ၶႅၵ်ႇ/တွၼ်ႈသၢဝ်းႁူၵ်း
ဝၼ်းမိူဝ်ႈၼႆႉ ပဵၼ်ဝၼ်းၵိူတ်ႇၽူၺ်းလႄႈ တီႈပၢင်ပွႆးဝၼ်းၵိူတ်ႇမၼ်း တႆးၵေႃႉမၼ်းၼၢင်း ဢွၼ်ၵၼ်ဢဝ်ၶူဝ်းၽၢၵ်ႇတွၼ်ႈသေ မႃးတွၼ်ႈပၼ်မၼ်း မႃးယွၼ်းသူးပၼ်မၼ်းယူႇ။
ၽႆးၶွင်ႇၽႆးၶဵဝ်ၽႆးလႅင် ဢၼ်ႁွႆႈဝႆႉ ၸွမ်းတူၼ်ႈမႆႉၵေႃႈ မၢပ်ႈႁိူဝ်ႈမၢပ်ႈႁိူဝ်ႈဝႆႉသေ ပဵၼ်ဢၼ်ႁၢင်ႈလီတႃဝႆႉယူႇ၊ ၶႅၵ်ႇ ၸိူဝ်းဢၼ်ၽႅဝ်မႃးၸိူဝ်းၼၼ်ႉ ဢွၼ်ၵၼ်ၼင်ႈၵိၼ်ၼမ်ႉၼဵင်ႈၼမ်ႉဝၢၼ် ၶဝ်ႈမုၼ်းတၢင်းၵိၼ်သေ ၼင်ႈထွမ်ႇၵႂၢမ်း ဢၼ်ၸုမ်းႁႆႇတိုင်ႈၶဝ် တွႆႇတိုင်ႈႁွင်ႉၵႂၢမ်းမူၼ်ႈၸႂ်ၼၼ်ႉယူႇ။
ၽူၺ်းၵေႃႉၼိုင်ႈတႄႉ ၵုမ်ႇၸူမ်းႁပ်ႉတွၼ်ႈ ပီႈၼွင်ႉၶႅၵ်ႇၶဝ်သေ သမ်ႉပေႃးဢမ်ႇႁူႉႁိူဝ်ႉယဝ်ႈ ၊ ၸၢႆးၸၢႆးၶဝ်ပေႃႈမႄႈလုၵ်ႈလႄႈ ၸၢႆးၼွင်ႉၵေႃႈ ၶီႇၵႃးမႃးၸွမ်းၵၼ်ယဝ်ႈ၊ ၸၢႆးၼွင်ႉ ၵေႃႉႁေႃႈၵႃးလႄႈ ပေႃးဝႃႈ ၽႅဝ်မႃး တီႈႁိူၼ်းၽူၺ်းၶဝ်ၼႆ လႆႈႁၼ်ၵႃးၶပ်ႉယႆၵၼ်ဝႆႉ မီးတၢင်းၼမ်ယဝ်ႈ၊ ၸၢႆးၼွင်ႉၵေႃႈ ႁေႃႈၵႃး ၵႂႃႇသူင်ပၼ် ႁိမ်းၽၵ်းတူဝၢင်းသေ လုင်းၸၢႆးၽေႇၶဝ် လူင်းၵႃးၵႂႃႇယဝ်ႉ၊ ၽွင်းမိူဝ်ႈၼၼ်ႉ ၸၢႆးၸၢႆးၸင်ႇဝႃႈ -
“ ဢၢႆႈၼွင်ႉ ... ဢဝ်ၵႃးၵႂႃႇဝႆႉ တၢင်းပုၼ်ႉလႄႈ ပေႃးမႂ်းၶဝ်ႈမႃးၼႆ ယႃႇပေမႃးၼင်ႈတီႈၽိူၼ်ႁဝ်း ... ၼႃႈ ... ”
“ ဢေႃႈ ... ဢေႃႈ ... ”
ၸၢႆးၼွင်ႉ ထူၺ်ႈၸႂ်လူင်ၵမ်းၼိုင်ႈသေ ႁေႃႈၵႃး ၵႂႃႇဝႆႉတီႈပဝ်ႇ တီႈၼိုင်ႈယဝ်ႈ၊ လွင်ႈဝႃႈ ၸၢႆးၸၢႆးဢမ်ႇၶႂ်ႈႁႂ်ႈမၼ်း ၼင်ႈၽိူၼ်ႁူမ်ႈၶဝ်ၼၼ်ႉၼႆၵေႃႈ မၼ်းပွင်ႇၸႂ်ယူႇ၊ ၸၢႆးၸၢႆးၶဝ်ပေႃႈမႄႈလုၵ်ႈ ၶဝ်ႈၵႂႃႇၼႂ်းဝၢင်းႁိူၼ်းသေ ၽူၺ်းၸင်ႇမႃးႁပ်ႉတွၼ်ႈၶဝ်ယူႇယဝ်ႈ၊ မၼ်းၼၢင်းႁွမ်းမိုဝ်းဝႆႈသေ ယုမ်ႉတၵ်ႉၶဝ်ဝႃႈ -
