ၶႅၵ်ႇ/တွၼ်ႈသၢမ်သိပ်းဢဵတ်း

ယွၼ်ႉပိူဝ်ႈ ပေႃႈၶဝ်လၢတ်ႈဝႃႈတီႈမၼ်းႁိုဝ် ? ဢမ်ႇၼၼ် ယွၼ်ႉပိူဝ်ႈ မၼ်းမေႃႁူႉတူဝ်ႁင်းၵူၺ်းမၼ်းယဝ်ႉႁိုဝ်? ယွၼ်ႉပိူဝ်ႈ ထၢင်ႇၸၢႆးၼွင်ႉၵေႃႈ တေဢမ်ႇၼွမ်းဢူၼ်ႈ ၸိူင်ႉၼင်ႇဝၼ်ႈပုၼ်ႉယဝ်ႉႁိုဝ် ? ၸၢႆးၸၢႆးၵေႃႈ ယွၼ်ႉပိူဝ်ႈ ၵွပ်ႈလွင်ႈသင်သေ မၼ်းလႆႈလႅၵ်ႈလၢႆႈယဵၼ်ၼိမ်မႃးသေၵဝ်ႇၼႆ ဢမ်ႇလၢမ်းႁူႉလႆႈ ။

ၸၢႆးၼွင်ႉတႄႉ ၵၢၼ်ဢၼ်မၼ်းလူဝ်ႇႁဵတ်းၼၼ်ႉ မၼ်းႁဵတ်းၸွမ်းတဵမ်ထူၼ်ႈယူႇ၊ ၸၢႆးၸၢႆးၵေႃႈ ဢမ်ႇမႃးလၢတ်ႈတေႃႇမၼ်းလႄႈ မၼ်းၵေႃႈ ယူႇၵႂႃႇႁဵတ်းၼၼ်ၵူၺ်း ။

ဝၼ်းၼိုင်ႈ ၽွင်းမိူဝ်ႈၸၢႆးၸၢႆး တေလူင်းႁဵၼ်းၼၼ်ႉ လုင်းသၢင်ႇတုၺ်ႉ ဢမ်ႇတၼ်းလႄႈ ၸၢႆးၼွင်ႉၵေႃႉလႆႈႁေႃႈၵႃး ၵႂႃႇႁပ်ႉၸၢႆးၸၢႆးယဝ်ႉ၊ မိူဝ်ႈလူင်းၸၼ်ႉၸွမ်မႃးၼၼ်ႉ လႆႈႁၼ်ၸၢႆးၸၢႆးလႄႈၽူၺ်း ပႆမႃးၸွမ်းၵၼ်ယဝ်ႉ ၊ ပေႃးဝႃႈ ၽႅဝ်မႃးႁိမ်းၵႃးၼႆ ၸၢႆးၸၢႆးၸင်ႇဝႃႈ -

“ ၽူၺ်း ... ၶိုၼ်ႈၵႃးလႄႈ ... ”

ၽူၺ်းၵေႃႈ ၶိုၼ်ႈၶီႇၽၢႆႇလင်ၵႃးယဝ်ႉ ၸၢႆးၸၢႆးၸင်ႇထၢမ် -

“ လုင်းသၢင်ႇတုၺ်ႉ ဢမ်ႇမႃးႁႃႉ ... ? ဢၢႆႈၼွင်ႉ... ”

“ မၼ်းဢမ်ႇတၼ်းၼႆဢေႃႈ ... ၵွပ်ႈၼႆ ... ”

“ မႂ်းသုတ်ႉၵႂႃႇၼင်ႈၽၢႆႇပုၼ်ႉလႄႈ ... ၵဝ်တေၵေႃႉႁေႃႈလႆ ”

ၸၢႆးၼွင်ႉၵေႃႈ သုတ်ႉၵႂႃႇၼင်ႈ ၽၢႆႇၶၢင်ႈၵႃးယူႇယဝ်ႉ၊ ၶဝ်ႁူမ်ႈၵၼ် ၶီႇၵႃးမႃးသေ ၽႂ်ၵေႃႈဢမ်ႇတၵ်းသဵင် ဢမ်ႇပဵၼ်ဢုပ်ႇၵၼ်သင် ၊ ၽွင်းမိူဝ်ႈ ၸၢႆးၸၢႆးတိုၵ်ႉႁေႃႈၵႃး ဢၢင်ႈၵႂႃႇသူင်ႇၽူၺ်းၼၼ်ႉၼႆ ၽႅဝ်မႃးသဵၼ်ႈတင်းဢၼ်ၼိုင်ႈ လႆႈႁၼ်ၵူၼ်းၸၢႆးသၢမ်ၵေႃႉ ဢွၵ်ႇမႃးႁႄႉဢိုတ်းတၢင်းၵႃးလႄႈ ၸၢႆးၸၢႆး ၸင်ႇလႆႈၵိုတ်းၵႃး ၽၢႆႇၼႃႈၶဝ်ယဝ်ႉ၊ ၶဝ်သၢမ်ၵေႃႉၼၼ်ႉ ဢၢပ်ႈတေဢမ်ႇၸႂ်ႈၵူၼ်းလီၼႆ ၸၢႆးၼွင်ႉလၢမ်းလႆႈယူႇ၊ ၶဝ်သၢမ်ၵေႃႉမႃးငွၵ်ႈတူၺ်း ၼႂ်းၵႃးသေ ၵေႃႉၼိုင်ႈၸင်ႇဝႃႈ -

“ ပီႈသထေးႁဝ်းၶဝ် ... ပေႃးဝႃႈ ဢမ်ႇသေလၢႆ မၢၼ်ႇၵႃးပီႈသထေးႁဝ်းၶဝ်ၼႆ ပၼ်ၵႃႈၼမ်ႉၼဵင်ႈႁဝ်းၽွင်ႈၶႃႈလႄႈ ... ႁဝ်းၶႃႈ ယွၼ်းဢဝ်လီလီဢေႃႈ ... ၼႆႉ ... ႁေး ... ႁေး ... ႁေ... ”

