ၶႅၵ်ႇ/တွၼ်ႈသၢမ်သိပ်း
ၸၢႆးၼွင်ႉ ပတ်းပတ်းၽဵဝ်ႈၽဵဝ်ႈၼႂ်းသူၼ် တီႈၼိုင်ႈယဝ်ႉ တီႈၼိုင်ႈယူႇ၊ ၽွင်းမိူဝ်ႈ မၼ်းၽႅဝ်မႃး ႁိမ်းတင်ႇဝႆ ၼႂ်းသူၼ်မွၵ်ႇၶဝ်ၼၼ်ႉ မၼ်းလႆႈ မႃးႁၼ် ပီႈဢၢႆႈမၼ်းၸၢႆးၸၢႆး တိုၵ်ႉၼင်ႈၼိူဝ်တင်ႇၽႅၼ်ဝႆၼၼ်ႉသေ တူၺ်းလိၵ်ႈယူႇ။
“ ၸၢႆးၼွင်ႉ ... ”
လႆႈငိၼ်းသဵင်ၸၢႆးၸၢႆး ႁွင်ႉၸိုဝ်ႈမၼ်းဝႃႈ “ ၸၢႆးၼွင်ႉ ... ” ၼႆလႄႈ မၼ်းပဵၼ်ဢၼ်ဢၢမ်းၵႂႃႇတႄႉတႄႉ၊ ဢွၼ်တၢင်းၼႆႉ ၸၢႆးၸၢႆးၵူၺ်း ယၢမ်ႈႁွင်ႉမၼ်းဝႃႈ “ ဢၢႆႈၼွင်ႉ ... ” ၼႆသေႇသေႇၵူၺ်း၊ ပွၵ်ႈၼႆႉ သဵင်လၢတ်ႈ ၸၢႆးၸၢႆးၼႆႉ ဢၢပ်ႈပဵၼ် သဵင်ဢူၼ်ႈမႃးဝႆႉယူႇ၊ ၸၢႆးၼွင်ႉ ၸင်ႇၼႅတ်ႈၵႂႃႇတီႈႁိမ်းၸၢႆးၸၢႆးသေ -
“ ပီႈ ... ပီႈဢၢႆႈ ... ႁွင်ႉၶႃႈႁႃႉ ... ? ”
ၸၢႆးၼွင်ႉၵေႃႈ ၵႂင်သေ ႁွင်ႉၸၢႆးၸၢႆးဝႃႈ “ ပီႈဢၢႆႈ ... ”ၼႆယဝ်ႉ လႆႈငိၼ်းၼင်ႇၼၼ် ၸၢႆးၸၢႆးၵေႃႈ လွမ်တူၺ်း ၼႃႈၸၢႆးၼွင်ႉသေ -
“ မႂ်းႁွင်ႉၵဝ် ဝႃႈႁိုဝ်ၵေႃ ... ? ၸၢႆးၼွင်ႉ ... ”
“ ဢေႃႈ ... ၶႃႈၵႂင်သေ ႁွင်ႉၽိတ်းဝႃႈ ပီႈဢၢႆႈၼႆဢေႃႈ ... ”
ၸၢႆးၸၢႆးၵူမ်ႈႁူဝ်သေ ၶိုၼ်းလၢတ်ႈဝႃႈ -
“ ဢိုဝ်း ! ... သင်ဝႃႈ ၵဝ်မီးၼွင်ႉၼႆၸိုင် ၼွင်ႉၵဝ် တေႁွင်ႉၵဝ်ဝႃႈ “ ပီႈဢၢႆႈ ... ” ၼႆယူႇ ... ၵူၺ်းၵႃႈ ... ၵဝ်သမ်ႉ ပဵၼ်လုၵ်ႈၸၢႆးၵေႃႉလဵဝ်ၵူၺ်းလူး ... မၢင်ပွၵ်ႈမၢင်လႂ် တႃႉၶႂ်ႈမီး ၼွင်ႉယိင်းၼွင်ႉၸၢႆး ၸိူင်ႉၼင်ႇပိူၼ်ႈလႃႈ ... ”
ၸၢႆးၼွင်ႉ တေလႆႈသိုပ်ႇလၢတ်ႈၸွမ်းၸိူင်ႉႁိုဝ်ၼႆ မၼ်းဝူၼ်ႉဢမ်ႇလႆႈ၊ ဢမ်ႇၼၼ် မၼ်းထုၵ်ႇလီလၢတ်ႈလွင်ႈဝႃႈ မၼ်းပဵၼ်ၼွင်ႉၸၢႆးဢွၵ်ႇၸၢႆးၸၢႆးၼႆ ၵမ်းလဵဝ်ယဝ်ႉႁိုဝ် ? ၊ ယူႇၵမ်းၼိုင်ႈ ၸၢႆးၸၢႆးၶိုၼ်းဝႃႈ -
“ ၸၢႆးၼွင်ႉ ... ”
“ ဢေႃႈ ... ”
“ ၵဝ်ၶႂ်ႈၸႂ်ႉမႂ်းမဵဝ်းၼိုင်ႈ ... ၸွင်ႇတေလႆႈႁိုဝ် ... ? ”
“ လႆႈယူႇ ဢေႃႈ ... ”
“ ၸွင်ႇမႂ်းတေဝႆႉၸေႇတၼႃႇလီသေ ႁဵတ်းပၼ်ႁိုဝ် ... ? ”
“ ဝႆႉဢေႃႈ ... ”