“ မႂ်ႇသုင် ၶႃႈ ... ”
“ မႂ်ႇသုင် ... ”
“ ၶဝ်ႈမႃး ၼင်ႈၽိူၼ်တၢင်းၼႃႈ ၼႆႉၶႃႈလႄႈ ... ”
ၽူၺ်း လွမ်တူၺ်း ဢမ်ႇလႆႈႁၼ်ၸၢႆးၼွင်ႉလႄႈ မၼ်းၸင်ႇထၢမ်
“ ၸၢႆးၼွင်ႉ ဢမ်ႇမႃးၶႃႈႁႃႉ ... ? ”
“ မႃးယူႇ ... မၼ်းတိုၵ်ႉၵႂႃႇဝႆႉၵႃးယူႇဢိူဝ်ႈ ... မၼ်းတေၸွမ်းမႃးယူႇ ... ”
“ ၼင်ႈၶႃႈလႄႈ ... ”
ၸၢႆးၸၢႆး ၸင်ႇဢဝ်ၶူဝ်းတွၼ်ႈ ဢၼ်ၶဝ်ပႃးမႃးၼၼ်ႉသေ တွၼ်ႈပၼ်ၽူၺ်းယဝ်ႉ -
“ ၽူၺ်း ... ၼႆႉပဵၼ် ၶူဝ်းတွၼ်ႈပုၼ်ႈတႃႇၽူၺ်းယဝ်ႈ ... ”
“ ၸူမ်း ၶွပ်ႈၸႂ်ယဝ်ႈ ... ၸၢႆးၸၢႆး ... ”
ၶႅၵ်ႇၸုမ်းၼိုင်ႈယဝ်ႉၸုမ်းၼိုင်ႈ ၽႅဝ်မႃးထႅင်ႈလႄႈ ၽိူၼ်ၸၢႆးၸၢႆးၶဝ်ပေႃႈမႄႈလုၵ်ႈၼၼ်ႉၵေႃႈ ပေႃႈမႄႈၽူၺ်းၶဝ် မႃးၼင်ႈၶၢမ်ႇၶႅၵ်ႇသေ တဵမ်ၽိူၼ်ၵႂႃႇယဝ်ႈ၊ ၽူၺ်းၵေႃႈ ၵႂႃႇသိုပ်ႇႁပ်ႉတွၼ်ႈ ၶႅၵ်ႇတင်းၼမ်ယူႇ၊ ၽူၺ်းလႆႈႁၼ်ၸၢႆးၼွင်ႉ ၼုင်ႈၵူၼ်တႆးသိူဝ်ႈတႆးသေ ၶဝ်ႈမႃးလႄႈ မၼ်းၼၢင်း ၸူမ်းသိူဝ်းသေ ၵႂႃႇႁပ်ႉတွၼ်ႈယူႇယဝ်ႈ -
“ မႂ်ႇသုင် ... ၸၢႆးၼွင်ႉ ... ”
“ မႂ်ႇသုင် ... ၽူၺ်း ... ”
“ မႃးလႄႈ ... ၸၢႆးၼွင်ႉ ... ”
“ ၽူၺ်း ... ၸၢႆးၼွင်ႉ ဢမ်ႇလႆႈၶူဝ်းတွၼ်ႈသင်မႃးသေတႃႉ တေၶတ်းၸႂ်ႁွင်ႉတွၼ်ႈပၼ် ၵႂၢမ်းသွင်ပုၵ်ႈ ၼႃႈ ... ”
“ ၸူမ်းယဝ်ႉ ... ၸၢႆးၼွင်ႉ ... ပေႃးထိုင်ၶပ်ႉမၢႆမၼ်းၼႆ ၽူၺ်းတေလၢတ်ႈလႆ ... ”
