ၶႅၵ်ႇ/တွၼ်ႈသၢမ်သိပ်းသီႇ
ယွၼ်ႉပိူဝ်ႈ ၸၢႆးၸၢႆးႁေႃႈၵႃးၽႂ်းၽႅဝ်ႁိုဝ်ၵေႃႈဢမ်ႇႁူႉ ၶဝ်ပေႃးတၼ်းၽႅဝ် မေႇမဵဝ်ႉ ( ႁူဝ်ပၢင်ႇ ) သေ ၸၢႆးၸၢႆးႁေႃႈၵႃး လတ်းၶၢမ်ႈပူၼ်ႉ လေႃႉမႃႉလမ်းၼိုင်ႈယူႇၼၼ်ႉ ၽူၺ်းၸင်ႇငွၵ်ႈႁူဝ် လွမ်တူၺ်းလေႃႉမႃႉၼၼ်ႉယူဝ်ဝႃႈ တေပဵၼ်ၸၢႆးၼွင်ႉႁေႃႈၼႆယူႇ ၸၢႆးသႅင်ၸင်ႇထၢမ်ဝႃႈ-
“ၽူၺ်း ... ငွၵ်ႈတူၺ်းသင် ... ? ”
“ ဢေႃႈ... ၽူၺ်းယူဝ်ဝႃႈ ဢၼ်ႁေႃႈလေႃႉမႃႉၼၼ်ႉ ပဵၼ်ၸၢႆးၼွင်ႉႁိုဝ် ... ၼႆဢေႃႈ ... ”
“ ၸွင်ႇၸႂ်ႈႁိုဝ် ? ”
“ ႁိုဝ်ႉ ဢိုဝ်း ... ဢမ်ႇၸႂ်ႈ ... ပဵၼ်ၵလႃးၵၢင်းၶူၼ်လူင် ...”
ၶဝ်သၢမ်ၵေႃႉ ဢွၼ်ၵၼ်ၶူဝ်ယူႇ ၽူၺ်းၸင်ႇၶိုၼ်းဝႃႈ -
“ မိူဝ်ႈ ၽူၺ်းတႄႇမိုတ်ႈၸၢႆးၼွင်ႉၼၼ်ႉ ... မၼ်းပဵၼ်ၵူၼ်းႁေႃႈလေႃႉမႃႉသေ ၽူၺ်းၶဝ်သမ်ႉ လႆႈၶၢတ်ႈယိမ်လေႃႉမႃႉမၼ်းၵႂႃႇဢႅဝ် ၼမ်ႉတူၵ်းတၢတ်ႇ ဢိူဝ်ႈ ... ”
ၸၢႆးၸၢႆးၵေႃႈ ၸင်ႇဝႃႈ -
“ ပွၵ်ႈၼႆႉၵေႃႈ ... လူဝ်ႇယိမ်လေႃႉမႃႉမၼ်းထႅင်ႈယူႇယူဝ်ႉၼေႃ ၽူၺ်း ...... ”
“ ၶီႇလေႃႉမႃႉ မေႇမဵဝ်ႉၼႆႉ ... လီၵျေႃႇဢေႃႈ ... ၸၢႆးၸၢႆး ”
ၸၢႆးၸၢႆးသိုပ်ႇႁေႃႈၵႃး ပူၼ်ႉဢွၵ်ႇဝဵင်းမႃးသေ ၽွင်းမိူဝ်ႈ ၸမ်တေၽႅဝ်ထိုင် တီႈဝၢၼ်ႈယင်ႇငႄႈၼၼ်ႉ ဢဝ်ၸၢၵ်ႈၵႃးၶဝ် ၵိုတ်းၵႂႃႇယဝ်ႉ။ ၸၢႆးသႅင်လႄႈ ၸၢႆးၸၢႆးဢွၼ်ၵၼ် မႄးတူၺ်းၵေႃႈ ဢမ်ႇပဵၼ်တူဝ် ၊ ၸၢႆးၸၢႆး ၶႂ်ႈႁၼ်ၸၢႆးၼွင်ႉၼႃႇယဝ်ႉလႄႈ မၼ်းၸင်ႇထၢမ် -
“ ၽူၺ်း ...တီႈယူႇၸၢႆးၼွင်ႉၶဝ် တိုၵ်ႉၵႆယူႇႁႃႉ ... ? ”