ၸၢႆးၼွင်ႉ လွမ်တူၺ်း ၼႂ်းမိုဝ်းၵေႃႉဢၼ်လၢတ်ႈၵႂၢမ်းၼၼ်ႉ လႆႈႁၼ် မီးဝႆႉ ၶွၼ်ႉလဵၵ်းလႅမ်ႈၼိုင်ႈယူႇယဝ်ႉ၊ ၸၢႆးၸၢႆးၸင်ႇဝႃႈ -

“ ဢႃ ... တႆးၵေႃႉၶဝ် ယႃႇပေႁဵတ်းၼၼ် ... ”

ၵေႃႉဢၼ်ယိပ်းၶွၼ်ႉလဵၵ်းဝႆႉၼၼ်ႉ ၸင်ႇဝႆႁူဝ်ၼႄသေလၢတ်ႈဝႃႈ

“ ယႃႇပေၸိူင်ႉၶၢဝ်းယၢမ်းမၼ်းယူႇ ... ႁဝ်းလူဝ်ႇၼႅတ်ႈဢိူဝ်ႈ ပၼ်မႃးၽႂ်းၽႂ်းလႄႈ ၵႃႈၼမ်ႉၼဵင်ႈဝၢၼ် ... ”

ၸၢႆးၸၢႆး တေလႆႈႁဵတ်းႁိုဝ်ၵေႃႈ မၼ်းဢမ်ႇႁူႉ၊ ၽူၺ်းတႄႉ လွမ်မႆႈၸႂ်ဝႆႉယူႇယဝ်ႉ။

ၸၢႆးၼွင်ႉ ၸင်ႇၽုၺ်ႇၽၵ်းတူၵႃးသေ လူင်းၵႂႃႇၸူးၶဝ်သေ -

“ လီယဝ်ႈ ... ၵေႃႉၶဝ် ... သူၶႂ်ႈလႆႈၵႃႈႁိုဝ် ... ? ”

“ ႁႄး ... ႁႄး ... ႁဝ်းသၢမ်ၵေႃႉၼႆၼႃႇ ... ပၼ်ႁဝ်းမႂ်လူင် သၢမ်မၢင်ၵေႃႈလႆႈယဝ်ႉ၊ မၢၼ်ႇၵႃးသူၼႆႉတႄႉ ... မိူၼ်တေဢမ်ႇၵႃး သၢမ်သိပ်းမၢင်သႄႈ ... ၼေႃ ... ? ၸႂ်ႈႁိူဝ်ႉ ... ? ”

ၸၢႆးၼွင်ႉၵေႃႈ ၸင်ႇၸၼ်ဢဝ်ငိုၼ်းၼႂ်းထွင်းမၼ်းသေ ဢၢင်ႈပၼ်ၶဝ်ယူႇ၊ ၽွင်းၼၼ်ႉ ၽူၺ်းၸင်ႇႁွင်ႉလၢတ်ႈဝႃႈ -

“ ၸၢႆးၼွင်ႉ ... ၸၢႆးၼွင်ႉ ... ယႃႇပေပၼ် ၽူၺ်းတေၵေႃႉပၼ်လႆ ... ဢဝ်ၼႆႈလႄႈ ... ”

ၶဝ်ဢွၼ်ၵၼ် ငိၼ်းၼင်ႇၼၼ်သေ ဢွၼ်ၵၼ်ဝၢႆႇတူၺ်း ၽူၺ်း ၼႂ်းၵႃးယူႇ၊ ၽွင်းၼၼ်ႉ ၸၢႆးၼွင်ႉ ၼႅတ်ႈဝၵ်ႉဢဝ်ၶွၼ်ႉလဵၵ်း ၼႂ်းမိုဝ်းၵူၼ်းၵဝ်းၼၼ်ႉ ၽႂ်းၽႂ်းသေ လၢၵ်ႈႁႅမ်ပၼ်ၶဝ်ယဝ်ႉ၊ ၸၢႆးၼွင်ႉ တၼ်းႁဵတ်းႁိုဝ် ႁႅမ်မင်ၶဝ်ၸိူင်ႉႁိုဝ်ၵေႃႈ ဢမ်ႇႁူႉ ၶဝ်ၺႃးၵိၼ်ၵႂႃႇတင်းသၢမ်ၵေႃႉယူႇယဝ်ႈ ၽွင်းၼၼ်ႉၸၢႆးၸၢႆးၵေႃႈ ၵူဝ်ၶဝ်ႁႅမ်မႅၼ်ႈမၢၼ်ႇၵႃးမၼ်းလႅဝ်လႄႈ မၼ်းၼႅတ်ႈႁေႃႈၵႃးမၼ်း သွင်ႉဢွၵ်ႇပၢႆႈၵႂႃႇ ၽၢႆႇၼႃႈၵမ်ႈလဵဝ်ယဝ်ႈ။

ၶဝ်သၢမ်ၵေႃႉၸိူဝ်းၼၼ်ႉ ၶိုၼ်းၽုတ်ႇၽၢတ်ႇလုၵ်ႉမႃး ၽွမ်ႉႁူမ်ႈၵၼ် ၶိုၼ်းဢၢင်ႈႁႅမ်ၸၢႆးၼွင်ႉယူႇ၊ ၸၢႆးၼွင်ႉ ပဵၼ်ဝႆႉၵေႃႉလဵဝ်သေတႃႉ ၼႂ်းမိုဝ်းၸၢႆးၼွင်ႉ သမ်ႉလႆႈဝႆႉၶွၼ်ႉလဵၵ်းၶဝ်ဝႆႉလႄႈ ၶဝ်ဢမ်ႇႁတ်းၶဝ်ႈၸမ် ၸၢႆးၼွင်ႉ၊ ၶဝ်ဢွၼ်ၵၼ် ယိုဝ်ႈယိုတ်းယိုဝ်ႈယိုတ်းဝႆႉယူႇ၊ ၸၢႆးၼွင်ႉၸင်ႇဝႃႈ

“ မႃးလႄႈ ... မႃးဢဝ်ၵႃႈၼမ်ႉၼဵင်ႈဝၢၼ်သူလႄႈ ”

ယွၼ်ႉပိူဝ်ႈ ၶဝ်ၵူဝ်ၶွၼ်ႉလဵၵ်း ၼႂ်းမိုဝ်းၸၢႆးၼွင်ႉလႄႈ ၶဝ်ဢမ်ႇႁတ်းၸမ်၊ ၶဝ်ၵမ်တႃမိုဝ်းသေ လွမ်ႉငႃၸၢႆးၼွင်ႉဝႆႉယူႇၵူၺ်းလႄႈ -

