ၶႅၵ်ႇ/တွၼ်ႈၼိုင်ႈ
တီႈဢိူင်ႇဝဵင်းၵျွၵ်ႉမႄး ဝၢၼ်ႈၼႃးၶေႃ ။
လင်ႁိူၼ်းဢွၼ်ႇၶဝ် ၶပ်ႉယႆၸွမ်းၽင်ႇတၢင်းၵႃးသေ ပဵၼ်ဝၢၼ်ႈဢွၼ်ႇ ဢၼ်လီမူၼ်ႈသိူဝ်း ယဵၼ်ၸႂ်တႄႉတႄႉ။ ႁိူၼ်းဢွၼ်ႇၸၢႆးထုၼ်းလႄႈ ၼၢင်းၼူၼ်းၶဝ်ပေႃႈမႄႈလုၵ်ႈတႄႉ တူၵ်းၽိတ်ႇတူၵ်းၸွၵ်ႉဝႆႉ ဢိတ်းဢိတ်းသေတႃႉ ႁိူၼ်းၶဝ်ၵေႃႈ ပဵၼ်ႁိူၼ်းဢွၼ်ႇ ဢၼ်လီမူၼ်ႈသိူဝ်းဝႆႉယူႇ။
ၸၢႆးထုၼ်းလႄႈၼၢင်းၼူၼ်း တူၵ်းၼႃႈႁိူၼ်းလူၺ်ႈၵၼ်သေ ယၢမ်းလဵဝ်သမ်ႉပေႃးမီးမႃး လုၵ်ႈၸၢႆးဢွၼ်ႇသွင်ၵေႃႉ ဢၼ်ၸိုဝ်ႈဝႃႈ ၸၢႆးၸၢႆးလႄႈၸၢႆးၼွင်ႉၼၼ်ႉယဝ်ႉ။ ၶႃသွင်ၵေႃႉ ပီႈၼွင်ႉၵေႃႈ မေႃႁၵ်ႉၵၼ်တႄႉတႄႉ၊ ၽွင်းမိူဝ်ႈ ဢူႈမႄႈၶဝ် ၵႂႃႇႁဵတ်းသူၼ်ၼႆ ၶႃပီႈၼွင်ႉ ဢဵၼ်ႈၵေႃႉၼၢႆးၶဝ်သေ ၵိုတ်းဝႆႉတီႈႁိူၼ်းယဝ်ႉ။ ၼၢႆးၶဝ် ၼၢႆးမူၼ်းၵေႃႈ ႁၵ်ႉလၢၼ်ဢွၼ်ႇမၼ်း လိူဝ်ဢူၵ်းလိူဝ်ၸႂ်တႄႉတႄႉ။
ပေႃးဝႃႈ ႁွတ်ႈထိုင်မႃးတၢမ်းၶမ်ႈၼႆ ၶဝ်ၼၢႆးလၢၼ် ဢွၼ်ၵၼ်ၵႂႃႇဢၢပ်ႇၼမ်ႉႁွင်ႈဢွၼ်ႇ ဢၼ်မီးၽၢႆႇဢွၵ်ႇဝၢၼ်ႈၶဝ်ၼၼ်ႉယဝ်ႉ။ ၵူၼ်းဝၢၼ်ႈၶဝ်ၵမ်ႈၽွင်ႈ ၸိူဝ်းပွၵ်ႈၵၢၼ်မႃးၼႆႉ ၵမ်ႈၽွင်ႈ မႃးဢၢပ်ႇၼမ်ႉႁွင်ႈဢွၼ်ႇၼၼ်ႉသေ ၸင်ႇတေပွၵ်ႈမႃးမိူဝ်းႁိူၼ်းယဝ်ႉ။ ယွၼ်ႉပိူဝ်ႈ တေၽႅဝ်တီႈတႃႈၼမ်ႉယဝ်ႉလႄႈ ၸၢႆးၸၢႆး ယိပ်းၵွၵ်းဢၢပ်ႇၼမ်ႉမၼ်းသေ ဢႅၼ်ႇၵႂႃႇၸွမ်းတၢင်းၵႃးၽႂ်းၽႂ်းယဝ်ႉ။ ၸၢႆးၼွင်ႉတႄႉ ၼၢႆးၶဝ် ၸေးမၼ်းဝႆႉလႄႈ မၼ်းၵေႃႈ ၶႂ်ႈၽႅဝ်တႃႈၼမ်ႉၼႃႇသေ -
“ ၼၢႆးၼၢႆး... ၵႂႃႇၽႂ်းၽႂ်းလႄႈ... ”
“လွႆးလွႆးလေႃႇ... ၸၢႆး... ၼၢႆးႁိူဝ်ႉၼင်ႇၵဝ်ႇဢိူဝ်ႈ... ”
ၸၢႆးၼွင်ႉ ဢမ်ႇၽွမ်ႉၼၢႆးၶဝ်၊ မၼ်းၸၢႆး ယူႇၼိူဝ်လင် ၼၢႆးၶဝ်သေ ႁဵတ်းၸႃႉတေႃႇၼၢႆးၶဝ် ႁႂ်ႈၼၢႆးၶဝ် ၵႂႃႇၽႂ်းၽႂ်းယူႇ။ ၼၢႆးၶဝ် ၸင်ႇဢဝ်မၼ်း လူင်းၼိူဝ်လင်သေ ၸႂ်ႉမၼ်းၵႂႃႇႁင်းၵူၺ်းမၼ်းယဝ်ႉ။
“ ပေႃးမႂ်းၶႂ်ႈၵႂႃႇ ၽႂ်းၽႂ်းၵေႃႈ ၵႂႃႇၵူၺ်းမႂ်းလႄႈ... ”
