ၶႅၵ်ႇ/တွၼ်ႈသၢဝ်းသွင်
တီႈၼႂ်းၸၼ်ႉၸွမ် ပၢႆးမေႃယႃ ၊ တီႈပႃႈၼႃႈႁွင်ႈႁဵၼ်းၶဝ်ၼၼ်ႉ ၸၢႆးၸၢႆး မႃးၺႃးၽူၺ်းသေ -
“ ၽူၺ်း ... ”
“ ဢေႃႈ ... ၸၢႆးၸၢႆး ... မီးလွင်ႈသင် ... ? ”
“ ဢမ်ႇမီးလွင်ႈသင်ၼင်ႇၵဝ်ႇ ... ”
ၶႃသွင်ၵေႃႉ ပႆမႃးၸွမ်းၵၼ်သေ ဢုပ်ႇၵၼ်မႃးယူႇ -
“ ၽူၺ်း ... ထႅင်ႈပီတေမႃး ႁႃးၵေႃႈတေယဝ်ႉၸၼ်ႉၸွမ်ယဝ်ႈ ၼေႃ... ? ”
“ လူဝ်ႇလႆႈၶတ်းၸႂ် ႁႂ်ႈၸဵဝ်းယဝ်ႉဢိူဝ်ႈ ... ၸၢႆးၸၢႆး ... ”
“ ပေႃးယဝ်ႉသေ ပဵၼ်မေႃယႃမႃးၼႆ ... ၽူၺ်း မီးတၢင်းဢဵၼ်းဢၢၼ်းဝႆႉၸိူင်ႉႁိုဝ် ... ? ”
“ ပေႃးပဵၼ်မေႃယႃမႃး ၼႆတႄႉ ... လူဝ်ႇလႆႈၵႂႃႇယူတ်းယႃပၼ် ၵူၼ်းမိူင်းဢိူဝ်ႈ ... ”
“ ၽူၺ်း ... တေဢၢၼ်ႈၶႂ်ႈၵႂႃႇ တီႈလႂ် ... ? ”
“ တူၵ်းပုၼ်ႈၽွၼ်းတီႈလႂ်ၵေႃႈ ... ၵႂႃႇတီႈၼၼ်ႈဢိူဝ်ႈ ... သင်ဝႃႈ လႆႈၵႂႃႇမိူင်းတႆးႁဝ်းတႄႉ ...ၶႅၼ်းလီယဝ်ႈ ... ၸၢႆးၸၢႆးလူး ... ဢမ်ႇၶႂ်ႈၵႂႃႇ မိူင်းတႆးႁႃႉ ... ? “
“ ဢႃး ... ! တေၵႂႃႇႁဵတ်းသင် ? ယူႇၼႂ်းဝဵင်းလူင်ၼႆႉသေ ၽုၺ်ႇၵိၼ်ႁွင်ႈယႃၵေႃႈ တဵမ်ထူၼ်ႈယဝ်ႈ ... လူး ... ”
ယွၼ်ႉပိူဝ်ႈ ယိူင်းဢၢၼ်းဢမ်ႇမိူၼ်ၵၼ်လႄႈ ၽူၺ်းၸင်ႇထူၺ်ႈၸႂ်လူင် ၵမ်းၼိုင်ႈသေ -
“ ဢိုဝ်း ... ! တေဝႃႈ တူဝ်ၽႂ်ႇၸႂ်မၼ်းၼႆသေတႃႉ ... သင်ဝႃႈ ၸၢႆးၸၢႆးမီးၸႂ် ၶႂ်ႈမိူဝ်းယူတ်းယႃပၼ် ၵူၼ်းဝၢၼ်ႈၼွၵ်ႈၼႃးပၢင်ႇၼႆတႄႉ တေလီဝႃႈလီယဝ်ႈ ... ”
ပေႃးလၢတ်ႈဝႃႈၸိူင်ႉၼႆ တိုၼ်းဢမ်ႇထုၵ်ႈၸႂ်ၸၢႆးၸၢႆး၊ မၼ်းၸၢႆးၼႆႉ ပဵၼ်ၵူၼ်းယၢမ်ႈယူႇၼႂ်းဝဵင်းယဝ်ႉလႄႈ၊ ဝၢၼ်ႈၼွၵ်ႈၼႃးပၢင်ႇၼၼ်ႉ မၼ်းဢမ်ႇၶဝ်ႈၸႂ်၊ ဢၼ်မၼ်းၶဝ်ႈၸႂ်တႄႉ ၶႂ်ႈပဵၼ်ၶူးမေႃယႃလူင်သေ ၶႂ်ႈၵႂႃႇၼွၵ်ႈမိူင်းၼၼ်ႉၵူၺ်း၊ ၵွပ်ႈၼႆမၼ်းၸင်ႇဝႃႈ -
“ ၽူၺ်း...ၶိူဝ်းဝၢၼ်ႈၼွၵ်ႈၼႃးပၢင်ႇ ဢၼ်ဝႃႈၼၼ်ႉ လူတူၺ်း ၼႂ်းလိၵ်ႈတႄႉ ယွၼ်ႉပိူဝ်ႈ ပိူၼ်ႈတႅမ်ႈပဵၼ်လႄႈ ဢၢပ်ႈငၢႆႈၸႂ်ယူႇသေတႃႉ ပေႃးၵႂႃႇယူႇတႄႉတႄႉၼႆ ယၢပ်ႇၸႂ်ၵူၺ်းယဝ်ႈ ... ”
“ ဝႆႉသေၵွၼ်ႇလႃႈ ... ပေႃးလၢတ်ႈလွင်ႈၼႆႉ ႁႃးသွင်ၵေႃႉ တေၽိတ်းၵၼ်ယဝ်ႈ ... မိူဝ်ႈလႂ်ပဵၼ်ၶူးမေႃယႃမႃး ၸင်ႇၵွႆႈလၢတ်ႈလႃႈ ... ၼေႃႈ ... ”
ၸၢႆးၸၢႆးၵေႃႉၼိုင်ႈ ဢမ်ႇၸၢင်ႈသိုပ်ႇလၢတ်ႈၵႂၢမ်းသင်လႄႈ မၼ်းၸင်ႇသိုပ်ႇ လွင်ႈတၢင်ႇဢၼ်ဝႃႈ -
“ ဢေႃႈ ... ၽူၺ်း ... ၵွပ်ႈသင် လႅင်းပႄႉမိုတ်ႈၸၢႆးၼွင်ႉ? ၶဝ်ယၢမ်ႈႁူႉၸၵ်းၵၼ်မႃးႁႃႉ ... ? ”
“လႅင်းလႄႈၸၢႆးၼွင်ႉ ၺႃးၵၼ်ၼိူဝ်လူတ်ႉရဵၼ်းသေ ၸၢႆးၼွင်ႉ သမ်ႉမေႃႁဵတ်းၵေႃႉလုၵ်ႈဢွၼ်ႇ မေႃၸွမ်းၸႂ်လုၵ်ႈဢွၼ်ႇလႄႈ လႅင်းၸင်ႇမိုတ်ႈမၼ်းၵႂႃႈ ... ပေႃးၸၢႆးၸၢႆး ၶႂ်ႈႁႂ်ႈလုၵ်ႈဢွၼ်ႇမိုတ်ႈၼႆ ... ၸၢႆးၸၢႆးၵေႃႈ ယိူင်ႈၸၢႆးၼွင်ႉလေႃႇ ... ”
ယွၼ်ႉပိူဝ်ႈ ၽူၺ်းၸႂ်ႉမၼ်းယိူင်ႈၸၢႆးၼွင်ႉ ၸၢႆးၸၢႆးဢမ်ႇႁၢၼ်ႉၸႂ်သေ -
+ + + + + + + + “ ဢႃ ... ! ပေႃးလႃႈ ... တင်းဢၢႆႈၼႆႉႁေ ၵဝ်ဢမ်ႇပေႃးမႅၼ်ႈၽီၵၼ် ... ”
“ မၼ်းဢမ်ႇမႅၼ်ႈ ၸၢႆးၸၢႆးႁႃႉ ... ? ၸၢႆးၸၢႆး ဢမ်ႇမႅၼ်ႈမၼ်းႁႃႉ ... ? မၼ်းတႄႉ မႅၼ်ႈၸၢႆးၸၢႆးယူႇၵႂႃႈ ...”