“ သူၵူဝ် ၶွၼ်ႉလဵၵ်း ၼႆႉႁႃႉ ... ? ”

ၸၢႆးၼွင်ႉ ဝႃႈၼၼ်သေ ဢဝ်ၶွၼ်ႉလဵၵ်း ၼႂ်းမိုဝ်းမၼ်း ပိုတ်ႉပႅတ်ႈၵႂႃႇ ၼႂ်းသူၼ်ၽင်ႇတၢင်းၼၼ်ႉယဝ်ႉ၊ ၽိူဝ်ႈႁၼ်ၼင်ႇၼၼ် ၶဝ်သၢမ်ၵေႃႉ ၸင်ႇၶိုၼ်းမႃးၽွမ်ႉၵၼ် ၶဝ်ႈၸူးၸၢႆးၼွင်ႉယဝ်ႉ၊ ၸၢႆးၼွင်ႉၵေႃႈ ဝႆႉၽၢင်ႉသတိယႂ်ႇယႂ်ႇသေ တေႃႇသူႈၶဝ်ယူႇ၊ ၵေႃႉလႂ်ၶဝ်ႈၸူးၸၢႆးၼွင်ႉၵေႃႈ ၸၢႆးၼွင်ႉႁႆႇပၼ်ၶဝ် တိူဝ်ႉၸဵပ်းၵႂႃႇ ၵေႃႉလႂ်ၵေႃႉၼၼ်ႉလႄႈ ၶဝ်ၸင်ႇႁူႉထိုင်ဝႃႈ ၶဝ်ဢမ်ႇၶဵင်ႇတႃႉလႆႈ ၸၢႆးၼွင်ႉ ၵေႃႉတေႃႇၵေႃႉ ၼႆယဝ်ႉ၊ ၵွပ်ႈၼႆ ၶဝ်သၢမ်ၵေႃႉ ၸင်ႇႁူမ်ႈၵၼ်သေ ၶဝ်ႈမင်ၸၢႆးၼွင်ႉယဝ်ႉ။

ၸၢႆးၼွင်ႉ တၼ်းႁၼ်တႃမိုဝ်းၶွၼ်ၼိုင်ႈ ႁႅမ်ၶဝ်ႈမႃးၸူး သိုဝ်ႈၼႃႈမၼ်းလႄႈ မၼ်းၼႅတ်ႈၵူမ်ႈပႅတ်ႈၽႂ်းၽႂ်းသေ ဢဝ်တိၼ်မၼ်း ယုၵ်ႉပိတ်ႉပၼ်ပဵမ်ႉၵေႃႉၼၼ်ႉယဝ်ႉ၊ ထႅင်ႈၵေႃႉၼိုင်ႈ သမ်ႉဢဝ်တိၼ်ဝၵ်ႉ ပိတ်ႉတိၼ်ၸၢႆးၼွင်ႉ ဢၼ်ယင်ႇတမ်းဝႆႉ ၼိူဝ်လိၼ်ၼၼ်ႉယူႇ၊ သင်ဝႃႈ တိၼ်ဢၢႆႈၼၼ်ႉ ဝၵ်ႉပိတ်ႉၺႃး တိၼ်ၸၢႆးၼွင်ႉၼႆ ၸၢႆးၼွင်ႉၸၢင်ႈလူမ်ႉၼင်ႈသွင်ႉသႂ်ႇ ၼိူဝ်တၢင်းယဝ်ႉ၊ ၵူၺ်းၵႃႈ ၸၢႆးၼွင်ႉသမ်ႉပဵၼ်ၵူၼ်း ၶႅၼ်ႇမေႃလၢႆးလႅတ်းၵေႃႉၼိုင်ႈလႄႈ မၼ်းၸင်ႇတၼ်းဝႅၼ်ပႅတ်ႈယူႇယဝ်ႉ။

ၸၢႆးၼွင်ႉ တင်းဝႅၼ်တင်းလိူၼ်းပၢႆတိၼ်မၼ်း သႄႇပိတ်ႉသႂ်ႇပၼ် သိုဝ်ႈလမ်းၶေႃး ၵေႃႉဢၼ်ၶုတ်ႈပိတ်ႉတိၼ်မၼ်းၼၼ်ႉလႄႈ -

ပၢပ်ႉ ... ... ...

“ ဢိုဝ်ႉ ! ... ... ”

သဵင်တိၼ်တိူဝ်ႉလႄႈ သဵင်ႁွင်ႉဢွၵ်ႇမႃး မိူဝ်ႈလဵဝ်ၵၼ်သေ ၵေႃႉၼၼ်ႉၵေႃႈ ပၼ်ႇငူပ်ႇထူၵႂႃႇ ၼိူဝ်တၢင်းၵမ်းလဵဝ်ယဝ်ႉ။

ထႅင်ႈၵေႃႉၼိုင်ႈသမ်ႉ သွၼ်ႉတႃမိုဝ်းမၼ်းသေ ယိူင်းထုပ်ႉမႃးသိုဝ်ႈၼႃႈ ၸၢႆးၼွင်ႉထႅင်ႈလႄႈ ၸၢႆးၼွင်ႉ ၶၢႆႉလွၵ်းတိၼ် သၢင်ႉတူဝ်ငိူင်ႉငႅၵ်းဢွၵ်ႇပႅတ်ႈ တၢင်းၶၢင်ႈလႄႈ ဢဝ်ငွၵ်းသွၵ်ႇတွၵ်ႈတမ်ပၼ် သီႈမႅပ်ႉၵေႃႉၼၼ်ႉၶိုၼ်းယဝ်ႉ။ သွင်ၵေႃႉဢွၼ်တၢင်းၼၼ်ႉ ၽုတ်ႇလုၵ်ႉၶိုၼ်းၶဝ်ႈမႃး ႁႅမ်ၸၢႆးၼွင်ႉထႅင်ႈယူႇၵေႃႈ ၸၢႆးၼွင်ႉၵၢင်လၢႆးပၢၵ်ႈၶႄတူဝ်သေ ၶိုၼ်းတႅၼ်းၸဵမ်တိၼ် ပႃးတႃမိုဝ်းသွၼ်ႉပၼ် တိူဝ်ႉၵႂႃႇတင်းသွင်ၵေႃႉ ဝူင်ဢွၵ်ႇၼင်ႈသွင်ႉ ၵႂႃႇယူႇယဝ်ႉ။