“ဢမ်ႇပေႃးၵႆယဝ်ႈ ၸၢႆးၸၢႆး ... ပေႃးပႆၵႂႃႇၼႆလႆႈယူႇ ... ”
ၸၢႆးသႅင်ၵေႃႈ ၸင်ႇဝႃႈ -
“ပေႃးၼႆၵေႃႈ ... ၽူၺ်း ၵႂႃႇၸွမ်းၸၢႆးၸၢႆးလႄႈ မၼ်းၶႂ်ႈႁၼ် ၼွင်ႉၸၢႆးမၼ်းၼႃႇယဝ်ႉဢိူဝ်ႈၼၼ်ႉ ... ... ပီႈၸၢႆးသႅင် ၵေႃႉတေပႂ်ႉၵႃးသေ တေမႄးဝႆႉလႆ ... ၼႃႈ ... ”
“ ၸၢႆးၸၢႆး ... ၵႂႃႇႁဝ်း ... ပေႃးၼႆ ... ”
ၽူၺ်း ဢွၼ်ၸၢႆးၸၢႆးပႆမႃး ၼႂ်းဝၢၼ်ႈသေ မႃးၸူးတီႈႁိူၼ်း ၼၢႆးဢွၼ်ႇၸၢႆးၼွင်ႉၶဝ်ယဝ်ႈ -
“ ၸၢႆးၸၢႆး ... ၼႆႉပဵၼ်ႁိူၼ်းၸၢႆးၼွင်ႉၶဝ်ယဝ်ႈ ... ”
ၸၢႆးၸၢႆး ၵႂႃႇတီႈႁိမ်းၵိူၼ်ႇတူၼၼ်ႉသေ -
“ ၸၢႆးၼွင်ႉ ... ႁိူၺ်း ... ၸၢႆးၼွင်ႉ ... ”
ဢမ်ႇႁၼ်ၽႂ်ဢွၵ်ႇမႃးလႄႈ ၽူၺ်းၵေႃႈ ၸင်ႇႁွင်ႉထႅင်ႈယဝ်ႈ -
“ ၸၢႆးၼွင်ႉ ... ၸၢႆးၼွင်ႉ ...... ”
ၼၢႆးဢွၼ်ႇၸၢႆးၼွင်ႉၶဝ် ဢွၵ်ႇမႃးသေ မႃးလၢတ်ႈဝႃႈ -
“ ၸၢႆးၼွင်ႉ တိုၵ်ႉၵႂႃႇတဵၵ်းၼမ်ႉ ၽၢႆႇတူၵ်းပုၼ်ႉဢိူဝ်ႈ ... မႃးပႂ်ႉၼိူဝ်ႁိူၼ်းၼႆႉၵွၼ်ႇလႄႈ ၼၢႆး...... ”
“ လီၶႃႈယဝ်ႈ ... ၶႃႈၶဝ် တေၸွမ်းၵႂႃႇ တႃႈၼမ်ႉဢေႃႈ ... ”
ၸၢႆးၸၢႆးလႄႈၽူၺ်း ပႆမႃးၸွမ်း တၢင်းၵႂႃႇတႃႈၼမ်ႉၼၼ်ႉယူႇ ၶႃသွင်ၵေႃႉ လႆႈႁၼ်ၸၢႆးၼွင်ႉ ႁၢပ်ႇၼမ်ႉမႃးလႄႈ ၶႃၸင်ႇႁွင်ႉၸိုဝ်ႈၸၢႆးၼွင်ႉ မိူၼ်ၵၼ် ယဝ်ႈ -
“ ၸၢႆးၼွင်ႉ ... ”
“ ၸၢႆးၼွင်ႉ ... ”
ၸၢႆးၼွင်ႉၵေႃႈ လွမ်ဝၢႆႇတူၺ်း ၶႃသွင်ၵေႃႉလီလီသေ မၼ်းပဵၼ် ဢၼ်ဢၢမ်းဢေႃးလူင်လၢင်ၵႂႃႇ တႄႉတႄႉသေ -
“ ပီႈ ပီႈဢၢႆႈ ... ၽူၺ်း ... ... ”
