ၶႅၵ်ႇ/တွၼ်ႈသၢမ်သိပ်းသွင်
ၸၢႆးၸၢႆး လိၵ်းတႃမၼ်းၶွၼ်ၼိုင်ႈသေ ဢဝ်ၵွင်ႈလူမ်းမၼ်း ယိူင်းၼူၵ်ႉၸွၵ်ႇဢွၼ်ႇလီလီသေ ယိုဝ်းယူႇၼႂ်းသူၼ်ၶဝ်ယဝ်ႉ။ ၼူၵ်ႉၸွၵ်ႇဢွၼ်ႇ ၸိူဝ်းဢၼ်ၸၢႆးၼွင်ႉ ႁဵတ်းႁိူၼ်းပၼ်ၶဝ်ၼၼ်ႉ ဢွၼ်ၵၼ်ပၢႆႈမႅပ်း တဵတ်ႇယဵၼ်ဝႆႉယူႇ။ ၼူၵ်ႉၸွၵ်ႇဢွၼ်ႇ ၸိူဝ်းဢၼ်ဢမ်ႇဝႆႉသတိၼၼ်ႉတႄႉ လႆႈ ၶၢမ်ႇတၢင်းၸၢႆးၸၢႆး ယိုဝ်းတၢႆပႅတ်ႈယဝ်ႉ။
ၸၢႆးၼွင်ႉ လႆႈႁၼ်ၼင်ႇၼၼ် မၼ်းပဵၼ်ဢၼ်ၸႂ်ဢမ်ႇလီသေတႃႉ မၼ်းဢမ်ႇၸၢင်ႈႁဵတ်းႁိုဝ်ႁၢမ်ႈ ၸၢႆးၸၢႆးၼႆၵေႃႈ မၼ်းႁူႉယူႇ။ ၽွင်းၼၼ်ႉ ၼူၵ်ႉၸွၵ်ႇဢွၼ်ႇ ထႅင်ႈတူဝ်ၼိုင်ႈ မိၼ်မႃးၸပ်း ၼိူဝ်ၵိင်ႇမႆႉဢွၼ်ႇဢၼ်ၼိုင်ႈလႄႈ ၸၢႆးၸၢႆးၼၢဝ်ႉမွင်းၵွင်ႈမၼ်းသေ လိၵ်းတႃယိူင်းၸူး ၼူၵ်ႉဢွၼ်ႇတူဝ်ၼၼ်ႉယူႇ။ ၼူၵ်ႉၸွၵ်ႇဢွၼ်ႇတူဝ်ၼၼ်ႉ ဢမ်ႇႁၼ် ၽူႈၶဵၼ်မၼ်းလႄႈ မၼ်းႁွင်ႉ “ ၸိပ်ႉ ... ၸိပ်ႉ ... ” ၼႆသေ ႁႃတႆးၵေႃႉမၼ်းယူႇ ... ၽွင်းမိူဝ်ႈ ၸၢႆးၸၢႆး ဢၢင်ႈငၢဝ်ႉၼဵၼ်ၵွင်ႈမၼ်းၼၼ်ႉ ၸၢႆးၼွင်ႉ သမ်ႉၵူဝ်ၼူၵ်ႉၸွၵ်ႇဢွၼ်ႇ လႆႈၶၢမ်တၢင်းတၢႆလၢႆလၢႆလႄႈ မၼ်းၸင်ႇဢဝ်ၶွၼ်ႉလႅမ်ႈၼိုင်ႈသေ ပေႃႉၽတ်ႉသႂ်ႇ ၽၢင်လဵၵ်းယွၵ်း ဢၼ်ၼိုင်ႈ ႁႅင်းႁႅင်းယဝ်ႉ။
ပၢင်ႉ ... ပၢင်ႉ ... ...