ၽူၺ်းယူႇၼိူဝ်ၵႃးသေ ဝၢႆႇလင်ၶိုၼ်းလွမ်တူၺ်း ၸၢႆးၼွင်ႉၶဝ် မင်ၵၼ်ၼၼ်ႉယူႇ ၊ မၼ်းၼၢင်းမႆႈၸႂ်တၢင် ၸၢႆးၼွင်ႉလႄႈ -

“ ၸၢႆးၸၢႆး ... ၵႂႃႇၸွႆႈၸၢႆးၼွင်ႉ ... ၽွင်ႈလႄႈ ... ”

ၸၢႆးၸၢႆးၵေႃႈ ၼႅတ်ႈလူင်းၵႃးသေ ၸင်ႇဢႅၼ်ႇမႃးၶဝ်ႈၸူး တီႈၶဝ်မင်ၵၼ်ယူႇၼၼ်ႉယဝ်ႈ၊ ၵူၼ်းႁၢႆႉသွင်ၵေႃႉ မႃးၺွပ်းလႆႈ ၸၢႆးၼွင်ႉသေ ၸႂ်ႉႁႂ်ႈၵေႃႉၼိုင်ႈ မင်ၸၢႆးၼွင်ႉယူႇ၊ ဢၢႆႈၵေႃႉၼၼ်ႉ ၼႅတ်ႈဢဝ်တႃမိုဝ်း ၶဝ်ႈထုပ်ႉ ပုမ်ၸၢႆးၼွင်ႉလႄႈ ၸၢႆးၼွင်ႉၵေႃႈ ၼႅတ်ႈငွၵ်းၶိုၼ်ႈႁူဝ်ၶဝ်ႇမၼ်း ႁႄႉပႅတ်ႈသေ ၶိုၼ်းဢဝ်တိၼ်မၼ်း ပိတ်ႉပၼ်ၶိုၼ်း ဢၢႆႈၼၼ်ႉယဝ်ႉ၊ ဢၢႆႈၼၼ်ႉ ဝူင်ၵႂႃႇၽၢႆႇလင်ၶိုၼ်းသေ ၵႂႃႇသုမ်ႇသႂ်ႇ ၸၢႆးၸၢႆးလႅၼ်ႈမႃးၼၼ်ႉလႄႈ ၸၢႆးၸၢႆး ဢဝ်သၼ်မိုဝ်း ၽၼ်းပၼ်ၵွင်ႇၵေႃႈမၼ်း ဢဝ်ငွၵ်းသွၵ်ႇၼွၵ်းပၼ်ဢႅင်ႈမၼ်းယဝ်ႉ။

ၸၢႆးၼွင်ႉၵေႃႈ ၼဵင်ႇၶွၼ်ႈႁႅင်းသေ ၶတ်းၼၢဝ်ႉဢဝ် ဢၢႆႈသွင်ၵေႃႉ ဢၼ်ၺွပ်းမၼ်းဝႆႉၼၼ်ႉလႄႈ ၶႃသွင်ၵေႃႉ ၶိတ်းတင်ႈတူးလူမ်ႉငူပ်ႇမႃးၽၢႆႇၼႃႈ တင်းသွင်ၵေႃႉယူႇယဝ်ႉ၊ ၸၢႆးၼွင်ႉ ၸွမ်းဢဝ်တိၼ်ပိတ်ႉသႂ်ႇထႅင်ႈ ဢၢႆႈၵေႃႉၼိုင်ႈယူႇ၊ ၸၢႆးၸၢႆးၵေႃႈ ၶဝ်ႈမင်ဢၢႆႈႁၢႆႉတၢင်ႇၵေႃႉၼၼ်ႉလႄႈ ၵူၼ်းႁၢႆႉသၢမ်ၵေႃႉၶဝ်ၵေႃႈ ႁူႉထိုင်ဝႃႈ ၶဝ်တေဢမ်ႇၶဵင်ႇပႄႉလႆႈယဝ်ႉလႄႈ ၶဝ်ၸင်ႇ ၸၼ်တိုတ်ႉတၢႆးၵၼ် လုၵ်ႉလၢၵ်ႈၵၼ် ၽႃၵၼ်ဢႅၼ်ႇပၢႆႈ ၽၢတ်ႇဢွၵ်ႇၵႂႃႇယူႇယဝ်ႉ။

ၸၢႆးၸၢႆး ၸင်ႇမႃးယိပ်းၶႅၼ်ၸၢႆးၼွင်ႉသေ -

“ ဢၢႆႈၼွင်ႉ ... ၸဵပ်းၵႂႃႇတီႈလႂ် ... ? ”

“ ဢမ်ႇၸဵပ်းတီႈလႂ်ၶႃႈ ... ပီႈၸၢႆးလူး ... ? ”

လႆႈငိၼ်းလႆႈႁၼ် ၸၢႆးၸၢႆးၸူမ်းၽႂ်ႇတၵ်ႉၵႂၢမ်းသႂ်ႇမၼ်းၼင်ႇၼႆ ၼႂ်းၸႂ်ၸၢႆးၼွင်ႉ လႆႈၸူမ်းသိူဝ်းၵႂႃႇ ပွၵ်ႈထီႉၼိုင်ႈယဝ်ႉ။ ၶႃသွင်ၵေႃႉ ၶိုၼ်းပႆမႃးၸူးၵႃး လႆႈႁၼ်ၽူၺ်းယုမ်ႉ ပႂ်ႉႁပ်ႉၶႃဝႆႉယူႇသေ ၶဝ်ၶိုၼ်ႈၵႃးယဝ်ႉ ၽူၺ်းၸင်ႇဝႃႈမႃး -

“ ၸၢႆးၼွင်ႉ ...ၽူၺ်းတႄႉ ယွင်ႈယေႃးဢၢမ်းဢေႃး တၢင်းလႅတ်းၽၢႆ ၸၢႆးၼွင်ႉတႄႉတႄႉယဝ်ႉ ... ”

