ၶႅၵ်ႇ/တွၼ်ႈသၢဝ်းပႅတ်ႇ
တီႈၸၼ်ႉၸွမ်ပၢႆးယႃႈယႃ ။
ၽူၺ်းလႄႈဢူၺ်းၵေႃႉမၼ်း ငိုၼ်းႁွမ် မႃးႁူပ်ႉၺႃးၸၢႆးၸၢႆးသေ -
“ ၸၢႆးၸၢႆး ... တေဢၢင်ႈၵႂႃႇလႂ် ... ? ”
“ ဢမ်ႇၵႂႃႇလႂ်ၼင်ႇၵဝ်ႇ ၽူၺ်းၶဝ်လူး ... ”
“ ႁႃးငိုၼ်းႁွမ် ဢၢင်ႈၵႂႃႇၼင်ႈဢဵၼ်ႈတၢင်းပုၼ်ႉၼႆဢိူဝ်ႈ ... ”
“ ၵႂႃႇလႄႈ ... ပေႃးၼႆၵေႃႈ ... ”
ၶဝ်သၢမ်ၵေႃႉ ၵႂႃႇတီႈတင်ႇၼင်ႈတီႈၼိုင်ႈသေ ငိုၼ်းႁွမ်ၸင်ႇဝႃႈ-
“ ၽူၺ်း ... မိူဝ်ႈဝၼ်းၵိူတ်ႇၽူၺ်းၼၼ်ႉ ၵူၼ်းႁွင်ႉၵႂၢမ်းၸေးၵျေႃႉ ... ၼေႃ ... ? ”
“ ၸေးၸိူင်ႇႁိုဝ် ... ? ”
“ ဢေႃ ... ၵူၼ်းႁွင်ႉၵႂၢမ်းမီးၵူႈမဵဝ်းၼႆၵႂႃႈ ... ၼႂ်းၵူၼ်းႁွင်ႉၵႂၢမ်းတင်းသဵင်ႈၼၼ်ႉ ဢၼ်လၢၵ်ႇလၢႆးသေပိူၼ်ႈတႄႉ ပဵၼ်ၸၢႆးၼွင်ႉယဝ်ႈ ... ... ”
“ လၢၵ်ႈလၢႆးၸိူင်ႉႁိုဝ် ... ? ငိုၼ်းႁွမ် ”
“ ဢေႃ ...ၵႃႈၵွၼ်ႇပူၼ်ႉမႃးၼၼ်ႉ ၵႂၢမ်းတႆးၵဝ်ႇဢၼ်ဝႃႈၼၼ်ႉ ငိုၼ်းႁွမ် ဢမ်ႇတွၼ်ႉၶဝ်ႈၸႂ်ၵူၺ်း ...ဝၼ်းၼၼ်ႉ လႆႈငိၼ်းၵႂၢမ်းၸၢႆးၼွင်ႉႁွင်ႉသေ ၶႂ်ႈထုၵ်ႇၸႂ်ဝႆႉဢိူဝ်ႈ ... ၵွပ်ႈသင်ၼႆ လွင်ႈဝႃႈ သဵင်ၵႂၢမ်းတႆးၵဝ်ႇႁဝ်းၼႆႉ ပဵၼ်သဵင်ယဵၼ်ၸႂ်ၼႆ ... ငိုၼ်းႁွမ်ၸင်ႇႁႃႁူႉ ၶမ်ႈဝႃးၵူၺ်းယဝ်ႈ”
“ ပေႃးထုၵ်ႇၸႂ်ၼႆၵေႃႈ ... ႁွင်ႉၸၢႆးၼွင်ႉမိူဝ်းဝတ်ႉပၼ်ထႅင်ႈတႃႇငိုၼ်းႁွမ်ႁေ ယဝ်ႉၼႃႇ ... ”
“ ပေႃးဝၼ်းၵိူတ်ႇငိုၼ်းႁွမ်မႃးၼႆ ငိုၼ်းႁွမ်တေႁွင်ႉလႆ ... တေလႆႈႁဵတ်းႁိုဝ် ၵပ်းသိုပ်ႇလႃႇ ... ? ၽူၺ်း ... ”
“ ၼေႈ ... ၵပ်းသိုပ်ႇတီႈၸၢႆးၸၢႆးလႄႈ ... မၼ်းယူႇတီႈႁိူၼ်း ၸၢႆးၸၢႆးၶဝ်ဢိူဝ်ႈ... ”
“ တႄႉႁႃႉ ... ? ၸၢႆးၸၢႆး ... ”
