ၶႅၵ်ႇ/တွၼ်ႈသၢဝ်းၸဵတ်း
ၸၢႆးၸၢႆးၵေႃႉလဵဝ် ပႆမႃးၼႂ်းသူၼ်မွၵ်ႇၶဝ်သေ လွမ်တူၺ်းတူၼ်ႈမွၵ်ႇဢွၼ်ႇ တီႈၼိုင်ႈယဝ်ႉတီႈၼိုင်ႈယူႇ၊ လႆႈငိၼ်းသဵင်ၵူၼ်းဢုပ်ႇၵၼ်လႄႈ မၼ်းၸင်ႇၵႂႃႇလွမ်တူၺ်းယဝ်ႈ။ မၼ်းတူၺ်းႁၼ်ယူႇသေတႃႉ မၼ်းဢမ်ႇပေႃးၶႂ်ႈယုမ်ႇတႃမၼ်း၊ မၼ်းၸင်ႇပႅပ်ႉတီႈယုမ်းမွၵ်ႇသေ ၵႂႃႇလွမ်တူၺ်းၸမ်ၸမ် လႆႈႁၼ်ၸၢႆးၼွင်ႉလႄႈၽူၺ်း ၼင်ႈဢုပ်ႇၵၼ်ဝႆႉယူႇ။ ၽူၺ်းၵေႃႉၼိုင်ႈ တၼ်းၽႅဝ်မႃး ၼင်ႈဢုပ်ႇၸၢႆးၼွင်ႉ မိူဝ်ႈလႂ်ၼႆၵေႃႈဢမ်ႇႁူႉ။ ၵွပ်ႈသင် ၽူၺ်းသမ်ႉပႄႉမႃးၼင်ႈၸမ် ၸၢႆးၼွင်ႉ ? ၵွပ်ႈသင် ၸၢႆးၼွင်ႉ သမ်ႉဢမ်ႇလုၵ်ႉသေ ပၼ်ၽူၺ်းၼင်ႈၵေႃႉလဵဝ် ? ၶႃသွင်ၵေႃႉ ယုမ်ႉၶူဝ်တေႃႇၵၼ်သေ ဢုပ်ႇၵၼ်ယူႇသေတႃႉ ၶႃဢမ်ႇႁၼ်ၸၢႆးၸၢႆး ဢၼ်မႃးလွမ်ထွမ်ႇၶဝ်ၼၼ်ႉ၊ ၶႃႁဵတ်းႁိုဝ်ဢုပ်ၵၼ်ၼႆၵေႃႈ ၸၢႆးၸၢႆးႁၼ်သဵင်ႈသဵင်ႈယဝ်ႈ။
“ ၸၢႆးၼွင်ႉ ... မိူဝ်ႈဝၼ်းၵိူတ်ႇၽူၺ်းၼၼ်ႉ ၵွပ်ႈသင်သမ်ႉႁွင်ႉၵႂၢမ်းပုၵ်ႈၼၼ်ႉလႃႇ ... ”
“ ၵႂၢမ်းပုၵ်ႈလႂ် ... ? ”
“ မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်း ၼၼ်ႉဢိူဝ်ႈ ...”
