ၶႅၵ်ႇ/တွၼ်ႈသၢမ်သိပ်းသၢမ်
ၸၢႆးၼွင်ႉ ယိူၼ်ႉၸႂ်သိုပ်ႇယူႇမႃးၸွမ်း ၸၢႆးၸၢႆးၶဝ် ၸိူင်ႇၼင်ႇၼႆ လႆႈႁၼ်ငိူၼ်ႈၸၢႆးၸၢႆး ဢမ်ႇပေႃးတူၺ်းၸႃႉ တေႃႇမၼ်းယဝ်ႉလႄႈ မၼ်းလွမ်ၸူမ်းဝႆႉယူႇ ... ၊ ဢမ်ႇႁိုင်ဢမ်ႇၼၢၼ်း မၼ်းတေလႆႈႁပ်ႉဢဝ် မဵတ်ႉတႃႇတၢင်းႁၵ်ႉ ပီႈဢၢႆႈမၼ်းယဝ်ႉႁိုဝ် ? ၼႆသေ လွမ်ၸူမ်းသိူဝ်းဝႆႉယူႇ၊ ၵူၺ်းၵႃႈ မိူဝ်းၼႃႈ တေပဵၼ်ႁိုဝ်မႃးၼႆ မၼ်းလၢမ်းဢမ်ႇလႆႈ ။ ၽွင်းၸၢႆးၼွင်ႉ တိုၵ်ႉဝူၼ်ႉယူႇၼၼ်ႉ ပႃႈယွတ်ႈမႃးႁွင်ႉမၼ်းလႄႈ မၼ်းၸင်ႇၶိုၼ်ႈမိူဝ်းၸူး ပေႃႈလဵင်ႉ မႄႈလဵင်ႉၶဝ် ၼႂ်းႁိူၼ်းယဝ်ႉ။
“ ဢေႃႈ ... ပေႃႈလဵင်ႉမႄႈလဵင်ႉႁွင်ႉၶႃႈ ဝႃႈၼႆၶႃႈႁႃႉ ... ? ”
“ ၸႂ်ႈဢိူဝ်ႈ ... ၸၢႆးၼွင်ႉ ၼင်ႈလႄႈ မႄႈလဵင်ႉသူ ၶႂ်ႈထၢမ်မႂ်း မဵဝ်းၼိုင်ႈၼႆယဝ်ႉ ... ”
“ ဢေႃႈ ... ထၢမ်ၶႃႈလႄႈ ... မႄႈလဵင်ႉ ... ”
“ ငိုၼ်းဢၢၼ်ႇတီႇဝႆႉဝႆႉ ႁိမ်းၽူၼ်းၼႆႉသၢမ်ႁဵင်ဢိူဝ်ႈ ... ၸၢႆးၼွင်ႉဢမ်ႇႁၼ်မႅၼ်ႈႁႃႉ ... ? ”
“ ၶႃႈဢမ်ႇလႆႈ ႁူႉထိုင်ၶႃႈ ... ”
“ ယူဝ်ၸၢႆးၼွင်ႉ ႁၼ်မႅၼ်ႈယူႇၼႆၵႂႃႈ ... ၵွမ်ႉၵူၺ်းငိုၼ်းဢွၼ်ႇသၢမ်ႁဵင်ၵူၺ်းတႄႉ ... ဢၢၼ်ႇတီႇၶဝ် ဢမ်ႇသေလၢႆသင်ၼင်ႇၵဝ်ႇၵူၺ်း ၵူဝ်ၽူႈလၵ်ႉ မီးၼႂ်းႁိူၼ်းဢိူဝ်ႈ ... ”
“ ၶႃႈ... ၶႃႈ ... ဢမ်ႇႁွမ်ႇတွၼ်ႉယၢမ်ႈလၵ်ႉ ၶူဝ်းပိူၼ်ႈသေပွၵ်ႈၶႃႈ... ”
“ ၼၼ်ႉတႄႉ ... တူဝ်ၽႂ်ၸႂ်မၼ်း မၼ်းႁူႉသေပိူၼ်ႈဢိူဝ်ႈ”
ၸၢႆးၼွင်ႉ ဢမ်ႇလႆႈလၵ်ႉတႄႉလႄႈ မၼ်းၸင်ႇၶိုၼ်းဝႃႈ -
“ ယူဝ်ၶႄး ... ဢၢၼ်ႇတီႇလိုမ်းတီႈဝႆႉမၼ်း ၶႃႈယူဝ်ႉ... ? ”
“ ဢမ်ႇလိုမ်းၵူၺ်း ... ပေႃးၸၢႆးၼွင်ႉ လႆႈဢဝ်ဝႆႉၼႆၵေႃႈ ၶိုၼ်းပၼ်ႁႄလႄႈ ဢၢၼ်ႇတီႇၶဝ် တေဢမ်ႇဝႃႈသင်ၵူၺ်း ... ”
“ ၶႃႈဢမ်ႇလႆႈဢဝ်တႄႉၶႃႈ ... ဢၢၼ်ႇတီႇ ၶႂ်ႈၵိၼ်ႇၸိူင်ႉႁိုဝ်ၵေႃႈ ၵိၼ်ႇၶႃႈလႃႈ ... ”
လုင်းၸၢႆးၽေႇၸင်ႇၶိုၼ်းဝႃႈ -
“ ၼၼ်ႉတႄႉ ... ၸၢႆးၼွင်ႉဢဝ်ၼႆၵေႃႈ ႁဝ်းဢမ်ႇၼႄးၼင်ႇၵဝ်ႇၼႃႈ ... ၸၢႆးၼွင်ႉ လူဝ်ႇၵႂႃႇႁဵတ်းသင်ၵေႃႈ ၵႂႃႇႁဵတ်းလႄႈ ... ”
ဝၢႆးသေၸၢႆးၼွင်ႉဢွၵ်ႇႁိူၼ်းၵႂႃႇ ပႃႈမွၼ်းၸင်ႇဝႃႈ -
“ ဢိုဝ်ႈ ... ၼႂ်းႁိူၼ်းႁဝ်းၼႆႉ ၶူဝ်းဢမ်ႇတွၼ်ႉႁၢႆၵေႃႈ ႁၢႆမႃးယဝ်ႉၼႃႈ ... ႁဝ်းတႄႉၼၵ်းၸႂ်ၵျႃႉၼႆႉ ... ... ...”
လုင်းၸၢႆးၽေႇၸင်ႇဝႃႈ -
“ ဢိူဝ်ႈ ... ၶူဝ်းႁဝ်းၵေႃႈ လူဝ်ႇဝႆႉလီလီၼင်ႇၵဝ်ႇဢိူဝ်ႈ ...ၵႂၢမ်းတႆးႁဝ်းဝႃႈဝႆႉ ... “ ၶွင်ႁၢႆပဵၼ်ပၢင်ႇၵႂၢင်ႈ ဢမ်ႇလႃႈလီၸၢင်ႈႁၼ် ” ၼႆၼႃႇ သတိၶူဝ်းႁဝ်း ယႃႇပေတမ်းပိၼ်ႉတမ်းပႅတ်ႈ လူင်ၵႂႃႇဢိူဝ်ႈ “ ပေႃးငၢႆႈမိုဝ်း သထေးၸိုဝ်ႈလိုဝ်းယင်းမေႃလၵ်ႉ ... ” ၼႆယဝ်ႉ ... ”
“ ႁဝ်းတႄႉ ... ထၢင်ႇပဵၼ် ၸၢႆးၼွင်ႉၵူၺ်းယဝ်ႉ ... ”
“ ပေႃးၶူဝ်းႁၢႆ ငိုၼ်းႁၢႆဢၼ်ဝႃႈၼၼ်ႉ ... ၸၢင်ႈထၢင်ႇထိင်ႇလူင်ၵႂႃႇၵူႈၵေႃႉယဝ်ႉ ... ”
“ ပေႃးဝႃႈ ပဵၼ်မၼ်းဢဝ်တႄႉ ... ပေႃးလႆႈႁူႉလီလီၼႆ လူဝ်ႇလႆႈလမ်းပႅတ်ႈၵူၺ်းယဝ်ႉ ... ”
“ ပႂ်ႉတူၺ်းၵွၼ်ႇၵႂႃႈ ... ၵႃႈၵွၼ်ႇတွၼ်းဢွၼ်ႇ ယင်းဢမ်ႇယၢမ်ႈပဵၼ်ၼင်ႇၵဝ်ႇ ... ”
+ + + + + + + +
ပွၵ်ႈၼိုင်ႈ ။
ၸၢႆးၼွင်ႉ ၽႅဝ်မိူဝ်းၼႂ်းၶၢၼ်းၶႅၵ်ႇသေ မိူဝ်းသွၵ်ႈသွၵ်ႈႁႃတူၺ်း မဵဝ်းၼိုင်ႈယူႇ၊ လွမ်ႁႃတူၺ်း တီႈလႂ်ၵေႃႈ မၼ်းဢမ်ႇႁၼ်လႄႈ မၼ်းၶိုၼ်းဢၢင်ႈဢွၵ်ႇႁိူၼ်းၵႂႃႇယဝ်ႉ။ တီႈၼိူဝ်ၽိူၼ် ၼႂ်းၶၢၼ်းၶႅၵ်ႇၼၼ်ႉ မီးဝႆႉငိုၼ်း မႄႈလဵင်ႉၶဝ်သေတႃႉ မၼ်းၸၢႆးဢမ်ႇႁတ်းယိပ်းတူၺ်း၊ မၼ်းၸၢႆးၸင်ႇၶိုၼ်းဢွၵ်ႇၵႂႃႇယဝ်ႉ၊ မႄႈလဵင်ႉၶဝ် လၵ်ႉလွမ်ပႂ်ႉတူၺ်းမၼ်းယူႇၼႆ မၼ်းဢမ်ႇႁူႉ၊ ၸၢႆးၼွင်ႉ ပႆၶဝ်ႈၵႂႃႇ ၼႂ်းသိုင်ႇၽႆးသေ ၵႂႃႇၸူးပႃႈယွတ်ႈယဝ်ႉ -
“ ၸၢႆးၼွင်ႉ မႃးႁဵတ်းသင် ... ? ”
“ ပႃႈယွတ်ႈ ၸွင်ႇႁၼ်ၺႃး ၵၢၵ်ႇသေႃးၸၢႆးၼွင်ႉႁိုဝ် ? ”
ဢေႃႈ ... ၵၢၵ်ႇသေႃးဢွၼ်ႇၸၢႆးၼွင်ႉၼၼ်ႉႁႃႉ ... ? ပႃႈၵဵပ်းႁွႆႈဝႆႉ ႁိမ်းသဝ်ၼၼ်ႉၼေႈ ... ”
“ ဢေႃႈ ... ၸူမ်းၶႃႈယဝ်ႈ ပႃႈယွတ်ႈ ... ၶႃႈဢၢင်ႈၽုၺ်ႇတူၺ်း ၶူဝ်းၶႃႈၼႆ ဢမ်ႇႁၼ်ၵၢၵ်ႇသေႃးၶႃႈလႄႈ ... ၼႅတ်ႈႁႃ ပေႃးၶႂ်ႈၸွတ်ႇႁိူၼ်းယဝ်ႉဢေႃႈ ... ”
“ ဢၢင်ႈၽုၺ်ႇတိူၵ်ႈၼႆႁႃႉ ... ? ၼႂ်းတိူၵ်ႈ မီးၶူဝ်းၵႃႈၶၼ်ယႂ်ႇယူဝ်ႉၶေး ... ? ”
“ ႁႄႈ ... ႁႄႈ ... ပုၼ်ႈတႃႇပိူၼ်ႈတႄႉ ၵႃႈၶၼ်ဢမ်ႇယႂ်ႇသင်သေတႃႉ ပုၼ်ႈတႃႇၶႃႈတႄႉ ၶူဝ်းၶႃႈၼၼ်ႉ မီးၵႃႈၶၼ်သေပိူၼ်ႈယဝ်ႈ... ”
ၸၢႆးၼွင်ႉ ၸင်ႇၶိုၼ်းၵႂႃႇၽုၺ်ႇတူၺ်း တိူၵ်ႈမၼ်းယဝ်ႈ၊ သိူဝ်ႈၶူဝ်းမၼ်း ဢမ်ႇပေႃးမီးၼမ်သေတႃႉ ဢၼ်မီးဝႆႉၵႃႈၶၼ်လိူဝ်ပိူၼ်ႈၼၼ်ႉတႄႉ ပဵၼ်ထူင်ဢွၼ်ႇလုၵ်ႈၼိုင်ႈ၊ ၶႅပ်းႁၢင်ႈၵဝ်ႇၵဝ်ႇဢွၼ်ႇ ဢၼ်ၶဝ်ပေႃႈမႄႈလုၵ်ႈသီၵေႃႉ ထႆႇဝႆႉၸွမ်းၵၼ်ၼၼ်ႉ ၶႅပ်းၼိုင်ႈလႄႈ ၶႅပ်းသၢႆၶေႃးၶမ်းဢွၼ်ႇ ၶႅပ်းၼိုင်ႈယဝ်ႉ။
ဝၼ်းၼၼ်ႉ ၶူးမေႃယႃလူင် လုင်းၸၢႆးၽေႇသမ်ႉ ဢွၵ်ႇတၢင်း၊ ၸၢႆးၸၢႆးဢၢင်ႈဢၢပ်ႇၼမ်ႉလႄႈ မႃးလွၼ်ႈသိူဝ်ႈၶူဝ်းမၼ်း တီႈႁိမ်း လုၵ်းဢၢပ်ႇၼမ်ႉယူႇ၊ ၽိူဝ်ႇမၼ်းယိပ်းတူၺ်း သၢႆၶေႃးမၼ်း ဢမ်ႇႁၼ်လႄႈ မၼ်းၼႅတ်ႈဢၢပ်ႇၼမ်ႉၽႂ်းၽႂ်းသေ မႃးႁႃသၢႆၶေႃးမၼ်း တီႈၼႂ်းႁိူၼ်းယူႇ၊ ႁႃတူၺ်းတီႈလႂ်ၵေႃႈ ဢမ်ႇႁၼ်လႄႈ ၸၢႆးၸၢႆးၶိုၼ်းမႃးႁႃတူၺ်း ၸွမ်းၼႂ်းသူၼ် တီႈမၼ်းၵႆႉလဵၼ်ႈၼၼ်ႉယဝ်ႉ။ မၼ်းႁႃတူၺ်းတီႈလႂ်ၵေႃႈ ဢမ်ႇႁၼ်လႄႈ မၼ်းၸင်ႇၵႂႃႇၸူး တီႈၸၢႆးၼွင်ႉသေ ၵႂႃႇထၢမ်ၸၢႆးၼွင်ႉယဝ်ႉ ၊ ၽွင်းၼၼ်ႉ ၸၢႆးၼွင်ႉၵေႃႈ တိုၵ်ႉသၢၼ်ႉတူၺ်း ၶူဝ်းမၼ်းယူႇ ၽွင်းမိူဝ်ႈ ၸၢႆးၼွင်ႉတိုၵ်ႉယိပ်းတူၺ်း ၶႅပ်းၶေႃးၶမ်းမၼ်းၼၼ်ႉ ၸၢႆးၸၢႆးမႃးႁၼ်မႅၼ်ႈလီလီယဝ်ႉ။
ၸၢႆးၸၢႆးၸင်ႇဝႃႈ -
“ ဢၢႆႈၼွင်ႉ ... ၶႅပ်းသၢႆၶေႃးၼၼ်ႉ မႂ်းၵဵပ်းလႆႈတီႈလႂ် ? ”
“ ႁႂ်း ! ... ၶႃႈဢမ်ႇၵဵပ်းလႆႈတီႈလႂ် တိုၼ်းပဵၼ်ၶႅပ်းသၢႆၶေႃးၶႃႈဢေႃႈ ... ”
“ ဢမ်ႇၸႂ်ႈၵူၺ်း ... ၼၼ်ႉပဵၼ် ၶႅပ်းသၢႆၶေႃးၵဝ်ဢိူဝ်ႈ ... မၼ်းတူၵ်းႁၢႆလႄႈ မိူဝ်ႈလဵဝ် ၵဝ်ၸင်ႇၸွမ်းႁႃယူႇယဝ်ႉ ... ဢၢႆႈၼွင်ႉပၼ်ၶိုၼ်းၵဝ်လႄႈ ၶႅပ်းသၢႆၶေႃးၵဝ်ၼၼ်ႉ ... ”
“ ပီႈၸၢႆး ... ၶႅပ်းသၢႆၶေႃးၼႆႉ ပဵၼ်ၶႅပ်းသၢႆၶေႃးၶႃႈ ၸဵမ်လဵၵ်ႉဢေႃႈ ... ၸၢင်ႈလူဝ်ႇပၼ်ၶိုၼ်းပီႈၸၢႆး ... ႁဵတ်းသင် ... ? ”
“ ႁိုဝ်ႉ ! ... မဵဝ်းမႂ်းၼႆႉႁႃႉ တေမီးလႆႈၶႅပ်းသၢႆၶေႃးၶမ်းၸိူင်ႉၼႆ မႂ်းတေပၼ်ႁႃႉ ? တေဢမ်ႇပၼ်ႁႃႉ ... ? လၢတ်ႈလူး ...”
