ၶႅၵ်ႇ/တွၼ်ႈသၢမ်
ၵၢင်ၼႂ်ၸဝ်ႉ ၵႃးဢွၼ်ႇလမ်းၼိုင်ႈ လုၵ်ႉတီႈသီႇပေႃႉသေ ႁေႃႈမႃးတၢင်းၵျွၵ်ႉမႄးယဝ်ႉ ၊ တီႈၼိူဝ်ၵႃးၼၼ်ႉတႄႉ မီးၵူၼ်းသွင်ၵေႃႉလႄႈ မႃတူဝ်ၼို်င်ႈ။
ၵေႃႉဢၼ်ႁေႃႈၵႃးတႄႉပဵၼ် လုင်းၸၢႆးၽေႇ ၊ မေးမၼ်း ၵေႃႉဢၼ်တိုဝ်းဝႅၼ်ႉ (မၢၼ်ႇတႃ) သေ ၶီႇၸွမ်းမႃးၽၢႆႇၼႃႈၼၼ်ႉ ပဵၼ်ပႃႈမွၼ်း၊ မႃ ဢၼ်မီးၸွမ်းၽၢႆႇလင်ၼၼ်ႉ ပဵၼ်မႃဢွၼ်ႇ ဢီႇၽဵင်း။ ၵႃးၶဝ်ႁေႃႈမႃးၼိူဝ်သဵၼ်ႈတၢင်းသေ လတ်းၵႄႈႁူၺ်ႈၵႄႈလွႆမႃးယူႇ၊ ဝၢႆးသေ ၶဝ်လတ်းပူၼ်ႉၼႃးၶေႃမႃး ပႃႈမွၼ်းၸင်ႇဝႃႈ -
“ သူ ... ဝၢၼ်ႈၼႃးၶေႃၼၼ်ႉ ၽႆးမႆႈ ၶမ်ႈဝႃးယူဝ်ႉၼေႃ... ?”
“ၸႂ်ႈယူႇၵႂႃႈ ... ၵူၼ်းဝၢၼ်ႈၶဝ် သူၼ်ႈသိၼ်းသၢၼ်ဝႆႉယူႇလူး...”
“ၶႄးပဵၼ်ပွႆးတိုၵ်းၵၼ် ယူဝ်ႉ ... လုၵ်ႈသိုၵ်းၵေႃႈ မီးဝႆႉၵမ်ႈ ၽွင်ႈဢမ်ႇၸိုဝ်ႈႁႃႉ... ?”
“ ၸႂ်ႈဢိူဝ်ႈ ... ”
ၵႃးၶႃပူႇဢွၵ်ႇ သိုပ်ႇႁေႃႈပူၼ်ႉမႃးတၢၼ်ႇတၢၼ်ႇသေ ပႃႈမွၼ်း ၸင်ႇဝႃႈ-
“ သူ... ၵိုတ်းၵႃးၵမ်းၼိုင်ႈလူး ... ”
“ ႁဵတ်းသင်... ?”