“ ၵဝ် တိုၼ်းဢမ်ႇထုၵ်ႇတႃဢိူဝ်ႈ ... ”
“ ၵွပ်ႈသင်လႃႇ ... ? ၸၢႆးၸၢႆး ... ”
“ ၵွပ်ႈပိူဝ်ႈ မၼ်းဢဝ်တဝ်ႈမွၵ်ႇၵဝ်လႅဝ်သေ ... ပႆႇၶိုၼ်ႈတႅၼ်းၼၼ်ႉယဝ်ႉ ... ”
“ ဢဝ်လႅဝ်မိူဝ်ႈလႂ် ... ? ၸၢႆးၸၢႆး ”
“ မိူဝ်ႈၼႃႈ ... မၼ်းၸမ်တေမႃးယူႇၸွမ်းႁဝ်းၼၼ်ႉ ... ႁႃး ၽႃႇၺႃးၵၼ်တီႈလၢၼ်ႉၶၢႆသေ ...ၸူးဢဝ်တဝ်ႈမွၵ်ႇၵဝ်လႅဝ်ၵႂႃႇဢိူဝ်ႈ ”
“ တဝ်ႈမွၵ်ႇၸိူင်ႉႁိုဝ် ? ၸၢႆးၸၢႆး ... ”
“ တဝ်ႈမွၵ်ႇမိူင်းၶႄႇ ဢိူဝ်ႈ ... သီမဵဝ်းၼၼ်ႉ မၼ်းဢမ်ႇမီးထႅင်ႈလႄႈ လီသေလၢႆၵျႃႉ ... ၵွပ်ႈၼႆ ဝၼ်းၼၼ်ႉ ၵဝ်ၸႂ်လမ်ၼႃႇသေ ယင်းဢဝ်တႃမိုဝ်းထုပ်ႉပၼ်တႃမၼ်းၵွၼ်ႇဢိူဝ်ႈ ... ”
လႆႈငိၼ်းၼင်ႇၼၼ်သေ ၽူၺ်းၶိုၼ်းၵႂႃႇဝူၼ်ႉႁၼ်ထိုင်ၶိုၼ်း မိူဝ်ႈဢၼ်တႃၸၢႆးၼွင်ႉ မၢၼ်ႉၵမ်ႇၼၼ်ႉသေ မၼ်းလႅၼ်လၢတ်ႈဝႃႈ ပလၢတ်ႈသေ လူမ်ႉတိူဝ်ႉၺႃးဢိူဝ်ႈ ၼႆၼၼ်ႉယူႇ ။
“ တဝ်ႈမွၵ်ႇလႄႈမွၵ်ႇၼၼ်ႉ ၸၢႆးၸၢႆးဢၢင်ႈတွၼ်ႈပၼ် ၽူၺ်းၼင်ႇၵဝ်ႇယဝ်ႈ ... ”
ၸၢႆးၸၢႆး သိုပ်ႇလၢတ်ႈၼင်ႇၼၼ်သေတႃႉ ၽူၺ်း ဢမ်ႇၶဝ်ႈၸႂ်ယဝ်ႈ မၼ်းၵႂႃႇဝူၼ်ႉႁၼ်မႅၼ်ႈ ၶွပ်ႇတႃၸၢႆးၼွင်ႉၼၼ်ႉသေ ငဝ်မိုင်ဝႆႉယူႇ၊ ၸၢႆးၸၢႆးၸင်ႇထၢင်ႇဝႃႈ ၽူၺ်းၸႂ်ဢမ်ႇလီၸွမ်း ၵွပ်ႈတဝ်ႈမွၵ်ႇ ၼႆလႄႈ -
“ ၽူၺ်း ... လႅဝ်ၵေႃႈယဝ်ႉၵႂႃႈ ... ဝၢႆးၼႆႉ ပေႃးႁၼ်ပိူၼ်ႈမႃးၶၢႆထႅင်ႈၼႆ ၸၢႆးၸၢႆးၸင်ႇၵွႆႈသိုဝ်ႉပၼ်လႆ... ”
“ ဢမ်ႇသိုဝ်ႉၵေႃႈယဝ်ႉ ၸၢႆးၸၢႆး ... ”
“ ၵွပ်ႈၼႆလႄႈ ဢၢႆႈၼွင်ႉၼႆႉ ဢမ်ႇထုၵ်ႇတႃ ၸဵမ်မိူဝ်ႈၼၼ်ႉယဝ်ႈ ... ယူႇတီႈႁိူၼ်းၼႆၵေႃႈ ၸၢႆးၸၢႆး တိုၼ်းဢမ်ႇပေႃးတိတ်းတေႃႇမၼ်း ၽူၺ်းၶဝ်ၵေႃႈ ယႃႇပေတိတ်ႈတေႃႇမၼ်းၼႃႈ ... ”
“ ပေႃးတိတ်ႈတေႃႇၼႆ ပဵၼ်သင်လႃႇ ...”
“ ၸၢႆးၸၢႆး ဢမ်ႇၶႂ်ႈႁႂ်ႈတိတ်းတေႃႇၵူၺ်း ...ၽူၺ်း ...”
“ ၸၢင်ႈပဵၼ်သင် ... ? ႁဝ်းပဵၼ်တႆးၼင်ႇၵၼ် လူဝ်ႇဝႆႉၸႂ်ပီႈၸႂ်ၼွင်ႉၵၼ်သေ ယင်းလူဝ်ႇလႆႈ ၸွႆႈထႅမ်ၵၼ်ၵွၼ်ႇဢိူဝ်ႈ ... တီႈတႄႉမၼ်း ၸၢႆးၼွင်ႉၼႆႉ ပဵၼ်ၵူၼ်းသိုဝ်ႈယူဝ်း မီးၸႂ်လီၵေႃႉၼိုင်ႈယူႇ လူး...”
“ လူဝ်ႇလႆႈဝႆႉၸႂ်ပီႈၸႂ်ၼွင်ႉ ၼႆႁႃႉ ၽူၺ်း ... ”
“ၸႂ်ႈဢိူဝ်ႈ ...”
“ ႁႃး ... ႁႃး ... ႁႃး ... ဢၢႆႈၼွင်ႉၼႆႉ ပဵၼ်ၵူၼ်း ဢမ်ႇမီးဢူႈမႄႈပီႈၼွင်ႉၵေႃႉၼိုင်ႈလူး ... လူဝ်ႇလႆႈပွင်ႇၸႂ်သင် ... ? ဢမ်ႇဝႆႉလႆႈ သင်ပဵၼ်လႆႈ တမ်ႉဢမ်ႇၶႂ်ႈဝႆႉ တီႈႁိူၼ်းၵွၼ်ႇဢိူဝ်ႈ ...”