ၸၢႆးၼွင်ႉၵေႃႈ ႁွင်ႉသႅၼ်ႇဝႃႈ- “ ၸၢႆးၸၢႆး... ” ၼႆသေ ဢႅၼ်ႇၵႂႃႇၸွမ်းလင် ပီႈၸၢႆးမၼ်းယဝ်ႉ။
ၼၢႆးၶဝ်ၸင်ႇလၢတ်ႈဝႃႈ- “ ၵႂႃႇလီလီ... ၵူဝ်လူမ်ႉ ” ၼႆသေတႃႉ ၸၢႆးၼွင်ႉတေႃႈ ဢမ်ႇငိၼ်း၊ ၸၢႆးၸၢႆးၵေႃႈ ပႂ်ႉႁပ်ႉၼွင်ႉမၼ်း ႁိမ်းၶူဝ်ဢုတ်ႇၼၼ်ႉသေ ပေႃးဝႃႈ ၸၢႆးၼွင်ႉၽႅဝ်မႃး ၶႃသွင်ၵေႃႉ ၸုင်မိုဝ်းၵၼ် ႁွင်ႉသႅၼ်ႇ ဢႅၼ်ႇလူင်းၵႂႃႇၸူးတႃႈၼမ်ႉ ၵျေႃႇၵျေႃႇသိူဝ်းသိူဝ်းယဝ်ႉ။
ၽွင်းမိူဝ်ႈ ၼၢႆးၶဝ်ၽႅဝ်မႃး တီႈတႃႈၼမ်ႉၼၼ်ႉ ၼၢႆးၶဝ်လႆႈႁၼ် ၶႃသွင်ၵေႃႉပီႈၼွင်ႉ သမ်ႉပေႃး လူင်းဢၢပ်ႇၼမ်ႉသေ ဢဝ်ၼမ်ႉႁူတ်းၵၼ် လဵၼ်ႈယူႇ။
“ ၶိူဝ်ယႃႇပေႁူတ်းၵၼ်ၸိူင်ႉၼၼ် ... ၼမ်ႉတေၶဝ်ႈႁူၶိူဝ်ဢိူဝ်ႈ ... ”
ၽွင်းၼၢႆးၶဝ် လွႆးၶူဝ်းယူႇၼၼ်ႉ ၶႃသွင်ၵေႃႉပီႈၼွင်ႉ ၵႂႃႇဢဝ်လိၼ်ၼဵဝ် မႃးသေ မႃးႁဵတ်းလဵၼ်ႈ ႁၢင်ႈဝူဝ်းၵႂၢႆးယူႇ။ ၸၢႆးၸၢႆးႁဵတ်းႁၢင်ႈဝူဝ်းဢွၼ်ႇ တူဝ်ၼိုင်ႈသေ-
“ၼွင်ႉ... ၼေႈ ဝူဝ်းၸၢႆးႁၢင်ႈလီၵျႃႉ ၼွင်ႉႁဵတ်းသင်လႃႇၼၼ်ႉ”
“ ၼွင်ႉႁဵတ်း ၵႂၢႆးဢိူဝ်ႈ... ”
“ ႁႃး... ႁႃး... ၵႂၢႆးၼွင်ႉ တမ်ႉဢမ်ႇမီးၶဝ်လႃႇ... ”
ၶႃပီႈၼွင်ႉ တူၺ်းႁၢင်ႈလိၼ်ၼဵဝ်ဢွၼ်ႇၶဝ်သေ ၶူဝ်ယူႇၶိၵ်းၶိၵ်း
“ၸၢႆး... ႁဵတ်းပၼ်ၼွင်ႉ ႁၢင်ႈၵူၼ်းလႄႈ... ”
ၸၢႆးၸၢႆးၵေႃႈ မိတ်းဢဝ်လိၼ်ၼဵဝ်သေ ႁဵတ်းႁၢင်ႈၵူၼ်းပၼ်ၼွင်ႉမၼ်းယူႇ -။
“ ၼႆႉပဵၼ်ၵွၵ်းႁူဝ်မၼ်း... ၼႆႉပဵၼ်တူဝ်မၼ်း...ၼႆႉပဵၼ်တိၼ်မၼ်း... ၼႆႉပဵၼ်မိုဝ်းမၼ်း... ၼေႈယဝ်ႉယဝ်ႈ ၼွင်ႉႁဵတ်းသင်လႃႇၼၼ်ႉ”
“ၼွင်ႉႁဵတ်း ဝၢၼ်ႇၶဝ်ႈမၼ်းဢိူဝ်ႈ... ”
“ ႁႃး... ႁႃး... ႁႃး... ဝၢၼ်ႇၶဝ်ႈမၼ်းယႂ်ႇၼႃႇလူင် ၼွင်ႉၵေႃႈ... ပေႃးတႅၵ်ႈတူၺ်း တူဝ်မၼ်းၼႆ သမ်ႉပေႃးတၢၼ်ႇၵုပ်းယဝ်ႉ... ”
ၶႃသွင်ၵေႃႉပီႈၼွင်ႉ ယၵ်ႉတူၺ်းၵူၼ်းဢွၼ်ႇလႄႈ ဝၢၼ်ႇၶဝ်ႈလူင်ၶႃၼၼ်ႉသေ ၸၢႆးၼွင်ႉၸင်ႇဝႃႈ -
“မၼ်းၵိၼ်လူင်လႄႈ ဝၢၼ်ႇၶဝ်ႈမၼ်း ယႂ်ႇဢိူဝ်ႈ ၶိၵ်း... ၶိၵ်း...”
