ၶႅၵ်ႇ/တွၼ်ႈၵဝ်ႈ
ဝၢႆးသေ ႁႅၼ်းသွမ်းတၢင်တူဝ်ပၼ် ၼၢႆးၶဝ်ယဝ်ႉ ၸၢႆးၼွင်ႉ ပဵၼ်ဢၼ်မွင်ၸႂ်မွင်ၶေႃးတႄႉတႄႉ ။ ႁၢင်ႈၽၢင်ၼၢႆးၶဝ် ဢူဢၢႆမဵတ်ႉတႃၼၢႆးၶဝ်ၼၼ်ႉ တိုၵ်ႉပဵၼ်ဢၼ်ႁူမ်ႇငမ်းမၼ်းဝႆႉယူႇ ။
မၼ်းၸၢႆး တေသိုပ်ႇယူႇ တီႈဝၢၼ်ႈယင်ႇငႄႈၼႆႉၵေႃႈ မၼ်းဢမ်ႇၶႂ်ႈယူႇယဝ်ႉလႄႈ မၼ်းၸင်ႇယွၼ်းၶႂၢင်း တီႈၼၢႆးဢွၼ်ႇၶဝ်သေ သိုပ်ႇၶၢဝ်းတၢင်းမႃးတီႈၵျွၵ်ႉမႄး ဝၢၼ်ႈၸႃႇတိမၼ်း ဝၢၼ်ႈၼႃးၶေႃယဝ်ႉ ။
ႁၼ်ႁိူၼ်းမုင်းလဵၵ်းလူင်လင်ၼိုင်ႈလႄႈ မၼ်းၸၢႆးၸင်ႇၶဝ်ႈမိူဝ်း ၼႂ်းဝၢင်းႁိူၼ်းၼၼ်ႉသေ -
“ မႄႈပႃႈ ... ဢိူၺ်း ... မႄႈပႃႈ ၸဝ်ႈႁိူၼ်းၶဝ် ... ”
လႆႈႁၼ် မႄႈပႃႈပီးပီးၵေႃႉၼိုင်ႈ ဢွၵ်ႇႁိူၼ်းမႃးသေ -
“ ဢေႃႈ ... လၢၼ်သၢင်ႇၶႂ်ႈထူပ်းၽႂ် ... မီးလွင်ႈတၢင်းသင် ”
“ မီးလွင်ႈတၢင်းသင်ၼႆတႄႉၵေႃႈ ဢမ်ႇၸၢင်ႈဝႃႈ ၼင်ႇၵဝ်ႇၶႃႈ မႄႈပႃႈ ... ၶႃႈၶႂ်ႈထၢမ်တူၺ်း လွင်ႈဝၢၼ်ႈၼႃးၶေႃၼႆႉ ၵမ်ႈၽွင်ႈဢေႃႈ ”
“ ထၢမ်ၸိူင်ႉႁိုဝ် ... ? ” ၶဝ်ႈမႃးၼင်ႈၼႂ်းႁိူၼ်းၵွၼ်ႇလႄႈ ... လၢၼ် ... ”
ၸၢႆးၼွင်ႉၵေႃႈ ၶဝ်ႈမိူဝ်းၼႂ်းႁိူၼ်းၸွမ်း မႄႈပႃႈၼၼ်ႉသေ -
“ ၼင်ႈလႄႈ ... လၢၼ်သၢင်ႇ ... လွင်ႈၼႃးၶေႃ ၸိူင်ႉႁိုဝ်”
“ မိူဝ်ႈပူၼ်ႉမႃး သိပ်းသီႇသိပ်းႁႃႈပီၸိူဝ်းၼၼ်ႉ တီႈဝၢၼ်ႈၼႃးၶေႃၼႆႉ ပဵၼ်ပွႆးတိုၵ်းၵၼ်ႁေ ၽႆးမႆႈဝၢၼ်ႈၼႆ ၸွင်ႇၸႂ်ႈၶႃႈႁိုဝ် ... ?”
“ ၸႂ်ႈဢိူဝ်ႈ ... လၢၼ် ... မႄႈပႃႈၶဝ်လႆႈပၢႆႈ ပေႃးဢမ်ႇႁူႉဢမ်ႇႁၼ်ၵွၼ်ႇဢိူဝ်ႈ ... ၵူၼ်းဝၢၼ်ႈၵေႃႈတၢႆႇ ၽႆးၵေႃႈမႆႈႁိူၼ်းတင်းၼမ်ယဝ်ႉ ... ”
“ ၼႂ်းဢၼ် ၵူၼ်းဝၢၼ်ႈဢၼ်တၢႆၵႂႃႇ ၸိူဝ်းၼၼ်ႉ မႄႈပႃႈႁဝ်းၶဝ် ႁူႉၸၵ်းၽႂ်လၢႆလၢႆ ၶႃႈ ... ? ”
“ လုင်းၺူဝ်ႇႁိူၼ်းတူၵ်း ... ပႃႈလိုၼ်း ႁူဝ်ဝၢၼ်ႈ ... သၢင်ႇထုၼ်း ၶႃပူဢွၵ်ႇ ... ၶိင်းထွၼ်းၶႃပူႇဢွၵ်ႇ ... ... ၸိူဝ်းၼႆႉယဝ်ႉ ...”