“ ပေႃးၼႆၵေႃႈ ... ဝႆပၼ်တင်ႇၼင်ႈ ဢၼ်ၵဝ်ၼင်ႈၼႆႉလႄႈ”
ၸၢႆးၼွင်ႉၵေႃႈ မႃးယူႇၽၢႆႇလင်တင်ႇသေ ဝႆပၼ်လွႆးလွႆးယူႇ၊ ယူႇၵမ်းၼိုင်ႈ ၸၢႆးၸၢႆးၶိုၼ်းဝႃႈ -
“ ၸၢႆးၼွင်ႉ ... ပေႃးလႃႈ ...ၵွင်ႇၵေႃႈၵဝ်ၼၵ်းဢိူဝ်ႈ ... မိပ်ႇပၼ်ဢိတ်းၼိုင်ႈလူး ... ”
ၸၢႆးၼွင်ႉၵေႃႈ ၽၼ်ႉမိပ်ႇပၼ်ၵွင်ႇၵေႃႈ ၸၢႆးၸၢႆးယူႇ ၊ ၸၢႆးၸၢႆးၸင်ႇထၢမ် -
“ ၸၢႆးၼွင်ႉ ... ဢမ်ႇၶုၵ်းၸႂ်လႆႈမိူင်းတႆးႁႃႉ ... ? ”
“ ၶုၵ်းၸႂ်လႆႈၽႅဝ်ဢေႃႈ ... ”
“ ၶုၵ်းၸႂ်လႆႈ ... ၸိူင်ႉႁိုဝ် ... ? ”
“ ဢေႃႈ ... ၶုၵ်းၸႂ်လႆႈ မိူဝ်ႈႁဝ်းလဵၵ်ႉႁဝ်းဢွၼ်ႇသေ ဢဵၼ်ႈၵေႃႉ ၵျေႃႇသိူဝ်းလူၺ်ႈၸွမ်းၵၼ် ၼၼ်ႉဢေႃႈ ... ”
“ ၸၢႆးၼွင်ႉ ...မႂ်းၸွင်ႇၶႂ်ႈၶိုၼ်းမိူဝ်းမိူင်းတႆးယူႇႁႃႉ ... ? ”
“ ပေႃး ယိူင်းဢၢၼ်းၶႃႈတဵမ်ထူၼ်ႈၼႆ တေၶိုၼ်းမိူဝ်းယူႇ ”
“ ၸၢႆးၼွင်ႉ မီးယိူင်းဢၢၼ်းၸိူင်ႉႁိုဝ် ? ဢၢၼ်းပဵၼ်သထေးလူင် ႁႃႉ ... ? ”
“ ဢမ်ႇဢၢၼ်းပဵၼ်သထေးလူင် ၶႃႈ ... ”
“ ယိူင်းဢၢၼ်း မီးၸိူင်ႉႁိုဝ် ? လၢတ်ႈသိုဝ်ႈသိုဝ်ႈလူး ... ”
ၸၢႆးၼွင်ႉၵေႃႈ ၵုမ်ႇဝူၼ်ႉ ၸွင်ႇတေထုၵ်ႇလီလၢတ်ႈ ဢမ်ႇထုၵ်ႇလီလၢတ်ႈ လွင်ႈဢၼ်မၼ်းမႃးႁႃပီႈဢၢႆႈမၼ်းၼၼ်ႉယူႇ ၊ ၸၢႆးၸၢႆး ၸင်ႇၶိုၼ်းထၢမ်ထႅင်ႈဝႃႈ -
“ ၸၢႆးၼွင်ႉ ... ၵုမ်ႇဝူၼ်ႉသင်ယူႇ ... ? လၢတ်ႈလႄႈ ယိူၼ်းဢၢၼ်းမႂ်း မီးၸိူင်ႉႁိုဝ် ? ”
“ယိူင်းဢၢၼ်းၶႃႈၼၼ်ႉ ပေႃးၶႃႈလၢတ်ႈၼႆ ...ပီႈၸၢႆးတေ ၶႂ်ႈၶူဝ်ၶႃႈယူဝ်ႉ ... ”
“ဢမ်ႇၶူဝ်သႄႈ ... လၢတ်ႈၵွၼ်ႇလႄႈ ... ”
“ ဢိုဝ်ႈ ! ... မိူဝ်ႈၶႃႈၵေႃႉလဵၵ်ႉၼၼ်ႉ ၼၢႆးႁဝ်းၶႆႈၼႄၶႃႈဝႃႈ ၶႃႈမီးဝႆႉ ပီႈဢၢႆႈၵေႃႉၼိုင်ႈ ၼႆယဝ်ႉ ... တီႈဝၢၼ်ႈႁဝ်းၼၼ်ႉ ပဵၼ်ပွႆးတိုၵ်းသေ ႁဝ်းပီႈၼွင်ႉ လႆႈၽၢတ်ႇၵၼ်ၵႂႃႇ ၼႆဢေႃႈ ...ပီႈဢၢႆႈၶႃႈၼၼ်ႉ ႁၢႆၵႂႃႇတၢင်းလႂ်ၵေႃႈ ... ဢမ်ႇႁူႉၶႃႈယဝ်ႈ ... ”
ၸၢႆးၸၢႆးၶဝ်ႈၸႂ်သေ ပႂ်ႉထွမ်ႇ ဢၼ်ၸၢႆးၼွင်ႉလၢတ်ႈၼၼ်ႉယူႇ။
