ၶႅၵ်ႇ/တွၼ်ႈသွင်
ထိုင်မႃးထႅင်ႈ ဝၼ်းၼိုင်ႈ ဢူႈၸၢႆးၼွင်ႉၶဝ်ၸၢႆးထုၼ်းၵေႃႈ ၵႂႃႇၽၼ်းသင်ႉထူဝ်ႇၼႂ်းထိူၼ်ႇယဝ်ႉ၊ ၼႂ်းၸႂ်းမၼ်းတႄႉ လႆႈႁဵတ်းၵၢၼ်ႁိူဝ်ႉၼႆသေတႃႉ ပေႃးလႆႈႁၼ် လုၵ်ႈၸၢႆးဢွၼ်ႇမၼ်းၼႆ ႁိူဝ်ႉႁၢႆၵမ်းလဵဝ်ယဝ်ႉ။ ၵၢင်ၸႂ်ဢၼ်မုင်ႈမွင်းၼႃႇၼၼ်ႉတႄႉ မုင်ႈမွင်း ၶႂ်ႈၼုင်ႈသၢင်ႇပၼ် လုၵ်ႈၸၢႆးမၼ်းသေ ၶႂ်ႈပဵၼ်ပေႃႈသၢင်ႇၼၼ်ႉယဝ်ႉ၊ ၵွပ်ႈၼႆ ပီၼႆႉၶဝ်ႈၼႃးၶဝ်ၵေႃႈ ၶဝ်လႆႈၼမ်သေပီၵၢႆ မၢၵ်ႇၶိူဝ်သူမ်ႈၵေႃႈ တေလႆႈၶၢႆထႅင်ႈၼႆလႄႈ မၼ်းပဵၼ်လွင်ႈၸူမ်းသိူဝ်းသေ တိူဝ်းႁဵတ်းၵၢၼ်သူၼ်ၶဝ်ယူႇ။
ၼႂ်ၼၼ်ႉ ၼၢင်းၼူၼ်းလုၵ်ႉမႃးမႃႇၶဝ်ႈႁုင်ၽၵ်း တၵ်းၼမ်ႉယဝ်ႉသေ မၼ်းၼၢင်းပူၼ်ႉၵႂႃႇၵၢတ်ႇဝဵင်းယဝ်ႉ။ တီႈႁိူၼ်းတႄႉ ၵိုတ်းၼၢႆးမူၼ်းလႄႈ လၢၼ်ၸၢႆးမၼ်းသွင်ၵေႃႉ ၶဝ်ပႂ်ႉႁိူၼ်းယဝ်ႉ။ ၼၢႆးမူၼ်း ဢဝ်ၸိူဝ်ႉထူဝ်ႇ မႃးလိူၵ်ႈသေ သႂ်ႇၼႂ်းတႅပ်း ဢဝ်တၢၵ်ႇ တီႈၼွၵ်ႈၸၢၼ်းၼၼ်ႉယူႇ။ ၸၢႆးၸၢႆးလႄႈ ၸၢႆးၼွင်ႉတႄႉ လဵၼ်ႈၵေႃႉၵၼ်ယူႇတႂ်ႈလၢင်ႈႁိူၼ်းၶဝ်။ ၶႃသွင်ၵေႃႉပီၼွင်ႉ တေႃႇမၢၵ်ႇၵွၼ်ႈလိၼ်ၵၼ် မူၼ်ႈမူၼ်ႈသိူဝ်းသိူဝ်းယူႇ။ ၸၢႆးၼွင်ႉ ဢဝ်မၢၵ်ႇၵွၼ်ႈလိၼ်မၼ်း ၵိင်ႈၵႂႃႇသႂ်ႇ ဢၼ်ၶဝ်တင်ႈထႅဝ်ဝႆႉၼၼ်ႉယဝ်ႉ ယွၼ်ႉပိူဝ်ႈ ဢမ်ႉတိူဝ်ႉလႄႈ ၸၢႆးၸၢႆးၸင်ႇဝႃႈ-
“ ႁေး... ၸၢႆးၼွင်ႉဢမ်ႇတိူဝ်ႉ... ၵမ်းၼႆႉ ၸၢႆးၸၢႆးတေထိုမ်ႈ”
ၸၢႆးၸၢႆးၵေႃႈ ဢမ်ႇတိူဝ်ႉၼင်ႇၵဝ်ႇလႄႈ ၸၢႆးၼွင်ႉၸင်ႇၸူမ်းသေ ၶိုၼ်းဝႃႈ-
“ ႁေး... ႁေး... ၸၢႆးၸၢႆးၵေႃႈဢမ်ႇတိူဝ်ႉ ... ၵမ်းၼႆႉ ၼွင်ႉၼွင်ႉ တေၶိုၼ်းထိုမ်ႈလီလီ... ”
ၸၢႆးၼွင်ႉ ၶိုၼ်းထိုမ်ႈတိူဝ်ႉသႂ်ႇ တူဝ်ၵၢင်ၼၼ်ႉယဝ်ႉ-
“ ႁေး ... ၼွင်ႉလႆႈၵိၼ်ယဝ်ႉ ပွတ်းတႂ်ႈၼႆႉ... ”
ၸၢႆးၼွင်ႉ သိမ်းဢဝ်မၢၵ်ႇၵွၼ်ႈလိၼ်မၼ်းသေ ပႂ်ႉတူၺ်းၸၢႆးၸၢႆးထိုမ်ႈယူႇ၊ ၸၢႆးၸၢႆးၵေႃႈ ထိုမ်ႈၺႃး တူဝ်ၵႆသေပိူၼ်ႈၼင်ႇၵဝ်ႇလႄႈ-
“ ဢလႄး ... ... ၸၢႆးၸၢႆးၵေႃႈ လႆႈၵိၼ်ယဝ်ႉ ... ၵမ်းၼႆႉ တေႃႇၵေႃႉ ႁႃႈလုၵ်ႈ ... ”
ၶႃပီႈၼွင်ႉ မႃးၶပ်ႉၵေႃႉႁႃႈလုၵ်ႈလႄႈ ပဵၼ်ၵႂႃႇသိပ်းလုၵ်ႈ၊ ၶႃသိုပ်ႇလဵၼ်ႈၵၼ်ယူႇႁဵတ်းၼၼ် ၼၢႆးၶဝ်ၸင်ႇႁွင်ႉဝႃႈ -
“ ၸၢႆးၸၢႆး ၸၢႆးၼွင်ႉ... မႃးလႄႈ... မႃး... ၵိၼ်ဢွႆႈလႄႈ... ”
ၶႃပီႈၼွင်ႉၵေႃႈ ဢႅၼ်ႇၶိုၼ်ႈမိူဝ်းၼိူဝ်ၸၢၼ်းသေ မိူဝ်းၶူပ်းၵိၼ်ဢွႆႈ ဢၼ်ၼၢႆးၶဝ်တိုၵ်ႉပွၵ်ႇလဵင်ႉၼၼ်ႉယူႇ။ ၼၢႆးၶဝ်ပွၵ်ႇလဵင်ႉဢွႆႈယူႇၸိူင်ႉၼၼ် မၼ်းၶုၵ်းၸႂ်လႆႈ မေႃႈၽၵ်းမၼ်း တင်ႈဝႆႉၼႂ်းသိုင်ႇၽႆးၼၼ်ႉလႄႈ မၼ်းၸင်ႇဝၢင်းဝႆႉၽႃႉမၼ်းသေ ၶဝ်ႈမိူဝ်းတူၺ်း မေႃၽၵ်းၸေႃးမၼ်းယဝ်ႉ။
ၽွင်းၼၼ်ႉ ၸၢႆးၸၢႆး ၸင်ႇယိပ်းဢဝ်ၽႃႉၼၢႆးၶဝ်ၼၼ်ႉသေ မႃးၽၼ်းမႃးပွၵ်ႇဢွႆႈ ဢၼ်မၼ်းတေၵိၼ်ထႅင်ႈၼၼ်ႉယူႇ။
ၸၢႆးၼွင်ႉ ၸင်ႇဝႃႈ -
“ ၸၢႆးၸၢႆး ... ၽၼ်းပၼ်ဢွႆႈၸၢႆးၼွင်ႉၽွင်ႈ ၼွင်ႉဢမ်ႇၶူပ်းလႆႈ... ”
“ ၵမ်ႉၵွၼ်ႇလႄႈ... ၸၢႆးၸၢႆးတေၽၼ်း ဢၼ်ၼႆႉၵွၼ်ႇ... ”
ၸၢႆးၸၢႆးႁဵတ်းႁိုဝ်ၽၼ်းၵေႃႈ ဢမ်ႇႁူႉ ယွၼ်ႉပိူဝ်ႈ မၼ်းဢမ်ႇမေႃၽၼ်းလႄႈ ဢဝ်ၽႃႉၽၼ်းတိူဝ်ႉၺႃးမႅၼ်ႈ မိုဝ်းၼိဝ်ႉၸီႉမၼ်း ၽၢႆႇသၢႆႉယဝ်ႉ။ မၼ်းၸဵပ်းသေ ႁၼ်လိူတ်ႈလႅင်ဢွၵ်ႇမႃးလႄႈ မၼ်းၸင်ႇႁွင်ႉႁႆႈၵမ်းလဵဝ်ယဝ်ႉ-
“ ၼၢႆး... ႁႃႈ... ၽႃႉတိူဝ်ႉမိုဝ်းၸၢႆးယဝ်ႉ... ဢိုဝ်း ...ဢိုဝ်း...”