“ ၼွင်ႉၸၢႆး ... ”
“ ၸၢႆးၼွင်ႉ ... ... ”
လႆႈႁၼ် ၸၢႆးၸၢႆးဢႅၼ်ႇၵႂႃႇၸူး ၸၢႆးၼွင်ႉယူႇလႄႈ ၸၢႆးၼွင်ႉၵေႃႈ တမ်းႁၢပ်ႇၼမ်ႉမၼ်းသေ ဢႅၼ်ႇမႃးၸူး ၸၢႆးၸၢႆးယဝ်ႉ -
“ ၸၢႆးၼွင်ႉ ... ၼွင်ႉၸၢႆး ... ”
“ ၸၢႆးၸၢႆး ... ပီႈဢၢႆႈ ... ”
ၶႃသွင်ၵေႃႉပီႈၼွင်ႉ ဢႅၼ်ႇမႃးၵွတ်ႇၵၼ်ဝႆႉႁႅင်းႁႅင်းယူႇ -
“ ပီႈဢၢႆႈမႃးၸူးၼွင်ႉၸၢႆးႁႃႉ ... ? ”
“ ၸႂ်ႈဢိူဝ်ႈ ... ပီႈဢၢႆႈဢၢၼ်းၶိုၼ်းမႃးႁွင်ႉ ၼွင်ႉၸၢႆးဢိူဝ်ႈၼႆႉ”
ၽူၺ်းလႆႈႁၼ် ၶႃသွင်ၵေႃႉပီႈၼွင်ႉ ၸူမ်းသိူဝ်းၼင်ႇၼၼ် မၼ်းၵေႃႈ ၽႅဝ်မႃးႁိမ်းၶႃသွင်ၵေႃႉသေ မႃးၸူမ်းၸွမ်းယူႇ ၸၢႆးၸၢႆးၸင်ႇဝႃႈ -
“ ၸၢႆးၼွင်ႉ ... ၽူၺ်းၵေႃႈ မႃးၸွမ်းဢိူဝ်ႈ ... ”
“ ၽူၺ်း ... ၽူၺ်း မႃးၸွမ်းသူင်ႇ ၸၢႆးၸၢႆးႁႃႉ ... ? ”
“ ၸႂ်ႈဢိူဝ်ႈ ... ၸၢႆးၼွင်ႉ ... ”
“ ၸၢႆးၼွင်ႉ ... ယႃႇပေထၢင်ႇၽိတ်းပီႈဢၢႆႈၼႃႈ ... ဢၼ်ပီႈဢၢႆႈ လႆႈပႄႉၵိၼ်ၸၢႆးၼွင်ႉၼၼ်ႉ ပီႈဢၢႆႈ တေၶိုၼ်းသၢႆႈတႅၼ်းပၼ်မူတ်းမူတ်းယူႇ ၸၢႆးၼွင်ႉ ... ပၼ်တၢင်းၽိတ်းသင်ၵေႃႈ ပီႈဢၢႆႈတေၶၢမ်ႇဢဝ်ယူႇ ... ”
“ ၸၢႆးၼွင်ႉ ... တိုၼ်းဝၢင်းၶႂၢင်းပၼ်ယူႇ ပီႈဢၢႆႈ ”
“ မိူဝ်းၼႃႈမႃး ... ပီႈဢၢႆႈတေဢမ်ႇသၢၼ်ၶတ်းၸၢႆးၼွင်ႉ ဢမ်ႇၶႅၼ်ႇၸၢႆးၼွင်ႉသင်ယဝ်ႉၼႃႈ ... ၵွပ်ႈၼႆ တီႈၼိူဝ်ၽူၺ်းၵေႃႈ ပီႈဢၢႆႈဢမ်ႇၶႅၼ်ယဝ်ႉ ပီႈဢၢႆႈတေၽွမ်ႉ ဢဝ် ၽူၺ်းပဵၼ်ၼွင်ႉပႂ်ႉပီႈယူႇ ... ”
ၽူၺ်းလီဢၢႆၵႂႃႇသေ -
“ ဢူဝ် ! ... ... ”
“ ယႃႇပေဢၢႆၽူၺ်း ...”
