ၶႅၵ်ႇ/တွၼ်ႈၸဵတ်း
ၸၢႆးၼွင်ႉၵေႃႉၼိုင်ႈတႄႉ ၵုမ်ႇလႆႈမႆႈၸႂ် လုမ်းလႃးၼၢႆးၶဝ်ယူႇ မူတ်းယၢမ်းၵႂႃႇ ဝၼ်းလႂ်ဝၼ်းၼၼ်ႉ လိူၼ်လႂ်လိူၼ်ၼၼ်ႉ ပီလႂ်ပီၼၼ်ႉယူႇ။
ယွၼ်ႉပိူၼ်ႈ ၼၢႆးၶဝ် ဢမ်ႇပေႃးယူႇလီသေ လႆႈၶိုၼ်ႈႁူင်းယႃလႄႈ ငိုၼ်းတႃႇတေယူတ်းယႃၼၢႆးၶဝ် ၶၢဝ်းယၢဝ်းၼၼ်ႉ မၼ်းၸၢႆး လႆႈၶၢႆလေႃႉမႃႉမၼ်း ပႅတ်ႈယဝ်ႉ။ ၼင်ႇႁိုဝ် တေလႆႈငိုၼ်းၼၼ်ႉ မၼ်းၸၢႆးၵေႃႈၶတ်းၸႂ်ယူႇ။
သူၼ်မွၵ်ႇ ဢၼ်မၼ်းၽုၵ်ႇသေၶၢႆၼၼ်ႉ ပေႃးၵိၼ်ပေႃးယႅမ်ႉယူႇသေတႃႉ ယွၼ်ႉပိူဝ်ႈ လူဝ်ႇယူတ်းယႃ ၼၢႆးၶဝ်ၼၼ်ႉလႄႈ ငိုၼ်းတႃႇၸႂ်ႉတိုဝ်းၵေႃႈ လူဝ်ႇလႆႈၸႂ်ႉတိုဝ်းၼမ်သေၵဝ်ႇၵဝ်ႉယဝ်ႉ။
ၼင်ႇႁိုဝ် ၼႃႈၵၢၼ်တေသၢင်ႇထုၵ်ႇၼၼ်ႉ မၼ်းၸၢႆးၵေႃႈ ၶတ်းၸႂ်ႁဵတ်းႁႃယူႇ ၊ ၵႂႃႇႁႃႁဵတ်းၵၢၼ် ၵိၼ်ၸၢင်ႈႁေႃႈၵႃးပိူၼ်ႈၵေႃႈ ဢမ်ႇတၼ်းလႆႈႁဵတ်းႁိုင် ၊ ယွၼ်ႉပိူဝ်ႈ ဢမ်ႇသၢင်ႇထုၵ်ႇလႄႈ မၼ်းၸၢႆးဢွၵ်ႇၵၢၼ်သေ မႃးၼင်ႈငဝ်မိုင်ယူႇ ၼႂ်းသူၼ်မၼ်းယဝ်ႉ။
လွမ်တူၺ်း မွၵ်ႇဢွၼ်ႇ ဢၼ်ၵီႈၶွင်ႇႁၢင်ႈလီဝႆႉ ၸိူဝ်းၼၼ်ႉသေ မၼ်းၵႂႃႇၶုၵ်းၸႂ်လႆႈ ၽူၺ်း ... ၵမ်းလဵဝ်ယဝ်ႉ ။
ၼႃႈတႃသႂ်ဢွၼ်ႇ ၽူၺ်း ၊ သဵင်ၵႂၢမ်းဝၢၼ်ဢွၼ်ႇ ၽူၺ်း ၊ သႅဝ်ၼမ်ႉႁွမ်ဢွၼ်ႇ ၽူၺ်း ၸိူဝ်းၼၼ်ႉၵေႃႈ မၼ်းၶိုၼ်းၶုၵ်းထူပ်းယူႇ။ ၵူၺ်းၵႃႈ တႃႇတေၶိုၼ်းႁၼ်ၵၼ် ဢၼ်ဝႃႈၼၼ်ႉ ဢၢပ်ႈတေဢမ်ႇပဵၼ်မႃးယဝ်ႉ လႄႈ မၼ်းၸၢႆး လႆႈတၢင်းမုင်ႈမွင်းလၢႆလၢႆၵူၺ်း ၊ ၽွင်းမိူဝ်ႈမၼ်းတိုၵ်ႉဝူၼ်ႉ လွင်ႈၽူၺ်းယူႇၼၼ်ႉ လႆႈငိၼ်းသဵင်ဢႆ ၼၢႆးၶဝ်လႄႈ မၼ်းၸင်ႇၼႅတ်ႈၶိုၼ်ႈမိူဝ်းၼိူဝ်ႁိူၼ်းယဝ်ႉ။
ဢႁုၵ်ႉ ... ဢႁုၵ်ႉ ... ဢႁုၵ်ႉ ဢႁုၵ်ႉ ... ...