ၸၢႆးသႅင်လႄႈ လႅင်းၵေႃႈ ၽႅဝ်မႃးႁိမ်းၸၢႆးၼွင်ႉသေ မႃးႁွင်ႉၸၢႆးၼွင်ႉ ၵႂႃႇၼင်ႈၸွမ်းၶဝ်ယူႇယဝ်ႈ၊ ၶဝ်ဢွၼ်ၵၼ်ၸူမ်းသိူဝ်း ၼင်ႈၵိၼ်တၢင်းၵိၼ်သေ ဢုပ်ႇၵၼ်ယူႇ၊ ယူႇၵမ်းၼိုင်ႈ လႆႈႁၼ်ၽူၺ်းၶိုၼ်းၵႂႃႇတီႈ ၶဵင်ႇႁွင်ႉၵႂၢမ်းၼၼ်ႉသေ မွၵ်ႇလၢတ်ႈ ၵႂၢမ်းၶွပ်ႈၸႂ်ထိုင် ၸိူဝ်းမႃးၶိုၼ်ႈႁွတ်ႈ ပွႆးဝၼ်းၵိူတ်ႇမၼ်းၼၼ်ႉယူႇ -
“ မႂ်ႇသုင် တင်းသဵင်ႈၶႃႈ ... မိူဝ်ႈၼႆႉ ပဵၼ်ဝၼ်းၵိူတ်ႇၽူၺ်းလႄႈ လႆႈႁၼ်ပေႃႈမႄႈပီႈၼွင်ႉ ဢိၵ်ႇလူၺ်ႈ ဢူၺ်းၵေႃႉႁဝ်းၶဝ် ဢွၼ်ၵၼ်မႃးပၼ်ဢဵၼ်ပၼ်ႁႅင်း ၶိုၼ်ႈႁွတ်ႈလႄႈ ... ၽူၺ်း ပဵၼ်ဢၼ်ၸူမ်းသိူဝ်း ႁပ်ႉတွၼ်ႈတႄႉတႄႉယူႇဢေႃႈ ... ပေႃႈမႄႈပီႈၼွင်ႉ ဢိၵ်ႇလူၺ်ႈ ဢူၺ်းၵေႃႉႁဝ်းၶဝ်တင်းသဵင်ႈ ႁႂ်ႈမႂ်ႇသုင်သိူဝ်းၸႂ်ၵႂႃႇ ဝၼ်းတႃမိူဝ်းၼႃႈသေၵမ်းၼႆၽူၺ်း ယွၼ်းသူးပၼ်ယူႇ ... ဢေႃႈ ... ”
ဝၢႆးသေ ၽူၺ်းလၢတ်ႈၵႂၢမ်းတူင်ႉတၵ်ႉၵႂႃႇယဝ်ႉ သဵင်တူပ်းမိုဝ်း သမ်ႉပေႃးပၼ်းမေႃးလူင်ၵႂႃႇယူႇယဝ်ႈ ။
ၸွမ်းၼင်ႇၶပ်းမၢႆၶဝ် မီးဝႆႉၼၼ်ႉ ၸုမ်းႁႆႇတိုင်ႈၶဝ် ဢွၼ်ၵၼ် ႁွင်ႉၵႂၢမ်းၽၢၵ်ႇတွၼ်ႈဝၼ်းၵိူတ်ႇပၼ် ၽူၺ်းယူႇ၊ ပေႃးၵႂၢမ်းသုတ်းၵႂႃႇၼိုင်ႈပုၵ်ႈၼႆ ဢွၼ်ၵၼ်တူပ်းမိုဝ်းပၼ်ႁႅင်းယဝ်ႈ၊ ဢမ်ႇႁိုင်ဢမ်ႇၼၢၼ်း ၶပ်ႉမၢႆႁွတ်ႈထိုင်မႃးယဝ်ႉလႄႈ ၸၢႆးၸၢႆးၶိုၼ်ႈႁွင််ႉၵႂၢမ်းပုၵ်ႈၼိုင်ႈယဝ်ႈ ၊ ၸၢႆးၸၢႆးၼႆႉ ၸွမ်းၼင်ႇ ဝႃႇသၼႃႇမၼ်း မိုတ်ႈလူၺ်ႈၵႂၢမ်းၼွၵ်ႈမိူင်းၼၼ်ႉလႄႈ မၼ်းႁွင်ႉပၼ် ၵႂၢမ်းဢင်းၵိတ်ႉပုၵ်ႈၼိုင်ႈယူႇ ၊ သဵင်တွႆႇသဵင်ႁႆႇတင်းသဵင်ႈ ပဵၼ်ဢၼ်တွႆႇလႅတ်းႁႆႇလႅတ်းလွၼ်ႉလွၼ်ႉသေဢမ်ႇၵႃး သဵင်ႁွင်ႉၵႂၢမ်းၵေႃႈ ပဵၼ်ဢၼ်ႁွင်ႉ ပေႃးဢွၵ်ႇသဵင်လိပ်းသဵင်ၶဵဝ်ၼၼ်ႉယူႇ ၊ ယွၼ်ႉပိူဝ်ႈ သဵင်ၸၢၵ်ႈၵေႃႈ လင်ႁၢဝ်ႉႁႅင်းၼႃႇလႄႈ ၸိူဝ်းဢၼ်လႆႈငိၼ်းထွမ်ႇၼၼ်ႉ သမ်ႉပေႃးၶႂ်ႈဢၢၼ်ၸႂ်ၵႂႃႇယူႇယဝ်ႈ ။