“ၵွပ်ႈၼၼ် တႃႇတေၶိုၼ်းႁၼ်ပီႈဢၢႆႈၶႃႈၼၼ်ႉ ... ၶႃႈၸင်ႇလူင်းမႃးတႃႈၵုင်ႈၼႆႉ ၶႃႈယဝ်ႈ ... ”
“ ၸၢႆးၼွင်ႉ တေႁဵတ်းႁိုဝ်ႁႃပီႈဢၢႆႈၸၢႆးၼွင်ႉ ... ? ”
“ ပီႈဢၢႆႈၶႃႈၼၼ်ႉ ... မိူဝ်ႈႁဝ်းၵေႃႉလဵၵ်ႉၼၼ်ႉ ႁဝ်းပွၵ်ႇၵိၼ်ဢွႆႈၸွမ်းၵၼ်ၼႆ ၽႃႉတိူဝ်ႉၺႃး မိုဝ်းၼိဝ်ႉၸီႉမၼ်းလႄႈ ... တီႈမိုဝ်းမၼ်း မီးႁွႆးၽႃႉတိူဝ်ႉဝႆႉဢေႃး ... ပေႃးႁၼ် ႁွႆးဢၢတ်းမိုဝ်းၸဵပ်းမၼ်းၼၼ်ႉၼႆ တေႁူႉဝႃႈ ပဵၼ်ပီႈဢၢႆႈၶႃႈယူႇ ...ၼႆယဝ်ႈ ... ”
“ တႄႉႁႃႉ ... ? ၸၢႆးၼွင်ႉ ... ပေႃးၼႆ မိုဝ်းၼိဝ်ႉၸီႉၵဝ်ၼႆႉ မီးႁွႆးၽႃႉတိူဝ်ႉဝႆႉဢိူဝ်ႈ ... မႂ်း ... ယူဝ်ၶေး ... ၵဝ်ပဵၼ်ပီႈဢၢႆႈမႂ်းႁိုဝ်ၵေႃႈ ဢမ်ႇႁူႉယဝ်ႈ ... ”
ၸၢႆးၼွင်ႉၵေႃႈ လွမ်ယိပ်းတူၺ်း ၼိဝ်ႉၸီႉၸၢႆးၸၢႆးသေ -
“ မိုဝ်းပီႈၸၢႆးၼႆႉ ႁဵတ်းႁိုဝ်တိူဝ်ႉၺႃးၽႃႉလႃႇ... ? ၸွင်ႇတွင်း”
“ ဢိုဝ်ႈ ... ၵဝ်ၶိုၼ်းဝူၼ်ႉတူၺ်းလီလီၼႆ ... ဢၢပ်ႈပဵၼ်ႁႃးပီႈၼွင်ႉ ပွၵ်ႇၵိၼ်ဢွႆႈသေ တိူဝ်ႉၺႃးၼၼ်ႉယဝ်ႈ ... ”
“ ပေႃးၼႆ ... ပီႈၸၢႆးၼႆႉ ၸၢင်ႈပဵၼ်လႆႈ ပီႈဢၢႆႈၶႃႈယူႇယဝ်ႉၼေႃ ... ?”
“ ၸႂ်ႈဢိူဝ်ႈ ... ၸၢႆးၼွင်ႉ ... ”
ၸၢႆးၼွင်ႉ ပဵၼ်ဢၼ်ၸူမ်းသိူဝ်းၵႂႃႇ တႄႉတႄႉဝႃႈဝႃႈသေ ၶႃပီႈၼွင်ႉ ၵွတ်ႇၵၼ်ဝႆႉႁႅင်းႁႅင်းယဝ်ႉ ။
“ ပီႈဢၢႆႈ ... ”
“ ၼွင်ႉၸၢႆး... ”
ၸၢႆးၼွင်ႉႁဵတ်းႁိုဝ်ၸူမ်းသိူဝ်းၵေႃႈ သမ်ႉပေႃးဢမ်ႇႁူႉလႆႈယဝ်ႉ၊ ဢၼ်မၼ်းမုင်ႈမွင်းဝႆႉ မဵတ်ႉတႃႇပီႈဢၢႆႈမၼ်းၼၼ်ႉ မၼ်းႁပ်ႉတုင်းဢဝ်လႆႈယဝ်ႉ ၸၢႆးၸၢႆးၸင်ႇဝႃႈ -
“ ၼေႈ ... ၼွင်ႉၸၢႆး ၸၢႆးၼွင်ႉ ... မိူဝ်ႈဢွၼ်တၢင်း ၵွပ်ႈပိူဝ်ႈဝႃႈ ဢမ်ႇႁူႉဝႃႈ ပဵၼ်ပီႈၼွင်ႉဢွၵ်ႇၵၼ်လႄႈ ... လႆႈပေႉၵိၼ်ႁဵတ်းလႆႈၼိူဝ်ၸၢႆးၼွင်ႉၼၼ်ႉ ႁႂ်ႈဝၢင်းၶႂၢင်းပၼ် ပီႈဢၢႆႈၽွင်ႈၼႃႈ ... ၼွင်ႉၸၢႆး ... ”
“ ပီႈဢၢႆႈ ... ၼွင်ႉၸၢႆးဢမ်ႇဝႆႉၸႂ်သင်ၶႃႈ ... ၼွင်ႉၸၢႆးဢၢၼ်းလၢတ်ႈ ၸဵမ်မိူဝ်ႈၸဝ်ႉၸဝ်ႉၼၼ်ႉသေတႃႉ ... သၢႆငၢႆဢမ်ႇပၼ်လႄႈ ၸင်ႇဢမ်ႇပဵၼ်လၢတ်ႈမႃးယဝ်ႈ ... ”