ၸၢႆးၼွင်ႉ ၼႅတ်းၵႂႃႇတူပ်းပၼ် ၵွင်းလင်ၼၢႆးၶဝ်လွႆးလွႆးသေ ဢဝ်ၵွၵ်းထူမ်ႇ တုင်းပၼ်ၼၢႆးၶဝ်ယူႇ ။
“ ၼၢႆး ... ၼၢႆး ... ၼၢႆးႁဝ်းၵိၼ်ယႃႈယႃယဝ်ႉယဝ်ႈႁႃႉ ... မိူဝ်ႈၼႆႉ ... ”
“ ၵိၼ်ယဝ်ႉယဝ်ႈ ... လၢၼ် ... ”
“ ၼၢႆးႁဝ်း ပဵၼ်ႁိုဝ်မႃးၶႃႈ ... ၼႂ်းတူဝ်ၼႂ်းၸႂ်ၼႆႉ ၸွင်ႇဢၢပ်ႈယူႇသႃႇမႃး ၶႃႈႁိုဝ်... ? ”
ၼၢႆးမူၼ်း ထူၺ်းၸႂ်လူင်ၵမ်းၼိုင်ႈသေ လွမ်တူၺ်းၼႃႈၸၢႆးၼွင်ႉယူႇ ၊ မၼ်းယိပ်းဢဝ်မိုဝ်းၸၢႆးၼွင်ႉသေ -
“ လၢၼ် ... ၼၢႆးတႄႉ ... သင်ပဵၼ်ၵၢင်ဝၼ်းၼႆၵေႃႈ ပဵၼ်ၵၢင်ဝၢၼ်း ဢၼ်တေၸမ်တူၵ်းၼၼ်ႉယဝ်ႉ ... ”
ၸၢႆးၼွင်ႉၵေႃႈ လွမ်တူၺ်းၼၢႆးၶဝ်သေ -
“ ၼၢႆး ... ၼၢႆး ... ယႃႇပေၸႂ်လဵၵ်ႉသင်ၶႃႈ ... ၸၢႆးတေၶတ်းၸႂ် ယႃပၼ်ၼၢႆးႁဝ်း ႁႂ်ႈၸဵဝ်းႁႅင်းလႆ ... ”
“ ၸၢႆးၼွင်ႉ ... ... ”
“ ဢေႃႈ ... ... လၢတ်ႈလႄႈ ၼၢႆး ... ”
“ ၼႂ်းတိူၵ်ႈၼၢႆးၼၼ်ႉ ၸၢႆးၼွင်ႉၽုၺ်ႇသေ ဢဝ်ထူင်လမ် ဢွၵ်ႇမႃးပၼ်ၼၢႆးလူး ... ”
ၸၢႆးၼွင်ႉၵေႃႈ ၵႂႇၽုၺ်ႇတိူၵ်ႈပႅၼ်ႈၼၼ်ႉသေ ဢဝ်ထူင်လမ် ဢွၵ်ႇမႃးလုၵ်ႈၼိုင်ႈယဝ်ႉ -
“ ထူၵ်းတူၺ်းလူး ... ”
ၸၢႆးၼွင်ႉထူၵ်းတူၺ်း လႆႈႁၼ်ထူင်ၶၢဝ်ဢွၼ်ႇလုၵ်ႈၼိုင်ႈလႄႈ ၵွင်ႈၵေႃႇဢွၼ်ႇလဝ်းၼိုင်ႈယဝ်ႉ ။
“ ၼၢႆး ... ထူင်ႈဢွၼ်ႇၼႆႉလႄႈ ၵွင်ႈဢွၼ်ႇၼႆႉ ပဵၼ်ႁင်းၽႂ်”
