ၶႅၵ်ႇ/တွၼ်ႈသၢဝ်းၵဝ်ႈ
ၸၢႆးၼွင်ႉၵေႃႉၼိုင်ႈ ယိပ်းတင်းၶွၼ်ႉၸွၵ်းသေ တွၵ်ႇလဵၵ်းမၢႆႇၼႃးယူႇ၊ ၸွမ်းႁိမ်းႁွမ်းမၼ်းၼၼ်ႉ မႆႉပႅၼ်ႈဢွၼ်ႇ ဢၼ်လိူဝ်ႈဝႆႉ ပေႃးမၢၵ်ႇမိူဝ်သုၵ်ႉသၢၵ်ႉဝႆႉယူႇယဝ်ႉ ။
မၼ်းလိူဝ်ႈဢဝ်မႆႉပႅၼ်ႈဢွၼ်ႇ ဢၼ်ၼိုင်ႈလႄႈ ဢၼ်ၼိုင်ႈ မႃးတွၵ်ႇၵပ်းၸပ်းၵၼ်သေ ႁဵတ်းပဵၼ်ႁိူၼ်းဢွၼ်ႇလင်ၼိုင်ႈယဝ်ႉ လင်ၼိုင်ႈယူႇ၊ ယွၼ်ႉပိူဝ်ႈ လၢႆးမိုဝ်းမၼ်းၶႅမ်ႉလႄႈ ႁိူၼ်းဢွၼ်ၸိူဝ်းၼၼ်ႉ ပဵၼ်ဢၼ်ၶႅမ်ႉလႅပ်ႈတႄႉတႄႉ။ မၼ်း မႄးဢဝ်ၸိူၵ်ႈလဵၵ်းဢွၼ်ႇ မတ်ႉၶႅမ်ႉၶႅမ်ႉသေ တေဢၢၼ်းဢဝ်ၽႅၼ်ၼိူဝ်တူၼ်ႈမႆႉ ပုၼ်ႈတႃႇ ၼူၵ်ႉၸွၵ်ႇဢွၼ်ႇၶဝ် မႃးႁဵတ်းႁၢင်းသေ ယူႇၼႆယဝ်ႈ။
ၸၢႆးၼွင်ႉ ၶိုၼ်ႈၼိူဝ်တူၼ်ႈမႆႉသေ ဢဝ်ႁိူၼ်းၼူၵ်ႉၸွၵ်ႇဢွၼ်ႇ ၽႅၼ်ဝႆႉၸွမ်းတူၼ်ႈမႆႉ သႂ်ႇဝႆႉၸွမ်းငၢမ်ႈမႆႉယူႇ၊ ၽွင်းၼၼ်ႉ ၽူၺ်းႁေႃႈၵႃးသေ ၽႅဝ်မႃး ၼႂ်းဝၢင်းႁိူၼ်းၸၢႆးၸၢႆးၶဝ်ယဝ်ႉ၊ လႅင်း ယူႇၼႂ်းၵႃးသေ လႆႈႁၼ်ၸၢႆးၼွင်ႉ တိုၵ်ႉမီးဝႆႉ ၼိူဝ်တူၼ်ႈမႆႉယူႇလႄႈ မၼ်းၸင်ႇႁွင်ႉဝႃႈ -
“ ပီႈၸၢႆးၼွင်ႉ ... ”
ၸၢႆးၼွင်ႉၵေႃႈ ၸူမ်းသိူဝ်းသေ ယုၵ်ႉမိုဝ်းၼႄလႅင်းယူႇ ၊ ၽူၺ်းၵေႃႈ ႁေႃႈၵႃးမႃးၵိုတ်းသေ ၸင်ႇမႃးထၢမ် ပႃႈယွတ်ႈ ၵေႃႉပဵၼ်ၵူၼ်းတူမ်ႈၶဝ်ႈႁုင်ၽၵ်းၶဝ်ၼၼ်ႉ -
“ ပႃႈယွတ်ႈ ... ၸၢႆးၸၢႆးၶဝ်လူး ... ”
“ ဢေႃႈ ... ၶဝ်ပေႃႈမႄႈလုၵ်ႈ တိုၵ်ႉၵႂႃႇၼႂ်းဝဵင်းဢိူဝ်ႈ ... ၵမ်ႉၸမ်တေမႃးၼင်ႇၵဝ်ႇယဝ်ႈ ... ၽူၺ်း ... မႃးၼင်ႈၼႂ်းႁိူၼ်းၵွၼ်ႇလႄႈ”