ၼၢႆးၶဝ်ၵေႃႈ ၸင်ႇၼႅတ်ႈဢႅၼ်ႇဢွၵ်ႇသိုင်ႇၽႆး မႃးၸူးလၢၼ်မၼ်း ၽႂ်းၽႂ်းသေ -
“ ဢလူဝ်း ... ၸၢႆးၵႂႃႇယိပ်းၽႃႉႁဵတ်းသင်လႃႇ... ဢူႈသူ တိုၵ်ႉႁႃလပ်ႉဝႆႉၵူၺ်း... မၼ်းၽၢႆဝႃႈၽၢႆဢိူဝ်ႈ... ၼၼ်ႉ... ”
ၼၢႆးၶဝ် ၸင်ႇၼႅတ်ႈၵႂႃႇပိတ်းဢဝ် မႂ်ယႃႈမိူင်းႁၢမ်း မႃးထုပ်ႉသေ ဢုမ်ႇသႂ်ႇပၼ် မိုဝ်းၸၢႆးၸၢႆးယူႇယဝ်ႉ-
“ ဢီး... ဢိုဝ်း ... သႅပ်ႇဢိူဝ်ႈ ၼၢႆး ... ၸဵပ်းဢိူဝ်ႈ... ဢီး ... ”
ႁၼ်ၸၢႆးၸၢႆးႁႆႈလႄႈ ၸၢႆးၼွင်ႉၵေႃႈ ႁၢင်ႈပေႃးၶႂ်ႈႁႆႈၸွမ်းယူႇယဝ်ႉ။ ယွၼ်ႉပိူဝ်ႈ ၽႃႉတိူဝ်ႉမိုဝ်းၸၢႆးၸၢႆးယဝ်ႉလႄႈ ဝၼ်းၼၼ်ႉ ၶႃပီႈၼွင်ႉဢမ်ႇၸၢင်ႈၵႂႃႇဢဵၼ်ႈတႂ်ႈလၢင်ႈယဝ်ႉ၊ ၶႃပီႈၼွင်ႉ ဢဵၼ်ႈၵေႃႉၵၼ် ၼိူဝ်ႁိူၼ်းၵူၺ်း။
ထိုင်မႃးဝၢႆးဝၼ်း၊ မႄႈၶဝ်ပွၵ်ႈၵၢတ်ႇမႃးၼႆ ၸၢႆးၼွင်ႉၸင်ႇဝႃႈ
“ မႄႈ... မႄႈ... ၽႃႉတိူဝ်ႉမိုဝ်း ၸၢႆးၸၢႆးဢိူဝ်ႈ... ”
မႄႈၶဝ်တူၵ်းၸႂ်သေ-
“ မီးလႂ် ... ၸၢႆး... ဢလူဝ်ႉ ... ... တိူဝ်ႉၼမ်ဝႆႉႁႃႉ... ”
ၼၢႆးၶဝ်ၸင်ႇမွၵ်ႇဝႃႈ-
“ ၼမ်တၢၼ်ႇတၢၼ်ႇဢိူဝ်ႈ... ”
ၸၢႆးၸၢႆး ၼမ်ႉတႃယွႆႉတူၵ်းသေ ႁႆႈတေႃႇမႄႈၶဝ်ယူႇ၊ မႄႈၶဝ် ၸင်ႇၸဵတ်ႉပၼ် ၼမ်ႉတႃလုၵ်ႈၸၢႆးမၼ်းသေ -
“ ယႃႇပေႁႆႈ... မႄႈဝႃႈ... ၼေႈ ... မႄႈသိုဝ်ႉထူင်ႁၢင်ႈလီလီမႃး တႃႇပၼ်ၸၢႆးဢိူဝ်ႈ... ”
ၸၢႆးၸၢႆးၵေႃႈ... ၸူမ်းတူၺ်းထူင်ႁၢင်ႈလီဢွၼ်ႇ ဢၼ်မႄႈၶဝ်သိုဝ်ႉမႃးသေ မႃးပၼ်မၼ်းၼၼ်ႉယူႇ၊ ၸၢႆးၼွင်ႉၸင်ႇဝႃႈ -
“ မႄႈ... ၵွင်ႈၸၢႆးၼွင်ႉလူး... ”
မႄႈၶဝ် ၸင်ႇဢဝ်ၵွင်ႈ ဢၼ်မၼ်းသိုဝ်ႉမႃးၼၼ်ႉသေ-
“ ၼေႈ... ၸၢႆးၼွင်ႉ ၵွင်ႈ တႃႇၸၢႆးၼွင်ႉ... ”
ၸၢႆးၼွင်ႉၵေႃႈ ၸူမ်းသိူဝ်း ယိပ်းဢဝ်ၵွင်ႈမၼ်းသေ ၼၢဝ်ႉၼဵၼ်မၼ်း တူၺ်းယူႇယဝ်ႉ-
“ တၢၵ်ႉ... တၢၵ်ႉ... တၢၵ်ႉ... တၢၵ်ႉ ... တၢၵ်ႉ ... ”
မၼ်းၸၢႆးၵျေႃႇၸႂ်သေ လဵၼ်ႈၵွင်ႈမၼ်း ၵျေႃႇၵျေႃႇသိူဝ်းသိူဝ်းယူႇ။
ထိုင်မႃးတၢမ်းၶမ်ႈ ၽွင်းမိူဝ်ႈဢူႈၶဝ် ပွၵ်ႈၵၢၼ်မႃး မၼ်းၸၢႆး လႆႈႁၼ်လႄႈ မၼ်းၸင်ႇ ဢဝ်ၵွင်ႈမၼ်း ဢႅၼ်ႇလူင်းႁိူၼ်းသေ ၵႂႃႇယိုဝ်းၼႄဢူႈၶဝ်ယူႇယဝ်ႉ ၊ ဢူႈၶဝ်ၵေႃႈ ၸင်ႇၸူမ်းသိူဝ်း ႁွပ်ႇဢုမ်ႈဢဝ် လုၵ်ႈၸၢႆးမၼ်းသေ -
“ ဢလူဝ်ႉ... ... ၸၢႆးၼွင်ႉ လႆႈၵွင်ႈမႂ်ႇႁႃႉ... ”
မၼ်းၸၢႆးငွၵ်းႁူဝ်မၼ်း ၼႄဢူႈၶဝ်သေ -
“ ပေႃးၸၢႆး ယႂ်ႇမႃး ... ၸၢႆးတေႁဵတ်း လုၵ်ႈသိုၵ်း... ”
“ ဢလူဝ်ႉ... တေႁဵတ်းလုၵ်ႈသိုၵ်း ... ၼႆႁႃႉ... ... ”
“ ၸႂ်ႈဢေႃႈ... ”
“ ၸၢႆးတေယိုဝ်းၽႂ်လႃႇ... ”
“ ယိုဝ်း ၵူၼ်းႁၢႆႉၶဝ်... တူင်ႉ ... ၼႆဢိူဝ်ႈ ... ”
ဢူႈၶဝ် ၸူမ်းၶူဝ်သေ ႁွပ်ႇမၼ်းၸၢႆး တေႃႇပေႃးၽႅဝ်ၼိူဝ်ႁိူၼ်းယဝ်ႉ။
ၶမ်ႈၼၼ်ႉ ၶဝ်ပေႃႈမႄႈလုၵ်ႈ ၼၢႆးလၢၼ် ဢွၼ်ၵၼ်ၼွၼ်းၸဝ်ႉၸဝ်ႉ ယူႇယဝ်ႉ။
တၢမ်းၼႃႈမိူင်းၸမ်လႅင်း
“ တူင်ႉ ... တူင်ႉ ... တူင်ႉ ... တူင်ႉ ... ... ”
“ ဝီး ... ဝီး ... ... ဝီး ... ဝီး ... ... ... ”
“ တိူင်ႉ ... ... ထႁိူင်ႉ ... ... ... ”
“ ပၢင်ႉ ... ပၢင်ႉ ... ပၢင်ႉ ... ပၢင်ႉ ... ပၢင်ႉ ... ”
“ တူၵ်ႉ ... တူၵ်ႉ ... တူၵ်ႉ ... တူၵ်ႉ ... တူၵ်ႉ ... ...”
“ ဝီး ... ... ဝီး ... ... ဝီး ... ... ... ”
ငိၼ်းသဵင်ၵွင်ႈ သဵင်မၢၵ်ႇ တႅၵ်ႇၼႂ်းဝၢၼ်ႈလႄႈ ၼၢႆးမူၼ်းၸင်ႇၽုတ်ႇလုၵ်ႉမႃး ၽႂ်းၽႂ်းသေ -
“ သၢင်ထုၼ်း ... ဢေးၼူၼ်း ... ပိူၼ်ႈပဵၼ်ပွႆးတိုၵ်းၵၼ် ၼႂ်းဝၢၼ်ႈ ဢမ်ႇၸႂ်ႈႁႃႉ ၼႆႉ ... ”
သၢင်ႇထုၼ်းလႄႈၼၢင်းၼူၼ်းၵေႃႈ ၸင်ႇၼႅတ်ႈလုၵ်ႉမႃး ၽႂ်းၽႂ်းသေ -
“ ၸႂ်ႈ ... ၸႂ်ႈဢေႃႈ မႄႈ ... ”
သၢင်ႇထုၼ်း ၵႂႃႇလွမ်တူၺ်း တီႈႁူးၽႃသေ -
“ မႄႈ ... ၽၢႆႇၸၢၼ်းၼၼ်ႉ ၽႆးမႆႈႁိူၼ်းယူႇယဝ်ႉ... ”
“ပေႃးၼၼ် ... ပၢႆႈလူင်းႁိူၼ်းလႄႈ ... ၶူဝ်းဢၼ်လူဝ်ႇၵေႃႈ ဢဝ်လႄႈ... ”
သဵင်ၵွင်ႈသဵင်မၢၵ်ႇၵေႃႈ တႅၵ်ႇမေႃးတင်းသွင်ၽၢၵ်ႇ ႁၢဝ်ႉႁႅင်းတႄႉတႄႉ ၊ သဵင်ၵူၼ်းႁွင်ႉသႅၼ်ႇႁွင်ႉႁႆႈ ဢူၼ်ဢၢၼ်မေႃးပၼ်းတူင်ႉတိုၼ်ႇၵႂႃႇ တင်းဝၢၼ်ႈယဝ်ႉ ။ ယွၼ်ႉပိူဝ်ႈ ၵူဝ်ၵွင်ႈၵူဝ်မၢၵ်ႇလႄႈ ၽႂ်ၵေႃႈဢမ်ႇတၼ်းၶႄၽႆးသေ ဢွၼ်ၵၼ်ပၢႆႈႁင်းၽႂ်မၼ်း ႁႂ်ႈလွတ်ႈၵူၺ်းယဝ်ႉ ။ ၼၢႆးမူၼ်းၵေႃႈ ၼႅတ်ႈၵႂႃႇသိမ်ႈဢဝ် ၶူဝ်းမၼ်းသေ လူင်းႁိူၼ်းမႃးယဝ်ႉ။
ၽိူဝ်ႇၽႅဝ်တီႈတႂ်ႈ မၼ်းၶုၵ်းၸႂ်လႆႈ လၢၼ်ဢွၼ်ႇမၼ်းသွင်ၵေႃႉလႄႈ ၸင်ႇၼႅတ်ႈၶိုၼ်း လႅၼ်ႈၶိုၼ်ႈၼိူဝ်ႁိူၼ်းၵႂႃႇ သေ -
“ ဢေးၼူၼ်း ... လုၵ်ႈဢွၼ်ႇသွင်ၵေႃႉပီႈၼွင်ႉလူး ...”