“ ၵွင်ႈဢွၼ်ႇၼၼ်ႉ ပဵၼ်ၵွင်ႈၸၢႆးၼွင်ႉ မိူဝ်ႈလဵၵ်ႉယဝ်ႉ... ထူင်ၽိူၵ်ႇဢွၼ်ႇၼႆႉတႄႉ ပဵၼ်ထူင်ပီႈဢၢႆႈမႂ်း ၸၢႆးၸၢႆးၼႆသေ မႄႈၸၢႆးၼွင်ႉၶဝ် သိုဝ်ႉမႃးပၼ် မိူဝ်ႈဝၼ်းမၼ်းတေတၢႆၼၼ်ႉယဝ်ႉ ... ”
ၸၢႆးၼွင်ႉ ၵီႈတူၺ်း ထူင်ဢွၼ်ႇၼၼ်ႉ သေ -
“ ၼၢႆး ... တီႈထူင်ၽိူၵ်ႇၼႆႉ ၼုၵ်းသင်ဝႆႉ ၶႃႈလႃႇ ... ”
“ မိူဝ်ႈဢူႈမႄႈၸၢႆးၼွင်ႉၶဝ် တိူဝ်ႉမၢၵ်ႇသေ ဢၢပ်ႇလိူတ်ႈၼၼ်ႉ ၸၢႆးၼွင်ႉ ၵႂႃႇႁႆႈၵွတ်ႇဢူႈမႄႈၸၢႆးၼွင်ႉလႄႈ ပဵၼ်လိူတ်ႈဢူႈမႄႈၸၢႆးၼွင်ႉၶဝ် ၼုၵ်းဝႆႉယဝ်ႉ ၵွပ်ႈၼႆလႄႈ ၼၢႆးတင်ႈၸႂ် ဢဝ်သိမ်းဝႆႉပၼ် ၸၢႆးၼွင်ႉ ယဝ်ႉ... ”
ၸၢႆးၼွင်ႉ လွမ်တူၺ်းထူင်ဢွၼ်ႇၼၼ်ႉသေ ပဵၼ်တင်းၼမ်ႉတႃဢိူမ်ႈႁူၺ်ႇဝႆႉယူႇ ၼၢႆးမူၼ်းၸင်ႇၶိုၼ်းဝႃႈ -
“ ၸၢႆးၼွင်ႉ ... ဢဝ်ထူင်ၼၼ်ႉ ပၼ်ၼၢႆးလူး ... ”
ၼၢႆးမူၼ်းႁပ်ႉဢဝ်ထူင် ဢၼ်ၸၢႆးၼွင်ႉပၼ်ၼၼ်ႉသေ မႃးၸူၵ်းတူၺ်းယူႇ ၼၢႆးမူၼ်း ၸၼ်ၸွၵ်းၽႅၼ်ႇလႅင် ဢွၵ်ႇမႃးၸွၵ်းၼိုင်ႈသေ -
“ ၸၢႆးၼွင်ႉ ၼႆႉပဵၼ်ၶႅပ်းသၢႆၶေႃးၶမ်း ဢၼ်ပေႃႈၸၢႆးၼွင်ႉ သိုဝ်ႉမႃးပၼ်ၸၢႆးၼွင်ႉၼၼ်ႉယဝ်ႉ ... ”
ၸၢႆးၼွင်ႉ ယိပ်းဢဝ်ၶႅပ်းသၢႆၶေႃးၶမ်း ဢၼ်ပႃးၶႅပ်းမူၼ်းႁၢင်ႈႁူဝ်ၵူၼ်းၼၼ်ႉသေ ၵမ်ဝႆႉႁႅင်းႁႅင်းယဝ်ႉ မၼ်းၸင်ႇဝႃႈ -
“ ၼၢႆး ... သၢႆၶေႃးဢၼ်ၼႆႉ ၸၢႆးဢမ်ႇၶႂ်ႈႁွႆႈ ... ”
