ၶႅၵ်ႇ/တွၼ်ႈသၢမ်သိပ်းႁူၵ်း
ၵႃးၸၢႆးၸၢႆးၶဝ် ႁေႃႈပူၼ်ႉမေႇမဵဝ်ႉသေ ၽႅဝ်မႃးဝၢၼ်ႈယင်ႇငႄႈယဝ်ႉလႄႈ ၽူၺ်းၸီႉၼႄ တၢင်းၵႂႃႇႁိူၼ်းၸၢႆးၼွင်ႉၶဝ်ယူႇ၊ ၸၢႆးသႅင်ႁေႃႈၵႃးသေ ၽႅဝ်ၵႂႃႇတီႈၼႃႈႁိူၼ်း ၸၢႆးၼွင်ႉၶဝ်ယဝ်ႉလႄႈ ၶဝ်ဢွၼ်ၵၼ်လူင်းၵႃးသေ မႃးႁွင်ႉဝႃႈ -
“ ၸၢႆးၼွင်ႉ ...ၸၢႆးၼွင်ႉ ... ”
ၼၢႆးဢွၼ်ႇ ၸၢႆးၼွင်ႉၶဝ် ဢွၵ်ႇမႃးသေ -
“ ဢေႃ ... ၶဝ်ႈမႃးၼႂ်းႁိူၼ်းလႄႈ ... လၢၼ်ၶဝ် ... ”
“ ၸၢႆးၼွင်ႉ ... ၸွင်ႇမီးတီႈၼႆႈၶႃႈႁိုဝ် ? ၼၢႆး... ”
“ ဢေႃ ... ၸၢႆးၼွင်ႉ ၼႆႁႃႉ ? ”
“ ၸႂ်ႈဢေႃႈ ... မၼ်းမီးတီႈလႂ်ၶႃႈ ... ? ”
“ ၸၢႆးၼွင်ႉ ပူၼ်ႉၵႂႃႇၵျွၵ်ႉမႄး မိူဝ်ႈသိုၼ်းၼၼ်ႉၼႆဢိူဝ်ႈ ... မၼ်းတေမိူဝ်းတီႈဝၢၼ်ႈၸႃႇတိမၼ်း ၼႃးၶေႃၼႆဝႃႇ ... ”
တၢင်းမုင်ႈမွင်းၶဝ်သၢမ်ၵေႃႉ ဢမ်ႇတဵမ်ထူၼ်ႈလႄႈ ၶဝ်ႁိူဝ်ႉၸႂ်သေ ဢွၼ်ၵၼ်ထူၺ်ႈၸႂ်လူင်ႁူမ်ႈၵၼ်ယူႇ -
ႁိုဝ်း ! ... ... ႁိုမ်း ! ...
ဢိုမ်ႉ ! ......
ၶဝ်ၶိုၼ်းတႅပ်းတတ်း သိုပ်ႇပူၼ်ႉမႃးတီႈၵျွၵ်ႉမႄးယဝ်ႈ ။
ၶဝ်ပူၼ်ႉၵျွၵ်ႉမႄးယဝ်ႉ ၽႅဝ်မႃးတီႈဝၢၼ်ႈၼႃးၶေႃသေ မႃးထၢမ်ႁႃတူၺ်း ၶၢဝ်ႇၸၢႆးၼွင်ႉယူႇ -
“ မႄႈပႃႈ ... ၸိုင်ဝႃႈ ၸၢႆးၼွင်ႉပွၵ်ႈမႃး တီႈဝၢၼ်ႈၼႆႉၼႆ ၸွင်ႇၸႂ်ႈၶႃႈႁိုဝ် ? ”
“ ၸႂ်ႈဢိူဝ်ႈ ... လၢၼ် ... လၢၼ်ၶဝ်လုၵ်ႉယၢၼ်ႇၵုင်ႇမႃးႁႃႉ?”