“ သၢင်ထုၼ်းၶႃပူႇဢွၵ်ႇၵေႃႈ ႁူႉၸၵ်းယူႇၶႃႈႁႃႉ ... ?”
“ ႁူႉဢိူဝ်ႈ ... ႁူႉၼႃႇၽႅဝ်လႃႇ ... ၶႃသွင်ၵေႃႉၼႆႉ တႃႉလီဢီးလူပိူၼ်ႈလႃႈ လၢၼ်သၢင်ႇဝႃႈ ... ၵူၼ်းဝၢၼ်ႈတင်းလၢႆ ဢွၼ်ၵၼ်သေလၢႆၶႃ တႄႉတႄႉဢိူဝ်ႈ ... ”
“ ၵွပ်ႈသင်လႄႈ ... သေလၢႆၶႃႈလႃႇ ... မႄႈပႃႈ ... ...?”
“ ဢိူဝ်ႈ ... ၶႃသွင်ပူႇဢွၵ်ႇၼႆႉ တိုၵ်ႉပဵၼ်ၵူၼ်းၼုမ်ႇၼႆသေတႃႉ ၵၢၼ်ၼႂ်းပွၵ်ႉၼႂ်းၽၢႆႇၼႆ ၶႃမေႃၸွႆႈ မေႃဢွၼ်ႁူဝ်ပိူၼ်ႈသေဢမ်ႇၵႃး ၸေႇတၼႃႇၵေႃႈလီဢိူဝ်ႈ ... ၼႃႈဝၢၼ်ႈတႃသူၼ် ဢၼ်ယၢပ်ႇၽိုတ်ႇ ပေႃႇမႃးၸိူင်ႉႁိုဝ်ၵေႃႈ ပေႃးသၢင်ႇထုၼ်းၵႂႃႇလၢတ်ႈပၼ် ၵူၼ်းလူင်ၶဝ်ၼႆ ပဵၼ်ဢၼ်သၢင်ႇထုၵ်ႇၵႂႃႇ တႄႉတႄႉဢိူဝ်ႈ ... ၵွပ်ႈၼႆ ... ၵူၼ်းဝၢၼ်ႈ ဢမ်ႇႁူႉတႂ်ႈႁူႉၼိူဝ် ၸိူင်ႉၼင်ႇမႄႈပႃႈၶဝ်ၸိူဝ်းၼႆႉ လႆႈၸႂ်ယႂ်ႇၶဝ်ၵူၺ်းယဝ်ႉ ... လၢၼ်သၢင်ႇႁူႉ ... ... ”
“ ဢေႃႈ ... ... ပီႈၼွင်ႉငိူၼ်ႈၶိူဝ်းၶႃပူႇဢွၵ်ႇ ဢမ်ႇမီးဝႆႉ ၼႂ်းဝၢၼ်ႈၼႆႉႁႃႉ ... ... မိူဝ်ႈလဵဝ် ... ”
မႄႈပႃႈပီးပီးၼၼ်ႉ ဝူၼ်ႉၵမ်းၼိုင်ႈသေ -
“ ဢိုဝ်ႈ ... ... မိူဝ်ႈလဵဝ်တႄႉ ဢမ်ႇဢၢပ်ႈမီးယဝ်ႉ ... ၶႃပူႇဢွၵ်ႇမီးဝႆႉ လုၵ်ႈၸၢႆးဢွၼ်ႇသွင်ၵေႃႉဢိူဝ်ႈ ... ၵူၺ်ႈၵႃႈ မိူဝ်ႈပဵၼ်ပွႆးတိုၵ်းၼၼ်ႉ ႁၢႆၵႂႃႇၵေႃႉၼိုင်ႈသေ ၼၢႆးၶဝ်သမ်ႉႁွင်ႉၵႂႃႇ ၵေႃႉၼိုင်ႈ ၼႆယဝ်ႉ ...”
