ၶႅၵ်ႇ/တွၼ်ႈသၢမ်သိပ်းႁႃႈ
ႁိူၼ်းၸၢႆးၸၢႆးၶဝ် တီႈတႃႈၵုင်ႈ ။
တီႈႁိူၼ်းၸၢႆးၸၢႆးၶဝ်တႃႈၵုင်ႈတႄႉ ပႃႈယွတ်ႈ လုင်းသၢင်ႇတုၺ်ႉ ပႃႈမွၼ်း လုင်းၸၢႆးၽေႇၶဝ် ဢွၼ်ၵၼ်ၽႅဝ်ႈလုၵ်းၼွၼ်းသေ ၵၢၼ်သုၵ်ႉဝႆႉယူႇ ၊ မႄႈလဵင်ႉလူင် ပႃႈမွၼ်းၸင်ႇဝႃႈ -
“ဢိုဝ်ႈ ... ၸၢႆးၼွင်ႉၼႆႉ ၵဝ်ထၢင်ႇၽိတ်းမၼ်း ယူဝ်ဝႃႈ မၼ်းလၵ်ႉငိုၼ်းၵဝ်ၼႆၼႃး ... တီႈတႄႉ ငိုၼ်းၵဝ် ဢၼ်ႁၢႆၼၼ်ႉ ၵဝ်လိုမ်းတီႈဝႆႉမၼ်းဢိူဝ်ႈ ... ”
ၶူးမေႃယႃလူင် လုင်းၸၢႆးၽေႇၸင်ႇဝႃႈ -
“ ဢိူဝ်ႈ ... ႁဝ်းဝႃႈတီႈသူယူႇလူး ... သူၵႆႉလေႇၼဵပ်းၸွၵ်ႉ ၼဵပ်းၸဵင်ႇတႃႇသေႇယဝ်ႉ ၼႆ ... ”
“ ပေႃး ၸၢႆးၼွင်ႉၸွမ်းမႃးတႄႉ ... ႁဝ်းတေၶိုၼ်းတွင်းပၢၼ်ႇမၼ်းလႆ ... ”
လုင်းသၢင်ႇတုၺ်ႉၵေႃႈ ဢီးၵူႇၼွၼ်းၶၢႆႉသေ -
“ မႄႈလဵင်ႉ ... ၵူႈၼွၼ်းၼႆႉ ဝႆႉတီႈလႂ်တေလီ ... ”
“ဢိူဝ်ႈ ... ဢိူဝ်ႈ ... ၸၢႆးၸၢႆးသင်ႇဝႆႉ ႁႂ်ႈဝႆႉပၼ်ၼႂ်းလုၵ်းၽၢႆႇၸၢၼ်းၼႆႉ ၼႆၼႃႇ ... ဝႆႉပၼ်ႁိမ်းၼႆႉလႄႈ ...... ”
ၶဝ်ဢွၼ်ၵၼ် ပတ်းပတ်းၽဵဝ်ႈၽဵဝ်ႈပၼ် ပုၼ်ႈတႃႇလုၵ်းၼွၼ်း ၸၢႆးၼွင်ႉယူႇ လုင်းသၢင်ႇတုၺ်ႉၸင်ႇဝႃႈ -
“ ဢိူဝ်ႈ ... ပေႃးၸၢႆးၼွင်ႉၶိုၼ်းမႃးၼႆ ... မၼ်းတေဢမ်ႇၼွၼ်းၸွမ်းၵဝ် တီႈၼႂ်းသိုင်ႇၵႃးယဝ်ႉလႄႈ ၵဝ်ၶေႃးၶူမ်ၵျႃႉၼႆႉ ... ”
“ဢိူဝ်ႈ ... ၼႆႉတႄႉ ဢဝ်ၸၢႆးၸၢႆးဝႃႈယဝ်ႉ ... ၸၢႆးၸၢႆးၸႂ်ႉႁၢင်ႈႁႅၼ်းဝႆႉလႄႈ ႁဝ်းလႆႈႁဵတ်းပၼ်ဝႆႉထႃႈၵူၺ်း ... ပႃႈယွတ်ႈ ...ၵႂႃႇဢဝ်ၽႃႈသိူဝ်ႇပၼ် ၼိူဝ်ၵူႇၸိူဝ်းၼႆႉႁေလႄႈ ... ”
“ ဢေႃႈ ... ဢေႃႈ ... ”
လုင်းၸၢႆးၽေႇၵေႃႈ ၼဵၵ်းတူၺ်းၼဵၼ်ၽႆး ၼႂ်းလုၵ်းၽုၺ်ႇတူၺ်း ၽတ်ႉလူမ်းၼႂ်းလုၵ်းသေ -
“ၽႅၼ်ႇသိူဝ်ႇၼိူဝ်ၽိူၼ်လူး ... ဢမ်ႇမီးႁႃႉ ... ၼႆႉ ... ”
“ မီးဢိူဝ်ႈ ... မီးဢိူဝ်ႈ ... ”
“ ပေႃးမီးၵေႃႈ ဢဝ်မႃးသိူဝ်ႇပၼ်လႄႈ ၸၢႆးၸၢႆးဝႃႈ တေဢၢၼ်းႁႂ်ႈၸၢႆးၼွင်ႉ တူၺ်းလိၵ်ႈသေ တေၶိုၼ်းၸႂ်ႉၸၢႆးၼွင်ႉ ယူႇၼွၵ်ႈမၼ်းသေ တွပ်ႇလိၵ်ႈၶိုၼ်းၼႆယဝ်ႈ ... ”
“ ဢိူဝ်ႈ ...မၼ်းၵေႃႈၶႂ်ႈႁႂ်ႈ ၼွင်ႉၸၢႆးမၼ်း ပဵၼ်ၵူၼ်းႁပ်ႉၶူး ၼႆၼႃႇ ... ”
ၶဝ်ဢွၼ်ၵၼ် ပတ်းပူလူမႄးႁၢင်ႈႁႅၼ်းဝႆႉထႃႈပၼ် ပုၼ်ႈတႃႇ ၸၢႆးၼွင်ႉတေမႃးၼၼ်ႉယူႇ ။