ၸၢႆးၸၢႆးယိပ်းဢဝ်မိုဝ်းၽူၺ်း သႂ်ႇပၼ်ၼႂ်းမိုဝ်းၸၢႆးၼွင်ႉသေ မၼ်းၵႂႃႇႁၢပ်ႇဢဝ်ပုင်းၼမ်ႉ ၸၢႆးၼွင်ႉၼၼ်ႉ မႃးယူႇယဝ်ႉ ၊ ၸၢႆးၼွင်ႉလႄႈၽူၺ်း ယုမ်ႉတူၺ်း ၸၢႆးၸၢႆး ဢၼ်ဢမ်ႇယၢမ်ႈႁၢပ်ႇၼမ်ႉသေပွၵ်ႈၼၼ်ႉယူႇ၊ ဝၢႆးသေ ၸၢႆးၸၢႆးပူၼ်ႉၵႂႃႇ ၸၢႆးၼွင်ႉ ယိပ်းဝႆႉမိုဝ်းၽူၺ်းၵႅၼ်ႇၵႅၼ်ႇသေ -
“ ၽူၺ်း ...”
“ ၸၢႆးၼွင်ႉ ... ”
ၽူၺ်းမူၼ်ႉၶဝ်ႈယူႇ ၼႂ်းၵႄႈဢူၵ်းၸၢႆးၼွင်ႉသေ ၵွတ်ႇဝႆႉၸၢႆးၼွင်ႉ ႁႅင်းႁႅင်းယူႇ -
“ ၽူၺ်း ... ”
“ ၸၢႆးၼွင်ႉ ... ၶိုၼ်းမိူဝ်းၸွမ်းၽူၺ်း ၼေႃႈ ...”
“ ၽူၺ်း ... ”
“ပေႃးၸၢႆးၼွင်ႉမိူဝ်းယူႇတႃႈၵုင်ႈ ၸွင်ႇၽူၺ်းတေႁပ်ႉတွၼ်ႈ တႃႇသေႇႁိုဝ် ? ”
“ ႁပ်ႉတွၼ်ႈတႃႇသေႇယဝ်ႈ ...”
“ပေႃးယူႇၼႂ်းၵႄႈဢူၵ်းၽူၺ်း တႃႇသေႇလူး ... ”
ၽူၺ်းလီဢၢႆၵႂႃႇတႄႉတႄႉသေ -
“ ဢူဝ် ! ... ၸၢႆးၼွင်ႉၼႆႉၵေႃႈ ...”
ၽူၺ်းယူႇၼႂ်းၵႄႈဢူၵ်းၸၢႆးၼွင်ႉသေ လွမ်တူၺ်းၸွမ်းႁိမ်းႁွမ်း ပဵၼ်ဢၼ်ႁၢင်ႈလီ ၵူႈဢၼ်လႄႈ မၼ်းၼၢင်းပဵၼ်ဢၼ်သိူဝ်းၸႂ်တႄႉတႄႉ-
တိတ်း ... တိတ်း ... ...