ၼၢႆးမူၼ်းလႄႈၼၢင်းၼူၼ်း ၼႅတ်ႈၶဝ်ႈၵႂႃႇ ၼႂ်းႁွင်ႇသေ ၵႂႃႇၸူးၶႃသွင်ၵေႃႉပီႈၼွင်ႉယဝ်ႉ၊ ၶႃပီႈၼွင်ႉၵေႃႈ တူၵ်းၸႂ်သဵင်မၢၵ်ႇသေ ၸၢႆးၼွင်ႉတႄႉ လုၵ်ႉမႃးၼင်ႈယူႇတွၵ်းသွၵ်းယဝ်ႉ၊ ၸၢႆးၸၢႆးတႄႉ ၵူဝ်သေ ႁႆႈဝႆႉယူႇ။ ဢေးၼူၼ်း ၸင်ႇၵႂႃႇႁွပ်ႇဢဝ် ၸၢႆးၸၢႆးသေ ဢွၵ်ႇမႃးယဝ်ႉ။
ဢေးၼူၼ်း လွမ်တူၺ်းၵႂႃႇ လႆႈႁၼ်ၽႆးမႆႈႁိူၼ်းၶဝ်ဝႆႉယူႇယဝ်ႉ။
“ မႄႈ ... မႄႈ... မၢၵ်ႇတိူဝ်ႉႁိူၼ်းႁဝ်းယဝ်ႉ ... ပီႈထုၼ်းၵေႃႈ ဢမ်ႇႁၼ်မႃး ... ”
ၼၢႆးမူၼ်းၵေႃႈ လွမ်တူၺ်းၽႆးလုၵ်ႉယူႇႁိုၼ်ႉႁိုၼ်ႉသေ ၼမ်ႉတႃမၼ်းၵေႃႈ လႆလူင်းၵႅမ်ႈမႃးသေ -
“ ဢလူဝ်ႉ ... ၽြႃး ... ၽြႃး ... ... ”
ၼၢႆးမူၼ်းတိုၵ်ႉဝႃႈၼင်ႇၼၼ်ၵူၺ်း လႆႈႁၼ်ဢေးၼူၼ်း ဢၢင်ႈၵႂႃႇတၢင်းႁိူၼ်းလႄႈ -
“ ဢေးၼူၼ်း ... မႂ်းတေၵႂႃႇလႂ်ၼၼ်ႉ ... ”
“ၶႃႈတေၵႂႃႇတူၺ်း ပီႈထုၼ်းဢေႃႈ ... ”
“ ဢမ်ႇလူဝ်ႇၵႂႃႇ ... မႂ်းၶႂ်ႈတၢႆႁႃႉ... သဵင်ၵွင်ႈသဵင်မၢၵ်ႇပေႃးပဵၼ်တၢၼ်ႇၼႆႉ... ”
ၼၢင်းၼူၼ်းမႆႈၸႂ်ၼႃႇယဝ်ႉလႄႈ ဝႆႉပႅတ်ႈၸၢႆးၸၢႆးသေ ဢႅၼ်ၵႂႃႇၸူး တီႈႁိူၼ်းၶဝ်ယူႇယဝ်ႉ။
“ ဢေးၼူၼ်း... ဢေးၼူၼ်း ... ယႃႇပေၵႂႃႇ... ... ”
မႄႈၶဝ်ႁၢမ်ႈသီးမၼ်း ယူႇၵေႃႈ တေႃႈဢမ်ႇလႆႈ ၊ ၸၢႆးၸၢႆးၶႃ ပီႈၼွင်ႉၵေႃႈ ႁႆႈပေႃးပၼ်းၵႂႃႇယဝ်ႉ။ ၽွင်းမိူဝ်ႈၼၢင်းၼူၼ်း ဢႅၼ်ႇသေ ၽႅဝ်ၵႂႃႇတီႈဢမ်ႇပေႃးၵႆၼၼ်ႉ မၢၵ်ႇၵွင်ႈလုၵ်ႈၼိုင်ႈ တိူဝ်ႉၺႃးႁူဝ်ဢူၵ်းမၼ်းၼၢင်းသေ လူမ်ႉထူၵႂႃႇယဝ်ႉ။ မၼ်းၼၢင်း တေႃႉတႄႉဢွၵ်ႇသဵင်ႁွင်ႉဝႃႈ “ မႄႈ ... ... ” ၼႆၵမ်းၼိုင်ႈၵူၺ်း။
လႆႈငိၼ်းသဵင် လုၵ်ႈယိင်းမၼ်းႁွင်ႉဝႃႈ မႄႈၼႆလႄႈ ၼၢႆးမူၼ်းၵေႃႈ ၸင်ႇၼႅတ်ႈဢႅၼ်ႇဢွၵ်ႇၵႂႃႇ ၸူးလုၵ်ႈယိင်းမၼ်းယဝ်ႉ ။ တီႈႁိမ်းတၢင်းၽႄ ဢၼ်ၼိုင်ႈၼၼ်ႉ မၼ်းၸင်ႇၵႂႃႇၽႃႇၺႃး ၵူၼ်းၵေႃႉၼိုင်ႈသေ ၼၢႆးမူၼ်း လူမ်ႉၵႂႃႇၼိူဝ်တၢင်းယဝ်ႉ။
ယွၼ်ႉပိူဝ်ႈ ငဝ်းၽႆး ဢၼ်မႆႈႁိူၼ်းၼၼ်ႉလႄႈ ၼၢႆးမူၼ်းၸင်ႇလွမ်တူၺ်း ၵေႃႉဢၼ်မႃးၽႃႇမၼ်းၼၼ်ႉသေ -
“ သၢင်ႇထုၼ်း ... ၵႂႃႇတူၺ်းဢေးၼူၼ်းလူး ... ”
“ မၼ်းမီးလႂ်ၶႃႈ ... မႄႈ ... ”
သဵင်ၵွင်ႈသဵင်မၢၵ်ႇၵေႃႈ သမ်ႉပေႃးတၢၼ်ႇ ပိူၼ်ႈၶူဝ်ႈၶဝ်ႈတႅၵ်ႇပၼ်ၵၼ်ယူႇ၊ ၼၢႆးမူၼ်း ၸင်ႇၸိၼႄသေ -
“ မၼ်းလူမ်ႉယူႇတီႈ ... တီႈ ၵၢင်တၢင်းၼၼ်ႉၼေႈ ... ”
“ ၼၢႆး... ၶႃသွင်ၵေႃႉပီႈၼွင်ႉလူး ... မီးလႂ်... ? ”
“ မီးၼႂ်းႁွင်ႈႁိမ်းလႅၼ်ႁူဝ်ႉၼၼ်ႉ... ဢိူဝ်ႈ ... ”
“ ဢေႃႈ ... ၼၢႆးၵႂႃႇတူၺ်းၶႃပီႈၼွင်ႉလႄႈ ၶႃႈတေၵႂႃႇတူၺ်း မႄႈၶဝ် ”
ၸၢႆးသၢင်ႇထုၼ်းဝႃႈၼၼ်သေ ဢႅၼ်ႇၵႂႃႇ ၸူးမႄးမၼ်းၵမ်းလဵဝ်ယဝ်ႉ။ ၼၢႆးမူၼ်း ဢၢင်ႈသီးမၼ်းယူႇၼႆသေတႃႉ ဢမ်ႇတၼ်းသီး ၽွင်းမိူဝ်ႈ သၢင်ႇထုၼ်း ၽႅဝ်ၵႂႃႇႁိမ်းၼၢင်းၼူၼ်းသေ ၵႂႃႇႁွပ်ႇၼၢင်းၼူၼ်းယူႇၼၼ်ႉ မၢၵ်ႇလူင်မႃးတူၵ်းသႂ်ႇ ႁိမ်းၶႃသွင်ၵေႃႉလႄႈ သၢင်ႇထုၼ်းၵေႃႈတိူ ဝ်ႉမၢၵ်ႇသေ တၢႆထင်တီႈၵႂႃႇၵမ်းလဵဝ်ယဝ်ႉ။