“ ၽူၺ်း ... ၸၢႆးၼွင်ႉ လႆႈၵႂၢမ်းပုၵ်ႈၼၼ်ႉ ၵူၺ်းလႄႇ ... ”
“ ၵွပ်ႈသင်သမ်ႉ ဢမ်ႇႁွင်ႉၵႂၢမ်းတၢင်ႇပုၵ်ႈလႃႇ ... ? ”
ၸၢႆးၼွင်ႉ ယၵ်ႉလွမ်တူၺ်း ၼႃႈႁၢင်ႈလီဢွၼ်ႇ ၽူၺ်းသေ -
“ ၽူၺ်း... ၵႂၢမ်းပုၵ်ႈၼၼ်ႉ ပဵၼ်ၽဝ ၸၢႆးၼွင်ႉဢိူဝ်ႈ...ၽူၺ်း ... ၵွပ်ႈပိူဝ်ႈသင်ၼႆ ၸၢႆးၼွင်ႉၼႆႉ ပဵၼ်မၢဝ်ႇဝၢၼ်ႈၼွၵ်ႈလူး ... ”
ၽူၺ်း ၵေႉတႃတူၺ်းၸၢႆးၼွင်ႉသေ -
“ ၽႂ်သမ်ႉပဵၼ် ၼွင်ႉတႆးဝဵင်းလႃႇ ... ? ႁိုဝ် ... ? ”
“ ၼွင်ႉတႆးဝဵင်းၼၼ်ႉတႄႉ ပဵၼ်ၽူၺ်းဢိူဝ်ႈ ... ၽူၺ်း ... ”
ၽူၺ်းလီဢၢႆၵႂႃႇသေ -
“ ဢူဝ် ... ! ၸႂ်ႈၵေႃႈ ဢမ်ႇၸႂ်ႈသေလႄႈ ... ”
“ ၸႂ်ႈဢိူဝ်ႈ ... ၽူၺ်း ... ၵႂၢမ်းပုၵ်ႈၼၼ်ႉ ၸၢႆးၼွင်ႉ တင်ႈၸႂ် ယိူင်းႁွင်ႉတႃၽူၺ်းဢိူဝ်ႈ ...ပဵၼ်ၵႂၢမ်းၼႂ်းဢူၵ်းၼႂ်းၸႂ်ၸၢႆးၼွင်ႉယဝ်ႈ”
“ ဢမ်ႇယုမ်ႇ ... ဢမ်ႇယုမ်ႇလႆႈ ... ”
“ ယုမ်ႇလႄႈ ... ၽူၺ်း ... ... တႄႉဢိူဝ်ႈ ... ”
ၸၢႆးၼွင်ႉ ယိပ်းၽၼ်ႉဝႆႉႁူဝ်မႃႇၽူၺ်း တင်းသွင်ၶွၼ်သေ -
“ ၽူၺ်း... ၸွင်ႇတေႁၵ်ႉလႆႈ ၸၢႆးၼွင်ႉႁိုဝ် ... ? ”
“ ၽူၺ်း ... ၽူၺ်း ... ဢမ်ႇမေႃလၢတ်ႈ ... ၸၢႆးၼွင်ႉ ...”
“ ပေႃးဢမ်ႇမေႃလၢတ်ႈ ၼႆတႄႉ ... ၼႂ်းၸႂ်တႄႉ ႁၵ်ႉၸၢႆးၼွင်ႉယူႇဢမ်ႇၸႂ်ႈႁႃႉ ... ? ၽူၺ်း ... ”
ၽူၺ်း လွမ်တူၺ်းၸၢႆးၼွင်ႉသေ ငွၵ်းႁူဝ်ၼႄၸၢႆးၼွင်ႉၵမ်းၼိုင်ႈယဝ်ႈ၊ ၸၢႆးၼွင်ႉၵေႃႈ ပဵၼ်ဢၼ်ၸူမ်းသိူဝ်း လူၼ်ႉဢူၵ်းလူၼ်ႉၸႂ်သေ ဝႅၼ်ၵွတ်ႇဢဝ်တူဝ်ႁၢင်ႈလီဢွၼ်ႇၽူၺ်း ၸၼ်ၶဝ်ႈမႃး ၼႂ်းၵႄႈဢူၵ်းမၼ်း ၵွတ်ႇႁုတ်ႉဝႆႉႁႅင်းႁႅင်းယဝ်ႉ -