ငိၼ်းသဵင်ႁွၼ်းၵႃးလႄႈ ၽူၺ်းတူၵ်းၸႂ်တိုၼ်ႇသေ ၼႅတ်ႈမိုၼ်းတႃတူၺ်း ၼႂ်းၵႃးယူႇ ၊ ႁၼ်မၼ်းၼၢင်း ၼွၼ်းတိုၼ်ႇမႃးလႄႈ ၸၢႆးသႅင် ၸင်ႇထၢမ် -
“ ၽူၺ်းတိုၼ်ႇယဝ်ႉ ႁႃႉ ? ”
“ ဢေႃႈ ... ”
ၽူၺ်းၸၼ်သိၵ်ႇဢဝ် ၽႅၼ်ႇၸဵတ်ႉလၢင်ႉၼႃႈ မႃးၸဵတ်ႉၼႃႈမၼ်းၼၢင်းယဝ်ႉသေ မုင်ႈႁႅၼ်တူၺ်း ၼႃႈၽႃႉ မိူင်းၸမ်တေလႅင်း ဝုၺ်းဝၢႆးယူႇယဝ်ႉၼၼ်ႉသေ ထၢမ် -
“ ၽႅဝ်တီႈလႂ်ယဝ်ႉ ? ၸၢႆးၸၢႆး ... ? ”
“ပူၼ်ႉၽၢႆႁိၼ်ၵျွၵ်ႉသႄႇသေ ၸမ်တေထိုင်ဝဵင်းလိူဝ်ႇယဝ်ႉ ”
ပေႃႈမိူင်းလႅင်းၵေႃႈ ၶဝ်ၽႅဝ်မႃး ဝဵင်းလိူဝ်ႇ ၶဝ်ႈဝႄႉၵိၼ်ၶဝ်ႈသွႆးတႆး တီႈသႅင်ႇတႆးသေ ၶိုၼ်းသိုပ်ႇပူၼ်ႉၶိုၼ်ႈမိူဝ်း မေႇမဵဝ်ႉၵမ်းလဵဝ်ယူႇ ၊ ယွၼ်ႉပိူဝ်ႈ ၸၢႆးၸၢႆးႁေႃႈၵႃး တင်းၶိုၼ်းယဝ်ႉလႄႈ ၸၢႆးသႅင် ၶိုၼ်းပုတ်ႈႁေႃႈၵႃးသေ လၢတ်ႈဝႃႈ -
“ ၸၢႆးၸၢႆး ... ၸၢႆးၸၢႆးၶႂ်ႈၼွၼ်းၵေႃႈ ၼွၼ်းလိုဝ်ႈႁိူဝ်ႉလိုဝ်ႈတႃၵွၼ်ႇလႄႈ ... ”
“ ယွၼ်ႉပိူဝ်ႈဝႃႈ ... တေလႆႈၵႂႃႇထူပ်း ၼွင်ႉၸၢႆးၶႃႈလႄႈႁိုဝ်ၵေႃႈ ဢမ်ႇႁူႉယဝ်ႉ ၶႃႈပေႃးဢမ်ႇႁူႉၵူၼ်ႉႁူႉႁိူဝ်ႉသင်ယဝ်ႉ ၼႆႉ ... ”
“ ပဵၼ်လူၺ်ႈထၢတ်ႈၸႂ်ဢိူဝ်ႈၼၼ်ႉ ၸၢႆးၸၢႆး ... ”
“ တေၸႂ်ႈယူႇ ... ၽူၺ်းတွင်းႁိူၼ်းၸၢႆးၼွင်ႉၶဝ်ယူႇၼေႃႈ ”
“ပေႃးၽႅဝ်တီႈဝၢၼ်ႈၼႆတႄႉ တေတွင်းယူႇ ၸၢႆးၸၢႆး ဢမ်ႇဝႃႈထႅင်ႈယဝ်ႉႁႃႉ ? ပဵၼ်ဝၢၼ်ႈၸွၵ်ႉဝၢၼ်ႈထိူၼ်ႇၼႆၼၼ်ႉ ”
“ ဢႃ ... မိူဝ်ႈၼၼ်ႉတႄႉ လႆႈဝႃႈသေတႃႉ မိူဝ်ႈလဵဝ်တႄႉ ဢမ်ႇဝႃႈယဝ်ႉ ... ဢိုဝ်ႈ ... ၸၢႆးၼွင်ႉ ... ၸၢႆးၼွင်ႉ ၵူဝ်မၼ်းၸႂ်လမ်သေ ဢမ်ႇၶိုၼ်းမိူဝ်းၸွမ်းႁဝ်းၵူၺ်းယဝ်ႉ ... ၼေႃ ... ၽူၺ်း ... ”