“ ပေႃးပဵၼ်ၶူဝ်းပီႈၸၢႆးၶဝ်တႄႉတႄႉၼႆ ... ၶႃႈတေၶႂ်ႈဢဝ်ဝႆႉႁဵတ်းသင်... ? လၵ်ႉၶူဝ်းပိူၼ်ႈၵေႃႈ ၶႃႈဢမ်ႇတွၼ်ႉလၵ်ႉသေပွၵ်ႈၵူၺ်း ၼႆႉတိုၼ်းပဵၼ်ၶူဝ်းၶႃႈလႄႈ ၶႃႈဢမ်ႇပၼ်လႆႈ ... ”
ၸၢႆးၸၢႆးၵေႃႈ သေလၢႆၶူဝ်းႁၢႆမၼ်းလႄႈ ပိူင်ၼိုင်ႈ၊ ၸၢႆးၼွင်ႉသမ်ႉ ထဵင်ဝႃႈ ပဵၼ်ၶူဝ်းမၼ်းၼႆလႄႈပိူင်ၼိုင်ႈ မၼ်းၸႂ်လမ်တႄႉတႄႉယူႇယဝ်ႉ။
“ ၼေႈ ...ဢၢႆႈၼွင်ႉ ... ၵဝ်လၢတ်ႈမႂ်းလီလီဢိူဝ်ႈၼႆႉ ဢဝ်မႃးလႄႈ ၶႅပ်းသၢႆၶေႃးၵဝ် ... ”
“ ဢမ်ႇၸႂ်ႈ ...ပဵၼ်ၶႅပ်းသၢႆၶေႃးၶမ်းၶႃႈဢေႃႈ ... ၸၢင်ႈလူဝ်ႇပၼ်ႁဵတ်းသင် ... ? ”
“ ဢိုဝ်ႈ ! ... ဢၼ်ပိူၼ်ႈဝႃႈ ... ၽူႈလၵ်ႉၶိုၼ်းထိူတ်းၸဝ်ႈႁိူၼ်း ဢၼ်ဝႃႈၼၼ်ႉ ပဵၼ်မဵဝ်းမႂ်းၼႆႉယဝ်ႉ ... ”
“ ပီႈၸၢႆး ... ယႃႇပေၼႄးၶႃႈ ပဵၼ်ၽူႈလၵ်ႉ ...”
“ ႁိုဝ်ႉ ! ... ၶႅပ်းသၢႆၶေႃးၶမ်းၼၼ်ႉ မႂ်းၵဵပ်းလႆႈသေ ပေႃးမႂ်း ၶိုၼ်းဢမ်ႇပၼ်ၼႆတႄႉ ... မိူၼ်ၵၼ်တင်းမႂ်းလၵ်ႉယဝ်ႉ ... ”
“ ဢူဝ်း ! ... ၶႅပ်းသၢႆၶေႃးၶႃႈၵဵပ်းလႆႈၵေႃႈ ဢမ်ႇၸႂ်ႈ ...တိုၼ်းပဵၼ်ၶူဝ်းၶႃႈဢေႃႈ... ”
“ ၼႆႉ ဢမ်ႇပဵၼ်လႆႈ ... မႂ်းတေပၼ်ႁႃႉ ... ? ဢမ်ႇပၼ်ၶိုၼ်းႁႃႉ ? လၢတ်ႈလူး ... ”
“ ဢမ်ႇပၼ် ... ”
သၢႆငၢႆၶႃသွင်ၵေႃႉထဵင်ၵၼ် ပဵၼ်ဢၼ်ႁၢဝ်ႉႁႅင်းမႃး ၼင်ႇၵၼ်လႄႈ ၸၢႆးၸၢႆးလၢၵ်ႈဢဝ် ပွတ်းမႆႉႁိမ်းမၼ်းၼၼ်ႉ ဝူတ်ႇႁူဝ်ၸၢႆးၼွင်ႉယဝ်ႉ... ၸၢႆးၼွင်ႉ ၼႅတ်ႈငိူင်ႉဝႄႈပႅတ်ႈၽႂ်းၽႂ်းသေ လၢတ်ႈဝႃႈ -
“ ပီႈၸၢႆး ... ပီႈၸၢႆး ဢၢၼ်းႁဵတ်းတီႈၶႃႈ တႄႉတႄႉႁႃႉ ? ”
“ ပေႃးမႂ်းဢမ်ႇပၼ်ၶိုၼ်း ၶႅပ်းသၢႆၶေႃးၶမ်းၵဝ်တႄႉ လူဝ်ႇႁမ်းၵၼ်ၵူၺ်းယဝ်ႉ ... ”
“ ၸွင်ႇမၼ်းၸႂ်ႈ ၶူဝ်းပီႈၸၢႆးၶဝ်ၵေႃႈ ဢမ်ႇၸႂ်ႈ ... ဢမ်ႇပၼ် ”
“ ပေႃးဢမ်ႇပၼ်ၵေႃႈ ... ”
ၸၢႆးၸၢႆး ဢဝ်ၶွၼ်ႉပွတ်း ဝူတ်ႇပၼ်ၶေႃးၸၢႆးၼွင်ႉလႄႈ ၸၢႆးၼွင်ႉၼႅတ်ႈၶဝ်ႈၸူးၸမ်သေ လိမ်ႇမိုဝ်းၸၢႆးၸၢႆးပႅတ်ႈယဝ်ႉ၊ ၶွၼ်ႉၼၼ်ႉၵေႃႈ ဝူင်တူၵ်း လုတ်ႈမိုဝ်းၸၢႆးၸၢႆးၵႂႃႇယူႇ၊ ၸၢႆးၸၢႆး ၶိုၼ်းဢဝ်ငွၵ်းသွၵ်ႇ ဝၢႆႈပၼ်လင်သေ ၼွၵ်ႈသႂ်ႇသီႈမႅပ်ႉၸၢႆးၼွင်ႉ၊ ၸၢႆးၼွင်ႉ ၼႅတ်ႈပွႆႇမိုဝ်း ဢၼ်မၼ်းလိမ်ႇဝႆႉၼၼ်ႉသေ ၵူမ်ႈပႅတ်ႈယဝ်ႉ။
ၸၢႆးၼွင်ႉၵူမ်ႈသေ ၵဵပ်းဢဝ်မႆႉယူႇ၊ ၸၢႆးၸၢႆး ၼႅတ်ႈဢဝ်တိၼ်ပိတ်ႉပႅတ်ႈ ၵႂႃႇတီႈၵႆယဝ်ႉ၊ ၸၢႆးၸၢႆးၸင်ႇဝႃႈ -
“ မႂ်းတေႁူႉၼမ်ႉမႂ်းၵႂႃႈ မိူဝ်ႈၼႆႉ ... ႁိူဝ်ႉ ... မိူဝ်ႈငိုၼ်းမႃႇမီႁၢႆ သၢမ်ႁဵင်ၼၼ်ႉၵေႃႈ ပဵၼ်မႂ်းဢဝ်ၵူၺ်းယဝ်ႉ ... ”
“ ယႃႇပေၼေးၶႃႈဢဝ်ၼႃႈ ... ၶႃႈဢမ်ႇၸႂ်ႈၵူၼ်းလၵ်ႉၵူၺ်း ”
ၸၢႆးၸၢႆး ဢဝ်တႃမိုဝ်းပွႆႇသႂ်ႇ ၸူးၼႃႈၸၢႆးၼွင်ႉ ၊ ၸၢႆးၼွင်ႉၼႅတ်ႈဢဝ်မိုဝ်းမၼ်း ႁႄႉပႅတ်ႈသေတႃႉ ၸၢႆးၸၢႆးၶိုၼ်းဢဝ်တိၼ်ပိတ်ႉလႄႈ ၸပ်းသႂ်ႇတွင်ႉၸၢႆးၼွင်ႉသေ ၸၢႆးၼွင်ႉလူမ်ႉၵႂႃႇယဝ်ႉ။ ၽွင်းၸၢႆးၼွင်ႉ မီးယူႇၼိူဝ်လိၼ်ၼၼ်ႉ ၸၢႆးၸၢႆးဝႅၼ်ဢဝ်သူၼ်ႈတိၼ် တိုပ်ႈသႂ်ႇဢူၵ်းၸၢႆးၼွင်ႉယူႇ။ ၸၢႆးၼွင်ႉ ၼႅတ်ႈၵိင်ႈပႅတ်ႈၽၢႆႇၶၢင်ႈသေ ဢဝ်တိၼ်မၼ်းပိတ်ႉပၼ် တွင်ႇၼွင်ႈၸၢႆးၸၢႆးလႄႈ ဢဝ်တိၼ်ၸၢႆးၸၢႆး လုတ်ႈလိၼ်သေ ၼင်ႈသွင်ႉသႂ်ႇ ၼိူဝ်လိၼ် ႁႅင်းႁႅင်းၵႂႃႇယူႇယဝ်ႉ။
“ ဢိုဝ်ႉ ! ... ... ”
ၸၢႆးၼွင်ႉ ၶိုၼ်းဢဝ်တႃမိုဝ်းထုပ်ႉသႂ်ႇ ၼႃႈၸၢႆးၸၢႆးဢၼ်တိုၵ်ႉ ၼွၼ်းတၢၵ်ႇႁၢႆဝႆႉၼၼ်ႉယူႇလႄႈ ၸၢႆးၸၢႆးၼႅတ်ႈဢဝ်မိုဝ်း ပၢၵ်ႈပႅတ်ႈၽႂ်းၽႂ်းယဝ်ႉ၊ ၸၢႆးၸၢႆးၶိုၼ်းၼႅတ်ႈလုၵ်ႉမႃးသေ ၵမ်တႃမိုဝ်း ဝႆႉၵႅၼ်ႇၵႅၼ်ႇယူႇ၊ မၼ်းၸႂ်လမ်ၼႃႇယဝ်ႉလႄႈ ဢႅၼ်ႇၶဝ်ႈၸူးၸၢႆးၼွင်ႉသေ ၶႃသွင်ၵေႃႉၵုၼ်းၵၼ် ၵၼ်ႉၵၼ်ယူႇ ၶႃၶဵင်ႇငႅၼ်းၶေႃးၵၼ် မေႃးယူႇ ဢိုဝ်ႉ ! ဢိုဝ်ႉ !ယဝ်ႉ။
ၸၢႆးၸၢႆးတၼ်းၸဝ်ႉလႄႈ မၼ်းငႅၼ်းဝႆႉ ၶေႃးၸၢႆးၼွင်ႉဢွၼ်တၢင်းယဝ်ႉ။ ၸၢႆးၼွင်ႉ ၼႅတ်ႈႁၵ်းၵၢင်းမၼ်းဝႆႉ ၵႅၼ်ႇၵႅၼ်ႇလႄႈ ၸၢႆးၸၢႆး ဢမ်ႇၸၢင်ႈမိပ်ႇလႆႈ လွတ်ႈၶေႃးၸၢႆးၼွင်ႉ၊ ၸၢႆးၼွင်ႉ ၸင်ႇၼၢဝ်ႉဢဝ် ၼိဝ်ႉၵွႆႈၸၢႆးၸၢႆး တင်းသွင်ၽၢႆႇသေ ႁၵ်းပိၼ်ႈပႅတ်ႈယဝ်ႉ။
“ ဢႃး ... ! ... ”
ၼိဝ်ႉမိုဝ်းၸၢႆးၸၢႆး ၸဵပ်းၼႃႇယဝ်ႉလႄႈ မၼ်းဢမ်ႇပဵၼ်ငႅၼ်းၶေႃး ၸၢႆးၼွင်ႉယဝ်ႉ၊ ၶႃၸင်ႇၶိုၼ်းၽုတ်ႇလုၵ်ႉတင်းသွင်ၵေႃႉသေ ၸၢႆးၼွင်ႉ ၼႅတ်ႈဢဝ်တိၼ်ပိတ်ႉပၼ်ၸၢႆးၸၢႆးလႄႈ ၸၢႆးၸၢႆး ၼႅတ်ႈႁူၼ်လင်ၵႂႃႇယၢင်ႈၼိုင်ႈယဝ်ႉ၊ ၸၢႆးၼွင်ႉၶိုၼ်းသွၼ်ႉတိၼ် ထႅင်ႈၶွၼ်ၼိုင်ႈ ပိတ်ႉၺႃးပုမ်ၸၢႆးၸၢႆးလႄႈ ၸၢႆးၸၢႆးလူမ်ႉၵႂႃႇတိူၵ်ႈၽႃပႅတ်ႈယဝ်ႉ။ ၸၢႆးၼွင်ႉဢၢင်ႈၶဝ်ႈႁႅမ် ၸၢႆးၸၢႆးထႅင်ႈယူႇသေတႃႉ ၸၢႆးၸၢႆးယိပ်းဢဝ်လႆႈ ၶွၼ်ႉပွတ်းမိူဝ်ႈၵႆႈၼၼ်ႉသေ ၶိုၼ်းႁႅမ်ၸၢႆးၼွင်ႉယဝ်ႉ ။
ၸၢႆးၼွင်ႉ လႆႈဝႆႉသတိယႂ်ႇယႂ်ႇသေ ႁူၼ်လင်ယူႇ၊ ၸၢႆးၸၢႆးယိပ်း ပွတ်းမႆႉၼၼ်ႉ ၵႅၼ်ၵႅၼ်သေ ပႆၶဝ်ႈမႃးၸူး ၸၢႆးၼွင်ႉယူႇ၊ မၼ်းဢဝ်ၽတ်ႉဝၢႆႈလႅင်ႈသွင်ၵမ်းထပ်းၵၼ်သေ ၵမ်းလိုမ်းၼႆႉ ၽတ်ႉတိူဝ်ႉၺႃးႁိမ်းငဝ်ႈၶေႃး ၸၢႆးၼွင်ႉသေ ၸၢႆးၼွင်ႉလူမ်ႉၵႂႃႇ ႁိမ်းတင်ႇၼင်ႈလုၵ်ႈၼိုင်ႈယဝ်ႉ။
ၽွင်းၸၢႆးၸၢႆးၸွမ်းဢဝ် ၶွၼ်ႉလမ်းဝူတ်ႇႁူဝ် ၸၢႆးၼွင်ႉထႅင်ႈၼၼ်ႉ ၸၢႆးၼွင်ႉ ၼႅတ်ႈၵဵပ်းဢဝ်တင်ႇ ႁႄႉပႅတ်ႈၽႂ်းၽႂ်းယူႇ -
တၢၵ်ႉ ! ... ... ...
