼ်တွင်ႉ မိူဝ်ႈၶမ်ႈယဝ်ႉ။ ၶဝ်ႁမ်ႉၶႂ်ႈၵိၼ်ၵူႊမဵဝ်းယူႇယဝ်ႉ။ ႁူမ်ႈပႃးမႅင်းၶဝ်၊ ငူးၶဝ်၊ ႁဵပ်းလႂ် ဢိၵ်ႇတင်း ၼူပုၵ်းၶဝ်လႂ်ယဝ်ႉ။ သင်ၸိူဝ်ႉဝႃႈ ပုမ်ထွင်းႁၢင်ၼူတူဝ်ၼိူင်ႈၼႆႉ လႆႈၶၢမ်တၢင်း တူဝ်ၶဵၼ်သေဢၼ် မိူၼ်ၼင်ႇ မႃလိၼ်၊ ယဵဝ်ႈၶဝ်ၸိူဝ်းၼႆႉမႃး လွၵ်ႇငိူတ်ႈယဝ်ႉ ပေႃးၼႆ မၼ်းတေႁဵတ်းသၢင်ႇ ၼင်ႇတၢႆဝႆႉၼၼ်ႉယဝ်ႉ။ ဢဝ် "လၢႆးလဵၼ်ႉလိင်ႉ"ၼႆႉသေ ပုမ်ထွင်းႁၢင်ၼူ ႁဵတ်းႁႂ်ႈ တူဝ်ၶဵၼ်မၼ်း ၵႂင်ၵႂႃႇပႅတ်ႈသေ တေဝႆႉမၼ်းပႅတ်ႈ တူဝ်လဵဝ်ၼၼ်ႉယဝ်ႉ။

ဢေပုမ်ထွင်းၶဝ်ၼႆႉ ၵိူတ်ႇပႃးတႃမွတ်ႇမႃးဢိူဝ်ႈ၊ ႁူၵေႃႈၼူၵ်ႇ၊ ယဝ်ႉသမ်ႉ ဢမ်ႇမီးၶူၼ်တူဝ်။ ယဝ်ႉၵေႃႈ ၶဝ်ၼႆႉ လဵၵ်ႉႁႅင်းၼႃႇၼႃႇ။ မိူဝ်ႈၸင်ႇၵိူတ်ႇၼၼ်ႉၼႆ တူဝ်ၶဝ်သၢဝ်းတူဝ်ၼႆႉ ၸၢင်ႊၽုၺ်ႇလႆႈ ၼႂ်းၸေႃႉၼမ်ႉၼဵင်ႉဢၼ်လဵဝ် ၵွၼ်ႇယဝ်ႉ။ ဢေလႅင်ဢွၼ်ႇၶဝ်ယူႇ သဝ်းတီႈၼႂ်း ထူင်ထွင်းမႄႈၶဝ် တႃႇၵဝ်ႇတေႃႇသိပ်းဝူင်ႈ ၸိူဝ်းၼႆႉယဝ်ႉ။ ၶဝ်တေၵိၼ် ၼမ်ႉၼူမ်းမႄႈၶဝ်သေ ယႂ်ႇမႃးၼႂ်းၼၼ်ႉယဝ်ႉ။

• ပုမ်ထွင်းႁၢင်ၼူၶဝ် ၵႆႉၵႆႉယူႇတီႈၼႂ်းႁူးၵူင်မႆႉတင်း ပုတ်း၊ ဢမ်ႇၼၼ် တီႈၼႂ်းႁူးတႂ်းလိၼ်လႂ်ယဝ်ႉ။

←  ပုမ်ထွင်း  ●  ပၢင်တၢႆး →