ၶႅၵ်ႇ/တွၼ်ႈသၢဝ်းသီႇ
ဝၼ်းၼိုင်ႈ ၸၢႆးၼွင်ႉတိုၵ်ႉဢွင်ႇၶီႈတဵၼ်းသေ ထူဝ်းႁိူၼ်း ႁႂ်ႈလိူမ်ႈ လီယူႇ၊မၼ်းဢဝ်ၽႅၼ်ႈသေ ထူၵႂႃႇထူၶိုၼ်း ၽၢၵ်ႈႁိူၼ်း ပေႃးလိူမ်ႈသေဢွၵ်ႇငဝ်းႁိူဝ်ႈဝႆႉယူႇ၊ ပေႃးသိုပ်ႇထူထႅင်ႈ ဢိတ်းၼိုင်ႈၼႆတႄႉ ၸမ်တေယဝ်ႉ ၼင်ႇၵဝ်ႇလႄႈ မၼ်းၼႅတ်ႈၶတ်းၸႂ် ႁႂ်ႈၸဵဝ်းယဝ်ႉယူႇ၊ ၽွင်းၼၼ်ႉ ၸၢႆး ၸၢႆး ၵႂႃႇဢႅဝ်ႇတီႈၼွၵ်ႈ ပွၵ်ႈၽႅဝ်ၶိုၼ်းမႃးႁိူၼ်းသေ ဢၢင်ႈၶဝ်ႈမႃးၼႂ်းႁိူၼ်းယဝ်ႈ ၸၢႆးၼွင်ႉၸင်ႇႁၢမ်ႈဝႃႈ -
“ ပီႈၸၢႆး ...ၵႂႃႇၶဝ်ႈၽၢႆႇလင်ႁိူၼ်းပုၼ်ႉၶႃႈလႄႈ ... ၶႃႈထူႁိူၼ်း ပႆႇတၼ်းယဝ်ႉလီဢေႃႈ ... ”
ၸဵမ်မိူဝ်ႈဢွၼ်တၢင်း ၸၢႆးၸၢႆး တိုၼ်းဢမ်ႇႁၢၼ်ႉၸႂ်ၼိူဝ်ၸၢႆးၼွင်ႉလႄႈ မၼ်းၸင်ႇဝႃႈ -
“ ႁိုဝ်ႉ ... ၶႂ်ႈၶိုၼ်ႈၽၢႆႇလႂ်ၵေႃႈ ၶိုၼ်ႈဢိူဝ်ႈ ... ၸၢင်ႈပဵၼ်သင်”
“ ဢေႃႈ ... ပီႈၸၢႆး ... ၶႃႈတိုၵ်ႉၸင်ႇႁႃထူဝႆႉၵူၺ်းလႄႈ ၵူဝ်ပဵၼ်ႁွႆးတိၼ်မူတ်းဢေႃႈ ... ၵႂႃႇၶဝ်ႈၽၢႆႇလင်ႁိူၼ်းဢဝ်ၶႃႈလႄႄႈ ”
“ ႁႃး ... ႁႃး ... ၵၢၼ်ထူႁိူၼ်းထူဝ်းႁိူၼ်းၼၼ်ႉ ပဵၼ်ၵၢၼ်မႂ်းၼႃႇ ... ပေႃးႁိူၼ်းဢမ်ႇလိူမ်ႈၼႆ ... မႂ်းလူဝ်ႇထူႁႂ်ႈလိူမ်ႈဢိူဝ်ႈ ... ”
ၸၢႆးၸၢႆး တင်ႈၸႂ်တိုဝ်းသွၵ်းတိၼ်သေ ယဵပ်ႈၶိုၼ်ႈၼႂ်းႁိူၼ်းယဝ်ႈ ႁွႆးသွၵ်းတိၼ်ၸၢႆးၸၢႆး ပဵၼ်ႁွႆးပဵၼ်ႁွႆးဝႆႉလႄႈ ၸၢႆးၼွင်ႉ ၼႅတ်ႈဢဝ်ၽႅၼ်ႇၸဵတ်ႉၸွမ်း ထူၸွမ်းၽႂ်းၽႂ်းယူႇယဝ်ႈ -
“ ပီႈၸၢႆး ... ယႃႇပေတိုဝ်းသွၵ်းတိၼ်ယဵပ်ႇၶႃႈလေႃႇ ... ပဵၼ်ႁွႆးသွၵ်းတိၼ်မူတ်ႈၶႃႈယဝ်ႈ ... ”
“ ႁႃး ... ႁႃး ... ပဵၼ်ၵေႃႈယဝ်ႉၵႂႃႈ ... ၸဵတ်ႉလႄႈ ၸဵတ်ႉ ၸွမ်းႁႂ်ႈၵဵင်ႈၵဵင်ႈလႄႈ ႁႃး ... ႁႃး ... ”