ၶႃသွင်ၵေႃႉပီႈၼွင်ႉ သိုပ်ႇႁဵတ်းလဵၼ်ႈ မဵဝ်းၼိုင်ႈယဝ်ႉမဵဝ်းသေ ၵျေႃႇၸွမ်းၵၼ်ယူႇ။ ဝၢႆးၼၼ်ႉ ၼၢႆးၶဝ် ႁွင်ႉဢဝ်ၶႃပီႈၼွင်ႉ ဢၢပ်ႇၼမ်ႉပၼ်ၶႃပီႈၼွင်ႉသေ ၶဝ်ၶိုၼ်းပွၵ်ႈမႃးမိူဝ်းႁိူၼ်းယဝ်ႉ။ ၽွင်းမိူဝ်ႈၶဝ်မႃးၵိၼ်ၶဝ်ႈၶမ်ႈၼၼ်ႉ ၸၢႆးၸၢႆးလႄႈ ၸၢႆးၼွင်ႉ ၼင်ႈသွင်ၽၢၵ်ႇၶၢင်ႈမႄႈၶဝ်သေ ၵိၼ်ၶဝ်ႈယူႇ။
ၼၢႆးမူၼ်းၸင်ႇထၢမ် -
“ သူၼ်မၢၵ်ႇၶိူဝ်သူမ်ႈသူ လီယူႇၼႄႇ... သၢင်ႇထုၼ်း... ”
“လီယူႇဢေႃႈမႄႈ... ၵူဝ်မၢၵ်ႇႁဵပ်းတူၵ်းၽတ်ႉၵူၺ်းဢေႃႈ...”
ၸႂ်ႈတႄႉဢိူဝ်ႈၼေႃ ... ပီၵၢႆမၢၵ်ႇၶိူဝ်သူမ်ႈႁဝ်း ယင်းတၼ်းၺႃး ဢိတ်းၼိုင်ႈယူႇလူး ... ၵူၺ်းၵႃႈ ပီၼႆႉတႄႉ တေဢမ်ႇမိူၼ်ပီၵႆသႄႈ... လိၵ်ႈသၢင်းၵျၢၼ်ႇႁေႃးဝႆႉတႄႉ ၽူၼ်ႁူဝ်ပီႁၢင်ပီဢမ်ႇလီၼႆတႄႉ မၢၵ်းႁဵပ်းဢမ်ႇဢၢပ်ႈတူၵ်းသႄႈ... သၢင်ႇထုၼ်း...မိူဝ်ႈၽုၵ်ႈ မႂ်းမီးၵၢၼ်သင်ၼႆႉ...”
သၢင်ထုၼ်းၵေႃႈ ဢဝ်ၸေႃႉသူတ်ႉၵိၼ်ၼမ်ႉၽၵ်း ၸေႃႉၼိုင်ႈသေ -
“ မိူဝ်ႈၽုၵ်ႈၼႆႉ ၶႃႈတေၵႂႃႇၽၼ်းမႆႉသင်ႉထူဝ်ႇၼႆဢေႃႈ...”
“ဢေးၼူၼ်းလူး... မိူဝ်ႈၽုၵ်ႈ ဢၢၼ်းတေႁဵတ်းသင်...”