“ လႆႈၶႃႈယဝ်ႈ ပႃႈယွတ်ႈ ... ၽူၺ်းတေၵႂႃႇတူၺ်း ၼႂ်းသူၼ်ၵွၼ်ႇ ... ”
“ ဢိူဝ်ႈ ... ဢိူဝ်ႈ ... လီယဝ်ႈ ... ”
ၽူၺ်းလႄႈလႅင်း ၸုင်မိုဝ်းၵၼ်သေ ပႆမႃးၸူး တီႈၸၢႆးၼွင်ႉယူႇ၊ လႅင်းၸင်ႇထၢမ်ဝႃႈ -
“ ပီႈၸၢႆးၼွင်ႉ ႁဵတ်းသင်ယူႇၶႃႈ ... ? ”
“ လႅင်း... ပီႈၸၢႆးၼွင်ႉ တိုၵ်ႉႁဵတ်းပၼ် ႁိူၼ်းၼူၵ်ႉၸွၵ်ႇဢွၼ်ႇၶဝ်ဢိူဝ်ႈ ... ”
ၸၢႆးၼွင်ႉ ၵျွၵ်းလူင်းတူၼ်ႈမႆႉမႃးသေ ၶိုၼ်းမႃးဢဝ် ႁိူၼ်းၼူၵ်ႉမၼ်း ဢၢင်ႈၵႂႃႇသႂ်ႇထႅင်ႈ တၢင်ႇတူၼ်ႈယူႇ -
“ ပီႈၸၢႆးၼွင်ႉ ... တေဢဝ်ၵႂႃႇလႂ် ... ? ၶႃႈ ... ”
“ ဢေႃႈ ... လႅင်း ... ဢၢင်ႈၵႂႃႇသႂ်ႇထႅင်ႈ တၢင်းပုၼ်ႉဢိူဝ်ႈ ”
ၽူၺ်းလႄႈလႅင်းၵေႃႈ ၸွႆႈဢဝ်ႁိူၼ်းၼူၵ်ႉၸိူဝ်းၼၼ်ႉ ၵမ်ႈၽွင်ႈသေ ၽူၺ်းၸင်ႇဝႃႈ -
“ ၸၢႆးၼွင်ႉ ... မေႃႁၵ်ႉၼူၵ်ႉဢွၼ်သတ်းဢွၼ်ၶဝ် ယူႇၼေႃ”
ၸၢႆးၼွင်ႉ ၸင်ႇလွမ်တူၺ်းၼႃႈၽူၺ်းသေ ၶိုၼ်းတွပ်ႇဝႃႈ-
“ မေႃႁၵ်ႉဢိူဝ်ႈ ... ၽူၺ်း ... ”
“ ႁိူၼ်းဢွၼ်ႇၸိူဝ်းၼႆႉ ... တႃႉႁၢင်ႈလီ တႃလီႁၵ်ႉလႃႈ ... ”
“ ၽူၺ်း ... ပိၵ်ႉသမ်ႉဝႃႈ ႁဝ်းဢမ်ႇမီးႁိူၼ်းႁၢင်ႈလီ ဢမ်ႇလႆႈယူႇႁိူၼ်း ၶႅမ်ႉၶႅမ်ႉၸိူင်ႉပိူၼ်ႈသေတႃႉ ... ၼင်ႇႁိုဝ်ၼူၵ်ႉၸွၵ်ႇဢွၼ်ႇၶဝ် တေလႆႈယူႇႁိူၼ်းၶႅမ်ႉၶႅမ်ႉၼၼ်ႉ ဝႆႉပဵၼ်ပႃႇရမီႇသေ ၸင်ႇႁဵတ်းပၼ်ၶဝ်ယဝ်ႈ ... ၶႂ်ႈႁႂ်ႈၶဝ်လႆႈယူႇမူၼ်ႈမူၼ်ႈသိူဝ်းသိူဝ်းဢိူဝ်ႈ ... ၽူၺ်း ... ”