“ ၸႂ်ႈဢေႃႈ ... မႄႈပႃႈႁဵတ်းႁိုဝ်ႁူႉၶႃႈ ... ? ”
“ ၸၢႆးၼွင်ႉ လၢတ်ႈမႄႈပႃႈဝႆႉဢိူဝ်ႈ ... မၼ်းလၢတ်ႈဝႆႉဝႃႈ ပေႃးပီႈဢၢႆႈမၼ်း ၸၢႆးၸၢႆးၽႅဝ်မႃးၼႆ ... ႁႂ်ႈဢဝ်လိၵ်ႈၼႆႉ ပၼ်ၸၢႆးၸၢႆးလႄႈ ၽူၺ်း ၼႆယဝ်ႉ ... ”
“ ဢေႃႈ ... ၶႃႈပဵၼ်ၸၢႆးၸၢႆးဢေႃႈ ... မၼ်းၼၢင်းၼႆႉသမ်ႉပဵၼ် ၽူၺ်းဢေႃႈ ... ”
မႄႈပႃႈၼၼ်ႉ ဢဝ်လိၵ်ႈ ယိုၼ်ႈပၼ်ၸၢႆးၸၢႆးသေ ၸၢႆးၸၢႆးလႄႈ ၽူၺ်း ဢၢင်ႈထူၵ်းလူတူၺ်း ၵမ်းလဵဝ်ယဝ်ႉ မႄႈပႃႈၼၼ်ႉၸင်ႇဝႃႈ -
“ ၸၢႆး ... ၵမ်ႉလႄႈ ... ယႃႇပေၽူမ်ႈလူတူၺ်းလိၵ်ႈၼၼ်ႉၵွၼ်ႇ ၸၢႆးၼွင်ႉသင်ႇဝႆႉ ႁႂ်ႈၸၢႆးၸၢႆးၵႂႃႇတူၺ်း ၶုမ်ပႃႇႁဵဝ်ႈ ပေႃႈမႄႈၸၢႆးၸၢႆးဢွၼ်တၢင်းၵွၼ်ႇ ၼႆယဝ်ႉ ... မႃးၸွမ်းမႄႈပႃႈလႄႈ ... ”
ၶဝ်သၢမ်ၵေႃႉၵေႃႈ ဢွၼ်ၵၼ်ၵႂႃႇၸွမ်းမႄႈပႃႈၼၼ်ႉသေ ၽႅဝ်ၵႂႃႇတီႈပႃႇႁဵဝ်ႈယဝ်ႉ လႆႈႁၼ်ၶုမ်ပႃႇႁဵဝ်ႈ ဢၼ်ဢဝ်ၼမ်ႉထုၼ်ၶၢဝ် တႃးဝႆႉမႂ်ႇမႂ်ႇသွင်ၶုမ် ဢၼ်ႁိမ်းႁွမ်းမၼ်းၸွၼ်ႉၽဵဝ်ႈဝႆႉ ၵဵင်ႈၵဵင်ႈ ၼၼ်ႉယူႇ ။ မႄႈပႃႈပီးၸင်ႇၸီႉၼႄသေ လၢတ်ႈဝႃႈ -
“ ၸၢႆးၸၢႆး ... ၼေႈ ၼႆႉပဵၼ်ၶုမ်ပေႃႈသူ သၢင်ႇထုၼ်း ... ၼႆႉသမ်ႉပဵၼ်ၶုမ်မႄႈသူ ၼၢင်းၼူၼ်းယဝ်ႉ ...”