“ ၵွပ်ႈသင် ... ? ၽူၺ်း ... ”

“ ဢေႃ ... ၽူၺ်းယူဝ်ဝႃႈ ၸၢႆးၼွင်ႉ တေပၼ်ငိုၼ်းၶဝ်တႄႉတႄႉၼႆ ၼႃး ... ”

“ ၶွင်ၼင်ႇ ၵူၼ်းႁၢႆႉမဵဝ်းၼႆႉ ... လီပၼ်တႃမိုဝ်းၵူၺ်းဢိူဝ်ႈ ... ၽူၺ်း ... တႃမိုဝ်းၶူမ်းမႃးႁိုင်ၼႃႇယဝ်ႉလူး ... ”

ၸၢႆးၼွင်ႉတႄႉ ဢမ်ႇတၼ်းဝူၼ်ႉသင်သေ လၢတ်ႈဢွၵ်ႇမႅၼ်ႈသူပ်းၵႂႃႇသေတႃႉ ၸၢႆးၸၢႆးတႄႉ ဝူၼ်ႉပွင်ႇဝႃႈ ၸၢႆးၼွင်ႉ ၶႂ်ႈဝႃႈၶိတ်ႉမၼ်းႁိုဝ်? ၼႆယူႇယဝ်ႈ။

ၶဝ်သူင်ႇၽူၺ်း ၽႅဝ်ႁိူၼ်းၽူၺ်းၶဝ် ၼင်ႈဢုပ်ႈၵၼ်ၵမ်းၼိုင်ႈသေ ပူၼ်ႉမိူဝ်းမႃးယူႇယဝ်ႉ။

+ + + + + + +

ၽွင်းမိူဝ်ႈ ႁေႃႈၵႃးမႃးမိူဝ်းၼၼ်ႉ ၸၢႆးၸၢႆးႁေႃႈၵႃး ဢမ်ႇသၢင်ႇထုၵ်ႇလႄႈ မၼ်းၵႂင်သေ ဢဝ်ၵႃးမၼ်း ၽႃႇၺႃးၵႃးပိူၼ်ႈ တီႈၼႂ်းတၢင်းယဝ်ႉ မၼ်းဢမ်ႇထိင်းလႆႈၵႃးမၼ်းသေ ဢဝ်ၵႃးမၼ်း တမ်ၺႃး ၵူၼ်းၵေႃႉၼိုင်ႈ ဢၼ်တိုၵ်ႉၶၢမ်ႈတၢင်းၼၼ်ႉယဝ်ႉ။ တၢမ်ႇတၢင်းၽိတ်း ဢၼ်ႁေႃႈၵႃးၽႃႇပိူၼ်ႈၼၼ်ႉ ၵူၼ်းႁေႃႈၵႃး တေလႆႈၶမ်ၶွၵ်ႈ၊ ၸဝ်းၵႃး တေလႆႈသၢႆႈငိုၼ်းပၼ်ၵႃးပိူၼ်ႈ တေလႆႈပၼ်တၢမ်ႇငိုၼ်းၼႆ ၸၢႆးၼွင်ႉႁူႉထိုင်ယဝ်ႉ။ ၸၢႆးၸၢႆးတႄႉ ၵႂင်သေ ႁိူဝ်ႇမၼ်းတႅၵ်ႇယွႆႉဝႆႉယူႇ ... ၽူႈပႂ်ႉတၢင်း ဢၢႆႈႁူဝ်ၽိူၵ်ႇၶဝ်ၵေႃႈ တိုင်ႈၼူၵ်ႉဝိတ်းၶဝ် မေႃဝိတ်းဝိတ်းသေ ၸႂ်ႉၵႃးၵိုတ်းယူႇ ... ၊ ၽွင်းမိူဝ်ႈ လုၵ်ႉတီႈႁိူၼ်းၽူၺ်းၶဝ် ဢွၵ်ႇမႃးၼၼ်ႉ ယွၼ်ႉပိူဝ်ႈတီႈၼွၵ်ႈ မႆႈၼႃႇလႄႈ ၸၢႆးၸၢႆး ၸႂ်ႉဢိုတ်းမၢၼ်ႇၵႃးသေ ၽုၺ်ႇလူမ်းၵတ်း ၼႂ်းၵႃးဝႆႉယူႇယဝ်ႉ။ ၽႃမၢၼ်ႇၵႃးၶဝ်ၼၼ်ႉ ယွၼ်ႉပိူဝ်ႈ ပဵၼ်ၽႃမၢၼ်ႇလမ်ပိင်းဝႆႉလႄႈ ပေႃးလုၵ်ႉတီႈၼွၵ်ႈတူၺ်းမႃးၼႆၸိုင် ဢမ်ႇႁၼ်ၵူၼ်းၼႂ်းၵႃး ။

ၸၢႆးၸၢႆး ဢၢင်ႈၽုၺ်ႇၽၵ်းတူသေ လူင်းၵႃးယူႇ ... ၊ ၸၢႆးၼွင်ႉ ၸင်ႇၸၼ်မိုဝ်းမၼ်းဝႆႉသေ -

“ ပီႈၸၢႆး ... ယႃႇပေၽုၺ်ႇၽၵ်းတူၵႃး ... ”

“ ပဵၼ်သင် ... ? ”

“ ပီႈၸၢႆး ... မႃႈၼင်ႈၽၢႆႇၼႆႉ ၽႂ်းၽႂ်းလႄႈ ႁႃးလႅၵ်ႈတီႈၼင်ႈၵၼ် ... ”

ၸၢႆးၸၢႆးတႄႉ ၵႂင်သေ တေလႆႈႁဵတ်းႁိုဝ်ၵေႃႈ ဢမ်ႇႁူႉယဝ်ႈ။ ၸၢႆးၼွင်ႉ ၸင်ႇၼႅတ်ႈတိုတ်ႉၶႅၼ်ၸၢႆးၸၢႆးသေ ၸၼ်ဢဝ်ၸၢႆးၸၢႆး မႃးၼင်ႈၽၢႆႇၼႆႉသေ မၼ်းၶိုၼ်းၵႂႃႇၼင်ႈ တီႈႁေႃႈၵႃးၼၼ်ႉယဝ်ႉ။ ၸၢႆးၼွင်ႉၸင်ႇလၢတ်ႈဝႃႈ -

