ၶႅၵ်ႇ/တွၼ်ႈႁႃႈ
ဝၼ်းယဝ်ႉ လိူၼ်
လိူၼ်ယဝ်ႉ ပီ
ၶၢႆႉၼီလႅၵ်ႈလၢႆႈ ပူၼ်ႉၵႂႃႇ ဢမ်ႇၵိုတ်းဢမ်ႇလိုဝ်ႈယူႇ ။
ၼႂ်းၶူင်းၵၢင်လူင်ၼႆႉ ဢၼ်လႅၵ်ႈလၢႆႈၼၼ်ႉမၼ်းတိုၼ်းလႅၵ်ႈလၢႆႈယူႇ တႃႇသေႇယဝ်ႉ ။ ၼင်ႇႁိုဝ် ၸၢႆးၼွင်ႉ တေယႂ်ႇမႃႈၵႃႈသုင်သေ ပေႉတူဝ်ၼၼ်ႉ ၼၢႆးမူၼ်းၵိၼ်ႉမၢင်ႉၶတ်းၸႂ်လုမ်းလႃးမႃး တေႃႇၸၢႆးၼွင်ႉ ပေႃးယႂ်ႇယဝ်ႉ ။
ယၢမ်းလဵဝ် ၸၢႆးၼွင်ႉလႅၵ်ႈလၢႆႈသေ သမ်ႉပေႃးၶိုၼ်းမေႃလုမ်းလႃး ၼၢႆးၶဝ်ယူႇယဝ်ႉ။ မၼ်းၸၢႆးတဵၵ်းၼမ်ႉသႂ်ႇပၼ် ၼႂ်းပုင်းလူင်တဵမ်တဵမ်ယဝ်ႉသေ ၵႂႃႇမိူဝ်းၸူးၼၢႆးၶဝ် တီႈၼိူဝ်ႁိူၼ်းယဝ်ႉ -
“ ၼၢႆး ... ၸၢႆးတဵၵ်းၼမ်ႉဝႆႉယဝ်ႉ ... ၼၢႆးႁဝ်းၶႂ်ႈၵႂႃႇဢၢပ်ႇၵေႃႈ လႆႈယဝ်ႉ ... ဢေႃႈ ... ...”
“ ဢိူဝ်ႈ ... ဢိူဝ်ႈ ... ၵုသူဝ်ႇယႂ်ႇယဝ်ႉ လၢၼ်ဢိူၺ်း ... မေႃလူႁၼ်လုမ်းလႃး ပႂ်ႉပႃးပီႈၼွင်ႉၸိူဝ်ႉၶိူဝ်းၼႆႉ ပဵၼ်မင်ႇၵလႃႇလီ ပိူင်ၼိုင်ႈၼႆ ၽြႃးႁေႃးဝႆႉယူႇလူး ... ... ”
“ ၼင်ႇႁိုဝ် ၸၢႆးတေၵေႃႉယႂ်ႇလၵ်းလႅမ်ၼၼ်ႉ ၼၢႆးႁဝ်းလုမ်းလႃးမႃးယဝ်ႉၼႃႇ ... ၵမ်းၼႆႉ ... ၸၢႆးသမ်ႉ လူဝ်ႇၶိုၼ်းလုမ်းလႃး ၼၢႆးႁဝ်းဢေႃႈ ... ”
“ ဢိူဝ်ႈ ... ပေႃးလၢၼ် မေႃႁူႉထိုင်ၸိူင်ႉၼႆ ၼၢႆးၵေႃႈ ၸူမ်းပေႃးဢမ်ႇသုတ်းဢမ်ႇသဵင်ႈလႆႈယဝ်ႉ ... ၼၢႆးတေၵႂႃႇဢၢပ်ႇၼမ်ႉၵွၼ်ႇ... ”
ၸၢႆးၼွင်ႉၵေႃႈ ၶိုၼ်းမႃးတဵၵ်းၼမ်ႉသႂ်ႇၼႂ်းပုင်းငူင်းသေ ႁူတ်းမွၵ်ႇႁူတ်းသူၼ် ဢၼ်မၼ်းၽုၵ်ႇဝႆႉၼၼ်ႉယူႇ၊ ယွၼ်ႉပိူၼ်ႈ ၵႆႉႁူတ်းသူၼ် ၵႆႉၽႃႇၽိုၼ်းၵႆႉယွင်ႈၼၵ်းလႄႈ တူဝ်ၶိင်းၸၢႆးၼွင်ႉၵေႃႈ မၢၵ်ႈလီႁႅင်းလီတႄႉတႄႉ ၊ မၼ်းၸၢႆးၵေႃႉယႂ်ႇ ပဵၼ်ပၢၼ်မၢဝ်ႇဢွၼ်ႇ မႃးသေတႃႉ ၵၢၼ်ၼႃႈႁိူၼ်းတႃယေး ဢိၵ်ႇၸဵမ် လွင်ႈမိုဝ်ႉလွင်ႈႁုင် မၼ်းပေႉတူဝ်ပွင်ပဵၼ် လႆႈသဵင်ႈသဵင်ႈယူႇယဝ်ႉ။
ယွၼ်ႉပိူဝ်ႈ ပၢႆးမၢၵ်ႈမီးဢမ်ႇတဵမ်ထူၼ်ႈလႄႈ လႆႈယူႇႁူင်းႁဵၼ်းသွၼ်ဢဝ်လိၵ်ႈ မူၼ်ႈၸႂ်ယူႇသေတႃႉ ဝၢႆးသေဢွင်ႇပူၼ်ႉ ၸၼ်ႉပႅတ်ႇယဝ်ႉ ၸၢႆးၼွင်ႉ ဢမ်ႇၸၢင်ႈသိုပ်ႇၶိုၼ်ႈႁူင်းႁဵၼ်းထႅင်ႈယဝ်ႉ။ ယၢမ်းလဵဝ် တီႈႁိူၼ်းၶဝ်ယူႇၼႆႉ လုၵ်ႈယိင်းလုၵ်ႈၸၢႆး ၼၢႆးဢွၼ်ႇၶဝ်ၵေႃႈ ပဵၼ်ၼႃႈႁေႃတေႃႁိူၼ်းဢွၵ်ႇၵႂႃႇ ယူႇႁိူၼ်းၽႂ်ႁိူၼ်းမၼ်းယဝ်ႉလႄႈ ဢၼ်ပဵၼ်ၵူၼ်းၼုမ်ႇ ၵူၺ်းၵိုတ်းၸၢႆးၼွင်ႉၵေႃႉလဵဝ်ၵူၺ်း။
ၵၢၼ်ၼႃႈႁိူၼ်းလင်ၼႆႉ မၼ်းၸၢႆး လႆႈတူၺ်းထိုင်ၸွႆႈထႅမ်ပၼ်ယဝ်ႉ ၊ လိၼ်ၼႂ်းဝၢင်းႁိူၼ်းၶဝ် ဢၼ်လိူဝ်ဝႆႉၸိူဝ်းၼၼ်ႉ မၼ်းၸၢႆးမႄးဝဵၵ်ႉမႄးၸွၼ်ႉသေ ၽုၵ်ႇမွၵ်ႇၽုၵ်ႇၽၵ်းသဵင်ႈသဵင်ႈယဝ်ႉ။
မႃႉလေႃႉ တီႈႁိူၼ်းၶဝ်ၼၼ်ႉၵေႃႈ ဢဝ်ၶၢတ်ႈပၼ်ပိူၼ်ႈႁေႃႈဝႆႉသေတႃႉ ပေႃးဝႃႈ လူဝ်ႇၵႂႃႇဝဵင်းၼႆတႄႉ ၸၢႆးၼွင်ႉၵေႃႉႁေႃႈၵႂႃႇယဝ်ႉ။
မၢင်ပွၵ်ႈၵေႃႈ တေႃႉတၢင်ႇၽၵ်းယိူဝ်ႈၼၢင်းၶဵဝ် ၵႂႃႇၶၢႆၵၢတ်ႇဢွၼ်ႇၺၢၼ်ႇတေႃး တီႈမေႇမဵဝ်ႉ ၊ မၢင်ပွၵ်ႈၵေႃႈ တၢင်ႇမွၵ်ႇၵႂႃႇၶၢႆ ၊ မၢင်ပွၵ်ႈၵေႃႈ ၵိၼ်ၸၢင်ႈသူင်ႇပိူၼ်ႈ ႁဵတ်းၼႆသေ ငိုၼ်းဢၼ်ႁႃလႆႈမႃးၼၼ်ႉ မၼ်းဢဝ်ဢၢပ်ႈပၼ်ၼၢႆးၶဝ်သဵင်ႈသဵင်ႈယဝ်ႉ။
မၢင်ဝၼ်းမၢင်ဝၼ်းၼႆႉ မၼ်းၵူၺ်းၵုမ်ႇမူတ်းၶၢဝ်းယၢမ်းၸွမ်း သူၼ်မွၵ်ႇၼၢင်းသီ (မွၵ်ႇၵၢႆးလဝ်း) မၼ်းၼၼ်ႉၵူၺ်း၊ သူၼ်မွၵ်ႇၼၢင်းသီၼႆႉ လႆႈလုမ်းလႃး ယၢပ်ႇသေပိူၼ်ႈသေတႃႉ ငိုၼ်းၶဝ်ႈၵေႃႈ ပဵၼ်ဢၼ်လီဝႆႉတႄႉတႄႉ။ သူၼ်မွၵ်ႇၼၢင်းသီမၼ်းၸၢႆးၵေႃႈ ပဵၼ်ဢၼ်လီဝႆႉလႄႈ မွၵ်ႇၼႂ်းသူၼ်မၼ်းၼၼ်ႉ လႆႈၶၢႆၵူႈဝၼ်းသေ ပဵၼ်ငိုၼ်းၶဝ်ႈပိူင်ၼိုင်ႈယဝ်ႉ။
ၼႃႈၵၢၼ်မၼ်းၸၢႆး ၵႂၢင်ႈၶႂၢင်မႃးဝႆႉတၢၼ်ႇတၢၼ်ႇလႄႈ မၢင်ပွၵ်ႈ ပိူၼ်ႈမႃးသင်ႇဢဝ် တူၼ်ႈမွၵ်ႇ ဢၼ်မၼ်းၸၢႆးၵပ်းဝႆႉၼၼ်ႉၵွၼ်ႇ။ ယၢမ်းလဵဝ် မၼ်းၸၢႆးၽုၵ်ႇသႂ်ႇၼႂ်းဢုမ်ႁၢင်ႈလီလီသေ ၶၢႆပႃးဢုမ် မွၵ်ႇ ၵွၼ်ႇယဝ်ႉ။
ပေႃးၺႃးဝၼ်းၵၢတ်ႇဝၼ်းတၼ်းၼႆ တူဝ်မၼ်းၸၢႆး တၢင်ႇဢုမ်မွၵ်ႇ တေႃႉမိူဝ်းၶၢႆတီႈဝဵင်းမေႇမဵဝ်ႉသေ ၶတ်းၸႂ်ႁႃငိုၼ်းယူႇ။
ဝၼ်းၼိုင်ႈ ။
တီႈၼႂ်းဝဵင်း ပိူၼ်ႈသင်ႇသိုဝ်ႉဢုမ်မွၵ်ႇၼၢင်းသီလႄႈ ၵၢင်ၼႂ်မွၵ်ႈပႅတ်ႇမွင်း ၊ ၽွင်းမိူဝ်ႈ မၼ်းၸၢႆး ၵႂႃႇသူင်ႇဢုမ်မွၵ်ႇယဝ်ႉသေ ပွၵ်ႈမႃးၸွမ်း သဵၼ်ႈတၢင်း သုမင်ႇၵလႃႇၼၼ်ႉ
“ ၸဝ်ႈလေႃႉမႃႉ ... ၸဝ်ႈလေႃႉမႃႉ ... ၸွင်ႇတၼ်းႁိုဝ်... ”
“ ဢေႃႈ ... တၼ်းယူႇဢေႃႈ ... ၶႂ်ႈၵႂႃႇလႂ်ၶႃႈ ... ... ”
“ ၶႂ်ႈၵႂႃႇ ၼမ်ႉတူၵ်းတၢတ်ႇ ပီႇဢီးၽေႃး ဢိူဝ်ႈ ... ”
“ တေၶၢတ်ႈ တင်းၵႂႃႇတင်းမႃးႁႃႉ ... ... ”
“ ဢိူဝ်ႈ ... တေဢဝ်ၵႃႈႁိုဝ်... ”
“ ဢဝ်ၸိူင်ႉၼင်ႇ ၵႃႈၶၼ်ပိူၼ်ႈတႅပ်းတတ်းဝႆႉၼၼ်ႉၵူၺ်း ၼင်ႇၵဝ်ႇဢေႃႈ ... ၶႃႈဢမ်ႇဢဝ်လိူဝ်ၶႃႈ ... ”
ၼၢင်းလဝ်းလဝ်းဢွၼ်ႇ သီႇသၢဝ် ၼႃႈတႃယုမ်ႉႁၢင်ႈလီသေ ၵေႃႉဢၼ် မႃးၶၢတ်ႈလေႃႉမႃႉၼၼ်ႉ ၸင်ႇဝႃႈ-
“ မႃးလႄႈ ... မႃးၶီႇလႄႈ ... ... ”
ၶဝ်သီႇၵေႃႉ ဢွၼ်ၵၼ်ၶိုၼ်ႈၶီႇလေႃႉမႃႉမၼ်းသေ မၼ်းၵေႃႈႁေႃႈမႃႉ မၼ်းမႃး ၸွမ်းသဵၼ်ႈတၢင်းလႃႈသဵဝ်ႈ - ဝဵင်းလိူဝ်ႇ ၼၼ်ႉယူႇ ။
