ၶႅၵ်ႇ/တွၼ်ႈသၢဝ်းဢဵတ်း
မွၵ်ႇဢွၼ်ႇၼႂ်းသူၼ် ဢၼ်ၵီႈၶွင်ႇႁၢင်ႈလီမႃးၸိူဝ်းၼၼ်ႉ ၽႂ်ႁၼ်ၵေႃႈ ပဵၼ်ဢၼ်သိူဝ်းၸႂ်တႄႉတႄႉ၊ ၸၢႆးၼွင်ႉတႄႉ သိူဝ်းၸႂ်လူၺ်ႈၸွမ်း သူၼ်မွၵ်ႇမၼ်း၊ သိူဝ်းၸႂ်လူၺ်ႈၸွမ်း မႃဢွၼ်သွင်တူဝ်ပီႈၼွင်ႉသေ မူတ်းၶၢဝ်းယၢမ်းၵႂႃႇ ဝၼ်းလႂ်ဝၼ်းၼၼ်ႉယူႇ။
မွၵ်ႇမၼ်းၼႂ်းသူၼ် ဢၼ်မွၵ်ႇမႃးၸိူဝ်းၼၼ်ႉ မၢင်ပွၵ်ႈမႄႈလဵင်ႉ ( ဢၢၼ်ႇတီႇ )ၶဝ် ၵႆႉမႃးပိတ်းဢဝ်လႄႈ ၸၢႆးၼွင်ႉ ဢမ်ႇၶႂ်ႈႁႂ်ႈပိတ်းသေတႃႉ မၼ်းဢမ်ႇၸၢင်ႈဝႃႈႁိုဝ် ၊ ၵူၺ်းၵႃႈ ဝၼ်းၼိုင်ႈ ၽွင်းမၼ်း တိုၵ်ႉၵပ်းၸိူဝ်ႉမွၵ်ႇၼၢင်းသီယူႇၼၼ်ႉ မႄႈလဵင်ႉၶဝ် လႆႈႁၼ်မွၵ်ႇၼၢင်းသီ ၵီႈႁၢင်ႈလီလႄႈ မၼ်းၸင်ႇမႃးပိတ်းမွၵ်ႇၼၼ်ႉယူႇ ၸၢႆးၼွင်ႉလႆႈႁၼ်သေ မၼ်းၸင်ႇႁၢမ်ႈတပ်ႉဝႃႈ -
“ မႄႈလဵင်ႉ ဢေႃႈ ... ဢၢၼ်ႇတီႇ ယႃႇပေယၵ်းဢဝ်ၸိူင်ႉၼၼ်ၶႃႈ ... ၶႃႈတေၵႅတ်းပၼ်ၶႃႈလႆ ... ”
မႄႈလဵင်ႉၶဝ် တိုၼ်းဢမ်ႇပေႃးဝႆႉၼႃႈလီ တေႃႇမၼ်းသေပွၵ်ႈ -
“ ႁိုဝ်ႉ ... ယၵ်းဢဝ်ၵေႃႈ ၸၢင်ႈပဵၼ်သင် ... ? ”
မႄႈလဵင်ႉၶဝ် ၸႂ်လမ်ဢိတ်းဢိတ်းသေ ယၵ်းပိတ်းဢဝ် မွၵ်ႇၼၢင်းသီၼၼ်ႉယဝ်ႈ၊ ယွၼ်ႉပိူဝ်ႈ မၼ်းၸႂ်လမ်လႄႈ မၼ်းၵႂႃႇယိပ်းယၵ်းၺႃးပႃး ၼၢမ်မွၵ်ႇသေ ၼၢမ်မွၵ်ႇ ၸူၵ်ႉပၼ်မိုဝ်းမၼ်းယူႇယဝ်ႉ -
“ ဢႃး ... လႃး ... လႃး ... ၸုတ်ႉ ၸုတ်ႉ ... ”
“ ႁိုဝ်ႇ ... ! ၼၢမ်ၸူၵ်ႉမိုဝ်းမႄႈလဵင်ႇ ဢေႃႈ... ဢေႃႈ... ၼၢမ်ၸူၵ်ႉမႅၼ်ႈမိုဝ်းဢၢၼ်ႇတီႇၶႃႈႁႃႉ ... ၶႃႈဝႃႈယူႇၶႃႈၼႃႇ ... ယႃႇပေဢဝ်မိုဝ်းယၵ်းဢဝ်ၼႆ ... ”
ၸၢႆးၼွင်ႉမႆႈၸႂ်ၵႂႃႇသေ ၵူဝ်မႄႈလဵင်ႉၶဝ်ပွင်ႉမၼ်းလႄႈ မၼ်းၵႂင်သေ ဢၢင်ႈၵႂႃႇ ယိပ်းတူၺ်း မိုဝ်းမႄႈလဵင်ႉၶဝ်ယဝ်ႈ ၊ မႄႈလဵင်ႉၶဝ်ၸႂ်လမ်သေ ပွင်ႉပၼ်မၼ်းယူႇ -
“ ဢမ်ႇလူဝ်ႇမႃးယိပ်း ... ”
“ ဢေႃႈၶႃႈ ... ၶႃႈၵႂင်ၵႂႃႇဢေႃႈ ... တၢင်ႇပွၵ်ႈ ဢၢၼ်ႇတီႇ ယႃႇပေဢဝ်မိုဝ်းယိပ်းၶႃႈၼႃႈ ... ပေႃးဢဝ်မိုဝ်းပိတ်းဢဝ်ၼႆ မၼ်းသၢင်ႈတူၼ်ႈမွၵ်ႇမၼ်းဢေႃႈ ... ပေႃးမွၵ်ႇၸိူဝ်းၼႆႉ ၵီႈမႃးၼႆ ၶႃႈၵေႃႉတေၵႅတ်းမႃးပၼ် ဢၢၼ်ႇတီႇၶဝ်ၶႃႈလႆ ... ဢၢၼ်ႇတီႇႁဝ်း ၶႂ်ႈဢဝ်လူႇၽြႃးၵေႃႈလႆႈ ၶႂ်ႈပၵ်း ၵေႃႈလႆႈၶႃႈယဝ်ႈ ... ”
