ၶႅၵ်ႇ/တွၼ်ႈသၢမ်သိပ်းၸဵတ်း
ၸၢႆးၸၢႆး ၶိုၼ်းၽႅဝ်မႃးတႃႈၵုင်ႈသေ လူတူၺ်းလိၵ်ႈၽိုၼ်ၶၢဝ်ႇယူႇ ၼႂ်းလိၵ်ႈၽိုၼ်ၶၢဝ်ႇၼၼ်ႉ မၼ်းၵႂႃႇသႂ်ႇဝႆႉဝႃႈ -
“ ၸၢႆးၼွင်ႉ ပွၵ်ႈမႃးၽႂ်းၽႂ်းတႃႉ ”
ၸၢႆးၼွင်ႉ ၽႅဝ်ႁွတ်ႈတီႈလႂ်ၵေႃႈ ၶိုၼ်းပွၵ်ႈမႃးၽႂ်းၽႂ်းတႃႉ၊
ပီႈဢၢႆႈၶဝ်မုင်ႈမွင်းပႂ်ႉ ႁပ်ႉတွၼ်ႈၸၢႆးၼွင်ႉယူႇတႃႇသေႇယဝ်ႉ ၊
ဝၢင်းၶႂၢင်းပွႆႇပၼ်ပီႈဢၢႆႈသေ ပွၵ်ႈမႃးၸူးပီႈဢၢႆႈတႃႉ ... ။
သင်ဝႃႈ ၽႂ်ပၼ်လႆႈၶၢဝ်ႇငၢဝ်းၸၢႆးၼွင်ႉ မီးတီႈလႂ်ၼႆၸိုင်
တေၶွပ်ႈၸႂ် တွပ်ႇတႅၼ်းၵျေးၸူးယႂ်ႇယႂ်ႇၼမ်ၼမ်ယူႇ။
ၸၢႆးၸၢႆး - မႆႁိူၼ်း ......
ပႃႇရမီႇ - တႃႈၵုင်ႈ
ၸၢႆးၸၢႆးၶဝ် မုင်ႈမွင်းဝႆႉလိၵ်ႈၽိုၼ်ၶၢဝ်ၼႆႉ ၽႅဝ်ၸွတ်ႇလႆႈ ၵူႈဝဵင်းၼႆသေ ဢေႁႃၸၢႆးၼွင်ႉယူႇ ။
ဝၼ်းၼိုင်ႈယဝ်ႉဝၼ်းၼိုင်ႈ လိူၼ်ၼိုင်ႈယဝ်ႉလိူၼ်ၼိုင်ႈ ပီႊၼိုင်ႈယဝ်ႉပီႊၼိုင်ႈ ပူၼ်ႉၵႂႃႇသေတႃႉ ၶၢဝ်ႇငၢဝ်းၸၢႆးၼွင်ႉၵေႃႈ ၶဝ်ဢမ်ႇလႆႈငိၼ်းသင် ၶဝ်ဢွၼ်ၵၼ် ၸွပ်ႇႁႃၵူႈလၢႆးလၢႆးယူႇသေတႃႉ ဢမ်ႇလႆႈၶၢဝ်ႇၸၢႆးၼွင်ႉ၊ ၸၢႆးၸၢႆးတႄႉ ၵမ်းၵမ်းပိုၼ်ၶၢဝ်ႇ ၼႂ်းလိၵ်ႈၽိုၼ်ၶၢဝ်ႇ ပေႃးၽႂ်ပၼ်လႆႈ ၶၢဝ်ႇငၢဝ်းၸၢႆးၼွင်ႉ မၼ်းတေၶွပ်ႈၸႂ် တၢင်းတွပ်ႇၵျေးၸူးပၼ်ၶိုၼ်း ယႂ်ႇယႂ်ႇၼမ်ၼမ်ယူႇ ၼႆယဝ်ႉ ။