“ၽူၺ်းၶဝ်တေၸွႆႈလၢတ်ႈပၼ်ယူႇ ယႃႇပေမႆႈၸႂ် ၸၢႆးၸၢႆး ”
“ မိူဝ်ႈယူႇတီႈတႃႈၵုင်ႈၼၼ်ႉ ... ၸၢႆးၸၢႆးပႄႉၵိၼ်မၼ်းတႄႉတႄႉဢိူဝ်ႈ ... တီႈလဵဝ် တႃႉလီဢီးလူ ဢၼ်မၼ်းလႆႈၶၢမ်ႇၵၼ်ႈမႃးၼၼ်ႉတႄႉတႄႉ ... လွင်ႈဝႃႈ မၼ်းၶႂ်ႈမႃးႁႃ ပီႈဢၢႆႈမၼ်းၼႆ ၸၢႆးၸၢႆးဢမ်ႇႁူႉလႄႇ ဢိူဝ်ႈ ... ”
ၽူၺ်းၵေႃႈ ၸင်ႇသိုပ်ႇဝႃႈ -
“လွင်ႈဢၼ် မၼ်းလေႇႁႃထၢမ်ၶိူဝ်းၼိဝ်ႉၸီႉၽၢႆႇသၢႆႉ မီးႁွႆးၽႃႉတိူဝ်ႉၼၼ်ႉၼႆ ယူဝ်ၶႄးတေပဵၼ် မၼ်းႁႃၸၢႆးၸၢႆး ၵေႃႉတေပဵၼ်ပီႈဢၢႆႈမၼ်းယူဝ်ႉ ? ၼေႃ ... ”
ၸၢႆးသႅင်ၵေႃႈ ၸင်ႇဝႃႈ -
“ ဢိုဝ်ႈ ! ... ၶႄးၸႂ်ႈယူႇ ... တီႈပီႈၸၢႆးသႅင်ၵေႃႈ မၼ်းထၢမ်ယူႇဢိူဝ်ႈ ... ”
ၸၢႆးၸၢႆးၵေႃႈ ၶိုၼ်းဝူၼ်ႉႁၼ်မိူဝ်ႈၸၢႆးၼွင်ႉ ဢဝ်တဝ်ႈမွၵ်ႇမၼ်းလႅဝ် ၸၢႆးၸၢႆးထုပ်ႉပၼ် တႃမၼ်းသေတႃႉ မၼ်းၸီႉၼိဝ်ႉၸီႉၽၢႆႇသၢႆႉၸၢႆးၸၢႆးသေ လၢတ်ႈဝႃႈ - “ တီႈ ... တီႈမိုဝ်းပီႈၸၢႆးၼၼ်ႉ ... ... ” ၼႆသေ ဝူၼ်ႉႁၼ်ၶိုၼ်း လွင်ႈၸၢႆးၼွင်ႉႁႃႁွႆးၽႃႉတိူဝ်ႉမိုဝ်းၼၼ်ႉယူႇ။ ၸၢႆးၸၢႆးထူၺ်ႈၸႂ်လူင်သေ ဝူၼ်ႉဝႃႈ တေလႆႈႁဵတ်းႁိုဝ် လၢတ်ႈတေႃႇ ၸၢႆးၼွင်ႉဢွၼ်တၢင်းၼႆယူႇ ။
ၽူၺ်းၵေႃႈ လွမ်လွမ်ဝူၼ်ႉၶိုၼ်း ၸိူင်ႉၼင်ႇ ၼႂ်းၽၼ်မၼ်းၼၢင်းၼၼ်ႉ ၸွင်ႇတေပဵၼ်မႃးလႆႈႁိုဝ် ? သင်ပဵၼ်မႃးတႄႉၼႆ ၸွင်ႇမၼ်းတေလိူဝ်လႆႈတၢင်းႁၵ်ႉၸၢႆးၼွင်ႉ ?
ၶဝ်ဝူၼ်ႉၽႂ်ဝူၼ်ႉမၼ်းသေ သိုပ်ႇႁေႃႈၵႃးမႃးယူႇ ။