“ ၸႂ်ႈဢိူဝ်ႈ ... မၼ်းယူႇလူၺ်ႈႁဝ်းဢိူဝ်ႈ ... ”
“ တင်းၸၢႆးၸၢႆး ႁေပဵၼ်ပီႈၼွင်ႉၵၼ်ႁႃႉ ... ? ”
“ ဢႃ ... ဢမ်ႇၸႂ်ႈ ... ”
“ ဢိုဝ်ႈ ... ပေႃးဝႃႈၸၢႆးၸၢႆးလႄႈ မၼ်း ပဵၼ်ပီႈၼွင်ႉၵၼ်ၼႆ ပိူၼ်ႈတေယုမ်ႇယူႇၵူၺ်း ...ၵွပ်ႈသင်ၼႆ ပၵ်းပိူင်ၼႃႈတႃ ၶႂ်ႈငၢႆးၵၼ်ဝႆႉလူး”
“ ႁိုဝ်ႉ ... ႁဝ်းဢမ်ႇၶႂ်ႈၸၢပ်ႈၶိူဝ်း တင်းၵူၼ်းဝၢၼ်ႈၼွၵ်ႈၸိူင်ႉၼၼ် ဢမ်ႇမီးသရေႇ ... ”
ၽူၺ်းၸင်ႇၶဝ်ႈဝႃႈ -
“ ၸၢႆးၸၢႆး ... ၵူၼ်းဝၢၼ်ႈၼွၵ်ႈၵေႃႈ ပဵၼ်ၵူၼ်း ... ၵူၼ်းၼႂ်းဝဵင်းၵေႃႈ ပဵၼ်ၵူၼ်းၼင်ႇၵၼ်ၵူၺ်း ... ဢမ်ႇၸႂ်ႈႁႃႉ ... ? ”
“ ပဵၼ်ၵူၼ်းသေတႃႉ ... ႁိုဝ်တေၵႂႃႇမိူၼ်ၵၼ် ... ”
“ ဢမ်ႇမိူၼ်ၵၼ် ၸိူင်ႉႁိုဝ် ... ? ”
“ ယႃႇပေတူၺ်းၵႆ ... တူၺ်းဢဝ်ၸၢႆးၼွင်ႉ ႁွင်ႉၵႂၢမ်း မိူဝ်ႈၶမ်ႈဝႃးၼၼ်ႉလေႃႇ ... မၼ်းမႃးႁွင်ႉၵႂၢမ်းဝၢၼ်ႈၼွၵ်ႈမၼ်း ၼႂ်းဝဵင်းၼၼ်ႉ တႃႉလီၶႂ်ႈၶူဝ်လႃႈ ... ”
“ လီထွမ်ယူႇလူး ... ၸၢႆးၸၢႆး ... ”
“ ဢႃ ... ဢမ်ႇၶဝ်ႈၶႂၢင်ႇမၼ်းလူး ... သင်ၸၢႆးၸၢႆးတၼ်းႁူႉၼႆ တေဢမ်ႇပၼ်ႁႂ်ႈမၼ်းႁွင်ႉၵူၺ်း ... ၽူၺ်း ... ၽူၺ်းၸႂ်ႉမၼ်းႁွင်ႉႁဵတ်းသင်ၵေႃႈ ဢမ်ႇႁူႉယဝ်ႈ ... ? ”
“ ဢေႃ ... ၽူၺ်းဝႃႈတႄႉ ဝၼ်းၵိူတ်ႇၽူၺ်းၼၼ်ႉ ... ၽူၺ်း မိုတ်ႈၽႂ်ၵေႃႈ ၽူၺ်းၸႂ်ႉႁွင်ႉၵႂၢမ်းၵူႈၵေႃႉယဝ်ႈ ... မၢင်ၵေႃႉပဵၼ်လႆႈသေတႃႉ မၢင်ၵေႃႉတႄႉဢမ်ႇပဵၼ်လႆႈလူး ... ၸၢႆးၼွင်ႉၵေႃႈ မၼ်းဢမ်ႇၶႂ်ႈႁွင်ႉၼင်ႇၵဝ်ႇ ၽူၺ်း တဵၵ်းၸႂ်ႉမၼ်းႁွင်ႉပုၵ်ႈၼိုင်ႈ ၼႆလႄႈ ... မၼ်းၸင်ႇႁွင်ႉယဝ်ႈ ... ”
