ၶႅၵ်ႇ/ထၢမ်တွပ်ႇ
( 1 ) ထၢမ် ။ ။ ၸိူင်းတႆး ဢၼ်ႁႅင်းသိူဝ်ၶႅင် တႅမ်ႈဢွၵ်ႇမႃးၸိူဝ်းၼၼ်ႉ ၶႃႈႁဝ်းၽူႈလူလိၵ်ႈၵေႃႉၼိုင်ႈ ဢဝ်ၵုင်ႇမုၼ် ယွင်ႈယေႃးတႄႉတႄႉၶႃႈယဝ်ႉ။ ပေႃးႁႅင်းသိူဝ်ၶႅင်ႁဝ်း တႅမ်ႈၸိူင်းၼႆႉ ႁႂ်ႈပႃးပၢႆးမိူင်း ႁၢမ်ႉၼမ်ၼမ် ဢမ်ႇလႆႈၶႃႈႁႃႉ ?
ၸၢႆးမိူဝ်ႇပႃၼဝ်ႈ ၊ ၼမ်ႉႁၢင်ႈလီ
တွပ်ႇ ။ ။ ၶွပ်ႈၸႂ်ထိုင်ၵႂၢမ်းယွင်ႈယေႃး ၸၢႆးႈမိူဝ်ႇပႃၼဝ်ႈႁဝ်းယူႇ၊ ၶႂ်ႈဝႃႈပဵၼ်ၸိူင်း တၢင်းႁၵ်ႉ ပၢႆးမိူင်းလွၼ်ႉလွၼ်ႉၼႆၵေႃႈ လႆႈယူႇ ... ၵွပ်ႈဝႃႈ ပၢႆးမိူင်းၼႆႉ ၵပ်းၵၢႆႇၵူႈလွင်ႈလွင်ႈၼၼ်ႉယဝ်ႉ ။
( 2 ) ထၢမ် ။ ။ ပေႃးႁဝ်းႁွင်ႉႁႅင်းသိူဝ်ၶႅင်ဝႃႈ လုင်းလုင်းႁႅင်းသိူဝ်ၶႅင်ၼႆ ၸွင်ႇႁႅင်းသိူဝ်ၶႅင် တေၽိတ်းၸႂ်ၶႃႈႁိုဝ် ... ?
လၢၼ်ယိင်း
တွပ်ႇ ။ ။ ႁႅင်းသိူဝ်ၶႅင်ၵေႃႈ ၶႂ်ႈမီးလၢၼ်ယိင်းၼၼ်ႉ သၢင်ႇထုၵ်ႇလီလီယဝ်ႉ ... သင်ဝႃႈမီးၵူၼ်းႁွင်ႉ ပူႇပူႇႁႅင်းသိူဝ်ၶႅင်ၼႆ ႁႅင်းသိူဝ်ၶႅင် ၶႅၼ်းတေၸူမ်းဢိူဝ်ႈ ... ၵွပ်ႈပိူဝ်ႈဝႃႈ တႃႇတေပဵၼ် ပူႇပူႇႁႅင်းသိူဝ်ၶႅင်ၼၼ်ႉ ပေႃးဢႃႇယုဢမ်ႇယၢဝ်းၼႆ ဢမ်ႇပဵၼ်လႆႈလူး ...“ ပေႃးပိူၼ်ႈႁွင်ႉဝႃႈပူႇ တေလႆႈယူႇႁိုင်ႁီး တေမီးၶၢဝ်းတႅမ်ႈလိၵ်ႈၼမ် ”ၼႆၵႂႃႈ
( 3 ) ထၢမ် ။ ။ ၽဝၶႃႈႁဝ်းၼႆႉ မၼ်းမိူၼ် ၸၢႆးမွၼ်းၶိူဝ်း ပၢႆႈၼၢင်းမူဝ်ၶၢဝ်သေ တိုၵ်ႉမႅၼ်ႈၽွင်းႁႃတီႈယဵၼ်ၸႂ်ၼၼ်ႉယူႇလႄႈ ... တေလႆႈႁဵတ်းႁိုုဝ် ယႃႁႂ်ႈၸႂ်မႆႈယဵၼ်ႁၢႆၵေႃႈ ဢမ်ႇႁူႉၶႃႈၼေႃ ?
တွပ်ႇ ။ ။ ပေႃးဝႃႈ ၸႂ်မႆႈဢၼ်ၵဝ်ႇၼၼ်ႉ ပႆႉႁၢႆၼႆၸိုင် ဢဝ်ၸႂ်မႆႈ ဢၼ်မႂ်ႇသႂ်ႇပၼ်တိၵ်းတိၵ်းတႃႉ ... ၸႂ်မႆႈဢၼ်ၵဝ်ႇၼၼ်ႉ တေဢမ်ႇပေႃးမႆႈသေ တေဢုၼ်ႇၵႂႃႇယူႇယူဝ်ႉ ... ၸၢမ်းတူၺ်းလႄႈ ။
( 4 ) ထၢမ် ။ ။ ၶႃႈၼွင်ႉၸၢႆး မီးတၢင်းၶၢၼ်ၸႂ်သွင်သဵၼ်ႈဢေႃႈ ... ဢၼ်ၼိုင်ႈ ပဵၼ်လွင်ႈဢမ်ႇၶႂ်ႈယၢၼ်ၸူႉၶႃႈ ... ထႅင်ႈဢၼ်ၼိုင်ႈသမ်ႉ ဢမ်ႇၶႂ်ႈယၢၼ် လွင်ႈႁဵၼ်းလိၵ်ႈၼၼ်ႉဢေႃႈ ... ၶႅၼ်းတေႃႈ လၢတ်ႈပၼ်ၽွၼ်းလီၽွၼ်းၸႃႉသေ ၸွႆႈတႅပ်းတတ်းပၼ် ၶႃႈၼွင်ႉၸၢႆးသေၵမ်း ...
ၸၢႆးသႅင်မိူင်း ၊ ထုင်ႉယႃႈၶၼ်းဝၢၼ်
ၸူဝ်ႈၶၢဝ်းႁဵၼ်းတၢင်းမေႃ မိူင်းၵႆ
တွပ်ႇ ။ ။ ငၢႆႈယူႇၵူၺ်း ဝႆႉၸႂ် “ယိူၼ်ႉလႆႈပဵၼ်တႅင်ႈၶမ်း ” ၼႆသေ ၽွင်းတိုၵ်ႉႁဵၼ်းဢဝ်တၢင်းမေႃၼႆႉ လွင်ႈၸူႉၼၼ်ႉ ဢဝ်ဝႆႉတၢင်းၶၢင်ႈ ၸိူင်ႉၼင်ႇလုၵ်ႈႁဵၼ်းပႃးထူင်ၼၼ်ႉ တႃႉ ...
( 5 ) ထၢမ် ။ ။ ပပ်ႉၸိူင်းတႆး ဢၼ်ၵပ်းၵၢႆႇလူၺ်ႈ တႆးထုင်ႉလိၼ်ပဵင်းၵေႃႈ ၶႂ်ႈႁႂ်ႈတႅမ်ႇဢွၵ်ႇပၼ်ဢေႃႈ ... တႆးထုင်ႉလိၼ်ပဵင်းၵေႃႈ တေႃႈယူႇဢိူမ်ႈပူၵ်းသဝ်းလူၺ်ႈတင်း မၢၵ်ႇလမ်းႁူဝ်ၸႂ်ဢွၼ်ႇလုၵ်ႈၼိုင်ႈ ၼင်ႇၵဝ်ႇလႄႈ ထုတ်ႇတႅမ်ႈပၼ် ပပ်ႉၸိူင်း တေလႆႈယူႇၶႃႈယူဝ်ႉၼေႃ ... ? ။
ယိင်းႁွမ်ၶိူဝ်း ၊ ဝၢၼ်ႈၶမ်းလိူင် ( ထုင်ႉလိၼ်ပဵင်း )
တွပ်ႇ ။ ။ လႆႈတႄႉတေလႆႈယူႇ ... ၵူၺ်းၵႃႈ တႃႇတေလႆႈလွင်ႈတၢင်း တႃႇတေတႅမ်ႈၸိူင်းၼၼ်ႉ ႁႅင်းသိူဝ်ၶႅင် လူဝ်ႇလႆႈမႃးဢႅဝ်ႇတူၺ်း ထုင်ႉလိၼ်ပဵင်းလီလီၵွၼ်ႇဢိူဝ်ႈ ... ၸွင်ႇတေမီး ၵူၼ်းလဵင်ႉၼိူဝ်ႉႁႅင်းသိူဝ်ၶႅင်ၵေႃႈ ဢမ်ႇႁူႉ ? ဢၼ်လီသေပိူၼ်ႈတႄႉ ပေႃးတႆးထုင်ႉလိၼ်ပဵင်း ၶိုၼ်းတႅမ်ႈလႆႈ လွင်ႈထုင်ႉလိၼ်ပဵင်းၼႆ တေပဵင်းၸႂ်လိူဝ်သေ ႁႅင်းသိူဝ်ၶႅင်တႅမ်ႈယူႇဢမ်ႇႁၢင်ႉ ...