ႁွတ်ႈၽႅဝ်မႃးၽၢႆႇၼႃႈ သႅင်ႇယႃႈယႃလႄႈ ၸၢႆးၼွင်ႉၸင်ႇၵိုတ်း လေႃႉမႃႉမၼ်းသေ လူင်းမႃးယဝ်ႉ၊ ၼၢင်းသၢဝ်ၵေႃႉဢၼ်ၶၢတ်ႈလေႃႉၼၼ်ႉ ၸင်ႇထၢမ်ဝႃႈ -
“ ၸဝ်ႈလေႃႉမႃႉ ... ၵိုတ်းႁဵတ်းသင်လႃႇ ... ႁဝ်းၶႂ်ႈၵႂႃႇႁွတ်ႈ ၽႂ်းၽႂ်းဢိူဝ်ႈ... ... ”
ၸၢႆးၼွင်ႉ ဝၢႆႇတူၺ်းၼႂ်းလေႃႉသေ လွမ်တူၺ်းၶဝ်သီႇသၢဝ်ၼၼ်ႉယူႇ၊ သၢႆတႃၸၢႆးၼွင်ႉ ၵႂႃၸပ်းၵွင်ႉၺႃး ၵေႃႉဢၼ်ၼႃႈၸိုၼ်ႈတႃသႂ် သေပိူၼ်ႈၵေႃႉၼိုင်ႈ ဢၼ်မီးၼႂ်းလေႃႉၼၼ်ႉယဝ်ႉ မၼ်းၸင်ႇဝႃႈ -
“ ၵမ်ႉဢွၼ်ႇၶႃႈၼႃႈ ... ၶႃႈၶႂ်ႈသိုဝ်ႉယႃႈယႃပၼ် ၼၢႆးႁဝ်းဢိတ်းၼိုင်ႈဢေႃႈ ... ... ”
ၸၢႆးၼွင်ႉ ၼႅတ်ႈၵႂႃႇသိုဝ်ႉယႃႈယႃမႃးသေ ၸုင်ဢဝ်မႃႉလေႃႉမၼ်း ၵႂႃႇတီႈယွင်ၼမ်ႉယူႇ မႃႉၵေႃႈ တိုၵ်ႉၵိၼ်ၼမ်ႉဝႆႉယူႇ -
“ ၸဝ်ႈလေႃႉမႃႉ ... ႁဵတ်းသင် သမ်ႉပႆႇၵႂႃႇလႃႇ ... ... ”
ၸၢႆးၼွင်ႉယုမ်ႉၶိုင်ႈၼိုင်ႈသေ လၢတ်ႈဝႃႈ -
“ တေၵႂႃႇၼင်ႇၵဝ်ႇယဝ်ႉ ... ယႃႇပေၼႅတ်ႈၶႃႈလေႃႇ ... မႃႉတိုၵ်ႉၵိၼ်ၼမ်ႉယူႇၼေႈ ... သင်ပဵၼ်ၵႃးတႄႉ တိုၵ်ႉထႅမ်ထၢတ်ႈသီႇမၼ်းၵႂႃႈ... ... ”
ၼၢင်းသၢဝ်သီႇၵေႃႉ ... ယုမ်ႉၶူဝ်ၵႂႃႇႁူမ်ႈၵၼ်ယဝ်ႉ -
“ ၸဝ်ႈလေႃႉမႃႉ ... ႁေႃႈၽႂ်းဢိတ်းၼိုင်ႈၼႃႈ ... ၼေႈ ... ၽူၺ်းၵေႃႉၼႆႉ ပႆႇယၢမ်ႈၶီႇလေႃႉမႃႉမေႇမဵဝ်ႉ သေပွၵ်ႈလႄႈ ႁဝ်းဢွၼ်မၼ်း ၶီႇဢိူဝ်ႈၼႆႉ ... သင်ဢဝ်ၵႃးတီႈႁိူၼ်းၵႂႃႇသူင်ႇၼႆ သမ်ႉပေႃးႁွတ်ႈယဝ်ႉ ”
ၸၢႆးၼွင်ႉ ၸင်ႇလွမ်တူၺ်း ၽူၺ်း သေ -
“ ဢေႃႈ ... ... ၵႃးတႄႉၽႂ်းၽႅဝ်ဢေႃႈ ... ႁဝ်းၶႃႈသမ်ႉဢမ်ႇမီးၵႃးၸိူင်ႉၼင်ႇပိူၼ်ႈၶႃႈလႄႇ ... ”
ၸၢႆးၼွင်ႉဝႃႈၼင်ႇၼၼ်သေ ၵျွၵ်းၶိုၼ်ႈၼိူဝ်ႁူဝ်လေႃႉမၼ်း ၽႅတ်းၸိူၵ်ႈမႃႉမၼ်းသေ ႁေႃႈၵႂႃႇႁမ်ႉၽႂ်းၽႂ်းယဝ်ႉ။
တွၵ်ႉၵလွၵ်ႉ ... တွၵ်ႉၵလွၵ်ႉ... တွၵ်ႉၵလွၵ်ႉ ...
သဵင်တိၼ်မႃႉမၼ်း မေႃးပၼ်းသွၼ်ႉၸပ်းၵၼ်ၵႂႃႇ ယၢင်ႈၼိုင်ႈယဝ်ႉ ယၢင်ႈၼိုင်ႈယူႇ ၊ ၸၢႆးၼွင်ႉယူႇၼိူဝ်ႁူဝ်လေႃႉသေ ဝူၼ်ႉဝႃႈ -
“ ဢေႃး ... ... ၸိုဝ်ႈမၼ်းၼၢင်းႁွင်ႉဝႃႈ ၽူၺ်း ၼႆႁႃႉ ... ၽူၺ်း ဢၼ်ဝႃႈၼၼ်ႉ ပဵၼ်ႁူမ်ႈၽူၺ်း ႁူမ်ႈၽူၺ်းဢၼ်ဝႃႈၼၼ်ႉ ပဵၼ်တီႈၵတ်းယဵၼ်လီသိူဝ်းၸႂ် ... ဢေႃး ... ... ၽူၺ်း ...ၽူၺ်း ... ”
ႁွတ်ႈၽႅဝ်ထိုင်မႃး ဝၢၼ်ႈယင်ႇငႄႈယဝ်ႉလႄႈ ၸၢႆးၼွင်ႉၶုၵ်းၸႂ်လႆႈလွင်ႈ ဢၼ်မၼ်းလူဝ်ႇလႆႈၵႂႃႇပၼ် ယႃႈယႃတီႈၼၢႆးမၼ်းလႄႈ မၼ်းၸင်ႇၸၼ်မႃႉလေႃႉမၼ်း ဢွၵ်ႇသဵၼ်ႈတၢင်းလူင်သေ ၶဝ်ႈမိူဝ်းၼႂ်းဝၢၼ်ႈ ယဝ်ႉ။
တၢင်းႁမ်ႉသွင်ႉဝႆႉလႄႈ ၼၢင်းသၢဝ်သီႇၵေႃႉၼၼ်ႉ သမ်ႉပေႃးဢမ်ႇၸၢင်ႈၼင်ႈလီလီယဝ်ႉ။
“ ၸဝ်ႈလေႃႉမႃႉ ... ၸဝ်ႈလေႃႉမႃႉ ... ၵိုတ်းၵမ်ႉၼိုင်ႈလူး”
ယိင်းၸၢမ် ၵေႃႉဢၼ်ၶၢတ်ႈလေႃႉၼၼ်ႉ ၸင်ႇငွၵ်းႁူဝ်ဢွၵ်ႇမႃး တီႈၽၵ်းတူလေႃႉသေ လၢတ်ႈဝႃႈ -
“ ၸဝ်ႈလေႃႉမႃႉ တေႁေႃႈၵႂႃႇလႂ်ၼႆႉ ... ?”
ၸၢႆးၼွင်ႉၶိုၼ်းတွပ်ႇဝႃႈ -
“ ဢၢင်ႈၵႂႃႇတီႈႁိူၼ်းႁဝ်းၵမ်ႉၼိုင်ႈ ၼႆၵႂႃႈ ... ”
“ ဢူဝ် ... ... လေႃႉၼႆႉ ႁဝ်းၶၢတ်ႈမႃးတင်းလမ်းဢိူဝ်ႈ ... ၼႆႉ ... ဢမ်ႇလူဝ်ႇၵႂႃႇ ... ၶိုၼ်းလိမ်ႇႁူဝ်လေႃႉ ၵႂႃႇၼမ်ႉတူၵ်းတၢတ်ႇၵမ်းလဵဝ်လႄႈ ... ”
“ ဢႃ ... ... ၶႃႈလူဝ်ႇၵႂႃႇပၼ်ယႃႈယႃ တီႈႁိူၼ်းၵွၼ်ႇဢေႃႈ ”
“ ဢူဝ် ... ႁဝ်းမီးတၢင်းၵႂႃႇထႅင်ႈဢိူဝ်ႈ ... ၶိုၼ်းဝၢႆႇႁူဝ်လေႃႉ ၵမ်းလဵဝ် လႄႈ ... ”
ၸၢႆးၼွင်ႉ ၸင်ႇလူင်းလေႃႉမႃးသေ -
“ ႁိူၼ်းႁဝ်း ဢမ်ႇၵႆသင်ၵူၺ်း ... မီးတီႈၼႃႈၼႆႉၵူၺ်း ...”
“ ႁဝ်းၶၢတ်ႈမႃးၼႆႉ တႃႇမိူဝ်းတီႈႁိူၼ်းသူ ဢမ်ႇၸႂ်ႈၵူၺ်း ... ”
ၸၢႆးၼွင်ႉ ယၢႆးႁူဝ်မၼ်းသေ -
“ ၵမ်းဢွၼ်ႇၼိုင်ႈၵူၺ်း ၼွင်ႉသၢဝ်ၶဝ် ... ၼၢႆးႁဝ်း ဢမ်ႇယူႇလီလႄႈ ၶႂ်ႈၵႂႃႇပၼ်ယႃႈယႃမၼ်းဢေႃႈ ... ”
မၼ်းၸၢႆးလၢတ်ႈၼႄ ၼင်ႇၼႆသေ လွမ်တူၺ်းၼႃႈၶဝ်သီႇၵေႃႉၼၼ်ႉယူႇ ယိင်းၸၢမ်တႄႉဢမ်ႇၶႂ်ႈၽွမ်ႉ ၸၢႆးၼွင်ႉၸင်ႇၶိုၼ်းဝႃႈ -
“ ပေႃးပၼ်ယဝ်ႉ ၶႃႈတေၶိုၼ်းၵႂႃႇသူင်ႇ ၼွင်ႉႁဝ်းၶဝ်ၵမ်းလဵဝ်လႆ ... ၶႃႈတေႁေႃႈလေႃႉပၼ်ၽႂ်းၽႂ်းလႆ ၵူဝ်ၼၢႆးၶႃႈ မွင်းၶႃႈႁဝ်းဝႆႉဢေႃႈ”
ၽူၺ်းၵေႃႉၼိုင်ႈ လွမ်တူၺ်းယိင်းၸၢမ်သေ -
“ ယိင်းၸၢမ်... ႁႂ်ႈၸဝ်ႈလေႃႉမႃႉ မိူဝ်းပၼ် ယႃႈယႃၼၢႆးၶဝ်သေၵွၼ်ႇလႄႈ ၵူဝ်ၼၢႆးၶဝ်မွင်းဝႆႉဢိူဝ်ႈ ... ”
ယိင်းၸၢမ်ထူၺ်ႈၸႂ်လူင်ၵမ်းၼိုင်ႈသေ -
“ ဢိူဝ်ႈ ... မိူဝ်းပၼ်ယႃႈယႃလႄႈ ... ၽႂ်းၽႂ်းၼႃ ... ”
“ ၸူမ်းၶႃႈ ... ... ”
ၸၢႆးၼွင်ႉၶိုၼ်ႈႁေႃႈလေႃႉမႃႉမၼ်း မႃးၼႂ်းဝၢင်းႁိူၼ်း မႃးၵိုတ်း လေႃႉမႃႉမၼ်းသေ ၼႅတ်ႈလူင်းလေႃႉမႃႉၽႂ်းၽႂ်းယဝ်ႉ။
“ ၼႆႉပဵၼ်ႁိူၼ်းႁဝ်းဢေႃႈ ... ၶႃႈတေၵႂႃႇပၼ် ဢီႈယႃ တႃႇၼၢႆးႁဝ်းသေၵွၼ်ႇ ... ပႂ်ႉဝႆႉၵမ်းၼိုင်ႈၶႃႈၼႃႈ ... ”
ၸၢႆးၼွင်ႉၵေႃႈ လႅၼ်ႈၶိုၼ်ႈႁိူၼ်းမိူဝ်းသေ မိူဝ်းပၼ်ယႃႈယႃၼၢႆးၶဝ်ယူႇယဝ်ႉ ...