“ ႁဝ်းၶႂ်ႈၵႂႃႇၽၢႆႈဢွၼ်ႇဢိူဝ်ႈ ... ”
လုင်းၸၢႆးၽေႇၵေႃႈ ၵိုတ်းၵႃးပၼ် ႁိမ်းၽင်ႇတၢင်းသေ ၶႃပူႇဢွၵ်ႇလူင်းၵႃးမႃးယဝ်ႉ ၊ ၽွင်းမိူဝ်ႈၶႃတိုၵ်ႉၵႂႃႇၽၢႆႈဢွၼ်ႇၼၼ်ႉ မႃဢီႇၽဵင်းၵေႃႈ ဝႅၼ်လူင်းၵႃးသေ လႄႇႁႃသွပ်ႇ ဢၢႆၸွမ်းယုမ်းႁိမ်းၼၼ်ႉ တီႈၼိုင်ႈယဝ်ႉ တီႈၼိုင်ႈယူႇ။
ၽိူဝ်ႇၽႅဝ်မႃး တီႈယုမ်းဢၼ်ၼိုင်ႈ ဢီႇၽဵင်းႁဝ်ႇယူႇဝုၵ်ႉဝုၵ်ႉယဝ်ႉ
ဝုၵ်ႉ ... ဝုၵ်ႉ ... ဝုၵ်ႉ ... ႁိုဝ်ႇ ... ႁိုဝ်ႇ ... ဝုၵ်ႉ
လုင်းၸၢႆးၽေႇၵေႃႈ ၼႅတ်ႈမႃးႁွင်ႉဢီႇၽဵင်းယဝ်ႉ။
“ ဢီႇၽဵင်း ... မႃးလႄႈ ... မႃမႃး ... ဢူဝ်ႈ... ဢူဝ်ႈ... ”
“ၸုတ်ႉ... ၸုတ်ႉ ... ၸုတ်ႉ ... ဢီႇၽဵင်း မႃး ... မႃး”
“ဝုၵ်ႉ ... ဝုၵ်ႉ... ဝုၵ်ႉ ... ... ”
ဢီႇၽဵင်း ႁဝ်ႇယူႇဝုၵ်ႉဝုၵ်ႉယဝ်ႉ။
လုင်းၸၢႆးၽေႇၵေႃႈ ႁူႉပွင်ႇဝႃႈ ဢီႈၽဵင်း ႁၼ်သေဢၼ်ဢၼ်ယဝ်ႉၼႆသေ ၸင်ႇၵႂႃႇတူၺ်း တီႈဢီႇၽဵင်းႁဝ်ႇၼၼ်ႉယူႇ။
လုင်းၸၢႆးၽေႇၵေႃႈ ဝႆႉသတိယႂ်ႇယႂ်ႇသေ ၵႂႃႇၸွမ်းတူၺ်းယဝ်ႉ။ လႆႈႁၼ်လုၵ်ႈဢွၼ်ႇၵေႃႉၼိုင်ႈ ၼွၼ်းလပ်း ဝႆႉယူႇၼႂ်းယုမ်းၼၼ်ႉလႄႈ လုင်းၸၢႆးၽေႇ ၸင်ႇၵႂႃႇပူၵ်းတူၺ်းယဝ်ႉ။
“ၸၢႆးဢွၼ်ႇ... ၸၢႆးဢွၼ်ႇ ... ... ”
တီႈႁူဝ်ၶႅၼ်လုၵ်ႈဢွၼ်ႇၵေႃႉၼၼ်ႉ မီးႁွႆးၸဵပ်းမႂ်ႇမႂ်ႇသေ လိူတ်ႈလႅင်ဝႆႉယူႇ ၊ လုၵ်ႈဢွၼ်ႇ ၵေႃႉၼႆႉ ပႆႇတၢႆသေတႃႉ မၼ်းမဝ်းမိင်းလိုမ်းတူဝ်ဝႆႉၼႆ လုင်းၸၢႆးၽေႇ ႁူႉပွင်ႇၵမ်းလဵဝ်လႄႈ မၼ်ႈၸင်ႇႁွပ်ႇဢဝ် လုၵ်ႈဢွၼ်ႇၼၼ်ႉသေ
“ၼၢႆးၼႆႉ ... လုၵ်ႈဢွၼ်ႇၽႂ်ၵေႃႈဢမ်ႇႁူႉယဝ်ႉ မၼ်းလိုမ်းတူဝ် ဝႆႉဢိူဝ်ႈ... ”
ပႃႈမွၼ်းၵေႃႈ ၼႅတ်ႈမႃးလွမ်တူၺ်းၽႂ်းၽႂ်းယဝ်ႉ။ ၶႃပူႇဢွၵ်ႇ ၸင်ႇဢဝ်မႃးၸူးတီႈၵႃးၶႃသေ ပႃႈမွၼ်း ၸင်ႇဝႃႈ ...