( 6 ) ထၢမ် ။ ။ ပပ်ႉၸိူင်းတႆး ဢၼ်ဢွၵ်ႇယဝ်ႉ ဢွၼ်တၢင်းၸိူဝ်းၼၼ်ႉ မၢင်ၵေႃႉပႆႇလႆႈႁၼ် တိုၵ်ႉမီးတင်းၼမ်ယူႇလႄႈ ၶိုၼ်းဢိတ်ႇဢွၵ်ႇ ဢမ်ႇလႆႈၶႃႈႁႃႉ ?
ၸၢႆးပႃႉမႅင်ႇ ၊ သႅင်ၵႅဝ်ႉ
တွပ်ႇ ။ ။ သူးတွင်းၸွႆႈထႅမ်ပၼ် ႁႅင်းသိူဝ်ၶႅင် ႁႂ်ႈယူႇလီမီးငိုၼ်းတႃႉ ၸၢႆးပႃႇမႅင်ႇဢိူၺ်း ... ...
( 7 ) ထၢမ် ။ ။ ပေႃးဝႃႈ ၶႂ်ႈႁဵတ်းဢွၵ်ႇပပ်ႉၸိုင် တေလႆႈႁဵတ်းႁိုဝ်ၶႃႈ ?
ၸၢႆးမိၼ်ႉဢူး ၊ မိူင်းၵိုင်
တွပ်ႇ ။ ။ ၼိုင်ႈ - တေလႆႈတႅမ်ႈ ႁႂ်ႈထုၵ်ႇၸႂ်ၸဝ်ႈၵဝ်ႇလီလီ ၊
သွင် - သင်ဝႃႈ တေတၢင်ႇမၢႆၶႂၢင်းၼႆၸိုင် တေလႆႈၶိုၼ်းပိၼ်ႇၽၢႆႇမၢၼ်ႈသေ ႁဵတ်းၽိုၼ်မိူၼ်သီႇၽိုၼ် ၊
သၢမ် - ပေႃးလႆႈမၢႆၶႂၢင်း ၵူႈပိူင်ပိူင်ယဝ်ႉ တေလႆႈဢဝ်ၶွမ်ႇပိဝ်ႇတႃႇ ( Computer ) ပေႃႉသေ တေလႆႈႁဵတ်း ၽိမ်း ( film ) ယဝ်ႉ ၸင်ႇၸၢင်ႈတၢင်ႇၸၢၵ်ႈဢိတ်ႇ ( Offset )သေ ၶႄႇပၼ်ငိုၼ်း၊ ပေႃးပိူၼ်ႈယဵပ်ႉပဵၼ်ပပ်ႉယဝ်ႉ သူင်ႇၵႂႃႇပၼ်တီႈပိုၼ်ၽႄ လွင်ႈႁဵတ်းပပ်ႉမီးၼင်ႇၼႆယဝ်ႉ ......
( 8 ) ထၢမ် ။ ။ ၵွပ်ႈပိူဝ်ႈသင်လႄႈ ႁႅင်းသိူဝ်ၶႅင်ႁဵတ်းဢွၵ်ႇပပ်ႉလိၵ်ႈတႆး ယိူင်းဢၢၼ်းမီးၸိူင်ႉႁိုဝ်ၶႃႈ ... ?
ၵွင်တႆး ၊ လၢႆးၶႃႈ
တွပ်ႇ ။ ။ ယိူင်းဢၢၼ်းတႄႉ မီးတင်းၼမ်ယူႇယဝ်ႈ ... ၵူၺ်းၵႃႈ
လွင်ႈဢၼ်ႁဵတ်းဢွၵ်ႇပပ်ႉလိၵ်ႈတႆးၼႆႉ ပဵၼ်မႃးၵွပ်ႈပိူဝ်ႈ ဢမ်ႇၶႂ်ႈၶၢမ်ႇၵႂၢမ်းၶေႃႈၼိုင်ႈ၊ ၽွင်းမိူဝ်ႈ ႁဝ်းႁဵတ်းမေႃသွၼ် ‘မ’ႁႃႈတူဝ် တီႈၵျွၵ်းမႄး မိူဝ်ႈ ( 1979 ) ၼၼ်ႈယဝ်ႈ ... ၵႂၢမ်းၶေႃႈၼၼ်ႉတႄႉပဵၼ်“ သွၼ်ဢဝ်လိၵ်ႈတႆး သွၼ်ပွင်ႇသင် ? ပပ်ႉတႃႇတေလူၵေႃႈ ဢမ်ႇမီးသင် ” ၼႆၼၼ်ႉယဝ်ႉ ... ယၢမ်းလဵဝ် ႁႅင်းသိူဝ်ၶႅင် ၶွပ်ႈၸႂ်ထိုင် ၵေႃႉဢၼ်ဝႃႈၼင်ႇၼၼ်ယူႇ ... သင်ဢမ်ႇဝႃႈၼၼ် ယင်းတေ ဢမ်ႇပဵၼ်တႅမ်ႈသင်ႁိုဝ်ၵေႃႈ ဢမ်ႇႁူႉ ... ...
( 9 ) ထၢမ် ။ ။ ပေႃးတႅမ်ႈပပ်ႉၸိူင်းၸိုင် တီႈယူႇတီႈသဝ်း ၸၢႆးၸိူင်းၼၢင်းၸိူင်းၸိူဝ်းၼၼ်ႉ တေလႆႈတႅမ်ႈသႂ်ႇႁဵင်းလိၵ်ႈတႄႉတႄႉႁႃႉ ? ဢမ်ႇၼၼ် လၢမ်းလိမ်းႁဵတ်းပဵၼ်သေ သႂ်ႇၵေႃႈလႆႈယူႇႁႃႉ ? ပေႃးသႂ်ႇမၢႆႁိူၼ်းပိူၼ်ႈၼႆ ပိူၼ်ႈဢမ်ႇၶႂ်ႈၸႃႉၼိူဝ်ႁဝ်းႁႃႉ ? ပေႃးႁဵင်းလိၵ်ႈဢမ်ႇၸႂ်ႈတႄႉၼႆ ၵူၼ်းယူႇႁိမ်းႁွမ်းၼၼ်ႉ သမ်ႉတေဝႃႈႁိုဝ် ? ပိုင်ႈဢိင် ပီႈႁႅင်းသိူဝ်ၶႅင်သေ တေၶႂ်ႈတႅမ်ႈဢွၵ်ႇပပ်ႉလႄႈ ႁႂ်ႈလႆႈႁူႉသေၵမ်း...
ၸဝ်ႈဝိၸယ ၊ ၵႅပ်ႉၼိုင်ႈ တႃႈလိူဝ်ႇ
တွပ်ႇ ။ ။ တီႈယူႇတီႈသဝ်း ၸၢႆးၸိူင်းၼၢင်းၸိူင်းၶဝ်ၼၼ်ႉ ၵမ်ႉၼမ်ၼၼ်ႉ ဢမ်ႇသႂ်ႇမၢႆသေ သႂ်ႇမၢႆပဝ်ႇ ( - ) ဝႆႉၵူၺ်းဢေႃႈ ... လွင်ႈသႂ်ႇၺႃး မၢႆႁိူၼ်းပိူၼ်ႈၸိူဝ်းၼၼ်ႉတႄႉ ဢမ်ႇမီးပၼ်ႁႃသင်ၶႃႈ ၸိူင်း ဢၼ်ဝႃႈၼၼ်ႉ မၼ်းပဵၼ်ဢၼ်ၽၢမ်းတႅမ်ႈၵူၺ်း မၼ်းဢမ်ႇၸႂ်ႈဢၼ်တႄႉၼႆ ၵူၼ်းႁိမ်းႁွမ်းၸိူဝ်းၼၼ်ႉၵေႃႈ ပိူၼ်ႈပွင်ႇၸႂ်ယူႇတီႈၶႃႈဢေႃႈ ... ၶႃႈတပႄး တေသူးတွင်းမုင်ႈမွင်းပၼ် “ ႁႂ်ႈၸဝ်ႈႁဝ်းၶဝ် တႅမ်ႈပဵၼ်လႆႈပပ်ႉၼမ်ၼမ် ၶႅမ်ႉၶႅမ် သေၵမ်း ” ၼႆယူႇဢေႃႈ ... ...