မႄႈလဵင်ႉၶဝ် လိူၵ်ႇတႃ ၸႂ်လမ်တေႃႇမၼ်းသေ လၢတ်ႈဝႃႈ -
“ႁိုဝ်ႉ ... ! ႁိူၼ်းၼႆႉ ပဵၼ်ႁိူၼ်းၵဝ်ဢိူဝ်ႈ ... သူၼ်မွၵ်ႇၸိူဝ်းၼႆႉၵေႃႈ ပဵၼ်သူၼ်မွၵ်ႇၵဝ်ဢိူဝ်ႈ ... ၵဝ်ၶႂ်ႈဢဝ်ႁဵတ်းသင်ၵေႃႈ လႆႈယဝ်ႈ မႂ်းဢမ်ႇတၢပ်ႈလူဝ်ႇမႃးၸီႉသင်ႇယူႇ ... ႁိုဝ်ႉ ! ”
မႄႈလဵင်ႉၶဝ် ပွင်ႉၼင်ႇၼၼ်သေ ၶဝ်ႈမိူဝ်းၼႂ်းႁိူၼ်းယဝ်ႈ ၊ ၸၢႆးၼွင်ႉ ထူၺ်ႈၸႂ်လူင်ၵမ်းၼိုင်ႈသေ လွမ်တူၺ်းမွၵ်ႇၼၢင်းသီ ဢၼ်မႄႈလဵင်ႉၶဝ် ဢၢင်ႈပိတ်းသေ ဢမ်ႇပဵၼ်ပိတ်းၼၼ်ႉယူႇ၊ မၼ်းၸင်ႇဝူၼ်ႉဝႃႈ -
“ ဢေႃး ... မွၵ်ႇၼၢင်းသီ ႁၢင်ႈလီဢွၼ်ႇဢိူၺ်း ... ပေႃးပိူၼ်ႈ မေႃပိတ်းမႂ်းၼႆ မႂ်းတေပႃးၵႂႃႇ ၼႂ်းမိုဝ်းပိူၼ်ႈလီလီသေ ပေႃးပိူၼ်ႈဢမ်ႇဝႆႉသတိသေ ပိတ်းမႂ်းၼႆ မႂ်းမေႃဢဝ်ၼၢမ်မႂ်းႁၢင်ႈဝႆႉ ႁႂ်ႈမေႃၸူၵ်ႉပိူၼ်ႈဢိူဝ်ႈၼေႃ”
ၽွင်းမိူဝ်ႈ ၸၢႆးၼွင်ႉတိုၵ်ႉဝူၼ်ႉသေ ငဝ်တူၺ်းမွၵ်ႇၼၢင်းသီယူႇၼၼ်ႉ- “ ဢၢႆႈၼွင်ႉ ... ”
ငိၼ်းသဵင်ႁွင်ႉၸၢႆးၸၢႆးလႄႈ ၸၢႆးၼွင်ႉတူၵ်းၸႂ်ၵႂႃႇသေ ၶိုၼ်းဝၢႆႇတူၺ်းၸၢႆးၸၢႆးယူႇ -
“ ဢေႃႈ ... ပီႈၸၢႆး ... ”
“ မိူဝ်ႈၵႆႈ ... ႁဵတ်းသင်မႂ်းဢမ်ႇၵႅတ်းမွၵ်ႇပၼ် မႃႇမီႇ ... ? ”
“ ၶႃႈဢၢင်ႈၵႅတ်းပၼ်ယူႇဢေႃႈ ... ၵူၺ်းၼႃႇ ဢၢၼ်ႇတီႇၼႅတ်ႈပိတ်းလႄႈ ၸူးဢဝ်ၼၢမ်ၸူၵ်ႉမိုဝ်း ဢၢၼ်ႇတီႇၵႂႃႇဢေႃႈ ... ”
ၽွင်းၼၼ်ႉ လုင်းသၢင်ႇတုၺ်ႉသမ်ႉ ႁွင်ႉႁႃၸၢႆးၼွင်ႉယူႇ -
“ ၸၢႆးၼွင်ႉ မႃးယွင်ႈတိူၵ်ႈၸွႆႈၵဝ်ၽွင်ႈလူး ... ”
ၸၢႆးၼွင်ႉၵေႃႈ ၼႅတ်ႈဢႅၼ်ႇၵႂႃႇၸူး လုင်းသၢင်ႇတုၺ်ႉယဝ်ႈ၊ တီႈၼႂ်းသူၼ်ၼၼ်ႉ ၵိုတ်းဝႆႉၸၢႆးၸၢႆး ၵေႃႉလဵဝ်ၵူၺ်းလႄႈ မၼ်းဢၢင်ႈၵႂႃႇပွင်ႉ ၸၢႆးၼွင်ႉၵေႃႈ မၼ်းဢမ်ႇပဵၼ်ပွင်ႉယဝ်ႉလႄႈ မၼ်းဢမ်ႇႁၢၼ်ႉၸႂ်သေ ပႆမႃးၸူးၶိုၼ်းႁိူၼ်းယူႇ၊ ယွၼ်ႉပိူဝ်ႈ မၼ်းၵုမ်ႇၸႂ်လမ်တေႃႇ ၸၢႆးၼွင်ႉလႄႈ မၼ်းမႃးၶွင်ႉၺႃး လွတ်ႇၼမ်ႉသေ ဢၢင်ႈတေလူမ်ႉၵူၺ်းမၼ်းယူႇ ၊ မၼ်းၶတ်းပၢၵ်ႇၵမ်းၼိုင်ႈသေ -
“ တွၵ်ႉ ! ... ”
+ + + + + + +
တိတ်း ... တိတ်း ... ...
“ ပီႈၽူၺ်း ... ႁဵတ်းၽႂ်းၽႂ်းလႄႈ လႅင်ႈၶႂ်ႈၵႂႃႇၼႅၼ်ႇယဝ်ႉ...”