“ ပဵၼ်ႁိုဝ်ပဵၼ် ယၢမ်းလဵဝ် ... ႁႃးႁူႉဝႃႈ ပဵၼ်ပီႈၼွင်ႉဢွၵ်ႇၵၼ်ၼႆယဝ်ႉလႄႈ ၸၢႆးၼွင်ႉ ယႃႇပေၵႂႃႇတီႈလႂ်ယဝ်ႉၼႃႈ ... တေလႆႈယူႇၸွမ်းပီႈဢၢႆႈ တေႃႇၸူဝ်ႈၼႃ ၼွင်ႉၸၢႆး ... ”
ၸၢႆးၼွင်ႉၸင်ႇယုမ်ႉသေ ငွၵ်းႁူဝ်ၼႄ ပီႈဢၢႆႈမၼ်းယူႇ၊ ၶႃသွင်ၵေႃႉပီႈၼွင်ႉ ၸုင်ယိပ်းမိုဝ်းၵၼ်သေ ပႆလဵၼ်းၸွမ်းၵႄႈသူၼ်မွၵ်ႇႁၢင်ႈလီၼၼ်ႉ မူၼ်ႈမူၼ်ႈသိူဝ်းသိူဝ်းယူႇ။ ၽွင်းမိူဝ်ႈ ၶႃသွင်ၵေႃႉ ၽႅဝ်မႃးႁိမ်းၽၵ်းတူဝၢင်းႁိူၼ်းၶဝ်ၼၼ်ႉ ၵႃးလမ်းၼိုင်ႈ ၵိုင်ႉၵၢင်ႉငွၵ်းၶဝ်ႈမႃး ၼႂ်းဝၢင်းႁိူၼ်း ၶဝ်ၽႂ်းၽႂ်းလႄႈ ၶႃသွင်ၵေႃႉ ပဵၼ်ဢၼ်တူၵ်းၸႂ်လႂ်တိုၼ်ႇၵႂႃႇတႄႉတႄႉသေ ၸၢႆးၼွင်ႉ ၼႅတ်ႈၸၼ်ပီႈဢၢႆႈမၼ်းသေ ငိူင်ႉဝႅၼ်ဢွၵ်ႇၼွၵ်ႈတၢင်းၽႂ်းၽႂ်းယဝ်ႉ ။
“ ဢႃး ... ! ... ... ”
ၸၢႆးၼွင်ႉၸိုၼ်ႇလုၵ်ႉသေ မိုၼ်းတႃမႃးၵေႃႈ ၸွမ်းႁိမ်းႁွမ်းမၼ်း ပဵၼ်ဢၼ်လပ်းသိင်ႇဝႆႉယူႇ၊ ငိၼ်းသဵင်လုင်းသၢင်ႇတုၺ်ႉ ႁွင်ႉႁႃၸိုဝ်ႈမၼ်းယူႇ -
“ ၸၢႆးၼွင်ႉ ... ၸၢႆးၼွင်ႉ ... ပဵၼ်သင် ... ? ”
“ ၸၢႆးၸၢႆး ... ၸၢႆးၸၢႆး ... မီးလႂ် ... ? လုင်းသၢင်ႇတုၺ်ႉ”
“ မီးၼိူဝ်ႁိူၼ်းဢိူဝ်ႈ ... ၸၢႆးၼွင်ႉ ... ဢေႃ ...ၸၢႆးၼွင်ႉ ၼွၼ်းၵႂင်ဢိူဝ်ႈၼႆႉ ... လုၵ်ႉၵိၼ်ၼမ်ႉၵတ်း ၵွၵ်းၼိုင်ႈႁေလႄႈ ... ”
ၸၢႆးၼွင်ႉၵေႃႈ လုၵ်ႉၵိၼ်ၼမ်ႉၵတ်းၵွၵ်းၼိုင်ႈသေ ၶိုၼ်းမႃးၼွၼ်းဝူၼ်ႉမႅၼ်ႈ လွင်ႈဝႃႈ ပဵၼ်မၼ်းၼွၼ်းၽၼ်ၵူၺ်းလူင်ၼႆႉ ၼႆသေ ၶိုၼ်းဝူၼ်ႉမႅၼ်ႈ ၽၼ်မၼ်းၼၼ်ႉသေ တွၼ်ႈတႃႇၶိုၼ်းၼၼ်ႉ မၼ်းႁဵတ်းႁိုဝ်ၶတ်းၸႂ်သိုပ်ႇၼွၼ်းၵေႃႈ တိုၼ်းဢမ်ႇလပ်းလႆႈၶိုၼ်းယဝ်ႈ ။
ၸွင်ႇၸၢႆးၸၢႆး တေႁပ်ႉၶၢမ်ႇၵႂၢမ်းမၼ်း ၸိူင်ႉၼင်ႇၼႂ်းၽၼ်မၼ်းၼၼ်ႉႁိုဝ် ? မၼ်းၸၢႆး တေလႆႈႁဵတ်းႁိုဝ် ၶတ်းၸႂ်ႁႂ်ႈၸၢႆးၸၢႆး ႁပ်ႉၶၢမ်ႇ လွင်ႈဝႃႈ ၶႃပဵၼ်ပီႈၼွင်ႉၵၼ်ၼၼ်ႉ မၼ်းဝူၼ်ႉႁႃလၢႆးမၼ်းယူႇ ၊ သင်ဝႃႈ ၸၢႆးၸၢႆးႁပ်ႉၶၢမ်ႇ ၸိူင်ႉၼင်ႇၼႂ်းၽၼ်မၼ်းၼၼ်ႉၼႆ မၼ်းတေလႆႈၸူမ်းသိူဝ်း သမ်ႉပေႃးဢမ်ႇမီးတီႈတႅၵ်ႈ ဢမ်ႇႁၢင်ႉ ။