ၸၢႆးၸၢႆးလွမ်တူၺ်း ၶုမ်ပႃႇႁဵဝ်ႈပေႃႈမႄႈမၼ်း သမ်ႉပေႃးလိုမ်းၽႅပ်ႉတႃယူႇယဝ်ႉ ၊ ၵွပ်ႈသင်သေလႄႈ ၼမ်ႉတႃမၼ်း ဢိူမ်ႈႁူၺ်ႇလႆယွႆႉမႃးၼႆ မၼ်းဝူၼ်ႉဢမ်ႇပွင်ႇလႆႈ ။
ၸၢႆးၸၢႆးၶုပ်ႉၶဝ်ႇ ၼင်ႈဝႆႈၶုမ်မႄႈၶဝ်သေ ၵူမ်ႈဝႆႉတင်းႁိုင်ယူႇ ၽွင်းၼၼ်ႉ ၽူၺ်းလွမ်တူၺ်းၵႂႃႇ ၸွမ်းႁိမ်းႁွမ်းၸိူဝ်းၼၼ်ႉ လႆႈႁၼ်ၶုမ်ပႃႇႁဵဝ်ႈမႂ်ႇ ဢၼ်ၼိုင်ႈ ဢိၵ်ႇလူၺ်ႈ တူင်ႇမွၵ်ႇမွင်ၸႂ်ၸိူဝ်းၼၼ်ႉ တိုၵ်ႉပႆႇႁၼ်ႁဵဝ်ႇ၊ ၽူၺ်းလွမ်တူၺ်းၵႂႃႇလီလီ လႆႈႁၼ်တႅမ်ႈဝႆႉ
ၸၢႆးၼွင်ႉ ဢႃႇယု ( ... )
ၼႆလႄႈ ၽူၺ်းတူၵ်းၸႂ်ၵႂႃႇတႄႉတႄႉသေ -
“ မႄႈ ... မႄႈပႃႈ ...ၶုမ်မႂ်ႇၼၼ်ႉ ပဵၼ်ၶုမ်ၽႂ်ၶႃႈ ... ? ”
“ ဢေႃ ... ၼၼ်ႉပဵၼ်ၶုမ်ၸၢႆးၼွင်ႉ ၵူၼ်းဝၢၼ်ႈၼႆႉဢိူဝ်ႈ ... ၸင်ႁႃမႃးၽင် မိူဝ်ႈဝႃးၵူၺ်း ...”
“ ဢမ်ႇၸႂ်ႈၸၢႆးၼွင်ႉ ဢၼ်ၽူၺ်းၶဝ်မႃးႁႃၼႆႉ ၶႃႈၼေ ... ? ”
“ ဢမ်ႇၸႂ်ႈ ... ”
ၽူၺ်းၵေႃႉၼိုင်ႈ ပဵၼ်ဢၼ်လူမ်ၸႂ်ၵႂႃႇတႄႉတႄႉယူႇ ၊ ၸၢႆးၸၢႆးၵေႃႈ လုၵ်ႉမႃးသေ -
“ မႄႈပႃႈ ... ၸၢႆးၼွင်ႉသမ်ႉ ၵႂႃႇမီးတီႈလႂ်ယူႇၶႃႈ ... ”
“ ဢိုဝ်ႈ ... လူတူၺ်း လိၵ်ႈမၼ်းၼၼ်ႉလႄႈ ... ၸၢႆး ... မႄႈပႃႈၵေႃႈ ... ဢမ်ႇႁူႉၼင်ႇၵဝ်ႇ ...”
ၸၢႆးၸၢႆးၵေႃႈ ၽုၺ်ႇထူင်လိၵ်ႈသေ လူတူၺ်းယူႇ ။
ထိုင်
ပီႈဢၢႆႈ ...
ၼွင်ႉၸၢႆးလၢမ်းဝႆႉဝႃႈ ပီႈဢၢႆႈၸၢင်ႈမႃးၸွမ်းၶႆႈ ၼွင်ႉၸၢႆးၼႆလႄႈ ၸင်ႇလႆႈတႅမ်ႈလိၵ်ႈၼႆႉ ပၼ်ဝႆႉၼင်ႇၼႆယဝ်ႉ ...