ၽူၺ်းၵေႃႈ ၸင်ႇၼႅတ်ႈဢွၵ်ႇမႃးၸူး တီႈၵႃးၸၢႆးသႅင်သေ -
“ ဢလူဝ်ႉ ... လႅင်း ၶႂ်ႈၵႂႃႇၼႅၼ်ႇယဝ်ႈႁႃႉ ... ? ”
“ ၶႂ်ႈၵႂႃႇဢေႃႈ ... လႅင်းၶႂ်ႈၵႂႃႇဢႅဝ်ႇ ပီႈၸၢႆးၼွင်ႉၼႅၼ်ႇဢေႃႈ ”
ၸၢႆးသႅင်ၵေႃႈ ႁေႃႈၵႃးမၼ်းဢွၵ်ႇမႃးၸူး တီႈႁိူၼ်းၸၢႆးၼွင်ႉယူႇၼၼ်ႉယူႇ၊ လႅင်းတႄႉ တေလႆႈၵႂႃႇထူပ်း ၸၢႆးၼွင်ႉလႄႈ မၼ်းၸူမ်းတႄႉၸူမ်းဝႃႈယူႇ ၊ ၶဝ်ႁေႃႈၵႃးမိူဝ်းၵိုတ်း ၼႂ်းဝၢင်းႁိူၼ်းၸၢႆးၸၢႆးၶဝ်သေ ၶဝ်ႈမိူဝ်းၼႂ်းႁိူၼ်းယဝ်ႉ ၸၢႆးၸၢႆးၵေႃႈ မႃးႁပ်ႉတွၼ်ႈၶဝ်သေ ႁွင်ႉၶဝ်ႈမိူဝ်း ၼႂ်းႁွင်ႈၶႅၵ်ႇယဝ်ႈ၊ ၶဝ်ဢုပ်ႇၵၼ် မဵဝ်းၼိုင်ႈယဝ်ႉမဵဝ်းသွင်ယူႇသေတႃႉ လႅင်းတႄႉ ဢမ်ႇၶဝ်ႈၸႂ်၊ မၼ်းလွမ်ႁႃတူၺ်း ၸၢႆးၼွင်ႉဢမ်ႇႁၼ်လႄႈ မၼ်းၸင်ႇထၢမ်
“ ပီႈၽူၺ်း ... ပီႈၸၢႆးၼွင်ႉ မီးလႂ်... ? ” လႅင်းၶႂ်ႈၵႂႃႇတီႈပီႈ ၸၢႆးၼွင်ႉ... ”
ၽူၺ်း ၸင်ႇထၢမ်ၸၢႆးၸၢႆးဝႃႈ -
“ ၸၢႆးၸၢႆး ... ၸၢႆးၼွင်ႉမီးလႂ် ... ? ”
“ မီးတီႈသိုင်ႇၵႃးၼၼ်ႉယူဝ်ႉ ... ”
“ ပီႈၽူၺ်း ... ၵႂႃႇသူင်ႇလႅင်း ၽွင်ႈ ... ”
“ ၵမ်ႉလႄႈ ... လႅင်း ပီႈၸၢႆးသႅင်ၶဝ် တိုၵ်ႉဢုပ်ႇၵၼ်ပႆႇယဝ်ႉၼေႈ ... ”
ၸၢႆးသႅင်တူၺ်းႁၼ် ၵူဝ်လႅင်းႁဵတ်းၸႃႉတေႃႇၶဝ်လႄႈ မၼ်းၸင်ႇၶိုၼ်းလၢတ်ႈဝႃႈ -
“ ၽူၺ်း ... ၵႂႃႇသူင်ႇလႅင်းသေလႄႈ ... ၵမ်ႉမႃး ပေႃးႁႃးၸၢႆးၸၢႆး ဢုပ်ႇၵၼ်ယဝ်ႉ ... ႁႃးတေမႃးၸွမ်းလႆ ... ”
ၽူၺ်း ၸုင်မိုဝ်းလႅင်းသေ ၶႃသွင်ၵေႃႉ ပႆမႃးၼႂ်းသူၼ်ယူႇ ၊ လႆႈႁၼ်တူၼ်ႈမွၵ်ႇဢွၼ်ႇ ၵီႈမွၵ်ႇႁၢင်ႈလီဝႆႉတႄႉတႄႉလႄႈ ၶႃလွမ်တူၺ်း တူၼ်ႈမွၵ်ႇဢွၼ်ႇၸိူဝ်းၼၼ်ႉသေ လႆႈႁၼ်ၸၢႆးၼွင်ႉ တိုၵ်ႉၼင်ႈသေ ၽုၵ်ႇမွၵ်ႇဝႆႉယူႇလႄႈ လႅင်း ဢၢင်ႈဢႅၼ်ႇၵႂႃႇၸူး ၸၢႆးၼွင်ႉယဝ်ႈ၊ ၽူၺ်း ၸင်ႇၼႅတ်ႈၸၼ်လႅင်းဝႆႉသေ ၸႂ်ႉႁႂ်ႈလႅင်း ၵႂႃႇတူမ်းတႃၸၢႆးၼွင်ႉယဝ်ႈ၊ လႅင်းၵေႃႈ ပႆၵႂႃႇၽၢႆႇလင် ၸၢႆးၼွင်ႉလွႆးလွႆးသေ ဢဝ်မိုဝ်းမၼ်းသွင်ၶွၼ် တူမ်းတႃ ၸၢႆးၼွင်ႉဝႆႉ တင်းသွင်ၶွၼ်ယဝ်ႈ -
“ ဢႃႉ ... ဢႃႉ ... ပဵၼ်ၽႂ်ၼႆႉ ... ? ပွႆႇလႄႈ ပွႆႇလႄႈ... ”
လႅင်းၵၼ်ႈၶူဝ်သေ မၼ်းဢမ်ႇပွႆႇ -
“ ႁိူၺ်ႉ ... ပွႆႇလႄႈ ... ပဵၼ်ၽႂ် ... ? မႃးတူမ်းတႃၼႆႉ ...”