“ ၵွပ်ႈသင် ... ? မၼ်းသမ်ႉႁွင်ႉသွင်ပုၵ်ႈ ... လႃႇ ”
“ ႁွင်ႇသွင်ပုၵ်ႈၵေႃႈ ၸၢင်ႈပဵၼ်သင် ? လီယူႇလူး ... ”
ၸၢႆးၸၢႆး ထူၺ်ႈၸႂ်လူင် ၵမ်းၼိုင်ႈႁႅင်းႁႅင်းယူႇ၊ ၽွင်းၼၼ်ႉငိုၼ်းႁွမ်ၸင်ႇဝႃႈ -
“ ပုၵ်ႈၵမ်းလိုၼ်း ... မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်းၼၼ်ႉ ၸၢႆးၼွင်ႉႁွင်ႉလႆႈၶႅမ်ႉတႄႉဢိူဝ်ႈ ... ၼေႃ ... ? ၽူၺ်း ... ”
ၽူၺ်း ဢမ်ႇၸၢင်ႈတၵ်းသဵင် ၊ ငိုၼ်းႁွမ်ၶိုၼ်းသိုပ်ႇလၢတ်ႈဝႃႈ -
“ ယူဝ် ၸၢႆးၼွင်ႉ ၵေႃႉပဵၼ်မၢဝ်ႇဝၢၼ်ႈၼွၵ်ႈ ... ယူဝ်ၽူၺ်း သမ်ႉပဵၼ် ၼွင်ႉတႆးဝဵင်း ... ႁိုဝ်ၵေႃႈ ဢမ်ႇႁူႉလူင် ... ? ”
ၽူၺ်း ဢဝ်ငွၵ်းသွၵ်ႇမၼ်း ဢီးတမ်ပၼ်ငိုၼ်းႁွမ်ၵမ်းၼိုင်ႈသေ-
“ ငိုၼ်းႁွမ်ၼႆႉ ၵေႃႈ လၢတ်ႈသင်ၵေႃႈဢမ်ႇႁူႉ ... ”
“ ၶိၵ်း ... ၶိၵ်း ... တႄႉဢိူဝ်ႈၽူၺ်း ... မၼ်းပဵၼ်မၢဝ်ႇဝၢၼ်ႈၼွၵ်ႈၵေႃႉၼိုင်ႈသေ ႁွင်ႉၵႂၢမ်းမၢၵ်ႇသၢဝ်တႆးဝဵင်းၵႂႃႈ ... သၢဝ်တႆးဝဵင်း ၸွင်ႇတေၶိုၼ်းႁၵ်ႉမၼ်းႁိုဝ်ဢမ်ႇႁူႉ ... ? ၼႆဝႃႇ ... ၶိၵ်း ... ”
“ ႁိုၺ်ႉ ... ငိုၼ်းႁွမ် ... ယႃႇပေလၢတ်ႈယဝ်ႈ ... ပေႃးငိုၼ်းႁွမ် လႆႈၸႂ်ၼႆၵေႃႈ ... ငိုၼ်းႁွမ်ၵႂႃႇႁၵ်ႉမၼ်းလႃႈ ... ”
“ ၶိၵ်း ... ၶိၵ်း ... ၸၢႆးၼွင်ႉ ဢမ်ႇမႃးႁွင်ႉၵႂၢမ်းၸိူင်ႉၼၼ် ပၼ်ႁဝ်းလႄႇ ... သင်ဝႃႈ ႁွင်ႉၵႂၢမ်းၸိူင်ႉၼၼ်ပၼ်ႁဝ်း ၼႆတႄႉ ... တေၸႂ်ၸပ်းသေ ၼွၼ်းဢမ်ႇလပ်းတင်းၶိုၼ်းၵွၼ်ႇယဝ်ႈ ... ၽူၺ်းၼႃႇ ၶမ်ႈဝႃးၼွၼ်းလပ်းယူႇႁႃႉ ... ? ”
“ လပ်းၼႃႇၽႅဝ်ယဝ်ႈ ... ”
“ လပ်းသေ ... ဢမ်ႇၽၼ်ႁၼ်မၢဝ်ႇဝၢၼ်ႈၼွၵ်ႈႁႃႉ ... ?