ၸၢႆးၼွင်ႉၼႅတ်ႈဢဝ် တိၼ်ၶိုၼ်းပိတ်ႉၸပ်းသႂ်ႇဝၢင်ႈၶႃ ၸၢႆးၸၢႆးသေ ၸၢႆးၸၢႆးၸဵပ်းၼႃႇလႄႈ ၼင်ႈငွမ်ၵႂႃႇယဝ်ႉ၊ ၸၢႆးၼွင်ႉၵေႃႈ ၸႂ်လမ်ၼႃႇယဝ်ႉလႄႈ မၼ်းယုၵ်ႉဢဝ်တင်ႇသေ ဢၢင်ႈဝူတ်ႇပၼ်ႁူဝ်ၸၢႆးၸၢႆးႁႅင်းႁႅင်းယူႇ -
“ ၸၢႆးၼွင်ႉ ... ယႃႇပေႁဵတ်း ... ဢလူဝ်ႉ ၵိုတ်းလႄႈ ... ”
ပႃႈမွၼ်းၶႃ လုင်းသၢင်ႇတုၺ်ႉၽႅဝ်မႃးသေ လုင်းသၢင်ႇတုၺ်ႉ ၼႅတ်ႈမႃးႁၢမ်ႈၸၢႆးၼွင်ႉၽႂ်းၽႂ်း ၊ ၼႅတ်ႈမႃးႁိမ်ဢဝ်တင်ႇ ၼႂ်းမိုဝ်းမၼ်းၽႂ်းၽႂ်းယဝ်ႉ၊ ပႃႈမွၼ်းၵေႃႈ မႃးႁွပ်ဢဝ်လုၵ်ႈၸၢႆးမၼ်း ၸၢႆးၸၢႆးသေ မႆႈၸႂ်ယူႇ
“ လုၵ်ႈၸၢႆး ... လုၵ်ႈၸၢႆးပဵၼ်သင်ၵႂႃႇ? ၸဵပ်းတီႈလႂ် ... ? ”
ၸၢႆးၸၢႆးၸဵပ်းၼႃႇသေ ဢမ်ႇၸၢင်ႈလၢတ်ႈၵႂၢမ်းလႆႈၵမ်းလဵဝ် ပႃႈမွၼ်းၵေႃႈ ၵိုင်ႉၵၢင်ႉၸႂ်လမ်ၼႃႇသေ ၵႂႃႇဢဝ်ၽႃႇမိုဝ်း ၽတ်ႉပၼ်ၼႃႈ ၸၢႆးၼွင်ႉ ႁႅင်းႁႅင်းယဝ်ႉ -
“ ပၢပ်ႉ ! ... ”
မၼ်းၶိုၼ်း ဢၢင်ႈၽတ်ႉထႅင်ႈၵမ်းၼိုင်ႈလႄႈ ၸၢႆးၼွင်ႉ ၼႅတ်ႈယိပ်းၵမ်မိပ်ႇၶေႃႈမိုဝ်း ပႃႈမွၼ်းဝႆႉၵႅၼ်ႇၵႅၼ်ႇသေ -
“ မႄႈလဵင်ႉ ... ယႃႇပေမႃးႁႅမ်ၶႃႈ ... ပေႃးၶႃႈၸႂ်လမ်မႃးၼႆ ၶႃႈတေႁႅမ်ၺႃးပႃးမႄႈလဵင်ႉယူႇၼႃႈ ... ၶႃႈတေဢမ်ႇယိူၼ်ႉလႆႈယဝ်ႉ ”
ၸၢႆးၼွင်ႉ ယိပ်းၶေႃႈမိုဝ်းမႄႈလဵင်ႉၶဝ်ဝႆႉ ပေႃးသၼ်ႇတိုၼ်းတိုၼ်းယူႇ ၊ ၼၢႆးမွၼ်းၸၼ် ဢဝ်မိုဝ်းမၼ်းၶိုၼ်းသေ -
“ ဢေႃ ... မႂ်းၶိုၼ်းၶႂ်ႈႁတ်းတွပ်ႇထဵင်ႁဝ်းဢိူဝ်ႈၼေႃႈ ... မႂ်းတေဝႃႈ ပေႃႈလဵင်ႉသူ ဢမ်ႇမီးႁိူၼ်းလႄႈ မႂ်းၶႂ်ႈၶႃႇၵႄႇႁႃႉ ... ? ”
“ ဢမ်ႇၸႂ်ႈၶႃႈ မႄႈလဵင်ႉ ... ၵွပ်ႈပိူဝ်ႈပေႃႈလဵင်ႉဢမ်ႇမီးလႄႈ လုၵ်ႈၸၢႆးမႄႈလဵင်ႉ ၸင်ႇမႃးၽိတ်းၶႃႈယဝ်ႉ ... ၵူၼ်းဢၼ်ဝႃႈၼၼ်ႉ မၼ်းဢမ်ႇၸႂ်ႈမဵဝ်းၵူမ်ႈႁူဝ် ၶၢမ်ႇပၼ်ပိူၼ်ႈပႄႉၵိၼ် တႃႇသေႇၵူၺ်း ...... လွင်ႈယိူၼ်ႉၵၼ်ႈ ဢၼ်ဝႃႈၼၼ်ႉ မၼ်းဢမ်ႇမၼ်ႈၵိုမ်းလႆႈတႃႇသေႇ မၼ်းၸၢင်ႈတႅၵ်ႇငၢၵ်ႈဢေႃႈ... ”
ပႃႈမွၼ်းတဝ်ႉဢႅင်ႈသေ -
“ ႁီႉ ! ... ၵူၼ်းဢမ်ႇမီးပေႃႈမႄႈ ပီႈၼွင်ႉၸိူင်ႉမႂ်းၼႆႉ ပေႃႈလဵင်ႉသူႁွင်ႉဝႆႉလႄႈ ၵဝ်ဢမ်ႇလိူဝ်လႆႈႁေ ၸင်ႇႁပ်ႉမႂ်းဝႆႉၵူၺ်းဢိူဝ်ႈ ... ၵဝ်တိုၼ်းဢမ်ႇထုၵ်ႇတႃၵဝ်သေဢိတ်း ... ႁူႉႁိူဝ်ႉ ? ”
“ ပေႃႈလဵင်ႉမႄႈလဵင်ႉႁဝ်းၶဝ် ဢမ်ႇၶႂ်ႈႁႂ်ႈယူႇၼႆၵေႃႈ ... ၶႃႈၵေႃႈ ဢမ်ႇၶႂ်ႈယူႇသေဢိတ်း ... ”
“ ဢမ်ႇၶႂ်ႈယူႇၵေႃႈ ဢွၵ်ႇၵႂႃႇၵမ်းလဵဝ်လႄႈ ... ”
“ ၵႂႃႈဢေႃႈ ... ”
ၸၢႆးၼွင်ႉ သိမ်းဢဝ်ၶူဝ်းမၼ်း ယဵတ်ႈသႂ်ႇထူင်သေ ဢၢင်ႈဢွၵ်ႇႁိူၼ်းယူႇယဝ်ႉ ၸၢႆးၸၢႆးၸင်ႇၶိုၼ်းဝႃႈ -
“ ယႃႇၽူမ်ႈပၼ်မၼ်းၵႂႃႇၵွၼ် ... မႃႇမီႇ ... ၶႅပ်းသၢႆၶေႃးၸၢႆး မီးတီႈမၼ်းဢေႃႈ ... ”
“ ဢီႈသင်ၵေႃ ... ... ? ”
“ ၶႅပ်းသၢႆၶေႃးၸၢႆးႁၢႆသေ မၼ်းၵဵပ်းလႆႈလႄႈ ၸၢႆးၸၢႆးၶိုၼ်းမႃး ယွၼ်းလီလီ မၼ်းဢမ်ႇပၼ်ၶိုၼ်း ...ၵွပ်ႈၼႆ ၸင်ႇလႆႈမင်ၵၼ်ယဝ်ႉ ”
ပႃႈမွၼ်း ယၵ်ႉတူၺ်းၼႃႈၸၢႆးၼွင်ႉ ႁႅင်းႁႅင်းသေ -
“ ႁေႉ ! ဢၢႆႈၼႆႉ ... ၶႅပ်းသၢႆၶေႃးၶမ်း လုၵ်ႈၸၢႆးၵဝ်ၼၼ်ႉ ဢဝ်မႃးပၼ်လႄႈ ... ”
“ ဢမ်ႇပၼ်လႆႈ ... ၵွပ်ႈပိူဝ်ႈဢမ်ႇၸႂ်ႈ ၶႅပ်းၶေႃးသူၼၼ်ႉယဝ်ႉ”
“ ႁိုဝ်ႉ ! ႁဵတ်းႁိုဝ်လႄႈဝႃႈဢမ်ႇၸိုဝ်ႈ ... လုၵ်ႈၸၢႆးၵဝ် တိုၼ်းႁွႆႈမႃးၸဵမ်လဵၵ်ႉယဝ်ႉ ... ၼၼ်ႉ ... ”
“ ၶႃႈၵေႃႈ ... တိုၼ်းမီးမႃးဝႆႉ ၸဵမ်လဵၵ်ႉဢေႃႈ ...”
“ မဵဝ်းမႂ်းႁႃႉ ? တေမီးလႆႈၶႅပ်းၶေႃးၶမ်းၸိူင်ႉၼႆ ... လၢတ်ႈလူး ၵူၼ်းဢမ်ႇမီးဢူႈမႄႈပီႈၼွင်ႉ ၸိူင်ႉၼင်ႇမႂ်းၼႆႉ ... ”
ၶေႃႈၵႂၢမ်း ဢၼ်ပိူၼ်ႈဝႃႈတီႈမၼ်း “ၵူၼ်းဢမ်ႇမီးဢူႈမႄႈပီႈၼွင်ႉ” ၼႆၼၼ်ႉ မိူၼ်ၼင်ႇသဵင်ၽႃႉလင် ၽႃႇၶဝ်ႈမႃး ၼႂ်းႁူၸၢႆးၼွင်ႉသေ မၼ်းပဵၼ်ဢၼ်တိူဝ်ႉၸႂ်တႄႉတႄႉ။ မၼ်းၸၢႆးႁွင်ႉႁႅင်းႁႅင်းသေ -
“ မႄႈလဵင်ႉ ... မႄႈလဵင်ႉ ... ယႃႇပေဝႃႈတီႈၶႃႈၸိူင်ႉၼၼ် ၶႃႈဢမ်ႇၶႂ်ႈငိၼ်း ... ၶႃႈဢမ်ႇၶႂ်ႈငိၼ်း ... ”
ၸၢႆးၼွင်ႉ ဢဝ်မိုဝ်းသွင်ၶွၼ် တူမ်းႁူမၼ်းသေ ႁွင်ႉၼင်ႇၼၼ်ယူႇ။
“ ၸွင်ႇမီးတႄႉႁိုဝ် ... ? ”
“ မီးဢိူဝ်ႈ ... မီးဢိူဝ်ႈ ...”