ၽွင်းမိူဝ်ႈ ၸၢႆးၸၢႆးတိုၵ်ႉၵျွၵ်းလဵတ်းၵျွတ်းႁွင်သေ ႁွင်ႉၵႂၢမ်းယူႇၼၼ်ႉ ၽူၺ်း ၸင်ႇၽႅဝ်မႃးႁိမ်း ၸၢႆးၼွင်ႉ သေ -
“ ၸၢႆးၼွင်ႉ ... ပေႃးၸၢႆးၸၢႆး ႁွင်ႉယဝ်ႉၼႆ ... တူၵ်းလႄႉၵမ်းၸၢႆးၼွင်ႉယဝ်ႈ ... ႁွင်ႉပၼ်လီလီၼႃႈ ... ”
“ တမ်းၸႂ်လႃႈ ... ၽူၺ်း ... ”
ဝၢႆးသေ ၸၢႆးၸၢႆးႁွင်ႉၵႂၢမ်းၵႂႃႇယဝ်ႉ ၸၢႆးၼွင်ႉၶိုၼ်းၵႂႃႇ ၼိူဝ်ၶဵင်ႇႁွင်ႉၵႂၢမ်းသေ ၵႂႃႇလၢတ်ႈဝႃႈ -
“ မႂ်ႇသုင်ၶႃႈ ... ၵွပ်ႈပိူဝ်ႈ လႆႈမႃးႁွင်ႉၵႂၢမ်းၼိူဝ်ၶဵင်ၼႆႉလႄႈ ပဵၼ်ဢၼ်ငိၼ်းၸူမ်းတႄႉတႄႉၶႃႈ ... ၵႂၢမ်းဢၼ်ၶႃႈႁဝ်းတေႁွင်ႉၼႆႉ ပဵၼ်ၵႂၢမ်းၽၢၵ်ႇတွၼ်ႈဝၼ်းၵိူတ်ႇ ပဵၼ်ၵႂၢမ်းတႆးပၢၼ်ၵဝ်ႇဢေႃႈ ၶႅၼ်းတေႃႈ ယိူၼ်ႉၸႂ်ငိၼ်းထွမ်ႇၵၼ်သေၵမ်းၶႃႈ ... ”
ၸၢႆးၼွင်ႉ မႄးၶဵင်ႈမႄးယၢၼ်းသၢႆတိင်ႇသေ တူဝ်မၼ်းၵေႃႉလဵတ်းတိင်ႇႁွင်ႉၵႂၢမ်းယဝ်ႈ၊ ၵူၼ်းႁႆႇတိုင်ႈၸိူဝ်းၼၼ်ႉတႄႉ ဢွၼ်ၵၼ်ၵိုတ်းလိုဝ်ႈသေ ယဵၼ်ထွမ်ႇၵႂၢမ်းပၢၼ်ၵဝ်ႇ ၸၢႆးၼွင်ႉယူႇ -
“ ... ဝႃႈၵႃႈမိူဝ်းၼႆႉ ... ၶဝ်ႈပဵၼ်ဝၼ်းလီဝၼ်းငၢမ်း ... ၶႃႈၸင်ႇတေလႆႈမႃးႁွင်ႉၵႂၢမ်း ... ၽၢၵ်ႇၸူးၼွင်ႉၽူၺ်းႁွမ်ယဝ်ႉၼႃႈ ... ၽူၺ်းဢိူၺ်း ... သူၼႆႉၶဝ်ႈပဵၼ်ၵူၼ်းလဝ်း ၵူၼ်းသဝ်းၼႂ်းၶူးၼႂ်းဝဵင်း ... ထၢၼ်ႈပဵင်းလိူဝ်ပိူၼ်ႈၼေႃး ... ဢေႃး