ၶႅၵ်ႇ/တွၼ်ႈသၢဝ်းသၢမ်
ယွၼ်ႉပိူဝ်ႈ ၸၢႆးၼွင်ႉမေႃႁဵတ်းၵေႃႉလုၵ်ႈဢွၼ်ႇလႄႈ လႅင်းၵေႃႈ ၶိုၼ်းယူႇလီမႃးသေ ပႃႈၼၢင်းၶွင်ႇၶဝ် ၶွပ်ႈၸႂ်ၼိူဝ်မၼ်းတႄႉတႄႉ၊ လႅင်းၶႂ်ႈၵႂႃႇဢႅဝ်ႇ ၼႂ်းဝဵင်းၼႆလႄႈ ၸၢႆးၼွင်ႉၵေႃႉႁေႃႈၵႃးသေ ၸွမ်းသူင်ႇပၼ်လႅင်း တီႈဢၼ်လႅင်း ၶႂ်ႈလႄႇၶႂ်ႈဢႅဝ်ႇ တီႈၼိုင်ႈယဝ်ႉတီႈၼိုင်ႈယူႇ -
“ လႅင်း ... ၶႂ်ႈၵႂႃႇလႂ်ထႅင်ႈ... ? လၢတ်ႈလႄႈၼႃႈ ... ပီႈၸၢႆးၼွင်ႉ တေၵႂႃႇသူင်ႇပၼ် ... ”
“ပီႈၸၢႆးၼွင်ႉ ... လႅင်းၶႂ်ႈၵႂႃႇတူၺ်းၸၼ်ႉၸွမ်ပီႈၽူၺ်းၶဝ် ”
“ ၵႂႃႇလႆႈယူႇၼႃႇ ... ၵူၺ်းၵႃႈ ... ဢမ်ႇၸၢင်ႈၶဝ်ႈၼႂ်းမၼ်းၵူၺ်းၼႃႈ ... လႅင်း ... ”
ၸၢႆးၼွင်ႉၵေႃႈ ႁေႃႈၵႃးမၼ်းမႃး တီႈၸၼ်ႉၸွမ်ၽူၺ်းၶဝ်ယူႇ၊ ၽိူဝ်ႇၽႅဝ်မႃး တီႈႁိမ်းၽၵ်းတူဝၢင်း ၸၼ်ႉၸွမ်ပၢႆးမေႃယႃၼၼ်ႉ လႅင်းမုင်ႈႁၼ်ၽူၺ်းလႄႈ မၼ်းၸင်ႇယူႇၼိူဝ်ၵႃးသေ ႁွင်ႉသႅၼ်ႇႁႅင်းႁႅင်းယူႇယဝ်ႈ
“ ပီႈၽူၺ်း ... ပီႈၽူၺ်း ...”
ၽူၺ်းၵေႃႈ ဝၢႆႇတူၺ်း မႃးလႆႈႁၼ်ပဵၼ် ၼွင်ႉယိင်းမၼ်းလႄႈ မၼ်းၸင်ႇဝႃႈ -
“ လႅင်း ... ၵမ်ႉလူး ...”
