ၶႅၵ်ႇ/တွၼ်ႈသၢဝ်း
ၵၢင်ၼႂ် ၸၢႆးၼွင်ႉႁူတ်းသူၼ်မွၵ်ႇသေ မႄးလုမ်းလႃး တူၼ်ႈမွၵ်ႇ ၼႂ်းဝၢင်းႁိူၼ်းၶဝ်ယူႇ၊ ယွၼ်ႉပိူဝ်ႈ ၸၢႆးၼွင်ႉ မေႃလုမ်းလႃးတူၼ်ႈမွၵ်ႇလႄႈ မွၵ်ႇဢွၼ်ႇၼႂ်းသူၼ်ၵီႈၶွင်ႇႁၢင်ႈလီ ပဵၼ်တီႈလီယဵမ်ႈလီတူၺ်း လီသိူဝ်းၸႂ်ႁွမ်ႁူၺ်းတႄႉတႄႉ။ ၽွင်းမိူဝ်ႈ မၼ်းတိုၵ်ႉၵႅတ်းမွၵ်ႇယူႇၼၼ်ႉ လုင်းၸၢႆးၽေႇလႄႈ ပႃႈၼၢင်းမွၼ်းၶဝ် ၵႂႃႇပႆယၢင်ႈတၢင်း ၶိုၼ်းပွၵ်ႈမႃးသေ မႃးၺႃး ၸၢႆးၼွင်ႉၼႂ်းသူၼ်လႄႈ -
“ ၸၢႆးၼွင်ႉ ... ”
“ ဢေႃႈ ... ”
“ ၸူဝ်ႈၸၢႆးၼွင်ႉ မႃးယူႇၸွမ်းလုင်းၶဝ်ၼႆႉ သူၼ်မွၵ်ႇၼႂ်းဝၢင်းႁိူၼ်းၸိူဝ်းၼႆႉ သမ်ႉပေႃးၶႅမ်ႉလႅပ်ႈ ႁၢင်ႈလီဝႆႉ ၵူႈတီႈတီႈယဝ်ႈ ၼႆႉ... ”
လုင်းၸၢႆးၽေႇ လွမ်တူၺ်းသူၼ်မွၵ်ႇသေ သိူဝ်းၸႂ်ဝႆႉယူႇ -
“ ဢိူဝ်ႈ ... ဢိူဝ်ႈ ... ၶႅမ်ႉဢိူဝ်ႈ ... ၶႅမ်ႉဢိူဝ်ႈ ... လူဝ်ႇသင်ၵေႃႈ လၢတ်ႈလႄႈၼႃႈ ... ယႃႇပေၵဵင်ၸႂ်သင် ... ”
ၵၢင်ၸႂ်ၸၢႆးၼွင်ႉ ၶႂ်ႈလႆႈၵိမ်းၵႅတ်းမွၵ်ႇလႄႈ မၼ်းၸင်ႇလၢတ်ႈဝႃႈ-
“ ဢေႃႈ ... ပေႃႈလဵင်ႉ ၶႃႈၶႂ်ႈလႆႈ ၵိမ်းၵႅတ်းမွၵ်ႇ မၢၵ်ႈၼိုင်ႈဢေႃႈ ... ”
ပႃႈၼၢင်းၶွင်ႇ ၸင်ႇဝႃႈ -
“ တီႈလုင်းသၢင်ႇတုၺ်ႉ မီးယူႇဢမ်ႇၸိုဝ်ႈ ႁိုဝ် ... ? ”
“ ဢေႃႈ ... မႄႈလဵင်ႉ ၼၼ်ႉပဵၼ် ၵိမ်းၵႅတ်းၶူဝ်းၵူၺ်းဢေႃႈ ... ၶႃႈဝႃႈ ၶႂ်ႈလႆႈၵိမ်းၵႅတ်းမွၵ်ႇ ၼႆဢေႃႈ ... ”
“ ၵိမ်းၵႅတ်းၶူဝ်းၵေႃႈ ၵႅတ်းမွၵ်ႇလႆႈယူႇဢမ်ႇၸႂ်ႈႁႃႉ ... ? ”
“ လႆႈတႄႉ လႆႈယူႇ မႄႈလဵင်ႉ ... ၵူၺ်းၵႃႈ ပေႃးဢဝ်ၵိမ်းၵႅတ်းၶူဝ်းၼၼ်ႉ ၵႅတ်းၼႆ မၼ်းသၢင်ႈတူၼ်ႈမွၵ်ႇ ဢေႃႈ ... ”