“ ၵေႃႉလုၵ်ႈၸၢႆးၶဝ် ဢၼ်ႁၢႆၵႂႃႇမိူဝ်ႈပွႆးတိုၵ်းၼၼ်ႉ မႄႈပႃႈႁဝ်းၶဝ် ဢမ်ႇငိၼ်းၶၢဝ်ႇမၼ်းထႅင်ႈ ၸိူင်ႉႁိုဝ်ၶႃႈႁႃႉ .........? ”
“ ငိၼ်းၶၢဝ်ႇဝႃႈ ... ၶူးမေႃယႃလူင်ပူႇဢွၵ်ႇ မႃးႁၼ်မၼ်း တၢႆလိုမ်းဝႆႉယူႇႁိမ်းတၢင်းသေ ဢဝ်ၵႂႃႇၵဵပ်းလဵင်ႉဝႆႉ ၼႆယဝ်ႉ ... ... ”
“ ၶူးမေႃယႃလူင်ၼၼ်ႉ ၸိုဝ်ႈသင်ၶႃႈ ... မႄႈပႃႈ ... ”
“ ဢိူဝ်ႈ ... ဢႃႉ ... ၸိုဝ်ႈသင်ၵေႃႈ ဢမ်ႇႁူႉယဝ်ႉႁေး ... ”
“ ၶဝ်ယူႇတီႈလႂ် ... ၼႆ ၸွင်ႇႁူႉၶႃႈႁိုဝ် ... ... ? ”
“ ဢွၼ်တၢင်းတႄႉ ... ၶဝ်ယူႇဝဵင်းလိူဝ်ႇ ၼႆသေ လႆႈၶၢႆႉၵၢၼ်ၵႂႃႇ တီႈၼိုင်ႈယဝ်ႉတီႈၼိုင်ႈလႄႈ ၽႅဝ်လႂ်ၵႂႃႇၵေႃႈ ဢမ်ႇႁူႉယဝ်ႉ ... ... ”
ၸၢႆးၼွင်ႉ ထူၺ်ႈၸႂ်လူင်ၵမ်းၼိုင်ႈသေ ဝူၼ်ႉၵႂင်ယူႇ -
“ ငိၼ်းၶၢဝ်ႇ ... ၵမ်ႈၽွင်ႈဝႃႈတႄႉ ... ၶဝ်ၶၢႆႉၵႂႃႇတႃႈၵုင်ႈလူဝ်ႇလူဝ်ႇၼႆဢိူဝ်ႈ ... လၢၼ်သၢင်ႇ ... ”
“ ၶုမ်ပႃႇႁဵဝ်ႈ သၢင်ႇထုၼ်းၶႃပူဢွၵ်ႇၼၼ်ႉ မီးတီႈလႂ်ၼႆ မႄႈပႃႈႁဝ်း ၸွင်ႇႁူႉၶႃႈ ... ႁိုဝ် ... ? ”
“ ႁူႉဢိူဝ်ႈ ... ”
“ ပေႃးမႄႈပႃႈႁူႉၼႆ ... ၶႃႈၶႂ်ႈပိုင်ႈမႄႈပႃႈႁဝ်း ၸွမ်းၼႄပၼ်ၶႃႈၽွင်ႈဢေႃႈ ... ၸွင်ႇမႄႈပႃႈတၼ်းႁိုဝ် ... ... ?”
မႄႈပႃႈပီးပီးၼၼ်ႉ လွမ်တူၺ်း ၸၢႆးၼွင်ႉလီလီသေ -
“ လၢၼ်သင်ႇ ပဵၼ်ၽႂ်ၼႆႉ ... ...? တေၶႂ်ႈၵႂႃႇႁဵတ်းသင် ? ”
“ ၶႃႈပဵၼ် လုၵ်ႈၸၢႆးသၢင်ႇထုၼ်းလႄႈ ၼၢင်းၼူၼ်းဢေႃႈ ”
မႄႈပႃႈပီးၼၼ်ႉ ဢၢမ်းလူင်ဢၢမ်းလၢင်ၵႂႃႇသေ -
“ ႁိုဝ် ... လၢၼ်သၢင်ႇပဵၼ်ၵေႃႉပီႈႁႃႉ ... ၵေႃႉၼွင်ႉႁႃႉ ? ”
“ ၶႃႈပဵၼ် ... ၵေႃႉၼွင်ႉဢေႃႈ ... ”
“ ဢေႃႈ ... ... ပေႃးၼႆ လၢၼ်သၢင်ႇ ပဵၼ်ၵေႃႉဢၼ်ၼၢႆးမူၼ်း ႁွင်ႉၵႂႃႇၼၼ်ႉဢိူဝ်ႈ ၼေႃႈ ... ”
“ ၸႂ်ႈဢေႃႈ ... ... ”
“ ၼၢႆးမူၼ်း လူး ... တိုၵ်ႉမီးယူႇႁႃႉ ... ? ” “ ၼၢႆးၶႃႈ ၼၢႆးမူၼ်း ... သဵင်ႈၵႂႃႇ မိူဝ်ႈပူၼ်ႉမႃးသိပ်းဝၼ်းၼၼ်ႉ ယဝ်ႉၶႃႈဢေႃႈ ... ... ”
“ ဢေႃ ... ... ၼၢႆးမူၼ်း ပေႃးသဵင်ႈယဝ်ႉႁႃႉ ... ပေႃးၼႆ လၢၼ်သၢင်ႇၶိုၼ်းယူႇၸွမ်းၽႂ်လႃႇ ... ... ”
“ တီႈဝၢၼ်ႈယင်ႇငႄႇ တိုၵ်ႉမီးၼၢႆးဢွၼ်ႇၶဝ်ယူႇဢေႃႈ ... ၶႃႈၶႂ်ႈမႃးႁၼ် ၶႂ်ႈမႃးလုမ်းလႃး ၶုမ်ပႃႇႁဵဝ်ႈ ပေႃႈမႄႈၶႃႈလႄႈ ၸင်ႇမႃးထၢမ်ႁႃဢေႃႈ ... ”
“ လီယဝ်ႉ ... ပေႃးၼႆ လၢၼ်သၢင်ႇ တေၶႂ်ႈၵႂႃႇတီႈလဵဝ်ႁႃႉ ”
“ ဢေႃႈ ... ”
ၸၢႆးၼွင်ႉၵေႃႈ ၸွမ်းလင်မႄႈပႃႈပီးပီးၼၼ်ႉသေ ၽႅဝ်မႃး တီႈၶုမ်သွင်ဢၼ် မီးႁိမ်းၵၼ်ၼၼ်ႉယဝ်ႉ ။
ယွၼ်ႉပိူဝ်ႈ ပီပွင်းသိပ်းပီလိူဝ်ယဝ်ႉ လႄႈ ၶုမ်ပေႃႈမႄႈမၼ်းသွင်ၶုမ်ၼၼ်ႉ သမ်ႉပေႃး ၵဝ်ႇသဝ်ႈဝဝ်းမွင်တႄႉတႄႉသေ တူၼ်ႈယုမ်းတူၼ်ႈယိူဝ်ႈဢွၼ်ႇ သမ်ႉပေႃးႁူမ်ႇလူမ်ႈဝႆႉယဝ်ႉ ။
“ ၼေႈ ... ၼႆပဵၼ် ၶုမ်ပေႃႈသူ ... ၼႆႉသမ်ႉ ... ၶုမ်မႄႈသူယဝ်ႉ ... ... ”
ၸၢႆးၼွင်ႉၵေႃႈ လွမ်တူၺ်း ၶုမ်ပေႃႈမႄႈမၼ်း လီလီငမ်းငမ်းသေ ၼင်ႈၶုပ်ႉဝႆႈယူႇယဝ်ႉ ။ မၼ်းၸၢႆး ဢူတ်းၵၼ်ႈၸႂ်မၼ်းယူႇသေတႃႉ ၼမ်ႉတႃဢွၼ်ႇမၼ်း ၸိုမ်းယွတ်ႇတူၵ်းလိၼ်သေ မၼ်းၸၢႆးတူၼ်ႉႁႆႈသိုတ်ႉသိုတ်ႉယူႇ ။
“ ဢေႃႈ ... ပေႃႈၸဝ်ႈၵႄးၸူး မႄႈၸဝ်ႈၵႄးၸူး တင်းသွင်ၸဝ်ႈတီႈၶႃႈ ...လိူဝ်သေႁၼ်ႁၢင်ႈ ပေႃႈမႄႈႁဝ်း ၼႂ်းၶႅပ်းႁၢင်ႈၵူၺ်း ... ဢမ်ႇတွင်းၼႃႈပေႃႈမႄႈသေတႃႉ လုၵ်ႈၸၢႆးႁွမ်းမိုဝ်းၶုပ်ႉၶဝ်ႇ ယွၼ်းဝႆႈၵၼ်ႇတေႃး တီႈၶႃႈ ဢေႃႈ ... ... ”
“ ၽဝၸၢတ်ႈၼႆႉ ... လႆႈႁၼ်ပိူၼ်ႈ ပေႃႈမႄႈလုၵ်ႈၼင်ႇၵၼ် ၵျေႃႇသိူဝ်းယုမ်ႉၶူဝ်တေႃႇၵၼ်ၼၼ်ႉ လုၵ်ႈၸၢႆးပဵၼ်ဢၼ်ၶွႆပိူၼ်ႈတႄႉတႄႉဝႃႈဝႃႈသေ လွမ်လွမ်ၶေႃးၶူမ် ၼမ်ႉတႃတူၵ်းတႃႇသေႇၶႃႈယဝ်ႉ ... ၵွပ်ႈၼႆ ၸၢတ်ႈၼႆႉပိၵ်ႉသမ်ႉဝႃႈ ဢမ်ႇလႆႈႁူမ်ႈမဵတ်ႉတႃႇပေႃႈမႄႈသေတႃႉ ၽဝမိူဝ်းၼႃႈ ၵူႈၸၢတ်ႈၸၢတ်ႈၼၼ်ႉ ႁႂ်ႈလႆႈပဵၼ်ၵူၼ်းမီးပေႃႈမႄႈ ၸိူင်ႉၼင်ႇပိူၼ်ႈသေ ႁႂ်ႈလႆႈပဵၼ် ၵူၼ်းယူႇတႂ်ႈႁူမ်ႈၵတ်းယဵၼ်မဵတ်ႉတႃႇပေႃႈမႄႈႁဝ်း သေၵမ်းၶႃႈ ... ပေႃႈလႄႈတင်းမႄႈဢိူၺ်း ... ”
“ မဵတ်ႉတႃႇတင်းႁၵ်ႉပေႃႈမႄႈ ပဵၼ်ႁိုဝ်ဝႆႉဢၼ်ဝႃႈၼၼ်ႉ ... လုၵ်ႈၸၢႆးဢမ်ႇႁူႉသေတႃႉ လုၵ်ႈၸၢႆးမုင်ႈမွင်း ၶႂ်ႈလႆႈ မဵတ်ႉတႃပေႃႈမႄႈသေပိူၼ်ႈ တီႈၶႃႈယဝ်ႉ ။
“ မၢင်ပွၵ်ႈမၢင်လႂ် ... လႆႈႁၼ်ပေႃႈမႄႈပိူၼ်ႈသိုဝ်ႉၶူဝ်းၼုင်ႈဢွၼ်ႇ မႃးပၼ်လုၵ်ႈလၢင်းၶဝ်ၼၼ်ႉၼႆ လုၵ်ႈၸၢႆးတႄႉ ဢမ်ႇမီးပေႃႈမႄႈ ၸိူင်ႉၼင်ႇပိူၼ်ႈလႄႈ လႆႈၶွႆႈၵၢမ်ႇပိူၼ်ႈမုၼ်ပိူၼ်ႈတႄႉတႄႉဢေႃႈ ...”