ၸၢႆးၼွင်ႉၵေႃႈ ၵိုတ်းၵႃးဝႆႉ ႁိမ်းၽင်ႇတၢင်းသေ လွမ်တူၺ်းၽူၺ်း ဢၼ်ပႆမႃးၸူး ၵႃးၶဝ်ၼၼ်ႉယူႇ၊ ၽူၺ်းမႃးႁၼ်ပႃးၸၢႆးၼွင်ႉသေ -
“ ဢေႃႈ ... ၸၢႆးၼွင်ႉ မႃးသူင်ႇလႅင်းႁႃႉ ... ? ”
“ ၸႂ်ႈဢိူဝ်ႈ ... ၽူၺ်း ... လႅင်းဝႃႈ ၶႂ်ႈမႃးတူၺ်းၸၼ်ႉၸွမ်ၽူၺ်းၶဝ်ၼႆလႄႈ ၸင်ႇမႃးသူင်ႇပၼ်မၼ်းယဝ်ႈ ... ၽူၺ်းၶဝ်လူင်းႁဵၼ်းယဝ်ႉႁႃႉ ... ? ”
“ ပႆႇလူင် ၸၢႆးၼွင်ႉ ... ႁဵတ်းသင် ... ? ”
“ ဢေႃႈ... ပေႃးလူင်းႁဵၼ်းယဝ်ႉၼႆ မိူဝ်းၸွမ်းၵမ်းလဵဝ်ၵေႃႈလႆႈယူႇ ၼႆၵႂႃႈ ... ”
“ ၸၢႆးၼွင်ႉၶဝ် ဢၢင်ႈၵႂႃႇလႂ် ... ထႅင်ႈ... ”
“ ဢမ်ႇႁူႉလႅင်းယဝ်ႈ ... မၼ်းၶႂ်ႈၵႂႃႇလႂ်ၼႆၵေႃႈ လူဝ်ႇၵႂႃႇၸွမ်းသူင်ႇမၼ်းၵူၺ်းယဝ်ႈ ... ”
“ လႅင်း ... လႅင်းတေၶႂ်ႈၵႂႃႇလႂ်ထႅင်ႈ ... ”
“ ပီႈၽူၺ်း ... လႅင်းၶႂ်ႈၵႂႃႇၶီႇၶူဝ်လႆလိူၼ်ႈ ... မႃးၸွမ်းလႅင်းၶဝ်လႄႈ ပီႈၽူၺ်း ... ”
“ ပီႈၽူၺ်း ... လူဝ်ႇၶိုၼ်ႈႁဵၼ်းၵွၼ်ႇဢိူဝ်ႈၼႃ ... လႅင်း ... ဢမ်ႇပဵၼ်ယူဝ်ႉ ... ”
လႅင်းၶႂ်ႈႁဵတ်းၸႃႉတေႃႇၽူၺ်းသေ-
“ ဢႃ ... ပီႈၽူၺ်းၶိုၼ်းၵႃးလႄႈ ...”
“ လီယဝ်ႈ ...ပေႃးၽႅဝ်တီႈၽြႃးၼႆ ယႃႇပေၶႂ်ႈသိုဝ်ႉတၢင်းလဵၼ်ႈၼႃႈ ... ပေႃးသိုဝ်ႉၼႆတႄႉ ... ပီႈၽူၺ်း ဢမ်ႇၸွမ်းၵူၺ်း ... ”
“ လႅင်းဢမ်ႇသိုဝ်ႉၶႃႈ ပီႈၽူၺ်း... မႃးၶိုၼ်ႈၵႃးလႄႈ ... ”