“ ဢမ်ႇၶႂ်ႈႁွႆႈၵေႃႈ ဢဝ်သိမ်းဝႆႉလႄႈ ... ၼေႈ ... ၼႆႉသမ်ႉ ပဵၼ်ၶႅပ်းႁၢင်ႈ သူပေႃႈမႄႈလုၵ်ႈယဝ်ႉ ... ၼႆႉၵေႃႈ ၸၢႆးၼွင်ႉဢဝ်သိမ်းဝႆႉလႄႈ ... ”
ၸၢႆးၼွင်ႉ မႃးလွမ်တူၺ်းၶႅပ်းႁၢင်ႈ ဢၼ်ၶဝ်ပေႃႈမႄႈလုၵ်ႈသီႇၵေႃႉ ထႆႇၸွမ်းၵၼ်ဝႆႉၼၼ်ႉသေ ဝူၼ်ႉၶွပ်ႈၶိုၼ်းဢူႈမႄႈမၼ်းယူႇ ။
“ တႃႇတေပၼ်ၸၢႆးၼွင်ႉတႄႉ ၼၢႆးၵေႃႈ ဢမ်ႇမီးသင်ပၼ်ယဝ်ႉ”
“ ဢူဝ်... ၼၢႆး... ၼၢႆးႁဝ်းဢမ်ႇပၼ်သင်ၵေႃႈ ဢမ်ႇပဵၼ်သင်ၶႃႈ ... ၼၢႆးႁဝ်းသမ်ႉပေႃးပၼ် တၢင်းလၵ်းလႅမ် တီႈၸၢႆး ၼမ်ၼႅၼ်ႉယဝ်ႉၶႃႈလူး ... ဢမ်ႇၸိုဝ်ႈႁိုဝ် ... ? ”
ၼၢႆးမူၼ်းယုမ်ႉသေ လွမ်ႁၢၼ်ႉၸႂ် ၼိူဝ်ၸၢႆးၼွင်ႉယူႇ -
ၸၢႆးၼွင်ႉၼႆႉ ယွၼ်ႉပိူဝ်ႈဢမ်ႇမီးဢူႈမႄႈပီႈၼွင်ႉယဝ်ႉလႄႈ တႃႇမၼ်းတေလႆႈႁၵ်ႉၼၼ်ႉ မီးၼၢႆးမၼ်းၵေႃႉၼႆႉ ၵေႃႉလဵဝ်ၵူၺ်း။ ၸဵမ်မိူဝ်ႈ မၼ်းလဵၵ်ႉတေႃႇယႂ်ႇ ဢၼ်လူႁၼ်လုမ်းလႃးမၼ်းမႃးၼႆႉၵေႃႈ ပဵၼ်ၼၢႆးမူၼ်းၼႆႉယဝ်ႉ ။ ၵွပ်ႈၼႆ ၽဝမၼ်း ဢဵၼ်ႁႅင်းတီႈၸႂ်ယႂ်ႇမၼ်း မဵတ်ႉတႃႇမၼ်းၼႆႉ ပဵၼ်ပုၼ်ႈတႃႇၼၢႆးမူၼ်း ထီႉၼိုင်ႈယဝ်ႉ ။
“ ၼၢႆး ... ၵိၼ်ၶဝ်ႈႁုင်လႅဝ် ဢိတ်းၼိုင်ႈၼေႃႈ ... ”
လႆႈႁၼ်ၼၢႆးမူၼ်း ငွၵ်းႁူဝ်ၼႄလႄႈ မၼ်းၸၢႆးၵႂႃႇဢဝ်ၶဝ်ႈႁုင်လႅဝ် သႂ်ႇဝၢၼ်ႇသေ မႃးသွမ်ပၼ်ၼၢႆးၶဝ် ၸေႃႉလႂ်ၸေႃႉၼၼ်ႉယူႇ -
“ ၼၢႆး ... ၸွင်ႇၵိူဝ်မၼ်းထုၵ်ႇၶႃႈႁိုဝ် ... ?”