ၸၢႆးၸၢႆးမႃးၼင်ႈၼႂ်းသူၼ် လႆႈငိၼ်းသဵင်ၼူၵ်ႉၸွၵ်ႇဢွၼ်ႇ ႁွင်ႉမေႃးၸိပ်ႉၸိပ်ႉသေ ယူဝ်ၶႄးၶဝ်ႁွင်ႉႁႃ ၸၢႆးၼွင်ႉယူႇႁိုဝ်ၵေႃႈဢမ်ႇႁူႉ ႁိူၼ်းၼူၵ်ႉၸွၵ်ႇဢွၼ်ႇ ဢၼ်ၸၢႆးၼွင်ႉႁဵတ်းဝႆႉ ပၼ်ၶဝ်ၼၼ်ႉ ၶဝ်ၶဝ်ႈယူႇၼႂ်းမၼ်းသေ ႁွင်ႉမေႃးယူႇၸိပ်ႉၸိပ်ႉလႄႈ ၸၢႆးၸၢႆး ႁၼ်ၼူၵ်ႉၸွၵ်ႇဢွၼ်ႇၸိူဝ်းၼၼ်ႉသေ ၶုၵ်းၸႂ်လႆႈမိူဝ်ႈၸၢႆးၼွင်ႉ သီးမၼ်း ဢမ်ႇႁႂ်ႈယိုဝ်းၼူၵ်ႉၸွၵ်ႇၼၼ်ႉယူႇ ။
ၸၢႆးၸၢႆးပႆမႃးလႆႈႁၼ် ၽၢင်ၸၢမ်းမႅၼ်ႈ ဢၼ်ၸၢႆးၼွင်ႉ ႁဵတ်းဝႆႉပၼ်မၼ်းၼၼ်ႉသေ ၸၢႆးၸၢႆးၶုၵ်းၸႂ်လႆႈၶိုၼ်း မိူဝ်ႈၶဝ်ၸၢမ်းမႅၼ်ႈသေ ဢၼ်ၸၢႆးၼွင်ႉႁဵတ်း ၽူႈထတ်းသိၼ်ပၼ်မၢႆ ၼၼ်ႉယူႇ ။
တီႈၼႂ်းသူၼ်ဢွၼ်ႇၸိူဝ်းၼၼ်ႉ မွၵ်ႇဢၼ်ၸၢႆးၼွင်ႉၽုၵ်ႇဝႆႉၸိူဝ်းၼၼ်ႉၵေႃႈ ဢၢပ်ႈမုင်ႈမွင်ႈ ၵေႃႉလုမ်းလႃးၶဝ်ၼၼ်ႉ ဝႆႉၵေႃႈလူဝ်လူဝ်၊ ဢၢႆႈယုၺ်းၶႃဢၢႆႈသီႇတႃၵေႃႈ ၵႂႃႇၼင်ႈငဝ်ဝႆႉ တီႈဢၼ်ၸၢႆးၼွင်ႉ ၵႆႉဢွႆႇတၢင်းၵိၼ်ၶႃၼၼ်ႉယူႇ၊ လုင်းသၢင်ႇတုၺ်ႉၵေႃႈ ၼင်ႈၼိူဝ်တီႈၼွၼ်း မၼ်းသေ လွမ်ငဝ်မိုင်ယၵ်ႉတူၺ်း ဢွင်ႈၼွၼ်းၸၢႆးၼွင်ႉယူႇ ၊ ပႃႈယွတ်ႈၵေႃႈ လိုမ်းသေ ဢၢင်ႈၶူတ်ႉၶဝ်ႈပၼ် ပုၼ်ႈၸၢႆးၼွင်ႉၼႆလႄႈ မၼ်းယိပ်း ဝၢၼ်ႇၶဝ်ႈၸၢႆးၼွင်ႉသေ ငဝ်မိုင်ၵႂႃႇပဵၼ်ၵမ်းယဝ်ႈ ။
ၸၢႆးၸၢႆး လုၵ်ႉၼႂ်းသူၼ်သေ ပႆၶဝ်ႈမႃးၼႂ်းႁိူၼ်းလႄႈ မၼ်းၵႂႃႇၶုၵ်းၸႂ်လႆႈ မိူဝ်ႈမၼ်းမိူၵ်ႈၼိူဝ် ၸၢႆးၼွင်ႉထူႁိူၼ်းၼၼ်ႉယူႇ၊ မၼ်းၶဝ်ႈမႃး ၼႂ်းၶၢၼ်းၼွၼ်းမၼ်းသေ လွမ်တူၺ်းၵႂႃႇတီႈႁူးလႅင်း လႆႈႁၼ်ၵႂၼ်းၽႆးၶဝ်ႈမႃးလႄႈ မၼ်းၵႂႃႇၶုၵ်းၸႂ်လႆႈ မိူဝ်ႈၸၢႆးၼွင်ႉၸုတ်ႇယုၵ်းယၢၵ်းသေ မိူဝ်ႈမၼ်းၵႂႃႇထႃႉ ၸၢႆးၼွင်ႉ ၼၼ်ႉယူႇ။
ၸၢႆးၸၢႆး ဢၢင်ႈမႃး ႁိုဝ်ႈၵိၼ်ၼမ်ႉၼဵင်ႈၶူမ်ၼႆၵေႃႈ မၼ်းၵႂႃႇၶုၵ်းၸႂ်လႆႈ မိူဝ်ႈမၼ်းဢဝ်ၼမ်ႉၼဵင်ႈလိူတ်ႇ ႁၢတ်ႇသႂ်ႇၼႃႈၸၢႆးၼွင်ႉသေ ႁႅမ်ၸၢႆးၼွင်ႉ ၼၼ်ႉယူႇ ။
ၸၢႆးၸၢႆးၵုမ်ႇၶုၵ်းၸႂ်လႆႈ ၸၢႆးၼွင်ႉၵူႈလွင်ႈလွင်ႈသေ မၼ်းႁိူဝ်ႉၸႂ်ၼႃႇလႄႈ မၼ်းႁေႃႈၵႃးသေ ဢွၵ်ႇမႃးဢႅဝ်ႇ ၼႂ်းဝဵင်းၼႆၵေႃႈ မၼ်းတိုၵ်ႉၵႂႃႇၶုၵ်းၸႂ်လႆႈ မိူဝ်ႈမၼ်းဢဝ်ၵႃးၽႃႇပိူၼ်ႈသေ ၸၢႆးၼွင်ႉၶၢမ်ႇတူၵ်းၶွၵ်ႈ တၢင်မၼ်းၼၼ်ႉယူႇ၊ မၼ်းႁေႃႈၵႃးၶၢမ်ႈမႃး ၼိူဝ်သဵၼ်ႈတၢင်းရူတ်ႉရဵၼ်းၵေႃႈ မၼ်းၶိုၼ်းႁၼ်မႅၼ်ႈ မိူဝ်ႈၸၢႆးၼွင်ႉတူင်ႉတၵ်ႉၶဝ်သေ မိူဝ်းၵႂႃႇၼၼ်ႉ တႄႉတႄႉယူႇ ။
“ ၸၢႆးၼွင်ႉ ဢိူၺ်း ... ဝၢင်းၶႂၢင်းပၼ် ပီႈဢၢႆႈသေ ၶိုၼ်းပွၵ်ႈမႃးဝႆးဝႆးလႄႈ ... ... ”
တူၺ်းႁၼ်ၼႂ်းလိၵ်ႈၶၢဝ်ႇ ဢၼ်ၸၢႆးၸၢႆးပိုၼ်ႇၶၢဝ်ႇ ႁွင်ႉၸၢႆးၼွင်ႉမၼ်းၼၼ်ႉ မိူဝ်ႈလႂ်ၵေႃႈ ၽူၺ်း ပဵၼ်ဢၼ်ၶုၵ်းၸႂ်လႆႈၸၢႆးၼွင်ႉ လိူဝ်ဢူၵ်းလိူဝ်ၸႂ်တႄႉတႄႉယူႇ ။
ၽွင်းမိူဝ်ႈၽူၺ်း တူၺ်းလိၵ်ႈၶၢဝ်ႇၼၼ်ႉ လႅင်းၽႅဝ်မႃးသေ -
“ ပီႈၽူၺ်း ...ႁဵတ်းသင် ပီႈၸၢႆးၼွင်ႉ ဢမ်ႇၶိုၼ်းမႃး ... ?”