“ ဢႃ ... ငိုၼ်းႁွမ်ၼႆႉ ... တေၺႃးၵိၼ်ယူႇၼႃႈ ... ၵႂႃႇ... ၵႂႃႇ ... ယႃႇပေမႃးလၢတ်ႈၼမ်ယူႇယဝ်ႈ ... ”
ၽူၺ်း ဢၢင်ႈႁႅမ်ငိုၼ်းႁွမ်လႄႈ ငိုၼ်းႁွမ်ၵေႃႈ ၼႅတ်ႈလုၵ်ႉပၢႆႈယၢၼ် ၽႂ်းၽႂ်းသေ -
“ ၶိၵ်း ... ၶိၵ်း ... ဢေႃႈ ... ၽူၺ်း ... ငိုၼ်းႁွမ်လူဝ်ႇၵႂႃႇသူင်ႉပပ်ႉ တီႈတႆးၵေႃႉငိုၼ်းႁွမ်ဢိူဝ်ႈၼႆႉ ... ငိုၼ်းႁွမ် တေၵႂႃႇသူင်ပပ်ႉၵမ်ႉၼိုင်ႈၵွၼ်ႇၼႃႈ ... ”
ငိုၼ်းႁွမ်ဝႃႈၼၼ်သေ ၵႂႃႇသူင်ပပ်ႉမၼ်းယူႇယဝ်ႉ ၊ တီႈၼၼ်ႈ ၵိုတ်းဝႆႉ ၸၢႆးၸၢႆးလႄႈ ၽူၺ်းၵူၺ်းယဝ်ႈ။ ၸၢႆးၸၢႆးၵုမ်ႇဝူၼ်ႉၸွမ်း ၶေႃႈၵႂၢမ်းဢၼ်ငိုၼ်းႁွမ် လၢတ်ႈယွၵ်ႇၽူၺ်းၼၼ်ႉသေ မၼ်းပဵၼ်တၢင်းၼၵ်းၸႂ်ဝႆႉယူႇ ၵွပ်ႈၼႆ မၼ်းၸင်ႇထူၺ်ႈၸႂ်လူင်ႁႅင်းႁႅင်း ထႅင်ႈၵမ်းၼိုင်ႈယူႇယဝ်ႈ -
“ ၸၢႆး ... ၸၢႆး ... ပႄႉထူၺ်ႈၸႂ်လူင် ႁဵတ်းသင် ? ”
“ ဢေႃ... ၽူၺ်း ၸၢႆးၸၢႆးၶႂ်ႈထၢမ်ၽူၺ်း ...လွင်ႈၼိုင်ႈဢိူဝ်ႈ”
“ လွင်ႈသင် ... ? ထၢမ်လႄႈ ... ”
“ ၵႂၢမ်း မၢဝ်ႇဝၢၼ်ႈၼွၵ်ႈႁၼ်ၼွင်ႉတႆးဝဵင်းၼၼ်ႉ ၽူၺ်းလႆႈၸႂ်ယူႇႁႃႉ ... ? ”
ၽူၺ်းယုမ်ႉၵမ်းၼိုင်ႈသေ -
“ ၸၢႆးၸၢႆး ... ၵႂၢမ်းပုၵ်ႈၼၼ်ႉ ၽူၺ်းတိုၼ်းလႆႈၸႂ် ထုၵ်ႇၸႂ်မႃး ၸဵမ်မိူဝ်ႈတေၸႃႉဢွၵ်ႇၼၼ်ႉယဝ်ႈ ... ၵွပ်ႈသင်ၼႆ ရမ်ႇမၼ်းၵေႃႈလီ ၶေႃႈမၼ်းၵေႃႈၶႅမ်ႉ ... ၵႂၢမ်းမၼ်းၵေႃႈ သဵင်ဝၢၼ်လူး ... ”