“ ပီႈၸၢႆး ... ယႃႇပေလၢတ်ႈၵႂၢမ်းသင်ၼႃႈ ... ၶႃႈတေ တူၺ်းတူၺ်းသေ လၢတ်ႈလႆ ... ”

ၸၢႆးၼွင်ႉဝႃႈၼၼ်သေ ၽုၺ်ႇၽၵ်းတူၵႃးမၼ်း ယူႇယဝ်ႉ၊ ၽွင်းၼၼ်ႉ ဢၢႆႈႁူဝ်ၽိူၵ်ႇၶဝ် ၽႅဝ်မႃးသေ မႃးယွၼ်းလႅင်ႇၸႅၼ်ႇ ၸၢႆးၼွင်ႉ... ၵႂႃႇယဝ်ႉ။ ၶဝ်မႃးတွင်ႈထၢမ်ၸၢႆးၼွင်ႉ ၵူႈမဵဝ်းမဵဝ်းသေ တႅမ်ႈမၢႆၵႂႃႇယဝ်ႉ။ လိူဝ်သေၼၼ်ႉ ၶဝ်ႁွင်ႉၸၢႆးၼွင်ႉ ၶိုၼ်းၵႃးၵႂႃႇၸွမ်းၶဝ်သေ ဢဝ်ၵႂႃႇသႂ်ႇၶွၵ်ႈ ဝႆႉယဝ်ႉ။ ဝၢႆးသေႁၢၼ်ၶဝ် မႃးတႅၵ်ႈမႃးမၢႆ တီႈၵႃးၽႃႇၵၼ်ယဝ်ႉ ၸၢႆးၸၢႆးၵေႃႈ ဢွၼ်ဢဝ်ၵူၼ်းလႄႈၵႃး ဢၼ်မၼ်းၽႃႇၺႃးၼၼ်ႉသေ ႁွင်ႉမႃးတီႈႁိူၼ်းၶဝ်ယဝ်ႉ။ ၶဝ်ၼင်ႇၵၼ် ဢုပ်ႇၵၼ် ႁႂ်ႈသၢင်ႇထုၵ်ႇ တႃႇတေ ၶိုၼ်းမႄးလီပၼ်ၵၼ်ၼၼ်ႉယူႇ။

မိူဝ်ႈၸဝ်ႉၼၼ်ႉတႄႉ မႄႈၸၢႆးၸၢႆးၶဝ် ပႃႈၼၢင်းမွၼ်းထၢင်ႇဝႃႈ ... ၸၢႆးၼွင်ႉ ႁေႃႈၽႃႇပိူၼ်ႈၼႆသေ ၶႂ်ႈၸႃႉတေႃႇၸၢႆးၼွင်ႉယူႇ။ ၵူၺ်းၵႃႈ ၸၢႆးၸၢႆးၶိုၼ်းလၢတ်ႈၼႄ ၵူႈလွင်ႈလွင်ႈလႄႈ ပႃႈမွၼ်းၸင်ႇပွင်ႇၸႂ်ၵႂႃႇယဝ်ႉ။

ဝၢႆးၼၼ်ႉ လုင်းၸၢႆးၽေႇ ၸင်ႇၶိုၼ်းၵႂႃႇၵမ်ႉထႅမ် ၵူႈလွင်ႈလွင်ႈသေ ဢဝ်ၸၢႆးၼွင်ႉ လႆႈဢွၵ်ႇၶွၵ်ႈမႃးယူႇ။ ၸၢႆးၸၢႆးၵေႃႈ ၸင်ႇယိၼ်းၶွပ်ႈၸႂ်ၼိူဝ်ၸၢႆးၼွင်ႉမႃးယဝ်ႉ။

+ + + + + + + +

ဝၢႆးၼၼ်ႉဝၼ်းၼိုင်ႈ ။

ၽွင်းမိူဝ်ႈ ၸၢႆးၼွင်ႉမႃးပတ်းၽဵဝ်ႈ ၼႂ်းႁိူၼ်းယူႇၼၼ်ႉ ငိၼ်းသဵင်ၽူၼ်း မႃးလႄႈ ၸၢႆးၼွင်ႉ ၸင်ႇၼႅတ်ႈၵႂႃႇယိပ်းၽူၼ်းယဝ်ႉ။

“ ႁလူဝ် ... လၢတ်ႈၶႃႈလႄႈ ... ”

ၽူၺ်း တွင်းသဵင် ၸၢႆးၼွင်ႉလႄႈ ၽူၺ်းၸင်ႇဝႃႈ -

“ ႁလူဝ် ... ၸၢႆးၼွင်ႉႁႃႉ ? ၼႆႉ ... ၽူၺ်းၶႂ်ႈလၢတ်ႈတေႃႇ ၸၢႆးၼွင်ႉဢိူဝ်ႈ ...”

“ လၢတ်ႈလႄႈၽူၺ်း ...”

“ ၸၢႆးၼွင်ႉ ဢမ်ႇလူဝ်ႇၵႂႃႇလႂ် ဢမ်ႇၸႂ်ႈႁႃႉ ... ? ”

“ လူဝ်ႇၵႂႃႇဢိူဝ်ႈ ... ”

“ ၵႂႃႇလႂ် ... ? ”

“ ၸၢႆးၼွင်ႉ တေၶႂ်ႈၶိုၼ်းမိူဝ်းမိူင်းတႆးယဝ်ႈ ၽူၺ်း ... ”

“ ဢူဝ် ! ပဵၼ်သင် ? ၸၢႆးၼွင်ႉ ... ၸၢႆးၼွင်ႉဢမ်ႇၵျေႃႇႁႃႉ?” “ ပေႃးလႆႈလၢတ်ႈတေႃႇၽူၺ်းၶဝ်ၼႆတႄႉ ဢၢပ်ႈတေၵျေႃႇယူႇ ၵူၺ်းၵႃႈ ... ”

“ ၵူၺ်းၵႃႈ ... ၸိူင်ႉႁိုဝ် ? ”

“ ဢႃ ... လၢတ်ႈလႄႈၸၢႆးၼွင်ႉ ပေႃးၸၢႆးၼွင်ႉမိုတ်ႈ ၽူၺ်းၶဝ်ၼႆ လၢတ်ႈလႄႈ ... ”