ၸၢႆးၼွင်ႉ ၸင်ႇၼႅတ်ႈငၢင်ႉမိုဝ်း ဢၼ်တူမ်းတႃမၼ်းၼၼ်ႉသေ ၸင်ႇၼႅတ်းႁွပ်ႈဢဝ်လႅင်း ၽႂ်းၽႂ်းယဝ်ႉသေ -
“ ဢလူဝ်ႉ ... လႅင်း ... မႃးဢႅဝ်ႇပီႈၸၢႆးၼွင်ႉႁႃႉ ... ? ”
“ ၸႂ်ႈဢေႃႈ ... ပီႈၽူၺ်းၵေႃႈ မႃးဢေႃႈ ... ပီႈၸၢႆးသႅင်တႄႉ တိုၵ်ႉမီးၼႂ်းႁိူၼ်းဢေႃႈ ... ”
ၸၢႆးၼွင်ႉ ၶုၵ်းၸႂ်လႆႈမဵဝ်းၼိုင်ႈလႄႈ ၸင်ႇၼႅတ်ႈပွႆႇၶိုၼ်းလႅင်းသေ
“ ဢူဝ် ... မိုဝ်းပီႈၸၢႆးၼွင်ႉ ၼုၵ်းလိၼ်ဝႆႉဢိူဝ်ႈ ... ၵမ်ႉမႃး ၶူဝ်းလႅင်း တေၵိူဝ်ႇမူတ်းယဝ်ႈ ... ပီႈၸၢႆးၼွင်ႉ တေသုၵ်ႈမိုဝ်းၵွၼ်ႇၼႃႈ”
ၸၢႆးၼွင်ႉ ၵႂႃႇသုၵ်ႈမိုဝ်းမၼ်းသေ ၶိုၼ်းမႃးၸူးလႅင်းလႄႈ ၽူၺ်းယူႇ ၽူၺ်းၸင်ႇထၢမ်ဝႃႈ -
“ ၸၢႆးၼွင်ႉ ... ၽုၵ်ႇသင်ၼႆႉ ... ? ”
“ ၽုၵ်ႇမွၵ်ႇမၢင်းၶႄဢိူဝ်ႈ ... ၽူၺ်း ... ”
“ ၸူဝ်ႈၸၢႆးၼွင်ႉ ၽႅဝ်မႃးတီႈႁိူၼ်းၼႆႉ သူၼ်မွၵ်ႇၸိူဝ်းၼႆႉ ႁၢင်ႈလီလိူဝ်မႃးသေၵဝ်ႇယဝ်ႈ ... ”
“ ဢမ်ႇၸႂ်ႈသႄႈ ... ၽူၺ်း ... ”
“ ၸႂ်ႈဢိူဝ်ႈ ... ႁိူၼ်းတီႈၼႆႈ မိူဝ်ႈဢွၼ်တၢင်း ၽူၺ်းၵႆႉယၢမ်ႈၽႅဝ်ယူႇ ... တီႈလဵဝ်တႄႉ ဢၼ်လႅၵ်ႈလၢႆႈသေပိူၼ်ႈၼၼ်ႉတႄႉ ပဵၼ်သူၼ်မွၵ်ႇၸိူဝ်းၼႆႉယဝ်ႈ ... ၸၢႆးၼွင်ႉၵျေႃႇၸႂ်ယူႇၼေႃ ... ? ”
ၸၢႆးၼွင်ႉထူၺ်ႈၸႂ်လူင်ၵမ်းၼိုင်ႈသေ -
“ ၵျေႃႇၼႆၵေႃႈ ဢမ်ႇဝႃႈၼင်ႇၵဝ်ႇ ... ယူႇၵႂႃႇၵမ်ႉမၼ်းသင်ႇတေႃႇဢိူဝ်ႈ ... ၽူၺ်း ... ”
“ ပီႈၸၢႆးၼွင်ႉ တမ်ႉဢမ်ႇမႃးဢႅဝ်ႇလႅင်းၶဝ် သေပွၵ်ႈလႃႇ ? ”
“ ပီႈၸၢႆးၼွင်ႉ ဢမ်ႇတၼ်းဢိူဝ်ႈ ... လႅင်း ... ယူႇႁိူၼ်းပိူၼ်ႈၼႆ လူဝ်ႇလႆႈႁဵတ်းၵၢၼ်ပိူၼ်ႈႁႂ်ႈ တဵမ်ထူၼ်ႈဢိူဝ်ႈ... ပေႃးပီႈၸၢႆးၼွင်ႉတၼ်းၼႆ ပီႈၸၢႆးၼွင်ႉတေမႃးဢႅဝ်ႇယူႇၵူၺ်း ... ”
“ ပီႈၸၢႆးၼွင်ႉ တေတၼ်းမိူဝ်ႈလႂ်ၶႃႈလႃႇ ... ? ”
“ တေတၼ်းမိူဝ်ႈလႂ်ၼႆ ... ပႆႇၸၢင်ႈဝႃႈၵွၼ်ႇလႅင်း ... ”
“ ဢိုဝ်ႈ ... တီႈႁိူၼ်းၽူၺ်းၶဝ်ၵေႃႈ လႅင်းၵုမ်ႇထၢမ်ဝႃႈ ... ပီႈၸၢႆးၼွင်ႉ တေမႃးဢႅဝ်ႇလႅင်းၶဝ်မိူဝ်ႈလႂ် ... ၼႆယူႇတႃႇသေႇယဝ်ႈ ... ၸၢႆးၼွင်ႉၶႂ်ႈႁူႉၵေႃႈ ... ”
“ တႄႉႁႃႉ လႅင်း ... ? ”
“ တႄႉဢေႃႈ ... ပေႃးပီႈၸၢႆးၼွင်ႉဢမ်ႇမႃးဢႅဝ်ႇလႅင်းၶဝ်ၼႆ လႅင်းၵေႃႈ တေဢမ်ႇမႃးဢႅဝ်ႇ ပီႈၸၢႆးၼွင်ႉယဝ်ႈ ...”