“ ဝႆႉသေၵွၼ်ႇလႄႈ ... ဢၼ်ၸၢႆးၼွင်ႉႁွင်ႉၵႂႃႇ ၶမ်ႈဝႃးၼၼ်ႉလူး ... ၽူၺ်း ... လႆႈၸႂ်ယူႇႁႃႉ ... ? ”
“ ႁႃး ... ၸိူဝ်းဢၼ်မႃးႁွင်ႉၵႂၢမ်းပၼ် ဝၼ်းၵိူတ်ႇၽူၺ်းၼၼ်ႉ ၽူၺ်း ၸူမ်းသိူဝ်း လႆႈၸႂ်ၵူႈပုၵ်ႈယဝ်ႈ ... ”
“ ယူဝ်ၶေး ... ၽူၺ်း တေလႆႈၸႂ် မၢဝ်ႇဝၢၼ်ႈၼွၵ်ႈ လိူဝ်သေပိူၼ်ႈယူဝ်ႉ ... ? ”
“ လႆႈၸႂ်ဢမ်ႇလႆႈၸႂ် ၼႆၼၼ်ႉ ဝႆႉသေၵွၼ်လႄႈ ... ၵူၺ်းၵႃႈ ၽူၺ်း ၶဝ်ႈၸႂ်ၼိူဝ်မၼ်းဢိူဝ်ႈ ... ၵွပ်ႈသင်ၼႆ မိူဝ်ႈၸဝ်ႉၼၼ်ႉ ၽူၺ်းယူဝ်ဝႃႈ မၼ်းတေမေႃႁွင်ႉၵႂၢမ်းပၢၼ်ၵဝ်ၵူၺ်း ၼႆယဝ်ႈ ... ၵူၺ်းၵႃႈ ... ၽူၺ်း လွမ်ဢၢမ်း လွင်ႈဢၼ်မၼ်းမေႃႁွင်ႉပႃး ၵႂၢမ်းပၢၼ်ႇမႂ်ႇသေ မေႃတႅမ်ႈပႃး ပိူင်ႁွင်ႉၵႂၢမ်း (Note ) ၼၼ်ႉယဝ်ႈ ... ”
“ ပေႃးလႃႈ ... ၽူၺ်း ... ယႃႇပေလၢတ်ႈၶိူဝ်းမၼ်းယဝ်ႈ ... ဢမ်ႇၶႂ်ႈငိၼ်း ... ”
“ ၵွပ်ႈသင် ... ? ၸၢႆးၸၢႆးသမ်ႉဢမ်ႇၶႂ်ႈငိၼ်း ... ? ”
“ ဢမ်ႇၶႂ်ႈၵပ်းၵၢႆႇလူၺ်ႈ မၼ်းဢိူဝ်ႈ ... ”
“ ပေႃး ၵပ်းၵၢႆႇမၼ်း ပဵၼ်သင် ? ၸၢႆးၸၢႆး ... ”
“ ပဵၼ်သင်ဢမ်ႇပဵၼ်သင်ၼႆၼၼ်ႉတႄႉ ဢမ်ႇၸၢင်ႈလၢတ်ႈ... ပေႃးဢဝ်ၵၢင်ၸႂ်ၸၢႆးၸၢႆးဝႃႈတႄႉ ... ဢမ်ႇပေႃးၶႂ်ႈႁႂ်ႈၽူၺ်း ၵပ်းၵၢႆႇမၼ်း”
ၽူၺ်း ၵိုင်ႉၵၢင်ႉလွမ်တူၺ်း ၼႃႈၸၢႆးၸၢႆးသေ -