ယိူင်းဢၢၼ်းၼွင်ႉၸၢႆးတႄႉ ၶႂ်ႈဢွၼ်ဢဝ် ပီႈဢၢႆႈမႃးလႆႈႁၼ်လႆႈႁူႉ ၶုမ်ပႃႇႁဵဝ်ႈပေႃႈမႄႈႁႃးပီႈၼွင်ႉယဝ်ႉ ... သင်ပဵၼ်လႆႈတႄႉ ... ၼိုင်ႈပီၼိုင်ႈပွၵ်ႈ ၶႂ်ႈႁႂ်ႈပီႈဢၢႆႈမႃးၵၼ်ႇတေႃး လူႁၼ်လုမ်းလႃး ၶုမ်ပေႃႈမႄႈႁဝ်းယူႇ ... ၶႃႈၼွင်ႉၸၢႆးတႄႉ တေသိုပ်ႇမီးယူႇ ၼႂ်းမိူင်းတႆးႁဝ်းၵူၺ်း လႄႈၶႃႈၼွင်ႉ တေၵႆႉထိုင်တီႈၶုမ်ပေႃႈမႄႈႁဝ်းယူႇ ...
ပီႈဢၢႆႈဢိူၺ်း ...
ၶေႃႈၵႂၢမ်းဢၼ်ႁွင်ႉဝႃႈ ... “ ပီႈဢၢႆႈ ” ၼႆၼၼ်ႉ ၶႃႈၶႂ်ႈႁွင်ႉၸဵမ်မိူဝ်ႈ ၶႃႈၼွင်ႉ လႆႈယူႇၸွမ်း ပီႈဢၢႆႈၶဝ်ၼၼ်ႉယူႇ ... ၵူၺ်းၵႃႈ ... ၶႃႈဢမ်ႇပဵၼ်ႁွင်ႉ ... ၵွပ်ႈပိူဝ်ႈ ၵူဝ်ပီႈဢၢႆႈ ဢမ်ႇႁပ်ႉၶၢမ်ႇၼၼ်ႉၶႃႈယဝ်ႈ...
ပီႈဢၢႆႈ ...
ၼွင်ႉၸၢႆးၶႂ်ႈသင်ႇၵႂၢမ်းထိုင်ပီႈဢၢႆႈ ၼၵ်းၼၵ်းၸူမ်ၸူမ်ဢေႃႈ ... သင်ဝႃႈ ပီႈဢၢႆႈပဵၼ်ၶူးမေႃယႃလူင်မႃး ၼႆ ... ၶႅၼ်းတေႃႈ ၶိုၼ်းမႃးတူၺ်းထိုင်ပၼ် ပီႈၼွင်ႉမိူင်းတႆးႁဝ်းသေၵမ်း ... ႁႃးပီႈၼွင်ႉၼႆႉ ဢမ်ႇမီး ဢူႈမႄႈယဝ်ႉသေတႃႉ ဢူႈမႄႈမိူင်းတႆးႁဝ်း တိုၵ်ႉမီဝႆႉယူႇလူး ... ပီႈဢၢႆႈ ပဵၼ်ၵူၼ်း ဢၼ်မီးတၢင်းႁူႉယႂ်ႇၼမ်သေ ၼွင်ႉၸၢႆးတႄႉတႄႉလႄႈ ပီႈဢၢႆႈၵေႃႈ ဢမ်ႇလိုမ်း ၵုင်ႇမုၼ်ငဝ်း ပေႃႈမႄႈမိူင်းတႆးႁဝ်းၼႆ... ၶႃႈၼွင်ႉတိုၼ်းယုမ်ႇယမ်ဝႆႉယူႇၶႃႈ ... ၶႃႈၼွင်ႉတႄႉ တႅပ်းတတ်းၸႂ်ဝႃႈ တေႁဵတ်းၵၢၼ်ပၼ် ပုၼ်ႈတႃႇပေႃႈမႄႈမိူင်းတႆး ႁဝ်းတေႃႇၸူဝ်ႈ ပႅင်ႈၼင်ႇႁႅင်းတူဝ်ႁႅင်းၸႂ် ႁႅင်းၺၢၼ်ႇ ပွင်ပဵၼ်လႆႈၼၼ်ႉ ၼႆယဝ်ႈ ... ၶႃႈၼွင်ႉ တေၵႂႃႇမီးတီႈလႂ် ? တေၵႂႃႇယူႇတီႈလႂ် ? တေၵႂႃႇႁဵတ်းၸိူင်ႉႁိုဝ် ? ၼႆတႄႉ ပီႈဢၢႆႈယႃႇပေၶႂ်ႈႁူႉၸွမ်းၶႃႈလႃႈ ... ၼႃႈ ... ၶႃႈၼွင်ႉတေမီး တီႈမိူင်းတႆး တေယူႇၵႂႃႇၼႂ်းၵၢင်ၸႂ် ပီႈၼွင်ႉၸိူဝ်ႉၶိူဝ်းတႆး တေႁဵၼ်းၵၢၼ်လီ ပုၼ်ႈပၢင်ႈၸိူဝ်ႉၶိူဝ်းဝၢၼ်ႈ မိူင်းၽႃႇသႃႇႁဝ်း ၵႂႃႇယူႇ ... ၵွပ်ႈၼႆ ... ပီႈဢၢႆႈ ယႃႇပေသိုပ်ႇႁႃၼွင်ႉၸၢႆးထႅင်ႈလႃႈ ...