( 10 ) ထၢမ် ။ ။ ပီႈပီႈ ႁႅင်းသိူဝ်ၶႅင်ၶႃႈ ... ဢၼ်တႅမ်ႈဢွၵ်ႇမႃး ပပ်ႉသၢင်းတႆးၸိူဝ်းၼႆႉ ပဵၼ်တူဝ်ထူပ်း ပီႈပီႈၶႃႈႁႃႉ ? ဢမ်ႇၼၼ် ဢဝ်ၸႂ်ဝူၼ်ႉႁဵတ်းၶႃႈႁႃႉ ? ၊ ထွမ်ႇဢဝ်ၸိုဝ်ႈလႄႈ တၢင်းလၢတ်ႈၶေႃႈၵႂၢမ်း ၼႂ်းပပ်ႉၸိူဝ်းၼၼ်ႉတႄႉ တေလႅပ်ႈႁၢင်ႈလီ ထုၵ်ႇတႃယိင်းသၢဝ်ၶဝ် တင်းၼမ်ယူႇၼေႃ ? တေလႆႈထူပ်းၵၼ် မိူဝ်ႈလႂ်ၶႃႈ ?
ၼွင်ႉတိုၼ်းႁွမ် ၊ ပၢင်လူင်
တွပ်ႇ ။ ။ ပီႈပီႈႁႅင်းသိူဝ်ၶႅင် ၼႆႁႃႉ ? ဢလူဝ်း ... ! ၶူၼ်တုမ်ႇၼိူဝ်ႉသိူဝ် ပေႃးၵီႈယဝ်ႈ ... ဢၼ်တႅမ်ႈပပ်ႉသၢင်းတႆး ၸိူဝ်းလွင်ႈႁၢင်ႈလီဢမ်ႇႁၢင်ႈလီ ဢၼ်ဝႃႈၼၼ်ႉတႄႉ မီးတီႈတႃ ၵေႃႉလွမ်တူၺ်းၼၼ်ႉၵႂႃႈ ... တႃႇတေထူပ်းၵၼ်ၼၼ်ႉ ပေႃးဝၢႆးၼႆႉ ႁႅင်းသိူဝ်ၶႅင် တေမႃးလူင်းလၢႆးမိုဝ်း လိၵ်ႈႁူမ်ႈမၢႆပၢင်လူင် ယူႇၵူၺ်း ၼွင်ႉတိုၼ်းႁွမ်ဢိူၺ်း ...
( 11 ) ထၢမ် ။ ။ ၼႂ်းပပ်ႉမွၵ်ႇလူင်ႇလဵဝ်ၼၼ်ႉ ၵမ်းလိုၼ်းၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ်ၶဝ် ၶိုၼ်းၺႃးၵၼ်ယဝ်ႉ ... ၽွင်းၶီႇၵႃးမိူဝ်းလွႆလႅမ်ၼၼ်ႉ ယင်းပႆႇလႆႈသွင်ႇမင်ႇၵလႃႇသေ ဢဝ်သုတ်းၵႂႃႇၼၼ်ႉ ပဵၼ်ၼင်ႇႁိုဝ်ၼေႃး ... ? ဢမ်ႇၼၼ်ၵေႃႈ တေဢၢၼ်းသိုပ်ႇ ထႅင်ႈမၢႆသွင်ၼႄႇ ? ”
ၸၢႆးသိူဝ်ၶမ်း ၊ ၶူဝ်မၢၵ်ႇႁိၼ် ထုင်ႉယွၼ်း
တွပ်ႇ ။ ။ သင်ဝႃႈ ၽၢႆလင်တီႈသုတ်းၼၼ်ႉ တႅမ်ႈဝႆႉ “ ပႂ်ႉမွင်းမၢႆသွင်” ၼႆ တေမႃးမၢႆသွင်ယူႇ။ ၼႆႉတႄႉ ၺႃးၵၼ်ယဝ်ႉလႄႈ ဢမ်ႇသွင်ႇမင်ႇၵလႃႇၵေႃႈ မၼ်းတဵမ်ထူၼ်ႈယဝ်ႉ ... ၵွပ်ႈၼၼ် ၸင်ႇၶွတ်ႇယွတ်ႈပၢႆၵမ် မွၵ်ႇလူင်ႇလဵဝ်တီႈၼၼ်သေ တႅမ်ႈဝႆႉဝႃႈ “သုတ်းယဝ်ႉ” ၼႆယူႇယဝ်ႉ ... လွင်ႈဢၼ် ၸၢႆးၶမ်းလဵၵ်ႉ ၊ ဝၢၼ်ႈတူင်ႈ ၵုၼ်ႁိင်း ထၢမ်မႃးၼၼ်ႉၵေႃႈ မိူၼ်ၶေႃႈထၢမ် တီႈၼိူဝ်ၼႆႉ ၼင်ႇၵဝ်ႇယဝ်ႉလႄႈ ဢမ်ႇတွပ်ႇၶေႃၶေႃယဝ်ႉ ... ...
( 12 ) ထၢမ် ။ ။ လွင်ႈတၢင်းႁၵ်ႉလႄႈ လွင်ႈတၢင်းဢေးလူၼႆႉ ဢၼ်လႂ်ပေႃႇဢွၵ်ႇဢွၼ်တၢင်း ... ? ၼႆ ၶႅၼ်းတေႃႈ တွပ်ႇပၼ်သေၵမ်းၶႃႈ ...
ၸၢႆးၸၢႆး ၊ ဝၢၼ်ႈသူႈ ၊ လႃႈသဵဝ်ႈ
တွပ်ႇ ။ ။ လွင်ႈတၢင်းႁၵ်ႉလႄႈ လွင်းတၢင်းဢေးလူၼႆႉ ဢမ်ႇမီးပိူင်တၢႆ ... မၢင်ပွၵ်ႈ ၵိုင်ႉၵၢင်ႉႁၼ်လႄႈ ၵိုင်ႉၵၢင်ႉႁၵ်ႉၵေႃႈပဵၼ် ၊ မၢင်ပွၵ်ႈၵေႃႈ ႁၵ်ႉသေလႄႈ ၸင်ႇဢေးလူၵေႃႈ ၸၢင်ႈပဵၼ်မၢင်ပွၵ်ႈ ဢေးလူသေ ၸင်ႇႁၵ်ႉၵေႃႈ ၸၢင်ႈပဵၼ်ယဝ်ႉ ... မၼ်းပဵၼ်လူၺ်ႈ တီႈထၢတ်ႈဢၼ်တုမ်ႉတိူဝ်ႉၵၼ်ၼၼ်ႉယဝ်ႉ ... ဢၼ်လႂ်ပဵၼ်ဢွၼ်တၢင်းၼႆ ဢမ်ႇမီးပိူင်တၢႆ ...
( 13 ) ထၢမ် ။ ။ ပပ်ႉႁႅင်းသိူဝ်ၶႅင်ႁဝ်း ဢၼ်တႅမ်ႈဝႆႉၼၼ်ႉ ဢဝ်ဢွၵ်ႇပၼ်ၽႂ်းၽႂ်းၶႃႈလေႃႇ ... ၶဵဝ်ၶဝ် ပႂ်ႉလူပပ်ႉၸိူင်း ဢမ်ႇၶိုတ်းၸႂ် ၵွပ်ႈၼၢၼ်းဢွၵ်ႇမႃးထႅင်ႈၼၼ်ႉ ဢေႃႈ ...
ၶဵဝ် ၊ မိူင်းမိတ်ႈ
တွပ်ႇ ။ ။ ၵွပ်ႈပိူဝ်ႈ ၵၢၼ်ၼမ်သေၵူၼ်းလႄႈ ႁႅင်းသိူဝ်ၶႅင် တေပႆႇၸၢင်ႈၶပ်ႉၶိုင်ဢွၵ်ႇၽႂ်းၽႂ်း ၼႆ ဝၢင်းၶႂၢင်းပၼ်သေၵမ်း ... ပပ်ႉဢၼ်ဢွၵ်ႇမႃး ဢၼ်လႂ်သေဢမ်ႇဝႃႈ တေဢၢၼ်းႁႂ်ႈပဵၼ် ဢၼ်ထုၵ်ႇၸႂ်ၶဵဝ်ၶဝ်ယူႇ ... လိၵ်ႈတီႈၶဵဝ်တႄႉ ... ဝၢင်းၶႂၢင်းပၼ်ၵွပ်ႈပႆႇပဵၼ်တွပ်ႇၼၼ်ႉသေၵမ်း ... ႁႂ်ႈၶဵဝ်လႄႈၽူႈလူလိၵ်ႈတင်းသဵင်ႈၵေႃႈ ယူႇလီမီးငိုၼ်းသေၵမ်း ။
( 14 ) ထၢမ် ။ ။ ၸၢႆးမွၼ်းၶိူဝ်းလႄႈၼၢင်းမူဝ်ၶၢဝ်ၼႆႉ မေႃႁၵ်ႉၵိုမ်းၵၼ်တႄႉယဝ်ႈၼေႃ ... မၢဝ်ႇတႆးလႄႈသၢဝ်တႆး ၸိူဝ်းဢၼ်ၵိုတ်းၼၼ်ႉၼႃႇ ? ၸွင်ႇတေမေႃႁၵ်ႉ ၸိူင်ႉၼင်ႇၼၼ်ႁိုဝ် ?