ယွၼ်ႉပိူဝ်ႈ လႅင်း ၽုၺ်ႇၽၵ်းတူပၼ်မၼ်းလႄႈ ၽူၺ်းၵေႃႈ ဢဝ်လႅင်းၼင်ႈၼိူဝ်တၵ်းမၼ်းသေ ၶိုၼ်ႈၼင်ႈႁိမ်းၸၢႆးၼွင်ႉယဝ်ႈ ၊ သႅဝ်ၼမ်ႉႁွမ်ဢွၼ်ႇၽူၺ်းတႄႉ မႃးမိုတ်ႈသုမ်ႇ ၽိုတ်ႉၶဝ်ႈ ၼႂ်းၶူႈၼင်ၸၢႆးၼွင်ႉယူႇ၊ ၽွင်းၼၼ်ႉ လုင်းသၢင်ႇတုၺ်ႉၵေႃႈ မႃးႁပ်ႉၸၢႆးၸၢႆးသေ ဢၢင်ႈတေမိူဝ်း လႄႈ ၸၢႆးၸၢႆးႁၼ်ၸၢႆးၼွင်ႉသေ ၸင်ႇႁွင်ႉထၢမ်ဝႃႈ -
“ ႁိူၺ်ႉ ... ! ဢၢႆႈၼွင်ႉ ... မႂ်းပႆႇမိူဝ်းႁႃႉ ... ? ”
“ ၶမ်ႈၸူင်ႈမႃး ၶႃႈၸင်ႇတေမႃးမိူဝ်းဢေႃႈ ... ”
လုင်းသၢင်ႇတုၺ်ႉ ႁေႃႈၵႃးၵႂႃႇယဝ်ႉလႄႈ ၸၢႆးၼွင်ႉၵေႃႈ ႁေႃႈၵႃးမၼ်းၵႂႃႇၼင်ႇၵဝ်ႇယဝ်ႈ၊ ၼႂ်းၸႂ်ၸၢႆးၸၢႆးတႄႉ မၼ်းဢမ်ႇႁၢၼ်ႉၸႂ်မၼ်း ၵွပ်ႈပိူဝ်ႈၸၢႆးၼွင်ႉလႄႈ ၽူၺ်းၶဝ်မိုတ်ႈၵၼ်ၼၼ်ႉ။
ၸၢႆးၼွင်ႉၵေႃႈ ႁေႃႈၵႃးမႃးၸွမ်းသဵၼ်ႈတၢင်းဢူးဝိၸႃႇရသေ မႃးၸူး တိၼ်ၵုင်းၽၢႆႇတူၵ်းၵွင်းမူးယူႇ၊ ၽူၺ်းၸင်ႇထၢမ်ဝႃႈ -
“ ၸၢႆးၼွင်ႉ ...တေမိူဝ်းၶိုၼ်းမိူဝ်ႈၼႆႉယဝ်ႈႁႃႉ...? ၸၢႆးၼွင်ႉ”
“ ၸႂ်ႈဢိူဝ်ႈ ... ၽူၺ်း ... လႅင်းၵေႃႈ ယူႇလီယဝ်ႈလူး... ”
“ ၸၢႆးၼွင်ႉမႃးယူႇ တႃႇၵုင်ႈၼႆႉ ... ၵျေႃႇယူႇႁႃႉ ... ? ”
“ မၢၵ်ပွၵ်ႈၵေႃႈဢၢပ်ႈၵျေႃႇယူႇသေတႃႉ သမ်ႉဢမ်ႇၵျေႃႇလႆႈတႄႉတႄႉၵူၺ်း ... ၽူၺ်း ... ၼႂ်းၸႂ်တႄႉ ၶုၵ်းၸႂ်လႆႈမိူင်းတႆး တႃႇသေႇယဝ်ႈ ... ”
“ တီႈမိူင်းတႆး ... ယူဝ်ၶႄးမီး ၵေႃႉလီၶုၵ်းၸႂ်လႆႈယူဝ်ႉၼေႃ ?”