“ ၵွပ်ႈသင် ... သမ်ႉဝႆႉ ဝႆႉ လႃႇ ? ”
“ တႅတ်ႇတီႇ ႁွင်ႉဝႆႉလႄႈ ဝႆႉၵူၺ်းဢိူဝ်ႈ ... ၽူၺ်း ... မႃႇမီႇၵေႃႈ ဢမ်ႇလႆႈၸႂ်ၵူၺ်း ... ”
“ ၸၢႆးၼွင်ႉ မေႃၽုၵ်ႇသူၼ်ၶႅမ်ႉယူႇ ဢမ်ႇၸႂ်ႈႁႃႉ ... ? ၸူဝ်ႈမၼ်း မႃးယူႇႁိူၼ်းၸၢႆးၸၢႆးၶဝ်ၼႆႉ သူၼ်မွၵ်ႇၸၢႆးၸၢႆးၶဝ် မွၵ်ႇဢွၼ်ႇၵီႈၶွင်ႇႁၢင်ႈလီ လိူဝ်မႃးတႄႉတႄႉယဝ်ႈ ဢမ်ႇၸႂ်ႈႁႃႉ ... ၵူၼ်းမေႃလုမ်းလႃးသူၼ်မွၵ်ႇၸိူင်ႉမၼ်းၼၼ်ႉ ၼၢၼ်းမီးဢိူဝ်ႈ ၸၢႆးၸၢႆး ... ”
ၽူၺ်း လၢတ်ႈၵႂၢမ်းၶေႃႈလႂ်ၵေႃႈ ပဵၼ်ၶေႃႈဢၼ်ယွင်ႈၸၢႆးၼွင်ႉၵူႈၶေႃႈလႄႈ ၸၢႆးၸၢႆး ဢမ်ႇထုၵ်ႇၸႂ်လႃးလႃးသေ မၼ်းၸင်ႇဝႃႈ -
“ ပေႃးႁႅင်ႉ မေႃယွင်ႈမၼ်းတၢၼ်ႇၼၼ်ႉၵေႃႈ လူဝ်ႇၸႂ်ႉမၼ်း မိူဝ်းႁဵတ်းၸဝ်ႈသူၼ် တီႈႁိူၼ်းၽူၺ်းၶဝ် ၵူၺ်းယဝ်ႈ ... ”
ၽူၺ်းၵေႃႈ လၢမ်းႁူႉႁၼ်ၸႂ်ၸၢႆးၸၢႆး ဢမ်ႇႁၼ်လီ ၼိူဝ်ၸၢႆးၼွင်ႉၼႆလႄႈ မၼ်းၸင်ႇၶိုၼ်း တင်ႈၸႂ်တွပ်ႇဝႃႈ -
“ ၽူၺ်းတႄႉ ... ပဵၼ်ၵူၼ်းႁၵ်ႉမွၵ်ႇၵေႃႉၼိုင်ႈလႄႈ ... ပေႃးတီႈႁိူၼ်းၽူၺ်းၶဝ် မီးၸဝ်ႈသူၼ် ၸိူင်ႉၼင်ႇၸၢႆးၼွင်ႉၼႆ ၶႅၼ်းသၢင်ႇထုၵ်ႇဢိူဝ်ႈ ... ... ”
“ ၽူၺ်း ... ႁၵ်ႉမွၵ်ႇၵူၺ်းႁႃႉ ... ? ”
“ လွမ်ႁၵ်ႉပႃး ... ၸဝ်ႈသူၼ်မွၵ်ႇၵွၼ်ႇ ဢိူဝ်ႈ ... ”
ၵႂၢမ်းၶေႃႈၼႆႉတႄႉ မိူၼ်ပၢႆႁွၵ်ႇလႅမ်လႅမ် တႅင်းၸူၵ်ႉမႅၼ်ႈသႂ်ႇ ၸႂ်ၸၢႆးၸၢႆးၼၼ်ႉယဝ်ႈ -
“ ၽူၺ်း ... ဝႃႈတႄႉႁႃႉ ? ၼႆႉ ... ”
“ ဝႃႈတႄႉ ဢိူဝ်ႈ ... ”
ၸၢႆးၸၢႆး ထူၺ်ႈၸႂ်လူင်ၵမ်းၼိုင်ႈသေ မၼ်းဢမ်ႇၸၢင်ႈသိုပ်ႇၵႂၢမ်းသင်ယဝ်ႈ -
“ ႁိုဝ်ႉ ... ! ... ”
ၽူၺ်း လႆႈႁၼ်ၸၢႆးၸၢႆး ဢၢပ်ႈၶၢမ်ႈယၢပ်ႇတႄႉတႄႉလႄႈ မၼ်းၸင်ႇၶိုၼ်းဝႃႈ -
“ ၸၢႆးၸၢႆး ... ၽူၺ်း လႃႈလီႈဝႃႈၵူၺ်း ... တီႈတႄႉမၼ်း တႃႇလုမ်းလႃးသူၼ်မွၵ်ႇ ပီႈၸၢႆးသႅင်မီးဝႆႉယူႇလူး ... ”
ၸၢႆးၸၢႆး လႆႈငိၼ်းၼင်ႇၼၼ်သေ လူမ်ၸႂ်ၵႂႃႇဢိတ်းၼိုင်ႈယူႇ ၽူၺ်း ၸင်ႇၶိုၼ်းသိုပ်ႇဝႃႈ -
“ ၸၢႆးၸၢႆး သမ်ႉၶႂ်ႈႁႂ်ႈၸၢႆးၼွင်ႉ မႃးႁဵတ်းၸဝ်ႈသူၼ်မွၵ်ႇ တီႈၽူၺ်း ၶဝ်ယူႇႁႃႉ ? ”
“ ဢႃ ... ! ႁိုဝ်တေၵႂႃႇပဵၼ် ... ၵမ်ႉမႃး ၽူၺ်းလႄႈမၼ်း ၶႅၼ်းၸမ်ၵၼ်ၵႂႃႇဢိူဝ်ႈ ... ”
ၸၢႆးၸၢႆးၼႆႉ မၼ်းတိုၼ်းလွမ်ႁၵ်ႉၽူၺ်း ၵေႃႉလဵဝ်ၵူၺ်းလႄႈ လိူဝ်သေၽူၺ်း မၼ်းဢမ်ႇၶဝ်ႈၸႂ် ၼိူဝ်ၼၢင်းယိင်းၵေႃႉလႂ် -
“ ပေႃး ၸမ်ၵၼ် ၸၢင်ႈပဵၼ်သင် ... ? ”
“ ၸၢင်ႈၵွင်ႉၵၼ်ဢိူဝ်ႈ ... တီႈႁိမ်းၽူၺ်းၼၼ်ႉ ၸၢႆးၸၢႆး ဢမ်ႇၶႂ်ႈႁႂ်ႈၽႂ်ၸမ်လႃးလႃး ... ”
“ ယႃႇပေသိုပ်ႇလၢတ်ႈယဝ်ႈ ... ၸၢႆးၸၢႆး ... ပေႃးသိုပ်ႇလၢတ်ႈၼႆ ၽူၺ်းတေပၢႆႈပႅတ်ႈယဝ်ႈ ... ၽူၺ်းလၢတ်ႈယူႇ ဢမ်ႇၸႂ်ႈႁႃႉ ပေႃးမိုတ်ႈၽူၺ်းၼႆ ယႃႇပေသိုပ်ႇၵႂၢမ်းၸိူင်ႉၼႆ ... ၽွင်းတိုၵ်ႉႁဵၼ်းလိၵ်ႈယူႇၼႆႉ ၽူၺ်းဝူၼ်ႉ လွင်ႈလိၵ်ႈမဵဝ်းလဵဝ်ၵူၺ်း ... ဢိူဝ်ႈ ... ”