“ ယႃႇပေဝႃႈၼၼ်လႅင်း ...ပီႈၸၢႆးၼွင်ႉတေမႃးဢႅဝ်ႇယူႇၵူၺ်း”
“ ပီႈၸၢႆးၼွင်ႉ မႃးဢႅဝ်ႇတႄႉတႄႉၶႃႈၼႃႈ ... ”
ၸၢႆးၼွင်ႉ ငွၵ်းႁူဝ်ၼႄ လႅင်းသေ ယုမ်ႉဝႆႉယူႇ၊ ၽွင်းၼၼ်ႉ ဢၢႆႈသီႇတႃလႄႈ ဢၢႆႈယုၺ်း ႁဝ်ႇသေ ဢႅၼ်ႇမႃးၸူး ၸၢႆးၼွင်ႉၶဝ်ယဝ်ႈ -
“ ဝုၵ်ႉ ... ဝုၵ်ႉ ... ”
ငိၼ်းသဵင်မႃႁဝ်ႇလႄႈ လႅင်းဝၢႆႇတူၺ်းမႃဢွၼ်ႇသွင်တူဝ်ၼၼ်ႉသေ -
“ ပီႈၸၢႆးၼွင်ႉ လႅင်း ၵူဝ် ... ”
လႅင်းၼႅတ်ႈမႃးယိပ်းမိုဝ်းၸၢႆးၼွင်ႉဝႆႉယူႇ ၸၢႆးၼွင်ႉၸင်ႇဝႃႈ -
“ ယႃႇၵူဝ် လႅင်း ... ၶႃဢမ်ႇႁဵတ်းသင် ... ဢၢႆႈယုၺ်း ဢၢႆႈသီႇတႃ မႃး မႃး ...... ဢူဝ်ႉ ... ! ... ဢူဝ်ႉ ... ! ”
မႃသွင်တူဝ်ၼၼ်ႉၵေႃႈ ၶွၼ်းႁၢင်ၶႃသေ မႃးၸူးၶဝ်ယူႇ၊ လႆႈႁၼ်ၸၢႆးၼွင်ႉ လုပ်ႈႁူဝ်ၶႃသွင်တူဝ်လႄႈ လႅင်းၵေႃႈ ၸင်ႇလုပ်ႈၸွမ်းယဝ်ႈ၊ လႅင်းၵေႃႈ မိုတ်ႈမႃသေ မၼ်းဢဝ်မႆႉဢွၼ်ႇလႅမ်ႈၼိုင်ႈသေယွၵ်ႇမႃယူႇ၊ မႃဢွၼ်ႇသွင်တူဝ်ၼၼ်ႉ လမ်းၸွမ်းၶူပ်းလဵၼ်ႈပၢႆမႆႉလႅင်းလႄႈ ႁၼ်လႅင်းပဵၼ်ဢၼ်သိူဝ်းၸႂ်ဝႆႉ တႄႉတႄႉ၊ ၽူၺ်းၸင်ႇဝႃႈ -
“ မႃဢွၼ်ႇသွင်တူဝ်ၼႆႉ လီႁၵ်ႉပိူၼ်ႈၵျႃႉၼေႃ ... ?ၸၢႆးၼွင်ႉ”
“ ၸႂ်ႈဢိူဝ်ႈ ... ၽူၺ်း ...ၸၢႆးၼွင်ႉတႄႉ ၵူၺ်းၵျေႃႇၸွမ်း ၶႃသွင်တူဝ်ၼႆႉၵူၺ်းယဝ်ႉ ... ”
“ ၸိုဝ်ႈၶႃ ဢၼ်ဝႃႈဢၢႆႈယုၺ်း ဢၢႆႈသီႇတႃၼႆၼၼ်ႉ ၸၢႆးၼွင်ႉ တၢင်ႇပၼ်ဝႆႉႁႃႉ ... ? ”
“ ၸႂ်ႈဢိူဝ်ႈ ... ၽူၺ်း ... ၸွင်ႇလႅပ်ႈႁိုဝ် ... ? ”
“ လႅပ်ႈၽႅဝ်ဢိူဝ်ႈ ... ၸၢႆးၼွင်ႉ ... ”
လႅင်းတႄႉ ဢဝ်ၶွၼ်ႉဢွၼ်ႇလႅမ်ႈၼိုင်ႈသေ တင်းမႃဢွၼ်ႇသွင်တူဝ်ၼၼ်ႉ လမ်းၵၼ်လဵၼ်ႈ ၼႂ်းသူၼ်ၼၼ်ႉယူႇ -
“ ၽူၺ်း လႄႈၸၢႆးၸၢႆးၶဝ် ၶိုၼ်ႈၸၼ်ႉၸွမ် ဢၼ်လဵဝ်ၵၼ်ႁႃႉ ၽူၺ်း ... ... ? ”
“ ၸႂ်ႈဢိူဝ်ႈ ... ၸၢႆးၼွင်ႉ ပဵၼ်ပၢႆးယႃႈယႃၼင်ႇၵၼ်ယဝ်ႈ... ပေႃးဢဝ်လိၵ်ႈလၢႆးဝႃႈတႄႉ ၸၢႆးၸၢႆး ၺၢၼ်ႇလီသေၽူၺ်းတႄႉတႄႉဢိူဝ်ႈ လိၵ်ႈမၢင်မဵဝ်းၼႆႉ ၽူၺ်းယင်းလႆႈထၢမ် ၸၢႆးၸၢႆးၵွၼ်ႇဢိူဝ်ႈ ၸၢႆးၼွင်ႉၶႂ်ႈႁူႉၵေႃႈ ... ”
“ပေႃးၽူၺ်းၶဝ် ပဵၼ်မေႃယႃလူင်မႃးၼႆ တႃႉၶႂ်ႈႁႂ်ႈၽူၺ်းၶဝ် မိူဝ်းယူတ်းယႃပၼ် ၵူၼ်းမိူင်းတႆးႁဝ်းၶဝ်ၵျႃႉ ... မိူင်းႁူၺ်ႈမိူင်းလွႆႁဝ်းၼႆႉ မေႃယႃၵေႃႈ ဢမ်ႇမီးၼမ် ဢမ်ႇတၢၼ်ႇပဵၼ်ၶိုၵ်ႉၵေႃႈ လႆႈပဵၼ်ၶိုၵ်ႉ ... ဢမ်ႇတၢၼ်ႇလီတၢႆၵေႃႈ လႆႈတၢႆၵႂႃႇ မီးတင်းၼမ်လႄႈ တႃႉလီဢီးလူတႄႉယဝ်ႈၼႃ ... ၽူၺ်း ... ၵူၺ်းၵႃႈ ... မေႃယႃၵမ်ႈၽွင်ႈတႄႉ ၵူၺ်းၶႂ်ႈယူႇဝဵင်းယႂ်ႇဝဵင်းလူင်ၵူၺ်းလူး ... ”