ၸၢႆးၼွင်ႉ ၼႅတ်ႈၸဵတ်ႉၸွမ်း ႁွႆးလႂ်ႁွႆးၼၼ်ႉယူႇ ၊ ၸၢႆးၸၢႆးတႄႉ ပဵၼ်ဢၼ်ႁၢၼ်ႉၸႂ်လူင်လၢင် ပုၼ်ႈမၼ်းသေ -
“ ႁႃး ... ႁႃး ... ႁႃး ... ပေႃးပဵၼ်ၼႆ ၵဝ်တေၽုၺ်ႇၵႂၢမ်းသေ ၵႃႈၶႅမ်ႉၶႅမ်ႉၵွၼ်ႇၵႂႃႈ ... ”
ၸၢႆးၸၢႆး ၵႂႃႇၽုၺ်ႇၶႅပ်းၵႂၢမ်းၼွၵ်ႈမိူင်းသေ ၵႃးတိၸ်ႇၵူဝ်ႇ ၼိူဝ်ႁိူၼ်းၵျေႃႇၵျေႃႇသိူဝ်းသိူဝ်းယူႇ၊ ၸၢႆးၼွင်ႉတႄႉ ၼႅတ်ႈဢဝ်ၽႅၼ်ႇသေ လႆႈၸဵတ်ႉၸွမ်းထူၸွမ်းယူႇတိၵ်းတိၵ်းလႄႈ မၼ်းသမ်ႉပေႃးႁိူဝ်ႉသေ ႁိူဝ်ႇမၼ်းပေႃး ၸိုမ်ႉယွတ်ႇလႆတူၵ်းလူင်းမႃးယူႇယဝ်ႈ -
“ ပီႈၸၢႆး ... ယႃႇပေႁဵတ်း ... ”
“ ႁႃး ... ႁႃး ... ၸၢင်ႈပဵၼ်သင် ... ႁိူၼ်းႁဝ်းလူင် ၶႂ်ႈၵႃႈၵႃႈ ၶႂ်ႈဝႅၼ်ဝႅၼ် ၽႂ်ႇဢမ်ႇၸၢင်ႈမႃးၶႅၼ်သီးသႄႈ ... ”
ၸၢႆးၸၢႆး သိုပ်ႇၵႃႈၵႃႈ ဝႅၼ်ဝႅၼ် တိုပ်ႈတိုပ်ႈလႄႈ ႁွႆးတိၼ်မၼ်း သမ်ႉပေႃး လၢႆးၵႂႃႇၵူႈတီႈယဝ်ႈ ၊ ၸၢႆးၼွင်ႉၵေႃႈ ၸဵတ်ႉၸွမ်းၸဵတ်ႉၸွမ်းသေတႃႉ မၼ်းဢမ်ႇပႄႉလႆႈယဝ်ႉလႄႈ မၼ်းႁိူဝ်ႉသေ ၼင်ႈတူၺ်းႁွႆးတိၼ် ၸၢႆးၸၢႆး ဢၼ်ၵႃႈၼႄမၼ်းၼၼ်ႉယူႇ -
“ ပီႈၸၢႆး ...ယႃႇပေႁဵတ်းၼၼ်ယဝ်ႈၶႃႈ ... ၶႃႈတွင်းပၢၼ်ႇယႂ်ႇယႂ်ႇၼမ်ၼမ်ဢေႃႈ ... ႁႂ်ႈၶႃႈဝႆႈၼႆၵေႃႈ ၶႃႈတေဝႆႈၶႃႈလႆ ... ဢၢၼ်ႇၵႄႇ တေမႃးထႃႉၶႃႈ ဢေႃႈ ... ”
“ ႁႃး ... ႁႃး ... ထႃႉမႂ်းလူင် ... ထႃႉၵဝ်ၵေႃႈ ဢမ်ႇၸႂ်ႈ ၸၢင်ႈပဵၼ်သင် ... ထူလႄႈ ... ထူလႄႈ ...ႁွႆးတိၼ်ၸိူဝ်းၼႆႉ ထူႁႂ်ႈၵဵင်ႈမူတ်းမူတ်းလႄႈ ... မႂ်းၵုမ်ႇၼင်ႈႁဵတ်းသင်ယူႇလႃႇ ... ? ”
ၸၢႆးၸၢႆး မႃးၸၼ်ၶူၼ်ႁူဝ်ၸၢႆးၼွင်ႉသေ ၸႂ်ႉႁႂ်ႈၸၢႆးၼွင်ႉ ထူႁိူၼ်းယူႇယဝ်ႈ -