“ၶႃႈ ၶႂ်ႈၵႂႃႇၵၢတ်ႇဝဵင်းဢေႃႈ လူဝ်ႇၵႂႃႇသိုဝ်ႉၽႅၼ်ႇသိူဝ်ႈလႄႈ ၵူၼ် ပၼ်ၶႃပီႈၼွင်ႉၼႆဢေႃႈ... ”
ၽွင်းၼၼ်ႉ ၸၢႆးၼွင်ႉၸင်ႇဝႃႈ -
“သိုဝ်ႉပၼ် ၼွင်ႉၵွင်ႈ... ”
“လုၵ်ႈၸၢႆးတေသိုဝ်ႉႁဵတ်းသင် ... ၵွင်ႈ ... မႄႈတေသိုဝ်ႉၵႃးဢွၼ်ႇ မႃးပၼ် ၸၢႆးၼွင်ႉၼႃႈ... ”
ၸၢႆးၼွင်ႉဝႆ ႁူဝ်မၼ်းသေ -
“ဢိုဝ်... ၼွင်ႉၶႂ်ႈလႆႈၵွင်ႈၵူၺ်း... ၼွင်ႉၶႂ်ႈယိုဝ်းၵွင်ႈ တူင်ႉ...တူင်ႉ... ၼႆဢိူဝ်ႈ... ”
“ၸၢႆးၼွင်ႉတေယိုဝ်းၽႂ်လႃႇ... မႄႈဝႃႈ... ”
“ၼွင်ႉတေယိုဝ်း ၽူႈလၵ်ႉ... တေယိုဝ်းၵူၼ်းႁၢႆႉ... ”
ၽွင်းၼၼ်ႉ ၸၢႆးၸၢႆးၸင်ႇဝႃႈ -
“မႄႈမႄႈ ၸၢႆးၸၢႆးၶႂ်ႈလႆႈ ထူင်ႇမႂ်ႇမႂ်ႇ... ”
“ၸၢႆးတေ ၶႂ်ႈလႆႈထူင်ႁဵတ်းသင်... ”
“ၸၢႆးတေၶိုၼ်ႈၵျွင်း ၸိူင်ႉၼင်ႇပိူၼ်ႈ...”
“ဢိူဝ်ႈ... မႄႈတေသိုဝ်ႉမႃးပၼ်လႆ ... ၵိၼ်ၶဝ်ႈၶိူဝ်ပီႈၼွင်ႉႁႂ်ႈၸဵဝ်းယဝ်ႉ ၸဵဝ်းသဵင်ႈလႄႈ... ”
သေၵိၼ်ၶဝ်ႈယဝ်ႉ ဝၼ်းၶမ်ႈလပ်းသိင်ႇယဝ်ႉသေ ၶဝ်ဢွၼ်ၵၼ် ၼင်ႈသူတ်ႉၼမ်ႉၼဵင်ႈၶူမ်ၵၢင်ႁိူၼ်းယူႇ။
ၸၢႆးၼွင်ႉ မႃးၼင်ႈတၵ်းၼၢႆးၶဝ်သေ -
“ၼၢႆး... ၶႆႈၼႄဢပုမ်ႇ ”
ၸၢႆးၵေႃႈ သုတ်ႉၸမ် ႁိမ်းၼၢႆးၶဝ်သေ -
“တႄႉဢိူဝ်ႈ... ၼၢႆး... ၶႆႈၼႄဢပုမ်ႇလႄႈ... ... ”
ၼၢႆးမူၼ်းၵေႃႈ သူတ်ႉၵိၼ်ၼမ်ႉၼဵင်ႈၶူမ်ၵွၵ်းၼိုင်ႈသေ -
“တေလႆႈၶႆႈဢပုမ်ႇသင်... လၢၼ်... ”
“ ၶႆႈဢပုမ်ႇဢလွင်းဢိူဝ်ႈ... ၼၢႆး ... ”
“ ၼၢႆး ၶၢၼ်ႉၶႆႈ... ”
“ဢႃ... ... ၼၢႆးၵေႃႈ... ၼွင်ႉၶဝ်ၶႂ်ႈထွမ်ႇဢေႃႈ ”
“ဢပုမ်ႇ ဢပုမ်းပုမ်း ဝႅၼ်ၶဝ်ႈယုမ်းပုမ်သွင်ႇ... ဝႅၼ်ၶဝ်ႈႁွင်ႇပုမ်သႃး ဝႅၼ်ၶဝ်ႈၼႃးႁၢႆလၢႆ ဝႅၼ်ၶဝ်ႈၶူၵ်ႉတမ်တၢႆ... ”
“ ဢႃ... ... ၼၢႆးၼၢႆးၼႆႉ... ၶႆႈလီလီလေႃႇ... ”