ၽူၺ်းယဵၼ်သေ ပႂ်ႉထွမ်ၵႂၢမ်း ဢၼ်ၸၢႆးၼွင်ႉလၢတ်ႈၼၼ်ႉယူႇ-
“ ၽူၺ်း ပေႃးၽူၺ်းပဵၼ်မေႃယႃမႃးၼႆ ၸွင်ႇတေမိူဝ်းယႃပၼ် ၵူၼ်းမိူင်းတႆးႁဝ်းလႆႈႁိုဝ် ? ”
ၽူၺ်း လွမ်တူၺ်းၼႃႈ ၸၢႆးၼွင်ႉသေ -
“ ဢဵၼ်းဢၢၼ်းတႄႉ မီးဝႆႉယူႇ ... ၸၢႆးၼွင်ႉ... ၵူၺ်းၵႃႈ တေပဵၼ်ဢမ်ႇပဵၼ်မႃး ၼႆၼၼ်ႉတႄႉ ... ၶၢဝ်းယၢမ်း တေတႅပ်းတတ်းပၼ်ယူႇၵႂႃႈ ... ”
“ ၽူၺ်း မီးတၢင်းဢဵၼ်းဢၢၼ်းၼင်ႇၼၼ် ၼႆလႄႈ ... ၸၢႆးၼွင်ႉ ပေႃးၸူမ်းဝႆႉထႃႈယဝ်ႈ ...ႁႂ်ႈၽူၺ်း ၸဵဝ်းပဵၼ်မေႃယႃၽႂ်းၽႂ်းသေၵမ်းၼႆ ၸၢႆးၼွင်ႉတေသူးတွင်းပၼ်ၵူႈၶမ်ႈလႆ ... ”
လႆႈငိၼ်းၼင်ႇၼၼ် ၽူၺ်းၸူမ်းၸႂ်တႄႉတႄႉသေ -
“ ႁႂ်ႈပဵၼ်ၼင်ႇ ၵႂၢမ်းယွၼ်းသူးၸၢႆးၼွင်ႉၼၼ်ႉ သေၵမ်း ... ”
“ ပေႃးပဵၼ်မေႃယႃလူင်မႃးၼႆ ... ယႃႇပေလိုမ်းၸၢႆးၼွင်ႉၶဝ်ၼႃႈ ၽူၺ်း... ... ”
“ ဢမ်ႇလိုမ်းသႄႈ ... ”
“ ပေႃးၸၢႆးၼွင်ႉၼၢဝ်သေ မႃးယူတ်းယႃ မႃးသမ်းၶဵမ် တီႈၽူၺ်းၼႆ ... ယႃႇပေဢဝ်ၵႃႈမၼ်း ၼႃႈ ... ”
“ ဢမ်ႇဢဝ်သႄႈ ... ”
“ ပေႃးၼႆ ... ၸၢႆးၼွင်ႉ ပေႃးၶႂ်ႈၼၢဝ်တူၺ်းၵမ်းလဵဝ်ယဝ်း... ”
လႆႈငိၼ်းၼင်ႇၼၼ် ၽူၺ်းၸူမ်းၶူဝ်ယူႇၶိၵ်းၶိၵ်းယဝ်ႈ။ ၽွင်းမိူဝ်ႈ ၸၢႆးၼွင်ႉ ၼၢဝ်တီႈႁိူၼ်းၽူၺ်းၶဝ်ၼၼ်ႉၵေႃႈ ၽူၺ်း ၶိုၼ်းၵႂႃႇၶုၵ်ႉၸႂ်လႆႈလႄႈ ႁူဝ်ၸႂ်မၼ်းၼၢင်း လွမ်တွတ်ႇၶိုၼ်ႈယူႇၼႆ မၼ်းၼၢင်းၵေႃႉလဵဝ်ၵူၺ်း ႁူႉထိုင် ။
“ ပီႈၸၢႆးသႅင်မႃးယဝ်ႈ ပီႈၸၢႆးၼွင်ႉ ”
လႆႈငိၼ်းသဵင်လႅင်း လၢတ်ႈၼင်ႇၼၼ်လႄႈ ၸၢႆးၼွင်ႉလႄႈၽူၺ်း ၸင်ႇဝၢႆႇတူၺ်းၵႂႃႇ လႆႈႁၼ် ပီႈၸၢႆးသႅင်လႄႈ ၸၢႆးၸၢႆး ပႆမႃးၸူးၶဝ်ယူႇ၊ ၸၢႆးၸၢႆးလႆႈႁၼ် ၽူၺ်းလႄႈ ၸၢႆးၼွင်ႉ မိုတ်ႈၵိုဝ်းဢုပ်ႇၵၼ်ၼင်ႇၼၼ် မၼ်းဢမ်ႇထုၵ်ႇၸႂ်မၼ်း။ ၸၢႆးၼွင်ႉ ၸင်ႇႁပ်ႉလၢတ်ႈဝႃႈ -
“ ဢေႃႈ ... ပီႈၸၢႆးသႅင်... မႃးဢႅဝ်ႇၶႃႈႁႃႉ ... ? ”
“ ၸႂ်ႈဢိူဝ်ႈ ... ၸၢႆးၼွင်ႉ ယူႇလီယူႇၼေႃ ... ? ”
“ ယူႇလီယူႇၶႃႈ ... ဢူႈလုင်းမႄႈပႃႈၶဝ်တီႈႁိူၼ်းလူး ... ယူႇလီၵၼ်ယူႇၶႃႈၼႄႇ ... ? ”
“ ဢိူဝ်ႈ ... ယူႇလီၵၼ်ယူႇ ... ႁဵတ်းသင် ၸၢႆးၼွင်ႉ သမ်ႉဢမ်ႇပေႃႇမႃးလႄႇႁဝ်းလႃႇ ... ? ”