ၸၢႆးၸၢႆး ဢမ်ႇၸၢင်ႈသိုပ်ႇၵႂၢမ်းသင်သေ ငဝ်မိုင်ၵမ်းၼိုင်ႈယူႇ မၼ်းၸင်ၶိုၼ်းဝႃႈ -
“ ပေႃးယဝ်ႉၸၼ်ႉၸွမ်ၼႆတႄႉ ၽူၺ်းတေဝူၼ်ႉယူႇႁႃႉ ... ”
“ မိူဝ်ႈလႂ်ယဝ်ႉမႃးၵွၼ်ႇ ... ၸင်ႇၵွႆႈလၢတ်ႈယဝ်ႈ ၼႃႈ ... ”
+ + + + + + +
ဝၼ်းၼၼ်ႉ လုင်ႈသၢင်ႇတုၺ်ႉ ဢမ်ႇပေႃးယူႇလီလႄႈ ၸၢႆးၼွင်ႉ လႆႈႁေႃႈၵႃးသေ မႃးႁပ်ႉၸၢႆးၸၢႆးယဝ်ႈ၊ ၽူၺ်းလႄႈဢူၺ်းၵေႃႉမၼ်း ၵမ်ႈၽွင်ႈၵေႃႈ ဢၢင်ႈမႃးမိူဝ်းႁိူၼ်းသေ ပႂ်ႉၵႃးဝႆႉယူႇ၊ ၸၢႆးၸၢႆးလႆႈႁၼ် ၸၢႆးၼွင်ႉ ႁေႃႈၵႃးမႃးလႄႈ မၼ်းၸင်ႇထၢမ် -
“ လုင်းသၢင်ႇတုၺ်ႉ လူး ... ? ”
“ မၼ်း ဢမ်ႇပေႃးယူႇလီလႄႈ ၸႂ်ႉၶႃႈ မႃးႁပ်ႉပီႈၸၢႆးဢေႃႈ ”
ၸၢႆးၸၢႆး ထူၺ်ႈၸႂ်လူင်ၵမ်းၼိုင်ႈသေ -
“ လူင်းၵႃးလႄႈ ... ၵဝ်တေႁေႃႈလႆ ... ”
ၸၢႆးၼွင်ႉၵေႃႈ လူင်းၵႃး ၶၢႆႉတီႈပၼ် ၸၢႆးၸၢႆးယူႇယဝ်ႉ ။
မိူဝ်ႈၸဝ်ႉၸဝ်ႉၼၼ်ႉ ၽူၺ်းၵႂႃႇသိုပ်ႇၽူၼ်းထၢမ်တူၺ်းၵႃး တီႈႁိူၼ်းၼႆ ၵႃးၶဝ် လႅဝ်သေ တိုၵ်ႉလႆႈၵႂႃႇမႄးဝႆႉ ၼႆလႄႈ မၼ်းလႄႈတႆးၵေႃႉမၼ်းသီႇၵေႃႉ ဢၢင်ႈၵႂႃႇ ၼႂ်းဝဵင်းၵေႃႈ ပဵၼ်ဢၼ်ယၢပ်ႇၸႂ်လူၺ်ႈၵႃးယူႇ၊ ၵွပ်ႈၼႆ ၽူၺ်းလႆႈႁၼ်ၸၢႆးၼွင်ႉလႄႈ မၼ်းၸင်ၼႅတ်ႈမႃးတီႈၵႃးသေ -
“ ဢေႃႈ ... မိူဝ်ႈၼႆႉ ၸၢႆးၼွင်ႉ ႁေႃႈၵႃးမႃးႁႃႉ ... ? ”
“ ၸႂ်ႈဢိူဝ်ႈ ... ၽူၺ်း ... ”
ယွၼ်ႉပိူဝ်ႈ ပဵၼ်ၽၢႆႇၼႃႈၸၢႆးၸၢႆးလႄႈ ၸၢႆးၼွင်ႉဢမ်ႇပေႃးႁတ်းလၢတ်ႈတေႃႇ ၽူၺ်း ။ ၽူၺ်းၸင်ႇလွမ်တူၺ်း ၸၢႆးၸၢႆးသေ ယွၼ်းတၢင်းၸွႆႈထႅမ်ယဝ်ႈ
“ ဢေႃႈ ... ၸၢႆးၸၢႆး ... ၽူၺ်းလႄႈ တႆးၵေႃႉၽူၺ်းၶဝ် ၶႂ်ႈၵႂႃႇၼႂ်းဝဵင်း ဢၢင်ႈၵႂႃႇဢဝ်သိူဝ်ႈ ဢၼ်ပၼ်ယဵပ်ႉဝႆႉၼၼ်ႉလႄႈ ၶႂ်ႈၵႂႃႇဝႆႈၽြႃးပူဝ်ႇတထွင်ႇဢိူဝ်ႈ ... ၸွင်ႇတေတၼ်းၵႂႃႇသူင်ႇ ၽူၺ်းၶဝ်ႁိုဝ် ? ”
ၵႃႈၵွၼ်ႇဢွၼ်တၢင်းၵေႃႈ ယၢမ်ႈပၼ်တၢင်းၸွႆႈထႅမ်ၵၼ်မႃးယူႇ လႄႈၸၢႆးၸၢႆးၸင်ႇဝႃႈ -
“ တၼ်းယူႇ ၽူၺ်း ... ၶိုၼ်ႈၵႃးလႄႈ ...”
“ ၽူၺ်းၵေႃႈ ၸူမ်းၵႂႃႇသေ ၸင်ႇႁွင်ႉတႆးၵေႃႉမၼ်းသီႇၵေႃႉ ၶိုၼ်ႈၵႃးယူႇယဝ်ႈ ၊ ၶဝ်ၼၢင်းသီႇၵေႃႉ ၶိုၼ်ႈၼင်ႈ ၽၢႆႇလင်တဵမ်ပႅတ်ႈယဝ်ႉလႄႈ တီႈယူႇၽူၺ်းတႄႉ ၵိုတ်းဝႆႉ ၽၢႆႇၼႃႈ တီႈႁိမ်းၵူၼ်းႁေႃႈၵႃးၼၼ်ႉၵူၺ်း၊ ၽူၺ်းၸင်ႇဝူၼ်ႉတူၺ်း ... ၸၢႆးၼွင်ႉ တေလႆႈၼင်ႈတီႈလႂ် ... ? ၼႆယူႇ ၊ ၸၢႆးၸၢႆး ၸင်ႇဝႃႈ -
“ ၶဝ်ႈမႃးၼင်ႈလႄႈ ... ၽူၺ်း ... ”
ၽူၺ်းၸင်ႇလွမ်တူၺ်း ၸၢႆးၼွင်ႉ ဢၼ်ၸုၵ်းယူႇ ႁိမ်းၽင်ႇတၢင်းၼၼ်ႉသေထၢမ် -
“ ၸၢႆးၼွင်ႉသမ်ႉ တေၶီႇတီႈလႂ်လႃႇ ... ? ၸၢႆးၸၢႆး ...”