“ ဢိူဝ်ႈ... ဢိူဝ်ႈ... ၼၢႆးတေၶႆႈလႆ ပႂ်ႉထွမ်ႇလီလီၼႃႈ... ”
ၶႃသွင်ၵေႃႉပီႈၼွင်ႉၵေႃႈ ပႂ်ႉထွမ်ႇဝႆႉယူႇ -
“ မိူဝ်ႈၵွၼ်ႇ... ၵွၼ်ႇ... မီးၵဝ်ႉတူဝ်ၼိုင်ႈ ၼူၵ်ႉသႅဝ်းတူဝ်ၼိုင်ႈ လႄႈ ၵႃတူဝ်ၼိုင်ႈ... ၶဝ်ပဵၼ်ဢူၺ်းၵေႃႉလီၵၼ် ဝႃႈ... ”
“ၵဝ်ႉၼႆၵေႃႈ ၶူၼ်မၼ်းပႆႇလၢႆးၸိူင်ႉၼႆ ၵႃလႄႈၼူၵ်ႉသႅဝ်းၵေႃႈ ၶူၼ်ၶဝ် ပႆႇလမ်ၸိူင်ႉၼႆ... ဝႃႇ... ”
ၸၢႆးၼွင်ႉၸင်ႇထၢမ်ဝႃႈ -
“ၶူၼ်ၶဝ် မိူၼ်ႁိုဝ်ဝႆႉလႃႇ... ၼၢႆးၼၢႆး... ”
“ၶူၼ်ၶဝ် ပဵၼ်သီၶၢဝ်ဝႆႉၼႆယဝ်ႉ... ”
“ ထိုင်မႃးဝၼ်းၼိုင်ႈ ၽွင်းမိူဝ်ႈၵဝ်ႉ တိုၵ်ႉၸပ်းၼိူဝ်ၵိင်ႇမႆႉသေ ဝူၼ်ႉငဝ်ယူႇၼၼ်ႉ လုၵ်ႈဢွၼ်ႇၵေႃႉၼိုင်ႈ ဢဝ်ၵၢင်ၵႂႃႉ ပိုတ်းပၼ်မၼ်းဝႃႈ ... ”
“ၸွင်ႇၸပ်းႁိုဝ်... ၼၢႆးၼၢႆး ... ”
“ၸပ်းဢိူဝ်ႈ... ”
“ၵဝ်ႉတၢႆပႅတ်ႈႁႃႉၼၢႆးၼၢႆး ... ”
ၸၢႆးၸၢႆးၸင်ႇဝႃႈ -
“ယႃႇပေမေႃးၸွမ်းလေႃႇ... ၼၢႆးၼၢႆးတေၶႆႈၼႄၵႂႃႈ ၼွင်ႉ...”
“ ၼွင်ႉၶႂ်ႈႁူႉၼႃႇ ၸွင်ႇၵဝ်ႉတၢႆႁိုဝ် ... ၼၢႆးၼၢႆး... ”
“ဢမ်ႇတၢႆ... ”
“ၸပ်းတီႈလႂ်မၼ်းလႃႇ... ၸပ်းၵွၵ်းႁူဝ်မၼ်းႁႃႉ... ၼၢႆးၼၢႆး”
“ႁူဝ်မၼ်းတႄႉဢမ်ႇၸပ်း မၢၵ်ႇၵၢင်ႇလုၵ်ႈလဵၵ်ႉဢိတ်းၼိုင်ႈလႄႈ မၢၵ်ႇၵၢင်ၼၼ်ႉ ၸပ်းသႂ်ႇၵူၼ်ႈၵဝ်ႉသေ... ၶမ်ဝႆႉ ၼႂ်းၵူၼ်ႈမၼ်းၼႆယဝ်ႉ ... ”
“ႁဵတ်းၼၼ်သေ ... ၵဝ်ႉၵေႃႈ ဢမ်ႇၸၢင်ႈၶီႈ ဢမ်ႇၸၢင်ႈယဵဝ်ႈယဝ်ႉ... ဢိူဝ်ႈ... ”
ၸၢႆးၼွင်ႉၸင်ႇဝႃႈ -
“ဢႃ... ၼၢႆးၼၢႆး ... မၢင်ၵၢင်ႇၶဝ်ႈၵူၼ်ႈမၼ်းၼႆ မၼ်းဢမ်ႇၸၢင်ႈၶီႈသေတႃႉ မၼ်းၸၢင်ႈယဵဝ်ႈယူႇၵႂႃႇ... ”
ၶဝ်ပေႃႈမႄႈလုၵ်ႈ ဢွၼ်ၵၼ်ၶူဝ်ၸၢႆးၼွင်ႉသေ ၼၢႆးၶဝ်ၸင်ႇၶိုၼ်းလၢတ်ႈဝႃႈ -