ပႃႈၼၢင်းမွၼ်း ဢမ်ႇၸၢင်ႈၶိုၼ်းတွပ်ႇ ၵႂၢမ်းၸၢႆးၼွင်ႉလႄႈ မၼ်းဢမ်ႇပေႃးႁၢၼ်ႉၸႂ်၊ လုင်းၸၢႆးၽေႇ ၸင်ႇဝႃႈ -
“ ၸႂ်ႈတႄႉဢိူဝ်ႈ ... လူဝ်ႇတႄႉဢိူဝ်ႈ ... ပေႃႈလဵင်ႉတေသိုဝ်ႉမႃးပၼ်လႆ တၢင်ႇမဵဝ်းလူး ... တေလူဝ်ႇသင်ထႅင်ႈ ... ”
“ ဢမ်ႇလူဝ်ႇၶႃႈယဝ်ႈ ... ပေႃႈလဵင်ႉ ... ”
လုင်းၸၢႆးၽေႇၶႃ ပႃႈၼၢင်းမွၼ်း သိုပ်ႇပႆၶဝ်ႈမႃး ၼႂ်းႁိူၼ်းသေ ၼႂ်းၸႂ်ပႃႈၼၢင်းမွၵ်ႇတႄႉ ဢမ်ႇႁၢၼ်ႉၸႂ် ၼိူဝ်ၵိမ်းၵႅတ်းမွၵ်ႇၼၼ်ႉသေတႃႉ မၼ်းဢမ်ႇလိူဝ်လႆႈ ၶိင်းလူင်မၼ်း။
+ + + + + + +
ထႅင်ႈဝၼ်းၼိုင်ႈ လုင်းၸၢႆးၽေႇ သိုဝ်ႉၵိမ်းၵႅတ်းမွၵ်ႇသေ ၽႅဝ်ႁိူၼ်းမႃးယဝ်ႈ၊ မၼ်းမႃးႁၼ် လုၵ်ႈမၼ်းၸၢႆးၸၢႆးလႄႈ မၼ်းၸင်ႇဝႃႈ -
“ လုၵ်ႈၸၢႆး ... ႁိူဝ်ႈ ... ဢဝ်ၵိမ်းၵႅတ်းမွၵ်ႇၼႆႉ ၵႂႃပၼ်ၸၢႆးၼွင်ႉႁေလူး ... ... ”
ၸၢႆးၸၢႆး ဢမ်ႇၶႂ်ႈၵႂႃႇပၼ်သေတႃႉ မၼ်းဢမ်ႇလိူဝ်လႆႈ ၵႂၢမ်းဢူႈၶဝ်လႄႈ မၼ်းၸင်ႇဢဝ်ၵိမ်းၵႅတ်းမွၵ်ႇၼၼ်ႉသေ ၵႂႃႇၸူးၸၢႆးၼွင်ႉ တီႈသိုင်ႇၵႃးယဝ်ႈ၊ လႆႈႁၼ် ၸၢႆးၼွင်ႉၺွပ်းမႃသေ ဢဝ်ၶွၼ်ႉဢွၼ်ႇ လႅမ်ႈၼိုင်ႈႁႅမ်မႃ ဢၢႆႈသီႇတႃယူႇလႄႈ သဵင်မႃ ႁွင်ႉယူႇငႅၵ်းငႅၵ်းယဝ်ႈ။
“ ဢၢႆႈၼွင်ႉ ... မႂ်းႁႅမ်မႃၵဝ်ႁဵတ်းသင် ? ”
“ ဢေႃႈ ... ပီႈၸၢႆး မၼ်းၵႆႉၶူပ်းလဵၼ်ႈသွၵ်းတိၼ်ဢေႃႈ ... ပေႃးဢမ်ႇသင်သွၼ်မၼ်းၼႆ ... ၵူဝ်မၼ်းယၢမ်ႈဢေႃႈ ... ”
ၸၢႆးၼွင်ႉၸင်ႇဝႃႈၼၼ်သေ ဢဝ်မႆႉဢွၼ်ႇ ၽတ်ႉႁႅမ်သူပ်းဢၢႆႈသီႇတႃယူႇ -
“ ဢၢႆႈသီႇတႃ မႂ်းတေၶူပ်းထႅင်ႈၼႄႇ ... ... ”
ငႅၵ်း ... ... ငႅၵ်း ... ... ...