ၸၢႆးၸၢႆး ၸင်ႇဝႃႈ -
“ ဢၢႆႈၼွင်ႉ မႂ်ႉပႂ်ႉၶီႇရူတ်ႉသၢႆမိူဝ်းဢဝ်လႃႈ ...ပေႃးၽႅဝ်ႁိူၼ်းၼႆ မွၵ်ႇလၢတ်ႈပၼ် တီႈႁိူၼ်းသေၼႃႈ ... ”
“ ဢေႃႈ ... ဢေႃႈ ... ”
ၽူၺ်း ၶိုၼ်ႈၼင်ႈၼိူဝ်ၵႃးသေ -
“ တႃႉလီ ၵဵင်ၸႂ်ၸၢႆးၼွင်ႉလႃႈ ... ”
“ လႆႈယူႇၵူၺ်း ၽူၺ်း ... ”
ၸၢႆးၸၢႆးႁေႃႈၵႃးသေ ဢွၵ်ႇၵႂႃႇယဝ်ႈ၊ ၽွင်းမိူဝ်ႈၸၢႆးၼွင်ႉ လုၵ်ႉတီႈႁိူၼ်း ဢွၵ်ႇမႃးၼၼ်ႉ မၼ်းၼႅတ်ႈလႄႈ ငိုၼ်းၼႂ်းထူင်ၼႂ်းထွင်းမၼ်း ဢမ်ႇၸပ်းမႃးသေပႅၵ်ႉ ... မၼ်းၸူၵ်းတူၺ်းထွင်းမၼ်းၵေႃႈ ဢမ်ႇမီးသင်၊ ၵွပ်ႈၼႆ တႃႇတေၶီႇၵႃးရူတ်ႉသၢႆၼၼ်ႉ ဢမ်ႇပဵၼ်လႆႈယဝ်ႉလႄႈ မၼ်းၸၢႆး လႆႈပႆတိၼ်ႈမႃးမိူဝ်းယဝ်ႈ ။
ၸၢႆးၸၢႆးတႄႉ ၵႂႃႇၸွမ်းသူင်ႇၽူၺ်းၶဝ်ယဝ်ႉသေ ၸင်ႇတေၽႅဝ်မႃးႁိူၼ်းယဝ်ႈ၊ ပေႃးမၼ်းၽႅဝ်မႃးႁိူၼ်းၼႆ မႄႈၶဝ်ၸင်ႇထၢမ် -
“ လုၵ်ႈၸၢႆး ဢၢႆႈၼၼ်ႉၵႂႃႇလႂ်လႃႇၼႆႉ ... ? ”
“ မၼ်း ပႆႇၽႅဝ်ႁိူၼ်းၶႃႈႁႃႉ ... ? မႃႇမီႇ ... ”
“ ပႆႇၽႅဝ် ... ”
“ ဢိုဝ်ႈ ... ! ၶႃႈဝႃႈ ၶႃႈတေၵႂႃႇသူင်ႇၽူၺ်းၶဝ် ၼႂ်းဝဵင်းၼႆသေ ၸႂ်ႉမၼ်းၶီရူတ်ႉသၢႆ မႃးမိူဝ်းဢွၼ်တၢင်းၶႃႈဢေႃႈ ... မၼ်းၵႂႃႇဝႄႉလႂ်ၵေႃႈ ဢမ်ႇႁူႉၶႃႈယဝ်ႈ ... ”
“ ပေႃးမၼ်းၽႅဝ်ႁိူၼ်းမႃးၼႆ ... ... ၸႂ်ႉမၼ်းမႃးတီႈ တႅတ်ႇတီႇလႄႈ ၼႃႈ ... တႅတ်ႇတီႇ ထၢမ်ႁႃမၼ်းဢိူဝ်ႈ ... ”
“ ဢေႃႈ ... ဢေႃႈ ... ”
ၶဝ်ပႂ်ႉတူၺ်းၸၢႆးၼွင်ႉ ဢၼ်တေၽႅဝ်မႃးၼၼ်ႉယူႇ ၊ ၸၢႆးၼွင်ႉတႄႉ လႆႈလုၵ်ႉတီႈၵႆ ပႆမႃးလႄႈ ၶႃမၼ်း သမ်ႉပေႃးၵူၼ်ႉယူႇယဝ်ႈ၊ မၼ်းပဵၼ်ဢၼ်ႁိုဝ်ႉတႄႉတႄႉသေ ၶဝ်ႈမႃးၼႂ်းဝၢင်းႁိူၼ်းယူႇ၊ လုင်းသၢင်ႇတုၺ်ႉ ၸင်ႇပႂ်ႉႁပ်ႉလၢတ်ႈမၼ်းဝႃႈ -
“ ၸၢႆးၼွင်ႉ ... ပေႃႈလဵင်ႉလူင်ဝႃႈ ပေႃးၸၢႆးၼွင်ႉၽႅဝ်ၼႆ ႁႂ်ႈၵႂႃႈၸူးမၼ်းၼႆဝႃႇ ... ”
ၸၢႆးၼွင်ႉ မႃးၵွၼ်ႉၵိၼ်ၼမ်ႉၵတ်း ၵွၵ်းၼိုင်ႈသေ ၶဝ်ႈမိူဝ်းၼႂ်းႁွင်ႈၶႅၵ်ႇယဝ်ႈ၊ လႆႈႁၼ် ၶဝ်သၢမ်ၵေႃႉပေႃႈမႄႈလုၵ်ႈ ၼင်ႈဝႆႉ ၼႂ်းၶၢၼ်းၶႅၵ်ႇယူႇ
လုင်းၸၢႆးၽေႇ ၸီႉၼႄတီႈၼင်ႈသေ -
“ ၼင်ႈလႄႈ ၸၢႆးၼွင်ႉ ... ”
ဝၢႆးသေ ၸၢႆးၼွင်ႉၼင်ႈယဝ်ႈ လုင်းၸၢႆးၽေႇၸင်ႇထၢမ် -
“ ၸၢႆးၼွင်ႉ ... ႁဵတ်းသင် ပေႉမႃးမိူဝ်းႁိူၼ်းတူၵ်းလိုၼ်းလႃႇ ... ၸၢႆးၼွင်ႉ ဝႄႉတီႈလႂ် ... ? ”
“ ဢေႃႈ ... ၶႃႈဢမ်ႇဝႄႉတီႈလႂ်ၶႃႈ ... ”
ပႃႈမွၼ်း ၸင်ႇဝႆႉသဵင်ၶႅင်ၶႅင်သေ လၢတ်ႈဝႃႈ -
“ ပေႃးဢမ်ႇဝႄႉတီႈလႂ်ၼႆ ... လူဝ်ႇၽႅဝ်ၶိုၼ်းႁိူၼ်းၸဝ်ႉၸဝ်ႉယူႇဢိူဝ်ႈ ... ”
“ ၶႃႈဢမ်ႇၸၢင်ႈၵႂႃႇဝႄႉ တီႈလႂ်ၶႃႈ ... ယွၼ်ႉပိူဝ်ႈ ငိုၼ်းဢမ်ႇၸပ်းထွင်းၵႂႃႇလႄႈ ၶႃႈလႆႈပႆတၢင်းမႃးဢဝ်ဢေႃႈ ... ”
ၸၢႆးၼွင်ႉ လၢတ်ႈၼင်ႇၼႆသေ ၵူမ်ႈႁူဝ်ၼႆႉယူႇ၊ ပႃႈၼၢင်းမွၼ်း ဢဵၼ်းဢၢၼ်းပွင်ႉထႃႉ ၸၢႆးၼွင်ႉ ၶႅမ်ႉၶႅမ်ႉၼႆသေတႃႉ မၼ်းဢမ်ႇၸၢင်ႈပွင်ႉယဝ်ႈ၊ လုင်းၸၢႆးၽေႇ လႆႈငိၼ်းၼင်ႇၼၼ်သေ ပဵၼ်ဢၼ်ၸႂ်ဢမ်ႇလီယူႇ၊ မၼ်းၸင်ႇဝႃႈ -
“ ၸၢႆးၼွင်ႉ သမ်ႉဢမ်ႇယွၼ်းၸၢႆးၸၢႆးႁႃႉ ... ? ”
“ ၶႃႈ ... ၶႃႈၵေႃႈ ဢမ်ႇတၼ်းယွၼ်းမႅၼ်ႈၶႃႈ ... ”
“ ဢိူဝ်ႈ ... တၢင်ႇပွၵ်ႈမႃး ယႃႇပေပဵၼ်ၸိူင်ႉၼႆထႅင်ႈ ... ၸၢႆးၸၢႆး မႂ်းၵေႃႈ လူဝ်ႇလႆႈထၢမ်တူၺ်းၸၢႆးၼွင်ႉဢိူဝ်ႈ ... ငိုၼ်းမီးဢမ်ႇမီႈၼႆ ၼႆႉ တူၺ်းလူး ... ၸၢႆးၼွင်ႉ လႆႈပႆမႃးဢဝ်ဢိူဝ်ႈၼႆႉ ... ”
ၸၢႆးၼွင်ႉၸင်ႇဝႃႈ -
“ ၶႃႈတေၵႂႃႇဢၢပ်ႇၼမ်ႉၵွၼ်ႇၶႃႈ ... ”
ဝၢႆးသေၸၢႆးၼွင်ႉ ဢွၵ်ႇၵႂႃႇ ပႃႈၼၢင်းမွၼ်းၸင်ႇဝႃႈ -