ၼမ်ႉၵတ်းယဵၼ် ၊ မိူင်းပဵင်း
တွပ်ႇ ။ ။ မၢဝ်ႇတႆးလႄႈသၢဝ်တႆး ဢၼ်မေႃႁၵ်ႉၵၼ်ၸိူင်ႉၼၼ်ၵေႃႈ မီးတင်းၼမ်ယူႇ ... ဢၼ်ဢမ်ႇမေႃႁၵ်ႉၵၼ်ၵေႃႈ တေမီးယူႇ ... ဢၼ်ၵႂႃႇမေႃႁၵ်ႉပိူၼ်ႈၼၼ်ႉၵေႃႈ တေမီးယူႇ ... တၢင်းႁၵ်ႉ ဢၼ်ဝႃႈၼၼ်ႉ ပေႃးမေႃႁၵ်ႉၵၼ်ၼႆ ၸၢင်ႈဢဝ်ၸိူဝ်ႉၶိူဝ်းၽႄႈတိူၼ်းၶိုၼ်ႈယႂ်ႇယဝ်ႉ ပေႃးဢမ်ႇမေႃႁၵ်ႉၵၼ်ၼႆႉ ၸၢင်ႈဢဝ်ၸိူဝ်ႉၶိူဝ်း ဝွတ်ႈဝၢႆးတူၵ်းတႅမ်ႇယဝ်ႉ ... ၵွပ်ႈၼၼ် မၢဝ်ႇသၢဝ်တႆး ႁႂ်ႈမေႃႁၵ်ႉၵၼ်သေၵမ်း ......
( 15 ) ထၢမ် ။ ။ ပပ်ႉဢၼ်ႁႅင်းသိူဝ်ၶႅင်ႁဝ်း ႁဵတ်းဢွၵ်ႇမႃးၼၼ်ႉ ၶႆႈၸႂ်တေႃႇၵူၼ်းၽၢၼ် ၽူႈႁၵ်ႉလိၵ်ႈၶဝ်သေ ယႃႇပေဢဝ်ၵႃႈၶၼ်မၼ်း ယႂ်ႇလႃႈၼႃႈ ?
ၸၢႆးယွတ်ႈၶိူဝ်း ၊ ၼွင်လႅင်
တွပ်ႇ ။ ။ သင်ပဵၼ်လႆႈတႄႉ ႁႅင်းသိူဝ်ၶႅင် ၶႂ်ႈတွၼ်ႈပၼ်လၢႆလၢႆၵွၼ်ႇဢိူဝ်ႈ ... ၵူၺ်းၵႃႈ ... ၵၢပ်ႈပၢၼ်ယၢမ်းလဵဝ် ၶၼ်ငိုၼ်းပဵၼ်ႁိုဝ်ဝႆႉၼႆ ဢွၼ်ၵၼ်ႁူႉယူႇလူး ... ၼင်ႇႁိုဝ်တေသၢင်ႇထုၵ်ႇ ၵူႈၽၢႆႇၼၼ်ႉ တေၶႆႈၸႂ်ပၼ်ယူႇၼႃႈ ......
( 16 ) ထၢမ် ။ ။ မိူဝ်ႈ 20.4.95 ၽွင်းႁႅင်းသိူဝ်ၶႅင် ႁွတ်ႈၼမ်ႉလၼ်ႈၼၼ်ႉ ၶႃႈႁဝ်း မႁႃႇဝၼ်းၶျၢႆး ႁၼ်ႁႅင်းသိူဝ်ၶႅင်သေ တေဢၢင်ႈလၢတ်ႈတေႃႇ တူင်ႉတၵ်ႉၵေႃႈ ဢမ်ႇႁတ်းသေ လွမ်ပႂ်ႉမွင်း ႁႅင်းသိူဝ်ၶႅင် လၢတ်ႈတေႃႇၶႃႈဢွၼ်တၢင်းယူႇဢေႃႈ ... ၸွင်ႇႁႅင်းသိူဝ်ၶႅင် မေႃတူင်ႉတၵ်ႉ လၢတ်ႈတေႃႇပိူၼ်ႈဢွၼ်တၢင်းယူႇၶႃႈႁိုဝ် ? ပေႃးဝႃႈ ၶႃႈၶဝ်ပၼ်ၸိုဝ်ႈၸိူင်းသေ လၢတ်ႈၼႄ လွင်ႈတၢင်းၸိူင်းၼႆၸိုင် ၸွင်ႇႁႅင်းသိူဝ်ၶႅင်ႁဝ်း တေတႅမ်ႈပဵၼ်လႆႈယူႇလႃႈႁိုဝ် ?
မႁႃႇဝၼ်းၶျၢႆး ၊ ၵႅပ်ႉၼိုင်ႈ မိူင်းၵွၵ်ႇ
တွပ်ႇ ။ ။ မႂ်ႇသုင် မႁႃဝၼ်းၶျၢႆး ... ၽွင်းမိူဝ်ႈႁႅင်းသိူဝ်ၶႅင် ႁွတ်ႈၼမ်ႉလၼ်ႈပွၵ်ႈၼၼ်ႉ ပဵၼ်ပွၵ်ႈဢွၼ်တၢင်းသုတ်းလႄႈ ႁႅင်းသိူဝ်ၶႅင် ဢမ်ႇပႆႇႁူႉၸၵ်းၽႂ်သေ တိုၵ်ႉၶဝ်ႈၸႂ် တၢင်းႁၢင်ႈလီ ဝဵင်းၼမ်ႉလၼ်ႈယူႇ ... “ လွင်ႈသိုပ်ႇမိုတ်ႈၵၼ်ၼၼ်ႉ ၽႂ်တၼ်းဢွၼ်တၢင်းၵေႃႈ မၼ်းၶႅမ်ႉသေ ၵေႃႉတူၵ်းလိုၼ်းၼၼ်ႉ ဢမ်ႇႁၢင်ႉယဝ်ႉ” ၵွပ်ႈၼႆ မိူဝ်းၼႃႈမႃး ... ၽႂ်ႁၼ်ၽႂ်ၵေႃႈ ႁႂ်ႈတၼ်းဢွၼ်တၢင်းတႃႉ ... ႁႅင်းသိူဝ်ၶႅင် မေႃမိုတ်ႈပိူၼ်ႈလိူဝ်သေပိူၼ်ႈယူႇၼႆ ယုမ်ႇလႃႈ ... ပေႃးမီး ၵေႃႉမႃးၶႆႈၼႄ လတ်ႈၼႄ လွင်ႈတၢင်းၸိူင်းၼႆ ပေႃးႁႅင်းသိူဝ်ၶႅင်လႆႈၸႂ်ယူႇ ၼႆတႄႉ တေၸၢင်ႈပဵၼ်ပပ်ႉလႆႈယူႇ ...
( 17 ) ထၢမ် ။ ။ ပေႃးဝႃႈ တႅမ်ႈပပ်ႉၸိူင်းထႅင်ႈၼႆၸိုင် တႅမ်ႈပႃး ၵူၼ်းၸိူဝ်း ဢၼ်ဢမ်ႇၶိုၼ်းၽႅဝ်လႆႈၸၼ်ႉၸွမ် မိူၼ်ၼင်ႇႁဝ်းၼႆႉ ဢမ်ႇပဵၼ်လႆႈၶႃႈႁႃႉ ... ?
ၼၢင်းသႅင်ႁၢၼ် ၊ ၵွင်းၶႃး ၊ လႃႈသဵဝ်ႈ
တွပ်ႇ ။ ။ ပေႃးဝႃႈ ... ၼၢင်းသႅင်ႁၢၼ် ၶႆႈၼႄလၢတ်ႈၼႄ လွင်ႈၼၢင်းသႅင်ႁၢၼ်ၼႆတႄႉ တေတႅမ်ႈလႆႈယူႇ ...