“ ဢမ်ႇပႆႇသၢင်ႇထုၵ်ႇလႄႈ ... ပႆႇပဵၼ်မႃးဢႅဝ်ႇဢေႃႈ ... ”
“ ဢိူဝ်ႈ ... လႅင်းတႄႉ ၵႆႉၵႆႉထၢမ်ႁႃၸၢႆးၼွင်ႉ တႃႇသေႇယဝ်ႈ
မိူဝ်ႈၼႆႉ ၶဝ်ဢိုတ်းႁဵၼ်းလႄႈ မၼ်းၸႂ်ႉႁဝ်း မႃးသူင်ႇမၼ်းယဝ်ႈ ... ၵွပ်ႈၼႆ ႁဝ်းမႃးသူင်ႇမၼ်းဝႆႉသေ တၢမ်းၶမ်းမႃး ၸင်ႇတေၶိုၼ်းမႃးႁွင်ႉမၼ်းမိူဝ်းယဝ်ႈ ... မၼ်းတေမႃးဢဵၼ်ႈၵေႃႉ ၸၢႆးၼွင်ႉတင်းဝၼ်း ၼႆဝႃႈ ... ”
“ တႄႉႁႃႉ ... လႅင်း ... ? ”
“ တႄႉဢေႃႈ ... ”
ဝၢႆးသေ ၸၢႆးသႅင်လႄႈၽူၺ်းၶဝ် မိူဝ်းၵႂႃႇ လႅင်း တႄႉၵိုတ်းဝႆႉ တီႈၸၢႆးၼွင်ႉသေ မၼ်းဢဵၼ်ႈၵေႃႉၸၢႆးၼွင်ႉယူႇ၊ ပေႃးဝႃႈ ၸၢႆးၼွင်ႉႁူတ်းသူၼ်မွၵ်ႇၼႆၵေႃႈ မၼ်းမႃးၸွႆႈႁူတ်း၊ ပေႃးဝႃႈ ၸၢႆးၼွင်ႉၽုၵ်ႇမွၵ်ႇၼႆၵေႃႈ မၼ်းၸွႆႈထႅမ်ၸၢႆးၼွင်ႉသေ ၶႃသွင်ၵေႃႉ ၵျေႃႇလူၺ်ႈၸွမ်းၵၼ်ဝႆႉယူႇ။ ပေႃးဝႃႈ မၼ်းၶႂ်ႈထွမ်ႇဢပုမ်ၼႆၵေႃႈ ၸၢႆးၼွင်ႉသမ်ႉၶႆႈၼႄမၼ်းလႄႈ လႅင်းပဵၼ်ဢၼ်ၵျေႃႇသိူဝ်းၸႂ် တႄႉတႄႉယူႇယဝ်ႈ။
လႆႈႁၼ် ၸၢႆးၼွင်ႉလႄႈလႅင်းမိုတ်ႈၵိုဝ်း ႁၵ်ႉႁွမ်ၵၼ် မူၼ်ႈသိူဝ်းၼင်ႇၼၼ် ၸၢႆးၸၢႆးတႄႉ ဢမ်ႇပေႃးထုၵ်ႇၸႂ်၊ ၵွပ်ႈသင်လႄႈ မၼ်းဢမ်ႇထုၵ်ႇၸႂ်ၼႆ မၼ်းဝူၼ်ႉဢမ်ႇပွင်ႇၼင်ႇၵဝ်ႇ။
လႅင်းတူၺ်းႁၼ် ၸၢႆးၼွင်ႉဢဝ်မႃယုၺ်း ဢၢပ်ႇၼမ်ႉသေ မၼ်းသိူဝ်းၸႂ်တႄႉတႄႉ၊ မၼ်းၸွႆႈဢဝ်ၼမ်ႉသေ တွင်ႈပၼ်ဢၢႆႈယုၺ်းယူႇ၊ ဝၢႆးသေ ဢၢပ်ႈၼမ်ႉပၼ်ဢၢႆႈယုၺ်းယဝ်ႉ ၸၢႆးၼွင်ႉ ဢၢင်ႈဢၢပ်ႇၼမ်ႉပၼ် ဢၢႆႈသီႇတႃၼႆသေတႃႉ ဢမ်ႇႁၼ်ဢၢႆႈသီႇတႃႇလႄႈ မၼ်းလွမ်ႁႃဢၢႆႈသီႇတႃယူႇ -
“ လႅင်း ... ဢမ်ႇႁၼ်ဢၢႆႈသီႇတႃႁႃႉ ... ? ”
“ ဢမ်ႇႁၼ်ၶႃႈ ...ပီႈၸၢႆးၼွင်ႉ တေဢၢပ်ႇၼမ်ႉပၼ်မၼ်းႁႃႉ?”
“ ၸႂ်ႈဢိူဝ်ႈ ... လႅင်း ...”
ၶႃသွင်ၵေႃႉ လႄႇႁွင်ႉႁႃ ဢၢႆႈသီႇတႃႇယူႇ -
“ ဢၢႆႈသီႇတႃ ... ဢၢႆႈသီႇတႃ ... မႃး ... မႃး ... ဢူဝ်ႉ! ”
ဢၢႆႈသီႇတႃ လႆႈငိၼ်းသဵင်ၸၢႆးၼွင်ႉ ႁွင်ႉႁႃလႄႈ မၼ်းဢႅၼ်ႇမႃးၸူး ၸၢႆးၼွင်ႉယူႇ၊ လႅင်းၸင်ႇဝႃႈ -
“ ၼေႈ ... ! ဢၢႆႈသီႇတႃ ၵၢပ်ႈသင်မႃးၶႃႈၼၼ်ႉ ပီႈၸၢႆးၼွင်ႉ”
ၸၢႆးၼွင်ႉလွမ်တူၺ်းၵႂႃႇ လႆႈႁၼ် ဢၢႆႈသီႇတႃ ၵၢပ်ႈသွၵ်းတိၼ်ၼင် ၸၢႆးၸၢႆးမႃးလႄႈ မၼ်းၸင်ႇဢဝ်တူၺ်းၼႆ လႆႈႁၼ်သွၵ်းတိၼ်ၶွၼ်ၼၼ်ႉ ပေႃးယွၵ်ႈယွႆ ၵွႆပႅတ်ႈမူတ်းယူႇယဝ်ႈ၊ ၽွင်းၼၼ်ႉ ၸၢႆးၸၢႆးၽႅဝ်မႃးသေ မႃးႁၼ်ၸၢႆးၼွင်ႉ ဢၢင်ႈႁႅမ်ဢၢႆႈသီႇတႃလႄႈ -
“ ဢၢႆႈၼွင်ႉ ... ပဵၼ်သင် ... ?”