“ သူၼႆႉၵေႃႈ ...သမ်ႉမႃးတၢင်ႇတၢင်းၽိတ်း ၼိူဝ်လုၵ်ႈၸၢႆးႁဝ်း ၽၢႆႇၼႃႈဢၢႆႈၼၼ်ႉဝႃႇ”
“ ႁဝ်းတၢင်ႇတၢင်းၽိတ်း ဢမ်ႇၸႂ်ႈၵူၺ်း ... ႁဝ်းလၢတ်ႈၸွမ်း လၢႆးမၼ်းဢိူဝ်ႈ ... ၼႆႉ ... ... ”
ပႃႈၼၢင်းမွၼ်းၵေႃႈ ဢမ်ႇၸၢင်ႈဝႃႈႁိုဝ်ယဝ်ႉလႄႈ မၼ်းဢမ်ႇႁၢၼ်ႉ ၸႂ်သေ ၽုတ်ႇလုၵ်ႉၶဝ်ႈၵႂႃႇ ၼႂ်းႁိူၼ်းယူႇယဝ်ႉ၊ ၸၢႆးၸၢႆးၵေႃႈ ဢၢင်ႈၶဝ်ႈၵႂႃႇယူႇ လုင်းၸၢႆးၽေႇၸင်ႇဝႃႈ -
“ လုၵ်ႈၸၢႆး ... ၵမ်ႉလူး ... ”
ၸၢႆးၸၢႆးၵေႃႈ ၶိုၼ်းမႄးၼင်ႈလီလီသေ ပႂ်ႉထွမ်ၵႂၢမ်းပေႃႈၶဝ်ယူႇ၊ လုင်းၸၢႆးၽေႇၵေႃႈ ၵႂၢမ်းဢၼ်ဢၢၼ်းတေလၢတ်ႈၼၼ်ႉ မၼ်းၶိုၼ်းဝူၼ်ႉသွၼ်ႇဝႃႈ ဢမ်ႇပႆႇၵိုင်ႇလီလၢတ်ႈယဝ်ႈၼႆသေလႄႈ မၼ်းၸင်ႇလႅၵ်ႈပိၼ်ႇၶၢႆႉသၢႆၵႂၢမ်းသေ -
“ လုၵ်ႈၸၢႆး ... ၸွမ်းလႆႈလိၵ်ႈယူႇႁႃႉ ... ? ”
“ လႆႈယူႇဢေႃႈ ...တႅတ်ႇတီႇ... ”
“ ဢိူဝ်ႈ ...ဢိူဝ်ႈ ...သိုပ်ႇၶတ်းၸႂ်လႄႈၼႃႈ ဢမ်ႇပေႃးဝႃႈယဝ်ႈ လုၵ်ႈၸၢႆးၵေႃႈ ၸမ်တေပဵၼ်ၶူးမေႃယႃၼင်ႇၵဝ်ႇယဝ်ႈ ... လူဝ်ႇမေႃဝႆႉၸႂ်မဵတ်ႉတႃႇ ၼိူဝ်ပိူၼ်ႈဢိူဝ်ႈၼႃႈ ... ဢိူဝ်ႈ ... ဢိူဝ်ႈ ... လီယဝ်ႈ ... လုၵ်ႈၸၢႆး လူဝ်ႇၵႂႃႇလႂ်ၵေႃႈ ၵႂႃႇလႄႈ ... ”
လုင်းၸၢႆးၽေႇၵေႃႈ ၼင်ႈလွမ်တူၺ်းၸၢႆးၸၢႆး ဢၼ်ပႆၶဝ်ႈၵႂႃႇ ၼႂ်းလုၵ်းႁိူၼ်းၼၼ်ႉယူႇယဝ်ႉ။
- + - + -
ပႃႈၼၢင်းၶွင်ႇ ဢဝ်ဝၢၼ်ႇၶဝ်ႈႁုင်လႅဝ်လႄႈ ဝၢၼ်ႇၼမ်ႉၼူမ်းသေ မႃးၸူးလႅင်းယူႇ၊ ယွၼ်ႉပိူဝ်ႈ လႅင်းၼၢဝ်ၼႆႉလႄႈ မၼ်းၼွၼ်းဝႆႉၼႂ်းၽႃႈယူႇ -
“ လႅင်း ... ၵိၼ်ၶဝ်ႈႁုင်လႅဝ်သေၼႃႈ ... ”
“ ဢိုဝ်း ... ဢိုဝ်း ... ဢမ်ႇၶႂ်ႈၵိၼ် ... ”
“ ၵိၼ်ဢိတ်းၼိုင်ႈလႄႈ မႄႈဝႃႈ ... ”
လႅင်းဝႆႁူဝ်ဝုတ်းဝုတ်းယူႇ -
“ ၵိၼ်ၼမ်ႉၼူမ်းႁေၼေႃႈ ... ပေႃးၼႆ ... ”
လႅင်း တေႃႉတႄႉ တူၼ်ၵိၼ်ဢိတ်းၼိုင်ႈၵူၺ်းသေ ပေႃးပႅတ်ႈယဝ်ႈ - “
“လုၵ်ႈယိင်း ...ၵိၼ်ႁႂ်ႈမူတ်းႁေလႄႈ ...လုၵ်ႈယိင်းၵူၼ်းလီ”
“ လႅင်း ... ဢမ်ႇၶႂ်ႈၵိၼ် ... ”
“ လႅင်း ... ၶႂ်ႈၵိၼ်သင်လႃႇ ... ”
လႅင်းဝႆႁူဝ်ၼႄမႄႈၶဝ်ယူႇ၊ ပႃႈၼၢင်းၶွင်ႇ မႆႈၸႂ်ၵွပ်ႈလုၵ်ႈယိင်းဢွၼ်ႇမၼ်းသေ ၶျေႃးဝွၼ်းလၢတ်ႈဝၢၼ်တေႃႇလုၵ်ႈယိင်းမၼ်း ၵူႈၸိူဝ်ႉၸိူဝ်ႉယူႇ -
“ လႅင်း ... ၸိုင်လုၵ်ႈယိင်း ဢမ်ႇၵိၼ်သင်လႃႇ ... ပေႃးၵိၼ်ၼႆ ၸင်ႇတေႁႅင်းဢိူဝ်ႈ ... ပေႃးႁႅင်းၼႆ ၸင်ႇယူႇလီဢိူဝ်ႈ ... ပေႃးယူႇလီၼႆ ၸင်ႇတေၸၢင်ႈၵႂႃႇၶိုၼ်ႈႁဵၼ်းဢိူဝ်ႈ ... ပေႃးဢိုတ်းႁဵၼ်းၼႆၵေႃႈ ၸင်ႇၸၢင်ႈၵႂႃႇလႄႇဢိူဝ်ႈ ... မႄႈ ... ... ”
“ လႅင်း ... ၶႂ်ႈၵႂႃႇဢႅဝ်ႇ ပီႈၸၢႆးၼွင်ႉ ... ”
“ ဢိူဝ်ႈ ... ပေႃးလႅင်း ၶႅၼ်းၼႆ ၵႂႃႇဢႅဝ်ႇၵႂႃႈ ... ”
လႅင်းၶႂ်ႈႁႆႈသေ လၢတ်ႈဝႃႈ -
“ မႄႈ ... မႄႈ ... လႅင်းၶႂ်ႈၵႂႃႇဢႅဝ်ႇ ပီႈၸၢႆးၼွင်ႉ ... ”
“ လုၵ်ႈယိင်း ... လႅင်းဢိူဝ် ... လႅင်းတိုၵ်ႉၼၢဝ်ယူႇၼႃႇမႄႈ ပေႃးၶႅၼ်းမႃးၼႆ မႄႈမႄႈတေၵႂႃႇသူင်ႇပၼ် တႄႉတႄႉၼႃႈ ... ... ”
“ မႄႈ ... မႄႈ ... လႅင်း ၶႂ်ႈၵႂႃႇတီႈလႅဝ် ... ”
လႅင်းႁႆႈသေ မႆႈမႄႈၶဝ်ယူႇ၊ မႄႈၶဝ်ႁဵတ်းႁိုဝ်ၶျေႃးမၼ်းၵေႃႈ မၼ်းဢမ်ႇၽွမ်ႉ၊ ၵမ်းလိုၼ်း မႄႈၶဝ်ၸင်ႇဝႃႈ -
“ လႅင်း ... ယႃႇၵႂႃႇတီႈၸၢႆးၼွင်ႉယဝ်ႈ ... မႄႈတေၸႂ်ႉပီႈၸၢႆးသႅင် ၵႂႃႇႁွင်ႉမႃးၼႃႈ ... လႅင်းပႂ်ႉထႃႈ ၼႃႈ ... ”
လႅင်းလႆႈငိၼ်းၼင်ႇၼၼ် မၼ်းယုမ်ႉသေ -
“ ပီႈၸၢႆးၼွင်ႉ တေမႃးတႄႉတႄႉၶႃႈႁႃႉ ... ? မႄႈမႄႈ ... ”
“ မႃးဢိူဝ်ႈ ...”