ၶၢဝ်ႇငၢဝ်းၶိုၼ်ႈၸိၵ်းၸွမ် ... လွမ်မုင်ႈတူၺ်း ၼႃႈၽူၺ်း ... သမ်ႉပေႃးတၢၼ်ႇငိုၼ်းလုၵ်ႈလိူၼ်မူၼ်း ... ႁၢင်ႈဢွၼ်ႇၼႃႈသူၼွင်ႉၽူၺ်းၼႆႉ ... ပဵၼ်ဝႆႉ ၼႃႈမဵတ်ႉတႃႇ ၵရူႉၼႃႇ မုတိတႃႇ ... မေႃဝႆႉၼႃႇ ... ထုၵ်ႇၸႂ်ၵူႈၵူၼ်းၵူၼ်း သူၼ်းႁႂ်ႈႁဝ်းလႆႈသဝ်းၵျေႃႇၼႃႇ ... မိူဝ်ႈဝၼ်းၵိူတ်ႇဝၼ်းလွတ်ႈၽေးၶဵၼ် ... ဝၼ်းၸိုၼ်ႈၵတ်းယဵၼ် ၼႆၼေႃး ... ”
“ ၶႃႈႁဝ်းၼႆႉတႄႉ တႃႇတေႁႂ်ႈမေႃ ၵႂၢမ်းထေႃဢင်းၵိတ်း ၵျွၵ်းလိတ်းၵျွတ်းလိတ်း ... ၵႃႈၶိတ်းၵႃႈၶိတ်း ပေႃးတၢၼ်ႇပိူၼ်ႈၸိတ်းၼဵၼ် ... ထွမ်လူး ... ထွမ်ႇလူး ... သဵင်ႁွင်ႉၵႂၢမ်းၵေႃႈၼေႃး ... ႁွင်ႉမေႃး သမ်ႉပေႃႈလေႁႃယိုတ်ႈၶေႃးဢဵၼ် ... ၶဵၼ်တႄႉၼေႃး ၸိူင်ႉႁဝ်းၼႆႉ ... သမ်ႉဢမ်ႇပဵၼ်လႆႈလႃးလႃး ... ၵွပ်ႈဝႃႈ ႁဝ်းၼႆႉပဵၼ်ဝႆႉ ... ၵူၼ်းဢမ်ႇၶိုတ်းၵၢပ်ႈလိူဝ်ဢႃး ... မႃးႁွင်ႉၵႂၢမ်းၽိင်ႈတႆးၵဝ်ႇ ... ဢၼ်ပိူၼ်ႈမဝ်ႇတွၼ်ႉယၢမ်ႈငိၼ်းႁၼ်ၼၼ်ႉယဝ်ႉ ...
ၶႃႈႁဝ်းၸၢႆးၼွင်ႉ ... ၸင်ႇတေႁွင်ႉၵႂၢမ်းၵၢဝ်ႇယွၼ်းသူး တိူင်ႇၸူးၼွင်ႉၽူၺ်း ... ၵေႃႉဢူၺ်း မိုတ်ႈၵိုဝ်းၵၼ် လွင်ႈလူၺ်ႈဢမ်ႇလီဢမ်ႇလၵ်းၼၼ်ႉ ယႃႇပေႁႂ်ႈ တၵ်းလႆႈၺႃးႁၼ် ...ၶဵၼ်ၽေးႁႂ်ႈတၵ်းယၢႆႈၵၢင်းယၢၼ် ... ဢၼ်ၶႅမ်ႉလိူဝ်ပိူၼ်ႈတွၼ်းသုတ်း ႁႂ်ႈၶႅမ်ႉလိူဝ်ပိူၼ်ႈတွၼ်းသုတ်း ... ... ၽုတ်းပေႃႇပၼ်ၼွင်ႉၼုတ်းၵေႃႉၽူၺ်းပီႈသေၵမ်း ...ၶမ်းႁိုဝ်ႉငိုၼ်း ႁူႉတိုၼ်းႁႂ်ႈၵိုၼ်းလိူင်ႇတႃႇသေႇ ပေႁႂ်ႈမၼ်းဢေႇ ႁႂ်ႈမီးမၢၵ်ႈတွၼ်းၼမ် မီးလွင်ႈသဝ်းယမ်သေၵမ်းဢေႃႈ...”