( 18 ) ထၢမ် ။ ။ ပပ်ႉၸိူင်းၼိုင်ႈပုၵ်ႈၼႆႉ လႆႈတႅမ်ႈလၢႆဝၼ်းၶႃႈ ? သမ်ႉႁဵတ်းႁိုဝ် ၶပ်ႉၶိုင်ၼႆ ၶႅၼ်းတေႃႈ သပ်းလႅင်းၼႄပၼ်သေၵမ်း ... ပေႃးၽႅဝ်လႃႈသဵဝ်ႈၼႆ မႃးဢႅဝ်ႇႁဝ်းလႄႈၼႃႈ ...
ၼၢင်းသႅင်ႁၢၼ် ၊ ၵွင်းၶႃး ၊ လႃႈသဵဝ်ႈ
တွပ်ႇ ။ ။ တႃႇတေတႅမ်ႈပဵၼ်လႆႈ ၸိူင်းၼိုင်ႈပုၵ်ႈၼႆႉ ဢမ်ႇၸၢင်ႈမၵ်းမၢႆဝၼ်းမၼ်း ... မၢင်ပုၵ်ႈၵေႃႈၽႂ်း မၢင်ပုၵ်ႈၵေႃႈၼၢၼ်းယဝ်ႉ ... လွင်ႈတႅမ်ႈၸိူင်းပဵၼ်ပပ်ႉၼၼ်ႉ ဢွၼ်တၢင်းၵေႃႈ ယၢမ်ႈလၢတ်ႈမႃးယဝ်ႉလႄႈ ၶိုၼ်းႁႃတူၺ်း ၼႂ်းပပ်ႉဢွၼ်တၢင်းၼၼ်ႉၽွင်ႈတႃႉ ... ပေႃးဝႃႈ မီးၵၢင်ၸႂ်ၶႂ်ႈတႅမ်ႈၼႆ ပိုတ်ႇပပ်ႉပဝ်ႇသေ ဢဝ်ၵမ်တႅမ်ႈ တႅမ်ႈၵႂႃႇၸွမ်းၼင်ႇ ဢၼ်ဝူၼ်ႉလႆႈၼၼ်ႉတိၵ်းတိၵ်းတႃႉ ... ပၢႆၵမ်တေၸၼ်မိုဝ်းၸဝ်ႈၵဝ်ႇသေ တေပဵၼ်မႃးၸွမ်း ၼင်ႇၵၢင်ၸႂ်ၶႂ်ႈတႅမ်ႈၼၼ်ႉယူႇ ... ၶွပ်ႈၸႂ်ၼိူဝ် လွင်ႈၽိတ်ႈမွၵ်ႇ ႁႂ်ႈမႃးဢႅဝ်ႇၼၼ်ႉယူႇ ...
( 19 ) ထၢမ် ။ ။ ႁႅင်းသိူဝ်ၶႅင် ၶႃႈ ... ၼႂ်းလုမ်ၽႃႉ ဢမ်ႇၼၼ် ၼႂ်းမိူင်းၼႂ်းဝဵင်းၵူႈတီႈတီႈ ၸိူဝ်းပဵၼ်ၽူႈယိင်းတႆး ဢၼ်မေႃႁၵ်ႉၸိူဝ်ႉၶိူဝ်းတႆးၽိင်ႈငႄႈတႆးလႄႈ လိၵ်ႈလၢႆးတႆး မေႃႁၵ်ႉမၢဝ်ႇၸၢႆးတႆး ႁဝ်းၶဝ်ၸိူဝ်းၼၼ်ႉ ၸွင်ႇႁႅင်းသိူဝ်ၶႅင်ႁဝ်း ၵႆႉလႆႈႁၼ်ယူႇၶႃႈႁိုဝ် ... ?
ၶိူဝ်းလႅင်း ၊ မိူင်းဝၼ်း - ဝဵင်းႁႆး
တွပ်ႇ ။ ။ ၽူႈယိင်းတႆး ၸိူဝ်းဢၼ်မေႃႁၵ်ႉၶိူဝ်းတႆး ၽိင်ႈငႄႈတႆးလိၵ်ႈလၢႆးတႆး မေႃႁၵ်ႉမၢဝ်ႇၸၢႆးတႆး တႄႉတႄႉဝႃႈဝႃႈၵေႃႈ ၵႆႉၵႆႉႁၼ်ယူႇ ... ဢၼ်မေႃႁၵ်ႉလိူဝ်လူၼ်ႉပူၼ်ႉၵႂႃႇၵေႃႈ ၵႆႉၵႆႉႁၼ်ယူႇ ...
( 20 ) ထၢမ် ။ ။ တီႈၼႂ်းၸိူင်းမွၵ်ႇလူင်ႇလဵဝ် ဢၼ်ပဵၼ်ၸိုဝ်ႈၵူၼ်းႁေႃၵႃး “ လုင်းထုၼ်း ” ၼႆၼၼ်ႉ မၼ်းပဵၼ်ၸိုဝ်ႈတႆးၶႃႈႁႃႉ ?
တွပ်ႇ ။ ။ ထုၼ်း ဢၼ်ဝႃႈၼၼ်ႉ တႆးႁဝ်း ဢဝ်ၸႂ်ႉတိုဝ်းၸွမ်းဝၼ်းထုၼ်း ဝၼ်းၼဝ်ႈ ၸိူဝ်းၼၼ်ႉယဝ်ႉ ... ဝၼ်းထုၼ်းၼႆႉ ပဵၼ်ဝၼ်းမီးသုၼ်ႇမီးမၢၼ် လိူဝ်သေတၢင်ႇဝၼ်း(The most lucky day of the month ) ၼႆယဝ်ႉ ... ၵွပ်ႈၼႆ “ ထုၼ်း ” ဢၼ်ဝႃႈၼၼ်ႉ ပွင်ႇဝႃႈ “ မီးသုၼ်ႇမီးမၢၼ် ” ၼႆလႄႈ ၼႂ်းမွၵ်ႇလူင်လဵဝ်ဝႃႈ ပဵၼ်ၸိုဝ်ႈတႆးယဝ်ႉ ...
( 21 ) ထၢမ် ။ ။ ႁႅင်းသိူဝ်ၶႅင် ဢမ်ႇဢွၵ်ႇၸႂ်ၶႂ်ႈၽုၺ်ႇ တိူၵ်ႈမႅၵ်ႉၵၸိၼ်းတႆး တီႈတႃႈၵုင်ႈၶႃႈႁႃႉ ? ၼႂ်းမႅၵ်ႉၵၸိၼ်းၼၼ်ႉ ပၢႆးယူႇလီ ဢပုမ်ႇ လိၵ်ႈႁွမ်တွမ် ဝွၵ်း ၵူႈမဵဝ်းမဵဝ်း ၸိူင်းပွတ်း လွင်ႈဝၢၼ်ႈမိူင်းၸိူဝ်းၼႆႉၵေႃႈ တေပႃးလႄႈ တေပဵၼ်ဢၼ်ထႅမ်ပၼ် တၢင်းႁူႉႁၼ်ပီႈၼွင်ႉတႆးႁဝ်းၶဝ် တႄႉတႄႉဢေႃႈ ...
သၢႆလႅင်းမိူင်း ၊ သႅၼ်ဝီ
တွပ်ႇ ။ ။ တႃႇတေႁဵတ်းပဵၼ် ပပ်ႉလိၵ်ႈတႆး ၵူႈမဵဝ်းမဵဝ်းၼၼ်ႉ ၵူၺ်းၵႃႈ မၢင်မဵဝ်းၼႆႉ ၵွပ်ႈပိူဝ်ႈသၢႆငၢႆၵူႈလွင်ႈလွင်ႈလႄႈ လႆႈယွၼ်ႇၸႂ်ဝႆႉယဝ်ႉ ... တႃႇတေပဵၼ် တိူၵ်ႈမႅၵ်ႉၵၸိၼ်းတႆးလႆႈၼၼ်ႉ သင်ဝႃႈႁဝ်းမီး “ ၸူမ်းၽူႈတႅမ်ႈလိၵ်ႈ ” ၼႆၸိုင် တေဢမ်ႇယၢပ်ႇ
( 22 ) ထၢမ် ။ ။ ပေႃး ႁႅင်းသိူဝ်ၶႅင်ႁဝ်း တႅမ်ႈပပ်ႉမႂ်ႇထႅင်ႈၼႆ ပေႃးတႅမ်ႈပႃးဝၢၼ်ႈၼွၵ်ႈၼႃးပၢင်ႇ လွင်ႈၸွမ်းႁူၺ်ႈၸွမ်းလွႆၸွမ်းထိူၼ်ၸွမ်းၶိူဝ်း ၸိူဝ်းၼႆႉ ၸွင်ႇတေလႆႈလႃႈႁိုဝ် ?