“ မႂ်းပဵၼ် ၵူၼ်းၼူတူဝ်လဵဝ်ၵူၺ်း ... ဢမ်ႇၸႂ်ႈႁႃႉ ? ”
ၶေႃႈၵႂၢမ်းဢၼ်ဝႃႈ ပဵၼ်ၵူၼ်းၼူတူဝ်လဵဝ် ၼႆၼၼ်ႉၵေႃႈ မႃးသၢင်ႈသႂ်ႇ ႁူဝ်ၸႂ်ၸၢႆးၼွင်ႉၸိူင်ႉၼင်ႇ မၼ်းလႆႈၽိတ်းပိူၼ်ႈ မိူဝ်ႈလဵၵ်ႉသေ မႃးႁႆႈတေႃႇၼၢႆးၶဝ်ၼၼ်ႉယူႇယဝ်ႉ။ မၼ်းၸင်ႇ တွပ်ႇဝႃႈႁႅင်းႁႅင်း -
“ မႄႈလဵင်ႉ ...... ယႃႇပေဝႃႈတီႈၶႃႈ ၸိူင်ႉၼၼ်ထႅင်ႈၶႃႈ ... ၸႂ်ႉၶႃႈႁွမ်းမိုဝ်းဝႆႈၼႆၵေႃႈ ၶႃႈတေဝႆႈယူႇ ၊ ၶႃႈဢမ်ႇၸႂ်ႈၵူၼ်းၼူတူဝ်လဵဝ်ၶႃႈ ... ”
လႆႈႁူႉဝႃႈ ၸၢႆးၼွင်ႉမေႃတိူဝ်ႉၸႂ် ၼင်ႇၼႆလႄႈ မႄႈလဵင်ႉၶဝ်ၶိုၼ်းဝႃႈ -
“ မႂ်းပဵၼ်ၵူၼ်းၼူတူလဵဝ်လႄႈႁဝ်းဝႃႈၼၼ် ... ၸၢင်ႈၵႂႃႇၽိတ်းဢီႈသင် ... ? မႂ်းတူၺ်းလူး လုၵ်ႈၸၢႆၵဝ်ၼႆႉ ဢူႈဢေႃႈမီး မႄႈၵေႃႈမီးဢိူဝ်ႈ ... ငိုၼ်းၵေႃႈမီး ၶမ်းၵေႃႈမီး ၵႃးၵေႃႈမီး ႁိူၼ်းၵေႃႈမီး ပိင်ႇၺႃႇၵေႃႈမီးဢိူဝ်ႈ မႂ်းလူးသမ်ႉမီးသင်? ၵွပ်ႈဢမ်ႇမီးသင်လႄႈ ၸင်ႇႁႃလၵ်ႉဢမ်ႇၸႂ်ႈႁႃႉ ? ပွၵ်ႈပုၼ်ႉ ငိုၼ်းၵဝ်ႁၢႆၼၼ်ႉၵေႃႈ တေႃႈတေပဵၼ် မႂ်းဢဝ်ၵူၺ်းယဝ်ႉ ... ၵမ်းၼႆႉ ၶႅပ်းသၢႆၶေႃးလုၵ်ႈၸၢႆးၵဝ်ၼႆႉၵေႃႈ ... မႂ်းဢၢၼ်းမၢပ်ႇဝႃႈ ဢဝ်ပဵၼ်ၶွင်မႂ်းၼႆႁႃႉ ... ? မႂ်းလၢတ်ႈလူး ... ”
“ ၶႃႈဢမ်ႇမၢပ်ႇၶႃႈ ... မႄႈလဵင်ႇ ယႃႇပေႁႅင်ႉၼဵၵ်းၵူၼ်းတၢၼ်ႇၼႆႉလႄႈ ... ပေႃးၶႃႈ ၶိုၼ်းဝႃႈတီးမႄႈလဵင်ႉၼႆ ၵူဝ်ဢမ်ႇလီဢေႃႈ ... ”
“ မႂ်းတေၸၢင်ႈႁဵတ်းႁိုဝ် ဝႃႈတီႈၵဝ် ပေႃးမႂ်းဢမ်ႇၶိုၼ်းပၼ်ၶႅပ်းသၢႆၶေႃးၶမ်းၼၼ်ႉသေ ဢွၵ်ႇႁိူၼ်းၵႂႃႇၼႆတႄႉ ႁဝ်းတေသိုပ်ႇၽူၼ်း လၢတ်ႈႁၢၼ်ၶဝ်သေ မႃးၺွပ်းမႂ်းဢိူဝ်ႈ မႂ်းဢၢၼ်းၶႂ်ႈမၢပ်ႇယူႇႁႃႉ ?”
“ ၶႃႈဢမ်ႇမၢပ်ႇ ... ဢၼ်မၢပ်ႇလူင်မၢပ်ႇလၢင်ၼၼ်ႉ ပဵၼ်မႄႈလဵင်ႉၶဝ်ဢိူဝ်ႈ ... ”
ၸၢႆးၸၢႆးၵေႃႈၸင်ႇဝႃႈ -
“ ဢၢႆႈၼွင်ႉ ... မႂ်းဝႃႈသင်တီႈမႃႇမီႇၼႆႉ ...”
ၸၢႆးၸၢႆး ဢၢင်ႈမႃးထုပ်ႉမင်ၸၢႆးၼွင်ႉလႄႈ မႄႈၶဝ် ၼႅတ်ႈၸၼ်မၼ်းဝႆႉယဝ်ႉ၊ လုင်းသၢင်ႇတုၺ်ႉၵေႃႈ ၼႅတ်ႈၸၼ်ၸၢႆးၼွင်ႉ ဝႆႉယူႇ။
“ ၵဝ်ဝႃႈ ... မႃႇမီႇသူၼႆႉဢိူဝ်ႈ ပဵၼ်ၵူၼ်းမၢပ်ႇလူင်မၢပ်ႇလၢင်”
ပႃႈမွၼ်းၵေႃႈ ၸႂ်လမ် ပေႃးၶႂ်ႈသၼ်ႇသေ -
“ ဢၢႆႈၼွင်ႉ ... ဢၢႆႈဢမ်ႇႁူႉၵုင်ႇ ... မႂ်းဝႃႈၵဝ်ပဵၼ်ၵူၼ်းမၢပ်ႇလူင်မၢပ်ႇလၢင် ၼႆႁႃႉ ... ? ၵဝ်မၢပ်ႇၽႂ် ? ၵဝ်မၢပ်ႇၽႂ်? မႂ်းလၢတ်ႈလူး ”
“ မႄႈလဵင်ႉႁဝ်း မၢပ်ႇၽႂ်ၼႆ ... မႄႈလဵင်ႉႁူႉသေပိူၼ်ႈဢိူဝ်ႈ ”
“ မႂ်းလူလၢႆၵဝ်ဢိူဝ်ႈၼႆႉ ... ဢၢႆႈၼွင်ႉ ... ”
ၸၢႆးၼွင်ႉ ဝႆႉသဵင်မၼ်ႈသေ သိုပ်ႇလၢတ်ႈယူႇ -
“ ၶႃႈဢမ်ႇလူလၢႆၽႂ်ၶႃႈ ... ၶႃႈဝႃႈ ဢၼ်သိုဝ်ႈဢၼ်ၸိုဝ်ႈမၼ်းၵူၺ်းဢေႃႈ ... ”
ၸၢႆးၸၢႆးၵေႃႈ ၶၢၼ်ႉၶၢမ်ႇလႄႈ ၸင်ႇဝႃႈတီႈ ၸၢႆးၼွင်ႉယဝ်ႉ -
“ ဢၢႆႈၼႆႉ ... မႂ်းၼႄးဝႃႈ မႃႇမီႇပဵၼ်ၵူၼ်းမေႃမၢပ်ႇၼႆ ... မၼ်းမၢပ်ႇၽႂ်? မႂ်းလၢတ်ႈလူး မႂ်းလၢတ်ႈၽႂ်းၽႂ်းလူး ပေႃးမႂ်းဢမ်ႇလၢတ်ႈသိုဝ်ႈသိုဝ်ႈၼႆ ၵဝ်တေႁႅမ်မႂ်းတၢႆ ယူႇယဝ်ႉ ... ”
“ ထၢင်ၶႃႈတေၵူဝ်ႁႃႉ ... ? ၶႃႈဢမ်ႇၵူဝ်ၽႂ်လႄႈ ၸင်ႇလုၵ်ႉမိူင်းလွႆသေ မႃးတႃႈၵုင်ႈၼႆႉယဝ်ႉ ... သင်ဝႃႈ ပီႈၸၢႆးၶႂ်ႈႁူႉ မႃႇမီႇမၢပ်ႇၽႂ် မၢပ်ႇလူင်မၢပ်ႇလၢင်တၢၼ်ႇႁိုဝ်ၼႆ ... ၶႃႈတေလၢတ်ႈၼႄလႆ ... ”
“လၢတ်ႈလႄႈ ... ပဵၼ်ၽႂ် ... ? ”
“မၢပ်ႇပီႈၸၢႆးဢိူဝ်ႈ ... ”
“ ႁႃ ! ... ႁိုဝ် ... ! ”
“ ဢီႈသင်ၵေႃ ? မၢပ်ႇၸိူင်ႉႁိုဝ် ? လၢတ်ႈလူး ... ”
“ ၶႃႈတေလၢတ်ႈယူႇ ... ၵူၺ်းၵႃႈ ပေႃးၶႃႈလၢတ်ႈယဝ်ႉ ၶႃႈတေဢမ်ႇသိုပ်ႇယူႇ တီႈႁိူၼ်းၼႆႉယဝ်ႉ ... ၶႅၼ်းတေႃႈ ပၼ်ၶႃႈၶိုၼ်းမိူဝ်ႈ မိူင်းတႆးသေၵမ်း ... ငိုၼ်းဢၼ်ႁၢႆ ၼႂ်းႁိူၼ်းမိူဝ်ႈပူၼ်ႉမႃးၼၼ်ႉၵေႃႈ ၶႃႈဢမ်ႇလႆႈဢဝ်၊ သၢႆၶေႃးၶမ်း ဢၼ်တီႈၶႃႈၼႆႉၵေႃႈ တေဢမ်ႇၸႂ်ႈသၢႆၶႅပ်းၶေႃး ပီႈၸၢႆး ... ၵူၺ်းၵႃႈ ... သင်ဝႃႈ ၶႃႈတေဢဝ်သၢႆၶေႃးၼႆႉ ဢွၵ်ႇႁိူၼ်းၵႂႃႇၼႆ မႄႈလဵင်ႉၶဝ် သမ်ႉတေၸႂ်ႉႁၢၼ်ၶဝ် မႃးၺွပ်းၶႃႈ ၼႆလႄႈ သၢႆၶႅပ်းၶေႃးၶွင်ၶႃႈၼႆႉၵေႃႈ ၶႃႈတေဢမ်ႇဢဝ်ၵႂႃႇယဝ်ႈ တေပၼ်ဝႆႉတီႈမႄႈလဵင်ႉၶဝ်ယူႇ”
ၶဝ်ဢွၼ်ၵၼ် ယဵၼ်ထွမ်ႇၸၢႆးၼွင်ႉလၢတ်ႈၼၼ်ႉယူႇ -
“ လွင်ႈဢၼ်မႄႈလဵင်ႉႁဝ်း ႁဵတ်းႁိုဝ်မၢပ်ႇပီႈၸၢႆးဝႆႉၼၼ်ႉ ...ၶႃႈတေလၢတ်ႈၼႄ ပီႈၸၢႆးၵေႃႉလဵဝ်ၵူၺ်း... ၵွပ်ႈၼႆ ပီႈၸၢႆးဢဝ်ၵႃးသေ ၵႂႃႇသူင်ႇၶႃႈ တီႈတႃႈရူတ်ႉရဵၼ်းၶႃႈလႄႈ ... ”
ပႃႈမွၼ်းမႆႈၸႂ်သေ -
လုၵ်ႈၸၢႆး ... ယႃႇပေယုမ်ႇမၼ်း ... ”
ၸၢႆးၸၢႆးသမ်ႉၶႂ်ႈႁူႉ ဢၼ်ၸၢႆးၼွင်ႉ တေလၢတ်ႈၼၼ်ႉလႄႈ -
“ မႃႇမီႇ ... ၸၢႆးၵေႃႈဢမ်ႇယုမ်ႇမၼ်း ၵူၺ်းၵႃႈ ... မၼ်းတေလၢတ်ႈသင်ၼႆ ၸၢႆးၶႂ်ႈႁူႉဢေႃး ... မၼ်းၶႂ်ႈမိူဝ်း မိူင်းတႆးၼႆၵေႃႈ ပွႆႇမၼ်းမိူဝ်းသေလႄႈ ... လုၵ်ႈၸၢႆးတေၵႂႃႇသိုဝ်ႉ မႂ်တိုတ်းရူတ်ႉရဵၼ်း ပၼ်မၼ်းသေ သူင်ႇမၼ်းမိူဝ်းၵမ်းလဵဝ်လႆ ... ပေႃးမႄႈဢမ်ႇတမ်းၸႂ်ၼႆၵေႃႈ လုၵ်ႈၸၢႆးတေၸႂ်ႉ လုင်းသၢင်ႇတုၺ်ႉ ၵႂႃႇၸွမ်းဢေႃႈ ... ”
ၶဝ်သၢမ်ၵေႃႉ ၶိုၼ်ႈၶီႇၵႃးသေ မႃးတီႈတႃႈရူတ်ႉရဵၼ်းယူႇ ... ၼိူဝ်ၵႃး ၶဝ်ဢမ်ႇပဵၼ်ဢုပ်ႇၵၼ်သင်၊ ၽႅဝ်မႃးတီႈတႃႈရူတ်ႉရဵၼ်း ၸၢႆးၸၢႆး မီးၵူၼ်းမိုတ်ႈဝႆႉလႄႈ မၼ်းၵႂႃႇဢဝ်မႂ်တိုတ်း မႃးဢၼ်ၼိုင်ႈ ပၼ်ၸၢႆးၼွင်ႉသေ -
“ ဢၢႆႈၼွင်ႉ ... လၢတ်ႈလႄႈ ... ဢၼ်မႂ်းတေလၢတ်ႈၼၼ်ႉ ပေႃးမႂ်းလၢတ်ႈယဝ်ႉ ၵဝ်တေပၼ် မႂ်တိုတ်းတီႈမႂ်း ...”