“ ဢမ်ႇမီးၵူၺ်း ... ၽူၺ်း ... ”
“ ပေႃးဢမ်ႇမီးၼႆ သမ်ႉၶုၵ်းၸႂ်လႆႈမိူင်းတႆးတႃႇသေႇယူႇ ႁဵတ်းသင်လႃႇ ... ? ႁိုဝ် ... ? ၸၢႆးၼွင်ႉ... ”
“ ၽူၺ်း ... မိူင်းတႆးၼႆႉ ယွၼ်ႉပိူဝ်ႈ ပဵၼ်တီႈၽင်ႁူၵ်ႈၽင်ႁႄႇႁဝ်းလႄႈ ၸင်ႇၶုၵ်းၸႂ်လႆႈဢိူဝ်ႈ ... တေလႆႈလိုမ်းပႅတ်ႈႁႃႉ ? ၽူၺ်း ”
“ ၽူၺ်း ဢမ်ႇၸႂ်ႉလိုမ်းၼင်ႇၵဝ်ႇ ... ဝၢႆးၼႆႉ ၸၢႆးၼွင်ႉ တေၶိုၼ်းမိူဝ်းမိူင်းတႆးယူႇႁႃႉ ... ? ”
ၸၢႆးၼွင်ႉ ထူၺ်ႈၸႂ်လူင်ၵမ်းၼိုင်ႈသေ -
“ ၽူၺ်း ၸၢႆးၼွင်ႉၶဝ် ပဵၼ်ၶႅၵ်ႇၵူၺ်းလူး ... ပေႃးၶၢဝ်းမၼ်း ထိုင်မႃးၼႆ တေလႆႈၶိုၼ်းမိူဝ်းယူႇဢိူဝ်ႈ ... ”
ၶေႃႈၵႂၢမ်းဢၼ်ဝႃႈ ၶႅၵ်ႇ ၼႆၼၼ်ႉတႄႉ ပဵၼ်ၶေႃႈဢၼ်တုမ်ႉၸႂ် ၽူၺ်းၵႂႃႇမဵဝ်းၼိုင်ႈယူႇ ၽူၺ်းၸင်ႇၶိုၼ်းထၢမ်ဝႃႈ -
“ ၸၢႆးၼွင်ႉ ... တေၶိုၼ်းမိူဝ်း မိူဝ်ႈလႂ် ... ? ”
“ ပေႃးယိူင်းဢၢၼ်း တဵမ်ထူၼ်ႈမိူဝ်ႈလႂ်ၵေႃႈ တေၶိုၼ်းမိူဝ်းမိူဝ်ႈၼၼ်ႉယူႇၼႆယဝ်ႈ ၽူၺ်း...ယိူင်းဢၢၼ်းတႄႉ မီးပိူင်လဵဝ်ၵူၺ်းၼင်ႇၵဝ်ႇ”
“ ၼင်ႇႁိုဝ် ယိူင်းဢၢၼ်းၸၢႆးၼွင်ႉ တေတဵမ်ထူၼ်ႈၼၼ်ႉ ၽူၺ်းၶဝ် ယွၼ်းၸွႆႈထႅမ်ပၼ်ၽွင်ႈ ဢမ်ႇလႆႈႁႃႉ ... ? ”
“ ၶႂ်ႈႁႂ်ႈယိူင်းဢၢၼ်း ၸၢႆးၼွင်ႉတဵမ်ထူၼ်ႈသေ ၶႂ်ႈႁႂ်ႈၸၢႆးၼွင်ႉ မိူဝ်းၶိုၼ်းၽႂ်းၽႂ်းႁႃႉ ... ? ၽူၺ်း ... ”
“ ဢူဝ် ... ! ၸိူင်ႉၼၼ်ၵေႃႈ ဢမ်ႇၸႂ်ႈၼင်ႇၵဝ်ႇ... ၸၢႆးၼွင်ႉ ဢမ်ႇၶႂ်ႈႁပ်ႉၶၢမ်ႇ တၢင်းၸွႆႈထႅမ်ၽူၺ်းၶဝ်ႁႃႉ ... ? တေႃႈဝႃႈ ... ”