ၸၢႆးသၼ်သုင် ၊ ထုင်ႉလွႆသွမ်ႇ ၊ မိူင်းတႆးပွတ်းႁွင်ႇ
တွပ်ႇ ။ ။ ၼင်ႇႁိုဝ် တေပဵၼ်လႆႈ ၼင်ႇၵၢင်ၸႂ်ၽူႈလူလိၵ်ႈၼၼ်ႉ တေၶတ်းၸႂ်ယူႇ ... ႁႅင်းသိူဝ်ၶႅင်ၵေႃႈ တေလုၵ်ႉၼႂ်းဝဵင်းသေ ၸမ်ၶိုၼ်းလႆႈမိူဝ်း မိူင်းထိူၼ်မိူင်းႁူၺ်ႈမိူင်းလွႆ ၼင်ႇၵဝ်ႇယဝ်ႉ ... ...
( 23 ) ထၢမ် ။ ။ ၸွမ်းၼင်ႇ ၸိုဝ်ႈႁႅင်းသိူဝ်ၶႅင်ၼၼ်ႉ ပေႃးၵပ်းၵၢႆႇလူၺ်ႈတၢင်းႁၵ်ႉၼႆႉ ႁူဝ်ၸႂ်ႁႅင်းသိူဝ်ၶႅင်ႁဝ်း ၸွင်ႇတေၶႅင်လႆႈယူႇၶႃႈႁိုဝ် ?
ယိင်းၵွၼ်ၶွင်ႇ ၊ ဝဵင်းသဵဝ်ႈၶမ်း
တွပ်ႇ ။ ။ ပေႃးမီးၶေႃႈထၢမ်ၵေႃႈ တေႃႈတေလႆႈတွပ်ႇဢိူဝ်ႈၼေႃႈ ၽႂ်ၵေႃႈတေႃႈဢမ်ႇလိူဝ်ႇလႆႈ တၢင်းႁၵ်ႉလႄႈ ပေႃးၵပ်းၵၢႆႇတၢင်းႁၵ်ႉၼႆႉ ႁူဝ်ၸႂ်ႁႅင်းသိူဝ်ၶႅင်တႄႉ ၽၢၵ်ႇၼိုင်ႈ တေဢူၼ်ႈၼႃႇသေဢူၼ်ႈ ၽၢၵ်ႇၼိုင်ႈသမ်ႉ တေၶႅင်ၼႃႇသေၶႅင်ႇယူႇ ...
( 24 ) ထၢမ် ။ ။ ယွတ်ႈၽၵ်းၵုတ်ႇၼႆႉ ပိၵ်ႉသမ်ႉဝႃႈ မၼ်းၵူတ်ႉငေႃးသေတႃႉ ပေႃးၸေႃးၵိၼ်ၼႆ ပိူၼ်ႈၵျိူၵ်ႈပိူၼ်ႈထုၵ်ႇၸႂ်သေဝႃႈ - “ ၽၵ်းၵုတ်ႇၸေႃး ၽၵ်ႇၵုတ်ႇဢုပ်ႉၼႆႉ ဝၢၼ်ၵျႃႉ ... ” ၼႆယဝ်ႉ ... ၵူၺ်းၵႃႈ ပေႃးဝႃႈ ၸႂ်ၵူၼ်းၵူတ်ႉငေႃးၼႆ ၵွပ်ႈသင် ပိူၼ်ႈဢမ်ႇၵျိူၵ်ႈ ဢမ်ႇထုၵ်ႇၸႂ်ၼႆ မေႃတႅမ်ႈလိၵ်ႈႁဝ်း သပ်းလႅင်းပၼ်သေၵမ်းၶႃႈ
ၸၢႆးပႅင်းၶိူဝ်း ၊ ဝၢၼ်ႈသူပ်းႁူၺ်ႈ ၊ မိူင်းပၢၼ်ႇ
တွပ်ႇ ။ ။ ၽၵ်းၵုတ်ႇငေႃး ၽၵ်းၵုတ်ႇၸေႃး ၽၵ်းၵုတ်ႇဢုပ်ႉၼႆႉ ႁဵတ်းပၼ်ၽွၼ်းလီ မေႃၸွႆႈထႅမ်ပၼ် ၵၢင်ၸႂ် ၵူၼ်းၶႂ်ႈၵိၼ်မၼ်း ႁႂ်ႈတဵမ်ထူၼ်ႈဝၢၼ်ၸႂ်ထုၵ်ႇသူပ်းလႄႈ ပိူၼ်ႈၸင်ႇၵျိူၵ်ႈၸႂ်ထုၵ်ႇၸႂ်ယဝ်ႉ ၸႂ်ၵူတ်ႉၸႂ်ငေႃးၵူၼ်းႁဝ်းၼၼ်ႉ မၼ်းဢမ်ႇႁဵတ်းပၼ်ၽွၼ်းလီပိူၼ်ႈလႄႈ ပိူၼ်ႈၸင်ႇဢမ်ႇၵျိူၵ်ႈ ဢမ်ႇထုၵ်ႇၸႂ်ယဝ်ႉ ...
( 25 ) ထၢမ် ။ ။ ပီႈၸၢႆးႁႅင်းၶႅင်ၶႃႈ ... ပေႃးလိူၼ်သီႇ ပီၼႃႈမႃး ၼွင်ႉယိင်းၶဝ် တေဢၢၼ်းၽႅဝ်တႃႈၵုင်ႈ တႃႇဢႅဝ်ႇဝႆႈၽြႃးၼႆလႄႈ ... ပေႃးမႃးၽႅဝ်ထိုင် တီႈမွၵ်ႇၵူႇသွႆႈလႅင် ဝၢၼ်ႈတႆးၵဝ်ႈလၵ်းၼႆ ၸွင်ႇတေၸၢင်ႈတူပ်း တင်းပီႈၸၢႆးၶႃႈႁိုဝ် ... ? ၊ ပေႃးယိင်းၶဝ်သႂ်ႇၸႂ်မႃးလႄႇ မႃးထူပ်းၼႆ ယႃႇပေပၢႆႈပႅတ်ႈၶႃႈၼႃႈ ...
ယိင်း ( ႁွင်ႉ ) ႁွမ်ၽူၺ်း
တွပ်ႇ ။ ။ ဢဝ်သိူဝ်တူၵ်းႁၢႆပႅတ်ႈတီႈလႂ်လႃႇၼႆႉ ... “ ႁႅင်းသိူဝ်ၶႅင် ” ၼႆလေႃႇ ... လိူၼ်သီႇပီၼႃႈမႃး ႁႅင်းသိူဝ်ၶႅင်သမ်ႉ ဢၢင်ႈမိူဝ်းဢႅဝ်ႇ တီႈယိင်း ( ႁွင်ႉ ) ႁွမ်ၽူၺ်းၶဝ်ၼႆဢိူဝ်ႈ ယူဝ်ၵၢတ်ႈၵၼ် ၸွမ်းတၢင်းယူဝ်ႉ ...