“ ပဵၼ်သင် ... ? ၸၢႆးၸၢႆး ... ၽူၺ်းလႄႈ ၸၢႆးၼွင်ႉ မိုတ်ႈၵၼ်ၼႆႉ ၸၢႆးၸၢႆးဢမ်ႇလႆႈၸႂ်ႁႃႉ ? ”
“ ၸႂ်ႈဢိူဝ်ႈ ... ၽူၺ်း ... ၽူၺ်း ၵႂႃႇမိုတ်ႈၵူၼ်းၸၢႆးၵေႃႉလႂ်ၵေႃႈ ... ၸၢႆးၸၢႆးဢမ်ႇလႆႈၸႂ်ၵူၺ်း ... ”
“ ဢေႃ ... ၸၢႆးၸၢႆး ...ၵူၼ်းဢၼ်ဝႃႈၼၼ်ႉ လူဝ်ႇလႆႈမီး ၵေႃႉမိုတ်ႈၵိုဝ်းၼမ်ၼမ်ဢိူဝ်ႈ ... မိုတ်ႈၼမ်ၵႃႈႁိုဝ် လီၵႃႈၼၼ်ႉယဝ်ႈ ... ”
“ ပေႃးမိုတ်ႈလိူဝ်ၼႃႇၽႅဝ်တႄႉ...ဢမ်ႇသၢင်ႇထုၵ်ႇယူဝ်ႉၽူၺ်း”
“ ၵွပ်ႈသင် ... ? ဢမ်ႇသၢင်ႇထုၵ်ႇ ...ၸၢႆးၸၢႆး လၢတ်ႈသိုဝ်ႈသိုဝ်ႈလူး ... ယွၼ်ႉပိူဝ်ႈသင်လႄႈ ၸၢႆးၸၢႆး ဢမ်ႇႁၢၼ်ႉၸႂ်ၼိူဝ် ၸၢႆးၼွင်ႉ မၼ်းပဵၼ်ၵူၼ်းသိုဝ်ႈၵူၼ်းယူဝ်းသေ ပဵၼ်ၵူၼ်းယူႇလူၺ်ႈၸၢႆးၸၢႆးၶဝ် ဢမ်ႇၸႂ်ႈႁႃႉ ... ? ... ”
“ ၵွပ်ႈသင် ဢမ်ႇႁၢၼ်ႉၸႂ်မႅၼ်ႈၼိူဝ်မၼ်း ၼႆၼၼ်ႉ ... ၵွပ်ႈပိူဝ်ႈ ဢမ်ႇၶႂ်ႈႁႂ်ႈမၼ်းလႄႈ ၽူၺ်း ... ... ”
“ ပေႃးလႃႈ ... ၸၢႆးၸၢႆး ... ပေႃးၸၢႆးၸၢႆးမိုတ်ႈၽူၺ်းၼႆ ယႃႇပေလၢတ်ႈ ...ယႃႇပေၶႅၼ်ၽူၺ်း ၸိူင်ႉၼင်ၼႆ...ၽူၺ်းဢမ်ႇၵျိူၵ်ႈၵူၺ်း”
“ ၽူၺ်း ... ႁႃးသွင်ၵေႃႉၼႆႉမိူဝ်းၼႃႈမႃး တေပဵၼ်မေႃယႃ တင်းသွင်ၵေႃႉသေ ဢမ်ႇၵႃး ...