ၶဝ်သီၵေႃႉၼၼ်ႉ ဢွၼ်ၵၼ်လွမ်တူၺ်း ႁိူၼ်းၸၢႆးၼွင်ႉလႄႈ ဝၢင်းႁိူၼ်းဝၢင်းသူၼ်ၸၢႆးၼွင်ႉၶဝ်ယူႇ ။ လႆႈႁၼ်သူၼ်မွၵ်ႇၸၢႆးၼွင်ႉ မွၵ်ႇဢွၼ်ႇၵီႈပေႃးလႅင်ၶွင်ႇဝႆႉလႄႈ ၶဝ်သီႇၵေႃႉ ပဵၼ်ဢၼ်လႆႈၸႂ် ၸူမ်းတူၺ်းမွၵ်ႇႁၢင်ႈလီဝႆႉယူႇ ။
“ ၽူၺ်း ... တူၺ်းၵႂႃႇတၢင်းပူၼ်ႉလူး ... သူၼ်မွၵ်ႇၼၢင်းသီ ဢိူဝ်ႈ ဢလူဝ်ႉ ... ႁၢင်ႈလီဝႃႈႁၢင်ႈလီယဝ်ႉ ... ... ”
“ တႄႉဢိူဝ်ႈၼေႃ ... ယိင်းၸၢမ် ထၢမ်တူၺ်းလူး ... ၸွင်ႇမၼ်းၶၢႆႁိုဝ်ၼႆႉ ... ...”
“ ၽူၺ်း ၵေႃႉထၢမ်လေႃႇ ... ”
“ ဢူဝ်... ၽူၺ်း ဢမ်ႇႁတ်းထၢမ်”
“မွၵ်ႇဢွၼ်ႇၸိူဝ်းဢၼ်ၼႂ်းဢုမ်ၼၼ်ႉၵေႃႈ ၶႄးပဵၼ်တႃႇၶၢႆယူဝ်ႉၼေႃ ... ... ?”
“ ၸႂ်ႈယူႇယူဝ်ႉ... ... ! ”
ၸၢႆးၼွင်ႉလူင်းႁိူၼ်းၶိုၼ်းမႃးသေ ဢၢင်ႈမႃးၶိုၼ်ႈလေႃႉမႃႉၵမ်းလဵဝ် ယူႇယဝ်ႉ ယိင်းၸၢမ်ၸင်ႇထၢမ် -
“ၸဝ်ႈလေႃႉမႃႉ ... ၵမ်ႉၼိုင်ႈလူး ... မွၵ်ႇၼၢင်းသီၸိူဝ်းၼႆႉ ၽုၵ်ႇဝႆႉတႃႇၶၢႆႁႃႉ ... ?”
“ ၽုၵ်ႇတႃႇၶၢႆလၢႆလၢႆတႄႉၵေႃႈ ဢမ်ႇၸႂ်ႈၼင်ႇၵဝ်ႇ လူႇလူႇၶၢႆၶၢႆဢေႃႈ ... ”
ယိင်းၸၢမ် လွမ်တူၺ်းၽူၺ်းသေ -
“ ၽူၺ်း ... ၶၢႆယူႇဝႃႇ ... ”
ၽူၺ်း ၸင်ႇလွမ်တူၺ်း ၼႃႈၸၢႆးၼွင်ႉသေ -
“ ၸွင်ႇတေၶၢႆပၼ် ၽူၺ်း ၶဝ်ႁိုဝ်ၸဝ်ႈလေႃႉမႃႉ ... ? ၽူၺ်းၶဝ် ၶႂ်ႈယွၼ်းသိုဝ်ႉမိူဝ်းၽွင်ႈ ဢိူဝ်ႈ ... ”
“ ဢေႃႈ ... ပေႃးၶၼ်မၼ်းထုၵ်ႇၼႆ ၶၢႆၶႃႈၵႂႃႈ ... ပေႃးၶႂ်ႈလႆႈၼႆ လူင်းတူၺ်း ၼႂ်းသူၼ်ၵေႃႈလႆႈယူႇၼႃႇ ... ”
ၶဝ်သီႇၵေႃႉၵေႃႈ ၽႂ်ဢမ်ႇႁၢမ်ႈသီးၽႂ်သေ လူင်းလေႃႉမႃႉမႃးၼင်ႇၵၼ်ယဝ်ႉ။ ၶဝ်ဢွၼ်ၵၼ်ၵႂႃႇ ၼႂ်းသူၼ်မွၵ်ႇၼၢင်းသီသေ ဢွၼ်ၵၼ်ႁႃတူၺ်း မွၵ်ႇဢၼ်ႁၢင်ႈလီသေပိူၼ်ႈယူႇ ၸၢႆးၼွင်ႉၵေႃႈ ယိပ်းဢဝ်ၵိမ်းၵႅတ်းမွၵ်ႇသေ မႃးၸွမ်းၶဝ်ၼႂ်းသူၼ်ယဝ်ႉ။
“ ဢလူဝ်ႉ ... မွၵ်ႇလူင်ႇၼႆႉႁၢင်ႈလီၵျႃႉ ...ၸၢမ်တေဢဝ်လူင်ႇၼႆႉဢိူဝ်ႈ ... ... ၽူၺ်း ... ၼေႈ ... ၽူၺ်း ... ဢဝ်လူင်ႇၼႆႉလႄႈ လူင်ႇၼႆႉၶႅၼ်းႁၢင်ႈလီ ယဝ်ႉ ... ”
“ တႄႉဢိူဝ်ႈၼေႃႈ ... ”
ၽူၺ်း လွမ်တူၺ်းၸၢႆးၼွင်ႉသေ -
“ သူၼ်မွၵ်ႇၸိူဝ်းၼႆႉ ၸဝ်ႈလေႃႉမႃႉ ၵေႃႉၽုၵ်ႇဝႆႉႁႃႉၼႆႉ?... ”
“ ၸႂ်ႈဢေႃႈ ... ၽူၺ်းတေဢဝ်လူင်ႇၼႆႉႁႃႉ ... ?”
ၸၢႆးၼွင်ႉၵေႃႈ ၵႅတ်းသေ ဢဝ်ပၼ်ၽူၺ်းယဝ်ႉ -
“ ယိပ်းဢဝ်လီလီၼႃႈ ... မဵဝ်းမွၵ်ႇၼၢင်းသီၼႆႉ မီးၼၢမ်သေ ၸၢင်ႈမေႃႈၸူၵ်ႉမိုဝ်းဢိူဝ်ႈ ... ”
ၽူၺ်းၵေႃႈ ယိပ်းဢဝ်လီလီ ဢဝ်မႃးၼူမ်တူၺ်းသေ ဢဝ်ၼဵပ်း ပၵ်းသႂ်ႇ ၼိူဝ်ႁူဝ်မၼ်းယဝ်ႉ -
“ ၸဝ်ႈလေႃႉမႃႉ ... ၸၢမ်ၵေႃႈ တေဢဝ်လူင်ႇၼႆႉဢိူဝ်ႈ ...”
ၸၢႆးၼွင်ႉၵေႃႈ မႃးၵႅတ်းပၼ် ယိင်းၸၢမ်သေဢမ်ႇၵႃး တႆးၵေႃႉၶဝ်သွင်ၵေႃႉၼၼ်ႉၵေႃႈ ၸၢႆးၼွင်ႉၵႅတ်းပၼ်ယဝ်ႉ ။ ၽူၺ်း ၸင်ႇမႃးႁိမ်း ၸၢႆးၼွင်ႉသေ ထၢမ်ဝႃႈ -
“ မွၵ်ႇဢၼ်ၽုၵ်ႇဝႆႉ ၼႂ်းဢုမ်ၸိူဝ်းၼႆႉ ၶၢႆပႃးဢုမ်မၼ်းႁႃႉ ... ”
“ ၸႂ်ႈဢေႃႈ ... ၽူၺ်း ”
“ၼိုင်ႈဢုမ် ၵႃႈႁိုဝ်... ? ၸဝ်ႈလေႃႉမႃႉ ”
“ ဢုမ်ၼႆႉ တူၼ်ႈမၼ်းၵေႃႈၶႅမ်ႉ မွၵ်ႇမၼ်းၵေႃႈပဵၼ် မွၵ်ႇသီလိူင်သီလႅင် ၵပ်းၵၼ်လႄႈ ၼိုင်ႈဢုမ် သီႇပၢၵ်ႇဢိူဝ်ႈ ... ၼႆႉတႄႉ သၢမ်ပၢၵ်ႇ ၼႆႉသမ်ႉၵူမ်းႁႃႈၶၼ် ၼႆဢေႃႈ ... ”
ယိင်းၸၢမ်ၸင်ႇဝႃႈ -
“ ဢလူဝ်ႉ ... ! ပေႉၵႃႈယႂ်ႇလႃႇ ... ”
“ဢမ်ႇယႂ်ႇသႄႈ... တႃႇတေၵပ်းတူၼ်ႈမၼ်းၼၼ်ႉ ၵပ်းယၢပ်ႇတႄႉတႄႉ ၶဝ်ႈတိၼ်ၶဝ်ႈမိုဝ်းတႄႉတႄႉဢေႃႈ ... လုမ်းလႃးၵေႃႈယၢပ်ႇ”
“ ယွမ်းပၼ်ၽူၺ်းၶဝ်ၽွင်ႈလႄႈ ၸဝ်ႈလေႃႉမႃႉ ၽူၺ်းတေဢဝ် သွင်ဢုမ်ၼႆႉ ဢေႃႈ ... ”
“ ၶႃႈဢမ်ႇလၢတ်ႈလိူဝ်ၶႃႈ ... ၶၼ်ၶၢႆမၼ်းယဝ်ႉဢေႃႈ ...ၼႆႉ”
“ ယွမ်းပၼ်ဢိတ်းၼိုင်ႈလႄႈ ... ၸဝ်ႈလေႃႉမႃႉ ... ”
ယိင်းၸၢမ်ၸင်ႇဝႃႈ -
“ ၽူၺ်း ... ယၢမ်းလဵဝ် မၼ်းဢမ်ႇၸႂ်ႈၸဝ်ႈလေႃႉမႃႉယဝ်ႉ မၼ်းပဵၼ်ၸဝ်ႈသူၼ်မွၵ်ႇယဝ်ႉ ... ”
“ဢေႃႈ ... ၸိုဝ်ႈၸဝ်ႈလေႃႉမႃႉ ဝႃႈႁိုဝ်ၵေႃႈ ဢမ်ႇႁူႉယဝ်ႉ ...”
“ ႁႄႈ ... ႁႄႈ ... ႁွင်ႉဝႃႈၸဝ်ႈလေႃႉမႃႉၼႆၵေႃႈ လႆႈယူႇၼႃႇ ပေႃးၼႆ ပေႃးၽူၺ်းတေဢဝ်ၵေႃႈ သွင်ဢုမ်ၼႆႉ ... ဝႆႉပၼ်ၸဵတ်းပၢၵ်ႇႁႃႈၶၼ်ၶႃႈလႄႈ... ”
“ ဝႆႉၸဵတ်းပၢၵ်ႇႁႄယဝ်ႉၼႃႇ ... ၸဝ်ႈလေႃႉမႃႉ ... ”
“ ဢမ်ႇလႆႈၶႃႈ ... ပဵၼ်ၽူၺ်းၶဝ်လႄႈ ၶၢႆပၼ်ဢေႃႈၼႆႉ ... သင်ပဵၼ်တၢင်ႇၵေႃႉတႄႉ ...ယင်းတေဢမ်ႇယွမ်း သေပႅၵ်ႉၵွၼ်ႇလႃႈ ... ’
ၽူၺ်းၸင်ႇယုမ်ႉၵမ်းၼိုင်ႈသေ လၢတ်ႈဝႃႈ -
“ ၽူၺ်း ...တေဢဝ်မိူဝ်း တႃႈၵုင်ႈပုၼ်ႉဢေႃႈၼႆႉ ၵူဝ်ၵိင်ႇမၼ်း ႁၵ်းၵူၺ်းယဝ်ႉ ... ”
“ ပေႃးဢမ်ႇတိူဝ်ႉၺႃးႁႅင်းႁႅင်းတႄႉ ဢမ်ႇႁၵ်းသႄႈ ၶႃႈတေသႂ်ႇသွင်းသေ မတ်ႉပၼ်လီလီလႆ ... ”
ၽူၺ်း ထူၵ်းငိုၼ်းသေ ပၼ်ၵႃႈမွၵ်ႇမၼ်းယဝ်ႉ -
“ ၸဝ်ႈလေႃႉမႃႉ သွၼ်ႇပၼ်ၵႃႈမွၵ်ႇ ဢၼ်ၽူၺ်းၶဝ်သီၵေႃႉ ဢဝ်ပၵ်းၼႆႉႁႄလႄႈ မႅၼ်ႈၵႃႈႁိုဝ်... ?”