ႁႂ်ႈပီႈဢၢႆႈယူႇလီသေၵမ်း ... ...
ၸၢႆးၼွင်ႉ ၸၢႆးၸၢႆး လူလိၵ်ႈယဝ်ႉသေ ၼမ်ႉတႃမၼ်းၸၢႆး ယွႆႉတူၵ်းမႃးယူႇ မၼ်းတေလႆႈႁဵတ်းႁိုဝ် သိုပ်ႇႁႃၸၢႆးၼွင်ႉ တီႈလႂ် ?
ၽူၺ်းၵေႃႈ မႃးသိၵ်ႇတူၺ်းလိၵ်ႈတႃႇမၼ်းၼၼ်ႉယူႇ ။
ထိုင်
ၽူၺ်း ...
ယုမ်ႇယမ်ဝႃႈ လိၵ်ႈၽိုၼ်ၼႆႉ တေႁွတ်ႈၼႂ်းမိုဝ်းၽူၺ်းယူႇၼႆသေ ... ၸင်ႇတေတႅမ်ႈပၼ်ဝႆႉယူႇယဝ်ႉ ...
ၽွင်းမိူဝ်ႈ တေၽၢတ်ႇတႃႈၵုင်ႈၼၼ်ႉ ... ၼႂ်းၸႂ်မုင်ႈမွင်း တႃႉၶႂ်ႈထူပ်းၽူၺ်းၶဝ်ၵျႃႉၼႆသေ သမ်ႉလိူၵ်ႈလိူၵ်ႈ လႆႈထူပ်းလႄႈ တၢင်းမုင်ႈမွင်းၸၢႆးၼွင်ႉ တဵမ်ထူၼ်ႈၵႂႃႇပွတ်းဢွၼ်ႇတွၼ်ႈၼိုင်ႈယူႇ ...
ၽွင်းမိူဝ်ႈ ... ရူတ်ႉရဵၼ်းၸမ်တေဢွၵ်ႇ ဢၼ်ပီႈၸၢႆးသႅင် လႅင်းလႄႈ ၽူၺ်းၶဝ် ထၢမ်ဝႃႈ “ တေမိူဝ်းဢႅဝ်ႇႁႃႉ ? တေၶိုၼ်းမႃးမိူဝ်ႈလႂ် ? ၸၢႆးၼွင်ႉ တေၶိုၼ်းပွၵ်ႈမႃးယူႇႁႃႉ ? ... ” ၶေႃႈထၢမ် ၸိူဝ်းၼၼ်ႉ ... ၸၢႆးၼွင်ႉ မီးၶေႃႈတွပ်ႇယူႇသေတႃႉ ... ဢမ်ႇမီးႁႅင်း တႃႇတေတွပ်ႇပၼ်လႄႈ ၸင်ႇဢမ်ႇပဵၼ်တွပ်ႇပၼ်ၽူၺ်းၶဝ်ယဝ်ႈ ... ၽူၺ်း၊ ၵွပ်ႈသင်ၼႆ ... ၸၢႆးၼွင်ႉပဵၼ်ၶႅၵ်ႇၵူၺ်းလူး ... ၶႅၵ်ႇ ဢၼ်ဝႃႈၼၼ်ႉ ယူႇႁိုင်ႁိုင်ဢမ်ႇထုၵ်ႇ ... ၵွပ်ႈၼႆ ... ၸၢႆးၼွင်ႉ ၸင်ႇပွၵ်ႈၶိုၼ်းမိူင်းတႆးသေ တေဢမ်ႇပဵၼ်မႃးၶိုၼ်း တႃႈၵုင်ႈယဝ်ႈ ယူဝ်ႉ ...