ၶမ်ႈၼၼ်ႉ မၼ်းၼွၼ်းဢမ်ႇလပ်းယဝ်ႉလႄႈ ထိုင်မႃးၵၢင်ၼႂ်ၸဝ်ႉ ၼႃႈမိူင်းၸမ်လႅင်းပၢင်ႇသႂ် မၼ်းၸင်ႇလုၵ်ႉမႃး သုၵ်ႇၼႃႈသီႇတႃမၼ်းယဝ်ႉသေ မႃးႁူတ်းၼမ်ႉမွၵ်ႇ ၼႂ်းသူၼ်ယူႇ။ ဝၢႆးသေ ႁူတ်းမွၵ်ႇယဝ်ႉ မၼ်းၵႂႃႇၵိၼ်ၶဝ်ႈၶူဝ်ႈ ဢၼ်ပႃႈယွတ်ႈၶူဝ်ႈလဵင်ႉမၼ်းၼၼ်ႉသေ ၶိုၼ်းမႃး ပတ်းပတ်းၽဵဝ်ႈၽဵဝ်ႈ ၼႂ်းသူၼ်ယူႇ ၊ ၽွင်းမိူဝ်ႈမၼ်း ပတ်းၽဵဝ်ႈသူၼ်ယူႇၼၼ်ႉ ၸၢႆးၸၢႆး တၼ်းၽႅဝ်မႃး ၼႂ်းသူၼ်မွၵ်ႇ မိူဝ်ႈလႂ်ၵေႃႈဢမ်ႇႁူႉ၊ ၸၢႆးၸၢႆး မႃးၼင်ႈလဵၼ်ႈ တီႈတင်ႇဝႆ ၵေႃႉလဵဝ်ယူႇမၼ်းၸင်ႉႁွင်ႉ ၸၢႆးၼွင်ႉယူႇယဝ်ႉ -
“ ဢၢႆႈၼွင်ႉ ... မႃးတီႈၼႆႈ ... ၵမ်ႉလူး ... ”
ၸၢႆးၼွင်ႉၵေႃႈ လွမ်မုင်ႈမွင်း တေပဵၼ်ၼင်ႇ ၼႂ်းၽၼ်မၼ်းၼၼ်ႉသေ ၸင်ႇၼႅတ်ႈမႃးၸူး ၸၢႆးၸၢႆးၽႂ်းၽႂ်းသေ -
“ ဢေႃႈ ... ပီႈၸၢႆး လူဝ်ႇၸႂ်ႉသင်ၶႃႈ ... ? ”
“ ဢိူဝ်ႈ ... ၵႂႃႇသႂ်ႇၼမ်ႉၼဵင်ႈၶူမ် မႃးပၼ်ၵဝ် ၵွၵ်းၼိုင်ႈလူး ”
“ ဢေႃႈ ... ဢေႃႈ ... ”
ၸၢႆးၼွင်ႉၼႅတ်ႈၵႂႃႇမိူဝ်ႈႁိုဝ်ႈ ၼမ်ႉၼဵင်ႈၶူမ်ၵွၵ်းၼိုင်ႈသေ ဢဝ်မႃးပၼ် ၸၢႆးၸၢႆးယူႇယဝ်ႈ၊ ၸၢႆးၸၢႆးၵေႃႈ ႁပ်ႉဢဝ်သေ သူတ်ႉၵိၼ်လွႆးလွႆးယူႇ
“ ပႂ်ႉ ၵမ်ႈၼိုင်ႈၵွၼ်ႇၼႃႈ ... ဢၢႆႈၼွင်ႉ ... ”
“ ဢေႃႈ ... ဢေႃႈ ... ”
ၸၢႆးၼွင်ႉၵေႃႈ ၸုၵ်းပႂ်ႉ တီႈႁိမ်းၸၢႆးၸၢႆးသေ လွမ်ဝူၼ်ႉပူၼ်ႉယူႇ၊ မၼ်းဝူၼ်ႉမႅၼ်ႈၶိုၼ်း ၽၼ်မၼ်းၶမ်ႈဝႃး ဢၼ်ၸၢႆးၸၢႆးၸႂ်ႉမၼ်း ဝႆပၼ် တင်ႇဝႆၼၼ်ႉၼႆလႄႈ မၼ်းလိုမ်းတူဝ်သေ ၵႂႃႇဢီးဝႆတင်ႇပၼ် ၸၢႆးၸၢႆးယူႇယဝ်ႉ၊ ၽွင်းၼၼ်ႉ မႅၼ်ႈၽွင်းၸၢႆးၸၢႆး တိုၵ်ႉသူတ်ႉၼမ်ႉၼဵင်ႈၶူမ်ယူႇလႄႈ ၸူးဢဝ် ၼမ်ႉၼဵင်ႈၶူမ် လူၵ်ႈသူပ်းၸၢႆးၸၢႆးသေ ၸၢႆးၸၢႆးၵႅၼ်ႉၼမ်ႉယူႇယဝ်ႉ
“ ဢႃး ! ... ၽူး ၽရူး ... ဢႁူၵ်ႉ ... ! ဢႁူၵ်ႉ ... ! ”