“ၸမ်ရူတ်ႉရဵၼ်းတေဢွၵ်ႇ ၸင်ႇၵွႆႈလၢတ်ႈယဝ်ႉ ... ”
ၶဝ်ဢွၼ်ၵၼ်ပႂ်ႉၶၢဝ်းယၢမ်း ရူတ်ႉရဵၼ်းတေဢွၵ်ႇယူႇ -
“ ပီႈၸၢႆးၼွင်ႉ ... ”
ငိၼ်းသဵင်ႉႁွင်ႉၸိုဝ်ႈမၼ်းလႄႈ ၸၢႆးၼွင်ႉ ဝၢႆႇတူၺ်းၽႂ်းၽႂ်းယဝ်ႉ၊ လႆႈႁၼ်လႅင်းလႄႈ ၸၢႆးသႅင် ပႆမႃးၸူးၶဝ်လႄႈ လႅင်းၸင်ႇဢႅၼ်ႇမႃးၸူး ၸၢႆးၼွင်ႉယဝ်ႉ၊ ၸၢႆးၼွင်ႉၵေႃႈ ၸင်ႇႁွပ်ႇဢုမ်ႈဢဝ် လႅင်းသေ -
“ လႅင်း ... လႅင်း ... ၶဝ်မႃးႁဵတ်းသင် ... ? ”
“ လႅင်း မႃးသူင်ႇ ပႃႈပႃႈၶဝ်ဢေႃႈ ... ”
ၸၢႆးၼွင်ႉ တူၺ်းၵႂႃႇလႆႈႁၼ် မႄႈပႃႈမိူင်းတႆးသွင်ၵေႃႉ ဢၼ်ၸၢႆးသႅင် မႃးသူင်ႇၶဝ်ၼၼ်ႉယူႇ၊ ၸၢႆးသႅင် ၸင်ႇမႃးထၢမ်ၸၢႆးၼွင်ႉ ?
“ၸၢႆးၼွင်ႉ ... တေၵႂႃႇလႂ် ? ”
“ ၶႃႈ ... ၶႃႈ ... တေမိူဝ်းမိူင်းတႆးဢေႃႈ ... ”
“ တေမိူဝ်းဢႅဝ်ႇႁႃႉ? ၸၢႆးၼွင်ႉ ... ”
ၸၢႆးၼွင်ႉ တေလႆႈတွပ်ႇၸိူင်ႇႁိုဝ်ၵေႃႈ မၼ်းဢမ်ႇမေႃတွပ်ႇလႄႈ မၼ်းဢမ်ႇလၢတ်ႈသင် လႅင်းၸင်ႇထၢမ်ဝႃႈ -
“ ပီႈၸၢႆးၼွင်ႉ ... တေမိူဝ်းမိူင်းတႆးၼႆၶႃႈႁႃႉ ? တေၶိုၼ်းမႃး မိူဝ်ႈလႂ် ? ”
ပေႃးမၼ်းတေတွပ်ႇသိုဝ်ႈသိုဝ်ႈ “ဢမ်ႇၶိုၼ်းမႃးယဝ်ႉ ” ၼႆၵူဝ်လႅင်း ၸႂ်ဢမ်ႇလီလႄႈ မၼ်းၸင်ႇဝႃႈ -
“ ဝၼ်းၼိုင်ႈ တေၶိုၼ်းမႃးယူႇ ... လႅင်း ...”
“ပေႃးပီႈၸၢႆးၼွင်ႉ ... မႃးၶိုၼ်းၼႆ သိုဝ်ႉၶဝ်ႈမုၼ်းမႃးပၼ်လႅင်းၼႃႈ ၶဝ်တမ်ငႃးၵေႃႈ သိုဝ်ႉမႃးၼႃႈ ... ယႃႇပေလိုမ်းၼႃႈ ... ”
သူပ်းၸၢႆးၼွင်ႉတႄႉဝႃႈ - “ ဢိူဝ်ႈ ... ဢိူဝ်ႈ ...”ၼႆသေတႃႉ ၼႂ်းၸႂ်မၼ်းတႄႉ ႁူႉဝႃႈမၼ်းတေဢမ်ႇၶိုၼ်းမႃးယဝ်ႉလႄႈ ၼႂ်းၸႂ်မၼ်း ပဵၼ်ဢၼ်တိပ်ႇမႃးဝႆႉယူႇ ။
“ လႅင်းတေပႂ်ႉမွင်း ပီႈၸၢႆးၼွင်ႉဝႆႉဢေႃႈ... ”
ၼႂ်းၸႂ်ၸၢႆးၼွင်ႉတႄႉ
“ ဢေႃး ... ... လႅင်းဢိူၺ်း ... လႅင်း မွင်းတၢၼ်ႇႁိုဝ်ၵေႃႈ ... ပီႈၸၢႆးၼွင်ႉ တေဢမ်ႇၽႅဝ်မႃးလႆႈယဝ်ႈ ... ”
တႅင်း ... တႅင်း ... တႅင်း ... တႅင်း ... တႅင်း ...
ရူတ်ႉရဵၼ်းတေဢွၵ်ႇ လူဝ်ႇထႅင်းႁႃႈမဵတ်ႉၵူၺ်းယဝ်ႉလႄႈ - ၸၢႆးၼွင်ႉႁွပ်ႇဝႆႉလႅင်း ၼူမ်ၵႅမ်ႈလႅင်း တၢင်းသွင်ၽၢႆႇသေ -
“ လႅင်း ... ပီႈၸၢႆးၼွင်ႉ တေမိူဝ်းယဝ်ႉၼႃႈ ... ... ”
လႅင်းၶိုၼ်းၼူမ်ၵႅမ်ႈၸၢႆးၼွင်ႉ တၢင်းသွင်ၽၢႆႇသေ မႃးၸူးၶိုၼ်း ၸၢႆးသႅင်ယဝ်ႉ ၸၢႆးၸၢႆးဢဝ်မႂ်တိုတ်း ယိုၼ်ႈပၼ်ၸၢႆးၼွင်ႉလႄႈ ၸၢႆးၼွင်ႉ သွပ်ႉသႅပ်ႉလၢတ်ႈပၼ် ႁိမ်းႁူၸၢႆးၸၢႆး ဢဝ်ထူင်ဢွၼ်ႇလုၵ်ႈၼိုင်ႈ ပၼ်ၸၢႆးၸၢႆးယဝ်ႉသေ ၶဝ်ႈၵႂႃႇ ၼႂ်းၽၵ်းတူလဵၵ်းယဝ်ႉ၊ ၸၢႆးၼွင်ႉ ယူႇၼႂ်းၽၵ်းတူလဵၵ်းသေ ၶိုၼ်းတူင်ႉတၵ်ႉ လုင်းသၢင်ႇတုၺ်ႉယူႇ -
“ လုင်းသၢင်ႇတုၺ်ႉ ... ၸၢႆးၼွင်ႉတေမိူဝ်းၵွၼ်ႇၶႃႈ ၼႃႈ ”
လုင်းသၢင်ႇတုၺ်ႉ ပဵၼ်ဢၼ်သေလၢႆၸၢႆးၼွင်ႉ တႄႉတႄႉဝႃႈဝႃႈလႄႈ မၼ်းတဵမ်ဢူၵ်းတဵမ်ၸႂ်ဝႆႉသေ ငွၵ်းႁူဝ်ၼႄ ၸၢႆးၼွင်ႉၵူၺ်းယဝ်ႉ မၼ်းဢမ်ႇၸၢင်ႈလၢတ်ႈဢွၵ်ႇသူပ်းသင် -
ၽွင်းရူတ်းရဵၼ်း ၸမ်တေဢွၵ်ႇယႅၼ်ႉယႅၼ်ႉၼၼ်ႉ ၶႅၵ်ႇၽူၺ်းၶဝ် သမ်ႉလိုမ်းဝႆႉ ဢႅပ်ႇငိုၼ်းလႄႈ မၢႆၽၢင် တီႈႁိူၼ်းသေ ၽူၺ်းၸင်ႇၵႂႃႇၺႃးႁၼ်လႄႈ ၸင်ႇၼႅတ်ႈမႃးၸွမ်းသူင်ႇ ႁႂ်ႈၶိုတ်း မိူဝ်ႈရူတ်ႉရဵၼ်းပႆႇဢွၵ်ႇယဝ်ႈ။
“ ပီႈၸၢႆးသႅင် ... ”
“ ဢေႃး ... ၽူၺ်း ... ဢီႈသင် ... ? ”
“ထူင်ငိုၼ်းမႄႈပႃႈၶဝ် လိုမ်းဝႆႉလႄႈ ၽူၺ်းမႃးၸွမ်းသူင်ဢေႃႈ”
ၽူၺ်း ထူၺ်ႈၸႂ်ႁိူဝ်ႉ ထူၺ်ႈၸႂ်လူင်သေ လၢတ်ႈၼႄ ၸၢႆးသႅင်ယူႇ၊ မႄႈပႃႈၶႅၵ်ႇသွင်ၵေႃႉၼၼ်ႉၵေႃႈ ပေႃးၵႂႃႇၼင်ႈဝႆႉ ၼိူဝ်ရူတ်ႉရဵၼ်း ၊ ရူတ်ႉရဵၼ်းၵေႃႈ ၸမ်တေဢွၵ်ႇယဝ်ႉလႄႈ ၸၢႆးသႅင်ၸင်ႇဝႃႈ
“ ဢေႃႈ ... ၸၢႆးၼွင်ႉ ... ပေႃးၸၢႆးၼွင်ႉ ၽႅဝ်ၼိူဝ်ရူတ်ႉရဵူၼ်းၼႆ ဢဝ်ထူင်ငိုၼ်းၼႆႉ မႅင်ႇပၼ် မႄႈပႃႈပီးပီးသွင်ၵေႃႉၼၼ်ႉၼႃႈ ... ”
“ ဢေႃႈ ... တမ်းၸႂ်လႃႈ ... ပီႈၸၢႆးသႅင် ... ”
ၽူၺ်းလႆႈႁၼ် ၸၢႆးၼွင်ႉလႄႈ မၼ်းၸင်ႇထၢမ် -
“ ၸၢႆးၼွင်ႉ ... ၸၢႆးၼွင်ႉ တေၵႂႃႇလႂ် ? ”
“ ၸၢႆးၼွင်ႉ တေမိူဝ်းမိူင်းတႆးဢိူဝ်ႈ ... ၽူၺ်း ... ”
“ တေမိူဝ်းႁဵတ်းသင် ... ? ၸၢႆးၼွင်ႉ ... ... ”
“ ၽူၺ်း ... ႁဝ်းပဵၼ်ၶႅၵ်ႇၵူၺ်းလူး ... ပေႃးၶၢဝ်းမၼ်းထိုင်မႃးၼႆၵေႃႈ ႁူႉတေႃႈ တေလႆႈပွၵ်ႈမိူဝ်းယဝ်ႈ ... ”
“ ၸၢႆးၼွင်ႉတေမိူဝ်းၼႆ ... ၵွပ်ႈသင် သမ်ႉဢမ်ႇပွင်ႇၶၢဝ်ႇတီႈၽူၺ်းၶဝ်လႃႇ ... ”
“ ၸၢႆးၼွင်ႉ တေၶိုၼ်းပွၵ်ႈမႃးယူႇႁႃႉ ? ”
ၸၢႆးၼွင်ႉ ဢမ်ႇၶိုၼ်းတွပ်ႇသင်၊ မၼ်းယၵ်ႉတူၺ်း ၼႃႈၶဝ်ၵူႈၵေႃႉသေ ဝၢႆႇလင်ၶိုၼ်ႈမိူဝ်း ၼိူဝ်ရူတ်ႉရဵၼ်းယဝ်ႉ၊ ၽွင်းၼၼ်ႉရူတ်ႉရဵၼ်းၵေႃႈ တူင်ႉၼိုင်လွႆးလွႆးသေ လေႃႈဢွၵ်ႇၵႂႃႇယူႇ၊ ၸၢႆးၼွင်ႉ ယူႇၼိူဝ်ရူတ်ႉရဵၼ်းသေ ၶဝ်ၵၵ်းၵႆဝႆမိုဝ်း တူင်ႉတၵ်ႉသူင်ႇသင်ၵၼ်ယူႇ ၼႃႈငဝ်ဢွၼ်ၶဝ် ဢၼ်ဢမ်ႇယုမ်ႉလႆႈၼၼ်ႉ တိုၵ်ႉမႃးၸပ်းၼႂ်းတႃၸၢႆးၼွင်ႉယူႇ -
ပေႃႇ ... ပူး ... ပေႃႇ ... ပူး ... ... ... ”
ၸၢႆးၼွင်ႉ ဢဝ်ထူင်ငိုၼ်း မႄႈပႃႈပီးသွင်ၵေႃႉၼၼ်ႉသေ ၵႂႃႇပၼ်ၶိုၼ်းတီႈၶႃယဝ်ႉ၊ ၶႃႈၶွပ်ႈၸႂ်ၸူမ်းသိူဝ်း ၼိူဝ်ၸၢႆးၼွင်ႉတႄႉတႄႉ။ ဝၢႆး ၼၼ်ႉ ၸၢႆးၼွင်ႉ မႃးၼင်ႈတီႈၼင်ႈမၼ်းၶိုၼ်းသေ ဝူၼ်ႉတူၺ်း ဢၼ်ပူၼ်ႉမႃးၼၼ်ႉယူႇ၊ ၵႂၢမ်းဢၼ်ၼၢႆးၶဝ်သင်ႇလၢတ်ႈမၼ်းဝႆႉဝႃႈ “ ပေႃး... ၶိူဝ်ပီႈၼွင်ႉၺႃးၵၼ်ၼႆ ယႃႇပေၽိတ်းၵၼ် ... ႁႂ်ႈထုၵ်ႇမေႃၽေႃးၵႂၢမ်းၵၼ်” ၼႆၼၼ်ႉၵေႃႈ မၼ်းၶိုၼ်းငိၼ်းမႅၼ်ႈၼႂ်းႁူမၼ်း -
“ ... ဢေႃး... ၼၢႆး... ၸၢႆးၼွင်ႉ ပဵၼ်ၵူၼ်းလိူဝ်ၵႂၢမ်းၼၢႆးႁဝ်းယဝ်ႉ ... ပႅင်ႈၼင်ႇၸၢႆးၼွင်ႉ ယိူၼ်ႉၶၢမ်ႇလႆႈၼၼ်ႉ ၸၢႆးၼွင်ႉယိူၼ်ႉမႃးယူႇ ၼၢႆးဢိူၺ်း ... ၵူၺ်းၵႃႈ ၸၢႆးၼွင်ႉလီတေႃႇမၼ်းသေတႃႉ မၼ်းဢမ်ႇလီတေႃႇၸၢႆးၼွင်ႉလူး ... ၵွပ်ႈၼႆ ... လီတေႃႇလီၼၼ်ႉ မၼ်းဢမ်ႇပဵၼ်မႃးလႄႈ ႁၢႆႉတေႃႇႁၢႆႉယဝ်ႉ ၼၢႆးဢိူၺ်း ... မၢင်ပွၵ်ႈၼႆႉ ထုၵ်ႇလီႁၢႆႉၵေႃႈ လူဝ်ႇလႆႈႁၢႆႉယူႇယူဝ်ႉၼေႃၼၢႆး ... ၼၢႆးဢိူၺ်း ... ဝၢင်းၶႂၢင်းပၼ် တၢင်းႁၢႆႉၸၢႆးၼွင်ႉသေၵမ်း ... ”
+ + + + + + +
ဝၢႆးသေ ရူတ်ႉရဵၼ်းၸၢႆးၼွင်ႉၶဝ်ဢွၵ်ႇၵႂႃႇ ၸၢႆးၸၢႆးၵေႃႈ တူင်ႉတၵ်ႉၽူၺ်းၶဝ်သေ ၶီႇၵႃးမႃးမိူဝ်းယဝ်ႉ ၊ ၸွမ်းတၢင်း ၸၢႆးၸၢႆး ၶိုၼ်းဝူၼ်ႉငိၼ်းမႅၼ်ႈ ၵႂၢမ်းဢၼ် ၸၢႆးၼွင်ႉသွပ်ႉသႅပ်ႉ တီႈႁူမၼ်းၼၼ်ႉယူႇ ... ...