“ တၢင်းၵိၼ်တၢင်းယႅမ်ႉ ၶဝ်ႈမုၼ်းၶဝ်ႈပွင်းဢွၼ်ႇ ... ဢၼ်ဢူႈမႄႈပိူၼ်ႈ သိုဝ်ႉမႃးပၼ်သေ ဢၼ်လုၵ်ႈလၢင်းၶဝ်ၵိၼ်ၼၼ်ႉ ယူဝ်ၶႄးတေပႃးထၢတ်ႈမဵတ်ႉတႃႇ ပေႃႈမႄႈပိူၼ်ႈႁိုဝ် ... ၵေႃႈဢမ်ႇႁူႉယဝ်ႉ ... မၼ်းဢၢပ်ႈဝၢၼ်ဢၢပ်ႈမၼ်းတႄႉတႄႉလႄႈ လုၵ်ႈၸၢႆးၵေႃႈ ၶႂ်ႈၵိၼ်ၸိူင်ႉၼင်ႇပိူၼ်ႈ တႄႉတႄႉဝႃႈဝႃႈဢေႃႈ ... ပေႃႈလႄႈမႄႈဢိူၺ် ... ”
“ ႁၼ်ပိူၼ်ႈ ... ပေႃႈမႄႈလုၵ်ႈ ၵိၼ်ၶဝ်ႈႁူမ်ႈမူႇလဵဝ်ၵၼ် ၵွၼ်ႉၽၵ်းသႂ်ႇပၼ်ၵၼ်ၸိူင်ႉၼၼ် လုၵ်ႈၸၢႆးၵေႃႈ ၶႂ်ႈႁႂ်ႈပေႃႈမႄႈႁဝ်းၶဝ် ၵွၼ်ႉသႂ်ႇပၼ်ၼႂ်းဝၢၼ်ႇလုၵ်ႈၸၢႆးသေ ... လုၵ်ႈၸၢႆးၵေႃႈ ၶႂ်ႈၵွၼ်ႉၽၵ်းသႂ်ႇပၼ် ၼႂ်းဝၢၼ်ႇပေႃႈမႄႈႁဝ်းၶဝ်ယူႇဢေႃႈ ... ၵူၺ်ႈၵႃႈ ... ၽႂ်ၵေႃႈ ဢမ်ႇၵွၼ်ႉသႂ်ႇပၼ်လုၵ်ႈၸၢႆး ... လုၵ်ႈၸၢႆး ... လုၵ်ႈၸၢႆးၵေႃႈ ဢမ်ႇလႆႈၵွၼ်ႉသႂ်ႇပၼ်ပေႃႈမႄႈႁဝ်းၶဝ် သေပွၵ်ႈ ... ”
“ ႁၼ်ပိူၼ်ႈ ... ယဵပ်ႇၵူၼ်ႉယဵပ်ႇၶိုၼ်ႈ မိပ်ႇၵူၼ်ႉမိပ်ႇၶိုၼ်ႈပၼ် ပေႃႈမႄႈပိူၼ်ႈ ... ၼႆၵေႃႈ ... လုၵ်ႈၸၢႆး သမ်ႉဢမ်ႇမီး ပေႃႈမႄႈၸိူင်ႉပိူၼ်ႈ လႄႈ ... လုၵ်ႈၸၢႆးၶေႃးၶူမ်တႄႉတႄႉဢေႃႈ ... ”
“ မိူဝ်ႈလုၵ်ႈၸၢႆးလဵၵ်ႉၼၼ်ႉ ... ၽွင်းမိူဝ်ႈ လုၵ်ႈၸၢႆးၵႂႃႇႁူင်းႁဵၼ်းလႂ် ၽွင်းမိူဝ်ႈ လူင်းႁူင်းႁဵၼ်းလႂ် လႆႈႁၼ်ပေႃႈမႄႈပိူၼ်ႈ မႃးသူင်ႇမႃးႁပ်ႉသေတႃႉ လုၵ်ႈၸၢႆးတႄႉ ... ဢမ်ႇမီးၽႂ်သူင်ႇ ဢမ်ႇမီးၽႂ်ႁပ်ႉသေ ဢမ်ႇၵႃး ... ၵမ်ႈၽွင်ႈသမ်ႉၵွႆဝႃႈတီႈလုၵ်ႈၸၢႆး ဢၢႆႈဢမ်ႇမီးပေႃႈမႄႈ ၼႆၵွၼ်ႇဢေႃႈ ... ”
“ မိူဝ်ႈလုၵ်ႈၸၢႆးၵေႃႉလဵၵ်ႉၼၼ်ႉ ... ပေႃးဝႃႈလုၵ်ႈၸၢႆး ၵႂႃႇၽိတ်းပိူၼ်ႈၼႆ ပိူၼ်ႈပီႈၼွင်ႉၵၼ် ဢွၼ်ၵၼ်ၸွႆႈၵၼ်သေ မႃးႁႅမ်လုၵ်ႈၸၢႆးဢေႃႈ ... လုၵ်ႈၸၢႆး မီးပီႈဢၢႆႈၵေႃႉၼိုင်ႈ ၼႆသေတႃႉ ... ႁႃးပီႈၼွင်ႉသမ်ႉၽၢတ်ႇၵၼ် ဝႆႉလႄႈ ၽႂ်ၵေႃႈ ဢမ်ႇၸၢင်ႈမႃးၸွႆႈလုၵ်ႈၸၢႆးၶႃႈ ...”