“ ပီႈၸၢႆး ... ၶႃတေထူၶႃႈလႆ ... ”
ၸၢႆးၸၢႆးတႄႉ ၵႃႈၸွမ်းၵႂၢမ်းသေ ၵျေႃႇၸႂ်ယူႇ၊ ပႃႈမွၼ်းၵေႃႈ ယူႇၼိူဝ်ႁိူၼ်းသေ ယုမ်ႉႁၢၼ်ႉၸႂ်တူၺ်း တၢင်းႁဵတ်းလုၵ်ႈၸၢႆးမၼ်းယူႇ ၊ ၸၢႆးၼွင်ႉတႄႉ ႁိူဝ်ႉၵေႃႈႁိူဝ်ႉ ႁိူဝ်ႇမၼ်းၵေႃႈ မၼ်းလူဝ်ႇၸဵတ်ႉ ပႅၼ်ႈသိူဝ်ႇႁိူၼ်းၵေႃႈ မၼ်းလူဝ်ႇထူသေ ပဵၼ်ဢၼ်ၶၢၼ်ၸႂ်ယူႇ၊ ၽႅၼ်ႇမၼ်းပွတ်းၼိုင်ႈၼၼ်ႉ မၼ်းဢမ်ႇၸၢင်ႈဢဝ်ထူယဝ်ႉလႄႈ မၼ်းဝၢင်းၼိူဝ်ပႅၼ်ႈႁိူၼ်းၶဝ်ၼၼ်ႉသေ ဢဝ်ၽႅၼ်ႇဢၼ်လဵဝ် ၶတ်းၸႂ်ၸွမ်းၸဵတ်ႉ ႁွႆးတိၼ်ၸၢႆးၸၢႆးယူႇ ယွၼ်ႉပိူဝ်ႈသဵင်ၵႅတ်ႉသႅတ်ႉ လင်ႁႅင်းၼႃႇလႄႈ လုင်းၸၢႆးၽေႇ ႁေႃႈၵႃးသေ ၽႅဝ်မႃးၼႆ ၶဝ်ဢမ်ႇတၼ်းငိၼ်းသဵင်ၵႃး၊ လုင်းၸၢႆးၽေႇ မႃးၸုၵ်းႁိမ်း ၽၵ်းတူသေ လွမ်တူၺ်း တၢင်းႁဵတ်းၸၢႆးၸၢႆးယူႇ၊ ၸၢႆးၼွင်ႉတႄႉ ထူၺ်ႈၸႂ်ပေႃးဢမ်ႇၶႂ်ႈထိုင်ၵၼ်လႆႈယဝ်ႉလႄႈ သဵင်ထူၺ်ႈၸႂ်မၼ်း ပေႃးတၢၼ်ႇပိူၼ်ႈထူဝ်းသဝ်ႇယူႇယဝ်ႈ၊ ၶႅပ်းၵႂၢမ်းသုတ်းၵႂႃႇယဝ်ႉလႄႈ ၸၢႆးၸၢႆး ၸင်ႇဝႃႈ -
“ ဢေႃး ... ၶႅပ်းၵႂၢမ်းပေႃးမူတ်းၵႂႃႇယဝ်ႉလူင်ၼႆႉ ... ၽုၺ်ႇထႅင်ႈၽၢႆႇၼိုင်ႈသေ သိုပ်ႇၵႃႈၵွၼ်ႇၵႂႃႈ ... ”
ၽွင်းၸၢႆးၸၢႆး ဢၢင်ႈၵႂႃႇၽုၺ်ႇ ၶႅပ်းၵႂၢမ်းထႅင်ႈၽၢၵ်ႇၼိုင်ႈၼၼ်ႉ မၼ်းၵႂႃႇယဵပ်ႇၺႃး ၽႅၼ်ႇဢွၼ်ႇပွတ်းၼိုင်ႈ ၸူးဢဝ်မၼ်းပလၢတ်ႈသေလူမ်ႉ ပိၼ်ႈတၢၵ်ႇႁၢႆၵႂႃႇယူႇယဝ်ႉ။ ၵူၼ်ႈမၼ်း ၵွင်းလင်မၼ်း ၵွၵ်းႁူဝ်မၼ်း ၽတ်ႉသႂ်ႇပႅတ်ႈသိူဝ်ႇႁိူၼ်းၶဝ်လႄႈ မၼ်းပဵၼ်ဢၼ်ၸဵပ်းၵႂႃႇတႄႉတႄႉ -
“ ဢႃႉ ... ! ဢႃႉ ... ! ... ဢႂ်ႈ ... ! ”
တူင်ႉ ... ထရူင်ႉ ... ...