“ ၽူၺ်း ... ”
“ ၸၢႆးၼွင်ႉ ... ”
ၸၢႆးၸၢႆးလႆႈႁၼ်ၼင်ႇၼၼ် ၵွပ်ႈသင် ၽူၺ်းၵႂႃႇႁၵ်ႉၸၢႆးၼွင်ႉၼႆ မၼ်းဝူၼ်ႉဢမ်ႇပွင်၊ ၵေႃႉမၼ်းႁၵ်ႉ ၽူၺ်း သမ်ႉၵႂႃႇႁၵ်ႉၵေႃႉမၼ်းၸင်းလႄႈ မၼ်းပဵၼ်ဢၼ်တေႃးသ တႅၵ်ႇဢွၵ်ႇတႄႉတႄႉ။
“ ၸၢႆးၼွင်ႉ ... ၽူၺ်းထူၺ်ႈၸႂ်ယၢပ်ႇဢိူဝ်ႈ ...ပွႆႇၵွၼ်ႇလႄႈ”
“ ဢမ်ႇပွႆႈလႆႈ ... ၽူၺ်း ... ”
“ ၸၢႆးၼွင်ႉဢိူၺ် ပွႆႇၽူၺ်းလႄႈ ... ဢိုဝ်ႈ ... ”
ၽွင်းၼၼ်ႉ ၸၢႆးၸၢႆးၵိုင်ႉၵၢင်ႉၽႅဝ်မႃးသေ -
“ ႁိူၺ်ႉ ... ! ဢၢႆႈၼွင်ႉ ပွႆႇလူး ... ”
ၸၢႆးၼွင်ႉလႄႈၽူၺ်း ၵိုင်ႉၵၢင်ႉတူၵ်းၸႂ်ၵႂႃႇသေ ၸၢႆးၼွင်ႉၸင်ႇဝႃႈ
“ ပွႆႇႁဵတ်းသင် ... ? ၽူၺ်း ၼႆႉ ပဵၼ်ၵေႃႉႁၵ်ႉၵဝ်ဢိူဝ်ႈ ... ဢမ်ႇၵပ်းၵၢႆႇသင်မႂ်းၵူၺ်း ... ႁႃးလႆႈၸႂ်သေ ႁၵ်ႉၵၼ်ယူႇၼႆ မႂ်းယႃႇပေမႃးၵဝ်းသင် ... ၸၢႆးၸၢႆး ... ”
ယွၼ်ႉပိူဝ်ႈ ၸၢႆးၼွင်ႉ ဝႃႈတီႈမၼ်း ပုတ်းပုတ်းၶၢတ်ႇၶၢတ်ႇၼင်ႇၼၼ်လႄႈ မၼ်းပဵၼ်ဢၼ်ၶၢမ်ယၢပ်ႇတႄႉတႄႉ တေႃႉသမၼ်းၵေႃႈ တႅၵ်ႇႁႅင်းၼႃႇယဝ်ႉလႄႈ မၼ်းဢဝ်တႃမိုဝ်းမၼ်း ထုပ်ႉပၼ်ၼႃႈၸၢႆးၼွင်ႉ ႁႅင်း ႁႅင်းယဝ်ႉ။
ပၢပ်ႉ ... ...
“ ဢႃး ... ! ဢႃး ... ! ... ဢယႃးယႃး ...! ... ”
တႃမိုဝ်းၸၢႆးၸၢႆး ၸဵပ်းၼႃႇယဝ်ႉလႄႈ မၼ်းၼွၼ်းတိုၼ်ႇလုၵ်ႉမႃး ၵမ်းမိုဝ်းမၼ်း ဢၼ်ထုပ်ႉၺႃးၽႃၼၼ်ႉယူႇ၊ ႁူဝ်ၸႂ်မၼ်းၵေႃႈ တွတ်ႇတိုၵ်ႉတိုၵ်ႉသေ လွမ်ဝၢႆႇတူၺ်း ၽၢႆႇသၢႆႉၽၢႆႇၶႂႃယူႇ၊ မၼ်းဢဝ်ၽႃႇမိုဝ်းမၼ်း ပၢပ်းဢူၵ်းမၼ်းၶိုၼ်းလွႆးလွႆးသေ -