ၼူၵ်ႉၸွၵ်ႇဢွၼ်ႇငိၼ်းသဵင် ပေႃႉၽၢင်လဵၵ်းယဝ်ႉ ၼႅတ်ႈမိၼ်ပၢႆႈၽႂ်းၽႂ်းလႄႈ ၸၢႆးၸၢႆး ဢမ်ႇတၼ်းလႆႈယိုဝ်းသေ ၸႂ်လမ်ၵႂႃႇယဝ်ႉ။
“ တွၵ်ႉ ! ... ”
ၸၢႆးၸၢႆးၶတ်းပၢၵ်ႇမၼ်းသေ မႅၵ်ႇၵွင်ႈၵႂႃႇၸူး ၸၢႆးၼွင်ႉယဝ်ႉ -
“ ဢၢႆႈၼွင်ႉ ... မႂ်းတင်ႈၸႂ်ပေႃႉၽၢင်လဵၵ်း ႁဵတ်းသင် ? ”
“ ၵွပ်ႈပိူဝ်ႈ လိၼ်ၸပ်းဝႆႉလႄႈ ၶႃႈပေႃႉ ႁႂ်ႈလိၼ်တူၵ်းဢေႃႈ ”
“ မႂ်းတင်ႈၸႂ်ပေႃႉဢမ်ႇၸႂ်ႈႁႃႉ ? ၵွပ်ႈသင်မႂ်းပေႃႉ ? လၢတ်ႈလူး”
“ ၵွပ်ႈပိူဝ်ႈ ၵူဝ်ၼူၵ်ႉၸွၵ်ႇဢွၼ်ႇ ဢၼ်ဢမ်ႇမီးတၢင်းၽိတ်းသင်ၼၼ်ႉ လႆႈတၢႆလၢႆလၢႆဢေႃႈ ... ”
“ႁိူဝ်ႉ ! ... ၼူၵ်ႉၸွၵ်ႇၼႆႉ သဵင်ၶဝ်သုၵ်ႉႁူသုၵ်ႉတႃၼႃႇဢိူဝ်ႈမႂ်း ၶဝ်ၵေႃႈ ဢမ်ႇႁဵတ်း ၽွၼ်းလီသင် ပၼ်ၵူၼ်းႁဝ်း ... ”
“ ပီႈၸၢႆးသမ်ႉယိုဝ်း ၶဝ်ႁဵတ်းသင်ၶႃႈလႃႇ ? ”
“ ၸမ်းမိုဝ်းမႅၼ်ႈဢိူဝ်ႈ ”
“ ပေႃးပီႈၸၢႆး ... ၶႂ်ႈၸၢမ်းမိုဝ်းမႅၼ်ႈၼႆ ... ၶႃႈတေႁဵတ်းပၼ် တီႈၸၢမ်းမိုဝ်းမႅၼ်ႈလႆ ပီႈၸၢႆး ယႃႇပေယိုဝ်းၼူၵ်ႉၸွၵ်ႇၸိူဝ်းၼႆႉၶႃႈၼႃႈ ”
“ ပေႃးယိုဝ်း သမ်ႉပဵၼ်သင်လႃႇ ... ? ”
“ ဢေႃႈ ... ပီႈၸၢႆး တေပဵၼ်မေႃယႃၵေႃႉၼိုင်ႈ ဢမ်ႇၸႂ်ႈႁႃႉ? ၶႃႈလႆႈငိၼ်းပိူၼ်ႈဝႃႈတႄႉ မေႃယႃ ဢၼ်ဝႃႈၼႆႉ လူဝ်ႇလႆႈမီး ၸႂ်ဢီးလူၼိူဝ်ပိူၼ်ႈ ၼႆၶႃႈၼႃႇ ... ”
“ ဢေႃ ... မႂ်းပဵၼ်ၵူၼ်းတၢင်ၼႃႈ ၽၢႆႇၼူၵ်ႉၸွၵ်ႇဢိူဝ်ႈၼေႃႈ?”
“ ၸိူင်ႉၼၼ်ၵေႃႈ ... ဢမ်ႇၸႂ်ႈၼင်ႇၵဝ်ႇ ...ၼူၵ်ႉၸွၵ်ႇဢွၼ်ႇၸိူဝ်းၼႆႉ ... ၶဝ်လႄႇႁႃသၵ်းၵိၼ်မူင်ႈမႅင်း ... ဢၼ်မေႃယႃႉတူၼ်ႈမွၵ်ႇၼၼ်ႉဢေႃႈ ... ၵွပ်ႈၼႆ ဢမ်ႇလီယိုဝ်းၶဝ်ၼႆဢေႃႈ ... ”
ၸၢႆးၸၢႆး ဢမ်ႇထဵင်ပေႉလႆႈ ၸၢႆးၼွင်ႉလႄႈ မၼ်းဢဝ်ၵွင်ႈလူမ်းမၼ်း ယိုဝ်းၶိုၼ်ႈၽႃႉၵမ်းၼိုင်ႈသေ ၶဝ်ႈမိူဝ်း ၼႂ်းႁိူၼ်းယဝ်ႉ။