ငိၼ်းသဵင်ဢႆၵႅၼ်ႉ ၸၢႆးၸၢႆးလႄႈ ၸၢႆးၼွင်ႉၸင်ႇတိုၼ်ႇတူၵ်းၸႂ်ၵႂႃႇသေ ၼႅတ်ႈၵႂႃႇတူပ်းပၼ် ၵွင်းလင်ၸၢႆးၸၢႆး လွႆးလွႆးယူႇယဝ်ႉ -
“ ဢႁူၵ်ႉ ... ! ဢႁူၵ်ႉ ...! ဢႁူၵ်ႉ ... ”
“ ပီႈၸၢႆး ၵႅၼ်ႉၼမ်ႉၵႂႃႇယဝ်ႉ ႁႃႉ ... ? ”
ၸၢႆးၸၢႆး ထူၺ်ႈၸႂ်ၽႂ်းၽႂ်း ၵိုတ်းလူၺ်ႈၸႂ်လမ်သေ -
“ မႂ်းတင်ႈၸႂ် ဢီးတင်ႇ ႁႂ်ႈၵဝ်ႇၵႅၼ်ႉၼမ်ႉႁႃႉ ? ” ၼႆႉ ... ႁိုဝ် ဢၢႆႈၼွင်ႉ ... ”
“ ဢမ်ႇ ... ဢမ်ႇၸႂ်ႈၶႃႈ ... ပီႈၸၢႆး ... ”
“ ႁဵတ်းႁိုဝ်လႄႈဝႃႈ ဢမ်ႇၸႂ်ႈ ... ၵဝ်သူတ်ႉၼမ်ႉမႆႈယူႇတီႈၼႆႈ မႂ်းႁၼ်ယူႇ ... မႂ်းဢီးတင်ႇဝႆႁဵတ်းသင် ... ? ”
“ ၶႃႈယူဝ်ဝႃႈ ပီႈၸၢႆး ၸႂ်ႉၶႃႈဝႆတင်ႇဝႆ ၼႆၶႃႈဢေႃႈ ... ”
“ ႁိုဝ်ႉ ! ... ၵဝ်ႉၸႂ်ႉမိူဝ်ႈလႂ် ... မႂ်းတင်ႈၸႂ်ႁႂ်ႈၼမ်ႉမႆႈလူၵ်ႈၵဝ် တင်ႈၸႂ်ႁႂ်ႈၵဝ် ၵႅၼ်ႉဢိူဝ်ႈ ... ၼႆႉ ... ”
“ ဢမ်ႇ ... ဢမ်ႇ ... ဢမ်ႇၸႂ်ႈၶႃႈ ... ပီႈ ... ... ”
ၽွင်းၼၼ်ႉ ၸၢႆးၸၢႆးၸႂ်လမ်ၼႃႇတႄႉသေ ဢဝ်ၼမ်ႉၼႂ်းၵွၵ်းၼၼ်ႉ ႁၢတ်ႇသႂ်ၼႃႈၸၢႆးၼွင်ႉ ႁႅင်းႁႅင်းယဝ်ႉ၊ ၸၢႆးၼွင်ႉ ၼႅတ်ႈလပ်းတႃၽႂ်းၽႂ်းသေ ဢဝ်မိုဝ်းႁႄႉၼႃႈမၼ်းယူႇလႄႈ ၼမ်ႉလိူတ်ႇ ဢမ်ႇတၼ်းၶဝ်ႈတႃမၼ်းသေတႃႉ ၼႃႈမၼ်းၸၢႆးတႄႉ လိူတ်ႇမႆႈၵႂႃႇ ၵမ်ႈၽွင်းယူႇယဝ်ႉ။ ၸၢႆးၸၢႆး ထၢင်ႇၽိတ်းသေ ၸႂ်လမ်ၼႃႇယဝ်ႉလႄႈ မၼ်းၶိုၼ်းဢဝ်ဝၢၼ်ႇၼမ်ႉၼဵင်ႈၶူမ် သိုင်းမင်သႂ်ႇ ႁူဝ်ၸၢႆးၼွင်ႉထႅင်ႈသေ ဝၢၼ်ႇၵေႃႈတႅၵ်ႇလႅဝ် ႁူဝ်ၸၢႆးၼွင်ႉၵေႃႈ ပွင်ႇၵႂႃႇယဝ်ႉ၊ သဵင်ဝၢၼ်လႅဝ် တၼ်းငိၼ်းၶဝ်ႈၼႂ်းႁူၸၢႆးၼွင်ႉ ၵမ်းၼိုင်ႈသေ ၸၢႆးၼွင်ႉ မဝ်းပၼ်ႇတႃလမ်ၵႂႃႇယဝ်ႉ။
ၽွင်းၸၢႆးၼွင်ႉမဝ်းသေ ၵူမ်ႈလူင်းမႃးတင်းၼႃႈၼၼ်ႉ ၸၢႆးၸၢႆး ဢဝ်တႃမိုဝ်း ႁႆႇပၼ်ၼႃႈမၼ်း၊ ဢဝ်တိၼ်ပိတ်ႉပၼ်ပုမ်မၼ်းလႄႈ ၸၢႆးၼွင်ႉ ၼွၼ်းလူမ်ႉမူပ်ႇၵႂႃႇ ၼိူဝ်ယိူဝ်ႈယဝ်ႉ၊ ၸၢႆးၸၢႆး ဢၢင်ႈၶိုၼ်းႁႅမ်ၸၢႆးၼွင်ႉထႅင်ႈၼႆသေတႃႉ -
“ ၸၢႆးၸၢႆး ... ယႃႇပေႁႅမ် ...ယႃႇပေႁႅမ်ၸၢႆးၼွင်ႉထႅင်ႈယဝ်ႉ”