“ ဢေႃး ... ၵဝ်ၼွၼ်းၽၼ် ဢိူဝ်ႈၼႆႉ ... ၵတ်းၵႃႈဢမ်ႇၸႂ်ႈဢၼ်တႄႉလႃႈ ... ဢိုဝ်ႈ ... ”
ၸၢႆးၸၢႆး ၶိုၼ်းသိုပ်ႇၶတ်းၸႂ်ၼွၼ်းသေတႃႉၵေႃႈ မၼ်းၵုမ်ႇဝူၼ်ႉတႂ်ႈဝူၼ်ႉၼိူဝ်ယူႇလႄႈ မၼ်းၼွၼ်းဢမ်ႇလပ်းလႆႈယဝ်ႈ။
ၼႃႈမိူင်း ပေႃးၸိုၼ်ႈလႅင်းပၢင်ႇမႃးယဝ်ႉလႄႈ မၼ်းၸင်ႇလုၵ်ႉမႃး သုၵ်ႈၼႃႈသုၵ်ႈတႃသေ တူၺ်းလိၵ်ႈမၼ်းယူႇ -
ၸၢႆးၼွင်ႉၵေႃႈ ဢဝ်လွတ်ႇၼမ်ႉဢၼ်ၼိုင်ႈသေ ႁူတ်းသူၼ်မွၵ်ႇယူႇ၊ ယွၼ်ႉပိူဝ်ႈ ၸၢႆးၼွင်ႉ ၽိဝ်လူမ်းၸွမ်းၵႂၢမ်း မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်းသေ ႁူတ်းသူၼ်ယူႇလႄႈ ၸၢႆးၸၢႆး ဢမ်ႇၸၢင်ႈတူၺ်းလိၵ်ႈသေ ၸင်ႇဢွၵ်ႇႁိူၼ်းမႃးၸူး ၸၢႆးၼွင်ႉၼႂ်းသူၼ်ယဝ်ႈ၊ ၸၢႆးၼွင်ႉတႄႉဢမ်ႇႁူႉသင် မၼ်းၽိဝ်လူမ်းသေ ႁူတ်းၼမ်ႉမွၵ်ႇမၼ်း တီႈၼိုင်ႈယဝ်ႉ တီႈၼိုင်ႈယူႇ၊ ၽွင်းမိူဝ်ႈမၼ်း ဢၢင်ႈၸၼ်လွတ်ႇၼမ်ႉ ၵႂႃႇႁူတ်းထႅင်ႈ တီႈၼိုင်ႈၼၼ်ႉ မႅၼ်ႈမိူဝ်ႈၸၢႆးၸၢႆး တိုၵ်ႉမႃးယဵပ်ႇဝႆႉ ၼိူဝ်လွတ်ႇၼမ်ႉမၼ်းၼၼ်ႉယူႇ မၼ်းသမ်ႉထၢင်ႇ လွတ်ႇၼမ်ႉၶမ်ဝႆႉၼႆလႄႈ မၼ်းၸၼ်ႁွၵ်ႉဢဝ်ႁႅင်းႁႅင်းယဝ်ႉ လႆႈႁၼ်ၸၢႆးၸၢႆး ၸမ်ဢၢင်ႈပလၢတ်ႈလူမ်ႉ မၼ်းၸင်ႇၼႅတ်ႈၵိုတ်းသေ -
“ ဢေႃႈ ... ပီႈၸၢႆး ... ၶႃႈယူဝ်ဝႃႈ လွတ်ႇၼမ်ႉၶႃႈ ၶွင်ႉဝႆႉၼႆၼႃး ပီႈၸၢႆးလူဝ်ႇသင်ၶႃႈ ... ? ”
“ ၵဝ်လူဝ်ႇလၢတ်ႈမႂ်း မဵဝ်းၼိုင်ႈဢိူဝ်ႈ ... ”