ၼၢႆးမူၼ်းၵေႃႈ ႁွင်ႉႁႆႈဝႃႈ “သၢင်ႇထုၼ်း” ၼႆသေ ၸဵတ်ႉၼမ်ႉတႃမၼ်း ၼႂ်းၵႄႈမၢၵ်ႇၵွင်ႈ ၵႄႈဢၢႆယၢမ်းယူႇ။ လႆႈငိၼ်း သဵင်ႁႆႈလၢၼ်မၼ်းလႄႈ မၼ်းၸင်ႇ ၼႅတ်ႈမူပ်ႇမူပ်ႇၵၢၼ်းၵၢၼ်းသေ မႃးၸူးလၢၼ်မၼ်းယဝ်ႉ။
လႆႈမႃးႁၼ် လၢၼ်မၼ်းၵေႃႉၼိုင်ႈၵူၺ်းလႄႈ -
“ ၸၢႆးၼွင်ႉ ... ပီႈဢၢႆႈမႂ်းၵႂႃႇလႂ် ... ”
ၸၢႆးၼွင်ႉႁႆႈသေ ၸီႉၼႄတၢင်းၸၢႆးၸၢႆးလႅၼ်ႈပၢႆႈၵႂႃႇၼၼ်ႉယဝ်ႉ သဵင်ၵွင်ႈသဵင်ႈမၢၵ်ႇ တူၵ်းမႃးႁိမ်းၶႃၼၢႆးလၢၼ်လႄႈ ၼၢႆးမူၼ်းၸင်ႇၵႂႃႇ ၵွတ်ႇၸၢႆးၼွင်ႉသေ မူပ်ႇၽႅပ်ႉၸပ်းလိၼ် ဝႆႉယဝ်ႉ။ တၢင်းဢၼ် ၸၢႆးၸၢႆးလႅၼ်ႈၵႂႃႇၼၼ်ႉၵေႃႈ မၢၵ်ႇလူင်တူၵ်းသႂ်ႇ တႅၵ်ႇယူႇပိုင်ႉပိုင်ႉယဝ်ႉ။
သဵင်ၵွင်ႈသဵင်မၢၵ်ႇ ထၢတ်ႇၵႂႃႇၵမ်းၼိုင်ႈယဝ်ႉလႄႈ ၼၢႆးမူၼ်းၸင်ႇႁွပ်ႇဢဝ် လၢၼ်မၼ်းသေ ဢႅၼ်ႇၵႂႃႇပၢႆႈတဵတ်ႇ ၼွၵ်ႈဝၢၼ်ႈယဝ်ႉ ။ ၼႂ်းဝၢၼ်ႈတႄႉ ၽႆးမႆႈလုၵ်ႉဝႆႉႁုၼ်ႉႁုၼ်ႉယူႇၵေႃႈ ဢမ်ႇမီးၵူၼ်းၶႄၽႆး။ ဝၢႆးသေၼၼ်ႉ သဵင်ၵွင်ႈသဵင်မၢၵ်ႇ ၶိုၼ်းမေႃးမႃး ပဵၼ်ၵမ်းပဵၼ်ၵမ်းသေ ၽွင်းၼႃႈမိူင်းလႅင်းပၢင်မႃးၼၼ်ႉ သဵင်ၵွင်ႈသဵင်မၢၵ်ႇတဵတ်ႇယဵၼ်ၵႂႃႇယဝ်ႉ။
ၵူၼ်းဝၢၼ်ႈၵူၼ်းသူၼ်ၶဝ်ၵေႃႈ ၵဝ်ၵဝ်မႂ်းမႂ်း ၶိုၼ်းဢွၼ်ၵၼ်ဝႆႉသတိသေ ၶဝ်ႈမႃးၼႂ်းဝၢၼ်ႈ မႃးၸူးႁိူၼ်းၽႂ်မၼ်း၊ မႃးႁႃပီႈႁႃၼွင်ႉၽႂ်မၼ်းယူႇ ၊ ၵေႃႉတၢႆၵေႃႈတၢႆ ၊ ၵေႃႉဢၼ်ႁၢႆၵေႃႈႁၢႆသေ ဝၢၼ်ႈၼႃးၶေႃဢွၼ်ႇၼႆႉ လႆႈၶၢမ်ႇတၢမ်ႇသိုၵ်း ၵႂၢႆးတေႃးၵၼ်သၢင်ႈတေးၼႃးယဝ်ႉ။
ၼၢႆးမူၼ်းၵေႃႈ ႁွပ်ႇဢဝ်ၸၢႆးၼွင်ႉသေ ၶဝ်ႈမႃးၼႂ်းဝၢၼ်ႈယူႇ ၊ မၼ်းၽႅဝ်မႃး ႁိမ်းသၢင်ႇထုၼ်းလႄႈၼၢင်းၼူၼ်း ဢၼ်တၢႆၸွမ်းၵၼ်ဝႆႉၼၼ်ႉသေ ၼၢႆးမူၼ်း ပဵၼ်ဢၼ်ႁႆႈမႆႈလိူတ်ႇယူႇ၊ ၸၢႆးၼွင်ႉႁၼ်ၼၢႆးၶဝ်ႁႆႈလႄႈ မၼ်းၸၢႆးၵေႃႈ ႁႆႈၸွမ်းၼၢႆးၶဝ်ယဝ်ႉ ။ မၼ်းၸၢႆးၵႂႃႇယိပ်းၶႅၼ်မႄႈမၼ်းသေ ၸၼ်ၶဝ်ႇႁွင်ႉဝႃႈ “ မႄႈ … … မႄႈ … … ” ၼႆယူႇသေတႃႉ မႄႈၶဝ် ဢမ်ႇၸင်ႈဝႆႇတူၺ်းမၼ်းၶိုၼ်းယဝ်ႉ။ ၼၢႆးၶဝ်ၸင်ႇႁႆႈသေ မႃးၵွတ်ႇၵဝ်မၼ်းၸၢႆး သႂ်ႇဝႆႉၼႂ်းဢူၵ်းၵႅၼ်ႇၵႅၼ်ႇယူႇ ။
“ ၸၢႆးၼွင်ႉဢိူၺ်း ႁဝ်းၼၢႆးလၢၼ် ပႄႉမႃးၵၢမ်ႇႁၢႆႉလႃႇ ၼၢႆးဝႃႈ သိုတ်ႉ ... သိုတ်ႉ ... ဢူႈမႄႈသူ တၢႆပႅတ်ႈမႂ်းယဝ်ႉဢိူဝ်ႈ ၸၢႆးဢိူၺ် ... မႂ်းတေၵႂႃႇႁွင်ႉၽႂ်ဝႃႈ ဢူႈ ... မႄႈ ... ၼႆလႃႇ ... ”
ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်မႃးၸွၼ်ဢီးလူ ၸၢႆးၼွင်ႉၶႃၼၢႆးလၢၼ်ယူႇ၊ ၸၢႆးၼွင်ႉၵေႃႈ ႁွင်ႉႁႆႈသေ ၶိုၼ်းၵႂႃႇၵွတ်ႇ ပေႃႈမႄႈမၼ်း ဢၼ်တၢႆဝႆႉဢမ်ႇတူင်ႉ ဢမ်ႇၼိုင်ၼၼ်ႉယူႇ။
“ မႄႈ ... မႄႈ ... ဢိုဝ်း ... ဢိုဝ်း ... ပေႃႈ ... ပေႃႈ...”
ယွၼ်ႉပိူဝ်ႈ မၼ်းဢဝ်ၼႃႈမၼ်း ငူပ်ႉသႂ်ႇၼိူဝ်ၼႃႈဢူၵ်းမႄႈၶဝ်လႄႈ ၼႃႈမၼ်းၸၢႆး ၼုၵ်းလိူတ်ႈမႄႈၶဝ်ယဝ်ႉ ။ မၼ်းၵႂႃႇ လုပ်ႈလုပ်ႈၵမ်းၵမ်း ပေႃႈမႄႈမၼ်းလႄႈ ၸွမ်းၶႅၼ်ၸွမ်းမိုဝ်းမၼ်းၸၢႆးၵေႃႈ ၼုၵ်းလိူတ်ႈပေႃႈမႄႈမၼ်းယဝ်ႉ။
ၵွင်ႈဢွၼ်ႇ ဢၼ်မႄႈၶဝ်သိုဝ်ႉပၼ်မၼ်းၼၼ်ႉတႄႉ မၼ်းဢဝ်သႂ်ႇၼႂ်းထူင် ပီႈဢၢႆႈမၼ်းသေ ပႃးႁွႆႈၶေႃးမၼ်းဝႆႉလႄႈ ထူင်ၶၢဝ်ဢွၼ်ႇ လုၵ်ႈၼၼ်ႉၵေႃႈ ၼုၵ်းလိူတ်ႈၵႂႃႇၵမ်ႈၽွင်ႈယဝ်ႉ။