ငိၼ်းသဵင်လုင်းသၢင်ႇတုၺ်ႉ ႁၢမ်ႈသီးလႄႈ ၸၢႆးၸၢႆးၸင်ႇၵိုတ်းယိုတ်းၵႂႃႇယူႇ ၊ လုင်းသၢင်ႇတုၺ်ႉ ၸင်ႇၼႅတ်ႈၵႂႃႇႁွပ်ႇဢဝ် ၸၢႆးၼွင်ႉ ၽႂ်းၽႂ်းသေ လုပ်ႈလုပ်ႈၵမ်းၵမ်းတူၺ်းယူႇ၊ လႆႈႁၼ် ၵွၵ်းႁူဝ်ၸၢႆးၼွင်ႉ ပွင်ႇဢွၵ်ႇလိူတ်ႈ ၼမ်ဝႆႉလႄႈမၼ်းၼႅတ်ႈဢဝ်ၽႅၼ်ႇၸဵတ်ႉမိုဝ်း ၼႂ်းထွင်းမၼ်း တဵၵ်းတူမ်းၼိူဝ်ၵွၵ်းႁူဝ် ၸၢႆးၼွင်ႉသေ -
“ ၸၢႆးၼွင်ႉ ... ၸၢႆးၼွင်ႉ ... ”
ၸၢႆးၼွင်ႉႁူႉတူဝ်ပဵၼ်ၵမ်း ဢမ်ႇႁူႉတူဝ်ပဵၼ်ၵမ်းဝႆႉယူႇ၊ လုင်းသၢင်ႇတုၺ်ႉ ၸင်ႇႁွပ်ႇဢုမ်ႈဢဝ်ၸၢႆးၼွင်ႉသေ မႃးဝႆႉၼိူဝ်တီႈၼွၼ်းၸၢႆးၼွင်ႉယဝ်ႉ၊ လုင်းသၢင်ႇတုၺ်ႉ ၼႅတ်ႈဢဝ်ယႃႈယႃသေ မႃးသႂ်ႇပူၵ်ႉႁေႃႇပၼ်ၸဵပ်းၸၢႆးၼွင်ႉယူႇ။
ဝၢႆးသေၸၢႆးၼွင်ႉ ၶိုၼ်းႁူႉတူဝ်မႃးလီလီ မၼ်းလွမ်လွမ်ဝူၼ်တူၺ်းၶိုၼ်း မဵတ်ႉတႃႇပီႈဢၢႆႈမၼ်း မိူဝ်းၼႂ်းၽၼ်ၼၼ်ႉၵူၺ်းယဝ်ႉ၊ မဵတ်ႉတႃႇပီႈဢၢႆႈမၼ်း တီႈၼွၵ်ႈၼႆႉတႄႉ မၼ်းဢမ်ႇၸၢင်ႈႁဵတ်းႁိုဝ် ဝူၼ်ႉႁူႉၸွမ်းလႆႈယဝ်ႉ။ ၵွပ်ႈသင် ၸၢႆးၸၢႆးသမ်ႉၸင်းမၼ်း ၵွပ်ႈသင်ၸၢႆးၸၢႆး သမ်ႉဢမ်ႇႁၵ်ႉမၼ်း ၵွပ်ႈသင်ၸၢႆးၸၢႆးသမ်ႉပႄႉၵိၼ်မၼ်း မၼ်းၸၢႆးဝူၼ်ႉလွင်ႈၸိူဝ်းၼႆႉသေ ၸူၵ်ႉၸႂ်တိူဝ်ႉၸႂ်မႅၼ်ႈလႄႈ သီႈတွၼ်ႉႁႆႈယူႇၵူၺ်းမၼ်းၸၢႆးယူႇယဝ်ႉ ။ လုင်းသၢင်ႇတုၺ်ႉၵေႃႈ ပဵၼ်ဢၼ်ၸႂ်ဢမ်ႇလီၸွမ်း တႄႉတႄႉသေ
“ ၸၢႆးၼွင်ႉ လုင်းၵေႃႈ ၸႂ်ဢမ်ႇလီလႆႈၼင်ႇၵဝ်ႇ ... ဢိုဝ်ႈ ... တေလႆႈႁဵတ်းႁိုဝ်ၵေႃႈ ဢမ်ႇႁူႉယဝ်ႈ ... ႁေး ... ”
ၸၢႆးၼွင်ႉ ၸင်ႇၵမ်တႃမိုဝ်းမၼ်း ၵႅၼ်ႇၵႅၼ်ႇသေ လၢတ်ႈဝႃႈ -
“ လုင်းသၢင်ႇတုၺ်ႉ ... ၵူၼ်းဢၼ်ဝႃႈၼၼ်ႉ မၼ်းတေပဵၼ် ၵူၼ်းယိူၼ်ႉၵၼ်ႈလႆႈတႃႇသေႇ ဢမ်ႇၸႂ်ႈၵူၺ်း ... ပေႃးထိုင်ဝၼ်းဢၼ်မၼ်း ဢမ်ႇယိူၼ်ႉၵၼ်ႈလႆႈၼႆ တေတႅၵ်ႇယူႇဢမ်ႇႁၢင်ႉယဝ်ႉ ...”
ၸၢႆးၼွင်ႉ ပဵၼ်ဢၼ်ၶၢမ်ႇယၢပ်ႇၶမ်ၸႂ်ၼႃႇလႄႈ မၼ်းဢဝ်တႃမိုဝ်းမၼ်း ထုပ်ႉၽႃပႅၼ်ႈႁႅင်းႁႅင်းယူႇယဝ်ႉ။
“ ႁိုဝ်ႉ ... ! ”
တူင်ႉ ! ... တူင်ႉ ! ... တူင်ႉ ! ... တူင်ႉ ! ...