ၽွင်းမိူဝ်ႈ ၸၢႆးၼွင်ႉ ႁွင်ႉမေႃၵႂၢမ်းပၢၼ်ၵဝ်ႇၼၼ်ႉ ပိူၼ်ႈဢမ်ႇသူႈယၢမ်ႈငိၼ်းၵၼ်လႄႈ ဢွၼ်ၵၼ်ႁေႈႁူယဵၼ်ထွမ်ႇၵႂၢမ်းမၼ်းဝႆႉယူႇ ၊ ၵွပ်ႈပိူဝ်ႈသင်ၼႆၸိုင် မိူဝ်ႈၸၢႆးၸၢႆး ႁွင်ႉၵႂၢမ်းဢင်းၵိတ်ႉၼၼ်ႉ သဵင်တွႆႇမၼ်းပဵၼ်ဢၼ်သုၵ်ႉသၢၵ်ႉသူၼ်သၢၼ်၊ ထိုင်တီႈၸၢႆးၼွင်ႉၼႆႉသမ်ႉ ပဵၼ်သဵင်ဢၼ်ယဵၼ်ၵတ်းႁူလႄႈ ပိူင်ၼိုင်ႈ၊ သဵင်ၸၢႆးၼွင်ႉၵေႃႈ သမ်ႉၶႅမ်ႉလႄႈ ပိူင်ၼိုင်ႈ၊ ၵူၼ်းမႃးပွႆးၶဝ် ဢွၼ်ၵၼ်လႆႈၸႂ်ၵၼ်သေ ယုမ်ႉထုၵ်ႇၸႂ်ဝႆႉယူႇ။
ၽူၺ်းၵေႃႈ ၶဝ်ႈၸႂ်သေ ထွမ်ႇၵႂၢမ်းၸၢႆးၼွင်ႉ လီလီငၢမ်းငၢမ်းယူႇ ယွၼ်ႉပိူဝ်ႈ ပွႆးဝၼ်းၵိူတ်ႇမၼ်းၼၢင်းၼႆႉ မီးၵူၼ်းႁွင်ႉၵႂၢမ်းၵူႈမဵဝ်းမဵဝ်းလႄႈ မၼ်းၼၢင်းပဵၼ်ဢၼ်ၸူမ်းတႄႉတႄႉ၊ ပေႃးဝႃႈ ၸၢႆးၼွင်ႉႁွင်ႉၵႂၢမ်းသုတ်းၵႂႃႇယဝ်ႉၼႆ ပိူၼ်ႈဢွၼ်ၵၼ် တူပ်းမိုဝ်းပၼ်ႁႅင်းမၼ်း သမ်ႉပေႃးၵွင်ႈလူင်ၵႂႃႇယဝ်ႈ၊ ၸၢႆးၼွင်ႉ ၶိုၼ်းဢဝ်ၸေႈပိူင်ႁွင်ႉၵႂၢမ်း ယိုၼ်ႈပၼ် ၵူၼ်းႁႆႇတိုင်ႈ ၶဝ်ၵေႃႉမၢင်မၢင်သေ မၼ်းၶိုၼ်းမႃးလၢတ်ႈဝႃႈ -
“ ၵမ်းၼႆႉ ... ၶႅၼ်းတေႃႈ သိုပ်ႇငိၼ်းထွမ်ႇၵႂၢမ်းဢၼ်ဝႃႈ မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်း ၼၼ်ႉသေၵမ်း ... ”
ပွၵ်ႈၼႆႉ သမ်ႉပဵၼ်သဵင်ႁႆႇတိုင်ႈပၢၼ်ႇမႂ်ႇလႄႈ ၸၢႆးၼွင်ႉ မေႃႁွင်ႉ ၵႂၢမ်းပၢၼ်မႂ်ႇသေၼႆ ပိူၼ်ႈၸင်ႇဢွၼ်ၵၼ် ၶဝ်ႈၸႂ်ၼိူဝ်မၼ်းသေ လွမ်ထၢမ်ၵၼ်ဝႃႈ
“ မၼ်းပဵၼ်ၽႂ် ... ? ယူႇတီႈလႂ် ... ? သဵင်မၼ်းလီတႄႉၼေႃ ... ”ၼႆယူႇ ၊