“ ဢေႃႈ ... ပီႈၸၢႆး... ဢၢႆႈသီႇတႃ ၶူပ်း ၶူပ်းသွၵ်းတိၼ်ဢေႃႈ”
ၸၢႆးၸၢႆး ဢမ်ႇထၢင်ႇ တေပဵၼ်သွၵ်းတိၼ်မၼ်းလႄႈ -
“ ၶူပ်းၵေႃႈ ယဝ်ႉ ၵႂႃႈ ...... ”
ၸၢႆးၼွင်ႉ ၸင်ဢဝ်သွၵ်းတိၼ်ၼၼ်ႉ ၼႄၸၢႆးၸၢႆးသေ -‘
“ ပီႈၸၢႆး ၼႆႉပဵၼ် သွၵ်းတိၼ်ပီႈၸၢႆး ဢမ်ႇၸႂ်ႈၶႃႈႁႃႉ ... ? ”
ၸၢႆးၸၢႆး မႃးယိပ်းတူၺ်းသွၵ်းတိၼ်မၼ်း ဢၼ်မႃၶူပ်းဝႆႉၼၼ်ႉသေ -
“ ဢႃ ... ၵွႆမူတ်းယဝ်ႉ ၼႆႉ ... ဢၢႆႈၼွင်ႉ ... မႂ်းဢမ်ႇတူၺ်း မႃမႂ်းလူင် ... ”
“ ပီႈၸၢႆး ... ၶႃႈႁိုဝ်တေၵႂႃႇတၼ်းတူၺ်း ... ၸဵမ်မိူဝ်ႈ ဝၼ်းပုၼ်ႉ မၼ်းၶူပ်းၶႅပ်းတိၼ်ၶႃႈသေ ၶႃႈသင်ႇသွၼ်မၼ်းၼၼ်ႉ ပီႈၸၢႆးသမ်ႉဝႃႈ ၶႂ်ႈၶူပ်းၵေႃႈ ပွႆႇမၼ်းၶူပ်းလႄႈ ၼႆလႄႇ ... ၵွပ်ႈၼႆ မၼ်းၸင်ႇၵႆႉႁႃၶူပ်း သွၵ်းတိၼ်ၶႅပ်းတိၼ်ၸိူဝ်းၼႆႉယဝ်ႈ ... ”
ၸၢႆးၸၢႆးၸႂ်လမ်ၼႃႇသေ ဢဝ်သွၵ်းတိၼ်မၼ်း ဝိုတ်ႉသိုင်းသႂ်ႇမႃ ဢၢႆႈသီႇတႃၼၼ်ႉ ႁႅင်းႁႅင်းယဝ်ႈ -
ငႅၵ်း ... ငႅၵ်း ...
ဢၢႆႈသီႇတႃႁွင်ႉသႅၼ်သေ ဢႅၼ်ႇပၢႆႈၵႂႃႇၵႆၵႆယဝ်ႈ ၊ ၸၢႆးၸၢႆး တေၸႂ်လမ်တေႃႇ ၸၢႆးၼွင်ႉၼႆၵေႃႈ ယွၼ်ႉပိူဝ်ႈ ၵႂၢမ်းမၼ်းၶိုၼ်းသုပ်းၶေႃးမၼ်းလႄႈ မၼ်းဢမ်ႇၸၢင်ႈဝႃႈႁိုဝ် မၼ်းၸင်ႇဝႃႈ -
“ ဢႃႉ ... ! မႃယွၵ်းတူဝ်ၼႆႉ ၵဝ်တေသင်ႇသွၼ်မၼ်းလီလီၵွၼ်ႇ ... တွၵ်ႉ ... ! ”
ၸၢႆးၸၢႆး ႁႃၶွၼ်ႉလႅမ်ႈၼိုင်ႈသေ ၵႂႃႇႁႃလမ်းႁႅမ် ဢၢႆႈသီႇတႃယူႇ၊ ဢၢႆႈသီတႃ ၼႅတ်ႈၵႂႃႇပႅပ်ႉဝႆႉ တီႈၸၢႆးၸၢႆး ဢမ်ႇႁၼ်မၼ်းၼၼ်ႉယူႇ ၊ ၸၢႆးၸၢႆး ႁႃဢမ်ႇႁၼ်လႄႈ မၼ်းၶိုၼ်းမႃးတီႈ ၸၢႆးၼွင်ႉသေ -
“ ဢၢႆႈၼွင်ႉ ...မႃတူဝ်ၼၼ်ႉ ၵႂႃႇလႂ်ယဝ်ႉၵေႃႈဢမ်ႇႁူႉယဝ်ႈ မႂ်း သင်ႇသွၼ်ပၼ်မၼ်း လီလီလူး ... ”
“ ဢေႃႈၶႃႈ ... ပီႈၸၢႆး တမ်းၸႂ်ၶႃႈလႃႈ ... ၶႃႈတေသင်ႇသွၼ်မၼ်းလီလီ ႁႂ်ႈမၼ်းပေႃးလၢပ်ႇၶႃႈလႆ ... ”
တွၵ်ႉ ... !
ၸၢႆးၸၢႆးၶတ်းပၢၵ်ႇမၼ်း ၵမ်းၼိုင်ႈသေ ၶဝ်ႈမိူဝ်းၼႂ်းႁိူၼ်းယဝ်ႈ။ လႅင်းၸင်ႇထၢမ်ဝႃႈ -
“ ပီႈၸၢႆးၼွင်ႉ ... မႃသီႇတႃၵႂႃႇလႂ်ယဝ်ႉ ... ? ”
“ မၼ်းၵႂႃႇပၢႆႈမႅပ်း ၽၢႆႇလင်ထူင်ထၢၼ်ႇၼၼ်ႉ ၵႂႃႈ ... ”
“ ဢမ်ႇဢၢပ်ႇၼမ်ႉပၼ်မၼ်းယဝ်ႉႁႃႉ ... ? ပီႈၸၢႆးၼွင်ႉ ...”
“ ဢၢပ်ႈဢိူဝ်ႈ ... မႃးလႄႈ ... ႁႃးၵႂႃႇႁွင်ႉမၼ်း ...”
ၸၢႆးၼွင်ႉ ၵႂႃႇႁွင်ႉဢၢႆႈသီႇတႃသေ မႃးဢၢပ်ႇၼမ်ႉပၼ်လီလီငၢမ်းငၢမ်းယူႇ၊ လႅင်းတႄႉ လႆႈဢဝ်ၼမ်ႉတွင်ႈပၼ်မႃလႄႈ မၼ်းၸူမ်းသိူဝ်းတႄႉတႄႉ၊ ၽွင်းမိူဝ်ႈ တိုၵ်ႉတွင်ႈပၼ်မၼ်းၼၼ်ႉ ဢၢႆႈသီႇတႃ လွတ်ႈၵႂႃႇလႄႈ ၸၢႆးၼွင်ႉၶႃ လမ်းၺွပ်းဢၢႆႈသီႇတႃသေ တွၼ်ႈတႃႇဝၼ်းဢွၼ်ႇဝၼ်းၼၼ်ႉ ၶႃသွင်ၵေႃႉ ပဵၼ်ဢၼ်ၵျေႃႇၸႂ်တႄႉတႄႉ။