ၼၢႆးမူၼ်းၸင်ႇၶုၵ်းၸႂ်လႆႈ လၢၼ်မၼ်းထႅင်ႈၵေႃႉၼိုင်ႈသေ ၼႅတ်ႈလၢတ်ႈၵူၼ်းဝၢၼ်ႈၶဝ် ႁႂ်ႈၸွႆႈႁႃပၼ်ယဝ်ႉ။
ၽိူဝ်ႇမိူဝ်းတူၺ်းတၢင်းႁိူၼ်းၵေႃႈ ၽႆးမႆႈသေ ပဵၼ်ၽွင်တဝ်ႈမူတ်းယဝ်ႉ။ ႁိူၼ်းၼႂ်းဝၢၼ်ႈ ၵမ်ႉၼမ်ၼမ် ၽႆးမႆႈသေ ပဵၼ်ၽွင်တဝ်ႈၵႂႃႇၼင်ႇၵဝ်ႇ၊ ၵူၼ်းဝၢၼ်ႈၵမ်ႈၽွင်ႈၵေႃႈ ၺႃးမၢၵ်ႇၵွင်ႈမၢၵ်ႇမျွၵ်ႈသေတၢႆ ၊ ၵမ်ႈၽွင်ႈၵေႃႈ ၽႆးမႆႈသေတၢႆလႄႈ ၽႂ်ႁၢႆၽႂ်တၢႆၼႆၵေႃႈ တေႃႈဢမ်ႇႁူႉလႆႈ။
ဢၼ်ႁူႉတႄႉ ၺႃးတၢမ်ႇသိုၵ်းသေ ၽႆးဢၼ်ပႆႇမွတ်ႇလႆႈၼၼ်ႉတႄႉ ပဵၼ်ၽႆး ဢၼ်မႆႈတီႈၼႂ်းမၢၵ်ႇႁူဝ်ၸႂ်ၼၼ်ႉယဝ်ႉ။ ၸၢႆးၸၢႆးၵေႃႉၼိုင်ႈ တၢႆႁိုဝ်ႁၢႆႁိုဝ်ၼႆၵေႃႈ ၼၢႆးမူၼ်းဢမ်ႇလႆႈႁူႉထိုင်လႄႈ ပဵၼ်ၽႆးမုၵ်ႉၼိုင်ႈ လုၵ်ႉႁိုၼ်ႈႁိုၼ်ႈ ၼႂ်းၵႄႈမၢၵ်ႇႁူဝ်ၸႂ်မၼ်းဝႆႉယူႇ။
ၼႂ်းဝၢၼ်ႈ ပေႃးငိၼ်းဝႃႈလုၵ်ႈဢွၼ်ႇတိူဝ်ႉမၢၵ်ႇၵွင်ႈသေ တၢႆတီႈလႂ်ၼႆၵေႃႈ ၼၢႆးမူၼ်း ၵူဝ်ပဵၼ်လၢၼ်မၼ်းလႄႈ ၼႅတ်ႈၵႂႃႇတူၺ်း ပေႃးဢမ်ႇႁူႉႁိူဝ်ႉယဝ်ႉ။ တီႈလႂ်ၽႆးမႆႈ ပႃးၵူၼ်းၼႆၵေႃႈ မၼ်းၵႂႃႇၸွပ်ႇထၢမ်တူၺ်းသေတႃႉ ပဵၼ်ၽႂ်တၢႆၽႂ်ႁၢႆၼႆၵေႃႈ တေႃႈဢမ်ႇပႆႇႁူႉထိုင်လႆႈ။
ၵေႃႉဢၼ်တၢႆၼၼ်ႉ သုမ်းၸၢတ်ႈလၢႆလၢႆသေ တၢႆၵႂႃႇသေတႃႉ ၵေႃႉဢၼ်ၵိုတ်းဝႆႉၼႆႉ ပဵၼ်ဝႆႉၵၢၼ်လူင်ဢၼ်ၼိုင်ႈယဝ်ႉ။ ၵူၼ်ႈဝၢၼ်ႈၶဝ် ၸွႆႈၵၼ်ဢဝ်ပုၼ်ႈၽွၼ်းသေ ၽင်ပၼ်ၵူၼ်းဢၼ်လူႉႁၢႆတၢႆၵႂၢႇ ၸိူဝ်းၼၼ်ႉ သဵင်ႈသဵင်ႈယဝ်ႉ။ ၼမ်ႉတႃပီႈၼွင်ႉဢူႈမႄႈၽႂ်မၼ်း ဢၼ်လႆတူၵ်းယူႇၼၼ်ႉ ဢမ်ႇမႃးႁူတ်းပၼ်လႆႈ ၸႂ်မႆႈၸႂ်လိူတ်ႇႁႂ်ႈပေႃးယဵၼ်။
သွင်သၢမ်ဝၢၼ်းၼၼ်ႉ ၼၢႆးမူၼ်းၵေႃႉၼိုင်ႈတႄႉ ၵုမ်ႇထၢမ်ၶၢဝ်ငၢဝ်း လၢၼ်မၼ်းၸွမ်းဝၢၼ်ႈႁိမ်းႁွမ်းၸိူဝ်းၼၼ်ႉ တီႈၼိုင်ႈယဝ်ႉတီႈၼိုင်ႈသေတႃႉ ၽႂ်ၵေႃႈ ဢမ်ႇႁူႉႁၼ်လွင်ႈလၢၼ်မၼ်း။
ဝၢႆးသေ ႁႅၼ်းသွမ်းတင်တူဝ်ပၼ် ၸၢႆးထုၼ်းလႄႈ ၼၢင်းၼူၼ်းယဝ်ႉ ၼၢႆးမူၼ်း ပဵၼ်လွင်ႈၸႂ်ဢမ်ႇလီတႄႉတႄႉ၊ ၶီၶီငဝ်ငဝ်ဝႆႉ တီႈၼႂ်းၸႂ် မၼ်းမွင်ၸႂ်မွင်ၶေႃး သမ်ႉပေႃးဢမ်ႇမီးတီႈလၢတ်ႈယဝ်ႉ ။ တၢမ်ႇသိုၵ်းႁၢႆႉ ဢၼ်မႃးပၢႆႉသႂ်ႇ ၶဝ်ၼၢႆးလၢၼ်ၼၼ်ႉၵေႃႈ မၼ်းသူးတွင်း ယႃႇပေႁႂ်ႈလႆႈၺႃးထႅင်ႈၼႆယူႇ။
တေသိုပ်ႇယူႇတီႈဝၢၼ်ႈၼႃးၶေႃၼႆႉ ပီႈၼွင်ႉၸမ်ၸႂ်ၵေႃႈ သမ်ႉဢမ်ႇမီးၽႂ် ၊ ဝၼ်းလႂ်ဝၼ်းလႂ်ၵေႃႈ ၵုမ်ႇၶုၵ်းၶွပ်ႈႁၼ်ၶိုၼ်း ဢၼ်ပူၼ်ႉသေ ပဵၼ်မႃးၼၼ်ႉယူႇတိၵ်းတိၵ်း ၊ ၸႂ်ၼႆႉဢမ်ႇသိူဝ်းသေဢိတ်းလႄႈ မၼ်းၸင်ႇဢွၼ်ဢဝ် ၸၢႆးၼွင်ႉသေ တေႇဢွၵ်ႇဝၢၼ်ႈမႃးယဝ်ႉ။
“ ၼၢႆးမူၼ်း ... တေၵႂႃႇလႂ်ၶႃႈ ... ”
ပႃႈၶမ်းလူႇ ထၢမ်ၼင်ႇၼႆလႄႈ ၼၢႆးမူၼ်းၸင်ႇတွပ်ႇဝႃႈ -
“ ႁႃးၼၢႆးလၢၼ် တေၶၢႆႉဝၢၼ်ႈၼႆဢိူဝ်ႈ ... ”
“ တေၶၢႆႉၵႂႃႇလႂ်ၶႃႈ ... ယူႇတီႈၼႆႈ ၸၢင်ႈပဵၼ်သင် ... ”
“ ဢမ်ႇၶႂ်ႈယူႇယဝ်ႉ ... ၶမ်းလူႇ ... ”
“ တေႁွင်ႉပႃး လၢၼ်ၼၢႆးႁဝ်းၵႂႃႇ ၶႃႈႁႃႉ ... ”
“ ၸႂ်ႈဢိူဝ်ႈ ... ”
ပႃႈၶမ်းလူႇၶႃပူႇဢွၵ်ႇၼႆႉ ပဵၼ်ၵူၼ်းၶႅၼ်းၸႂ်သေတႃႉ ဢမ်ႇမီးလုၵ်ႈလၢင်းသေၵေႃႉ ၊ ၵွပ်ႈၼႆ မၼ်းၸင်ႇဝႃႈ -