ယွၼ်ႉပိူဝ်ႈ ၶေႃႈၵႂၢမ်းၸၢႆးၼွင်ႉၼႆႉသေ ၽူၺ်း လွမ်လွမ်ထိုင်ဢူၵ်းထိုင်ၸႂ်ၵႂႃႇ ပဵၼ်ၸႂ်ဢီးလူဝႆႉ ၼိူဝ်ၸၢႆးၼွင်ႉယူႇယဝ်ႉ၊ ၸၢႆးၼွင်ႉၶိုၼ်းသိုပ်ႇဝႃႈ -
“ ဢမ်ႇပေႃးဝႃႈ ... ၼူၵ်ႉၸွၵ်ႇဢွၼ်ႇၸိူဝ်းၼႆႉ ၸမ်တေတႄႇမုင်ႉ တႄႇႁၢင်းၶဝ်သေ တေၶႆႇယဝ်ႈၽူၺ်း ... ၵွပ်ႈၼႆ ၸၢႆးၼွင်ႉ ၸင်ႇႁဵတ်းႁိူၼ်းႁၢင်ႈလီလီဢွၼ်ႇ ပၼ်ၶဝ်ဢိူဝ်ႈ ... ”
“ ၶဝ်တေမႃးယူႇယူႇႁႃႉ ... ? ၸၢႆးၼွင်ႉ ... ”
“ ယူႇဢိူဝ်ႈ ... ၽူၺ်း ... တူၺ်းလႄႈ ဢၼ်ၸၢႆးၼွင်ႉႁွႆႈဝႆႉၼၼ်ႉ ၼူၵ်ႉဢွၼ်ႇၵမ်ႈၽွင်ႈ ပေႃးမႃးၸွပ်ႇတူၺ်းယူႇယဝ်ႈ ... ”
ၽူၺ်းလႄႈလႅင်း လွမ်တူၺ်းၵႂႃႇ လႆႈႁၼ်ၼူၵ်ႉၸွၵ်ႇဢွၼ်ႇ ၵမ်ႈၽွင်ႈ သမ်ႉပေႃးမႃး လွမ်တူၺ်းႁိူၼ်းမႂ်ႇၶဝ်ယူႇယဝ်ႉ -
“ တႄႉဢိူဝ်ႈ ... ၼေႃ ...ၸၢႆးၼွင်ႉ ...ၶဝ်ပေႃးမႃးလွမ်တူၺ်း ႁိူၼ်းမႂ်ႇၶဝ်ယူႇယဝ်ႉ လူး ... ”
ၸၢႆးၼွင်ႉ ၶိုၼ်းၶိုၼ်ႈၼိူဝ်တူၼ်ႈမႆႉသေ ဢဝ်ႁိူၼ်းၼူၵ်ႉဢွၼ်ႇ ႁွႆႈပၼ်ထႅင်ႈ တီႈၼိုင်ႈယဝ်ႉတီႈၼိုင်ႈယူႇ၊ ၽူၺ်းလႄႈလႅင်းၵေႃႈ ၸွႆႈတေႃႉႁိူၼ်းၼူၵ်ႉ ယိုၼ်ႈပၼ်ၸၢႆးၼွင်ႉယူႇ ၊ ပေႃးဝႃႈ ႁွႆႈပၼ်ႁိူၼ်းၼူၵ်ႉယဝ်ႉမူတ်းၵေႃႈ ၸၢႆးၼွင်ႉ မႃးသိမ်း လဵၵ်းလိူဝ်ႈၶွၼ်ႉၸွၵ်းမၼ်းၸိူဝ်းၼၼ်ႉသေ ၶဝ်ၼင်ႈဢုပ်ႇၵၼ်ယူႇ၊ လႅင်းၸင်ႇထၢမ်ဝႃႈ -
“ ပီႈၸၢႆးၼွင်ႉ ... ႁဵတ်းသင် ဢမ်ႇမိူဝ်းဢႅဝ်ႇႁိူၼ်းလႅင်းၶဝ် ?”