“ လၢတ်ႈၶႃႈလႄႈ ...ပီႈၸၢႆး ... ”
“ မိူဝ်ႈၶမ်ႈဝႃး မႂ်းတင်ႈၸႂ်ႁဵတ်းၵႂၢမ်းၶိတ်ႉၵဝ် ဢမ်ႇၸႂ်ႈႁႃႉ ? ”
“ ဢႃ ! ဢမ်ႇၸႂ်ႈၶႃႈသႄႈ ... ပီႈၸၢႆး... ”
“ ႁဵတ်းႁိုဝ် လႄႈဝႃႈဢမ်ႇၸႂ်ႈ ... ၼႂ်းၵႂၢမ်းတႆးၼွၵ်ႈမႂ်းၼၼ်ႉ မႂ်းဝႃႈ မႂ်းဢမ်ႇမေႃႁဵတ်းၵႂၢမ်းဢင်းၵိတ်း ၵျွၵ်းလိတ်း ၵႃႈၶိတ်း ပေႃးတၢၼ်ႇပိူၼ်ႈၸိတ်းၼဵၼ် ၼႆဢမ်ႇၸႂ်ႈႁႃႉ ... ? ”
“ ၶႃႈၵေႃႈ ဢမ်ႇမေႃတႄႉၶႃႈလႄႈ ... ၵႂၢမ်းဢင်းၵိတ်း ... ပေႃးမေႃပႄႇ ... ၶႂ်ႈႁွင်ႉယူႇဢေႃႈ ... ”
“ ႁိုဝ်ႉ ! ၵႂၢမ်းဢၼ်မႂ်းႁွင်ႉၵႂႃႇမိူဝ်ႈဝႃးၼၼ်ႉ မၼ်းဢမ်ႇၸႂ်ႈၵႂၢမ်းမဵဝ်းႁွင်ႉၼႂ်းဝဵင်းၵူၺ်း ... ၵႂၢမ်းတႆးၼွၵ်ႈလူင်မဵဝ်းၼၼ်ႉ လူဝ်ႇမိူဝ်းႁွင်ႉၸွမ်းၽၢႆႇလင်ဝူဝ်းၵႂၢႆးၵူၺ်း ...ဢိူဝ်ႈ ... မႂ်းၶႂ်ႈႁူႉၵေႃႈ ... ”
“ ပေႃးမေႃထွမ်တႄႉ ၶႅမ်ႉယူႇဢေႃႈ ... ပီႈၸၢႆး ... ”
“ ပေႃးလႃႈ ... တၢင်ႇပွၵ်ႈ ယႃႇပေႁွင်ႉထႅင်ႈ ၵဝ်လီဢၢႆပိူၼ်ႈတၢင်မႂ်း မိူဝ်ႈမႂ်းႁွင်ႉၵႂၢမ်းတႆးၼွၵ်ႈမႂ်းၼၼ်ႉ တႆးၵေႃႉၵဝ် မႃးထၢမ်ၵဝ်ဢိူဝ်ႈ မႂ်းၶႂ်ႈႁူႉၵေႃႈ ထၢမ်ဝႃႈ မႂ်းပဵၼ်ၵူၼ်းယူႇၸွမ်းႁဝ်းႁႃႉၼႆႉယဝ်ႈ ... ၵဝ်တႃႉလီဢၢႆပိူၼ်ႈလႃႈ ... ”
“ ႁဝ်းၵႂႃႇလၵ်ႉၵႂၢမ်းပိူၼ်ႈမႃးႁွင်ႉၵေႃႈ ဢမ်ႇၸႂ်ႈၶႃႈ ... ၸၢင်ႈလီဢၢႆႁဵတ်းသင် ... ? ပီႈၸၢႆး ... ”
“ ဢေႃႈ ... မႂ်းၶႂ်ႈဝႃႈ ၵဝ်လၵ်ႉႁွင်ႉၵႂၢမ်းပိူၼ်ႈၼႆႁႃႉ ... ? ”
“ ဢမ်ႇဝႃႈၼင်ႇၵဝ်ႇ ပီႈၸၢႆး ... ”