“ ပိူၼ်ႈၽွမ်ႉၵၼ် ႁႅမ်လုၵ်ႈၸၢႆးၼင်ႇၼၼ် ... သင်ဝႃႈ ပေႃႈမႄႈႁဝ်းၶဝ် တိုၵ်ႉမီးမိူင်းၵူၼ်းယူႇၼႆ လုၵ်ႈၸၢႆး တေမႃးတိူင်ႇလၢတ်ႈပေႃႈမႄႈသေ တေၸႂ်ယႂ်ႇပေႃႈမႄႈႁဝ်းယူႇ ဢမ်ႇႁၢင်ႉၶႃႈယဝ်ႉ ... ၵူၺ်းၵႃႈ ... လိူဝ်သေၼၢႆးႁဝ်းၵေႃႉလဵဝ် ... လုၵ်ႈၸၢႆးဢမ်ႇၸၢင်ႈၵႂႃႇတိူင်ႇၵႂႃႇလၢတ်ႈၽႂ်ၶႃႈ ... ယၢမ်းလဵဝ် ၼၢႆးႁဝ်းၵေႃႈ လပ်းတႃလိုမ်းမိူင်း လပ်ႉလွႆငိုၼ်းလွႆၶမ်း ၵႂႃႇယဝ်ႉလႄႈ လုၵ်ႈၸၢႆးၼႆႉ ဢမ်ႇမီးတီႈၸႂ်ယႂ်ႇ သေတီႈၶႃႈယဝ်ႉ ... ”
“ ယၢမ်းမိူဝ်ႈ လုၵ်ႈၸၢႆး မႃးထၢမ်ၶၢဝ်ႇပေႃႈမႄႈႁဝ်းၶဝ်ၼၼ်ႉ ပိူၼ်ႈႁွင်ႉလုၵ်ႈၸၢႆးဝႃႈ “လၢၼ်သၢင်ႇ” ၼႆသေတႃႉ ... ၵွပ်ႈပိူဝ်ႈ ... လုၵ်ႈၸၢႆးၼႆႉ ဢမ်ႇမီးပေႃႈမႄႈၸိူင်ႉပိူၼ်ႈ ၵေႃႉပဵၼ်ၼၢႆးၵေႃႈ ၽၢၼ်ၶၢၼ်ၸႂ်လႄႈ ပႆႇယၢမ်ႈလႆႈပဵၼ်သၢင်ႇမႃးၸိူင်ႉပိူၼ်ႈၶႃႈ ... သင်ဝႃႈ ပေႃႈမႄႈႁဝ်းၶဝ် တိုၵ်ႉမီးယူႇၼႆၸိုင် ယူဝ်ၶႄး တေဢဝ်လုၵ်ႈၸၢႆး ႁဵတ်းသၢင်ႇလွင်း ၸိူင်ႉၼင်ႇပိူၼ်ႈ ... တေဢဝ်ၼုင်ႈၶူဝ်းလွင်းႁၢင်ႈလီလီ ၸိူင်ႉၼင်ႇပိူၼ်ႈသေ တေပဵၼ်ပေႃႈသၢင်ႇမႄႈသၢင်ႇ ယုမ်ႉၶူဝ်သိူဝ်းၼူမ် ၼႂ်းပၢင်ပွႆးၵိုၼ်းယူႇႁိုဝ် ... ၼေႃး ... ၸၢတ်ႈၼႆႉတႄႉ ၵၢမ်ႇပၢၼ်ဢွၼ်ႁဝ်းၶႃႈ ပေႃႈမႄႈလုၵ်ႈ ယွၼ်းလႆႈၶွႆႈၵၼ်မႃး တၢၼ်ႇၼႆႉၵူၺ်းသေတႃႉ ၸၢတ်ႈၼႃႈမႃး ႁႂ်ႈႁဝ်းၶႃႈ ယႃႇပေလႆႈၶွႆပိူၼ်ႈ သေမဵဝ်းသၵ်းၵမ်းၼႆ ... လုၵ်ႈၸၢႆးဝႆႈၽြႃး မိူဝ်ႈလႂ်ၵေႃႈ လုၵ်ႈၸၢႆး ယွၼ်းသူးတႃႇသေႇဢေႃႈ ... ပေႃႈလႄႈမႄႈ... ဢိူၺ်... ... ”
“ ၵုင်ႇၵုၼ်းမုၼ်ငဝ်းပေႃႈမႄႈ ဢၼ်လႆႈၵိူတ်ႇပၼ်လုၵ်ႈၸၢႆး ပဵၼ်ၵူၼ်းမႃးၼႆႉ ၵႄးၸူးမၼ်း မီးယႂ်ႇၼမ်တႄႉတႄႉၼႆ လုၵ်ႈၸၢႆးဝူၼ်ႉၶွပ်ႈ ႁၼ်ထိုင်ယူႇၶႃႈ ... ၼင်ႇႁိုဝ် ... လုၵ်ႈလၢင်း ပေႃးတေယႂ်ႇမႃႈၵႃႈသုင်ၼၼ်ႉ ပေႃႈမႄႈႁဝ်းၶဝ် ၶတ်းၸႂ်လုမ်းလႃးမႃးယူႇသေတႃႉ ၽဝႁဝ်းၶႃႈ ပေႃႈမႄႈလုၵ်ႈသမ်ႉ ၵၢမ်ႇႁၢႆႉလႄႈ လႆႈၽၢတ်ႇယၢၼ်ၵၼ် ၸဵမ်ၸဝ်ႉယဝ်ႉ ယၢမ်းလဵဝ် ... သင်ဝႃႈ ... ပေႃႈမႄႈႁဝ်း တိုၵ်ႉမီးယူႇၼႆၸိုင် လုၵ်ႈၸၢႆးသမ်ႉပေႃးတေလႆႈ ၸူမ်းသိူဝ်းသေႁဵတ်းလဵင်ႉပေႃႈမႄႈႁဝ်း တွပ်ႇၵုင်ႇၵႄးၸူး ပေႃႈမႄႈႁဝ်း ၶဝ်ယူႇယဝ်ႉဢေႃႈ ... ”
“ ဢေႃႈ ... ... ပေႃႈလႄႈမႄႈဢိူၺ် ... ပေႃႈမႄႈႁဝ်းၶဝ် ႁွတ်ႈၽႅဝ်ထိုင်ယူႇ ၽဝလႂ်သေတႃႉ ၶႅၼ်းတေႃႈ မုၼ်ႁူမ်ႇတူၺ်းပၼ် လုၵ်ႈ ၸၢႆးၶဝ်သေၵမ်း ... လုၵ်ႈၸၢႆး တေမုင်ႈမွင်းမဵတ်ႉတႃႇပေႃႈမႄႈသွင်ၸဝ်ႈ ယူႇတႃႇသေႇဢေႃႈ ... ... ”
လႆႈငိၼ်း သဵင်ၸၢႆးၼွင်ႉႁႆႈႁႃတိူင်ႇၵၢဝ်ႇၼင်ႇၼၼ် မႄႈပႃႈပီး ဢၼ်မႃးၸွမ်းသူင်ႇမၼ်းၼၼ်ႉၵေႃႈ ၼမ်ႉတႃ သမ်ႉပေႃးတူၵ်းၸွမ်း ၸၢႆးၼွင်ႉယူႇယဝ်ႉ ၊ မၼ်းတေႁွင်ႉၸၢႆးၼွင်ႉဝႃႈ “ လၢၼ်သၢင်ႇ ” ၼႆၵေႃႈ မၼ်းဢမ်ႇႁတ်းႁွင်ႉထႅင်ႈယဝ်ႉလႄႈ မၼ်းၸင်ႇဝႃႈ -
“ လၢၼ် ... လၢၼ်ၸၢႆး ... မႄႈပႃႈၵေႃႈ ၸႂ်ဢမ်ႇလီၸွမ်း သူပေႃႈမႄႈလုၵ်ႈတႄႉတႄႉယဝ်ႉ ... ယိူၼ်ႉၸႂ်ဢဝ်လႄႈ ပႃႈ ... ယိူၼ်ႉလႄႈ ... ... ”
ၸၢႆးၼွင်ႉၵေႃႈ ၸဵတ်ႉၼမ်ႉတႃမၼ်းသေ -
“ မႄႈပႃႈ ... ၶုမ်ပႃႇႁဵဝ်ႈပေႃႈမႄႈၶႃႈၼႆႉ ၶႃႈၶႂ်ႈၵေႃႇဢုတ်ႇသေ မေးလွမ်ႉဝႆႉလီလီဢေႃႈ ... ”
“ ၶႅမ်ႉၽႅဝ်ဢိူဝ်ႈ လၢၼ်ၸၢႆး ... ”
“ တီႈၼႂ်းဝၢၼ်ႈၼႆႉႉ ... မေႃၵေႃႇ ၵူၼ်းမေႃၶပ်ႉဢုတ်ႇၸွင်ႇမီးၶႃႈႁိုဝ် ... ၸွင်ႇတေႁႂ်ႈၶဝ်ႁဵတ်းပၼ်လႆႈၶႃႈ ... ? မႄႈပႃႈ ... ”
“ မီးယူႇ ... မႄႈပႃႈ... တေၵႂႃႇၸွႆႈလၢတ်ႈပၼ်လႆ ... ”
“ ၸူမ်းၶႃႈယဝ်ႉ ... မႄႈပႃႈ ... သင်ဝႃႈ ၵေႃႇဢုတ်ႇယဝ်ႉ လီ လီငၢမ်းငၢမ်းၼႆ ဝၢႆးၼႆႉ ၶႃႈတေၵႂႃႇႁႃႁွင်ႉ ပီႈဢၢႆႈၶႃႈသေ ၶိုၼ်းတေမႃးၵၼ်ႇတေႃး ပေႃႈမႄႈႁဝ်းထႅင်ႈၵွၼ်ႇဢေႃႈ ... ”