ဢၼ်လႅင်းသမ်ႉ သင်ႇဝႃႈ “ သိုဝ်ႉၶဝ်ႈမုၼ်းမႃးၼႃႈ ... သိုဝ်ႉၶဝ်ႈတမ်ငႃးမႃးၼႃႈ ... ” ၼႆၼၼ်ႉၵေႃႈ ... ၸၢႆးၼွင်ႉ တေဢမ်ႇၸၢင်ႈသိုဝ်ႉသူင်ႇပၼ်လႆႈယဝ်ႈ ... ၵွပ်ႈၼႆ ၽူၺ်းၶဝ် သိုပ်ႇလၢတ်ႈပၼ်လႅင်း သိုဝ်ႈသိုဝ်ႈ - “ ၸၢႆးၼွင်ႉတႄႉ ဢမ်ႇၶိုၼ်းမႃးယဝ်ႉ ... လႅင်း ... ” ၼႆလႃႈ ... တမ်ႈတီႈ ဢူႈလုင်းလႄႈ မႄႈပႃႈၶဝ်ၵေႃႈ ၸၢႆးၼွင်ႉဢမ်ႇလိုမ်းၵုင်ႇမုၼ်ငဝ်းၶဝ် ၼင်ႇၵဝ်ႇ ... ၶုၵ်းၶူၼ်ႉဝူၼ်ႉၶွပ်ႈယူႇ ...
ၽူၺ်း ... ...
ၸၢႆးၼွင်ႉ ယၢမ်ႈလႆႈဝႆႉဝွၵ်းဢွၼ်ႇပုၵ်ႈၼိုင်ႈသေ တႅမ်ႈပၼ်ႁႂ်ႈၽူၺ်းလူတူၺ်းယဝ်ႈ ... ၸိုဝ်ႈဝွၵ်းဢွၼ်ႇၼၼ်ႉတႄႉ ႁွင်ႉဝႃႈ “ ၶႅၵ်ႇ ” ၼႆဝႃႇ ... ...
“ ၶႅၵ်ႇ ”
✽ ၽွင်းမိူဝ်ႈမႃးၵေႃႈ ၊ တေႃႈမႃးႁင်းၵူၺ်း
ဢမ်ႇပႃးဢူၺ်းၵေႃႉ ၊ တႃႇတေႃႉၸုင်မိုဝ်း
ၶူဝ်းႁွႆႈတိုဝ်းၵေႃႈ ၊ တေႃႈဢမ်ႇပႃးသင်
✽ ၽွင်းမိူဝ်ႈၵႂႃႇၵေႃႈ ၊ တေႃႈၵႂႃႇႁင်းၵူၺ်း
ဢမ်ႇပႃးဢူၺ်းၵေႃႉ ၊ တႃႇတေႃႉၸုင်မိုဝ်း
ၶူဝ်းႁွႆႈတိုဝ်းၵေႃႈ ၊ တေႃႈဢမ်ႇပႃးသင် ။
✽ ၽႅဝ်မႃးသေလိုဝ်ႈ ၊ ၽွင်းပႆႇယိုဝ်ႈၵႂႃႇ
မႃးၽႃႇၸိူၵ်ႈၶိုမ်း ၊ ႁုတ်ႉၵိုမ်းမတ်ႉမၼ်ႈ
လိမ်ႇၽၼ်ႈၵဵဝ်ႈတူဝ် ၊ ယုမ်ႉၶူဝ်မႅပ်ႇႁႆႈ
လႆႈၸင်း လႆႈႁၵ်ႉ ၊ ဢမ်ႇမၵ်ႉတေႃးသ
မတ်ႉလေႃးၽပဵၼ် ၊ ဢၼ်ယဵၼ်လႆႈမႃႈ
ၵျွၵ်းၵႃႈၵူႈလွင်ႈ ၊ ၵၢမ်ႇယွင်ႈသဵင်ႈမူတ်း
လႆႈပူတ်းပွႆႇၽႃႈ ၊ ဝၢႆႇၼႃႈပႅတ်ႈၵၼ်
ယၼ်သိုပ်ႇတၢင်းၸႅၵ်ႇ ၊ ထုင်းၸဝ်ႈၶႅၵ်ႇ ။ ။
ၽူၺ်း ...
ဝွၵ်းဢွၼ်ႇပုၵ်ႈၼႆႉ မၼ်းငမ်ႇမႅၼ်ႈၽဝၸၢႆးၼွင်ႉၼႃႇလႄႈ ၸၢႆးၼွင်ႉလႆႈၸႂ်တႄႉတႄႉ ... ၵွပ်ႈၼႆ ၸၢႆးၼွင်ႉပဵၼ် ၶႅၵ်ႇၵူၺ်းလႄႈ ... မိူၼ်ၸိူင်ႉၼင်ႇ ၼႂ်းဝွၵ်းပုၵ်ႈၼႆႉယဝ်ႈ ... ၽူၺ်း ...
ၸၢႆးၸၢႆးၼၼ်ႉ ... ပဵၼ်ပီႈဢၢႆႈဢွၵ်ႇဢွၵ်ႇၸၢႆးၼွင်ႉဢိူဝ်ႈ ... ၵွပ်ႈၼႆ ဢၼ်ၸၢႆးၼွင်ႉၶႂ်ႈႁွင်ႉဝႃႈ “ ၽူၺ်း ” ၼႆၼၼ်ႉ ၸၢႆးၼွင်ႉတေလႆႈထိူၵ်ႈႁွင်ႉဝႃႈ “ ပီႈၽူၺ်း ” ၼႆၵူၺ်းယဝ်ႈ ၼႃႈ
ႁႂ်ႈ ပီႈၽူၺ်းၶဝ် ယူႇလီသေၵမ်း ...
ၸၢႆးၼွင်ႉ
ၽူၺ်း လူတူၺ်းလိၵ်ႈၸၢႆးၼွင်ႉၼၼ်ႉသေ ၼမ်ႉတႃမၼ်းၼၢင်း လႆလူင်းၸွမ်းၵႅမ်ႈၶွင်ႇမၼ်းယူႇ ၊ ၶဝ်ဢွၼ်ၵၼ် ပႆမႃးၸူးၵႃးၶဝ်သေ ၸၢႆးၸၢႆးၸင်ႇဝႃႈ -
“ ပီႈၸၢႆးသႅင် ... ပီႈၸၢႆးသႅင်ၶဝ် မိူဝ်းတႃႈၵုင်ႈၶႃႈလႃႈ ... ၶႃႈတႄႉ တေသိုပ်ႇၵႂႃႇႁႃၸၢႆးၼွင်ႉထႅင်ႈၵွၼ်ႇ ဢေႃႈ ... ”
“ တေၵႂႃႇႁႃတီႈလႂ် ... ? ၸၢႆးၸၢႆး ...”