“ လုၵ်ႈဢွၼ်ႇၵေႃႉၼႆႉ တေပဵၼ်လုၵ်ႈဢွၼ်ႇၶဝ်ၼႃးၶေႃယဝ်ႉ... မိူဝ်ႈၶမ်ႈဝႃး ပဵၼ်ပွႆးတိုၵ်းလႄႈ မၼ်းတေတိူဝ်ႉမၢတ်ႇသေ ပၢႆးမႃးတၢင်းၼႆႉ မႃးလိုမ်းတူဝ်ဝႆႉၵႂႃႈ... တိူၵ်ႈယႃႈယႃသူ ပႃးမႃးယူႇဢမ်ႇၸႂ်ႈႁႃႉ... ?”
“ပႃးဢိူဝ်ႈ... ”
လုင်းၸၢႆးၽေႇၼႆႉ ပဵၼ်ၶူးမေႃယႃလူင်ၵေႃႉၼိုင်ႈလႄႈ မၼ်းၸင်ႇၵႂႃႇၽုၺ်ႇဢဝ် တိူၵ်ႈယႃႈယႃမၼ်းသေ မႃးသႂ်ႇယႃမႃးသမ်းၶဵမ်ပၼ် ၸၢႆးဢွၼ်ႇၼၼ်ႉယူႇ၊ ၸၢႆးဢွၼ်ႇၼၼ်ႉတႄႉ ပဵၼ်ၸၢႆးၸၢႆး ပီႈဢၢႆႈၸၢႆးၼွင်ႉၼၼ်ႉယဝ်ႉ ။
ၶမ်ႈဝႃး တီႈဝၢၼ်ႈၶဝ် ပဵၼ်ပွႆးတိုၵ်းလႄႈ မၼ်းၸၢႆးတူၵ်းၸႂ်လႂ် တိုၼ်ႇသေ ဢႅၼ်ႇပၢႆႈ ၵႃႈပွင်ႇၵႃႈပဵၼ်ယဝ်ႉ ၊ ယွၼ်ႉပိူဝ်ႈ လႆႈဢႅၼ်ႇၽႃႇမႃး ၼႂ်းၵႄႈမၢၵ်ႇၵွင်ႈမၢၵ်ႇမျွၵ်ႈလႄႈ မၢၵ်ႇၵွင်ႈလုၵ်ႈၼိုင်ႈ သႅတ်ႈတိူဝ်ႉႁူဝ်ၶႅၼ်မၼ်းၽၢႆႇသၢႆႉ လိူတ်ႈဢွၵ်ႇၼမ်ၵေႃႈပိူင်ၼိုင်ႈ ဢႅၼ်ႇသေႁိူဝ်ႉလႄႈပိူင်ၼိုင်ႈ တူၵ်းၸႂ်ၵူဝ်ႁေလႄႈပိူင်ၼိုင်ႈ မၼ်းၸၢႆးဢႅၼ်ႇမႃးၸွမ်းတၢင်းၵႃးသေ တႃႉ တႃမၼ်းလၢႆးသေ ဝၢင်ႇဝိူဝ်ႈၽႃႇၶဝ်ႈယုမ်း ၵႂႃႇၼွၼ်းလူမ်ႉဝႆႉယူႇယဝ်ႉ။ ဝၢႆးသေ လုင်းၸၢႆးၽေႇ သႂ်ႇယႃႈယႃ သမ်းၶဵမ်ပၼ်ယဝ်ႉ ပႃႈမွၼ်းၸင်ႇဝႃႈ -
“ႁိူဝ်ႇ... မိုဝ်းၼိဝ်ႉၸီႉမၼ်းၵေႃႈ ဢဝ်ၽႅၼ်ႇပူၵ်ႉဝႆႉႁေဢိူဝ်ႈၼႆႉ... တႃႉလီဢီးလူပိူၼ်ႈလႃႈ ... ... ”
လုင်းၸၢႆးၽေႇ ၶိုၼ်းမႃးလိတ်ႈတူၺ်းသေ မႄးသႂ်ႇယႃႈယႃပၼ်ယဝ်ႉ မၼ်းၸင်ႇဝႃႈ -