“ ၼေႈ... ၸၢႆးၼွင်ႉ ... မဵဝ်းၼူၵ်ႉ မဵဝ်းၵႃ မဵဝ်းၵႆႇ ဢၼ်ဝႃႈၼၼ်ႉ ႁူးၶီႈႁူးယဵဝ်ႈ ပဵၼ်ဢၼ်လဵဝ်ၵၼ်ဝႃႈ... ၵွပ်ႈၼႆ... ၵဝ်ႉဢမ်ႇၸၢင်ႈၶီႈ ဢမ်ႇၸၢင်ႈယဵဝ်ႈသေ ... ငဝ်ၵဝ်ႉဝႆႉယူႇ ယဝ်ႈ... ... ”
“ထၢင်ႇဝႃႈ တေၶီႈဢွၵ်ႇဝၼ်းလႂ်ၵေႃႈ ဢမ်ႇဢွၵ်ႇလႄႈ မၼ်းၸင်ႇၵႂႃႇၸူး ၼူၵ်ႉသႅဝ်းသေ လၢတ်ႈၼႄ လွင်ႈမၢၵ်ႇၵၢင်ႇၵွၼ် ၶမ်ၵူၼ်ႈမၼ်းၼၼ်ႉယဝ်ႉ... ... ”
“ၼူၵ်ႉသႅဝ်းၵေႃႈၸင်ႇဝႃႈ ... ၵိၼ်မၢၵ်ႇႁွတ်ႈလႄႈၼႆသေ ၵဝ်ႉၵေႃႈၵႂႃႇ ႁႃၵိၼ်မၢၵ်ႇႁွတ်ႈယဝ်ႉ... ဝၢႆးသေ ၵိၼ်မၢၵ်ႇႁွတ်ႈယဝ်ႉ တွင်ႉၶႂ်ႈၵႂႃႇယူႇသေတႃႉ မၢၵ်ႇၵၢင်ႇၵွၼ် သမ်ႉဢိူတ်းဝႆႉလႄႈ ဢမ်ႇၸင်ႈၵႂႃႇ... ၶႅၼ်း ပဵၼ်ဢၼ်ၶၢၼ်ၸႂ်ယဝ်ႉ... ”
“ၼူၵ်ႉသႅဝ်းၵေႃႈ ဢမ်ႇၸၢင်ႈႁဵတ်းႁိုဝ်...ၸင်ႇၼႅတ်ႈမိၼ်ၽႂ်းၽႂ်းသေ ၵႂႃႇႁႃႁွင်ႉၵႃမႃး... ၼႆယဝ်ႉ ”
“ၵႃၵေႃႈ...လႆႈႁူႉၶၢဝ်သေ ၼႅတ်ႈမႃးၸူးၵဝ်ႉၽႂ်းၽႂ်း...ၼႆယဝ်ႉ”
“ၵႃၸင်ႇဝူၼ်ႉလႆႈမဵဝ်းၼိုင်ႈသေ... ၸႂ်ႉႁႂ်ႈၵဝ်ႉၵႂႃႇၼင်ႈၸေႈဝႆႉၼႂ်းၼမ်ႉ... ႁဵတ်းၼၼ်သေ ယူႇၵမ်းၼိုင်ႈ ... ၸူးဢဝ်မၢၵ်ႇၵၢင်ႇၵွၼ်ႇၼၼ်ႉ ဢူၼ်ႈမႃးယၢႆႈမႃးလွႆးလွႆးသေ ၵွပ်ႈပိူဝ်ႈ ၵဝ်ႉသမ်ႉၵိၼ် မၢၵ်ႇႁွတ်ႈဝႆႉလႄႈ ပေႃးမၼ်းၼဵင်ႇမင်ႁႅင်းႁႅင်းၼႆ ၸူးဢဝ်မၢၵ်ႇၵၢင်ႇၵွၼ်ၼၼ်ႉ ယၢႆႈဢွၵ်ႇၵႂႃႇ ပႅတ်ႈၵမ်းလဵဝ် ... ၼႆယဝ်ႉ ... ”
“ႁဵတ်းၼၼ်သေ ၶဝ်ၼႆႉႁၵ်ႉႁွမ်ၵၼ် ယူႇၸွမ်းၵၼ် ၵိၼ်ၸွမ်းၵၼ် ႁဵတ်းၵေႃႉၵၼ်မႃးတႃႇသေႇ ၼႆယဝ်ႉ... ”
“ထိုင်မႃးဝၼ်းၼိုင်ႈ ... ၵႃၵႂႃႇလၵ်ႉလႆႈမႃး ၼမ်ႉမိုၵ်ႉ ႁေႃႇၼိုင်ႈ မၼ်းထၢင်ႇဝႃႈ ပဵၼ်ႁေႃႇတၢင်းၵိၼ်ၼႆသေ ဢဝ်မႃးၸူးၼူၵ်ႉသႅဝ်းလႄႈ ၵဝ်ႉယဝ်ႉ... ”
“ ၽိူဝ်ႇၶဝ်မႃးလိတ်ႈတူၺ်း ... ၶဝ်ႁူႉဝႃႈ မၼ်းဢမ်ႇၸႂ်ႈ တၢင်းၵိၼ်... မၼ်းပဵၼ်ၼမ်ႉမိုၵ်ႉ... ၼႆယဝ်ႉ... ”