“ႁႃၼႂ်းမိူင်းတႆး ၵူႈတီႈတီႈဢေႃႈ ... ပေႃးဢမ်ႇႁၼ်ၸၢႆးၼွင်ႉ ၼႆတႄႉ ... ၶႃႈဢမ်ႇပႆႇဢၢၼ်းမိူဝ်းယဝ်ႈ ... ”
“ ယႃႇပေႁဵတ်းၼၼ် ၸၢႆးၸၢႆး ... ပေႃးၸၢႆးၸၢႆးဢမ်ႇမိူဝ်းၼႆ ၵူဝ်တႅတ်ႇတီႇလႄႈ မႃႇမီႇၸၢႆးၸၢႆးၶဝ် မႆႈၸႂ်ဢိူဝ်ႈ ... ပေႃးၽႅဝ်တႃႈၵုင်ႈၼႆ ၸင်ႇၵွႆႈသႂ်ႇၼႂ်းလိၵ်ႈၽိုၼ်ၶၢဝ်ႇသေ ႁွင်ႉႁႃၸၢႆးၼွင်ႉ တေလီယူႇယူဝ်ႉ?”
“ ၸႂ်ႈတႄႉဢိူဝ်ႈ ... ၸၢႆးၸၢႆး ... ဢၼ်ပီႈၸၢႆးသႅင်လၢတ်ႈၼၼ်ႉထုၵ်ႇဢိူဝ်ႈ ... သႂ်ႇၼႂ်းလိၵ်ႈၶၢဝ်ႇသေ ၶိုၼ်းႁွင်ႉ ႁႂ်ႈၸၢႆးၼွင်ႉပွၵ်ႈမႃးၼႆ တေလီယူႇလူး ... ”
ၽူၺ်းလႄႈၸၢႆးသႅင် ႁူၺ်းပၢႆးဢဝ်ၸၢႆးၸၢႆးလႆႈသေ ဢွၼ်ၵၼ်ပွၵ်ႈမႃးၶိုၼ်း တႃႈၵုင်ႈယဝ်ႈ။ ၸွမ်းပွတ်းတၢင်း ၶဝ်ဝူၼ်ႉလွင်ႈၸၢႆးၼွင်ႉ ႁင်းၽႂ်ႁင်းမၼ်းယူႇ၊ တူၺ်းၼႃႈၶဝ်ငဝ်ဝႆႉၵူႈၵေႃႉ ၊ ၽူၺ်းတႄႉဝူၼ်ႉဝႃႈ မၼ်းတေလႆႈႁဵတ်းႁိုဝ်မိူဝ်းမွၵ်ႇပၼ်လႅင်း လွင်ႈဝႃႈၸၢႆးၼွင်ႉဢမ်ႇၶိုၼ်းမႃး ၸၢႆးၸၢႆးသမ်ႉ တေလႆႈႁဵတ်းႁိုဝ် မိူဝ်းမွၵ်ႇလၢတ်ႈပၼ် တႅတ်ႇတီႇမႃႇမီႇၶဝ် ။
ၶဝ်ၶိုၼ်းမႃးဝႄႉဢႅဝ်ႇ တီႈမေႇမဵဝ်ႉ သွင်ဝၼ်းသေ ၶိုၼ်းပွၵ်ႈမိူဝ်းယဝ်ႉ ။ ၽွင်းမိူဝ်ႈ ၵႂႃႇဢႅဝ်ႇၼမ်ႉတူၵ်းတၢတ်ႇၼၼ်ႉ ၽူၺ်းပဵၼ်ဢၼ်ၶုၵ်းၸႂ်လႆႈ ၸၢႆးၼွင်ႉတႄႉတႄႉ ၊ ၽွင်းမိူဝ်ႈၶႃသွင်ၵေႃႉ လႆႈၶၢမ်ႈၶူဝ်ၽႅၼ်ၸွမ်းၵၼ်ၼၼ်ႉ လႄႈသင် ၽွင်းမိူဝ်ႈၶႃႁေႃႈလေႃႉမႃႉ ၸွမ်းၵၼ်ၼၼ်ႉလႄႈသင် ပဵၼ်လွင်ႈတၢင်းဢၼ်ၽူၺ်းၶုၵ်းၸႂ်လႆႈမူတ်းမူတ်းယဝ်ႉ ။