ပေႃႈမႄႈႁဝ်းၶဝ်ၵေႃႈ လႆႈၸႂ်သေ တေမၵ်းမၢႆၼႃႈႁိူၼ်းပၼ်ႁႃးလႄႈ ... ၸၢႆးၸၢႆး ၸင်ႇဢမ်ႇၶႂ်ႈႁႂ်ႈ ၽူၺ်းမိုတ်ႈမၼ်းယဝ်ႈ၊ မၼ်းၽႅဝ်မႃးတႃႈၵုင်ႈသေ တေႃႉတႄႉ မႃးဝႄႉၼွၼ်းႁိူၼ်းၽူၺ်းၶဝ် ၵႅပ်ႉၼိုင်ႈ ... ၽူၺ်းသမ်ႉ ပေႃးမိုတ်ႈမၼ်းတၢၼ်ႇၼႆႉ ၼႆ ဢမ်ႇသၢင်ႇထုၵ်ႇယူဝ်ႉ ... ? ၽူၺ်း ... ဝူၼ်ႉတူၺ်းလႄႈ ... ”
ၽူၺ်း ... ထူၺ်ႈၸႂ်လူင် ... ၵမ်းၼိုင်ႈသေ -
“ ၸၢႆးၸၢႆး ... ၽူၺ်းလႄႈၸၢႆးၼွင်ႉ ၸင်ႇႁႃႁၼ်ၵၼ်သေ ၸင်ႇႁႃမိုတ်ႈၵၼ်ဢမ်ႇၸႂ်ႈၵူၺ်း ... ၸဵမ်မိူဝ်ႈၽူၺ်းၶဝ် ၵႂႃႇဢႅဝ်ႇမေႇမဵဝ်ႉၼၼ်ႉ ၽူၺ်းၶဝ်ပေႃးမိုတ်ႈၵၼ်မႃး ၸဵမ်မိူဝ်ႈဝၼ်းၼၼ်ႉယဝ်ႈ ...ၸၢႆးၸၢႆး လွင်ႈဢၼ်ပေႃႈမႄႈႁဝ်းၶဝ် တေမၵ်းမၢႆပၼ်ၵၼ်ၼႆၼၼ်ႉတႄႉ ၶၢဝ်းမၼ်းပႆႇထိုင်လူင် ... ယၢမ်းလဵဝ်တႄႉ ၽူၺ်းလႄႈၸၢႆးၸၢႆးၼႆႉ တိုၵ်ႉပဵၼ်ဝႆႉ ဢူၺ်းၵေႃႉမိုတ်ႈၵၼ်ယူႇၵူၺ်း ... ၶေႃႈၵႂၢမ်း ဢၼ်လိူဝ်သေ လွင်ႈမိုတ်ႈၵိုဝ်းၼၼ်ႉၵေႃႈ ၸၢႆးၸၢႆး ယႃႇပေလၢတ်ႈယဝ်ႈ ... ”
ၸၢႆးၸၢႆး ဢမ်ႇၸၢင်ႈသိုပ်ႇလၢတ်ႈသင်သေလႄႈ ငဝ်မိုင်ဝႆႉယူႇယဝ်ႈ ၊ ယူႇၵမ်းၼိုင်ႈ ၸၢႆးၸၢႆးၸင်ႇဝႃႈ -
“ ၽူၺ်း ... ပေႃးယဝ်ႉၸၼ်ႉၸွမ်ယဝ်ႉၼႆတႄႉ တေလႆႈလၢတ်ႈယူႇႁႃႉ ... ? ”
“ ၼၼ်ႉတႄႉ ... မိူဝ်ႈလႂ်ယဝ်ႉမႃးၵွၼ်ႇ ထုၵ်ႇလီလၢတ်ႈၵေႃႈ ၸင်ႇၵွႆႈလၢတ်ႈလႃႈ ... ... ”
ၸၢႆးၸၢႆး ဢမ်ႇၸၢင်ႈၶိုၼ်းဝႃႈသင်ထႅင်ႈယဝ်ႉလႄႈ မၼ်းလွမ်တူၺ်း လူမ်းထွင်းဢဝ်မႂ်မႆႉ ဢၼ်ပိဝ်ဝူင်ၵႂႃႇၸွမ်းလူမ်းၼၼ်ႉယူႇ။