“ ၼၢႆး... မိူဝ်းဝႄႉတီႈႁိူၼ်းႁဝ်းၵမ်းၼိုင်ႈ ၶႃႈလႄႈ ... ၶႃႈၶႂ်ႈလၢတ်ႈ မဵဝ်းၼိုင်ႈဢေႃႈ ... ”
“လူဝ်ႇလၢတ်ႈသင်ၵေႃႈ ... လၢတ်ႈတီႈၼႆႈ လႆႈယူႇၼႃႇ... ”
“ ဢမ်ႇၸႂ်ႈၶႃႈ ... ပဵၼ်ႁိုဝ်ပဵၼ် မိူဝ်းဝႄႉတီႈႁိူၼ်းၵွၼ်ႇၶႃႈလႄႈ... ၸင်ႇၵွႆႈဢုပ်ႇၵၼ်လီလီ ၶႃႈၵႂႃႈ ... ”
ၼၢႆးမူၼ်းၵေႃႈ ၸွမ်းပႃႈၶမ်းလူႇ မိူဝ်းတီႈႁိူၼ်းယဝ်ႉ ။ ပေႃးဝႃႈ ၽႅဝ်တီႈႁိူၼ်းၼႆ ပႃႈၶမ်းလူႇ ၸင်ႇႁွင်ႉၶိင်းလူင်မၼ်း လုင်းသွႆႈ မႃးသေ -
“ၶိင်းၼႆႉ... ႁဝ်းႁွင်ႉၼၢႆးမူၼ်းမႃးလႄႇ ႁဝ်းဢိူဝ်ႈ ... ”
“ဢေႃႈ ... ၼၢႆး ... မႃးၼင်ႈၶႃႈလႄႈ ... သူတ်ႉၼမ်ႉၼဵင်ႈၶူမ်ၵွၼ်ႇ ၶႃႈလႄႈ... ”
ၼၢႆးမူၼ်းၵေႃႈ သူတ်ႉၼမ်ႉၼဵင်ႈၶူမ်သေ ပႂ်ႉထွမ်ႇဢၼ်ပႃႈၶမ်းလူႇၶဝ် တေလၢတ်ႈၼၼ်ႉယူႇ၊ လုင်းသွႆႈ ၸင်ႇဝႃႈ -
“ လႆႈငိၼ်းၶၢဝ်ႇၼၢႆးႁဝ်းၶဝ်ၼႆ ႁဝ်းၶႃႈၵေႃႈၸႂ်ဢမ်ႇလီၸွမ်းတႄႉတႄႉၶႃႈယဝ်ႈ ... သၢင်ႇထုၼ်းၶႃ ၼၢင်းၼူၼ်းၵေႃႈ လႆႈဝႃႈၵၢမ်ႇႁၢႆႉ တႄႉတႄႉ... ”
ၼၢႆးမူၼ်း ဢိုၼ်ၼမ်ႉလၢႆးမၼ်းၵမ်းၼိုင်ႈသေ -
“ တေၸၢင်ႈႁဵတ်းႁိုဝ်လႃႇ ... သမ်ႉပေႃးပဵၼ်ပူၼ်ႉၵႂႃႇယဝ်ႉလူး ၵေႃႉဢၼ်တၢႆၵေႃႈ တၢႆယဝ်ႉလူး ... ယၢပ်ႇၸႂ်ႁဝ်းၵေႃႉဢၼ်ၵိုတ်းဝႆႉၼႆႉဢိူဝ်ႈ... ”
“ ဢဝ်တြႃးသႂ်ႇၸႂ်ယႃၸႂ်ဢိူဝ်ႈ ... ၼၢႆး ... ”
“ဢဝ်တြႃးသႂ်ႇၸႂ် ဢၼ်ဝႃႈၼၼ်ႉ လၢတ်ႈငၢႆႈသေတႃႉ ပဵၼ်ဢၼ်ယၢပ်ႇဝႆႉဢိူဝ်ႈ ... ”
ၶဝ်ဢွၼ်ၵၼ်ၵိုတ်းမိုင် ၵႂၢမ်းၶဝ်ယဵၼ်ၵႂႃႇၵမ်းၼိုင်ႈသေ ပႃႈၶမ်းလူႇ ၸင်ႇဝႃႈ -
“ ဢၼ် ႁဝ်းၶႃႈႁွင်ႉၼၢႆးႁဝ်းမႃးၼႆႉ ၶႂ်ႈထၢမ်တူၺ်း လွင်ႈလၢၼ်ၸၢႆး ၼၢႆးႁဝ်းဢေႃႈ ... ”
ၼၢႆးမူၼ်း ထူၺ်ႈၸႂ်လူင်ၵမ်းၼိုင်ႈသေ -
“ ဢိုဝ်ႈ ... လၢၼ်ၸၢႆးလူင်ၼၼ်ႉ တၢႆႁိုဝ်ႁၢႆႁိုဝ်ၵေႃႈ ၼၢႆးဢမ်ႇပႆႇႁူႉၶၢဝ်ႇမၼ်းလီလီ ... ၵူၺ်း ... ”
“ ၼၢႆးႁဝ်း ... ၸွပ်ႇတူၺ်းလီလီယဝ်ႉၶႃႈႁႃႉ ... ”
“ ဢိုဝ်ႈ... ၸွပ်ႇတူၺ်းၵေႃႈ ၶႂ်ႈတိူၵ်ႈၸႂ်ယဝ်ႉၼႆႉ... ”
“ လၢၼ်ၸၢႆးဢွၼ်ႇၵေႃႉၼႆႉ လူး ... ၼၢႆးႁဝ်းတေႁွင်ႉၵႂႃႇလႂ်ၶႃႈလႃႇ... ”
“ တေႁွင်ႉၵႂႃႇၸွမ်းၼၢႆးဢိူဝ်ႈ ... ”
“ ၼၢႆးႁဝ်း သမ်ႉတေၵႂႃႇလႂ်ၶႃႈလႃႇ ... ”
ၼၢႆးမူၼ်းတေၵႂႃႇလႂ်ၼႆ မၼ်းဢမ်ႇၶႂ်ႈလၢတ်ႈလႄႈ မၼ်းၸင်ႇတွပ်ႇလၢတ်ႈဝႃႈ -
“ ၵႂႃႇလႂ် ၼႆၵေႃႈ ဢမ်ႇၸၢင်ႈဝႃႈၼင်ႇၵဝ်ႇ ... ပေႃးဢွၵ်ႇဝၢၼ်ႈၼႆႉၵႂႃႇၼႆ ယူဝ်ၸႂ်လီဢိတ်းၼိုင်ႈၼႆလႄႈ ... ၼၢႆးၸင်ႇတႅတ်းတတ်းဝႃႈ တေဢွၵ်ႇဝၢၼ်ႈၼႆႉ ... ၼႆယဝ်ႉ... ”
“ ၼၢႆးဢိူၺ်း ... ယႃႇပေၵႂႃႇလႂ်ယဝ်ႉၶႃႈ ... မႃးယူႇၸွမ်းႁဝ်းႁေယဝ်ႉၶႃႈၼႃႇ ... လၢၼ်ၸၢႆးၼၢႆးႁဝ်းၼႆၵေႃႈ ႁဝ်းၶႃႈတေၶႂ်ႈယွၼ်းၵဵပ်းလဵင်ႉဝႆႉ ဢေႃႈ... ၼၢႆးႁဝ်း တေဝႃႈႁိုဝ်လႃႇ ... ”
ၼၢႆးမူၼ်းၵေႃႈ ပႆႇၸၢင်ႈဝႃႈႁိုဝ် ၊ မၼ်းဝူၼ်ႉၵႂင်သေ မိုင်ဝႆႉယူႇတၢင်းႁိုင်ယဝ်ႉ၊၊ လုင်းသွႆႈၵေႃႈ ၸင်ႇဝႃႈ -
“ ၸႂ်ႈတႄႉဢေႃႈ ... ႁႃးသွင်ၵေႃႉၵေႃႈ ယွၼ်ႉပိူဝ်ႈဢမ်ႇမီးလုၵ်ႈလၢင်းလႄႈ ႁႃးတေၵဵပ်းလဵင်ႉ ဢဝ်ပဵၼ်လုၵ်ႈပဵၼ်လၢင်းႁႃးဢေႃႈ ... တေဢမ်ႇပၼ်မႆႈၸႂ်သင်ၶႃႈ ... ၼၢႆးႁဝ်းၵေႃႈ ယူႇၸွမ်းႁဝ်း ဢမ်ႇလီၶႃႈႁႃႉ ?”