“ ယွၼ်ႇပိူဝ်ႈ ... ၽူၺ်းၶဝ် ၸွႆႈထႅမ်မႃးငဝ်ႈတေႃႇပၢႆလႄႈ ယိူင်းဢၢၼ်းၸၢႆးၼွင်ႉ ၸမ်တေထိုင်တီႈ ၼင်ႇၵဝ်ႇယဝ်ႈလူး ... ”
“ တႄႉႁႃႉ ... ? ၸၢႆးၼွင်ႉ ... ယိူင်းဢၢၼ်းၼၼ်ႉ ဢမ်ႇပၼ် ၽူၺ်းၶဝ်ႁူႉလႆႈႁႃႉ ... ပဵၼ်ယိူင်းဢၢၼ်းသင် ... ? ”
“ တီႈလဵဝ် ပႆႇၸၢင်ႈလၢတ်ႈသေတႃႉ ... ဝၢႆးၼႆႉ ... ၽူၺ်း တေလႆႈႁူႉယူႇၵႂႃႈ ... ”
ၸၢႆးၼွင်ႉႁေႃႈၵႃးမႃးၵိုတ်းဝႆႉ တီႈၽၢႆႇတူၵ်ႈၵွင်းမူးလူင်သေ ၶဝ်သၢမ်ၵေႃႉ ပႆမႃးၶီႇၶူဝ်လႆလိူၼ်ႈၶိုၼ်ႈ ၼိူဝ်ၵုင်းၽြႃးၸွမ်းၵၼ်ယဝ်ႈ ၊ လႅင်းတႄႉ ပဵၼ်ဢၼ်ႁၼ်ၵျေႃႇသိူဝ်းၸႂ်တႄႉတႄႉ ၊ ၶဝ်ပႆလဵပ်ႈၵွင်းမူးလူင်သေ ဢုပ်ႇၵၼ်မႃးယူႇ -
“ လႅင်း ... ၸွင်ႇတေၵႂႃႇလူႇၼမ်ႉ တမ်ႈတီႈၽြႃးထႅင်ႈႁိုဝ် ?”
လႅင်းငွၵ်းႁူဝ်ၼႄၸၢႆးၼွင်ႉ ၵမ်းၼိုင်ႈယူႇ၊ လႅင်းယူႇၼႂ်းၵၢင်ယိပ်း မိုဝ်းၸၢႆးၼွင်ႉလႄႈၽူၺ်း ၵေႃႉၶွၼ်ၶွၼ်သေ ပႆလဵပ်ႈၵွင်းမူးလူင်ယူႇ၊ ၵူၼ်းႁိမ်းႁွမ်းၸိူဝ်းၼၼ်ႉ ၵမ်ႈၽွင်ႈ လွမ်တူၺ်းၶဝ်ယူႇလႄႈ ၼႂ်းၸႂ်ၸၢႆးၼွင်ႉလႄႈ ၽူၺ်း ပဵၼ်ႁိုဝ်ဝႆႉၼႆၵေႃႈ ၶႃဢမ်ႇမေႃလၢတ်ႈယဝ်ႈ၊ လွင်ႈသိူဝ်းဢွၼ်ႇဢၼ်ၼိုင်ႈ ပဵၼ်မႃးဝႆႉ ႁင်းၽႂ်မၼ်းယူႇၼႆတႄႉ ၽႂ်ဢမ်ႇထဵင်လႆႈ။
ၽွင်းမိူဝ်ႈၸၢႆးၼွင်ႉလႄႈလႅင်း ၵႂႃႇလူႇၼမ်ႉသွၼ်းၽြႃးယူႇၼၼ်ႉ ၽူၺ်းၸုၵ်းသေ ပႂ်ႉလွမ်တူၺ်းဝႆႉယူႇ၊ တႆးၵေႃႉၽူၺ်းၵေႃႉၼိုင်ႈ ၽႅဝ်မႃးသေ
“ ႁိူၺ်ႉ ... ! ၽူၺ်း... ၵေႃႉလဵဝ်ၵူၺ်းႁႃႉ ... ?”