“ တေမိူဝ်းယူႇၵူၺ်း ... လႅင်း ... သုတ်းတီႈမိူဝ်ႈဝၼ်းၵိူတ်ႇ ပီႈၽူၺ်းၼၼ်ႉ ၽႅဝ်မိူဝ်းယူႇလူး ... ”
“ ပီႈၸၢႆးၼွင်ႉ ...သွၼ်ပၼ်လႅင်း ၵႂၢမ်းတႆးၵဝ်ႇၸိူင်ႉၼင်ႇ ပီႈၸၢႆးၼွင်ႉႁွင်ႉၶမ်ႈၼၼ်ႉၽွင်ႈလေႃႇ ...ၼႃႉ ... ”
“ လႅင်း ၶႂ်ႈမေႃယူႇႁႃႉ ... ? ”
လႅင်းယုမ်ႉသေ ငွၵ်းႁူဝ်မၼ်းၼႄယဝ်ႉ -
“ ဝၢႆးၼႆႉ ... ပီႈၸၢႆးၼွင်ႉ တေသွၼ်ပၼ်လႆ ... ၼႃႈ လႅင်း”
ၽူၺ်းၸင်ႇလွမ်တူၺ်း ၸၢႆးၼွင်ႉသေ လၢတ်ႈဝႃႈ-
“ ၸၢႆးၼွင်ႉ ...ၵႂၢမ်းမၢၵ်ႇဝၼ်းၵိူတ်ႇၽူၺ်း ဢၼ်ၸၢႆးၼွင်ႉဝတ်ႉၵႂႃႇၼၼ်ႉၼႆ ... ၽူၺ်းလႆႈၸႂ်တႄႉတႄႉသေ ၶွပ်ႈၸႂ်ၼိူဝ်ၸၢႆးၼွင်ႉတႄႉတႄႉ ယဝ်ႉ ... ၼႃႈ ... ”
“ ယူဝ်ၽူၺ်း လႃႈလီယွင်ႈၵူၺ်း ယူဝ်ႉ ... ? ”
“ ဢမ်ႇဝႃႈသႄႈ ... လၢတ်ႈတႄႉဢိူဝ်ႈ ... ”
“ ပီႈၼွင်ႉတႆးၼႂ်းဝဵင်းၶဝ်ၼႆႉ ၵမ်ႉၼမ်ၼမ် လုၵ်ႈဢွၼ်ႇတႆးႁဝ်း ၵမ်ႉၼမ်ၼမ်ၼႆႉ ... ႁၢမ်ႉၵျိူၵ်ႈၵႂၢမ်းပၢၼ်မႂ်ႇၵူၺ်းသေ ၵႂၢမ်းပၢၼ်ၵဝ်ႇၼၼ်ႉ ဢမ်ႇၶဝ်ႈႁူ ဢမ်ႇၶဝ်ႈၸႂ်ၶဝ်ယဝ်ႉၵူၺ်း ... ၽူၺ်း ... ”
ၽူၺ်း ထူၺ်ႈၸႂ်လူင်ၵမ်းၼိုင်ႈသေ -
“ ၸၢႆးၼွင်ႉ ... ၽူၺ်းတႄႉ လႆႈၸႂ်တင်းသွင်မဵဝ်းယဝ်ႈ ... ၵွပ်ႈသင်ၼႆ ၵႂၢမ်းမႂ်ႇၵေႃႈ ပဵၼ်ၵႂၢမ်းတႆးႁဝ်း ... ၵႂၢမ်းၵဝ်ႇၵေႃႈ ပဵၼ်ၵႂၢမ်းတႆးႁဝ်းၼင်ႇၵဝ်ႇလႄႈ ... ၵၢင်ၸႂ်ၽူၺ်းတႄႉ ၽိင်ႈၵဝ်ႇႁဝ်းၵေႃႈ ယႃႇပၼ်ႁၢႆ ၽိင်ႈမႂ်ႇႁဝ်းၵေႃႈ ၶႂ်ႈႁႂ်ႈၶိုတ်းၵၢပ်ႈပၢၼ် ဢိူဝ်ႈ ... ၸၢႆးၼွင်ႉ ... ”
ၸၢႆးၼွင်ႉ လွမ်ယုမ်ႉႁၢၼ်ႉၸႂ်သေ ပႂ်ႉထွမ်ႇ ဢၼ်ၽူၺ်းသိုပ်ႇလၢတ်ႈထႅင်ႈယူႇ -
“ ၵူၼ်းၶူဝ်း ၵျပၢၼ်ႇၶဝ်ၼႆႉ ... ၶဝ်ၶိုၼ်ႈယႂ်ႇမႂ်ႇသုင်ၶိုတ်းၵၢပ်ႈ တၢၼ်ႇလႂ်ၵေႃႈ ၶဝ်တေႃႈဢမ်ႇပိုၼ်ႉပႅတ်ႈ ၽိင်ႈငႄႈထုင်းၵဝ်ႇၶဝ်လႄႈ ပဵၼ်ဢၼ်လီယွင်ႈယေႃး လီလူယိူင်ႈတႄႉတႄႉဢိူဝ်ႈ ... ၸၢႆးၼွင်ႉ ... ၵွပ်ႈၼႆ ၽူၺ်းၵေႃႈ တွင်းမၢႆယိူင်ႈထုင်းၵျပၢၼ်ႇ သႂ်ႇၸႂ်သေ ၽိင်ႈၵဝ်ႇတႆးႁဝ်းၵေႃႈ ၽူၺ်းဢမ်ႇပိုၼ်ႉပႅတ်ႈ ... ၽိင်ႈမႂ်ႇတႆးႁဝ်းၵေႃႈ ၶႂ်ႈႁႂ်ႈၶိုတ်းၵၢပ်ႈပၢၼ်ယူႇယဝ်ႈ ... ”
ၸၢႆးၼွင်ႉ ဢမ်ႇတၵ်းသဵင်သင်လႄႈ ၽူၺ်းၸင်ႇၶိုၼ်းထၢမ် -
“ ၸၢႆးၼွင်ႉ ...ၵႂၢမ်းတႆးၵဝ်ႇၼႆႉ ၸၢႆးၼွင်ႉၶဝ်လႆႈသွၼ်မႃးႁႃႉ?”