ထိုင်
ႁႅင်းသိူဝ်ၶႅင် တၢင်ႉယၢၼ်း မၢႆဝၼ်း 26.12.95
ႁဝ်းမႃးလႆႈလူမႅၼ်ႈပပ်ႉၸိူင်းတႆးၵူႈပပ်ႉလႄႈ ပဵၼ်ဢၼ်ႁၢၼ်ႉၸႂ်ၸွမ်းတႄႉတႄႉၶႃႈ ယွၼ်ႉပိူဝ်ႈ ဢမ်တွၼ်ႉလႆႈႁၼ်သေ ဢွၵ်ႇမႃးသိုဝ်ႈၼႃႈတၼ်းတႃ ၼင်ႇႁိုဝ် ၵူၼ်းမိူင်းႁဝ်းၶႃႈ ပေႃးတေၶိုၼ်ႈယႂ်ႇၼၼ်ႉ ပၢႆၵမ်ႁႅင်းသိူဝ်ၶႅင်ႁဝ်းၶႃႈ တိုၼ်ႉၸၼ်သေ ၶိုၼ်ႈယႂ်ႇမႃးလွႆးလွႆးယဝ်ႉ ၵူၼ်းမိူင်းႁဝ်းၶႃႈၼႆႉ ယွၼ်ႉပိူဝ်ႈ ၸိူင်းတႆးဢွၵ်ႇမႃးၼမ်တိၵ်းတိၵ်းလႄႈ ၵူၼ်းၶတ်းၸႂ် သွၼ်လိၵ်ႈတႆး မီးဝႆႉၼမ်တႄႉတႄႉဢေႃႈ ယွင်ႈယေႃးပၢႆၵမ်သေ ႁႂ်ႈၸိူင်းတႆး ဢွၵ်ႇမႃးၶၼ်ၶၼ်ဝႆးဝႆးသေၵမ်းၶႃႈ
ၵေႃႉႁတ်းႁၢၼ်ပုၼ်ႈတႆး ၵေႃႉပိုင်းၽႆးၵႂႃႇၼႃႈ
သွၼ်ႇဝႃႈႁႅင်းသိူဝ်ၶႅင် တႃႇၼႅင်ၸႂ်ပုၼ်ႈတႆး
ဢမ်ႇငိၼ်းဝႆးသေပွၵ်ႈ ပပ်ႉၸိူင်းတႆးၽႄႈဢွၵ်ႇ
မွၵ်ႇပၼ်ၸၢႆးယိင်းတႆး ၶႆႈႁဵတ်းလၢႆးႁိပ်ႈၼႅတ်ႈ
ပႅတ်ႈၵၢၼ်ၼႅတ်ႈသွၼ်ဢၢၼ်ႇ လႆႈတၢၼ်ႇတၢၼ်ႇၸူမ်းတူၺ်း
ယူၺ်းၸိူင်းတႆးဢမ်ႇၽႃႈ ယုမ်ႇယမ်ဝႃႈ ၸိူင်းတႆးတေႁိူင်းဝႆးယူႇၶႃႈဢေႃႈ
ယိင်းၼွင်ႉၼွင်ႉ ( မိူင်းမိတ်ႈ )ဢ/သ
ယိင်းၶတ်းၸႂ်တူၺ်း ၸွင်ႇတေပဵၼ်ဝွၵ်းၼႆ ယႃႇပေသေႉၼႄးၶႃႈ
ထိုင် 20.11.93
ၼပ်ႉယမ်ထိုင် ၽူႈတႅမ်ႈလိၵ်ႈႁႅင်းသိူဝ်ၶႅင် တၢင်ႉယၢၼ်း
ၼၢင်းၼႆႉပဵၼ် ၼၢင်းယိင်းၵေႃႉဢၼ်ပၼ်ႁႅင်း ႁႅင်းသိူဝ်ၶႅင်ယူႇတႃႇသေႇဢေႃႈ ၼၢင်းလႆႈလူမႅၼ်ႈ (1) တၢင်းႁၵ်ႉၼူၵ်ႉဢွၼ်ႇ (2) တၢင်းႁၵ်ႉမၢင်ႇၵႅမ်ႈၶွင်ႇ (3) မွၵ်ႇလူင်ႇလဵဝ်ၼၼ်ႉဢေႃႈ ၼၢင်းလႆႈၸႂ်တႄႉတႄႉဢေႃႈ တႄႇဝႃႈ မွၵ်ႇၵွၼ်တေမွၵ်ႇၼႄယူႇၼၼ်ႉတႄႉ ၼၢင်းဢမ်ႇႁၼ်မႅၼ်ႈလႄႈ ၼၢင်းဢမ်ႇလႆႈလူၶႃႈ ပေႃးတီႈႁႅင်းသိူဝ်ၶႅင် မီးပပ်ႉမၼ်းၼႆၵေႃႈ သူင်ႇပၼ်ၼၢင်းၽွင်ႈ ၼၢင်းတေပၼ်ၵႃႈၶၼ်မၼ်းယူႇ ပေႃးဝႃႈ ႁႅင်းသိူဝ်ၶႅင် မီးၸႂ်ပၼ်လၢႆ ၼၢင်းၵေႃႈလႆႈယူႇၶႃႈ ႁႂ်ႈပဵၼ်တီႈမၢႆတွင်းၼႆၵေႃႈ လႆႈယူႇဢေႃႈ
ၼင်ႇႁိုဝ်ၸိူဝ်ႉၶိူဝ်းၽိင်ႈငႄႈလိၵ်ႈလၢႆးႁဝ်းဢမ်ႇႁၢႆ လုၵ်ႈတႆးႁဝ်းတင်းသဵင်ႈ ပေႃးတေမီးတၢင်းႁူႉတၢင်းႁၼ်ၼၼ်ႉ ႁႅင်းသိူဝ်ၶႅင်ႁဝ်း ပိုတ်ႇၽုၺ်ႇပၼ်မၢၵ်ႇတႃသေ ဢမ်ႇၵႃး ပိုတ်ႇၽုၺ်ႇပၼ် မၢၵ်ႇတႃပီႈၼွင်ႉတႆးႁဝ်းတၢင်းသဵင်ႈလႄႈ ၼၢင်းယွင်ႈယေႃး ပၢႆၵမ်ယူႇတႃႇသေႇဢေႃႈ ၼၢင်းၼၢင်းၵေႃႈ ၼင်ႇႁိုဝ် တေပဵၼ်ၽူႈတႅမ်ႈလိၵ်ႈ မိူၼ်ႁႅင်းသိူဝ်ၶႅင်ၼၼ်ႉ ၼၢင်းတေၶတ်းၸႂ်ၵႂႃႇယူႇၶႃႈဢေႃႈ။ တႄႇဝႃႈ ၼၢင်းတႄႉ ဢမ်ႇပေႃးမေႃတႅမ်ႈလႄႈ မႅၼ်ႈဢမ်ႇၶႅမ်ႉလႄႈ ၼၢင်းတႅမ်ႈဝႆႉ ၼႂ်းပပ်ႉၸိူဝ်းၼၼ်ႉၵွႆးၶႃႈဢေႃႈ
ႁႂ်ႈႁႅင်းသိူဝ်ၶႅင်ၵတ်းယဵၼ်ၸႂ်သေၵမ်းၶႃႈ
ပေႃးၼၢင်းတႅမ်ႈၽိတ်းၵေႃႈၶႂၢင်းပၼ်ၼၢင်းၽွင်ႈၶႃႈ
ၼၢင်းဝၢၼ်ႈၼွၵ်ႈ (ၵဵင်းတုင် )
ထိုင်
ၽူႈတႅမ်ႈလိၵ်ႈ ႁႅင်းသိူဝ်ၶႅင်
ပႅင်ႈၼင်ႇၽူႈတႅမ်ႈလိၵ်ႈ မီးတၢင်းၶတ်းၸႂ်သေ တႅမ်ႈဢွၵ်ႇမႃး ၊ 1. တၢင်းႁၵ်ႉမၢၵ်ႇၵႅမ်ႈၶွင်ႇ 2. တၢင်းႁၵ်ႉၼူၵ်ႉသႅဝ်းဢွၼ်ႇ 3. မွၵ်ႇၵွၼ်တေမွၵ်ႇၼေႇယူႇ 4. မွၵ်ႇလူင်ႇလဵဝ် ပပ်ႉသၢမ်သီႇပပ်ႉၼႆႉ ၶႃႈလႆႈလူႁၼ် မႅၼ်ႈၸႂ်ယူႇၵူႈပပ်ႉဢေႃႈ ။ ဢၼ်မႅၼ်ႈၸႂ် ( လႆႈၸႂ် )သေပိူၼ်ႈတႄႉ ပဵၼ်ပပ်ႉ“ တၢင်းႁၵ်ႉၼူၵ်ႉသႅဝ်းဢွၼ်ႇ ” ၼၼ်ႉဢေႃႈ။ ႁဵတ်းသင်လႄႈ လႆႈၸႂ်ၼႆ လွင်ႈမၼ်း ယုၵ်ႉယွင်ႈ ဢဝ်ၵုင်ႇလိၵ်းတႆးၵေႃႈပိူင်ၼိုင်ႈ ၶၢဝ်းတၢင်းသွင်ပီလိူဝ်လႆႈမႃး ၶဝ်ၸုမ်းတႃႇပိူင်းသၢႆလႅင်း ၸေႈတွၼ်ႈၼွင်ၶဵဝ်သေ ပဵၼ်ဢၼ်လႆႈၸႂ် မႅၼ်ႈၸႂ်ထုၵ်ႇၸႂ်တႄႉတႄႉဢေႃႈ။