ၸၢႆးၼွင်ႉဝၢႆႇတူၺ်း ၸၢႆးၸၢႆးၵမ်းႁူဝ်ၵမ်းၵူၼ်ႈမၼ်းသေ ဢၢပ်ႈတေၸဵပ်းၼႃႇ တႄႉတႄႉလႄႈ ၼႃႈမၼ်းမီႇဝႆႉယူႇယဝ်း၊ ပႃႈၼၢင်းမွၼ်းၵေႃႈ ၼႅတ်ႈဢႅၼ်ႇလူင်းႁိူၼ်းမႃးၽႂ်းၽႂ်းသေ မႃးႁွပ်ႇဢဝ်လုၵ်ႈၸၢႆးမၼ်းယူႇ
“ ဢလူဝ်ႉ ... ! လုၵ်ႈၸၢႆးမႄႈ ... ”
ပႃႈၼၢင်းမွၼ်း လွမ်တူၺ်းမႃး ၽၢႆႇၸၢႆးၼွင်ႉသေ -
“ ဢၢႆႈၼွင်ႉ ... မႂ်းပေႃးဢမ်ႇမေႃမႃးဢဝ် လုၵ်ႈၸၢႆးၵဝ်လုၵ်ႉ ၽွင်ႈလႃႇၼႆႉ ... မႂ်း ... မႂ်း ... တင်ႈၸႂ်ႁဵတ်း ဢမ်ႇၸႂ်ႈႁႃႉ ၼႆႉႁိုဝ်? ”
“ ဢၢၼ်ႇ ... ဢၢၼ်ႇတီႇ ... ၶႃႈ ၶႃႈ ဢမ်ႇတင်ႈၸႂ်ႁဵတ်းၶႃႈ ပီႈၸၢႆး ပလၢတ်ႈလူမ်ႉႁင်းၵူၺ်းမၼ်း ... ဢေႃႈ ... ”
ၸၢႆးၸၢႆး ၸဵပ်းၵႂႃႇယဝ်ႉလႄႈ မၼ်းၸင်ႇၽုတ်ႇလုၵ်ႉမႃးသေ ဢၢင်ႈမႃးႁႅမ် ၸၢႆးၼွင်ႉယူႇ -
“ ဢၢႆႈၼွင်ႉ ... မႂ်းတေႁူႉၼမ်ႉမႂ်းလႆ ... ”
“ ပီႈၸၢႆး ... ယႃႇ ယႃႇပေႁဵတ်းၶႃႈ ... ၶႃႈဢမ်ႇတင်ႈၸႂ်ႁဵတ်းၶႃႈလူင် ... ”
ၽွင်းမိူဝ်ႈ ၸၢႆးၸၢႆးၽႅဝ်မႃး ႁိမ်းၸၢႆးၼွင်ႉသေ ဢၢင်ႈဢဝ်တိၼ်ပိတ်ႉ ၸၢႆးၼွင်ႉၼၼ်ႉ -
“ လုၵ်ႈၸၢႆး ... ၵိုတ်းလူး ... ”
ငိၼ်းသဵင် လုင်းၸၢႆးၽေႇ ႁၢမ်ႈတပ်ႉလႄႈ ၶဝ်ၸင်ႇဢွၼ်ၵၼ် ၵိုတ်းၵႂႃႇယူႇၵူႈၵေႃႉယဝ်ႈ-
“ ပဵၼ်သင် ... ? ၼႆႉ ... သူႁဵတ်းသင်ယူႇၼႆႉ ... ? ၵဝ်မႃးလွမ်တူၺ်း ၸဵမ်မိူဝ်ႈၵႆႈၼၼ်ႉယဝ်ႈ ၸၢႆးၸၢႆး ... လၢႆးဢၼ်မႂ်းႁဵတ်းၼႆႉ ၸွင်ႇမၼ်းၸႂ်ႈပိူင်ၵူၼ်းႁိုဝ် ? ၼႆႉ ... လၢတ်ႈလူး ... ”