“ မႄႈလဵင်ႉမၢပ်ႇဝႃႈ မၼ်းပဵၼ်မႄႈ ပီႈၸၢႆးၼႆယဝ်ႉ ... ပေႃးပီႈၸၢႆးၶႂ်ႈႁူႉ မႄႈတႄႉတႄႉ ပီႈၸၢႆးပဵၼ်ၽႂ် ? ၼႆ ၵႂႃႇထၢမ်တူၺ်းၶိုၼ်းလႄႈ”
တေႃႇပေႃးၽႅဝ်မႃး တီႈႁိူုၼ်း ၼႃႈၸၢႆးၸၢႆးပဵၼ်ဢၼ်ငဝ်ၵႂႃႇတႄႉတႄႉဝႃႈဝႃႈ၊ ၵႂၢမ်းၶေႃႈၼႆႉ မၼ်းထုၵ်ႇလီထၢမ် မႃႇမီႇႁိုဝ် ? ဢမ်ႇထုၵ်ႇလီထၢမ်ႁိုဝ် ? ၼႆ မၼ်းတိုၵ်ႉႁိဝ်ႈတူၺ်းၸႂ်မၼ်းယူႇ ၊ ၵႂၢမ်းဢွၼ်ႇၶေႃႈၼႆႉတႄႉ ပဵၼ်ဢၼ် ၶမ်ၸႂ်မၼ်းဝႆႉတႄႉတႄႉယဝ်ႉ။
မႄႈတႄႉတႄမၼ်း တေပဵၼ်ၽႂ် ? ၼႆၵေႃႈ မၼ်းပဵၼ်ဢၼ်ၶႂ်ႈႁူႉမႃး ၸွင်ႇမၼ်းတေမီးထႅင်ႈ ပီႈဢွၵ်ႇၼွင်ႇဢွၵ်ႇမၼ်းႁိုဝ် ? ၼႆၵေႃႈ မၼ်းၶႂ်ႈႁူႉမႃး တဵမ်ဢူၵ်းတဵမ်ၸႂ်မၼ်းသေတႃႉ ပေႃးတေထၢမ်မႃႇမီႇမၼ်းၼႆ သမ်ႉၵူဝ်မႃႇမီႇၶဝ် ၸႂ်ဢမ်ႇလီလႄႈ မၼ်းဢမ်ႇၶႂ်ႈႁတ်းထၢမ်။ ပႃႈမွၼ်း တူၺ်းႁၼ် ၼႃႈလုၵ်ႈၸၢႆးမၼ်း ငဝ်ဝႆႉလႄႈ မၼ်းၸင်ႇမႃးထၢမ်လုၵ်ႈၸၢႆးမၼ်းဝႃႈ -
“ လုၵ်ႈၸၢႆး ... ႁဵတ်းသင်လုၵ်ႈၸၢႆးပေႉငဝ်လႃႇ ? လၢတ်ႈမႃႇမီႇလူး ဢၢႆႈၼၼ်ႉ လၢတ်ႈသင် ? တီႈလုၵ်ႈၸၢႆး ... ”
ၸၢႆးၸၢႆး လွမ်တူၺ်းၼႃႈမႄႈၶဝ်သေ ထူၺ်ႈၸႂ်လူင်ႁႅင်းႁႅင်းယူႇ၊ မၼ်းဢမ်ႇတၵ်းသဵင်သင်လႄႈ မႄႈၶဝ်ၸင်ႇထၢမ် -
“ မၼ်းလၢတ်ႈသင် ? တီႈလုၵ်ႈၸၢႆးၼႆ လၢတ်ႈမႃႇမီႇလူး ...”
“ မႃႇမီႇ လုၵ်ႈၸၢႆး တေထၢမ်မႃႇမီႇၼႆၵေႃႈ ၵူဝ်မႃႇမီႇဢမ်ႇသိူဝ်းၸႂ်လႄႈ လုၵ်ႈၸၢႆးဢမ်ႇၶႂ်ႈထၢမ်ယဝ်ႉ ... ”
“ၶႂ်ႈထၢမ်သင် ? ထၢမ်လႄႈ ... ၸၢင်ႈလူဝ်ႇဝႆႉႁႂ်ႈၶမ်ၸႂ်ၸၢႆးယူႇႁဵတ်းသင် ... ထၢမ်လႄႈ လုၵ်ႈၸၢႆး... ...”
“ ပေႃးမႃႇမီႇ ပၼ်ထၢမ်ယူႇၼႆ လုၵ်ႈၸၢႆးတေထၢမ်ဢေႃႈ... ”
“ ထၢမ်လႄႈ ... ”
“မႄႈဢွၵ်ႇဢွၵ်ႇလုၵ်ႈၸၢႆး ပဵၼ်ၽႂ်ၶႃႈ ... ? ”
ၶေႃႈထၢမ်ၶေႃႈၼႆႉ မိူၼ်ငၢႆးၼင်ႇ သဵင်ၽႃႉလင်လူင် ၽႃႇၶဝ်ႈၼႂ်းႁူ ပႃႈမွၼ်းယဝ်ႉ၊ ဢၼ်ပႃႈမွၼ်း ၵူဝ်ၸၢႆးၸၢႆးႁူႉ လွင်ႈဝႃႈမၼ်းပဵၼ် လုၵ်ႈၵဵပ်းမၼ်းၼၼ်ႉ ၸၢႆးၸၢႆးႁူႉၵႂႃႇယဝ်ႉလႄႈ ပႃႈမွၼ်းဢမ်ႇၸၢင်ႈႁဵတ်းႁိုဝ်ယဝ်ႉ၊ မၼ်းပဵၼ်ဢၼ် ၸႂ်လမ်တေႃႇၸၢႆးၼွင်ႉ ၶိူဝ်းၶိူဝ်းယူႇ ။
“ ၸၢႆးၼွင်ႉ မႃ ၸၢႆးၼွင်ႉ မႃ ... မႂ်းမႃးႁၵ်းဢူၵ်းၵဝ်ဢိူဝ်ႈၼႆႉ မႂ်းႁၵ်းဢူၵ်းၸႂ်ၵဝ်ဢိူဝ်ႈ ၼႆႉ ... ႁီး ... သိုတ်ႉ ... သိုတ်ႉ ... ”
ပႃႈမွၼ်း ၼင်ႈႁႆႈယူႇသိုတ်ႉသိုတ်ႉယဝ်ႉ၊ ယွၼ်ႉပိူဝ်ႈ မၼ်းႁႅင်ႉဝႃႈၵႂၢမ်းတဵၵ်းတဵင်ၸၢႆးၼွင်ႉၼႃႇလႄႈ ၸၢႆးၼွင်ႉ ၸင်ႇႁႂ်ႈၸၢႆးၸၢႆး မႃးထၢမ်မၼ်းၼင်ၼႆယဝ်ႉ ။
ၸၢႆးၸၢႆးလႆႈႁၼ် မႃႇမီႇၶဝ်တိူဝ်ႉၸႂ်သေ ႁွင်ႉႁႆႈၼင်ႇၼၼ်လႄႈ မၼ်းပဵၼ်ၸႂ်ဢမ်ႇလီ ၼင်ႇၵဝ်ႇ -
“ မႃႇမီႇ ... မႃႇမီႇႁႆႈႁဵတ်းသင် ၶႃႈလႃႇ ... ? ၶႃႈၼႆႉဢမ်ႇၸႂ်ႈ လုၵ်ႈဢွၵ်ႇဢွၵ်ႇမႃႇမီႇၶဝ် ၶႃႈႁႃႉ ... ? ”
ပႃႈမွၼ်းဢမ်ႇတွပ်ႇသင် မၼ်းႁႆႈယူႇတိၵ်းတိၵ်းၵူၺ်းယဝ်ႉ၊ ၽွင်းၼၼ်ႉ တႅတ်ႇတီႇၶဝ် လုင်းၸၢႆးၽေႇၵေႃႈ ၽႅဝ်မႃးသေ မႃးထၢမ်လွင်ႈတၢင်းမၼ်းယူႇ။ ၸၢႆးၸၢႆးၵေႃႈ ၸင်ႇၶႆႈလၢတ်ႈၼႄ ဢၼ်ပဵၼ်ပူၼ်ႉမႃး ၸိူဝ်းၼၼ်ႉယူႇ။ ပႃႈမွၼ်းတႄႉ ႁႆႈယူႇသိုတ်ႉသိုတ်ႉတိၵ်းတိၵ်း၊ လုင်းၸၢႆးၽေႇတႄႉ ဝူၼ်ႉပွင်ႇၸဵမ်မိူဝ်ႈၸဝ်ႉၸဝ်ႉလႄႈ မၼ်းဢမ်ႇပေႃးတိူဝ်ႉၸႂ် ။
“ ဢိုဝ်ႉ ... လွင်ႈဢၼ်တႄႉတႄႉၼႆႉ ဝၼ်းၼိုင်ႈ တေၶိုၼ်းထၢင်ႈၸႅင်ႈယူႇၼႆ ... ႁဝ်းလၢတ်ႈသူယူႇ ဢမ်ႇၸိုဝ်ႈႁိုဝ် ? ”
ၸၢႆးၸၢႆးၵေႃႈ ၸင်ႇၶိုၼ်းဝႃႈ -
“ တမ်ႈတီႈၼိူဝ်ၸၢႆးၼႆႉ မႃႇမီႇလႄႈတႅတ်ႇတီႇၵေႃႈ ပဵၼ်ဢၼ်မီၵျေးၸူးယႂ်ႇ မိူၼ်ၼင်ႇ ပေႃႈမႄႈဢွၵ်ႇဢွၵ်ႇၸၢႆးၼၼ်ႉယူႇၼႆ ... ၸၢႆးဢမ်ႇလိုမ်းၼင်ႇၵဝ်ႇ ၵူၺ်းၵႃႈ ... ၸၢႆးၶႂ်ႈႁူႉ ၶႂ်ႈႁၼ် ပေႃႈမႄႈၸၢႆးဢေႃႈ”
တေသိုပ်ႇသိူင်ႇသိမ်းၵေႃႈ တေဢမ်ႇပဵၼ်ယဝ်ႉလႄႈ လုင်းၸၢႆးၽေႇ ၸင်ႇလၢတ်ႈၼႄ လွင်ႈဢၼ် ၶဝ်ၵဵပ်းလဵင်ႉ ၸၢႆးၸၢႆးၼၼ်ႉသဵင်ႈသဵင်ႈယဝ်ႉ -
“ပေႃႈမႄႈၸၢႆးၼၼ်ႉတႄႉ လႆႈႁူႉဝႃႈ ဢမ်ႇမီးမိူင်းၵူၼ်း တင်းသွင်ၵေႃႉၼႆယဝ်ႉ ... ၵၢင်ၸႂ်လုၵ်ႈၸၢႆး ၶႂ်ႈႁဵတ်းႁိုဝ် ? ၶႂ်ႈပဵၼ်ႁိုဝ် ? ၼႆၵေႃႈ လၢတ်ႈၼႄတႅတ်ႇတီႇၶဝ်လႄႈ ... ”
ၸၢႆးၸၢႆး ပႆႇၸၢင်ႈတႅပ်းတတ်းသင်လႄႈ မၼ်းၵႂင်ၸႂ်သေ ပၢႆႈမိူဝ်းယူႇ ၼႂ်းလုၵ်းၼွၼ်းမၼ်းယူႇ ။
“ဢူႈတႄႉမႄႈတႄႉၵဝ် တၢႆတႄႉတႄႉယဝ်ႉႁႃႉ ? တႅတ်ႇတီႇမႃႇမီႇၶဝ် လႅၼ်ၵဝ်ႁႃႉ ? သင်ဝႃႈ ဢူႈမႄႈတႄႉၵဝ် တၢႆယဝ်ႉၼႆ ၵဝ်ထုၵ်ႇလီၵႂႃႇႁႃတူၺ်း ၶုမ်ပႃႇႁဵဝ်ႈၶဝ်ယူႇယူဝ်ႉ ? ပီႈၼွင်ႉၵဝ်ၵေႃႈ တေမီးယူႇႁိုဝ် ? တႅတ်ႇတီႇလႄႈမႃႇမီႇ ၸွင်ႇတေႁၵ်ႉၵဝ် မိူၼ်မိူဝ်ႈဢွၼ်တၢင်းၼၼ်ႉႁိုဝ်?”