“ ဢၢႆႈၼွင်ႉ ... ပေႃးလႃႈ ... ယႃႇပေႁႅမ်ယဝ်ႈ ... ၶႂ်ႈၶူပ်းၵေႃႈ ပွႆႇမၼ်းၶူပ်းလႄႈ ... ... ”
“ ဢႃ ... ပီႈၸၢႆး... မၼ်းၶူပ်းၶႅပ်းတိၼ်ၶႃႈ သွင်ပွၵ်ႈယဝ်ႈ ... ဢၢႆႈသီႇတႃၼႆႉ ...ပေႃးဢမ်ႇသွၼ်မၼ်းလီလီၼႆ ၵူဝ်မၼ်းၶူပ်းထႅင်ႈ တိၵ်းတိၵ်းဢေႃႈ ... ”
“ ပေႃးလႃႈ ... ၼႆ ... ဢမ်ႇလူဝ်ႇသင်သွၼ်ထႅင်ႈယဝ်ႈ ... ၸိုဝ်ႈမၼ်းမႂ်းႁွင်ႉဝႃႈႁိုဝ်ၵေႃ ... ”
ၸၢႆးၼွင်ႉ လွမ်တူၺ်းၼႃႈမႃတူဝ်ၼၼ်ႉသေ ၶိုၼ်းလၢတ်ႈဝႃႈ -
“ ယွၼ်ႉပိူဝ်ႈ ... တႃမၼ်း မိူၼ်မီးသီႇလုၵ်ႈလႄႈ ၶႃႈႁွင်ႉဝႃႈ ဢၢႆႈသီႇတႃၼႆဢေႃႈ ... တူဝ်ယုၺ်းၼၼ်ႉတႄႉ ၶႃႈႁွင်ႉဝႃႈ ဢၢႆႈယုၺ်း ၼႆယဝ်ႈ ... ၸွင်ႇလႅပ်ႈႁိုဝ် ... ပီႈၸၢႆး... ”
“ ႁိုဝ်ႉ ... ဢမ်ႇလႅပ်ႈၵူၺ်း ...မႃယုၺ်းၼႆႉ ႁွင်ႉဝႃႈၵႅၼ်ႇတူဝ်ႇၼႆလႄႈ ... မႃလမ်ၼႆႉႁွင်ႉဝႃႈ ရမ်ႇပူဝ်ႇ ၼႆလႄႈ ... ”
ၸၢႆးၼွင်ႉ ယၢႆးႁူဝ်မၼ်းသေ ႁွင်ႉတူၺ်းယူႇ -
“ ၵႅၼ်ႇတူဝ်ႇ ... ရမ်ႇပူဝ်ႇ ... ”
မႃသွင်တူဝ်ၼၼ်ႉ ဢမ်ႇၶွၼ်းႁၢင်လႄႈ ၸၢႆးၼွင်ႉၸင်ႇဝႃႈ -
“ ပီႈၸၢႆး ... ၶႃတွင်းၸိုဝ်ႈၵဝ်ႇၵဝ်ႇၶႃ ၼၼ်ႉၵူၺ်း ... ဢေႃႈ ဢၢႆႈသီႇတႃ ... ဢၢႆႈယုၺ်း ... ”
မႃသွင်တူဝ်ၼၼ်ႉ ၸင်ႇၶွၼ်းႁၢင်ၶႃသေ မုင်ႈလွမ်တူၺ်းၸၢႆးၼွင်ႉယူႇ ၸၢႆးၼွင်ႉၸင်ႇဝႃႈ -