ၸၢႆးၼွင်ႉ ယိပ်းမႅၵ်ႉႁွင်ႉၵႂၢမ်း ႁဵတ်းႁၢင်ႈၵႃႈၸွမ်းၵႂၢမ်းသေ သိုပ်ႇႁွင်ႉၵႂၢမ်းပၼ်ၽူၺ်းယူႇ၊ ၵူၼ်းတႂ်ႈၶဵင်ႇၸိူဝ်းၼၼ်ႉ ဢွၼ်ၵၼ်ငဝ်တူၺ်းၸၢႆးၼွင်ႉသေ ပေႃးလိုမ်းၵိၼ်တၢင်းၵိၼ်ၶဝ်ယူႇယဝ်ႈ။
ယူႇတီႈႁူဝ်လွႆ လူင်းမႃးႁၼ် ၼွင်ႉတႆးဝဵင်းၵေႃႉမႃးထုၵ်ႇၸႂ်ၸၢႆးဢိူၺ်
ၵႂႃႇတီႈလႂ်ၵေႃႈ ၸႂ်ၸပ်းၸွမ်းသူ ၼွင်ႉၼၢင်းၵူၼ်းႁၢင်ႈလီဢွၼ်ႇသင်ပေႉမႃးၵဝ်းမၢၵ်ႇႁူဝ်ၸႂ်ႁဝ်း
မဝ်းၸွမ်းၼွင်ႉပေႃးတၢၼ်ႇ ပႃႁၼ်ၶေးၼမ်ႉသႂ် သိူဝ်းယူႇၸမ်
မၢဝ်ႇပီႈႁဝ်း လႆႈမႃးထူပ်းႁၼ် ၸႂ်ၸပ်းၼွင်ႉဢွၼ်ႇယဝ်ႈ ၸွင်ႇသူၼၢင်း တေႁၵ်ႉၸၢႆးလႆႈ ၶႂ်ႈယွၼ်းၵႂၢမ်းထၢမ်တူၺ်း
ဢမ်ႇႁိုင်ပီႈတေမိူဝ်းယဝ်ႉၼႃႈ ၼွင်ႉတႆးဝဵင်း ၵေႃႉမႃးထုၵ်ႇၸႂ်ၸၢႆးဢိူၺ် မွၵ်ႇလၢတ်ႈပီႈႁဝ်း ႁႂ်ႈပေႃးႁူႉလႄႈ ၸွင်ႇၼၢင်းၼွင်ႉႁၵ်ႉၸၢႆးႁိုဝ် ႁႂ်ႈပီႈပေႃးသိူဝ်းၵျေႃႇသေလႄႈမိူဝ်း ၸၢႆးႁၵ်ႉၼွင်ႉပေႃးတၢၼ်ႇ ပႃႁၼ်ၶေးၼမ်ႉသႂ် သိူဝ်းယူႇၸမ်
သင်ဝႃႈၸၢႆးယၢၼ်မိူဝ်းၼွင်ႉၵႂႃႇ တေႁဵတ်းၸိူင်ႉႁိုဝ်ၼႆ သၢဝ်ႁၢင်ႈလဝ်း ၼွင်ႉတႆးဝဵင်းဢိူၺ် ပီႈႁၵ်ႉၵိုမ်းၼႃႈယဝ်ႈ
ၽူၺ်း ယူႇတီႈတႂ်ႈသေ လွမ်တူၺ်းၸၢႆးၼွင်ႉ ဢၼ်တိုၵ်ႉႁွင်ႉၵႂၢမ်းပၼ် တႃႇမၼ်းၼၢင်းၼၼ်ႉယူႇ၊ ၵႂၢမ်းဢၼ်ပုၵ်ႈၼႆႉ တေၶႂ်ႈဝႃႈ ၸၢႆးၼွင်ႉ ပဵၼ်မၢဝ်ႇဝၢၼ်ႈၼွၵ်ႈ၊ တေၶႂ်ႈဝႃႈ ၽူၺ်းပဵၼ်သၢဝ်ၼွင်ႉတႆးဝဵင်း ၼႆႁိုဝ် ? ၵွပ်ႈပိူဝ်ႈသင် ၸၢႆးၼွင်ႉသမ်ႉလိူၵ်ႈလိူၵ်ႈသေ ႁွင်ႉၵႂၢမ်းပုၵ်ႈၼႆႉ ? ၵွပ်ႈပိူဝ်ႈ မၼ်း လွမ်ႁၵ်ႉၽူၺ်းသေ မၼ်းပိုတ်ႇၽုၺ်ႇႁူဝ်ၸႂ်မၼ်းႁိုဝ် ? မၢင်ၵမ်းမၢင်ၵမ်း လႆႈႁၼ်ႁၢင်ႈၸၢႆးၼွင်ႉ ၸီႉၽူၺ်းသေ ႁွင်ႉမေႃၵႂၢမ်းယူႇလႄႈ ၽူၺ်း လွမ်ပဵၼ်မၢၵ်ႇႁူဝ်ၸႂ် တွတ်ႇဝႆႉယူႇ။ ၽူၺ်းၵေႃႉၼိုင်ႈ လွမ်တူၺ်း ၸၢႆးၼွင်ႉတႃပေႃးဢမ်ႇၽႅပ်ႉၼႆ ၸၢႆးၸၢႆး တူၺ်းႁၼ်ၼင်ႇၼၼ်သေ ပဵၼ်တၢင်းၶမ်ၸႂ်မၼ်း ဝႆႉယူႇၼႆ ၽူၺ်းတႄႉဢမ်ႇႁူႉ။ ပေႃးဝႃႈ ၵႂၢမ်းၸၢႆးၼွင်ႉ သုတ်းၵႂႃႇၼႆ ပိူၼ်ႈဢွၼ်ၵၼ် တူပ်းမိုဝ်းပၼ်ႁႅင်းသေတႃႉ ၸၢႆးၸၢႆးတႄႉဢမ်ႇတူပ်း။
ၶပ်ႉမၢႆၶဝ် ဢၼ်ၼိုင်ႈယဝ်ႉဢၼ်ၼိုင်ႈ ယဝ်ႉၵႂႃႇသေ ၶမ်ႈၼၼ်ႉ ၸၢႆးၼွင်ႉၶဝ်ၵေႃႈ ၶိုၼ်းပွၵ်ႈမႃးမိူဝ်းၸွမ်းၵၼ်ယဝ်ႈ။
ၸၢႆးၼွင်ႉတႄႉ မႃးၼွၼ်းဝူၼ်ႉႁၼ်ၼႃႈတႃႁၢင်ႈလီဢွၼ်ႇ ၽူၺ်း ဢၼ်မုင်ႈလွမ်တူၺ်းမၼ်း ႁွင်ႉၵႂၢမ်းၼၼ်ႉယူႇ။ ၽူၺ်းၵေႃႈ တေႃႈဝူၼ်ႉၸွမ်းၵႂၢမ်း “ မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်း ”ၼၼ်ႉသေ လွမ်လွမ်ထူၺ်ႈၸႂ်လူင်ယူႇ။ ၸၢႆးၸၢႆးၵေႃႈ ၼွၼ်းသေ ဝူၼ်ႉလွင်ႈၸၢႆးၼွင်ႉ ဢၼ်မႃးႁွင်ႉၵႂၢမ်းၽၢၵ်ႇပၼ် တႃႇၽူၺ်း “ မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်း ”ၼၼ်ႉလႄႈသင် မၼ်းဢမ်ႇႁၢၼ်ႉၸႂ်မၼ်းသေ ပဵၼ်ၸႂ်လမ်တေႃႇၸၢႆးၼွင်ႉယူႇ။ ၽူၺ်းၼႆႉ ပဵၼ်ၵေႃႉမၼ်းႁၵ်ႉဝႆႉလႄႈ ၸၢႆးၼွင်ႉၵႂႃႇႁွင်ႉၵႂၢမ်းၸိူင်ႉၼၼ် မၼ်းဢမ်ႇထုၵ်ႇၸႂ်မၼ်းသေဢိတ်း။ ၼႂ်းၵၢင်ၸႂ်မၼ်းတႄႉ ၶႂ်ႈမိတ်းလိမ်ႇပႅတ်ႈၶေႃးၸၢႆးၼွင်ႉ ၵွၼ်ႇယဝ်ႈ။