“ လႅင်း ... ပီႈၸၢႆးၼွင်ႉ ၵႂႃႇမိူဝ်းယူႇမိူင်းတႆးယဝ်ႉဢိူဝ်ႈ ”
လႅင်းပဵၼ်တင်းမွင်ၸႂ်သေ လၢတ်ႈယူႇႁင်းၵူၺ်းမၼ်းယဝ်ႈ -
“ ပီႈၸၢႆးၼွင်ႉဢိူၺ်း ... ပွၵ်ႈမႃးဢႅဝ်ႇလႅင်းၶဝ်ၽွင်ႈလႄႈ ... လႅင်း ... ၶႂ်ႈထွမ်ႇဢပုမ်ႇ ပီႈၸၢႆးၼွင်ႉၼႅၼ်ႇယဝ်ႉ ... ပေႃးပီႈၸၢႆးၼွင်ႉမႃးၼႆ ဢွၼ်လႅင်းၵႂႃႇၶီႇၶူဝ်လႆလိူၼ်ႈၽွင်ႈၼႃႈ ... လႅင်းၶႂ်ႈၵႂႃႇဝႆၽြႃးၸွမ်း ပီႈၸၢႆးၼွင်ႉဢေႃႈ လႅင်းၶႂ်ႈၵႂႃႇတူၺ်းၸၢင်ႉလူင် သၢင်ႇသီႈလူင် ဢၼ်ပီႈၸၢႆးၼွင်ႉ ၶႆႈဢပုမ်ၼႄလႅင်းၼၼ်ႉဢေႃႈ ... ပေႃးလႅင်းၼၢဝ်ၼႆ ၽႂ်တေမႃးဝွၼ်းလႅင်းသေ ပၼ်ယႃႈယႃလႅင်းလႃႇ ... ? ပီႈၸၢႆးၼွင်ႉဢိူၺ်း မႃးဢႅဝ်ႇလႅင်းၶဝ်ၽွင်ႈလႄႈ ...”
လႅင်းဢမ်ႇၶိုတ်းၸႂ်မၼ်းလႄႈ ၸွမ်းၼင်ႇၸႂ်လုၵ်ႈဢွၼ်ႇၼၼ်ႉ လႅင်းႁွင်ႉမင်ႁႅင်းႁႅင်းယဝ်ႉ -
“ ပီႈၸၢႆးၼွင်ႉ ... မႃးဢႅဝ်လႅင်းၶဝ်လႄႈ ... လႄႈ ... လႄႈ
ပီႈၸၢႆးၼွင်ႉ မႃးဢႅဝ်ႇလႅင်းၶဝ်လႄႈ ... လႄႈ ... လႄႈ ...
ၽူၺ်း ... လႆႈငိၼ်းၼင်ႇၼၼ်ႉ ... မၼ်းၸဵတ်ႉၼမ်ႉတႃမၼ်းသေ မႃးၵွတ်ႇဢဝ်လႅင်း ဢၼ်ၶုၵ်းၸႂ်လႆႈ ပီႈၸၢႆးၼွင်ႉၼၼ်ႉယူႇ ။
“ လႅင်း ... ”
“ ပီႈၽူၺ်း ... လႅင်းၶုၵ်းၸႂ်လႆႈ ပီႈၸၢႆးၼွင်ႉဢေႃႈ ... ”
“ လႅင်းဢိူၺ်း ... ပီႈၽူၺ်း တေလႆႈႁဵတ်းႁိုဝ်သပ်းလႅင်းပၼ်လႅင်းလႃႇ ... ? ”
ၼမ်ႉတႃဢွၼ်ႇၽူၺ်းၵေႃႈ လေႃႈလူင်းမႃးသေ မၼ်းၵေႃႈ ဝူၼ်ႉလွင်ႈၸၢႆးၼွင်ႉယူႇ ... လွင်ႈဢၼ်ၶဝ်တေႇႁၼ်ၵၼ်မေႇမဵဝ်ႉ လွင်ႈဢၼ်ၸၢႆးၼွင်ႉလႄႈမၼ်း တႆႇၶူဝ်ၽႅၼ် ၊ လွင်ႈႁေႃႈလေႃႉမႃႉၸွမ်းၵၼ် ၊ လွင်ႈမၼ်းသိုဝ်ႉမွၵ်ႇ ၊ လွင်ႈၸၢႆးၼွင်ႉၽႅဝ်မႃးၸွမ်းလႅင်းသေ မႃးၼၢဝ် ၊ လွင်ႈၶဝ်ၵႂႃႇဝႆႈၽြႃးၸွမ်းၵၼ် ၊ လွင်ႈဢၼ်ငိုၼ်းႁွမ်ထၢမ်ဝႃႈ - “ ပဵၼ်မၢဝ် ၽူၺ်းႁႃႉ ... ?” လွင်ႈဢၼ်ၸၢႆးၼွင်ႉဝတ်ႉၵႂၢမ်း မၢဝ်ႇဝၢၼ်ႈၼွၵ်ႈႁၼ်သၢဝ်ၼွင်ႉတႆးဝဵင်း၊ လွင်ႈၶႃ သိုပ်ႇၽူၼ်းတေႃႇၵၼ်သေ ဢၼ်ၸၢႆးၼွင်ႉဝႃႈ“ ၸႂ်ၽၵ်းၵုတ်ႇ ” ၊ လွင်ႈဢၼ်ၶဝ်လႆႈထူပ်းၵၼ် တီႈတႃႈၵုင်ႈ၊ လွင်ႈဢၼ်ၸၢႆးၼွင်ႉ ၶိုၼ်းၽၢတ်ႇယၢၼ်ၶဝ်မိူဝ်း၊ လွင်ႈဢၼ်ၸၢႆးၼွင်ႉဝႃႈ - မၼ်းပဵၼ် ၶႅၵ်ႇ ...ၸိူဝ်းၼၼ်ႉ ၽူၺ်းၶိုၼ်းဝူၼ်ႉၶွပ်ႈတင်းသဵင်ႈယူႇ...။
ၸၢႆးၼွင်ႉသမ်ႉဝႃႈ မၼ်းပဵၼ် ၶႅၵ်ႇ ၵူၺ်းၼႆလႄႈ ၽူၺ်းတႄႉပႂ်ႉမုင်ႈမွင်းၶႅၵ်ႇမၼ်းယူႇ ... ... ။
ဝွၵ်းဢၼ်ၸၢႆးၼွင်ႉ တႅမ်ႈပၼ်မၼ်းဝႆႉၼၼ်ႉၵေႃႈ မၼ်းၶိုၼ်းမေးတႅမ်ႈဝႆႉ ၶႅမ်ႉၶႅမ်ႉသေ ဢဝ်ၸပ်းဝႆႉ တီႈႁူဝ်ၼွၼ်းမၼ်းယူႇ ...... ။
ၶႅၵ်ႇ
✽ ၽွင်ႈမိူဝ်ႈမႃးၵေႃႈ ၊ တေႃႈမႃးႁင်းၵူၺ်း
ဢမ်ႇပႃးဢူၺ်းၵေႃႉ ၊ တႃႇတေႃႉၸုင်မိုဝ်း
ၶူဝ်းႁွႆႈတိုဝ်းၵေႃႈ ၊ တေႃႈဢမ်ႇပႃးသင် ။ ။
✽ ၽွင်းမိူဝ်ႈၵႂႃႇၵေႃႈ ၊ တေႃႇၵႂႃႇႁင်းၵူၺ်း
ဢမ်ႇပႃးဢူၺ်းၵေႃႉ ၊တႃႇတေႃႉၸုင်မိုဝ်း
ၶူဝ်းႁွႆးတိုဝ်းၵေႃႈ ၊ တေႃႈဢမ်ႇပႃးသင် ။ ။
✽ ၽႅဝ်သေမႃးလိုဝ်ႈ၊ ၽွင်းပႆယိုဝ်ႈၵႂႃႇ
မႃးၽႃႇၸိူၵ်ႈၶိုမ်း ၊ ႁုၼ်ႉၵိုမ်းမတ်ႉမၼ်ႈ
လိမ်ႇၽၼ်ႈၵဵဝ်ႈတူဝ် ၊ ယုမ်ႉၶူဝ်မႅပ်ႇႁႆႈ
လႆႈၸင်းလႆႈႁၵ်ႉ ၊ ဢမ်ႇမၵ်ႉတေႃးသ
မၵ်ႉလေႃးၽပဵၼ် ၊ ဢၼ်ယဵၼ်လႆႈမႃး
ၵျွၵ်းၵႃႈၵူႈလွင်ႈ ၊ ၵၢမ်ႇယွင်ႈသဵင်ႈမူတ်း
လႆႈပူတ်းပွႆႇၽႃႈ ၊ ဝၢႆႇၼႃႈပႅတ်ႈၵၼ်
ယၼ်သိုပ်ႇတၢင်းၸႅၵ်ႇ ၊ ထုင်းၸဝ်ႈၶႅၵ်ႇ ။ ။
သင်ဝႃႈ ၽူႈလူလိၵ်ႈႁဝ်းၶဝ်
ႁၼ်မႅၼ်ႈ ၸၢႆးၼွင်ႉၼႆၸိုင် ၶႅၼ်းတေႃႈ ... ... ...
ႁႅင်းသိူဝ်ၶႅင် - တၢင်ႉယၢၼ်း
သုတ်းယဝ်ႉ