“ ၼေႈ ... ၶႃႈဝႃႈယူႇၼႃႇ ... ၶႃတွင်းၸိုဝ်ႈၶႃ ဢၼ်ဢၢႆႈသီႇတႃ ဢၢႆႈယုၺ်း ၼႆၵူၺ်း ... ဢေႃႈ ... ”
“ တွင်းဢမ်ႇတွင်းၵေႃႈ ႁွင်ႉဝႃႈ ၵႅၼ်ႇတူဝ်ႇ ရမ်ႇပူဝ်ႇၼႆၵူၺ်းလႃႈ ယေႃႈ ... ႁိုဝ်ႈ ... ၼႆႉပဵၼ်ၵိမ်းၵႅတ်းမွၵ်ႇ တႃႇမႂ်းဝႃႇ ... ”
ၸၢႆးၼွင်ႉၵေႃႈ ႁပ်ႉဢဝ်ၵိမ်းၵႅတ်းမွၵ်ႇ ဢၼ်ၸၢႆးၸၢႆးဢဝ်မိုဝ်းၽၢႆႇသၢႆႉ ယိုၼ်ႈပၼ်မၼ်းၼၼ်ႉသေ မၼ်းလႆႈႁၼ် ႁွႆးၽႃႉတိူဝ်ႉ တီႈၼိဝ်ႉၸီႉၸၢႆးၸၢႆးလႄႈ မၼ်းၸင်ႇထၢမ်ဝႃႈ -
“ တီႈၼိဝ်ႉၸီႉပီႈၸၢႆးၼၼ်ႉ မီးႁွႆးဢီႈသင်ၶႃႈ ... ”
“ ဢူဝ် ... ႁွႆးသင်ၵေႃႈယဝ်ႉဢိူဝ်ႈ ... မၼ်းဢမ်ႇၵပ်းၵၢႆႇသင်မႂ်း ... ၵိမ်းၼၼ်ႉ ယႃႇပေပၼ်ႁၢႆၼႃ ... ... ”
“ ဢေႃႈ ... ဢေႃႈ ... ဢမ်ႇပၼ်ႁၢႆၶႃႈ ... ...ပေႃႈလဵင်ႉသိုဝ်ႉပၼ်မႃးၶႃႈႁႃႉ ... ? ”
ယွၼ်ႉပိူဝ်ႈ ၸၢႆးၼွင်ႉႁွင်ႉဢူႈၶဝ်ဝႃႈ ပေႃႈလဵင်ႉၼႆလႄႈ မၼ်းဢမ်ႇမႅၼ်ႈႁူမၼ်း ၵွပ်ႈၼၼ် -
“ ဢၢႆႈၼွင်ႉ ... ပေႃးမႂ်းႁွင်ႉတႅတ်ႇတီႇၼႆ ... ယႃႇပေႁွင်ႉဝႃႈ ပေႃႈလဵင်ႉ ... ၵဝ်ဢမ်ႇၵျိူၵ်ႈ ... ”
“ တေလႆႈႁွင်ႉဝႃႈႁိုဝ်ၶႃႈလႃႇ ...... ... ? ထုင်းၸၢမ်ႇတႆးႁဝ်းၶႃႈတႄႉ ႁဝ်းယူႇၸွမ်းၽႂ်ၼႆၵေႃႈ ပေႃႈၸဝ်ႈႁိူၼ်းၼၼ်ႉ ႁဝ်းလႆႈႁွင်ႉဝႃႈ ပေႃႈလဵင်ႉၼႆသေ ... မႄႈၸဝ်ႈႁိူၼ်းၼၼ်ႉ ႁဝ်းလႆႈႁွင်ႉဝႃႈ မႄႈလဵင်ႉၼႆဢေႃႈ ... ... ...”