“ ဢေႃႈ ... ဢဝ်ၵႃႈဢုမ်မွၵ်ႇသွင်လုၵ်ႈၼႆႉၵူၺ်းၶႃႈယဝ်ႈ မွၵ်ႇပၵ်း ၸိူဝ်းၼၼ်ႉတႄႉ ... တွၼ်ႈပၼ်ၽူၺ်းၶဝ်လၢႆလၢႆၶႃႈ ၵႂႃႈ ... ”
“ ၸူမ်းၶႃႈယဝ်ႉ ... ”
“ ဢေႃႈ ... ဢုမ်မွၵ်ႇၼႆႉ တေလႆႈႁဵတ်းႁိုဝ်ၸဝ်ႈလေႃႉမႃႉ ?”
ၸၢႆးၼွင်ႉၵေႃႈဝူၼ်ႉၵမ်းၼိုင်ႈသေ -
“ ႁဵတ်းၼႆလႄႈ ပေႃးပွၵ်ႈၼမ်ႉတူၵ်းတၢတ်ႇမႃး ၸင်ႇမႃးဝႄႉဢဝ်လႄႈ ပေႃးဢဝ်ၵႂႃႇတီႈလဵဝ်ၼႆ ၵူဝ်မၼ်းမၢၼ်ႉလႅတ်ႇ ... ”
“ လီယဝ်ႉပေႃးၼႆ ၵႂႃႇႁဝ်းၵႂႃႇၼမ်ႉတူၵ်းတၢတ်ႇၵွၼ်ႇ ”
ၶဝ်ဢွၼ်ၵၼ် ၶိုၼ်ႈၶီႇလေႃႉမႃႉသေ မႃးၸူးၼမ်ႉတူၵ်းတၢတ်ႇယူႇယဝ်ႉ ။ ၸၢႆးၼွင်ႉၵေႃႈ ႁေႃႈမႃႉပၼ်ၽႂ်းၼႃႇလႄႈ ၽူၺ်းၶဝ် သမ်ႉပေႃးလွမ်ၵူဝ် လေႃႉမႃႉပိၼ်ႈယဝ်ႉ ။ ပေႃးဝႃႈ ၽႅဝ်တီႈတၢင်းၽႄ ဢၼ်လူင်းၵႂႃႇၸူးၼမ်ႉတူၵ်းတၢတ်ႇၼၼ်ႉယဝ်ႉၼႆၸိုင် ၸၢႆးၼွင်ႉၸင်ႇၵိုတ်းလေႃႉမႃႉမၼ်း တီႈႁိမ်းၽင်ႇတၢင်းၵႃးသေ -
“ ဢိူဝ်ႈ ... လူင်းသေပႆၵႂႃႇဢဝ်လႃႈ ၶႃႈတေပႂ်ႉဝႆႉတီႈၼိူဝ်ၼႆႉလႆ... ... ”
ယိင်းၸၢမ်ၸင်ႇဝႃႈ -
“ ၸဝ်ႈလေႃႉမႃႉ ဢမ်ႇၸွမ်းႁဝ်းၵႂႃႇႁႃႉ ... ? ”
“ ဢမ်ႇၸွမ်းယဝ်ႉ ... ”
“ ၸွမ်းသူင်ႇ ပီႈၼွင်ႉမိူင်းၵႆၶဝ်ၽွင်ႈလႄႈ ... ”
“ ဢမ်ႇမီးၵူၼ်းပႂ်ႉလေႃႉလႄႈ ... ဢမ်ႇၸွမ်းယဝ်ႉ ... ”
လႆႈႁၼ် ၽူၺ်းၵေႃႉၼိုင်ႈ လွမ်တူၺ်းမၼ်းၸၢႆးသေ ဢၢပ်ႈၶႂ်ႈႁႂ်ႈမၼ်း ၵႂႃႇၸွမ်းဝႆႉႁိုဝ်ၵေႃႈ ဢမ်ႇႁူႉ ယိင်းၸၢမ်လႄႈတႆးၵေႃႉမၼ်းသွင်ၵေႃႉ ၸင်ႇၶိုၼ်းဝႃႈ -
“ ၽႂ်ဢမ်ႇလၵ်ႉသႄႈ ... ”
“ ပေႃးလေႃႉမႃႉႁၢႆၼႆ ... ႁဝ်းတေသၢႆႈတႅၼ်းပၼ်လႆ... ”
“ တႄႉႁႃႉ ... ... ? ”
“ တႄႉဢေႃႈ ... ၸွမ်းသူင်ယိင်းၶဝ်ၽွင်ႈလႄႈ ယိင်းၶဝ်ပႆႇ ယၢမ်ႈၽႅဝ်သေပွၵ်ႈၵူၺ်း ... ”
ၽွင်းမိူဝ်ႈ ၸႂ်ၸၢႆးၼွင်ႉ တိုၵ်ႉၶႂ်ႈငိၼ်းၵႂၢမ်းၽူၺ်းၼၼ်ႉ ၽူၺ်းၵေႃႉၼိုင်ႈၸင်ႇဝႃႈ -
“ တႄႉဢေႃႈ ... ၸဝ်ႈလေႃႉမႃႉ ... ၽူၺ်းၵေႃႈပႆႇယၢမ်ႈၽႅဝ်သေပွၵ်ႈ ၵႂႃႇၸွမ်းသူင်ႇၽူၺ်းၶဝ်ၽွင်ႈလႄႈ ... ”
ယိင်းၸၢမ်ၶိုၼ်းဝႃႈ -
“ ၸဝ်ႈလေႃႉမႃႉ ဢမ်ႇၶႂ်ႈၸွမ်းႁဝ်းယူဝ်ႉ ... တေႃႈဝႃႈ ... ”
“ ဢမ်ႇဝႃႈၼင်ႇၵဝ်ႇ ... ”
ယွၼ်ႉပိူဝ်ႈ ၶဝ်ႁႅင်ႉႁွင်ႉၼင်ႇၼၼ်လႄႈ ၸၢႆးၼွင်ႉ ၸင်ႇပူတ်းမႃႉမၼ်း ၵႂႃႇမတ်ႉဝႆႉ တီႈတူၼ်ႈမႆႉတူၼ်ႈၼိုင်ႈသေ လၢတ်ႈသင်ႇၸဝ်ႈလေႃႉမႃႉ ဢၼ်မီးဝႆႉႁိမ်းမၼ်း ႁႂ်ႈတူၺ်းဝႆႉပၼ် လေႃႉမႃႉမၼ်းၽွင်ႈ ၼႆယူႇ ။
ၶဝ်ႁႃႈၵေႃႉ ဢွၼ်ၵၼ်ပႆလူင်းမႃးၸွမ်းတၢင်းၵႃးယူႇ ။
ၸၢႆးၼွင်ႉၸင်ႇထၢမ်ဝႃႈ -
“ ယိင်းၸၢမ်ၶဝ် ယူႇမေႇမဵဝ်ႉဢမ်ႇၸႂ်ႈႁႃႉ ... ? ၵႆႉၵႆႉယၢမ်ႈႁၼ်ယူႇလူး ... ”
ယိင်းၸၢမ်ၸင်ႇယုမ်ႉသေ -
“ ပေႃးၵႆႉႁၼ်တီႈမေႇမဵဝ်ႉၵေႃႈ ... ယူႇမေႇမဵဝ်ႉဢိူဝ်ႈ ... ”
“ ယူႇမေႇမဵဝ်ႉသေ ဢမ်ႇယၢမ်ႈၽႅဝ် ၼမ်ႉတူၵ်းတၢတ်ႇသေပွၵ်ႈၼႆတႄႉ ဢမ်ႇၸႂ်ႈယူဝ်ႉ ... ? ”
“ ယၢမ်ႈၽႅဝ်ယူႇ ... ”
“ ၵွပ်ႈသင်မိူဝ်ႈၵႆႈသမ်ႉလႅၼ်ဝႃႈ ဢမ်ႇယၢမ်ႈၽႅဝ်ၼႆလႃႇ ? ”
ယိင်းၸၢမ် ဢမ်ႇၸၢင်ႈဝႃႈႁိုဝ်လႄႈ မၼ်းၸင်ႇဝႃႈ -
“ ၸၢမ်ၶႂ်ႈဝႃႈ ၽူၺ်းဢမ်ႇယၢမ်ႈၽႅဝ်သေပွၵ်ႈၼႆၵႂႃႈ ... ”
ၸၢႆးၼွင်ႉ ၸင်ႇလွမ်တူၺ်းၼႃႈႁၢင်ႈလီၽူၺ်းသေ -
“ ၽူၺ်း ... ပႆႇယၢမ်ႈၽႅဝ်သေပွၵ်ႈႁႃႉ ... ? ”
“ ၽူၺ်း ဢမ်ႇလႅၼ်ႇၵူၺ်း ၽူၺ်း ပႆႇယၢမ်ႈၽႅဝ်လႄႈ ၸင်ႇၸူဝ်းႁႂ်ႈ ယိင်းၸၢမ်ၶဝ်ၸွမ်းသူင်ႇဢေႃႈ ... ၼင်ႇႁိုဝ် ပေႃးတေယၢမ်ႈၶီႇ လေႃႉမႃႉမေႇမဵဝ်ႉၼႆလႄႈ ၸင်ႇတင်ႈၸႂ်ယိမ်လေႃႉမႃႉသေ မႃးယဝ်ႉ ...”
“ ၽူၺ်း ယူႇတီႈလႂ်... ? ပေႃးၼႆ ... ”
ၽူၺ်းဢမ်ႇတွပ်ႇ တႆးၵေႃႉၽူၺ်း ယိင်းၸၢမ်ၸင်ႇတွပ်ႇပၼ်ဝႃႈ -
“ ယူႇတႃႈၵုင်ႈဢိူဝ်ႈ ... ၸဝ်ႈလေႃႉမႃႉ ”
“ ဢေႃႈ ... ယူႇတီႈတႃႈၵုင်ႈၼႆႁႃႉ ... ?”
ၽူၺ်းယုမ်ႉသေ ငွၵ်းႁူဝ်ၼႄၵမ်းၼိုင်ႈယူႇယဝ်ႉ -
“ ယူႇမိူူင်းပဵင်းသေ မႃးဢႅဝ်ႇၽႅဝ်မိူင်းလွႆၼႆႉ ၸွင်ႇသိူဝ်းၸႂ်ႁိုဝ်? ၽူၺ်း ... ၸွင်ႇယိၼ်းၵျေႃႇၶႃႈႁိုဝ် ... ...”