“ လုၵ်ႈဢွၼ်ႇၵေႃႉၼႆႉ ႁဝ်းတေႁဵတ်းႁိုဝ်ၼႆႉ... ”
ပႃႈမွၼ်း ၸင်ႇယၵ်ႉတူၺ်းၼႃႈ ၸၢႆးၸၢႆး ဢၼ်လပ်းမိင်းဝႆႉၼၼ်ႉယူႇ ၼႃႈတႃမၼ်းၸၢႆး ပဵၼ်ဢၼ်ႁၢင်ႈလီႁၵ်ႉဝႆႉတႄႉတႄႉ ၊ ပဵၼ်တၢင်းလွတ်ႈၵၢင်းတၢင်းၶီမႆႈဝႆႉတႄႉတႄႉလႄႈ ပႃႈမွၼ်း ပဵၼ်ဢၼ်လီႁၵ်ႉလီဢီးလူ ၵႂႃႇတႄႉတႄႉ သေ -
“ သူ... ႁဝ်းႁဵတ်းၼႆ ဢမ်ႇလီႁႃႉ ... ... ”
“ ႁဵတ်းႁိုဝ်... ... ”
“ လုၵ်ႈဢွၼ်ႇၵေႃႉၼႆႉ တႃႉလီဢီးလူပိူၼ်ႈလႃႈ ... ႁၵ်ႉၵေႃႈလီႁၵ်ႉ ပိူၼ်ႈတႄႉတႄႉ ... ႁႃးသွင်ၵေႃႉၵေႃႈ တေႃႈဢမ်ႇမီးလုၵ်ႈသေၵေႃႉ ၵွပ်ႈၼႆ ပဵၼ်ႁိုဝ်ပဵၼ် ႁႃးဢဝ်ၵဵပ်းလဵင်ႉလႃႈ သူဝႃႈ ... ဢမ်ႇလီၼႄႇ... ... ”
လုင်းၸၢႆးၽေႇ ဝူၼ်ႉၵႂႃႇဝူၼ်ႉၶိုၼ်းသေ -
“ ပေႃးဝႃႈ... ႁႃးတေဢဝ်ၵႂႃႇႁဵတ်းၼႆ ၼႆၸိုင် မိူၼ်ၵၼ်တင်း ႁႃးလၵ်ႉလုၵ်ႈပိူၼ်ႈဢိူဝ်ႈ ... မႂ်းဝႃႈ ... ဢမ်ႇလီယူဝ်ႉ... ... ”
“ ဢူဝ် ... ... သူၵေႃႈ ...ၽႂ်ဢမ်ႇႁူႉသႄႈ ...ၽႆးမႆႈဝၢၼ်ႈၶဝ်သေ ၶဝ်ၵေႃႈ တေထၢင်ႇလုၵ်ႈၶဝ် တၢႆၵိုၵ်းၽႆးယဝ်ႉ ၼႆၵႂႃႈ ... သူယႃႇပေဝူၼ်ႉတႂ်ႈဝူၼ်ႉၼိူဝ်ယူႇလႃႈ ... ၶိုၼ်ႈၵႃး လႄႈ ... ၵူဝ်ပိူၼ်ႈမႃးႁၼ်... ”
ၶႃပူႇဢွၵ်ႇ ၼႅတ်ႈၶိုၼ်ႈၵႃးသေ ႁေႃႈမႃးၽႂ်းၽႂ်းယဝ်ႉ။ ၵႃးဢွၼ်ႇၶဝ် သၢမ်ၵေႃႉပၢႆတူဝ်ၼိုင်ႈၼၼ်ႉ သိုပ်ႇလေႃႈ သိုပ်ႇႁေႃႈပူၼ်ႉဢွၵ်ႇၵျွၵ်ႉမႄးသေ လူင်းမႃးၼႂ်းႁူၺ်ႈၶူဝ်ၵိုတ်ႈယူႇ။ ၼၢႆးမွၼ်းတႄႉ ၵဵပ်းလႆႈ လုၵ်ႈၸၢႆးဢွၼ်ႇ ၵေႃႉၼိုင်ႈယဝ်ႉလႄႈ ၸူမ်းသိူဝ်းသေ လွမ်လွမ်ၼူမ်ၵႅမ်ႈလုၵ်ႈၸၢႆးမၼ်းယူႇ ၊ ယူႇၵမ်းၼိုင်ႈ ၸၢႆးၸၢႆးႁူႉတူဝ် မိုၼ်းတႃမႃးသေ လွမ်တူၺ်း ၼႃႈပႃႈမွၼ်းဝႆႉယူႇ ၊ ၼႂ်းတႃၸၢႆးၸၢႆးတႄႉ ႁၼ်ၼႃႈပႃႈမွၼ်း ပဵၼ်ၼႃႈမႄႈၶဝ်ဝႆႉလႄႈ မၼ်းၸင်ႇႁွင်ႉဝႃႈ -
“ မႄႈ ... မႄႈ ... ” ၼႆၵမ်းၼိုင်ႈယဝ်ႉ။
ပႃႈမွၼ်း ဢမ်ႇတွၼ်ႉလႆႈငိၼ်း ၽႂ်မႃးႁွင်ႉမၼ်းဝႃႈ မႄႈ ... မႄႈ ... ၼႆသေပွၵ်ႈလႄႈ ၼႂ်းၵႄႈၵၢင်ၸႂ်မၼ်း ပဵၼ်ဢၼ်ၸူမ်းသိူဝ်းၵႂႃႇတႄႉတႄႉ ၊ ၸၢႆးၸၢႆး ၶိုၼ်းသိုပ်ႇထၢမ် -
“ မႄႈ... မႄႈ ... ထူင်မႂ်ႇၸၢႆး မီးလႂ်... ... ”
“ မီးဢိူဝ်ႈ ... မႄႈဢဝ်သိမ်းဝႆႉဢိူဝ်ႈ ... ၼွၼ်းလႄႈမႄႈဝႃႈ”
ၸၢႆးၸၢႆးမိုၼ်းတႃတူၺ်းလီလီသေ ၵေႃႉဢၼ်ႁွပ်ႇမၼ်းဝႆႉၼၼ်ႉ ႁူႉဝႃႈ ဢမ်ႇၸႂ်ႈမႄႈမၼ်းလႄႈ မၼ်းၸင်ႇၵူဝ်သေ ႁႆႈယူႇယဝ်ႉ ။
“ ဢိုဝ်း ... ... ႁီး ... ... မႄႈ မႄႈ ... မီးလႂ်... ... ”
“ ယႃႇႁႆႈ ... ယႃႇႁႆႈ ... မိုဝ်းၸၢႆးၸဵပ်းဝႆႉၼႃႇ ... ”
ဝုၵ်ႉ ... ဝုၵ်ႉ ... ဝုၵ်ႉ ... ဝုၵ်ႉ ...
ငိၼ်းသဵင်ဢီႇၽဵင်းႁဝ်ႇလႄႈ ၸၢႆးၸၢႆးၵူဝ်သေ ၼႅတ်ႈၵွတ်ႇၶေႃး ပႃႈမွၼ်းဝႆႉယဝ်ႉ။
“ ၸၢႆး ၸၢႆး ... ၵူဝ်... ”
ပႃႈမွၼ်းၵေႃႈ ၶိုၼ်းၵွတ်ႇၸၢႆးၸၢႆးဝႆႉသေ -
“ ယႃႇၵူဝ် ၸၢႆး ... ၼွၼ်းလပ်းတႃၸၢႆးၸၢႆးဝႆႉသေ - ၸၢႆးၸၢႆးၵေႃႈ လပ်းတႃသေ ၶိုၼ်းၼွၼ်းၵႂႃႇယဝ်ႉ။ ၵႃးဢွၼ်ႇၶဝ်တႄႉ သိုပ်ႇႁေႃႈ သိုပ်ႇလေႃႈၵႂႃႇယူႇ။