“ ဢမ်ႇလႆႈသွၼ်မႃး ... ၽူၺ်း ... ”
“ သမ်ႉႁဵတ်းႁိုဝ် မေႃဝတ်ႉလႃႇ ...? ”
“ ၼႆႉတႄႉ ... ၸၢႆးၼွင်ႉၶဝ် ပဵၼ်တႆးၼွၵ်ႈလႄႈ ယၢမ်ႈထွမ်ႇ ယၢမ်ႈငိၼ်း မိုတ်ႈႁူမႃးၸဵမ်လဵၵ်ႉသေ ယၢမ်ႈဝတ်ႉလဵၼ်ႈမႃးလႄႈ ... မေႃၵႂႃႇႁင်းၵူၺ်းဢိူဝ်ႈ ... ပေႃးမႃးဝတ်ႉယဝ်ႉၼႆတႄႉ ... ဝၵ်ႉဢဝ်လွင်ႈလႂ်သႂ်ၵေႃႈ ၵမ်ႉမေႃၸႂ်ႁဝ်းယဝ်ႈ ... မေႃၵႂၢမ်းမၢင်ၵေႃႉၼႆႉ ႁဵတ်းၼႆသေ ႁွင်ႉမေႃၵႂႃႇ တေႃႇထိုင်မိူင်းလႅင်းၵေႃႈ လႆႈၵွၼ်ႇဢိူဝ်ႈ ... ၽူၺ်း ... ”
ၽူၺ်းၵေႃႈ ၸင်ႇဝႃႈ -
“ ဢိုဝ်ႈ ...ၼႆႉပဵၼ်ၽိင်ႈငႄႈတႆးႁဝ်း လွင်ႈလီဢၢမ်းလႄႈ လွင်ႈလီႁၵ်ႉၵူၺ်းဢမ်ႇၵႃး ... ပဵၼ်လွင်ႈလီဝႆႉၵႃႈၶၼ် ယွင်ႈၵုင်ႇ ပိူင်ၼိုင်ႈယဝ်ႈၼေႃ ... ၸၢႆးၼွင်ႉ ... ”
ဝၼ်းၼၼ်ႉ ၽူၺ်းၶႂ်ႈထၢမ် လွင်ႈၵႂၢမ်းမၢဝ်ႇဝၢၼ်ၼွၵ်ႈႁၼ်ၼွင်ႉတႆးဝဵင်းၼၼ်ႉ ၼႆသေတႃႉ ၽူၺ်းဢမ်ႇပဵၼ်ထၢမ်၊ ဢမ်ႇတၼ်းလႆႈထၢမ်၊ ပေႃးဝႃႈ ၸၢႆးၸၢႆးၶဝ်ပေႃႈမႄႈလုၵ်ႈ ၶိုၼ်းၽႅဝ်မႃးၼႆ ၽူၺ်း ယွၼ်းယိမ်ပပ်ႉလိၵ်ႈၸၢႆးၸၢႆးသေ ဢဝ်မိူဝ်းထုတ်ႇ တီႈႁိူၼ်းၶဝ်ယဝ်ႉ။