ၸၢႆးၸၢႆး ၵုမ်ႇပဵၼ်တၢင်းဝူၼ်ႉၶမ်ၸႂ်သေ ၼႃႈတႃမၼ်း ဢမ်ႇပေႃးမီးႁႅင်း မိူၼ်ဝၼ်းဢွၼ်၊ ၸႂ်ဢၼ်ဝႃႈ - “ ၵဝ်ပဵၼ်လုၵ်ႈၸၢႆးၵေႃႉလဵဝ် ပဵၼ်လုၵ်ႈၸၢႆးသထေး ... ” ၼႆၼၼ်ႉၵေႃႈ ဢၢပ်ႈတေၵွမ်ႉယွၼ်ႇတူၵ်းၵႂႃႇယဝ်ႉ ။
မၼ်းတေလႆႈႁဵတ်းႁိုဝ်? တေလႆႈသိုပ်ႇႁဵတ်းၸိူင်ႉႁိုဝ် ? ၼႆၵေႃႈ မၼ်းဝူၼ်ႉဢမ်ႇပွင်ႇ ၶၢဝ်းယၢမ်းပူၼ်ႉမႃး သွင်သၢမ်ဝၼ်းသေတႃႉ ၸၢႆးၸၢႆး ဢမ်ႇပႆႇၸၢင်ႈႁဵတ်းႁိုဝ် တႅပ်းတတ်းလႆႈ ၸႂ်မၼ်းၵွၼ်ႇ၊ မၼ်းမႃးၼင်ႈဢဵၼ်ႈၼႂ်းသူၼ်သေ ငဝ်ၵဝ်ႉယူႇ ။
မၼ်းလွမ်တူၺ်းၵႂႃႇၼႂ်းသူၼ် တီႈၼိုင်ႈယဝ်ႉတီႈၼိုင်ႈသေ လႆႈႁၼ်မႃ ဢၢႆႈယုၺ်းလႄႈ ဢၢႆႈသီႇတႃ ႁိမ်ၵၼ်ၶူပ်းလဵၼ်ႈ ၽႅၼ်ႇယွၵ်းယူႇ၊ ယူႇၵမ်းၼိုင်ႈ ဢၢႆႈသီႇတႃၵႂႃႇႁၼ် ၶႅပ်းသၢႆၶေႃးၶမ်း ၸၢႆးၸၢႆး ဢၼ်တူၵ်းႁၢႆဝႆႉၼၼ်ႉလႄႈ မၼ်းၶူပ်းဢဝ်သေ ဢၢႆႈယုၺ်းလမ်းမၼ်းလႄႈ မၼ်းဢႅၼ်ႇမႃး ႁိမ်းၸၢႆးၸၢႆးယဝ်ႉ ...၊ ၸၢႆးၸၢႆး လႆႈႁၼ်ၶႅပ်းလိူင်လိူင်ဢွၼ်ႇ ၼႂ်းသူပ်း မႃလႄႈ မၼ်းၸင်ႇၼႅတ်ႈ ၶျေႃးႁွင်ႉဢဝ်မႃသေ ပွၼ်ႈဢဝ်ၶႅပ်းသၢႆၶေႃးၶမ်း ဢၼ်မီးၼႂ်းသူပ်း ဢၢႆႈသီႇတႃယဝ်ႉ ... ။
“ ႁႃ ... ! ပဵၼ် ... ပဵၼ်ၶႅပ်းသၢႆၶေႃးၶမ်းၵဝ်ဢိူဝ်ႈၼႆႉ ... ”
ၸၢႆးၸၢႆးယိပ်းၵမ်ဢဝ် ၶႅပ်းသၢႆၶေႃးၶမ်းၼၼ်ႉသေ ဢၢင်ႈမိူဝ်းတႅၵ်ႈတူၺ်း ဢၼ်ၸၢႆးၼွင်ႉ ဝႆႉပၼ်ၶဝ်ၼၼ်ႉယဝ်ႉ -
ၵလိင်း ... ၵလိင်း ... ၵလိင်း ... ...
“ လိၵ်ႈ ... လိၵ်ႈ ... လိၵ်ႈ ... ၸၢႆးၸၢႆး ... ”
ၸၢႆးၸၢႆးၵေႃႈ ၵႂႃႇႁပ်ႉဢဝ် လိၵ်ႈတီႈၵူၼ်းသူင်ႇလိၵ်ႈသေ ဢဝ်မႃး ၽုၺ်ႇလူတူၺ်း တီႈႁွင်ႈၼွၼ်းမၼ်းယဝ်ႉ ၊ မၼ်းမႃးသိၵ်ႇတူၺ်းထူင်လိၵ်ႈၼႆႉ လႆႈႁၼ်လိၵ်ႈၽိုၼ်ၼိုင်ႈလႄႈ ၶႅပ်းႁၢင်ႈၵဝ်ႇၵဝ်ႇဢွၼ်ႇ ၶႅပ်းၼိုင်ႈယဝ်ႉ၊ဢၼ်သူင်ႇလိၵ်ႈမႃးတႄႉ ပဵၼ်ၸၢႆးၼွင်ႉ ... ...
ထိုင် -
ပီႈဢၢႆႈ ...
ၶႃႈတေဢမ်ႇႁွင်ႉဝႃႈ ပီႈၸၢႆးၼႆသေ တေႁွင်ႉဝႃႈ “ ပီႈဢၢႆႈ ” ၼႆၵူၺ်းၶႃႈယဝ်ႉ ... ၵွပ်ႈသင်လႄႈ ၶႃႈဝႃႈၸိူင်ႉၼႆၼႆ ၵွပ်ႈပိူဝ်ႈပီႈၸၢႆး ပဵၼ်ပီႈဢၢႆႈၶႃႈၼၼ်ႉယဝ်ႉ ...
ၵူၺ်းၵႃႈ... ၵႂၢမ်းၶေႃႈၼႆႉ ၶႃႈၼွင်ႉဢၢင်ႈလၢတ်ႈ ၸဵမ်မိူဝ်ႈၶႃႈၼွင်ႉ မႃးလႆႈယူႇၸွမ်းပီႈဢၢႆႈၶႃႈၼၼ်ႉ ဝႃႈၼႆသေတႃႉ ပီႈဢၢႆႈ ဢမ်ႇတွၼ်ႉပၼ်ၼႃႈလီတေႃႇၶႃႈၼွင်ႉသေပွၵ်ႈလႄႈ ၶႃႈၼွင်ႉ ဢမ်ႇပဵၼ်လၢတ်ႈ ဢမ်ႇႁတ်းလၢတ်ႈမႃး ... ၽွင်းမိူဝ်ႈ ၶႃႈၼွင်ႉ ယူႇၸွမ်းပီႈဢၢႆႈၼၼ်ႉ ပီႈဢၢႆႈပေႉၵိၼ် ၶႃႈသေတႃႉ ၶႃႈဢမ်ႇဝႆႉၸႂ်ၸင်းတေႃႇ ပီႈဢၢႆႈၼင်ႇၵဝ်ႇ ... ၵွပ်ႈပိူဝ်ႈ ၶႃႈၼွင်ႉ ၶႂ်ႈလႆႈမဵတ်ႉတႃႇ ပီႈဢၢႆႈသေပိူၼ်ႈ ၼၼ်ႉယဝ်ႉ ... ၵွပ်ႈသင်ပီႈဢၢႆႈ သမ်ႉပႅင်းၸင်းၶႃႈၼွင်ႉၼႆ ၶႃႈထၢင်ႇတႄႉ တေပဵၼ်ၵွပ်ႈပိူဝ်ႈ ၽူၺ်းယဝ်ႉ ... ၵူၺ်းၵႃႈ ၽူၺ်းလႄႈပီႈဢၢႆႈၼႆႉ ၽဝႃႉ မိူၼ်လိူၼ်လႄႈလၢဝ်သေ ပေႃႈမႄႈၵူၼ်းလူင်ၵေႃႈ ပေႃးလူင်ႉၵၼ်ဝႆႉယဝ်ႉ ဢမ်ႇၸႂ်ႈႁႃႉ ... ? သင်ဝႃႈ ပီႈဢၢႆႈလႄႈ ၽူၺ်းၶဝ် ပဵၼ်မေႃယႃလူင်ႁူမ်ႈၵၼ်သေ မႃးယူတ်းယႃပၼ် ပီႈၼွင်ႉမိူင်းႁူၺ်ႈမိူင်းလွႆႁဝ်းၼႆတႄႉ ... ၶႃႈၼွင်ႉလႄႈ ပီႈၼွင်ႉမိူင်းလွႆႁဝ်း တေၸူမ်းသိူဝ်း ႁပ်ႉတွၼ်ႈ တႄႉတႄႉဢေႃႈ ...
ၶႅပ်းႁၢင်ႈ ဢၼ်ၶႃႈၼွင်ႉသူၼ်မႃးၼႆႉ ပဵၼ်ၶႅပ်းႁၢင်ႈပေႃႈမႄႈလႄႈ ႁႃးပီႈၼွင်ႉဢေႃႈ... ၶႃႈၼွင်ႉ တင်ႈၸႂ်ၶႂ်ႈႁႂ်ႈပီႈဢၢႆႈလႄႈ မႄႈလဵင်ႉၶဝ် တႅၵ်ႇၵၼ်တႄႉဢမ်ႇၸႂ်ႈ၊ ၶႃႈၵူဝ်ပီႈဢၢႆႈ မီးၸႂ်သုင်သေ ဢမ်ႇၶႂ်ႈႁၼ်ၵူၼ်းၽဝတႅမ်ႇ ၸိူင်ႉၼင်ႇဢၢႆႈၼွင်ႉၼႆဢေႃႈ ... ပီႈဢၢႆႈႁႂ်ႈမီးထၢတ်ႈၸႂ် ၽဵင်ႇသေၵမ်းၼႆ ၶႃၼွင်ႉယွၼ်းသူးပၼ်ယူႇ ...
ၶႅပ်းသၢႆၶေႃးၶမ်းၼၼ်ႉတႄႉ ပဵၼ်ၶႅပ်းသၢႆၶေႃး ဢၼ်ပေႃႈႁဝ်း တႅမ်ႈၸိုဝ်ႈသေ ႁွႆႈပၼ်ႁႃးပီႈၼွင်ႉ ၸဵမ်လဵၵ်ႉၼႆယဝ်ႉ ... ၵွပ်ႈၼႆ ၶႅပ်းသၢႆၶေႃးၶႃႈၼၼ်ႉ တႅမ်ႈလိၵ်ႈၵိုၵ်းဝႆႉ - “ ၸၢႆးၼွင်ႉ ” ၼႆယူႇ ... ငိုၼ်းမႄႈလဵင်ႉ ႁဝ်းဢၼ်ႁၢႆၼၼ်ႉၵေႃႈ ၶႃႈၼွင်ႉဢမ်ႇလႆႈဢဝ်ၶႃႈ ... ၵူၺ်းၵႃႈ ပီႈဢၢႆႈ သမ်ႉၼေးၶႃႈလၵ်ႉၼႆသေ မႃးႁႅမ်ၶႃႈလႄႈ ၶႃႈၵေႃႈ ၸင်ႇၸႂ်လမ်သေ ၶိုၼ်းလႆႈတွပ်ႇတႅၼ်း ပီႈဢၢႆႈယဝ်ႉ ... ၵွပ်ႈၼႆ သင်ဝႃႈၼွင်ႉၸၢႆး မီးတၢင်းၽိတ်းၼႆ ဝၢင်းၶႂၢင်းပၼ်ၼွင်ႉၸၢႆးသေၵမ်း ... တမ်ႈတီႈမႄႈလဵင်ႉ ဢၼ် ၼွင်ႉၸၢႆး လႆႈၶိုၼ်းတွပ်ႇထဵင်သဵင်ႁႅင်းၸိူဝ်းၼၼ်ႉ ၼွင်ႉၸၢႆးၼႅင်ၸႂ်ၶိုၼ်းယူႇ ဢေႃႈ ... ...
ၵူၺ်းၵႃႈ ... ဢၼ်ပူၼ်ႉမႃးၸိူဝ်းၼၼ်ႉ ပေႃးတေဝူၼ်ႉတိၵ်းတိၵ်းၼႆ တေၸၢင်ႈၶမ်ၸႂ်ၵူၺ်းဢေႃႈ ... ပေႃးဝႃႈ ဢဝ်လွင်ႈဝၢင်းၶႂၢင်ႉပူတ်းပွႆႇပၼ်ၵၼ်ၼႆၸိုင် တေထိုင်ၶိုၼ်း တီႈလီယူႇၼႆ ယုမ်ႇယမ်ယူႇဢေႃႈ ...
ထူင်ၽိူၵ်ႇၽိူၵ်ႇဢွၼ်ႇ ဢၼ်ပၼ်ပီႈဢၢႆႈ မိူဝ်ႈရူတ်ႉရဵၼ်းၸမ်ဢွၵ်ႇၼၼ်ႉ ပဵၼ်ထူင်ပီႈဢၢႆႈ မိူဝ်ႈလဵၵ်ႉဢေႃႈ ... လိူတ်ႈဢၼ်ၼုၵ်းၸပ်း တီႈထူင်ၼၼ်ႉ ပဵၼ်လိူတ်ႈပေႃႈမႄႈ ဢၼ်တိူဝ်ႉမၢၵ်ႇ ၽွင်းမိူဝ်ႈပဵၼ်ပွႆးတိုၵ်း တီႈဝၢၼ်ႈႁဝ်း ၼႃးၶေႃၼၼ်ႉသေ တၢႆၽၢတ်ႇႁႃးပီႈၼွင်ႉၵႂႃႇၼၼ်ႉယဝ်ႉ ...