“ ဢေႃး ... ငိုၼ်းႁွမ်... ဢမ်ႇၸႂ်ႈ ... သၢမ်ၵေႃႉဢိူဝ်ႈ ... မႃးသူင်ႇလႅင်း ၶႂ်ႈမႃးသွၼ်းၼမ်ႉၽြႃး ၼႆဝႃႇ ... ”
ငိုၼ်းႁွမ် လွမ်တူၺ်း ၸၢႆးၼွင်ႉ ဢၼ်တိုၵ်ႉၵွၼ်ႉၼမ်ႉပၼ်လႅင်းယူႇၼၼ်ႉသေ မၼ်းၸင်ႇထၢမ်ဝႃႈ -
“ ႁေႉ ... ! ၽူၺ်း ... ဢၼ်ၵွၼ်ႉၼမ်ႉပၼ်လႅင်းယူႇၼၼ်ႉ ပဵၼ်ၽႂ် ... ပဵၼ်မၢဝ်ၽူၺ်းႁႃႉ ... ? လႅတ်းၵျႃႉၼေႃ ... ? သိုပ်ႇမိုတ်ႈပၼ်ႁဝ်းၽွင်ႈလေႃႇ ... ၼႃႈ ... ၽူၺ်း ... ”
ၽူၺ်းလီဢၢႆ ၼႃႈမႆႈၵႂႃႇသေ -
“ ဢူဝ် ... ! ငိုၼ်းႁွမ်ၼႆႉ ဝႃႈသင်ၵေႃႈဢမ်ႇႁူႉယဝ်ႈ ... ဢမ်ႇႁူႉငဝ်ႈႁူႉပၢႆသင်သေလႄႈ ... ”
“ ဢမ်ႇႁူႉၼႃး ...ယူဝ်ဝႃႈ ၽူၺ်းလႄႈမၢဝ်ႇၽူၺ်း မႃးယွၼ်းသူးႁူမ်ႈၵၼ် တီႈၽြႃးၼႆ ဢိူဝ်ႈ ... ”
“ ဢႃ ... ! ဢမ်ႇၸႂ်ႈၸိူင်ႉၼၼ် ... ”
“ ၽူၺ်းၶဝ်ပဵၼ် ပီႈၼွင်ႉၵၼ်ႁႃႉ ... ? ”
“ ဢမ်ႇၸႂ်ႈ ၼင်ႇၵဝ်ႇ ... ”
“ ပေႃးၼႆ ... ? ... ”
“ ဝၢႆးၼႆႉ ... ၽူၺ်းၸင်ႇတေၶႆႈၼႄလႆ ... လွင်ႈမၼ်းယၢဝ်းဝႆႇလႄႈဢိူဝ်ႈ ... ”
“ တေလႆႈၶႆႈၼႄတႄႉတႄႉၼႃႈ ... ငိုၼ်းႁွမ်တေၵႂႃႇၵွၼ်ႇ ”
ဝၢႆးသေ ငိုၼ်းႁွမ် ၽၢတ်ႇၶဝ်ၵႂႃႇယဝ်ႉ ၸၢႆးၼွင်ႉလႄႈလႅင်းၵေႃႈ ဝႆႈၽြႃးယဝ်ႉသေ ၶိုၼ်းမႃးၸူးၽူၺ်းယဝ်ႈ၊ ၸၢႆးၼွင်ႉၸင်ႇထၢမ် -
“ ၽူၺ်း ... မိူဝ်ႈၵႆႈၼၼ်ႉ ပဵၼ်တႆးၵေႃႉၽူၺ်းႁႃႉ ... ? ”
“ ၸႂ်ႈဢိူဝ်ႈ ... ၸၢႆးၼွင်ႉ ... ၸိုဝ်ႈမၼ်းဝႃႈ ငိုၼ်းႁွမ်ၼႆဝႃႇ ၸၢႆးၼွင်ႉ ႁၼ်သေ ထုၵ်ႇၸႂ်လႆႈၸႂ်ၵႂႃႇယဝ်ႈယူဝ်ႉ ... ? ”
“ ဢႃ ... ! ၽူၺ်းၵေႃႈ လၢတ်ႈသင်ၵေႃႈဢမ်ႇႁူႉ ... ”