“ ပီႈဢၢႆႈလၢၼ်ၸၢႆး မီးလႂ်ၼႆ ႁူႉယူႇႁႃႉ ... ” “ ဢမ်ႇႁူႉလႄႈ ၶႃႈၸင်ႇမႃးထၢမ်မႄႈပႃႈႁဝ်းၶဝ်ဢေႃႈ ... မႄႈပႃႈႁဝ်းဝႃႈ ယူဝ်ၶႄး တေမီးတႃႈၵုင်ႈၼႆလႄႈ ၶႃႈတေဢၢၼ်းၵႂႃႇႁႃႁႂ်ႈႁၼ်ဢေႃႈ ... ... ”
ၶႃသွင်ၵေႃႉ ပွၵ်ႈမႃးမိူဝ်းၸွမ်းၵၼ်ယူႇ -
“ ဢမ်ႇငၢႆႈငၢႆႈယူဝ်ႉ ... တႃႈၵုင်ႈဢၼ်ဝႃႈၼၼ်ႉ ပဵၼ်ဝဵင်းယႂ်ႇဝဵင်းလူင် ၵူၼ်းၵိုၼ်းၵူၼ်းၼမ်လူင် လၢၼ် ... ”
“ သင်ဝႃႈ ... သၢင်ႇတေႃႇၼႆ တေၸၢင်ႈႁၼ်ယူႇၶႃႈၵႂႃႈ ... ယွၼ်ႉပိူဝ်ႈ ဢမ်ႇမီးပေႃႈမႄႈ ပီႈၼွင်ႉသေၵေႃႉယဝ်ႉလႄႈ ၶႃႈၸႂ်ယႂ်ႇ ပီႈဢၢႆႈၶႃႈၼင်ႇၵဝ်ႇဢေႃႈ ... ”
“ ဢိူဝ်ႈ ... ဢိူဝ်ႈ ... ႁႂ်ႈၶိူဝ်ပီႈၼွင်ႉၸဵဝ်းၺႃးၵၼ် သေၵမ်း ၼႆ မႄႈပႃႈယွၼ်းသူးပၼ်ယူႇ ... ”
“ ႁႂ်ႈပဵၼ်မႃးၼင်ႇသူပ်းၼင်ႇၵႂၢမ်း မႄႈပႃႈႁဝ်းၼၼ်ႉသေၵမ်းၶႃႈ ... ဢေႃး ... ထႅင်ႈပိူင်ၼိုင်ႈ ... ၶႃႈၶႂ်ႈႁႅၼ်းသွမ်း လီလီငၢမ်းငၢမ်းသေ မိူဝ်းလူႇတၢၼ်း တီႈၵျွင်း တႃႇၽႄၵုသူဝ်ႇပၼ် ပေႃႈမႄႈၶႃႈၼၼ်ႉ မႄႈပႃႈႁဝ်း ၸွႆႈထႅမ်ပၼ်ၽွင်ႈ ၶႃႈၼေႃႈ ... ”
“ ပိူၼ်ႈဝႃႈ ... ပေႃးသူင်ႇ သူင်ႉၽႅဝ်တႃႈ ပေႃးၵႃႈ ၵႃႈတေႃႇပွႆးပေႃးယဝ်ႉ ၼႆၼႃႇ မႄႈပႃႈ တေၸွႆႈထႅမ်ပၼ် လၢၼ်ၸၢႆးလႆ ... ပေႃႈမႄႈသူလႄႈ မႄႈသူၼႆႉ မိုတ်ႈၵၼ်တႄႉဢိူဝ်ႈ ... ”
“ ၸူမ်းဝႃႈၸူမ်းၶႃႈယဝ်ႉ ... မႄႈပႃႈ ... ”
ၸၢႆးၼွင်ႉၵေႃႈ ၵိုတ်းယင်ႉတီႈႁိူၼ်းမႄႈပႃႈပီးၶဝ် ဝူင်ႈၼိုင်ႈ၊ ဝၢႆးသေ ႁႅၼ်းလူႇႁႅၼ်းတၢၼ်းယဝ်ႉ ဝၢႆးသေ မႄးၵေႃႇၶုမ်ပေႃႈမႄႈမၼ်းယဝ်ႉ လီလီငၢမ်းငၢမ်း မၼ်းၵႂႃႇၵၼ်ႇတေႃးၶုမ်ပေႃႈမႄႈမၼ်းသေ -
“ ဢေႃး ... ... ပေႃႈမႄႈၸဝ်ႈၵႄးၸူးတင်းသွင် ... ယၢမ်း လဵဝ်လုၵ်ႈၸၢႆး တေၵႂႃႇႁႃၵေႃႉပဵၼ်ပီႈဢၢႆႈသေ တေႁွင်ႉမၼ်း မႃးၵၼ်ႇတေႃး ပေႃႈမႄႈႁဝ်းၶဝ်ယူႇဢေႃႈ ... ၵွပ်ႈၼႆ ... ႁႂ်ႈႁႃးပီႈၼွင်ႉ ၸဵဝ်းႁၼ်ၵၼ်ၶိုၼ်း သေၵမ်းၶႃႈ ... ...”