ၽွင်းမိူဝ်ႈ ပွႆးတိုၵ်းတိုၵ်ႉပဵၼ်ယူႇၼၼ်ႉ ပီႈဢၢႆႈၵေႃႈ ႁၢႆၵႂႃႇလႄႈ ႁႃးပီႈၼွင်ႉၸင်ႇၽၢတ်ႇၵၼ်ယဝ်ႉ ... ဝၢႆးၼၼ်ႉ ၶႃႈၼွင်ႉလႄႈၼၢႆးႁဝ်း ပၢႆႈမႃးယူႇမေႇမဵဝ်ႉသေ လွင်ႈၶိူဝ်းပေႃႈမႄႈႁဝ်း လွင်ႈႁႃးပီႈၼွင်ႉ ပွၵ်ႇၵိၼ်ဢွႆႈသေ ၽႃႉတိူဝ်ႉမိုဝ်းပီႈဢၢႆႈ ... ၸိူဝ်းၼၼ်ႉ ၽိူဝ်ႇၸၢႆးၼွင်ႉယႂ်ႇမႃး ၼၢႆးႁဝ်း ၶိုၼ်းၶႆႈၼႄသဵင်ႈသဵင်ႈလႄႈ ၸင်ႇလႆႈႁူႉမႃးၶႃႈ ယဝ်ႉ ...
ၵွင်ႈဢွၼ်ႇၼၼ်ႉတႄႇ ပဵၼ်ၵွင်ႈ “ ၸၢႆးၼွင်ႉ ” ဢၼ်မႄႈႁဝ်း သိုဝ်ႉမႃးပၼ်ၼၼ်ႉယဝ်ႉ ... သမ်ႉထႅင်ႈ တီႈထူင်ၽိူၵ်ႇၽိူၵ်ႇၼၼ်ႉ မီးၵိုၵ်းပႃးလိူတ်ႈၸၢႆးၼွင်ႉၽွင်ႈယဝ်ႉ ... ၽွင်းမိူဝ်ႈပီႈဢၢႆႈ ဢဝ်ၵွၵ်းၼမ်ႉ ၽၢတ်ႈသိုင်းသႂ်ႇ ႁူဝ်ၶႃႈၼွင်ႉပွင်ႇၼၼ်ႉ ၶႃႈၼွင်ႉ ဢဝ်ထူင်ၼၼ်ႉ ၸဵတ်ႉလိူတ်ႈၶႃႈၼွင်ႉဢေႃႈ ... သင်ပီႈဢၢႆႈဝႃႈ လိူတ်ႈလႄႈထူင်ၼၼ်ႉ ဢမ်ႇမီးမင်ႇၵၺႃႇလီၼႆၸိုင် ဢဝ်ၸုတ်ႇၽႆးပႅတ်ႈၶႃႈလႃႈ ... ၼႂ်းလေႃးၵၼႆႉ ဢၼ်ၶႃႈၼွင်ႉမုင်ႈမွင်း သေပိူၼ်ႈၼၼ်ႉ ဢမ်ႇၸႂ်ႈတၢင်းႁၵ်ႉယိင်းသၢဝ်ၶႃႈ ၵွပ်ႈပိူဝ်ႈ ဢူႈမႄႈၵေႃႈ ဢမ်ႇမီး ပီႈၼွင်ႉၸမ်ၸႂ်ၵေႃႈ ဢမ်ႇမီးယဝ်ႉလႄႈ ၶႃႈၵူၺ်း မုင်ႈမွင်းမဵတ်ႉတႃႇ တၢင်းႁၵ်ႉပီႈဢၢႆႈ လဵဝ်လဵဝ် လိူဝ်သေပိူၼ်ႈဢေႃႈ၊ ၵူၺ်းၵႃႈ ... မီးတၢင်းမုင်ႈမွင်းသေတႃႉ ဢမ်ႇပဵၼ်မႃးလႄႈ ၸင်ႇလႆႈဝႄႈယၢၼ်ပီႈဢၢႆႈၶဝ်ယဝ်ႉ ...
ႁႂ်ႈပီႈဢၢႆႈႁဝ်းၶဝ် ၵတ်းၸိုၼ်ႈယဵၼ်ၸႂ်သေၵမ်း
ၸၢႆးၼွင်ႉ
( ၵေႃႉပဵၼ်ၼွင်ႉဢွၵ်ႇပီႈဢၢႆႈ )
ၸၢႆးၸၢႆး လႆႈလူလိၵ်ႈယဝ်ႉသေ ၵႂႃႇယိပ်းဢဝ်ထူင်ၽိူၵ်ႇၽိူၵ်ႇဢွၼ်ႇၼၼ်ႉ မႃးသႂ်ႇဝႆႉ ၼႂ်းၵႄႈဢူၵ်းမၼ်းယူႇ၊ မၼ်းထူၵ်းတူၺ်း ၵွင်ႈဢွၼ်ႇၸၢႆးၼွင်ႉသေ လုပ်ႈတူၺ်းယူႇ၊ မၼ်းၸူၵ်းဢဝ် ၶႅပ်းၶေႃးၶမ်း ဢၼ်ၸၢႆးၼွင်ႉပၼ်ဝႆႉၼၼ်ႉသေ မႃးလွမ်တူၺ်းလီလီ လႆႈႁၼ်တႅမ်ႈဝႆႉဝႃႈ “ ၸၢႆးၼွင်ႉ ” ၼႆယဝ်ႉ။ မၼ်းၶိုၼ်းဢဝ်ၶႅပ်းၶေႃးၶမ်းမၼ်း ဢၼ်တူၵ်းႁၢႆသေ မႃၵၢပ်ႈမႃးပၼ်ၼၼ်ႉ မႃးလွမ်တူၺ်းတႅမ်ႈဝႆႉ “ၸၢႆးၸၢႆး ” ၼႆယဝ်ႉ မၼ်းၶိုၼ်းလွမ်တူၺ်း ၶႅပ်းႁၢင်ႈၶဝ်ပေႃႈမႄႈလုၵ်ႈၼၼ်ႉ လီလီသေ ၼမ်ႉတႃမၼ်းၸၢႆး ဢိူမ်ႈတဵမ်ႁူၺ်ႇ ယွႆႉတူၵ်းမႃးယူႇယဝ်ႉ။ လွင်ႈဢၼ် မၼ်းဢမ်ႇႁူႉသေ ပႄႉၵိၼ်မႅၼ်ႈ ၼိူဝ်ၸၢႆးၼွင်ႉမႃးၸိူဝ်းၼၼ်ႉ မၼ်းပဵၼ်ဢၼ်ၼႅင်ၸႂ်ၶိုၼ်းတႄႉတႄႉယူႇယဝ်ႉ ။
“ ၸၢႆးၼွင်ႉ ... ဝၢင်းၶႂၢင်းပၼ်ပီႈဢၢႆႈလႄႈ ၸၢႆးၼွင်ႉဢိူၺ်း ... ၵွပ်ႈပိူဝ်ႈ ဢမ်ႇႁူႉဝႃႈ ႁႃးပဵၼ် ပီႈၼွင်ႉၵၼ်လႄႈ လႆႈပႄႉၵိၼ်ၸၢႆးၼွင်ႉမႃးၸိူဝ်းၼၼ်ႉ ပီႈဢၢႆႈ ၼႅင်ၶိုၼ်းတႄႉတႄႉယဝ်ႉ ... ဝၢင်းၶႂၢင်းပၼ်ပီႈဢၢႆႈလႃႈ ... ၸၢႆးၼွင်ႉဢိူၺ် ... ပီႈဢၢႆႈၼႆႉ ပဵၼ်ၵူၼ်းဢမ်ႇႁူႉသင်တႄႉယဝ်ႉ ... ”
ၸၢႆးၸၢႆးၼႅင်ၸႂ်ၶိုၼ်းတႄႉတႄႉသေ ၵၼ်ႈႁႆႈယူႇသိုတ်ႉသိုတ်ႉယဝ်ႉ မၼ်းၸင်ႇတႅပ်းတတ်းၸႂ်မၼ်း လွင်ႈၼိုင်ႈသေ မၼ်းၵႂႃႇၶုပ်ႉဝႆႈ တႅတ်ႇတီႇ မႃႇမီႇဢၼ်မီးၼႂ်းလုၵ်းၶႅၵ်ႇၼၼ်ႉယူႇ ။
မၼ်းၶႆႈၼႄ လွင်ႈလိၵ်ႈၸၢႆးၼွင်ႉပၼ်မႃးၼၼ်ႉသေ -
“ တႅတ်ႇတီႇ မႃႇမီႇ ... ၸၢႆးတေၶႂ်ႈၵႂႃႇႁႃ ၸၢႆးၼွင်ႉ ဢေႃႈ ”
ပႃႈမွၼ်းမႆႈၸႂ်သေ -
“ ၸၢႆး ... ၸၢႆး တေၵႂႃႇႁႃႁဵတ်းသင် ? ၸၢႆးယႃႇပေၽၢတ်ႇမႃႇမီႇၶဝ် ... ”
“ မႃႇမီႇ ... ၶႃႈတေၶႂ်ႈၶိုၼ်းၵႂႃႇႁွင်ႉမၼ်းမႃးဢေႃႈ ... ၸွင်ႇမႃႇမီႇၶဝ် တေၽွမ်ႇၶႃႈႁိုဝ် ? ”
“ ဢဝ်ၵၢင်ၸႂ်ၸၢႆးဝႃႈလႃႈ ... မႃႇမီႇၶဝ် တေဢမ်ႇႁၢမ်ႈတၢပ်ႈသင်ၵူၺ်း ... ၸၢႆး ... ”
ၸၢႆးၸၢႆး ၸင်ႇၼႅတ်ႈႁႅၼ်းၶူဝ်းမၼ်း သႂ်ႇၼႂ်းထူင်သေ တေဢၢင်ႈဢဝ်ၵႃးတီႈႁိူၼ်း ၵႂႃႇၸွမ်းၶႆႈၸၢႆးၼွင်ႉ ၼႆယူႇ။
ၽွင်းၼၼ်ႉ ၸၢႆးသႅင်သိုပ်ႇၽူၼ်းမႃးလႄႈ ၶႃလႆႈဢုပ်ႈၵၼ် -
“ ႁလူဝ် ၸၢႆးၸၢႆး ... ”
“ လၢတ်ႈလႄႈ ... ၸၢႆးသႅင် ... ”
“ ႁႃးသွင်ၵေႃႉၽူၺ်း ဢၢင်ႈၵႂႃႇမေႇမဵဝ်ႉ ၼႆဢိူဝ်ႈ ... ၸၢႆးၸၢႆး ၶႂ်ႈသင်ႇသင် ... ? ”
“ ႁိုဝ် ... တႄႉႁႃႉ ? သၢင်ႇထုၵ်ႇယဝ်ႈပေႃးၼႆ ... ၶႃႈၵေႃႈ ဢၢင်ႈၵႂႃႇၸွမ်းၶႆႈၸၢႆးၼွင်ႉ ၼင်ႇၵဝ်ႇဢိူဝ်ႈ ... ၶႃႈတေဢဝ် ၵႃးတီႈႁိူၼ်းၵႂႃႇၼႆဢိူဝ်ႈ ... ၸွမ်းၵႃးၶႃႈၵႂႃႇလႄႈ ... ပေႃးၼၼ် ၶႃႈတေမႃးႁပ်ႉတီႈလဵဝ်ယဝ်ႈ ... ၼႃ ... ”
“ လီယဝ်ႈ ... ၸၢႆးၸၢႆး ...”
ၸၢႆးၸၢႆးႁေႃႈၵႃး ၵႂႃႇႁွင်ႉႁပ်ႉ ၸၢႆးသႅင်လႄႈၽူၺ်းသေ ၶဝ်ၽၢတ်ႇယၢၼ် ဢွၵ်ႇတႃႈၵုင်ႈမႃးယူႇ ၊ ၶဝ်ဢွၼ်ၵၼ် သင်ႇလႅင်းဝႃႈ - “ႁဝ်းတေၵႂႃႇႁွင်ႉၸၢႆးၼွင်ႉမႃး ” ၼႆလႄႈ လႅင်းၵေႃႈ ၸူမ်းသိူဝ်းသေ ၶိုၼ်းသင်ႇဝႃႈ
“ ႁႂ်ႈပီႈၸၢႆးၼွင်ႉမႃး ၸွမ်းၵမ်းလဵဝ် ၼႃႈ ... ” ၼႆယူႇယဝ်ႉ ။
ၼိူဝ်ၵႃး ၸၢႆးၸၢႆးၵေႃႈ ၸင်ႇၶိုၼ်းၶႆႈၼႄ လွင်ႈဢၼ်မၼ်းလႄႈ ၸၢႆးၼွင်ႉ ပဵၼ်ပီႈၼွင်ႉဢွၵ်ႇဢွၵ်ႇၵၼ်ၼႆႉ ၼႆယူႇ ၊ ၸၢႆးၸၢႆးၵေႃႈ ဝႆႉသတိယႂ်ႇယႂ်ႇသေ ႁေႃႈၵႃးမႃးတင်းဝၼ်းတင်းၶိုၼ်းယူႇ၊ ၵွပ်ႈပိူဝ်ႈၸႂ်ၶႂ်ႈၸဵဝ်းထိုင် တႃႇလႆႈထူပ်းတင်း ၸၢႆးၼွင်ႉၼႃႇယဝ်ႉလႄႈ မၢင်ၵမ်းမၢင်ၵမ်း မၼ်းႁေႃႈၽႂ်းၼႃႇၽႅဝ်လႄႈ ၸၢႆးသႅင် လႆႈပၼ်သတိမၼ်းယူႇ -
“ ၸၢႆးၸၢႆး ... ယႃႇပေပေႃးႁေႃႈၽႂ်းၽႅဝ် ... ”
“ၸႂ်ၶႃႈၼႆႉ ယင်းၶႂ်ႈဝႃႈ ၵႃးထိူင်းၵွၼ်ႇဢေႃႈ ... ၵွပ်ႈဝႃႈ ၶႂ်ႈႁၼ်ၼႃႈၼွင်ႉၸၢႆးၶႃႈၼႃႇၼၼ်ႉယဝ်ႈ ... ”
“ တေႁၼ်ယူႇၵႂႃႈ ... ”
“ ႁိူၼ်းၸၢႆးၼွင်ႉၶဝ် တီႈမေႇမဵဝ်ႉ ၽူၺ်းႁၼ်ယူႇ ... ပေႃးၽႅဝ် မေႇမဵဝ်ႉ ... ၽူၺ်းတေၵႂႃႇသူင်ႇလႆ ... ”