ၸၢႆးၸၢႆး ဢမ်ႇၸၢင်ႈတွပ်ႇသင်သေ ၵူမ်ႈႁူဝ်ဝႆႉယူႇ၊ လုင်းၸၢႆႈၽေႇ ၶိုၼ်းလၢတ်ႈထႅင်ႈ -
“ တူၺ်းလူး ႁွႆးတိၼ်မႂ်းၸိူဝ်းၼႆႉ ... မႂ်းၶိုၼ်းလူဝ်ႇလႆႈမွတ်ႇၶိုၼ်း မူတ်းမူတ်းဢိူဝ်ႈၼႆႉ ...ၸၢႆးၼွင်ႉ...ၵႂႃႇႁဵတ်းၵၢၼ်မႂ်းၼႂ်းသူၼ်လႃႈ”
ၸၢႆးၼွင်ႉၵေႃႈ ဢမ်ႇႁတ်းလိူဝ်ၵႂၢမ်းပေႃႈလဵင်ႉၶဝ်လႄႈ မၼ်းလူင်းၵႂႃႇ ၼႂ်းသူၼ်ယဝ်ႈ၊ ပႃႈၼၢင်းမွၼ်းၵေႃႈ ဢမ်ႇႁတ်းလိူဝ်ၵႂၢမ်းၽူဝ်မၼ်းလႄႈ မၼ်းဢမ်ႇႁတ်းလၢတ်ႈၸွမ်းသင်၊ ၸၢႆးၸၢႆးၵေႃႈ ဢမ်ႇလိူဝ်လႆႈ ၵႂၢမ်းပေႃႈၶဝ်သေ လႆႈၵႂႃႇဢဝ်ၽႅၼ်ႇယွၵ်း ထူၸဵတ်ႉမွတ်ႇႁွႆးတိၼ်မၼ်းယူႇ။ မိူဝ်ႈၵႆႈ ဢၼ်ႁဵတ်းႁႂ်ႈႁိူဝ်ႇၸၢႆးၼွင်ႉ တူၵ်းၼၼ်ႉ ပဵၼ်မၼ်းလႄႈ ယၢမ်းလဵဝ်တႄႉ ႁိူဝ်ႇၼႃႈၽၢၵ်ႇမၼ်း ၶိုၼ်းတူၵ်းယူႇယဝ်ႈ။
ၸၢႆးၼွင်ႉလႆႈႁၼ် လုင်းၸၢႆးတုၺ်ႉယူႇၼႂ်းသူၼ်သေ ၵၵ်းမိုဝ်း ႁွင်ႉမၼ်းလႄႈ မၼ်းၸင်ႇမႃးၸူး လုင်းသၢင်ႇတုၺ်ႉယူႇ၊ လုင်းသၢင်ႇတုၺ်ႉ ၸႂ်ႉမၼ်းလွမ်တူၺ်း တီႈႁူးလႅင်းလႄႈ ၶႃသွင်ၵေႃႉ လွမ်တူၺ်းလႆႈႁၼ်ၸၢႆးၸၢႆး လႆႈထူပႅၼ်ႈႁိူၼ်း မွတ်ႇႁွႆးတိၼ်မၼ်းၶိုၼ်းယူႇလႄႈ ၶႃသွင်ၵေႃႉ လွမ်ယုမ်ႉတေႃႇၵၼ်ယူႇ၊ ၶႃသွင်ၵေႃႉ ၶိုၼ်းမႃးတီႈသိုင်ႇၵႃးသေ လုင်းသၢင်ႇတုၺ်ႉၸင်ႇဝႃႈ -
“ လုင်း လွမ်တူၺ်းသူ ၸဵမ်မိူဝ်ႈတႄႇၸႃႉမၼ်းယဝ်ႈ ၸၢႆးၼွင်ႉၶႂ်ႈႁူႉ ... ဝူတ်ႈတွပ်ႇဝူတ်ႈတႅၼ်း ဢၼ်ဝႃႈၼၼ်ႉ ၸၢႆးၸၢႆးၺႃးၵိၼ်ယူႇယဝ်ႈၼႃႇၼၼ်ႉ ... ”