ပပ်ႉမွၵ်ႇလူင်ႇလဵဝ်ၼႆႉ ၶႃႈလႆႈလူမႅၼ်ႈ ( 14.0.95 ) ၼႃႈလိၵ်ႈ 189 ထႅဝ် 19/20 ၼၼ်ႉဝႃႈ “(ၼၢင်းၸၢမ်သႅင်း)လႄႈ မူဝ်ၼႆႉယဝ်ႉ၊ ပိူၼ်ႈတဵၵ်းဝႃႈ ၸၢမ်သႅင်း တေၸႂ်လမ်ယူႇၼႃႈ ” ၶႄးၽူႈၶပ်ႉလိၵ်ႈၶဝ် ၶပ်ႉၽိတ်းယူႇၼႆဢေႃႈ။ တီႈမၢႆၶွပ်ႇ ( ) ၼၼ်ႉတေပဵၼ် “ ပီႈၸၢႆးၶိူဝ်းလႄႈမူဝ် ၼႆႉယဝ်ႉ ပိူၼ်ႈတဵၵ်းဝႃႇ ၸမ်သႅင်ႊတေၸႂ်လမ်ယူႇၼႃႈ ” ၼႆၶႃႈယူဝ်ႉၼေႃႈ
သမ်ႉထႅင်ႈလိၵ်ႈဝွၵ်း ဢၼ်ၽူႈတႅမ်ႈလိၵ်ႈ ပိုၼ်ၶၢဝ်ႇမႃး ၼႂ်းပပ်ႉမွၵ်ႇလူင်ႇလဵဝ်ၼၼ်ႉ ၶႃႈၼွင်ႉၸၢႆးမုင်ႈမွင်းၸဵမ်လႂ်ဢေႃႈ ။
ၸၢႆးသႅင်ၼုမ်ႇၶိူဝ်း ( ၵုၼ်ႁဵင် )
ထိုင် 26.8.96
တီႈမေႃတႅမ်ႈလိၵ်ႈ ႁႅင်းသိူဝ်ၶႅင်သေၵမ်း
ၶႃႈယွၼ်းသူးပၼ် ႁႂ်ႈမေႃတႅမ်ႈလိၵ်ႈႁဝ်း ယူႇလီသုင်းဝၢၼ်သေဢမ်ႇၵႃး ၸွမ်ႈၼင်ႇ ၵၢင်ၸႂ်မေႃတႅမ်ႈ လိၵ်ႈႁဝ်း ဢဵၼ်းဢၢၼ်းဝႆႉၼၼ်ႉ တဵမ်ထူၼ်ႈသေ ႁႂ်ႈတႅမ်ႈဢွၵ်ႇပၼ်လႆႈ ပပ်ႉၸိူင်းၼမ်ၼမ် သေၵမ်းၼႆယဝ်ႉ ။
ၵေႃႉတႅမ်ႈလိၵ်ႈသူင်ႇထိုင် မေႃတႅမ်ႈလိၵ်ႈႁဝ်းယူႇယၢမ်းၼႆႉတႄႉ ပဵၼ်ယိင်းတႆးထုင်ႉလိၼ်ပဵင်း ယိင်းၸၢမ်ၶမ်းႁွမ်ဢေႃႈ ယိင်းတႅမ်ႈလိၵ်ႈ သူင်ႇထိုင်ႁႅင်းသိူဝ်ၶႅင်ႁဝ်းၼႆႉ ပဵၼ်ပွၵ်ႈၵမ်းသွင်ယဝ်ႉ ယိင်းပႂ်ႉမွင်းထွမ် ၶေႃႈၵႂၢမ်းမေႃတႅမ်ႈလိၵ်ႈ ပွင်ႇၶၢဝ်ႇမႃးၶိုၼ်းယူႇဢေႃႈ။ လိၵ်ႈဢၼ်ယိင်းတႅမ်ႈ သူင်ႇမႃး ပွၵ်ႈၵမ်းဢွၼ်တၢင်းၼၼ်ႉ ဢမ်ႇႁွတ်ႈထိုင် တီႈႁႅင်းသိူဝ်ၶႅင်ႁဝ်းႁိုဝ် ပေႃးဝႃႈ လိၵ်ႈယိင်းႁွတ်ႈထိုင်တီႈ မေႃတႅမ်ႈလိၵ်ႈႁဝ်းယူႇသေ ဢမ်ႇတွပ်ႇမႃးၶိုၼ်း ပေႃးၼႆတႄႉ တေၼပ်ႉဝႆႉ မေႃတႅမ်ႈလိၵ်ႈႁဝ်းၼႆႉ ႁူဝ်ၸႂ်ယႂ်ႇၼႃႇၼႆယဝ်ႉ ပဵၼ်ႁိုဝ်ၵေႃႈယႃႇ ပေႃးယိင်း လႆႈလူႁၼ် လိၵ်ႈဢၼ်မေႃတႅမ်ႈလိၵ်ႈႁဝ်း တႅမ်ႈလိၵ်ႈမႃးၼၼ်ႉပေႃးၼႆ တူဝ်ၼိုင်ႈသွင်တူဝ်ၵူၺ်းၵေႃႈ ယိင်းႁၢၼ်ႉၸႂ်ပဵင်းၸႂ်လႆႈယူႇ ၶႅၼ်းတေႃႈ ပွင်ႇလႅင်းမႃးၶိုၼ်းသေၵမ်း တေပႂ်ႉမုင်ႈမွင်းယူႇ ၸူဝ်ႈၶၢဝ်းယၢမ်းဢၼ်သုတ်းၼႆသေ ယိင်းလိုဝ်ႈတီႈၼႆႈၵွၼ်ႇ။
ယိင်းၵေႃႈ ၶႆႈပဵၼ်ၽူႈတႅမ်ႈလိၵ်ႈၸိူင်ႉၼင်ႇ ႁႅင်းသိူဝ်ၶႅင်ၵူၺ်းယဝ်ႉ
( ၵေႃႉတေပႂ်ႉမုင်ႈမွင်းဝၼ်းယိုၼ်းယၢဝ်း ထုင်ႉလိၼ်ပဵင်း )
ယိင်းၸၢမ်ၶမ်းႁွမ် ( ဝၢၼ်ႈၸဵတ်းလၵ်း )
ထိုင် /
မေႃတႅမ်ႈလိၵ်ႈ
ႁႅင်းသိူဝ်ၶႅင် သေၵမ်းဢေႃႈ
ဢွၼ်တၢင်းသုတ်း ၼပ်ႉယမ်ထိုင် မေႃတႅမ်ႈလိၵ်ႈတႄႉတႄႉဢေႃႈ ၶႃႈၵေႃႈ ယွၼ်ႉဝႃႈလႆႈလူမႅၼ်ႈ ၸိူင်းတႆး ၸိူင်းဢၼ်ပူၼ်ႉမႃး တင်းၼမ်ဢေႃႈ မီးတၢင်းႁၢၼ်ႉၸႂ်ၸူမ်းသိူဝ်းတႄႉဢေႃႈ မိူဝ်ႈဢၼ်သမ်ႉၶိုၼ်းလႆႈလူမႅၼ်ႈ ၸိူင်းမွၵ်ႇလူင်ႇလဵဝ်ၼႆ သမ်ႉၶႅၼ်းမီးတၢင်းႁၢၼ်ႉၸႂ် ဢဝ်ၵုင်ႇဢဝ်မုၼ် ၼိူဝ်ၼၼ်ႉတႄႉတႄႉဢေႃႈ ။
ၵွပ်ႈဝႃႈ ၼင်ႇႁိုဝ် ပပ်ႉတႆးႁဝ်း သမ်ႉပေႃးတေ ၶိုၼ်ႈယႂ်ႇၶိုတ်းၵၢပ်ႈပၢၼ်မႂ်ႇ ယၢမ်းလဵဝ်မိူဝ်းၼႃႈၼႆ ပေႃးၶၢဝ်းယၢမ်းမီးၸိုင် ၶႅၼ်းတေႃႈ ဝူၼ်ႉၶိုင်တႅမ်ႈဢွၵ်ႇထႅင်ႈ ယႂ်ႇၼမ်သေၵမ်းၼႆ ၶႃႈၵေႃႈ မီးတၢင်းၼပ်ႉယမ်ထိုင် မေႃတႅမ်ႈလိၵ်ႈတႄႉတႄႉဢေႃႈ ။
ၸွမ်းၼင်ႇ ဝွၵ်းၶႃႈတႅမ်ႈမႃးၼႆႉ သင်ၸိူဝ်ႉဝႃႈ မီးတီႈၽိတ်းပိူင်ႈ တီႈၵိူင်းႁိူင်ႈၸိုင် ပွင်ၶိုင်ယႃႇၼႄး ၶႅၼ်းတေႃႈ သမ်ႉၶိုၼ်းမူၼ်ႉမႄးပၼ် ယႂ်ႇၼမ်သေၵမ်း ။
ၵမ်းလိုၼ်းသုတ်းၵေႃႈ ၼပ်ႉယမ်ထိုင် မေႃတႅမ်ႈလိၵ်ႈသေ ႁႂ်ႈလႆႈၶိုၼ်ႈယႂ်ႇမႂ်ႇသုင် တူဝ်ၸႂ်ၵတ်းယဵၼ် တင်းသွင်သေၵမ်းဢေႃႈ ။
ၸၢႆးၺၢၼ်လႅင်း (ၼႉ ၽ ထုင်ႉမၢဝ်း )