“ ဢိူဝ်ႈ ... ပေႃးၶႂ်ႈႁွင်ႉၸိုဝ်ႈတႆးၼွၵ်ႈၸိူင်ႉၼၼ် ၵႂႃႇမိူဝ်းႁွင်ႉတီႈမိူင်းသူၼၼ်ႉလႄႈ ... တီႈႁိူၼ်းႁဝ်းၼႆႉတႄႉ ပေႃႈမႂ်းႁွင်ႉတႅတ်ႇတီႇၼႆ ႁွင်ႉဝႃႈဢၢၼ်ႇၵႄႇၼႆလႄႈ ... ပေႃးႁွင်ႉမႃႇမီႇၼႆ ႁွင်ႉဝႃႈဢၢၼ်ႇတီႇၼႆလႄႈ ”
“ တေလႆႈႁွင်ႉပေႃႈလဵင်ႉဝႃႈ ဢၢၼ်ႇၵႄႇ ၼႆသေ တေလႆႈႁွင်ႉမႄႈလဵင်ႉဝႃႈ ဢၢၼ်ႇတီႇ ၼႆၶႃႈႁႃႉ ... ? ”
“ ဢိူဝ်ႈ ... ႁွင်ႉၸိူင်ႉၼၼ်လႄႈ ... တွင်းဝႆႉ ၼႃႈ ... ”
ၸၢႆးၸၢႆးဝႃႈၼၼ်သေ ၶိုၼ်းၶဝ်ႈမိူဝ်း ၼႂ်းႁိူၼ်းယဝ်ႈ ၸၢႆးၼွင်ႉတႄႉဝႆႁူဝ်မၼ်းဝုတ်းဝုတ်းသေ လွမ်ၶူဝ်ယူႇ -
“ ႁီး ... ႁီး ... ဢၢၼ်ႇၵႄႇ ... ဢၢၼ်ႇတီႇ ... ဢၢၼ်ႇၵႄႇ ဢၢၼ်ႇတီႇ ... ”
ၸၢႆးၼွင်ႉ ဢမ်ႇယၢမ်ႈႁွင်ႉလႄႈ ၼင်ႇႁိုဝ်တေလႅပ်ႈသူပ်းမၼ်းၼၼ်ႉ မၼ်းၽိုၵ်းႁွင်ႉလဵၼ်ႈသေ လွမ်ယုမ်ႉယူႇ -
“ ဢၢၼ်ႇၵႄႇ ... ဢၢၼ်ႇၵႄႇ ... ဢၢၼ်ႇတီႇ ... ဢၢၼ်တီႇ”
လုင်းသၢင်ႇတုၺ်ႉ လႆႈမႃးငိၼ်း ၸၢႆးၼွင်ႉၽိုၵ်းႁွင်ႉဝႃႈ ဢၢၼ်ႇၵႄႇ ဢၢၼ်ႇတီႇ ၼႆယူႇလႄႈ မၼ်းၸင်ႇထၢမ်ဝႃႈ -
“ ၸၢႆးၼွင်ႉ ... မႂ်းႁဵတ်းသင်ယူႇၼႆႉ ? ၸိုင်ဝႃႈသင်ယူႇ ? ”
“ ဢေႃႈ ... လုင်း... ၶႃႈၽိုၵ်းႁွင်ႉၸိုဝ်ႈပေႃႈလဵင်ႉမႄႈလဵင်ႉႁဝ်း ႁႂ်ႈမၼ်းလွႆႈသူပ်းမွၼ်ႈသူပ်း ၼႆဢေႃႈ ... ”
“ ႁွင်ႉဝႃႈႁိုဝ် ... ? ”
“ ဢေႃႈ ... လုၵ်ႈၸၢႆးၶဝ် ၸၢႆးၸၢႆး မႃးၸႂ်ႉလႅၵ်ႈဝႃႈ ယႃႇပေႁွင်ႉ ပေႃႈလဵင်ႉမႄႈလဵင်ႉ ၼႆဝႃႈ ... ႁႂ်ႈႁွင်ႉဝႃႈ ဢၢၼ်ႇၵႄႇဢၢၼ်ႇတီႇၶႃႈဝႃႈ ... ဢၢၼ်ႇၵႄႇ ဢၢၼ်ႇတီႇ ဢၢၼ်ႇၵႄႇ ဢၢၼ်ႇတီႇ ... ဢၢၼ်ႇၵႄႇ ဢၢၼ်တီႇ ဢၢၼ်ႇၵႄႇ ... ဢၢၼ်ႇတီႇ ... ”
ၸၢႆးၼွင်ႉ လၢတ်ႈၼႄၼင်ႇၼၼ်သေ ၶဝ်ႈမႃးၼႂ်းသူၼ်မွၵ်ႇ မႃးၸၢမ်းတူၺ်း ၵိမ်းမႂ်ႇမၼ်းယူႇ၊ ဢၢႆႈသီႇတႃလႄႈ ဢၢႆႈယုၺ်းၵေႃႈ ႁဝ်ႇဝုၵ်ႉဝုၵ်ႉသေ ၸွမ်းလင် ၸၢႆးၼွင်ႉမႃးယူႇယဝ်ႈ။