“ၼူၵ်ႉသႅဝ်းၸင်ႇထၢမ်ဝႃႈ... ၼမ်ႉမိုၵ်ႉၼႆႉ ပိူၼ်ႈဢဝ်ႁဵတ်းသင်ၼႆလႄႈ ... ၵဝ်ႉၸင်ႇလၢတ်ႈၼႄ ၼမ်ႉမိုၵ်ႉၼႆႉ ပိူၼ်ႈဢဝ်တႅမ်ႈလိၵ်ႈ ပိူၼ်ႈဢဝ်ယွမ်ႉ ဢဝ်တႃး... ၼႆယဝ်ႉ... ”
“ၵဝ်ႉၸင်ႇဝႃႈ... မၼ်းတေၶၢမ်ႇယွမ်ႉဢွၼ်တၢင်း ၼႆယဝ်ႉ... ၼူၵ်ႉသႅဝ်းလႄႈၵႃၵေႃႈဝႃႈ ... ၶႃတေယွမ်ႉဢွၼ်တၢင်းၼႆ ၼင်ႇၵဝ်ႇၵူၺ်း
ၵႃ ... ၵဝ်ႉၸင်ႇသပ်းလႅင်းၼႄဝႃႈ...ၽွင်းမိူဝ်ႈ မၢၵ်ႇၵၢင်ႇၵွၼ်ၶမ်ၵူၼ်းမၼ်းၼၼ်ႉ ၼူၵ်ႉသႅဝ်းလႄႈၵႃ မီးၵႄးၸူးၼိူဝ်မၼ်း ... ၵွပ်ႈၼႆ ၼူၵ်ႉသႅဝ်းလႄႈၵႃ ၶႂ်ႈယွမ်ႉၶႂ်ႈတႃးပၼ်မၼ်း ၸိူင်ႉႁိုဝ်ၵေႃႈ မၼ်းတေၶၢမ်ႇၸၢမ်းတူၺ်းဢွၼ်တၢင်း ၼႆလႄႈ... ၼူၵ်ႉသႅဝ်းလႄႈ ၵႃၵေႃႈ ပႅင်ႈၼင်ႇမေႃၸႂ်ၶႃၼၼ်ႉ ယွမ်ႉပၼ်တႅမ်ႈပၼ် ၵဝ်ႉၶႅမ်ႉၶႅမ်ႉလႅပ်ႈလႅပ်ႈယဝ်ႉ... ”
“ပေႃးဝႃႈယဝ်ႉၼႆ ၵဝ်ႉမႃးလွမ်တူၺ်းတူဝ်မၼ်း တီႈၽင်ႇၼမ်ႉသေ မၼ်း ပဵၼ်ဢၼ်ထုၵ်ႇၸႂ်မၼ်းတႄႉတႄႉသေ ၸူမ်းတူၺ်းႁၢင်ႈမၼ်း ၼႂ်းၼမ်ႉယူႇဝႃႇ... ”
“ၵႃလမ်ၸင်ႇဝႃႈ မႃးယွမ်ႉပၼ်ႁႃးၶိုၼ်းၽွင်ႈလႄႈ ၼႆသေတႃႉ ၵဝ်ႉၸင်ႇၶိုၼ်းဝႃႈ ပႂ်ႉႁႂ်ႈၼမ်ႉမိုၵ်ႉ တီႈတူဝ်မၼ်း ႁႅင်ႈၵွၼ်ႇၼႆယဝ်ႉ... ”
“ၼူၵ်ႉသႅဝ်းလႄႈ ၵႃၵေႃႈ ၸႂ်ဢမ်ႇယၢဝ်းသေ ၸႂ်ႉႁႂ်ႈၵဝ်ႉၶိုၼ်းမႃး ယွမ်ႉပၼ်ၶႃယူႇ... ၵဝ်ႉၸင်ႇဝႃႈ ၶူၼ်ၵဝ်ပႆႇႁႅင်ႈ ႁႂ်ႈၵႃ ယွမ်ႉပၼ်ၼူၵ်ႉသႅဝ်းယူႇယဝ်ႉ ၵႃလမ်ၵေႃႈ ၸႂ်လမ်သေ ၸင်ႇယွမ်ႉလမ်ပၼ်ၼူၵ်ႉသႅဝ်း တင်းတူဝ်ယဝ်ႉ... ”
“ၼူၵ်ႉသႅဝ်းၸင်ႇဝႃႈတီႈၵႃ ... ႁဵတ်းသင် သမ်ႉယွမ်ႉလမ်ပၼ်ၵဝ် တင်းတူဝ်... ၼႆယဝ်ႉ... ၵႃၸင်ႇၶိုၼ်းဝႃႈ... ပေႃးမႂ်းၵႂႃႇသုၵ်ႈၼမ်ႉၼႆ ၼမ်ႉယႃႈမၼ်း တေလူၼ်ႇသေ ၶူၼ်မႂ်းတေႁၢင်ႈလီမႃးဢိူဝ်ႈ ... ၼႆယဝ်ႉ”