ထႅင်ႈသွင်သၢမ်ဝၼ်းမႃး ၸၢႆးၼွင်ႉ ၶိုၼ်းႁဵတ်းပၼ် တီႈၸၢမ်းမႅၼ်ႈၶႅမ်ႉၶႅမ်ႉ ပုၼ်ႈတႃ ၸၢႆးၸၢႆးယဝ်ႉ ... ။ ၽွင်းမိူဝ်ႈမၼ်းႁဵတ်းယဝ်ႉၼၼ်ႉ ၸၢႆးသႅင် ၽူၺ်းလႄႈလႅင်း မႃးဢႅဝ် တီႈၸၢႆးၼွင်ႉၶဝ်ယဝ်ႉ။ ၶဝ်ပီႈၼွင်ႉသၢမ်ၵေႃႉ ၽႅဝ်မႃးတီႈႁိူၼ်း ၸၢႆးၸၢႆးၶဝ်သေ မႃးဢုပ်ႇၵၼ်ၼႂ်းႁိူၼ်းယူႇ ...၊ လႅင်းတႄႉ ဢွၵ်ႇမႃးႁႃ ၸၢႆးၼွင်ႉၼႂ်းသူၼ်၊ မႃးႁၼ်ၸၢႆးၼွင်ႉ တိုၵ်ႉသိမ်းၶိူင်ႈၶူဝ်းမၼ်းယူႇ -
“ ပီႈၸၢႆးၼွင်ႉ ... ”
“ ဢေႃး ... လႅင်း ... လႅင်းမႃးၸွမ်းၽႂ် ? ”
“ မႃးၸွမ်း ပီႈၸၢႆးသႅင်လႄႈ ပီႈၽူၺ်းဢေႃႈ ... ပီႈၸၢႆးၼွင်ႉႁဵတ်းသင်ၶႃႈၼႆႉ ... ? ”
“ ဢေႃ ... ႁဵတ်းမၢႆတီႈယိုဝ်းၵွင်ႈလူမ်းပၼ် ပီႈၸၢႆးဢိူဝ်ႈ ... ပေႃးယိုဝ်းၸပ်းမႅၼ်ႈ ၼႂ်းၵၢင်မၼ်းၼႆ ပဵၼ်ၵူၼ်းမိုဝ်းမႅၼ်ႈယဝ်ႉ ... လႅင်းၶႂ်ႈယိုဝ်းတူၺ်းႁႃႉ ? ၵႂႃႇယွၼ်းၵွင်ႈလူမ်း တီႈပီႈၸၢႆးမႃးလႄႈ ... ”
လႅင်းၵေႃႈ ၶိုၼ်းၶဝ်ႈမိူဝ်းၼႂ်းႁိူၼ်းသေ မိူဝ်းတုၵ်းမႆႈ ၸၢႆးၸၢႆး ႁႂ်ႈမႃးၸၢမ်းမိုဝ်းမႅၼ်ႈၼႆလႄႈ ၶဝ်ဢွၼ်ၵၼ် ၽႅဝ်မႃး တီႈၸၢမ်းမိုဝ်းမႅၼ်ႈၼၼ်ႉသေ မႃးၸၢမ်းမႅၼ်ႈတူၺ်း ၵူႈၵေႃႉယူႇယဝ်ႉ။
ၽွင်းၶဝ်ၸၢမ်းမႅၼ်ႈၼၼ်ႉ ၸၢႆးၼွင်ႉတႄႉ ပဵၼ်ၵူၼ်းယူႇႁိမ်း ၽၢင်ၸၢမ်းမႅၼ်ႈၼၼ်ႉသေ တူၺ်းပၼ် ၽႂ်ယိုဝ်းၺႃး တီႈလႂ်လႆႈလၢႆမၢတ်ႈၼႆယူႇ။ ပေႃးပဵၼ်ၼႆ ၼႂ်းၸႂ်ၸၢႆးၸၢႆး ဢၢပ်ႈယိၼ်းမူၼ်ႈသိူဝ်းမႃးယူႇ မၼ်းလွမ်ဝူၼ်ႉဝႃႈ -
“ ဢိုဝ်း ... ဢၢႆႈၼွင်ႉၼႆႉ မၼ်းဢမ်ႇၶႂ်ႈႁႂ်ႈၵဝ်ယိုဝ်း ၼူၵ်ႉၸွၵ်ႇၵႂႃႈလီယူႇလႆ ... ”
ဝၼ်းၼၼ်ႉ ၶဝ်ဢွၼ်ၵၼ်ၸၢမ်းတူၺ်း မိုဝ်းမႅၼ်ႈသေ ၵျေႃႇမူၼ်ႈၵူႈၵေႃႉယူႇယဝ်ႉ။
ၼူၵ်ႉၸွၵ်ႇဢွၼ်ႇၶဝ်ၵေႃႈ လႆႈႁၼ်သိူဝ်းမိၼ်သူၼ်ႈသိၼ်းသၢၼ်ယူႇ လွတ်ႈလွတ်ႈလႅဝ်းလႅဝ်းယဝ်ႈ ။