“ မိုတ်ႈတႄႉမိုတ်ႈယူႇ ၵူၺ်းၵႃႈ ... ဢမ်ႇၸၢင်ႈလၢတ်ႈ ... ”

“ ၸၢႆးၼွင်ႉ ယူႇတီႈၼၼ်ႈ ဢမ်ႇၵျေႃႇၸႂ်ႁႃႉ  ? မီးလွင်ႈၶမ်ၸႂ်ၸိူင်ႉႁိုဝ် ... ? ”

“ ဢမ်ႇမီးသင် ၼင်ႇၵဝ်ႇ ... ၽၢတ်ႇမိူင်းႁဝ်းႁိုဝ်ယဝ်ႉလႄႈ ၸႂ်ထိုင်ဢိူဝ်ႈ ၽူၺ်း ... ၽူၺ်း ၶဝ်တႄႉ လိုမ်းမိူင်းတႆးယဝ်ႉယူဝ်ႉ ? ”

“ ဢမ်ႇလိုမ်းသေပွၵ်ႈၵူၺ်း ... ၸၢႆးၼွင်ႉ ... ”

“ ယူဝ်ဝႃႈ လိုမ်းမိူင်းတႆးယဝ်ႉၼႆၵႂႃႈ ... ? ”

“ ဢမ်ႇလိုမ်း ...”

“ ပေႃးဢမ်ႇလိုမ်ႈၼႆ ပေႃးၽူၺ်းပဵၼ်မေႃယႃလူင်မႃးၼႆ ၸွင်ႇတေမိူဝ်းယူတ်းယႃပၼ် ၵူၼ်းမိူင်းတႆးႁဝ်းႁိုဝ် ? ”

“ ပေႃးပဵၼ်မေႃယႃမႃးၼႆ ... ၽူၺ်း ... ဢၢၼ်းမိူဝ်း ႁဵတ်းၵၢၼ်တီႈမိူင်းတႆးယူႇၵူၺ်း ... ”

“ ယူဝ်ၶႄး ၽူၺ်းၶဝ် တေႁဵတ်းမေႃယႃလူင် ၼႂ်းၶူးၼႂ်းဝဵင်းသေ တေဢမ်ႇတူၺ်းထိုင် ပီႈၼွင်ႉတႆးၼွၵ်ႈ မိူင်းထိူၼ်ႇႁဝ်းယဝ်ႉၼႆၵႂႃႈ... ”

“ ဢမ်ႇၸႂ်ႈၵူၺ်း ... ၽူၺ်း မဵတ်ႉတႃႇၽဵင်ႇယူႇ ၸၢႆးၼွင်ႉ ”

“ ၶႂ်ႈႁႂ်ႈၵၢၼ်ႉပၼ် ၽၢႆႇပီႈၼွင်ႉတႆးၼွၵ်ႈႁဝ်းဢိူဝ်ႈ ၽူၺ်း ... ၵွပ်ႈသင်ၼႆ မိူင်းၼွၵ်ႈႁဝ်းၼႆႉ မေႃယႃၵေႃႈဢမ်ႇမီး ဢမ်ႇတၢၼ်ႇပဵၼ်ၵေႃႈပဵၼ် ဢမ်ႇတၢၼ်ႇလူႉၵေႃႈ လႆႈလူႉမႃးၼမ်ၼႃႇယဝ်ႉလူး ... ၵွပ်ႈၼႆ ၸၢႆးၼွင်ႉတႄႉ ၶႂ်ႈႁႂ်ႈမေႃယႃၸိူင်ႉၼင်ႇၽူၺ်း ဝႆႉမဵတ်ႉတႃႇယႂ်ၼမ်ၼိူဝ် ပီႈၼွင်ႉမိူင်းၼွၵ်ႈ လိူဝ်သေ ပီႈၼွင်ႉမိူင်းဝဵင်းၶဝ်ဢိူဝ်ႈ ... ၸွင်ႇၽူၺ်းဝႆႉလႆႈ? ”

“ တီႈလဵဝ်တႄႉ ၽူၺ်းၵေႃႈ ပႆႇပဵၼ်မေႃယႃလူင်လႄႈ တေၶတ်းၸႂ်ဝႆႉပၼ်ယူႇ ... ”

“ ပေႃးၼႆ ၸၢႆးၼွင်ႉ တေတၢင်တူဝ်ၵူၼ်းမိူင်းၼွၵ်ႈသေ တေလွမ်ၸူမ်းဝႆႉထႃႈလႆ ... ”

“ ၶိၵ်း ... ၶိၵ်း ... ”

“ ဢေႃး ... ၽူၺ်း ... လႅင်းမီးယူႇႁႃႉ ? ”

“ လႅင်း တိုၵ်ႉၸွမ်းပီႈၸၢႆးသႅင် ၵႂႃႇဢႅဝ်ၼႆဢိူဝ်ႈ ၸၢႆးၼွင်ႉ ... ”

“ ပေႃးၼႆ ... လၢတ်ႈပၼ် လႅင်းၽွင်ႈၼႃႈ ... ပီႈၸၢႆးၼွင်ႉ သိုပ်ႇၽူၼ်းထၢမ်ႁႃလႅင်း ...ဢိူဝ်ႈ ... ၼႆၼႃႈ ... ”

“ ၽူၺ်း တေလၢတ်ႈပၼ်လႆ ... ”

“ ၼႆႉၵူၺ်းၼႃႈ ၽူၺ်း ... ၽူၺ်း ... ၶႂ်ႈလၢတ်ႈသင်ထႅင်ႈ?”

“ ဢၼ်ၶႂ်ႈလၢတ်ႈတႄႉ မီးတင်းၼမ်ယူႇ ... ၵူၺ်းၵႃႈ ... ဢမ်ႇလၢတ်ႈယဝ်ႉ ...”