“ သိူဝ်းၸႂ်ယူႇ ... ”
ယိင်းၸၢမ်ၸင်ႇဝႃႈ -
“ ၽူၺ်း မႃးဢႅဝ်မေႇမဵဝ်ႉၼႆႉ ၶႅၼ်းသိူဝ်းၸႂ်ယူဝ်ႉၼေႃ ? ”
ၽူၺ်း လီဢၢႆၵႂႃႇဢိတ်းၼိုင်ႈသေ ဢဝ်မိုဝ်းၼုမ်ႇၼုမ်ႇမၼ်း ၽတ်ႉပၼ် ၶႅၼ်ယိင်းၸၢမ်ယဝ်ႉ တႆးၵေႃႉယိင်းၸၢမ်ၵေႃႉၼိုင်ႈ ၸင်ႇၶိုၼ်းဝႃႈ -
“ ၽူၺ်း ... လႆႈၶီႇလေႃႉမႃႉမေႇမဵဝ်ႉၼႆႉ ၶႅၼ်းသိူဝ်းၸႂ်ၵႂႃႈၼေႃႈ ... ...? ”
“ ၽူၺ်း ... လႆႈပႆလူင်းမႃးၸိူင်ႉၼႆ ၶႅၼ်းသိူဝ်းၸႂ်ႈၵႂႃႈၼေႃႈ”
ၽူၺ်း လီဢၢႆယူႇသေတႃႉ မၼ်းဢမ်ႇၶိုၼ်းၸၢင်ႈဝႃႈႁိုဝ်တီႈၶဝ် ၵွပ်ႈၼၼ် မၼ်းၸင်ႇၶိုၼ်းထၢမ် -
“ ယိင်းၸၢမ်ၶဝ်လူး ဢမ်ႇၵျေႃႇႁႃႉ ... ? ”
“ ၵျေႃႇယူႇ ... ၸဝ်ႈလေႃႉမႃႉလူး ဢမ်ႇသိူဝ်းၸႂ်ႁႃႉ ... ? ”
ၸၢႆးၼွင်ႉ ဢမ်ႇတၵ်းသဵင် ယုမ်ႉသေသိုပ်ႇပႆလူင်းမႃးယူႇ တႆးၵေႃႉယိင်းၸၢမ်ၸင်ႇဝႃႈ -
“ ၵူဝ်မႃႉ ႁၢႆလႄႈ ဢမ်ႇသိူဝ်းၸႂ်ယူဝ်ႉ ... ... ! ”
ၶဝ်ဢွၼ်ၵၼ်ယုမ်ႉၶူဝ်သေ သိုပ်ႇပႆမႃး တေႃႇထိုင်တီႈၼမ်ႉတူၵ်းတၢတ်ႇယဝ်ႉ ၊ ၼႂ်းတႃၽူၺ်းတႄႉ ၵွပ်ႈပိူဝ်ႈ ဢမ်ႇတွၼ်ႉယၢမ်ႈႁၼ် ၼမ်ႉႁွင်ႈဢၼ်လႆၸွမ်းထိူၼ်ႇၸွမ်းၶိူဝ်းၼင်ႇၼႆလႄႈ ပဵၼ်ဢၼ်လၢၵ်ႇလၢႆး ပုၼ်ႈမၼ်းတႄႉတႄႉ ။ သဵင်ၼမ်ႉသႂ်သႂ်ဢွၼ်ႇ ဢၼ်လႆလူင်းၸွမ်းတၢတ်ႇၼၼ်ႉ တီႈၼႂ်းႁူမၼ်းၼၢင်း ငိၼ်းမိူၼ် သဵင်တူႇရိယႃႇဝႆႉပိူင်ၼိုင်ႈ ၊ ၵူၼ်းၸိူဝ်းဢၼ်ၽႅဝ်မႃး တီႈၼမ်ႉတူၵ်းတၢတ်ႇၼႆႉ တူၺ်းႁၼ်ၽႂ်ၵေႃႈ ပဵၼ်ဢၼ်ဢၢပ်ႈသိူဝ်းၸႂ်ဝႆႉ ၵူႈၵေႃႉလႄႈ ၽူၺ်းၵေႃႉၼိုင်ႈ ၶႅၼ်းပဵၼ်ဢၼ်သိူဝ်းၸႂ်ယဝ်ႉ ။
မၼ်းၼၢင်း ၸင်ႇယိပ်းမိုဝ်းယိင်းၸၢမ်သေ
“ ၸၢမ် ... လႆႈႁၼ်ၼမ်ႉတူၵ်းတၢတ်ႇဢွၼ်ႇၸိူင်ႉၼႆ ၼႂ်းၸႂ်ၽူၺ်း ပဵၼ်ႁိုဝ်ၵႂႃႇၵေႃႈ ပေႃးဢမ်ႇမေႃလၢတ်ႈယဝ်ႈ ... တႃႉလီသိူဝ်းၸႂ်လႃႈ ၼေႃ ... ၸၢမ် ... ”
ၽူၺ်း ဢဝ်ၵႅမ်ႇမရႃႇမၼ်း ပၼ်ယိင်းၸၢမ်သေ ႁႂ်ႈယိင်းၸၢမ် ထႆႇႁၢင်ႈပၼ်မၼ်းယူႇ ၊ လိူဝ်သေ ၼၼ်ႉ ၶဝ်ဢွၼ်ၵၼ် ထႆႇႁၢင်ႈတီႈၼိုင်ႈယဝ်ႉ တီႈၼိုင်ႈသေ ၶဝ်ဢွၼ်ၵၼ်လႄႇ မႃးတႆႇၶူဝ်ၽႅၼ်ယူႇယဝ်ႉ ။
“ ၽူၺ်း ... တႆႇၵႂႃႇၸူးတူၼ်ႈမႆႉတၢင်းပုၼ်ႉလႄႈ ... ”
“ ဢူဝ် ... ၸၢမ်ၶဝ်ၵႂႃႇဢွၼ်တၢင်းလေႃႇ...ၽူၺ်းဢမ်ႇႁတ်း”
“ မၼ်းဢမ်ႇပဵၼ်သင် မႃးၸွမ်းလင်ၸၢမ်လႄႈ ... ”
ယိင်းၸၢမ်လႄႈ တႆးၵေႃႉမၼ်းသွင်ၵေႃႉ ၶဝ်ဢွၼ်ၵၼ်တႆႇၵႂႃႇ ၼိူဝ်ၶူဝ်ၽႅၼ်ၼၼ်ႉ ဝႆၸိူင်ႉဝႆၸၢင်ႉ ဝႆဢိူင်ႉဝႆဢၢင်ႉသေ ၽႅဝ်ၵႂႃႇတီႈသုတ်း သုမ်ႉလၢင်း ၼိဝ်တူၼ်ႈမႆႉ ၽၢႆႇပုၼ်ႉငၢႆႈငၢႆႈယဝ်ႉသေ ၸၢမ်ၸင်ႇႁွင်ႉဝႃႈ -
“ၽူၺ်း ... တႆႇမႃးလႄႈ ... မၼ်းဢမ်ႇပဵၼ်သင် ... ယိပ်းႁၢဝ်းမၼ်းသေ တႆႇမႃးလွႆးလွႆး လႆႈယူႇ ... ”
ၽူၺ်းၵေႃႈ ၸင်ႇယိပ်းႁၢဝ်းၸိူၵ်ႈၼၼ်ႉသေ ၸၢမ်းတႆႇၵႂႃႇဢိတ်းၼိုင်ႈယဝ်ႉ ၊ ယွၼ်ႉပိူဝ်ႈ ၶူဝ်ၽႅၼ်ဢမ်ႇၼိမ်လႄႈ ၽူၺ်းၸင်ႇၵိုတ်းဝႆႉသေ -
“ ဢူဝ် ... ၽူၺ်း ဢမ်ႇႁတ်းတႆႇ ... ”
မၼ်းၼၢင်းလွမ်ဝၢႆႇတူၺ်း ၸၢႆးၼွင်ႉသေ လၢတ်ႈၼင်ႇၼႆလႄႈ ၸၢႆးၼွင်ႉ ၸင်ႇဝႃႈ -
“ သိုပ်ႇပႆၵႂႃႇလွႆးလွႆး လႆႈယူႇၼႃႇၽူၺ်း ... ”
ယိင်းၸၢမ်ၶဝ်ၵေႃႈ ယူႇၽၢႆႇပုၼ်ႉသေ ႁွင်ႉဝႃႈ -
“ ၽူၺ်း ...ယႃႇပေၵူဝ်သင်... မၼ်းဢမ်ႇပဵၼ်သင် မႃးလႄႈ”
ၽူၺ်း ၸင်ႇၶိုၼ်းတွပ်ႇဝႃႈ -
“ ဢူဝ် ... ... ၽူၺ်းဢမ်ႇႁတ်းတႆႇၵေႃႉလဵဝ် မႃးဢွၼ်ၽူၺ်းၽွင်ႈလႄႈ ... ”
တႆးၵေႃႉယိင်းၸၢမ်ၸင်ႇဝႃႈ -
“ ပေႃးၼၼ်ၵေႃႈ ... ႁေး ... ၸဝ်ႈလေႃႉမႃႉ ဢွၼ်ဢဝ်ၽူၺ်း တႆႇမႃးတၢင်းၼႆႉလႄႈ ... ”
ယိင်းၸၢမ်ၵေႃႈ ၶိုၼ်းဝႃႈ -
“ တႄႉဢိူဝ်ႈ ... ၸဝ်ႈလေႃႉမႃႉ ၸွမ်းသူင်ႇပၼ်ၽူၺ်းၽွင်ႈလႄႈ ... ”
ၸၢႆးၼွင်ႉ ၸင်ႇပႆၶိုၼ်ႈမႃး ၼိူဝ်ၶူဝ်မႃးႁိမ်းၽူၺ်းသေ -
“ ၽူၺ်း ... ယႃႇပေၵူဝ် သိုပ်ႇတႆႇၵႂႃႇလႄႈ ... ”
“ ၸဝ်ႈလေႃႉမႃႉ ၵႂႃႇဢွၼ်တၢင်းလႄႈ ... ”
ၸၢႆးၼွင်ႉတႄႉ ယွၼ်ႉပိူဝ်ႈယၢမ်ႈယဝ်ႉလႄႈ မၼ်းၸၢႆးဢမ်ႇၸႂ်သၼ်ႇသင် ၊ လႆႈႁၼ်ၸၢႆးၼွင်ႉ ပႆၵႂႃႇၸိူင်ႉၼၼ် ၽူၺ်းၵေႃႈ ၸင်ႇၸုၼ်ႉႁတ်းသေ ပႆၵႂႃႇၸွမ်း ၸၢႆးၼွင်ႉယဝ်ႉ ၊ ႁွတ်ႈထိုင်မႃး ၵၢင်ၶူဝ် ၶူဝ်ၽႅၼ် ဝႆႁႅင်းမႃးလႄႈ ၽူၺ်းၸင်ႇၵူဝ်သေ -
“ ဢူဝ် ... ... ၸဝ်ႈလေႃႉမႃႉ မႃးဢဝ်ၽူၺ်းၽွင်ႈ ၽူၺ်း ဢမ်ႇႁတ်းၵႂႃႇယဝ်ႉ ...... ”
ၸၢႆးၼွင်ႉ ၸင်ႈၸုၵ်းသေ ဝၢႆႇတူၺ်းၽူၺ်းယူႇ ၊ ယိင်းၸၢမ်ၶဝ်တႄႉ ဢွၼ်ၵၼ်ၶူဝ်ၽူၺ်းယူႇ ၽူၺ်းၵေႃႉၼိုင်ႈ တေသိုပ်ႇပႆၵေႃႈ ဢမ်ႇႁတ်း တေႁုၼ်လင်ၵေႃႈ ဢမ်ႇႁတ်းယဝ်ႉလႄႈ မၼ်းၼၢင်းၸင်ႇယိပ်းႁၢဝ်းၶူဝ်ဝႆႉ မၼ်ႈမၼ်ႈယဝ်ႉ ။
“ ၸဝ်ႈလေႃႉမႃႉ ... မႃးဢဝ်ၽူၺ်းၽွင်ႈ ၽူၺ်းဢမ်ႇႁတ်းယဝ်ႉ ... ... ”
ၸၢႆးၼွင်ႉၵေႃႈ ၸင်ႇၶိုၼ်းပႆမႃးႁိမ်းၽူၺ်းသေ လွမ်ယုမ်ႉတူၺ်း ၼႃႈၽူၺ်း ဢၼ်ၵူဝ်ဝႆႉၼၼ်ႉယူႇ ၊ ၶႃသွင်ၵေႃႉ ယိုၼ်းမိုဝ်းၸူးၵၼ်သေ ၸၢႆးၼွင်ႉၸင်ႇဝႃႈ -
“ မႃးလႄႈ ... ၽူၺ်း ... ယႃႇပေၵူဝ် ”
ၽူၺ်းၵေႃႈ ၸင်ႇယိပ်းဢဝ်မိုဝ်းၸၢႆးၼွင်ႉ ၵႅၼ်ႇၵႅၼ်ႇသေ ပႆမႃးၸွမ်းၸၢႆးၼွင်ႉယူႇ ၊ ယွၼ်ႉပိူဝ်ႈ ၵူဝ်တူၵ်းၶူဝ်လႄႈ ၽူၺ်း ဢမ်ႇတၼ်းဝူၼ်ႉသင်သေတႃႉ ၸၢႆးၼွင်ႉၵေႃႉၼိုင်ႈတႄႉ လႆႈယိပ်းမိုဝ်းၼုမ်ႇၼုမ်ႇဢွၼ်ႇ ၽူၺ်းလႄႈ “ မၼ်းၼွၼ်းၽၼ်ႁိုဝ်ၼေႃး ... ” ၼႆမၼ်းၶိုၼ်း လွမ်ထၢမ်တူၺ်း တူဝ်မၼ်းယူႇ ။ ၶႃသွင်ၵေႃႉ ၸုင်မိုဝ်းၵၼ်သေ သိုပ်ႇပႆမႃး ၼိူဝ်ၶူဝ်ၽႅၼ်ၼၼ်ႉယူႇ ။ ယိင်းၸၢမ်လၵ်ႉထႆႇႁၢင်ႈ ၶႃသွင်ၵေႃႉဝႆႉ ၼႆ ၶႃသွင်ၵေႃႉ ဢမ်ႇတၼ်းႁူႉထိုင်။
ၽွင်းမိူဝ်ႈ ၸမ်တေထိုင် တီႈယိင်းၸၢမ်ၶဝ် လူဝ်ႇထႅင်ႈမွၵ်ႈသွင်ဝႃးၼၼ်ႉ သၢႆၸိူၵ်ႈၵေႃႈ သုင်ဝႆႉလႄႈ ၽူၺ်း ဢမ်ႇႁတ်းယိပ်းသေ မၼ်းဢဝ်မိုဝ်းမၼ်း သွင်ၶွၼ်ယိပ်းဝႆႉ မိုဝ်းၸၢႆးၼွင်ႉယူႇ ။ ၽွင်းၼၼ်ႉ ၵူၼ်းထႅင်ႈၸုမ်းၼိုင်ႈ ၶိုၼ်ႈၽႅဝ်မႃး ၼိူဝ်ၶူဝ်ၽႅၼ်သေ ဢွၼ်ၵၼ်သႂ်ႇႁႅင်း ယွပ်ႇၶူဝ်ၽႅၼ်ယူႇ ၊ ၶူဝ်ၽႅၼ်ၵေႃႈ ဢိူင်ႇဢၢင်ဝႆၵႂႃႇဝႆၶိုၼ်း ႁႅင်းဝႆႉတၢၼ်ႇတၢၼ်ႇလႄႈ ၽူၺ်းၵူဝ်တူၵ်းသေ ၼႅတ်ႈၵွတ်ႇၶႅၼ်ၸၢႆးၼွင်ႉဝႆႉ ႁႅင်းႁႅင်းယဝ်ႉ ။