“ ထုၵ်ႇယူႇ ... ”
“ ၵိၼ်ၼမ်ၼမ်ၼႃႈ ၼၢႆး ... ပေႃးၵိၼ်ယဝ်ႉၼႆ လူဝ်ႇၶိုၼ်းၵိၼ်ထႅင်ႈ ယႃႁႅင်းဢေႃႈ ... ”
ၼၢႆးမူၼ်းလွမ်တူၺ်း ၸၢႆးၼွင်ႉသေ -
“ ဢေႃႈ ... ... လၢၼ်ၸၢႆး ... ၸၢႆးၼွင်ႉ ... လၢၼ်ၵဝ်ၼႆႉလၵ်းလႅမ်ႁူႉၶေႃႈတႄႉတႄႉလႄႈ ၼၢႆးၸူမ်းဝႃႈၸူမ်းယဝ်ႉ ... ”
“ ၼၢႆးႁဝ်း ယႃႇပေဝူၼ်ႉလွင်ႈမႆႈၸႂ်သင်ၶႃႈ ၼႃႈ ... ဝႆႉၸႂ်ယဵၼ်ယဵၼ်သေ ၵႆႉၼပ်ႉမၢၵ်ႇ ၵႆႉဢဝ်တြႃးသႂ်ႇၸႂ်ၽွင်ႈၼႃႈ ၼၢႆး ... ပေႃးၸႂ်ၼိမ်ပေႃးၸႂ်ယဵၼ်ၼႆ တၢင်းပဵၼ်ၸဵဝ်းႁၢႆ ၼႆဢေႃႈ ... ”
ဝၢႆးသေ ၼၢႆးမူၼ်းၵိၼ်ၶဝ်ႈႁုင်လႅဝ်ယဝ်ႉ ၸၢႆးၼွင်ႉႁိုဝ်ႈၼမ်ႉဢုၼ်ႇ ပၼ်ၼၢႆးၶဝ်သေ -
“ ၼေႈ ... ၼၢႆး ... ၵိၼ်ယႃႁႅင်းၼႆႉႁေၼႃႉ ... ၸၢႆးတိုၵ်ႉသိုဝ်ႉမႃး မိူဝ်ႈဝႃးၵူၺ်းဢေႃႈ ... ငိၼ်းပိူၼ်ႈဝႃႈ ယႃၼႆႉ ပဵၼ်ယႃႈယႃတႃႇၵူၼ်းထဝ်ႈ တႃႇၵူၼ်းၼၢဝ်လုၵ်ႉၼႆဢေႃႈ ... ”
ပေႃးဝႃႈ ၼၢႆးၶဝ်ၵိၼ်ယႃယဝ်ႉ ၸၢႆးၼွင်ႉဢဝ်ၼၢႆးၶဝ် ၼွၼ်းႁူမ်ႇၽႃႈမႆပၼ်လီလီယဝ်ႉ ။