ၽူၺ်းတင်ႈၸႂ် ၶႂ်ႈယွၵ်ႇၸၢႆးၼွင်ႉလႄႈ မၼ်းၸင်ႇဝႃႈ -
“ ပေႃး ၸၢႆးၼွင်ႉ လႆႈၸႂ်ၼႆ ... ၽူၺ်းတေၵပ်ႈသိုပ်ႇပၼ်လႆ ”
“ ပေႃးလႃႈ ... ၽူၺ်း ... ”
“ တႄႉဢိူဝ်ႈ...ၸၢႆးၼွင်ႉ ...ငိုၼ်းႁွမ်ႁၢင်ႈလီယူႇ ဢမ်ႇၸႂ်ႈႁႃႉ”
“ ဢမ်ႇႁၢင်ႈလီတၢၼ်ႇၽူၺ်း သႄႈ ... ”
ၵႂၢမ်းၶေႃႈၼႆႉ ပဵၼ်ၵႂၢမ်းၼႂ်းၸႂ်ၸၢႆးၼွင်ႉၵူၺ်း ၊ မၼ်းဢမ်ႇႁတ်းလၢတ်ႈဢွၵ်ႇသူပ်း၊ ၵူၺ်းၵႃႈ ၽွင်ႈၼၼ်ႉ လႅင်းၸင်ႇဝႃႈ -
“ ဢိုဝ်း ... ! ပီႈငိုၼ်းႁွမ် ဢမ်ႇႁၢင်ႈလီတၢၼ်ႇပီႈၽူၺ်း ပီႈၽူၺ်းႁၢင်ႈလီသေ ပီႈငိုၼ်းႁွမ်ဢေႃႈ ... ”
ၸၢႆးၼွင်ႉၵေႃႈ ၸင်ႇၶိုၼ်းၵမ်ႉထႅမ်ၵႂၢမ်းလႅင်းသေ -
“ ဢၼ်လႅင်းဝႃႈၼၼ်ႉ ၸႂ်ႈတႄႉဢိူဝ်ႈ... ၽူၺ်း ... ”
ၼၢင်းယိင်းဢၼ်ဝႃႈၼႆႉ ပေႃးပိူၼ်ႈယွင်ႈဝႃႈ ၶဝ်ႁၢင်ႈလီၼႆ ၶဝ်ဢမ်ႇတွၼ်ႉၸႂ်လမ်သေပွၵ်ႈ၊ ၶဝ်ပဵၼ်ဢၼ်ႁၢၼ်ႉၸႂ်ထုၵ်ႇၸႂ်ၶဝ်ဝႆႉယူႇယဝ်ႈ၊ ၽူၺ်းၵေႃႈ ထုၵ်ႇၸႂ်မၼ်းသေ မၼ်းၸင်ႇယုမ်ႉသေဝႃႈ -
“ ၶိၵ်း ... ၶိၵ်း ... ပီႈၸၢႆးၼွင်ႉလႄႈလႅင်း ၶႂ်ႈၵိၼ်သင် ၽူၺ်းတေလဵင်ႉလႆ ... ”
“ ဢမ်ႇၶႂ်ႈၵိၼ်သင်ၼင်ႇၵဝ်ႇ ... ၽူၺ်း ... ”
“ လႅင်းတႄႉ ... ၶႂ်ႈၵိၼ် ၶဝ်ႈသွႆးၵျေးဢူဝ်း ... ”
“ လႅင်းၶႂ်ႈၵိၼ်တႄႉႁႃႉ ... ? ပေႃးၼႆၵေႃႈ ပေႃးႁဝ်းလူင်းမိူဝ်းၼႆ ၸင်ႇမိူဝ်းဝႄႉသိုဝ်ႉၵိၼ်ၼႃႈ ... ”
ဝၼ်းၼၼ်ႉ ၶဝ်ပွၵ်ႈမႃးဝႄႉၵိၼ်ၵျေးဢူဝ်းသေ ၸင်ႇၶိုၼ်းပွၵ်ႈမႃးႁိူၼ်းယဝ်ႈ၊ ၸၢႆးၼွင်ႉၵေႃႈ ၶိုၼ်းပွၵ်ႈမိူဝ်းႁိူၼ်းၸၢႆးၸၢႆးၶဝ် ဝၼ်းၼၼ်ႉၼင်ႇၵဝ်ႇယဝ်ႈ ။