ႁူဝ်ၸႂ်ၸၢႆးၼွင်ႉ ဢမ်ႇတွၼ်ႉတွတ်ႇသေပွၵ်ႈၵေႃႈ မေႃတွတ်ႇၽႂ်းမႃးတႄႉတႄႉ ၊ မၼ်းၸင်ႇဢွၼ်ဢဝ်ၽူၺ်း သိုပ်ႇပႆ ႁႂ်ႈၽႅဝ်ႁိမ်းယိင်းၸၢမ်ၶဝ်ယဝ်ႉ လႆႈႁၼ်ယိင်းၸၢမ်ယိုၼ်ႈမိုဝ်းသေ ပႂ်ႉႁပ်ႉၽူၺ်းယူႇလႄႈ ၽူၺ်းၵေႃႈ ၸင်ႇဢဝ်မိုဝ်းမၼ်းၶွၼ်ၼိုင်ႈ ယိုၼ်းယိပ်းမိုဝ်းယိင်းၸၢမ်သေ ၶွၼ်ၼိုင်ႈသမ်ႉ ယိပ်းဝႆႉမိုဝ်း ၸၢႆးၼွင်ႉသေ ၶိုၼ်ႈမႃးၼိူဝ်လၢင်း ဢၼ်မီးၼိူဝ်တူၼ်ႈမႆႉၼၼ်ႉယဝ်ႉ ။
မၼ်းၼၢင်းထူၺ်ႈၸႂ်လူင်ၵမ်းၼိုင်ႈႁႅင်းႁႅင်း ဢဝ်မိုဝ်းတူပ်းဢူၵ်းမၼ်းၼၢင်း သေ -
“ ဢလူဝ်ႉ ... ... ၽူၺ်း ဢမ်ႇႁတ်းၶၢမ်ႈထႅင်ႈသေပွၵ်ႈယဝ်ႉ”
ၶဝ်ဢွၼ်ၵၼ် ၸူမ်းၶူဝ်ၽူၺ်းသေ တႆးၵေႃႉယိင်းၸၢမ်ၸင်ႇဝႃႈ -
“ ၽူၺ်း ...ၶိုၼ်းၶၢမ်ႈၵႂႃႇၽၢႆႇပုၼ်ႉလႄႈ ႁဝ်းတေပၼ်ငိုၼ်းပၢၵ်ႇၼိုင်ႈ ... ၼႃႈ ... ၽူၺ်း ... ၼေႃႈ ... ... ”
“ ပေႃးယဝ်ႉ ... ပေႃးယဝ်ႉ ... ပၼ်ႁႃႈပၢၵ်ႇၵေႃႈ ဢမ်ႇၶၢမ်ႈ”
“ တေပၼ် ႁဵင်ႁႃႈပၢၵ်ႇ ... ”
“ ပၼ်ၵႃႈႁိုဝ်ၵေႃႈ ဢမ်ႇၶၢမ်ႈ ... ”
မၼ်းၼၢင်းဝႆႁူဝ်သေ ယုမ်ႉဝႆႉယူႇလႄႈ ၼႃႈတႃမၼ်းၼၢင်း ပဵၼ်ဢၼ်လီႁၵ်ႉပိူၼ်ႈတႄႉတႄႉ ၊ ၶဝ်ၼင်ႈၼိူဝ်လၢင်းၼၼ်ႉ ၵႅပ်ႉၼိုင်ႈသေ သိုပ်ႇလူင်းမႃးဢႅဝ်ႇ တီႈတႂ်ႈၼႆႉယူႇ ၽူၺ်းၸင်ႇဝႃႈ -
“ ၸၢမ်... ၼမ်ႉတူၵ်းတၢတ်ႇဢွၼ်ႇ လႆလူင်းၸွမ်းၵႄႈလွႆၸိူင်ႉၼႆၼႆႉ ... ပဵၼ်သၽႃႇသ တၢင်းႁၢင်ႈလီမိူင်းလွႆႁဝ်းဢိူဝ်ႈ ... ၼေႃႈ ”
“ ၸႂ်ႈဢိူဝ်ႈ ... ၽူၺ်း ... တီႈမိူင်းတႆးႁဝ်း ၶႅၼ်းမီးၼမ် ၶႅၼ်းႁၢင်ႈလီသေတီႈၼႆႈ ပၢၵ်ႇပုၼ်ႈႁဵင်ပုၼ်ႈၵွၼ်ႇဢိူဝ်ႈ ... ၽူၺ်း ... ...”
“ တႄႉႁႃႉ ... ၽူၺ်း တႃႉၶႂ်ႈၵႂႃႉတူၺ်းလႃႈ ... ...”
“ ၼမ်ႉတူၵ်းတၢတ်ႇ ဢၼ်သုင်သေပိူၼ်ႈ တီႈၼႂ်းမိူင်းတႆးႁဝ်းတႄႉ ပဵၼ်ၼမ်ႉတူၵ်းတၢတ်ႇၵဵင်းတွင်း ဢၼ်ဝႃႈၼၼ်ႉယဝ်ႉ ... ...”
“ ၵဵင်းတွင်းၼႆႉ မီးတီႈလႂ်ပုၼ်ႉ ... ၸၢမ်... ”
“ ၵဵင်းတွင်းၼႆႉ မီးတီႈၼႂ်းၸေႊဝဵင်းမိူင်းၼၢႆး ဢိူဝ်ႈ ... ”
“ တၢတ်ႇၼၼ်ႉ သုင်ဝႆႉတႄႉႁႃႉ ... ၸၢမ်... ”
“ သုင်လေႃႇ ... ...”
“ သုင်တၢၼ်ႇႁိုဝ် ... သုင်ၵႃႈႁိုဝ်ဝႃႈ ... ”
“ သုင် 887 ပေႇ ဝႃႈၼႆယဝ်ႉ ... ပေႃးဢဝ်ႁႅင်းၼမ်ႉၼၼ်ႉသေ ၸႂ်ႉတိုဝ်း ပဵၼ်လႆႈႁႅင်းၽႆးၽႃႉၼႆၸိုင် မိူင်းတႆးႁဝ်းၵူႈတီႈတီႈ တေႁိူဝ်ႈလႅင်းၸွတ်ႇမိူင်းယူႇ ၼႆယဝ်ႉ ... ၽူၺ်း ... ... ”
“ ဢေႃႈ ... ... ၵဵင်းတွင်းဢၼ်ဝႃႈၼၼ်ႉ ပဵၼ်မိူင်းၶုၼ်သၢမ်လေႃးၶဝ်ဢိူဝ်ႈ ... ၼေႃ ... ”
“ ၸႂ်ႈဢိူဝ်ႈ ... ၽူၺ်း ... ၶုၼ်သၢမ်လေႃးလႄႈ ၼၢင်းဢုပဵမ်ႇၼႆ ၽူၺ်း ယၢမ်ႈငိၼ်းယူႇဢမ်ႇၸိုဝ်ႈ ႁိုဝ် ... ”
“ ယၢမ်ႈငိၼ်းယူႇ ... ဢေႃး ... ၼၢင်းဢုပဵမ် ယူႇမိူင်းလႂ်ၵေႃ”
“ ယူႇမိူင်းၵိုင်ဢိူဝ်ႈ ... ၼမ်ႉတူၵ်းတၢတ်ႇၵဵင်းတွင်းၼၼ်ႉ ႁူဝ်မၼ်း တႄႇမႃးတီႈမိူင်းၵိုင်သေ ႁွင်ႉဝႃႈ ၼမ်ႉတဵင်း ၼႆယဝ်ႉ ... ”
ၶဝ်သိုပ်ႇပႆသိုပ်ႇဢုပ်ႇၵၼ်မႃး ဢႅဝ်ႇၸွတ်ႇမူတ်းယဝ်ႉသေ ယိင်းၸၢမ်ၸင်ႇဝႃႈ -
“ ၽူၺ်း ... ႁဝ်းဢွၼ်ၵၼ် ၵႂႃႇႁႃၵိၼ် ၼမ်ႉၵတ်းၼမ်ႉဝၢၼ်ႁေၵွၼ်ႇႁိုဝ်ႉ ... ? ”
“ လီယူႇၼႃႇ ... ”
ၶဝ်ဢွၼ်ၵၼ် မႃးၼင်ႈလွမ်ႉၽိူၼ်ဢွၼ်ႇ လုၵ်ႈၼိုင်ႈသေ သင်ႇၵိၼ်ၼမ်ႉဝၢၼ်ယူႇ ယိင်းၸၢမ် ၸင်ႇထၢမ် -
“ ၸဝ်ႈလေႃႉမႃႉ ... လႆႈမႃးဢႅဝ်ၸွမ်းႁဝ်းၸိူင်ႉၼႆ ... ႁိူဝ်ႉၼႃႇယဝ်ႉယူဝ်ႉ ... ”
ၸၢႆးၼွင်ႉ ယုမ်ႉၵမ်းၼိုင်ႈသေ ၶိုၼ်းတွပ်ႇဝႃႈ -
“ ဢမ်ႇႁိူဝ်ႉသႄႈ ... ”
င်းၸၢမ် ၸင်ႇၶိုၼ်းထၢမ်ၽူၺ်းယဝ်ႉ -
“ ၽူၺ်းၼႃႇ ... ၸွင်ႇႁိူဝ်ႉႁိုဝ် ... ? ၸွင်ႇၵျေႃႇႁိုဝ် ? ”
“ ဢမ်ႇႁိူဝ်ႉ ... ၽူၺ်းတႄႉ ၵျေႃႇဢိူဝ်ႈ ... ၶွပ်ႈၸႂ်ထိုင် ၸိူဝ်းၸၢမ်ၶဝ် ဢၼ်ၸွမ်းသူင်ႇၼႆႉတႄႉတႄႉ ယဝ်ႉ ... ”
ၽူၺ်းယုမ်ႉတူၺ်းၸၢႆးၼွင်ႉသေ -
“ ၶွပ်ႈၸႂ်ယႂ်ႇတႄႉတႄႉ ... ယဝ်ႉ ... ၸဝ်ႈလေႃႉမႃႉ ... ”
“ လႆႈယူႇၵူၺ်း ... ”
“ တၢင်ႇပွၵ်ႈ ပေႃးၽူၺ်းမႃးမေႇမဵဝ်ႉၼႆ တေမႃးၶၢတ်ႈလေႃႉမႃႉ ထႅင်ႈၸွင်ႇလႆႈႁိုဝ် ... ? ”
“ ယိင်းၸၢမ် ၸင်ႇဝႃႈ -
“ ၽူၺ်းမိူဝ်ႈၽုၵ်ႈ ပေႃးၽူၺ်း ၶိုၼ်းမိူဝ်းတႃႈၵုင်ႈၼႆ ၶၢတ်ႈမိူဝ်းၵမ်းလဵဝ်ႁေယဝ်ႉၼႃႇ ... ”
ၶဝ်ဢွၼ်ၵၼ် ယုမ်ႉႁၢင်ႈလီယူႇ ၊ ၸၢႆးၼွင်ႉၸင်ႇထၢမ် -
“ ၽူၺ်း ... တေမိူဝ်းမိူဝ်ႈၽုၵ်ႈ ႁႃႉ ... ? ”
ၽူၺ်းငွၵ်းႁူဝ်ၼႄသေ -
“ ၸႂ်ႈဢေႃႈ ... ပေႃးလေႉသၢင်ႉတၢင်းတေႃႇသေ ၽႅဝ်မႃးတႃႈၵုင်ႈၼႆ မႃးဢႅဝ်ႁိူၼ်းၽူၺ်းၶဝ်ၽွင်ႈၶႃႈၼႃႈ ... ၸဝ်ႈလေႃႉမႃႉ... ”
“ တႃႈၵုင်ႈ ဢၼ်ဝႃႈၼၼ်ႉ ... ၸိူင်ႉႁဝ်းၵူၼ်းၽၢၼ် ႁဵတ်းၵိၼ်ၵၢၼ်ၸွမ်းဝၼ်းလႂ်ဝၼ်းၼၼ်ႉ တေႁွတ်ႈယၢပ်ႇယူႇယူဝ်ႉ ... ”
“ မိူဝ်ႈၼႃႈ တေပဵၼ်သင်ၼႆ ဢမ်ႇလၢမ်းလႆႈသႄႈ ... ပေႃးသူၼ်မွၵ်ႇၸဝ်ႈလေႃႉမႃႉ ၶၢႆလႆႈမွၵ်ႇၼမ်ၼမ်ၼႆ တေလႆႈငိုၼ်းၼမ်ၼမ်သေ တေၸၢင်ႈမႃးဢႅဝ်ၽႅဝ်တႃႈၵုင်ႈယူႇၵႂႃႈ ... ”
“ ပေႃးဢဝ်ၸႂ်ဝႃႈတႄႉ ... ၶႂ်ႈမိူဝ်းၸွမ်းမိူဝ်ႈၽုၵ်ႈၵမ်းလဵဝ်ၵွၼ်ယဝ်ႉ ... ”
ၸၢႆးၼွင်ႉ ၶႂ်ႈဝႃႈၸိူင်ႉၼၼ်သေတႃႉ ၵႂၢမ်းၶေႃႈၼႆႉတႄႉ ပဵၼ်ၵႂၢမ်း ဢၼ်မီးဝႆႉၼႂ်းၸႂ်မၼ်းၵူၺ်း ဢၼ်မၼ်းလၢတ်ႈဢွၵ်ႇသူပ်းတႄႉ -
“ ၼင်ႇႁိုဝ် ပေႃးတေယၢမ်ႈႁွတ်ႈၼၼ်ႉ တေၶတ်းၸႂ်ယူႇၽူၺ်း... ၵူၺ်းၵႃႈ ပေႃးဝႃႈ တႆးဝၢၼ်ႈၼွၵ်ႈၸိူင်ႉၼင်ႇႁဝ်း ၽႅဝ်မိူဝ်းတႃႈၵုင်ႈၼႆႉ... ယူဝ်ၽူၺ်းၶဝ် တေဢမ်ႇဝၢႆႇတူၺ်းသေဢိတ်းၵွၼ်ႇယူဝ်း ... ”
ၽူၺ်း ၸင်ႇယုမ်ႉႁၢင်ႈလီလီသေ -
“ ၶိၵ်း... ၶိၵ်း ... ၸဝ်ႈလေႃႉမႃႉ ၶႂ်ႈမေႃလၢတ်ႈဝႆႉ ၼင်ႇၵဝ်ႇၼေႃ... ၽူၺ်းမေႃမိုတ်ႈပိူၼ်ႈယူႇၵူၺ်း... သွၼ်ႇႁႂ်ႈၽႅဝ်မႃးလႃႈ ...”