“ လုင်း ... ႁဝ်းၶႃႈပဵၼ် ၵူၼ်းယူႇႁူမ်ႈပိူၼ်ႈၶႃႈလူး ...ပိူၼ်ႈၸႂ်ႉသင်ၵေႃႈ ႁိုဝ်တေလိူဝ်လႆႈၶႃႈလႃႇ ... ႁႂ်ႈပိူၼ်ႈႁၢၼ်ႉၸႂ်ထုၵ်ႇၸႂ်ၼၼ်ႉတႄႉ ႁဝ်းၶႃႈ တေႃႈလူဝ်ႇလႆႈႁဵတ်းပၼ်ၶႃႈယဝ်ႈ ... ”
“ ဢၼ်ၸၢႆးၸၢႆး ႁဵတ်းၵႂႃႇမိူဝ်ႈၼႆႉၼႆႉ ... မၼ်းပူၼ်ႉလိူဝ်ၼႃႇၽႅဝ်လူင် ... ပဵၼ်ၸၢႆးၼွင်ႉလႄႈ ႁဵတ်းပၼ်လႆႈ တၢၼ်ႇၼႆႉၵႂႃႈ ... မၼ်းၼႆႉ ဢမ်ႇမီးၸႂ်ပီႈၸႂ်ၼွင်ႉသေဢိတ်းလူင် ... ”
ယွၼ်ႉပိူဝ်ႈ ၵႂၢမ်းလုင်းသၢင်ႇတုၺ်ႉလၢတ်ႈ ဢၼ်ဝႃႈ “ၸႂ်ပီႈၸႂ်ၼွင်ႉ ” ၼႆၼၼ်ႉလႄႈ ၸၢႆးၼွင်ႉၸင်ႇထၢမ်ဝႃႈ -
“ ၸႂ်သင်ၶႃႈၵေႃ ... ? လုင်းသၢင်ႇတုၺ်ႉ ၸႂ်ပီႈၸႂ်ၼွင်ႉၼႆ”
“ ဢိူဝ်ႈ ... ၸႂ်ပီႈၸႂ်ၼွင်ႉ ၼႆဢိူဝ်ႈ ... ၶိူဝ်သွင်ၵေႃႉၼႆႉ မၼ်းၵေႃႉယႂ်ႇသေမႂ်းလႄႈ ... မၼ်းလူဝ်ႇလႆႈမီး ၸႂ်ပီႈဢိူဝ်ႈ ... မႂ်းတႄႉ မီးၸႂ်ၼွင်ႉယူႇ ... ”
ၸၢႆးၼွင်ႉတႄႉ ဝူၼ်ႉႁႃလၢႆး တႃႇတေႁႂ်ႈၸၢႆးၸၢႆး မီးၸႂ်ပီႈယူႇ၊ ၵၢင်ၸႂ်မၼ်းတႄႉ ၶႂ်ႈမွၵ်ႇလၢတ်ႈဝႃႈ လွင်ႈၸၢႆးၸၢႆး ပဵၼ်ပီႈဢၢႆႈမၼ်းၼႆသေတႃႉ သၢႆငၢႆၵူႈမဵဝ်းမဵဝ်း ဢမ်ႇပၼ်လႄႈ မၼ်းဢမ်ႇပဵၼ်မွၵ်ႇ၊ ၼင်ႇႁိုဝ် တေပဵၼ်မွၵ်ႇလၢတ်ႈၼႄၼၼ်ႉ မၼ်းႁႃၶူးလၢႆး ဢၼ်တေသၢင်ႇထုၵ်ႇမၼ်းယူႇ။
+ + + + + + + +
ယွၼ်ႉပိူဝ်ႈ လႆႈထူႁိူၼ်းမွတ်ႇႁွႆးတိၼ်မၼ်းၶိုၼ်းလႄႈ ၵၢင်ၼႂ်မိူင်းလႅင်းမႃးယဝ်ႉသေတႃႉ ၸၢႆးၸၢႆး ၸဵပ်းတူဝ်ၸဵပ်းၶိင်းဝႆႉယူႇ ၵူႈတီႈသေ မၼ်းဢမ်ႇၸၢင်ႈလုၵ်ႉ။
“ ဢႃး ... ! ၸုတ်ႉ ... ! ၸုတ်ႉ ... ! ၸုတ်ႉ ... ! ”