“ၼူၵ်ႉသႅဝ်းၵေႃႈ ၸင်ႇမိၼ်ၵႂႃႇ ႁိမ်းၵဝ်ႉၼၼ်ႉသေ ၵႂႃႇသုၵ်ႈၶူၼ်မၼ်း ယူႇသေတႃႉ ၼမ်ႉမိုၵ်ႉၼၼ်ႉ ဢမ်ႇလူၼ်ႇ... ”
“ၵႃၸင်ႇဝႃႈတီႈၵဝ်ႉ ... ႁႂ်ႈယွမ်ႉပၼ်မၼ်း ႁၢင်ႈလီလီၼႆယဝ်ႉ...ၵဝ်ႉၵေႃႈ ၵႂႃႇတူၺ်းႁၢင်ႈမၼ်း တီႈၼႂ်းၼမ်ႉ ပဵၼ်ဢၼ်ႁၢင်ႈလီၼႃႇလႄႈ မၼ်းၶႂ်ႈၵႂႃႇၼႄ ပိူၼ်ႈၼႅၼ်ႇယဝ်ႉ... ”
“မၼ်းသမ်ႉလူဝ်ႇလႆႈယွမ်ႉပၼ်ၵႃၵွၼ်ႇ မၼ်းၶႂ်ႈႁႂ်ႈၸဵဝ်းယဝ်ႉၼႃႇလႄႈ မၼ်းၸင်ႇ ဢဝ်ၼမ်ႉမိုၵ်ႉထွၵ်ႇသႂ်ႇပၼ်ၵႃ ႁႂ်ႈလမ်ၽိတ်းတင်းတူဝ်သေ မိၼ်ပၢႆႈၵႂႃႇ ၵႆၵႆယဝ်ႉ... ”
“ၵႃၵေႃႈ လႆႈႁူႉၵဝ်ႉႁဵတ်းၵူတ်ႉတေႃႇမၼ်း ယွမ်ႉပၼ်မၼ်း ႁႂ်ႈလမ်တင်းတူဝ်လႄႈ မၼ်းၸင်ႇ ဢၢင်ႈၵႂႃႇသုၵ်ႈ တီႈတႃႈၼမ်ႉယဝ်ႉ... ၼူၵ်ႉသႅဝ်းၵေႃႈ သုၵ်ႈၶူၼ်မၼ်း ဢမ်ႇလူၼ်ႇလႆႈယဝ်ႉလႄႈ ၸႂ်လမ်တေႃႇၵႃသေ ပေႃးဝႃႈ ႁၼ်ၵႃမႃး တီႈတႃႈၼမ်ႉၼႆ လမ်းသၵ်းၵႃ လမ်းသႅတ်ႈႁူဝ်ၵႃယူႇ တိၵ်းတိၵ်း တေႃႇထိုင်ယၢမ်းလဵဝ် ၼႆယဝ်ႉ ... ၵႃလမ်ၵေႃႈ ၸႂ်ယမ်တေႃႇၵဝ်ႉသေ ပေႃးဝႃႈႁၼ်ၵဝ်ႉၼႆ လမ်းသၵ်းၵဝ်ႉတိၵ်းတိၵ်း လႄႈ ၵၢင်ဝၼ်းၼႆႉ ၵဝ်ႉလႆႈပၢႆႈတဵတ်ႇဝႆႉသေ ၵၢင်ၶမ်ႈၸင်ႇတေ ဢွၵ်ႇမႃးႁႃၵိၼ်ႁႃယမ်ႉ ၼႆယဝ်ႉ... ”
“တေႇဢဝ်တီႈၼၼ်ႈမႃး ၼူၵ်ႉသႅဝ်းဢမ်ႇမႅၼ်ႈၵႃ ၵႃဢမ်ႇမႅၼ်ႈ ၵဝ်ႉ... ၼႆယဝ်ႉ... ... ”
“ၵႃ ၵေႃႈ ပိူၼ်ႈၸင်ႇႁွင်ႉဝႃႈ ၵႃလမ်... ”
“ ၼူၵ်ႉသႅဝ်း ၵေႃႈ ပိူၼ်ႈႁွင်ႉ ၼူၵ်ႉသႅဝ်းလမ်... ”
“ၵဝ်ႉ သမ်ႉ ပိူၼ်ႈႁွင်ႉဝႃႈ ၵဝ်ႉလၢႆး ၼႆယဝ်ႉ... ... ”
ၼၢႆးမူၼ်းၶႆႈၼႄ ၼင်ႇၼၼ်ယဝ်ႉသေ သူတ်ႉၵိၼ်ၼမ်ႉၼဵင်ႈၶူမ်မၼ်းယဝ်ႉ ... ၶမ်ႈၼၼ်ႉ ၶဝ်သိုပ်ႇဢုပ်ႇၵၼ် တၢၼ်ႇတၢၼ်ႇသေ ၸင်ႇဢွၼ်ၵၼ်ၶဝ်ႈၽႃႈၼွၼ်းယဝ်ႉ။