ဝၢႆးသေ ၶဝ်သူတ်ႉၼမ်ႉဝၢၼ် ဢုပ်ႇၵၼ်ယဝ်ႉ ၶဝ်ဢွၼ်ၵၼ် ပႆၶိုၼ်ႈမႃးၸူးလေႃႉမႃႉၶဝ် တီႈႁိမ်းတၢင်းၵႃးယူႇ ။
ၶဝ်ဢွၼ်ၵၼ်ၶိုၼ်ႈၶီႇလေႃႉသေ ၸၢႆးၼွင်ႉႁေႃႈမႃးတီႈႁိူၼ်းၶဝ် မႃးတၢင်ႇဢုမ်မွၵ်ႇသေ ၶိုၼ်းသိုပ်ႇႁေႃႈၵႂႃႇမေႇမဵဝ်ႉယူႇ ။ မၢၵ်ႇလေႃႉ လေႃႉမႃႉ ပၼ်ၵိင်ႈၵႂႃႇၼိူဝ်တၢင်းၵႃး ႁွပ်ႈၼိုင်ႈယဝ်ႉႁွပ်ႈၼိုင်ႈယူႇ တီႈၼိူဝ်လေႃႉမႃႉၼၼ်ႉ တႆးၵေႃႉယိင်းၸၢမ် ၸင်ႇဝႃႈ -
“ ၽူၺ်း... ပေႃးမိူဝ်းၵႂႃႇတႃႈၵုင်ႈၼႆ တေဢမ်ႇလိုမ်းလႆႈမေႇမဵဝ်ႉယဝ်ႉယူဝ်း ... ”
“ဢမ်ႇလိုမ်းလႆႈသႄႈ ... ”
“ လွင်ႈလႆႈၶီႇလေႃႉမႃႉၵေႃႈ တေၶုၵ်းၸႂ်လႆႈယူႇၵႂႃႈ ... ၼေႃ ”
ၽူၺ်း ယုမ်ႉႁၢင်ႈလီသေ -
“ မၢၵ်ပွၵ်ႈၵေႃႈ တေၶုၵ်းၸႂ်လႆႈယူႇၵႂႃႈ ... ”
“ ၸဝ်ႈလေႃႉမႃႉၵေႃႈ တေၶုၵ်းၸႂ်လႆႈပႃးယူႇယူဝ်ႉ ... ”
ၽူၺ်း ဢဝ်ၽႃႇမိုဝ်းၼုမ်ႇၼုမ်ႇမၼ်း ၽတ်ႉပၼ်မိုဝ်းတႆးၵေႃႉယိင်းၸၢမ်သေ -
“ ဢူဝ် ... လၢတ်ႈသင်ၵေႃႈဢမ်ႇႁူႉ... ”
ၶဝ်ဢွၼ်ၵၼ်ယွၵ်ႇၵၼ် ၼင်ႇၼၼ်သေ ၶူဝ်ယူႇၶိၵ်းၶိၵ်း ၊ ၸၢႆးၼွင်ႉၵေႃႈ ႁေႃႈလေႃႉမႃႉမၼ်းၵႂႃႇယူႇတိၵ်းတိၵ်း၊ မိူဝ်ႈၽုၵ်ႈၼႆႉ လႆႈႁူႉဝႃႈ ၽူၺ်းတေမိူဝ်းယဝ်ႉ ၼႆလႄႈ ၼႂ်းၸႂ်မၼ်း ပဵၼ်ႁိုဝ်ဝႆႉ ၼႆၵေႃႈ မၼ်းဢမ်ႇမေႃလၢတ်ႈဢွၵ်ႇ ၊ မၼ်းသိုပ်ႇႁေႃႈလေႃႉမႃႉမၼ်းယူႇ ၊ မၼ်းၵုမ်ႇဝူၼ်ႉယူႇၵူၺ်းလႄႈ ယိင်းၸၢမ်ၶဝ် ႁွင်ႉမၼ်း ၵိုတ်းလေႃႉမႃႉမၼ်းၵေႃႈ မၼ်းတေႃႈ ဢမ်ႇငိၼ်း ၊ ၽိူဝ်ႇၶဝ်ႁွင်ႉႁႅင်းႁႅင်း မၼ်းၸင်ႇတေငိၼ်းသေ ၵိုတ်းလေႃႉမႃႉမၼ်းယဝ်ႉ -
“ ဢလူဝ်ႉ ... ၸဝ်ႈလေႃႉမႃႉႁူၼူၵ်ႇႁႃႉ ... ၸၢမ်ၶဝ် လႆႈႁွင်ႉဢဝ်ႁဵတ်းတႄႉဢိူဝ်ႈ ... ၼႆႉ ... ”
ၸၢႆးၼွင်ႉၵေႃႈ ၸင်ႇယူႇၼိူဝ်လေႃႉသေ ထၢမ်ဝႃႈ -
“ တေႁဵတ်းသင် ... ဝႃႈ ... ”
“ ၼေႈ ... ၽူၺ်းၶႂ်ႈထႆႇၶႅပ်းႁၢင်ႈ မိူဝ်ႈၶီႇလေႃႉမႃႉ ...ၼႆဝႃႇ”
ၸၢႆးၼွင်ႉၵေႃႈ ၵိုတ်းလေႃႉမႃႉမၼ်းသေ မႃးၽုၺ်ႇၽၵ်းတူပၼ်ၶဝ်ယဝ်ႉ ၊ ယိင်းၸၢမ် ဢဝ်ၵႅမ်ႇမရႃႇမၼ်း ပၼ်ၸၢႆးၼွင်ႉသေ -
“ ၸဝ်ႈလေႃႉမႃႉ ... ယူႇတီႈၼွၵ်ႈၼၼ်ႉသေ ထႆႇပၼ်ႁဝ်းၶႅပ်းၼိုင်ႈၼႃႈ ... ...”
ၸၢႆးၼွင်ႉၵေႃႈ ယိူင်းသေထႆႇပၼ်ၶဝ်ယဝ်ႉ ။
“ ၸဝ်ႈလေႃႉမႃႉ ... ၽူၺ်းၶႂ်ႈႁေႃႈလေႃႉမႃႉသေ ထႆႇၶႅပ်းႁၢင်ႈ ၸွင်ႇတေလႆႈႁိုဝ် ... ? ”
“ လႆႈယူႇၵူၺ်း ... ၸွင်ႇၽူၺ်းတေႁတ်းၶိုၼ်ႈၶီႇ တီႈႁေႃႈလေႃႉၼၼ်ႉႁိုဝ် ... ? ”
“ ႁတ်းယူႇ... ”
ၽူၺ်းၵေႃႉၼိုင်ႈ ၶိုၼ်ႈၵႂႃႇၼင်ႈ တီႈႁေႃႈလေႃႉၼၼ်ႉသေ ယိပ်းၸိူၵ်ႈမႃႉဝႆႉယူႇ ၊ ယိင်းၸၢမ်ထႆႇၶႅပ်းႁၢင်ႈပၼ်မၼ်းယဝ်ႉ။ ဝၢႆးသေထႆႇႁၢင်ႈယဝ်ႉ ၽူၺ်းသမ်ႉ ၽႅတ်းၸိူၵ်ႈမႃႉလႄႈ မႃႉၵေႃႈ ၼႅတ်ႈဢႅၼ်ႇၵႂႃႇၵမ်းလဵဝ်ယဝ်ႉ။ လေႃႉမႃႉ ဢၢင်ႈၽႃႇၺႃး ယိင်းၸၢမ်လႄႈ ယိင်းၸၢမ်ၼႅတ်ႈဝႄႈပႅတ်ႈယဝ်ႉ။ ၽူၺ်းၵေႃႉၼိုင်ႈ တေလႆႈႁဵတ်းႁိုဝ်ၵေႃႈ မၼ်းၼၢင်းတေႃႈဢမ်ႇမေႃ မၼ်းၼၢင်းၵူဝ်တူၵ်းလေႃႉလႄႈ မၼ်းၼၢင်း ၼႃႈတႃလူႉၵႂႃႇတႄႉတႄႉသေ ထိင်းတူဝ်မၼ်းၼၢင်း ဢၼ်ပႃးၵႂႃႇၸွမ်းၼိူဝ် တီႈၼင်ႈၵူၼ်းႁေႃႈဝႆႉယူႇ ။
ၸၢႆးၼွင်ႉ ႁွင်ႉမႃႉၵိုတ်းၵေႃႈ မႃႉဢမ်ႇၵိုတ်းလႄႈ မၼ်းၸၢႆးၸင်ႇၼႅတ်ႈ လႅၼ်ႈလမ်းလေႃႉမႃႉမၼ်း ၽႂ်းၽႂ်းယဝ်ႉ ၊ ၽွင်းမႃႉလႅၼ်ႈၽႂ်းယူႇၼၼ်ႉ သင်ဝႃႈ ၽူၺ်းႁၢဝ်ႉၸိူၵ်ႈမႃႉၼႆၸိုင် မႃႉၸၢင်ႈၸုၵ်းသွင်တိၼ်သေ လေႃႉၸၢင်ႈၽႃႇမႃႉ လေႃႉၸၢင်ႈပိၼ်ႈၵႂႃႇၵွၼ်ႇယဝ်ႉ ၊ ၸၢႆးၼွင်ႉၸင်ႇႁွင်ႉ လၢတ်ႈဝႃႈ -
“ ၽူၺ်း... ... ယႃႇပေႁွၵ်ႉၸိူၵ်ႈမႃႉ ... ၼႃႈ ... ” ၼႆလႄႈ ၽူၺ်းၵေႃႈ ဢမ်ႇႁတ်းၸၼ်ႁွၵ်ႉၸိူၵ်ႈမႃႉလႃးလႃး ။
ၸၢႆးၼွင်ႉ ဢႅၼ်ႇလူၺ်းလမ်းၸွမ်းလေႃႉမႃႉ ၼႅတ်ႈဝႅၼ်ဢူင်ႇၶိုၼ်ႈလေႃႉ ယၢပ်ႇယၢပ်ႇယဵၼ်းယဵၼ်းသေ မႃးယိပ်းၶိုၼ်းၸိူၵ်ႈမႃႉယဝ်ႉ၊ မၼ်းပၼ်မႃႉ သိုပ်ႇဢႅၼ်ႇၵႂႃႇတၢၼ်ႇတၢၼ်ႇသေ ၸင်ႇထိင်းႁႂ်ႈမႃႉ ၵိုတ်းဢဝ်လွႆးလွႆးယဝ်ႉ ၽူၺ်း ၸင်ႇသဵင်သၼ်ႇသေ လၢတ်ႈဝႃႈ -
“ ၶွပ်ႈၸႂ်ယဝ်ႉ... ၸဝ်ႈလေႃႉမႃႉ ... ၵတ်ႉၵႃႈ ၸဝ်ႈလေႃႉမႃႉ မႃးဢဝ်လႃႈ ... သင်ဢမ်ႇၼၼ် ၽူၺ်းတေပဵၼ်သင်ၵေႃႈ ဢမ်ႇႁူႉယဝ်ႉ ... ”
ၸၢႆးၼွင်ႉ ၸင်ႇလွမ်တူၺ်းၼႃႈၽူၺ်းသေ -
“ ၽူၺ်းသမ်ႉ ၽႅတ်းၸိူၵ်ႈမႃႉ ႁဵတ်းသင်လႃႇ ... ? ”
“ ၽူၺ်း ...ယူဝ်ဝႃႈ ... မႃႉတေဢမ်ႇလႅၼ်ႈၼႆၵႂႃႈ ... ၸဝ်ႈလေႃႉမႃႉ ၶႂ်ႈၸႃႉတေႃႇၽူၺ်းယဝ်ႉယူဝ်ႉ ... ယႃႇပေၸႃႉၼႃႈ ... ၽူၺ်း ယွၼ်းတွင်းပၼ် ယူႇ ... ၼႃႈ ... ”
“ ဢမ်ႇၶႂ်ႈၸႃႉၼင်ႇၵဝ်ႇ ... မႆႈၸႂ်သေ ၵူဝ်ၽူၺ်း ပဵၼ်တႂ်ႈပဵၼ်ၼိူဝ်ၵႂႃႇဢိူဝ်ႈ ... ”