“ ႁိုဝ်ႉ ... ၵႂၢမ်းဢၼ်မႂ်းႁွင်ႉၼၼ်ႉ မႂ်းဢမ်ႇၵိုင်လီႁွင်ႉသေဢၼ် မိူၼ်ၸိူင်ႉၼင်ႇ ၵႂၢမ်းမၢဝ်ဝၢၼ်ႈၼွၵ်ႈၼၼ်ႉၵေႃႈ မႂ်းၵႂႃႇႁွင်ႉႁဵတ်းသင်”
“ ဢႃ ... ပီႈၸၢႆး ၶႃႈၵူၺ်းလႆႈၵႂၢမ်းပုၵ်ႈၼၼ်ႉၵူၺ်းလႄႇ ... ”
“ လႆႈၵေႃႈ မႂ်းဢမ်ႇထုၵ်ႇႁွင်ႉၵူၺ်း ... မႂ်းၶႂ်ႈႁူႉၵေႃႈ ”
ၸၢႆးၼွင်ႉ ၵူဝ်ၵႂၢမ်းၼမ်ၵၼ်မႃးလႄႈ မၼ်းဢမ်ႇပေႃးႁတ်းလၢတ်ႈၸွမ်းသင် -
“ မႂ်းတေဝႃႈ မႂ်းပဵၼ်မၢဝ်ႇဝၢၼ်ႈၼွၵ်ႈၼႆႁႃႉ ... ? မၢဝ်ႇဝၢၼ်ႈၼွၵ်ႈ ဢၼ်ဝႃႈၼၼ်ႉ ၼႂ်းဝဵင်းၼႆႉ ပိူၼ်ႈဢမ်ႇၸႂ်ႉတိုဝ်းၵူၺ်း မႂ်းႁူႉ ... ၵႂၢမ်း ဢၼ်မႂ်းဝတ်ႉမိူဝ်ႈၶမ်ႈဝႃးၼၼ်ႉ မၼ်းပွင်ႇဝႃႈ မႂ်းပဵၼ်မၢဝ်ႇဝၢၼ်ႈၼွၵ်ႈသေ ယွၼ်းတၢင်းႁၵ်ႉၼွင်ႉတႆးဝဵင်းၼႆယဝ်ႈ ... မႂ်းယွၼ်းတၢင်းႁၵ်ႉၽူၺ်းႁႃႉ”
“ ပီႈၸၢႆး ...ၶႃႈဝႃႈ ၵႂၢမ်းပုၵ်ႈၼၼ်ႉ သဵင်မၼ်းရမ်ႇမၼ်းၵေႃႈၶႅမ်ႉ ႁွင်ႉၵေႃႈႁွင်ႉငၢႆႈၼႆသေ ၶႃႈႁွင်ႉၵႂႃႇၵူၺ်းဢေႃႈ ... ”
“ တၢင်ႇပွၵ်ႈမႃး ယႃႇပေႁွင်ႉထႅင်ႈ ... တီႈၼႂ်းႁိူၼ်းႁဝ်းၼႆႉၵေႃႈ တေဢမ်ႇလႆႈႁွင်ႉၵူၺ်း ... တွင်းဝႆႉၵိုမ်းၵိုမ်း ယႃႇပေလိုမ်းၼႃႈ ”
“ ဢေႃႈ ... ”
“ ပဵၼ်မႂ်းလႄႈ ... ႁတ်းႁွင်ႉၵႂၢမ်းပုၵ်ႈၼၼ်ႉယဝ်ႈ ... တႃႉလီၵဵင်ၸႂ်ၽူၺ်းၶဝ်လႃႈ ... တင်းၵႂၢမ်းမႂ်းလႄႈ ၽူၺ်းၶဝ်ၵေႃႈ ဢမ်ႇၵိုင်ၵၼ်လႃးလႃး ပိူၼ်ႈပဵၼ်လုၵ်ႈၵူၼ်းမၢၵ်ႈမီးဢိူဝ်ႈ ... မိူဝ်းၼႃႈမႃး ၽူၺ်းဢၼ်ဝႃႈၼၼ်ႉ တေပဵၼ်ၶူးမေႃယႃၵေႃႉၼိုင်ႈဢိူဝ်ႈ ... ပိူၼ်ႈဢမ်ႇပဵၼ်တႆးၼွၵ်ႈ ၸိူင်ႉမႂ်းၵူၺ်း ... ပေႃးၶဝ်မႃးဢႅဝ်ႇ တီႈႁိူၼ်းႁဝ်းၼႆၵေႃႈ မႂ်းယႃႇပေမႃးႁဵတ်းၼႃႈလီတႃဝၢၼ်တေႃႇၶဝ်ၼႃႇၽႅဝ် ... ယႃႇပေမႃးၵဵဝ်ႇၸွမ်းႁဝ်း ၵဝ်ဢမ်ႇၵျိူၵ်ႈၵူၺ်း ... ၸွင်ႇမႂ်းငိၼ်းႁိုဝ် ... ! ”
“ ဢေႃႈ ... ... ”
ၸၢႆးၸၢႆး မႃးဝႃႈၼၼ်ႉသေ ၶိုၼ်းၶဝ်ႈၵႂႃႇၼႂ်းႁိူၼ်းယဝ်ႈ။
လွင်ႈဝႃႈ ၸၢႆးၸၢႆးဢမ်ႇၶႂ်ႈႁႂ်ႈၸၢႆးၼွင်ႉ ၵပ်းသိုပ်ႇၽူၺ်းၼႆၼၼ်ႉ ၸၢႆးၼွင်ႉႁူႉပွင်ႇၸႂ်ယူႇ ၊ လွင်ႈဝႃႈ ၸၢႆးၸၢႆးလွမ်ႁၵ်ႉၽူၺ်းဝႆႉၼႆၵေႃႈ ၸၢႆးၼွင်ႉႁူႉထိုင်ယဝ်ႈ၊ ၸၢႆးၼွင်ႉ ဢမ်ႇႁၵ်ႉၽူၺ်းၼႆၵေႃႈ ၸၢႆးၼွင်ႉဢမ်ႇလၢတ်ႈ၊ ၵပ်းၵၢႆႇလူၺ်ႈလွင်ႈတၢင်းႁၵ်ၼႆႉ ပေႃးၶႄႉၶဵင်ၵၼ်မႃးၼႆ တေလႆႈတေႃႇသူႈႁႃႉ ? တေလႆႈပၼ်သုမ်းႁႃႉ ? ၼႆ ၸၢႆးၼွင်ႉ ပႆႇၸၢင်ႈမေႃတႅပ်းတတ်းလႆႈ။
ယၢမ်းလဵဝ် ဢၼ်မၼ်းမုင်ႈမွင်းၼၼ်ႉတႄႉ ဢမ်ႇပႆႇၸႂ်ႈတၢင်းႁၵ်ႉ ၽူၺ်း၊ ဢၼ်မၼ်းမုင်ႈမွင်းဝႆႉယူႇၼၼ်ႉတႄႉ ပဵၼ်တၢင်းႁၵ်ႉ ပီႈဢၢႆႈမၼ်း ၸၢႆးၸၢႆးၼၼ်ႉၵူၺ်း ၊ တေလႆႈႁဵတ်းႁိုဝ် ႁႂ်ႈၸၢႆးၸၢႆး ပေႃးႁူႉပွင်ႇ လွင်ႈဝႃႈ ၸၢႆးၼွင်ႉ ပဵၼ်ၼွင်ႉၸၢႆးမၼ်းၼႆ ၸၢႆးၼွင်ႉဝူၼ်ႉဢမ်ႇပွင်လႆႈ။
ယၢမ်းလဵဝ် မၼ်းၶတ်းၸႂ်မႃး ဢဵၼ်းဢၢၼ်းၶႂ်ႈႁႂ်ႈၸၢႆးၸၢႆးႁၵ်ႉမၼ်း ၼႆသေတႃႉ ၸၢႆးၸၢႆးဢမ်ႇႁၵ်ႉမၼ်းသေ ဢမ်ႇၵႃး ၸၢႆးၸၢႆး သမ်ႉပၢႆၸင်းမၼ်းတိၵ်းတိၵ်းလႄႈ ၸၢႆးၼွင်ႉ ပဵၼ်ဢၼ်ၼၵ်းၸႂ်တႄႉတႄႉ။ ၽဝၸၢတ်ႈၼႆႉ မဵတ်ႉတႃႇပီႈဢၢႆႈ ဢၼ်ဝႃႈၼၼ်ႉ ၸွင်ႇမၼ်း တေၸၢင်ႈႁပ်ႉၶၢမ်ႇလႆႈယူႇႁိုဝ် ? ။