ၼၢႆးမူၼ်းဝူၼ်ႉၵႂႃႇ ဝူၼ်ႉၶိုၼ်းသေ လွမ်တူၺ်းၼႃႈလၢၼ်မၼ်းယူႇ ၊ ၵၢင်ၸႂ်မၼ်းတႄႉ တိုၼ်းဢမ်ႇၶႂ်ႈယူႇ ၼႂ်းဝၢၼ်ႈၼႆႉသေဢိတ်း ၊ တေဢဝ်လၢၼ်မၼ်း ပၼ်ပိူၼ်ႈသေ ႁႂ်ႈလၢၼ်မၼ်း ပဵၼ်လုၵ်ႈၵဵပ်း ဢၼ်ဝႃႈၼၼ်ႉၵေႃႈ မၼ်းဢမ်ႇလႆႈၸႂ်။
“ ၼၢႆးႁဝ်းတေဝႃႈႁိုဝ်ၶႃႈၼၢႆး ... လၢၼ်ၸၢႆးၼၢႆးႁဝ်းၼႆႉ ပၼ်ႁဝ်းႁေၶႃႈလႄႈ ... ပေႃးယႂ်ႇမႃး ႁဝ်းတေဝႆႉပၼ်ၵျွင်းသေ တေပၼ်ပဵၼ်လုၵ်ႈႁဝ်းၶႃႈဢေႃႈ ... ၼၢႆးႁဝ်းယႃႇမႆႈၸႂ်သင်ၶႃႈ ... ”
ပႃႈၶမ်းလူႇ ဝႃႈၼင်ႇၼႆ မႃးယိပ်းဢဝ်မိုဝ်းၸၢႆးၼွင်ႉသေ
“ ၸၢႆး ... မႃးယူႇၸွမ်းႁဝ်းၼေႃႈ ႁဝ်းတေသိုဝ်ႉပၼ် ၵႃးဢွၼ်ႇလႄႈ တၢင်းလဵၼ်ႈၼမ်ၼမ်ဢိူဝ်ႈ... ”
ၸၢႆးၼွင်ႉႁႅၼ်တူၺ်း ၼႃႈပႃႈၶမ်းလူႇသေ ဝႆႁူဝ်ယူႇယဝ်ႉ။
“ဢိုဝ်း ... ၼၢႆး ... ၸၢႆးဢမ်ႇၶႂ်ႈယူႇ ... ၸၢႆးတေယူႇၸွမ်းၼၢႆးႁဝ်းၵူၺ်း ... ၼၢႆး ... ႁဝ်းမိူဝ်းယဝ်ႉ ... ၼၢႆး... ”
ငိၼ်းသဵင်ၸၢႆးၼွင်ႉႁႆႈသေ လၢတ်ႈၼင်ႇၼႆ ၼၢႆးမူၼ်းပဵၼ်ဢၼ် တိူဝ်ႉၸႂ်တႄႉတႄႉ ၊ လုင်းသွႆႈၸင်ႇၶိုၼ်းလၢတ်ႈဝႃႈ -
“ ၼၢႆး ... ၼၢႆးႁဝ်းၵေႃႈ ယူႇၸွမ်းႁဝ်း တီႈၼႆႈသေ လၢၼ်ၼၢႆးႁဝ်းၵေႃႈ ပၼ်ႁဝ်းၵဵပ်းလဵင်ႉသေၶႃႈလႄႈ ... ဢမ်ႇလီၶႃႈၼႄႇ... ”
ၼၢႆးမူၼ်း ဝႆႁူဝ်မၼ်းလွႆးလွႆးသေ ...
“ ဢၢႆႈသၢင်ႇသွႆႈ ... ၵဝ်ဢမ်ႇၶႂ်ႈယူႇၼႂ်းဝၢၼ်ႈၼႆႉယဝ်ႉ ၊ လၢၼ်ၵဝ်ၼႆႉၵေႃႈ ၵဝ်ဢမ်ႇပၼ်ၽႂ်လႆႈ ... ၼႆႉပဵၼ်လၢၼ်ဢူၵ်းလၢၼ်ၸႂ်ၵဝ်ဢိူဝ်ႈ ... ၼႆႉ ၵဝ်ဢမ်ႇပၼ်လႆႈ ... ၵဝ်တိုၼ်းဢမ်ႇပၼ်ၽႂ်လႆႈ ... ”
ၼၢႆးမူၼ်းႁႆႈၵွတ်ႇလၢၼ်မၼ်းသေ လၢတ်ႈၼင်ႇၼၼ်ယူႇ။
“ ၼၢႆး... ႁဝ်းမိူဝ်းယဝ်ႉ ... ႁဝ်းမိူဝ်း ”
ၸၢႆးၼွင်ႉၵေႃႈ ႁႆႈသေတုၵ်းမိူဝ်းယူႇတိၵ်းတိၵ်း၊ ပႃႈၶမ်းလူႇ လုင်းသွႆႈၶဝ်ၵေႃႈ တုၵ်းယွၼ်းဢဝ် လၢၼ်မၼ်းယူႇတိၵ်းတိၵ်း ။
“ ၼၢႆး ... ဝူၼ်ႉတူၺ်းလီလီၶႃႈလႄႈ ၊ ၶႆႈၸႂ်တေႃႇလၢၼ်ၼၢႆးသေၵမ်း ... မိူဝ်းၼႃႈ ... ပေႃးဝႃႈ မၼ်းယႂ်ႇမႃႈၵႃႈသုင်မႃး ႁဝ်းၶႃႈၶႂ်ႈႁႂ်ႈမၼ်းမေႃပိင်ႇၺႃႇသေ မၢၵ်ႈမီးၸိူင်ႉၼင်ႇပိူၼ်ႈလႄႈ ၸင်ႇယွၼ်းဢဝ်ဢေႃႈ ... ”
ပေႃးဝူၼ်ႉတူၺ်း တႃႇၸၢႆးၼွင်ႉမိူဝ်းၼႃႈၼႆ ပဵၼ်ဢၼ်ၸိုဝ်ႈၸႂ်ႈယူႇ ၊ ၵူၺ်းၵႃႈ ၼၢႆးမူၼ်း ဢမ်ႇၽၢတ်ႇလႆႈလၢၼ်မၼ်းလႄႈ မၼ်းဝႆႁူဝ်မၼ်းသေ -
“ ၵဝ်ဢမ်ႇပၼ်လႆႈ လၢၼ်သၢင်ႇဢီႇၼၢင်းဢိူၺ်း ... ပဵၼ်ႁိုဝ်ပဵၼ် ၵဝ်တေၶၢမ်ႇၶတ်းၸႂ်လဵင်ႉ ႁႂ်ႈလၢၼ်ၵဝ် ပေႃးပေႉတူဝ်လႆ ... ”
မၼ်းဝႃႈၼႆသေ ႁွပ်ႇဢဝ်လၢၼ်မၼ်းလူင်းႁိူၼ်းမႃးယဝ်ႉ ၊ ႁွတ်ႈၽႅဝ်ထိုင်မႃး ႁိမ်းတၢင်းၵႃး မၼ်းၸင်ႇႁႄႉၶီႇ ၵႃးတၢင်ႇၵုၼ်ႇလမ်းၼိုင်ႈ ၶီႇၵႃး ၽၢတ်ႇယၢၼ်ဝၢၼ်ႈၼႃးၶေႃ မႃးယူႇယဝ်ႉ။