ၶႃသွင်ၵေႃႉ ၼင်ႈၼိူဝ်ႁူဝ်လေႃႉဢုပ်ႇၵၼ်သေ ၸၢႆးၼွင်ႉၶိုၼ်း ႁေႃႈလေႃႉ မႃးၸူး ယိင်းၸၢမ်ၶဝ်သၢမ်ၵေႃႉ ဢၼ်ၵိုတ်းဝႆႉၼၼ်ႉယူႇ ၊ ၽူၺ်းလၵ်ႉလွမ်ဝၢႆႇတူၺ်းၼႃႈ ၸၢႆးၼွင်ႉ ၵမ်းၼိုင်ႈသေ -
“ ဢေႃး ... ၵူဝ်ပဵၼ်တႂ်ႈပဵၼ်ၼိူဝ် ၼႆႁႃႉ ... ၸဝ်ႈလေႃႉမႃႉ မေႃမႆႈၸႂ်တၢင်ၽူၺ်းယူႇတႄႉတႄႉႁႃႉ ... ”
ၽူၺ်း ဝူၼ်ႉတူၺ်းၼႂ်းၸႂ်မၼ်း ၼင်ႇၼႆသေ ငဝ်မိုင်ဝႆႉယူႇ ၸၢႆးၼွင်ႇၸင်ႇဝႃႈ -
“ ၽူၺ်း ... ယေႃႈ ... ယိပ်းၸိူၵ်ႈမႃႉလႄႈ ... ”
“ ဢူဝ်... ၽူၺ်း ... ဢမ်ႇႁတ်းယိပ်းယဝ်ႉ ... ”
“ မၼ်းဢမ်ႇပဵၼ်သင်ထႅင်ႈယဝ်ႈ ၽူၺ်း... ယႃႇပေၽႅတ်းႁႅင်းၵူၺ်းလႃႈ ... ၼႃႈ ... ”
ၽူၺ်းၵေႃႈ ၶိုၼ်းယိပ်းဢဝ် ၸိူၵ်ႈမႃႉသေ ႁေႃႈမႃးတေႃႇထိုင် ႁိမ်းယိင်းၸၢမ်ၶဝ်ယဝ်ႉ -
“ ၽူၺ်း ...ၸၼ်ၸိူၵ်ႈမၼ်း ၶဵင်ႈလွႆးလွႆးလႄႈ ... ယႃႇပေၸၼ်တိူၵ်ႈၼႃႇၽႅဝ် ... လေႃႉမႃႉ တေၵိုတ်းၵႂႃႇယူႇ ... ”
ၽူၺ်းၵေႃႈ ႁဵတ်းၸွမ်းၼင်ႇၸၢႆးၼွင်ႉဝႃႈၼၼ်ႉသေ ဢဝ်လေႃႉမႃႉ ၵိုတ်းၵႂႃႇယဝ်ႉ ၊ ၽွင်းမိူဝ်ႈ ၸၢႆးၼွင်ႉလႄႈ ၽူၺ်းၼင်ႈၼိူဝ်လေႃႉသေ ၶီႇမႃး ၸွမ်းၵၼ်ၼၼ်ႉ ယိင်းၸၢမ်ထႆႇဝႆႉ ၶႅပ်းႁၢင်ႈၶႃသွင်ၵေႃႉ ထႅင်ႈယူႇယဝ်ႉ ။
“ ၽူၺ်း... လူင်းလီလီၼႃႈ ... ”
ၽူၺ်း ယုမ်ႉတူၺ်း ၼႃႈၸၢႆးၼွင်ႉ ၵမ်းၼိုင်ႈသေ -
“ ၵူဝ်ၽူၺ်း ပဵၼ်တႂ်ႈပဵၼ်ၼိူဝ် ႁႃႉ ... ? ”
ၸၢႆးၼွင်ႉ ဢမ်ႇၶိုၼ်းတွပ်ႇသင် မၼ်းယုမ်ႉသေ လွမ်တူၺ်း ၽူၺ်း ဢၼ်လူင်းၵႂႃႇၼၼ်ႉယူႇ ၊ ၽူၺ်းၶဝ်သီၵေႃႉ ၶိုၼ်းၶီႇလေႃႉယဝ်ႉသေ ၸၢႆးၼွင်ႉၵေႃႈ ၶိုၼ်းႁေႃႈမႃးၸူးမေႇမဵဝ်ႉယူႇ ၊ ယိင်းၸၢမ် ၸင်ႇဝႃႈ-
“ ၽူၺ်း ... ၽူၺ်းၵႂႃႇၽႅတ်းၸိူၵ်ႈမႃႉ ႁဵတ်းသင် ... ၵတ်ႉၵႃႈလေႃႉမႃႉ ဢမ်ႇၽႃႇၸၢမ် ...လႃႈ ... ”
“ ၽူၺ်း ယူဝ်ဝႃႈ တေဢမ်ႇပဵၼ်သင် ... ၼႆဢိူဝ်ႈ ... ”
“ ၵတ်ႉၵႃႈ ၸဝ်ႈလေႃႉမႃႉ ယင်းလႅတ်းလႃႈ ...သင်ဢမ်ႇၼၼ်ပႄႇ ... ဢမ်ႇႁူႉလႆႈယဝ်ႈ ... ႁိုဝ်း ... ... ”
“ တႄႉဢိူဝ်ႈၼေႃႈ ... ၽူၺ်းပေႃးဢမ်ႇၶႂ်ႈႁတ်းဝူၼ်ႉယဝ်ႉ ”
“ လူဝ်ႇလႆႈ ၶွပ်ႈၸႂ်ယႂ်ႇၼမ်ၼိူဝ် ၸဝ်ႈလေႃႉမႃႉတႄႉတႄႉဢိူဝ်ႈၼၼ်ႉ ... ၼေႃ ... ၽူၺ်း ... ”
“ ၽူၺ်း ၶွပ်ႈၸႂ်ယူႇ ... ”
ၸၢႆးၼွင်ႉ ႁေႃႈလေႃႉမႃႉမၼ်း ၽႅဝ်မႃး ၽၢႆႇၼႃႈႁိူၼ်းယိင်းၸၢမ်ၶဝ်ယဝ်ႉလႄႈ မၼ်းၸင်ႇၵိုတ်းလေႃႉသေ လူင်းမႃးၽုၺ်ႇ ၽၵ်းတူလေႃႉမႃႉမၼ်း ပၼ်ၶဝ်ယဝ်ႉ ။
“ ဢုမ်မွၵ်ႇၼႂ်းသွင်းၼႆႉ တေဝႆႉတီႈလႂ် ... ? ၽူၺ်း ... ”
“ လူဝ်ႇမိူဝ်းဝႆႉ ၼႂ်းဝၢင်းႁိူၼ်းယူဝ်ႉၼေႃ ... ယိင်းၸၢမ် ... ”
“ ဢေႃႈ ... ဢဝ်မိူဝ်းဝႆႉ ႁိမ်းယွင်ၼမ်ႉၼၼ်ႉ လႆႈယူႇၼႃႇ ”
ၼွင်ႉ ၸင်ႇယွင်ႈဢဝ်သွင်းၼၼ်ႉ ၵႂႃႇဝႆႉ ႁိမ်းယွင်ၼမ်ႉယဝ်ႉ ယိင်းၸၢမ်ၵေႃႈ မႃးပၼ်ၵႃႈလေႃႉမႃႉသေ -
“ ၸဝ်ႈလေႃႉမႃႉ မိူဝ်ႈၼႆႉတႄႉ ယၢပ်ႇၸႂ်ၸွမ်းယိင်းၸၢမ်ၶဝ်သေ ႁိူဝ်ႉၵႂႃႇယဝ်ႉယူဝ်ႉ ... တင်းဝၼ်းယဝ်ႉလူး ... ”
“ ဢမ်ႇႁိူဝ်ႉၼင်ႇၵဝ်ႇ ... ၼႆႉပဵၼ်ၵၢၼ်ႁဝ်းတႃႇသေႇယဝ်ႉ ”
“ ၸဝ်ႈလေႃႉမႃႉ တေမိူဝ်းၵမ်းလဵဝ်ယဝ်ႉႁႃႉ ... မိူဝ်းလိုဝ်ႈႁိူဝ်ႉၸႂ် ၼိူဝ်ႁိူၼ်းၵွၼ်ႇလႄႈ ... ”
“ လီယဝ်ႉ ... ယိင်းၸၢမ် ... တီႈႁိူၼ်းမီးၵၢၼ်ဝႆႉလႄႈ တေမိူဝ်းၵမ်း လဵဝ်ယဝ်ႉ ... ”
“ တွင်းဝႆႉၼႃႈ ... ၼႆႉပဵၼ် ႁိူၼ်းယိင်းၸၢမ်ၶဝ်ဢေႃႈ... ”
ၸၢႆးၼွင်ႉ တွင်ႉမႆႈၼမ်ႉလႄႈ မၼ်းၸင်ႇထၢမ်ဝႃႈ -
“ ဢေႃႈ ... ယိင်းၸၢမ် ၼမ်ႉၵတ်းဢမ်ႇမီးႁႃႉ ... ၶေႃးႁႅင်ႈၼႃႇလႄႈ ၶႂ်ႈၵိၼ်ၼမ်ႉၵွၵ်းၼိုင်ႈ ၵူၺ်းယဝ်ႉ ... ”
ယိင်းၸၢမ်ၶဝ် ပဵၼ်ဢၼ်ၵဵင်ၸႂ်ၸၢႆးၼွင်ႉတႄႉတႄႉသေ ၽူၺ်း ၸင်ႇၵႂႃႇတၵ်းၼမ်ႉ မႃးပၼ်ၸၢႆးၼွင်ႉၵွၵ်းၼိုင်ႈယဝ်ႉ ၸၢႆးၼွင်ႉၵေႃႈ ဢိုၵ်ႉၵိၼ်ၼမ်ႉၼၼ်ႉ တင်းသဵင်ႈသေ -
“ ၶွပ်ႈၸႂ်ယဝ်ႉ ... ၽူၺ်း ... တေမိူဝ်းၵွၼ်ႇၼႃႈ ... ... ”
“ ဢေႃႈ ... လီယဝ်ႉ ... ”
“ မိူဝ်းၵွၼ်ႇ ... ယိင်းၸၢမ်ၶဝ် ... ”
“ ဢေႃႈ ... ဢေႃႈ ... တၢင်ႇပွၵ်ႈ မႃးၶဝ်ႈဝႄႉလႄႇယိင်းၸၢမ်ၶဝ်ၽွင်ႈၼႃႈ ... ”
“ တေမႃးယူႇ ... ”
ၸၢႆးၼွင်ႉ ၶိုၼ်ႈၶီႇၼိူဝ်လေႃႉမႃႉမၼ်းသေ ႁေႃႈလေႃႉမႃႉမၼ်းၵႂႃႇယဝ်ႉ၊ မၼ်းဝၢႆႇတူၺ်းတၢင်းလင်ၵမ်းၼိုင်ႈ လႆႈႁၼ် ၽူၺ်း ၶဝ်သီၵေႃႉ ၵၵ်းၵႆဝႆမိုဝ်းမွၼ်းမွၼ်း တေႃႇမၼ်းလႄႈ မၼ်းၵေႃႈ ယုၵ်ႉမိုဝ်းၶွၼ်းမွၼ်းမွၼ်းတေႃႇၶဝ်သေ သိုပ်ႇႁေႃႈလေႃႉမၼ်း ၵႂႃႇၸွမ်းတၢင်းမိူဝ်းယူႇ ။
ယွၼ်ႉပိူဝ်ႈ ႁႅင်းမႃႉတိုတ်ႉလၢၵ်ႈၸၼ်လႄႈ မၢၵ်ႇလေႃႉၵေႃႈၵိင်ႈယၢၼ်ၵႆ ၽူၺ်းၶဝ် ႁွပ်ႈၼိုင်ႈယဝ်ႉ ႁွပ်ႈၼိုင်ႈယူႇ တိၵ်းတိၵ်း ၊ ၽူၺ်း ၶဝ်ၵေႃႈ လွမ်မုင်ႈတူၺ်း မႃႉလေႃႉၸၢႆးၼွင်ႉ ဢၼ်ယၢၼ်ၵႆၶဝ် ႁွတ်ႈၵႂႃႇၵႆတိၵ်းတိၵ်း ၼၼ်ႉယူႇယဝ်ႉ ။