လုင်းသၢင်ႇတုၺ်ႉၵေႃႈ ၸင်ႇၼႅတ်ႈမႃးၸၼ်ၸၢႆးၼွင်ႉဝႆႉယဝ်ႈ -
“ ၸၢႆးၼွင်ႉ ... ၸၢႆးၼွင်ႉ ... ယႃႇပေႁဵတ်းၼၼ် မႃးၼင်ႈလီလီလူး ... ”
ၸၢႆးၼွင်ႉ ဢဝ်ၼႃႈမၼ်း ငူပ်ႉၸပ်းၽႃသေ ယိူၼ်ႉၵၼ်ႈဝႆႉယူႇ၊ ၽွင်းၼၼ်ႉ လုင်းၸၢႆးၽေႇ ၽႅဝ်မႃး တီႈယူႇၶဝ်လႄႈ လုင်းသၢင်ႇတုၺ်ႉ ၸင်ႇဝႃႈ -
“ ဢေႃႈ ... ပေႃးလဵင်ႉလူင် မႃးၶႃႈလႄႈ ... ”
“ ပဵၼ်သင် ... ? တီႈၵၼ်ၼႆႉ လုင်းသၢင်ႇတုၺ်ႉ ... ? ”
လုင်းသၢင်ႇတုၺ်ႉၵေႃႈ ၸင်ႇၶႆႈၼႄလွင်ႈတၢင်း ဢၼ်ပဵၼ်မႃးၼၼ်ႉ သဵင်ႈသဵင်ႈလႄႈ ပေႃးလဵင်ႉလူင်ၶဝ် ပဵၼ်ၸႂ်ဢမ်ႇလီၵႂႃႇတႄႉတႄႉသေ -
“ ၸၢႆးၼွင်ႉ ... ၵွပ်ႈပိူဝ်ႈလုၵ်ႈၸၢႆးလုင်းလႄႈ လႆႈပဵၼ်ၵႂႃႇၼင်ႇၼႆ လုင်းၸႂ်ဢမ်ႇလီၼင်ႇၵဝ်ႇ ... တၢင်ႇပွၵ်ႈမႃး ၼင်ႇႁိုဝ် တေဢမ်ႇပဵၼ်ထႅင်ႈၼၼ်ႉ လုင်းတေသင်ႇသွၼ်ၸၢႆးၸၢႆးလႆ ... ”
လုင်းၸၢႆးၽေႇ ၸင်ႇၶိုၼ်းၸႂ်ႉလုင်းသၢင်ႇတုၺ်ႉ ၵႂႃႇဢဝ် တိူၵ်ႈယႃႈယႃမႃးသေ မၼ်းမေးသႂ်ႇယႃႈယႃပၼ်ၸၢႆးၼွင်ႉ လီလီယဝ်ႉ၊ ၸၢႆးၼွင်ႉၵေႃႈ ဢမ်ႇၸၢင်ႈလၢတ်ႈလႆႈၵႂၢမ်းသင်ယဝ်ႉလႄႈ ၼမ်ႉတႃမၼ်းၸၢႆး ဢိူမ်ႈႁူၺ်ႇဝႆႉယူႇ၊ ဝၢႆးသေ သႂ်ႇယႃပၼ်ယဝ်ႉ ၸၢႆးၼွင်ႉၸင်ႇဝႃႈ -
“ ပေႃႈလဵင်ႉ ... ၶႃႈၶႂ်ႈမိူဝ်းၶိုၼ်း မိူင်းတႆးယဝ်ႈ ... ”
ပေႃႈလဵင်ႉၶဝ် ဢမ်ႇပႆႇၸၢင်ႈတၵ်းသဵင်သင် ... ပေႃးတေပွႆႇၸၢႆးၼွင်ႉ မိူဝ်းၵႂႃႇၼႆ တႃႇတေလႆႈၵူၼ်းယူႇႁူမ်ႈလီၵေႃႉၼိုင်ႈ ႁႂ်ႈမိူၼ်ၼင်ႇၸၢႆးၼွင်ႉၼၼ်ႉ ဢမ်ႇငၢႆႈလႄႈ မၼ်းပဵၼ်ဢၼ်သေလၢႆဝႆႉယူႇ၊ ၵွပ်ႈၼႆ မၼ်းၸင်ႇထူၺ်ႈၸႂ်လူင် ၵမ်းၼိုင်ႈသေ -
“ ၸၢႆးၼွင်ႉ ... တေမိူဝ်းႁဵတ်းသင် ? ယိူၼ်ႉၸႂ်သေသိုပ်ႇယူႇၸွမ်း လုင်းၶဝ်လႄႈ ... တီႈႁိူၼ်းလုင်းၼႆႉ လွင်ႈၽုၵ်ႈတူၼ်ႈမႆႉတူၼ်ႈမွၵ်ႇၼႆႉ ၵူၺ်းလႆႈၸႂ်ယႂ်ႇ ၸၢႆးၼွင်ႉၵူၺ်းဢိူဝ်ႈ ... ၼႆႉ ... ”
ၸၢႆးၼွင်ႉ ဢမ်ႇတၵ်းသဵင်သင်လႄႈ ပေႃႈလဵင်ႉလူင်ၶဝ် ၸင်ႇၶိုၼ်းဝႃႈထႅင်ႈဝႃႈ -
“ ၸၢႆးၼွင်ႉ ... တေၶႂ်ႈၸႃႉတေႃႇလုင်းၶဝ်ပေႃႈမႄႈလုၵ်ႈယဝ်ႉႁႃႉ ... ? တေႃႈ ... ? ... ”
ၸၢႆးၼွင်ႉ ထူၺ်ႈၸႂ်လူင်ၵမ်းၼိုင်ႈသေ -
“ ၶႃႈ ဢမ်ႇၶႂ်ႈၸႃႉၽႂ်ၼင်ႇၵဝ်ႇၶႃႈ ... ၵူၺ်းၵႃႈ ... သင်ဝႃႈ ၶႃႈတေသိုပ်ႇယူႇထႅင်ႈတီႈၼႆႈၼႆ ... ၶႃႈၵူဝ်ၸႂ်ၶႃႈ ဢမ်ႇလီလႆႈ ဢမ်ႇယိူၼ်ႉလႆႈ မိူၼ်ၼင်ႇယၢမ်းၼႆတႃႇသေႇ ၼၼ်ႉဢေႃႈ ... ”
“ ၼၼ်ႉတႄႉ ... တမ်ႈတီႈ ၸၢႆးၸၢႆးၵေႃႈ လုင်းတေလၢတ်ႈ တေသင်ႇသွၼ်ပၼ်လႆ ... တေဢမ်ႇပၼ်ပဵၼ်ထႅင်ႈၵူၺ်း ... တမ်းၸႂ်လႃႈ”