ပႃႈၼၢင်းမွၼ်း ၶဝ်ႈမႃးၼႂ်းလုၵ်းၼွၼ်း လုၵ်ႈၸၢႆးမၼ်းသေ -
“ လုၵ်ႈၸၢႆး ... ပဵၼ်ႁိုဝ် ? မႄႈ ... ”
ၸၢႆးၸၢႆးၼႃႈမီႇသေ ၶၢင်းတေႃႇမႄႈၶဝ်ယူႇ မၼ်းလုၵ်ႉၼင်ႈသေ-
“ ဢိုဝ်ႈ ...ႁူဝ်မႃႇႁူဝ်ၶႅၼ်ၸၢႆးၼႆႉ ... ၸဵပ်းၸွပ်းၵႂႃႇမူတ်းယဝ်ႈ ဢႃးလူဝ်း ... ! ဢိုဝ်ႈ ... ဢိုဝ်ႈ ... ! ”
“ လုၵ်ႉလႄႈ ... မိူင်းပေႃးလႅင်းပၢင်ႇသိူင်ႁိူင်ယဝ်ႉၼႆႉ ...ဢိုဝ်း ၶွင်လုၵ်ႈၸၢႆး ဢမ်ႇယၢမ်ႈႁဵတ်းၵၢၼ်ၵျၢမ်းလႄႇ မႄႈ ...ႁူႉတေၸဵပ်းဢိူဝ်ႈ”
ၸၢႆးၸၢႆးဝူၼ်ႉတူၺ်းဝႃႈ မၼ်းတေႃႉတႄႉ လႆႈထူမွတ်ႇႁွႆးတိၼ်မၼ်း တၢၼ်ႇတၢၼ်ႇၵူၺ်း မၼ်းပေႃးၸဵပ်းၸွပ်းၵႂႃႇတၢၼ်ႇၼႆႉ၊ ဢၼ်လႆႈထူႁိူၼ်း ၼႃႇသေမၼ်း ၸၢႆးၼွင်ႉ ၶႅၼ်းတေၸဵပ်းသေမၼ်း ၼႆမၼ်းလွမ်ယုမ်ႉၼႂ်းၸႂ်မၼ်းယူႇ -
“ လုၵ်ႈၸၢႆး ... ၸွင်ႇလုၵ်ႉလႆႈႁိုဝ် ... ? ”
“ လႆႈယူႇဢေႃႈ ... မႃႇမီႇ ... ”
“ ဢိူဝ်ႈ ... ၵႂႃႇသုၵ်ႈၼႃႈသီတႃၸၢႆးသေ မႃးၵိၼ်ၼမ်ႉၼူမ်းလႄႈၼႃႈ ... ”
“ ဢေႃႈ ... ဢေႃႈ ... ”
ၸၢႆးၸၢႆး မႃးတီႈသုၵ်ႈၼႃႈသေ လွမ်တူၺ်းၼႂ်းသူၼ်ယူႇ ၊ လႆႈႁၼ် ၸၢႆးၼွင်ႉ ဝဵၵ်ႉသူၼ်ၸွၼ်ႉယိူဝ်ႈယူႇလႄႈ ဢၼ်မၼ်းထၢင်ႇဝႃႈ ၸၢႆးၼွင်ႉ တေၸဵပ်းတူဝ်ၸဵပ်းၶိင်းယူႇၸိူင်ႉမၼ်း ၼႆၼၼ်ႉ ၽိတ်းဝႆႉလႄႈ မၼ်းလွမ်ထူၺ်ႈၸႂ်လူင်ႁႅင်းႁႅင်း ၵမ်းၼိုင်ႈယူႇယဝ်ႈ၊ ၸၢႆးၼွင်ႉတႄႉ ၽိဝ်လူမ်းဢွၼ်ႇဝိတ်းဝိတ်းသေ ႁဵတ်းၵႂၢမ်းမူၼ်ႈလူၺ်ႈၸွမ်း ၵၢၼ်မၼ်းယူႇ။