ပႃႈၼၢင်းၶွင်ႇ ၼူမ်ႁွမ်ပၼ် ၵႅမ်ႈလုၵ်ႈယိင်းမၼ်းၵမ်းၼိုင်ႈသေ ၸႂ်ႉႁႂ်ႈၸၢႆးသႅင် ၵႂႃႇႁွင်ႉ ၸၢႆးၼွင်ႉယူႇယဝ်ႉ။ ၸၢႆးသႅင်ၵေႃႈ ၵႂႃႇလၢတ်ႈလွင်ႈတၢင်းမၼ်းၼႄ လုင်းၸၢႆးၽေႇသေ ႁွင်ႉဢဝ်ၸၢႆးၼွင်ႉ မႃးၸွမ်းမၼ်းယဝ်ႈ၊ ပေႃးဝႃႈၸၢႆးၼွင်ႉ ၽႅဝ်မႃးတီႈႁိူၼ်းလႅင်းၶဝ်ၼႆ ၸၢႆးၼွင်ႉလႆႈႁၼ်လႅင်း ၼွၼ်းဝႆႉၼိူဝ်ၽႃႈယူႇ၊ ငိၼ်းသဵင်ၸၢႆးၼွင်ႉမႃးလႄႈ လႅင်း ၸင်ႇမိုၼ်းတႃ တူၺ်းၸၢႆးၼွင်ႉသေ -
“ ပီႈၸၢႆးၼွင်ႉ ... ”
“ လႅင်း ... လႅင်း ... ၼၢဝ်ႁႃႉ ... ? ဢမ်ႇယူႇလီႁႃႉ ... ?”
“ ပီႈၸၢႆးၼွင်ႉ မႃးဢႅဝ်ႇလႅင်းႁိုင်ႁိုင်ၼႃႈ ... ”
“ မႃးဢိူဝ်ႈ ... လႅင်း ... မိူဝ်ႈပီႈၸၢႆးၼွင်ႉၼၢဝ်ၼၼ်ႉ ပီႈၸၢႆးၼွင်ႉ ၵိၼ်ၶဝ်ႈႁုင်လႅဝ်ၵူၺ်းသေ ၶိုၼ်းၵိၼ်ဢီႈယႃဢိူဝ်ႈလႅင်း...လႅင်းၸွင်ႇတွင်းႁိုဝ် ... ? ”
လႅင်း ငွၵ်းႁူဝ်ၼႄၵမ်းၼိုင်ႈယူႇ ၊ ၸွမ်းၼင်ႇၸၢႆးသႅင်လၢတ်ႈမၼ်းမႃး မိူဝ်ႈၼိူဝ်ၵႃးၼၼ်ႉ ၸၢႆးၼွင်ႉၵေႃႈ ၸင်ႇၵျေႃးႁႂ်ႈလႅင်း ၵိၼ်ယႃႈယႃယူႇ-
“ ပေႃးၼႆ ... လႅင်းၵေႃႈ ၵိၼ်ၶဝ်ႈႁုင်လႅဝ် ဢိတ်းၼိုင်ႈၼေႃႈ ”
“ ဢိုဝ်း ... လႅင်း ဢမ်ႇတွင်ႉမႆႈ ...”
“ ဢမ်ႇတွင်ႉမႆႈၵေႃႈ ... ၵိၼ်ဢိတ်းၼိုင်ႈဢိူဝ်ႈလႅင်း ... မႃးလႄႈ ပီႈၸၢႆးၼွင်ႉ ၵေႃႉတေသွမ်ပၼ် ... လႅင်း ဝႃႈငၢႆႈၵူၼ်းလီလူင် ”
ၸၢႆးၼွင်ႉၵေႃႈ ၸေႃႉဢဝ်ၶဝ်ႈႁုင်လႅဝ် ပွၼ်ႈသွမ်ပၼ်လႅင်းယူႇယဝ်ႈ၊ ပႃႈၼၢင်းၶွင်ႇၶဝ်ပေႃႈမႄႈလုၵ်ႈတႄႉ လႆႈႁၼ်ၼင်ႇၼၼ်သေ ပဵၼ်ဢၼ်ၸူမ်းသိူဝ်းၸွမ်းတႄႉတႄႉ၊ ဝၢႆးသေ ၵိၼ်ၶဝ်ႈလႅဝ်သဵင်ႈယဝ်ႉ -
“ ၼေႈ ... ပီႈၸၢႆးၼွင်ႉ ဝႃႈယူႇၼႃႇ ... လႅင်းဝႃႈငၢႆႈတႄႉလူင်ၼႆႉ ... ၵမ်းၼႆႉ ... ၵိၼ်ယႃၼႆႉႁေၼႃႈ ... လႅင်း ... ”
“ ဢိုဝ်း... လႅင်း ...ဢမ်ႇၶႂ်ႈၵိၼ် ... ၼႆၵေႃႈ ... ”
“ လႅင်း ... ပေႃးဢမ်ႇၶႂ်ႈၵိၼ်ၼႆ လႅင်းတေလႆႈသမ်းၶဵမ်ဢိူဝ်ႈ ၵိၼ်လႄႈ ...ယႃမဵဝ်းၼႆႉ ၵိၼ်ငၢႆႈယူႇၵူၺ်း ... ၼေႈ ... ၵိၼ်တူၺ်းလူး ... ... ”
လႅင်းၵေႃႈ ဢႃႈသူပ်းပၼ်လႄႈ ၸၢႆးၼွင်ႉ ဢဝ်ယႃႈယႃသႂ်ႇပၼ် ဢဝ်ၵွၵ်းၼမ်ႉ ယိုဝ်ႈပၼ်ထိုင်သူပ်းမၼ်းယဝ်ႈ၊ ၶဝ်ဢွၼ်ၵၼ်ႁၢၼ်ႉၸႂ်သေ လွမ်တူၺ်းၸၢႆးၼွင်ႉလႄႈလႅင်းယူႇ -
“ လႅင်း ... ပူၼ်ႈပၢၵ်ႇႁေႇၼေႃႈ ... ႁိူဝ်ႈ ... ပူၼ်ႈသႂ်ႇၼႂ်း ၵွၵ်းထူမ်ႇၼႆႉလႄႈ ... ”
လႅင်းၵေႃႈ ပူၼ်ႈပၢၵ်ႇယဝ်ႉသေ ၸၢႆးၼွင်ႉၶိုၼ်းဢဝ်မၼ်းၼွၼ်း ယဵၼ်ယဵၼ်ယူႇယဝ်ႈ -
“ ပီႈၸၢႆးၼွင်ႉ ... ယႃႇပေမိူဝ်းၼႃႈ ... ”
“ ပီႈၸၢႆးၼွင်ႉ ဢမ်ႇမိူဝ်း ... ပီႈၸၢႆးၼွင်ႉတေပႂ်ႉလႅင်းလႆ ... ၼွၼ်းလႄႈ လႅင်းၶႂ်ႈၼွၼ်ႈၵေႃႈ ၼွၼ်းလႄႈၼႃႈ ...”