“ လၢတ်ႈလႆႈယူႇၼႃႇ ... ၽူၺ်း ... ”

“ ဝၢႆးၼႆႉမႃး ၸင်ႇၵွႆႈလၢတ်ႈယဝ်ႉၼႃႈ ... ၸၢႆးၼွင်ႉ ... ”

“ ၽူၺ်း ဝၢင်းၽူၼ်းပႅတ်ႈယဝ်ႉလႄႈ ၸၢႆးၼွင်ႉၵေႃႈ ၶိုၼ်းဝၢင်းၽူၼ်းဝႆႉယဝ်ႉ၊ ယူႇတီႈသၢႆၽူၼ်း ၽႄတီႈၼိူဝ်ႁိူၼ်းၶဝ်ၼၼ်ႉသေ ၸၢႆးၸၢႆး လၵ်ႉထွမ်ငိၼ်းၶႃဢုပ်ႇၵၼ်ယူႇၼႆ ၶႃသွင်ၵေႃႉတႄႉ ဢမ်ႇႁူႉထိုင် ။

+ + + + + + + + +

ဝၼ်းၼိုင်ႈယဝ်ႉ ဝၼ်းၼိုင်ႈ ဝူင်ႈၼိုင်ႈယဝ်ႉ ဝူင်ႈၼိုင်ႈ လိူၼ်ၼိုင်ႈယဝ်ႉ လိူၼ်ၼိုင်ႈ ပီၼိုင်ႈယဝ်ႉ ပီၼိုင်ႈ ၶၢႆႉၼီလႅၵ်ႈလၢႆႈမႃးတိၵ်းတိၵ်းလႄႈ ၸၢႆးၸၢႆးလႄႈၽူၺ်းၵေႃႈ ပေႃးပဵၼ်မေႃယႃယဝ်ႉ။

ဝၼ်းၼိုင်ႈ ငိုၼ်းႁွမ်မႃးႁွင်ႉၽူၺ်း ၵႂႃႇဝႆႈၽြႃးလူင်သူၺ်ႇတၵူင်ႇသေ ငိုၼ်းႁွမ်ၸင်ႇယွၵ်ႇဝႃႈ -

“ ၽူၺ်း ... ၽူၺ်း လၵ်ႉလွမ်သူးတွင်း ႁႂ်ႈလႆႈၸမ်ၵၼ်ၽႂ်းၽႂ်းၼႆ ဢမ်ႇၸႂ်ႈႁႃႉ ... ? ”

“ ၸမ်ၽႂ် ... ? ငိုၼ်းႁွမ် ... ”

“ ၸမ်ၸၢႆးၸၢႆးဢိူဝ်ႈ ... ”

“ ဢႃ ဢမ်ႇသူး ... ”

“ ႁဵတ်းသင်သမ်ႉဢမ်ႇသူးလႃႇ ... ? ၽူၺ်းလႄႈၸၢႆးၸၢႆးၼႆႉ ၸိုင်ဝႃႈ ပေႃႈမႄႈၵူၼ်းလူင်တင်းသွင်ၽၢႆႇ လႆႈၸႂ်ၵၼ်ဝႆႉၼႆ ဢမ်ႇၸႂ်ႈႁႃႉ”

“ ဢိုဝ်ႈ ... ၵူၼ်းလူင်ၶဝ်တႄႉ လႆႈၸႂ်ၵၼ်ဝႆႉယဝ်ႉ ... ”

“ ၽူၺ်းလူး ... ဢမ်ႇလႆႈၸႂ်ႁႃႉ ... ? ”

“ ၽူၺ်း ပႆၶႆႈတႄႇ ၼႃႈႁိူၼ်းၵွၼ်ႇငိုၼ်းႁွမ် ... ”

“ ၵွပ်ႈသင်လႃႇ ... ? ”

“ ၵွပ်ႈပိူဝ်ႈ တိုၵ်ႉၶႂ်ႈပဵၼ်သၢဝ်လွတ်ႈလႅဝ်းၼၼ်ႉဢိူဝ်ႈ ... ”

“ ၸၢႆးၸၢႆး ယွၼ်းတၢင်းႁၵ်ႉၽူၺ်းဝႆႉ ဢမ်ႇၸႂ်ႈႁႃႉ  ? ၽူၺ်း တေဝႃႈႁိုဝ် ... ? ”

“ ဢိုဝ်ႈ ... ၽူၺ်းဢမ်ႇၸၢင်ႈလၢတ်ႈ ... ၸၢႆးၸၢႆးၼႆႉ ၽူၺ်း ႁၵ်ႉမၼ်းဢိူဝ်ႈၼႆၵေႃႈ ၽူၺ်းပႆႇၸၢင်ႈဝႃႈ ဢမ်ႇႁၵ်ႉမၼ်းၼႆၵေႃႈၽူၺ်း... ဢမ်ႇၸၢင်ႈဝႃႈၵူၺ်း ... ”

“ ပေႃးၼႆ ၵေႃႉဢၼ်ၽူၺ်းၶဝ်ႈၸႂ်လိူဝ်သေ ၸၢႆးၸၢႆးၼၼ်ႉ မီးယူႇႁႃႉ ? ၽူၺ်း ... ”

ၽူၺ်း ထူၺ်ႈၸႂ်လူင်ၵမ်းၼိုင်ႈသေ -

“ ဢိုဝ်ႈ ... တေလႆႈဝႃႈမီႈယူႇၼႆယဝ်ႉ ငိုၼ်းႁွမ် ... ”

“ မၼ်းပဵၼ်ၽႂ်လႃႇ ... ? ”

“ ... ပဵၼ်ၸၢႆးၼွင်ႉဢိူဝ်ႈ ... ငိုၼ်းႁွမ် ... သင်ဝႃႈ ဢမ်ႇမႃးထူပ်းႁၼ်မၼ်းၼႆ ၽူၺ်းတေႁၵ်ႉၸၢႆးၸၢႆးယူႇ ... ၵူၺ်းၵႃႈ ... ၽူၺ်း တေလႆႈႁဵတ်းႁိုဝ်ၵေႃႈ ဢမ်ႇႁူႉယဝ်ႈ ... ”

ၶႃသွင်ၵေႃႉ ဝူၼ်ႉဢမ်ႇလႆႈသေ ၼင်ႈငဝ်ဝႆႉယူႇ ... ၵမ်းလိုၼ်း ၽူၺ်း ၸင်ႇဝႃႈ -

“ ဢိုဝ်ႈ ... ၵမ်းလိုၼ်းမႃး ... ၶၢဝ်းယၢမ်းတေတႅပ်းပၼ်ယူႇၵႂႃႈ ... ”