“ လႅင်း ... ၶႂ်ႈထွမ်ႇဢပုမ်ႇ ... ”
ၸၢႆးၼွင်ႉၵေႃႈ ဝႆႉၸႂ်ယႂ်ယၢဝ်းသေ ၶႆႈဢပုမ်ႇၼႄလႅင်းယူႇ၊ လႅင်းၵေႃႈ ထွမ်ႇဢပုမ်ႇသေ ၼွၼ်းလပ်းၵႂႃႇယဝ်ႈ ၊ ဝၢႆးသေ လႅင်းၼွၼ်းလပ်းၵႂႃႇ ၶဝ်ဢွၼ်ၵၼ် မႃးၼႂ်းႁွင်ႈၶႅၵ်ႇသေ မႃးဢုပ်ႇၵၼ်ယူႇ၊ ပႃႈၼၢင်းၶွင်ႇ ၸင်ႇလၢတ်ႈဝႃႈ -
“ ဢိုဝ်း ... ! လႅင်းတႄႉ ... မႄႈပႃႈၵေႃႈ ဢမ်ႇမေႃၶျေႃးမၼ်းတၢၼ်ႇၸၢႆးၼွင်ႉယဝ်ႈႁေး ... ၸဵမ်မိူဝ်ႈ ႁၼ်ၸၢႆးၼွင်ႉ ႁဵတ်းၵေႃႉလႅင်းၼိူဝ်ရူတ်ႉရဵၼ်းၼၼ်ႉ မႄႈပႃႈတႄႉ တိုၼ်းလၢမ်းဝႆႉၼႂ်းၸႂ်၊ ၸၢႆးၼွင်ႉတေ မေႃႁဵတ်းၵေႃႉလုၵ်ႈဢွၼ်ႇယူႇၼႆယဝ်ႈ ... ”
“ ၶႃႈၵေႃႈ ... ဢမ်ႇတွၼ်ႉယၢမ်ႈႁဵတ်းၵေႃႉလုၵ်ႈဢွၼ်ႇ သေပွၵ်ႈၼင်ႇၵဝ်ႇၶႃႈ ... ”
ၽူၺ်း ဢဝ်ပၢၼ်ႉၼမ်ႉဝၢၼ် မႃးတမ်းသေ -
“ ၸၢႆးၼွင်ႉ ၵိၼ်ၼမ်ႉဝၢၼ်ၵွၼ်ႇလႄႈ ... ”
“ ၶွပ်ႈၸႂ်ယဝ်ႈ ... ၽူၺ်း ... ”
ၶဝ်ဢွၼ်ၵၼ် သူတ်ႉၼမ်ႉဝၢၼ်သေ ဢုပ်ႇၵၼ်ယူႇ ၊ ၽူၺ်း ၸင်ႇဝႃႈ -
“ မိူဝ်ႈဝူင်ႈဢွၼ်ပုၼ်ႉ ယွၼ်ႉပိူဝ်ႈၽူၺ်းၶဝ် ၶႂ်ႈၵႂႃႇၼႂ်းဝဵင်းလႄႈ မိူၼ်ႁိမ်ႇၶီႇၵႃးၸၢႆးၼွင်ႉလႄႈ ၽူၺ်းၶဝ် ၵဵင်တႄႉတႄႉယဝ်ႈ ... ”
“ ဢေႃႈ ... လႆႈယူႇ ... ”
“ ဝၼ်းၼၼ်ႉ ... ရူတ်ႉသၢႆဢိပ်ႇၼႃႇယူဝ်ႉ ... ၸၢႆးၼွင်ႉ ”
“ ၸၢႆးၼွင်ႉ ဢမ်ႇၶီရူတ်ႉသၢႆမိူဝ်းလူင် ... ၽူၺ်း ... ”
“ ၸၢႆးၼွင်ႉ ဢမ်ႇၶီႇရူတ်ႉသၢႆၼႆ ... ဢဝ်တႅၵ်ႇၸီႇမိူဝ်းႁႃႉ ”
ၸၢႆးၼွင်ႉ ၸင်ႇယုမ်ႉသေ -
“ ၸၢႆးၼွင်ႉ ၶီႇလင်ႇၵႃႇသိပ်းႁူဝ် မိူဝ်းဢိူဝ်ႈ ... ”
“ လင်ႇၵႃႇသိပ်းႁူဝ် ... ၸိူင်ႉႁိုဝ် ? ၸၢႆးၼွင်ႉ ... ”
“ ဢေႃး ... ဝၼ်းၼၼ်ႉ ငိုၼ်းဢမ်ႇၸပ်းထွင်းမႃးလႄႈ လႆႈပႆတိၼ်မိူဝ်းဢဝ်ယဝ်ႈ ... ”
“ ဢလူဝ်း ... တႃႉလီၵဵင်ၸႂ် ၸၢႆးၼွင်ႉလႃႈ ... ”
ၽူၺ်းၵေႃႈ ၶိုၼ်းမႄးၶႆႈၼႄမႄႈၶဝ် လွင်ႈဢၼ်ပဵၼ်မႃးၼၼ်ႉယူႇ ၊ ၶဝ်သိုပ်ႇဢုပ်ႇၵၼ်သေ ပႃႈၼၢင်းၶွင်ႇၸင်ႇဝႃႈ -
“ ၸၢႆးၼွင်ႉ ... မႄႈပႃႈၶႂ်ႈယွၼ်းပိုင်ႈၸၢႆးၼွင်ႉ ... ၶႂ်ႈႁႂ်ႈၸၢႆးၼွင်ႉ ၸွႆႈတူၺ်းပၼ်လႅင်းဢိူဝ်ႈ ... ၵွပ်ႈသင်ၼႆ ပွႆးထၢမ်လိၵ်ႈၶဝ်ၵေႃႈ ၸမ်မႃးလွႆးလွႆးယဝ်ႉလႄႈ ၵူဝ်မၼ်းၼၢၼ်းၶႅၼ်းသေ ၵူဝ်ဢမ်ႇပဵၼ်တွပ်ႇလိၵ်ႈဢိူဝ်ႈ ... ”
“ လႆႈယူႇဢေႃႈ ... မႄႈပႃႈ ... ၵူၺ်းၵႃႈ ... မႄႈပႃႈၶဝ်ၵေႃႈ လၢတ်ႈပၼ်တီႈလုင်းၸၢႆးၽေႇၶဝ်သေ ၸင်ႇတေလီၶႃႈယူဝ်ႉ... ? ”
“ ၼႆႉတႄႉ ... မႄႈပႃႈတေလၢတ်ႈပၼ်လႆ တႃႇတေလၢတ်ႈၼၼ်ႉ ပဵၼ်ပုၼ်ႈၽွၼ်းမႄႈပႃႈၶဝ်ယဝ်ႈ ... တမ်းၸႂ်လႃႈ ...”
ပႃႈၼၢင်းၶွင်ႇၵေႃႈ လုၵ်ႉၵႂႃႇသိုပ်ႇၽူၼ်းၵမ်းလဵဝ်သေ လၢတ်ႈၼႄ လွင်ႈတၢင်း ၶဝ်ႁွင်ႉဝႆႉ ၸၢႆးၼွင်ႉ ၼၼ်ႉယူႇ။