ၶႅၵ်ႇ/တွၼ်ႈသီႇ
ၵႃးတၢင်ႇၵုၼ်ႇလမ်းၼိုင်ႈ ႁေႃႈပူၼ်ႉဝဵင်းၼွင်ၶဵဝ် သိုပ်ႇႁေႃႈၶိုၼ်ႈ လွႆမႃးလွႆးလွႆးယူႇ၊ ပေႃးဝႃႈ ႁွတ်ႈၽႅဝ်ထိုင် ဝၢၼ်ႈယေႇငႄႇ(ဝၢၼ်ႈယင်ႇငႄႈ)ၼႆ ၼၢႆးထဝ်ႈ ဢၼ်မီးၼိူဝ်ၵႃးၼၼ်ႉ ၸင်ႇဝႃႈ -
“ လၢၼ်သၢင်ႇ ၸဝ်ႈၵႃး ... ၵိုတ်းၵႃးတီႈၼႆႈလႃႈ ... ၼၢႆးၶဝ် တေလူင်းတီႈဝၢၼ်ႈယေႇငႄႈ ၼႆႉယဝ်ႉ... ”
ၸဝ်ႈၵႃးၵေႃႈ ၵိုတ်းၵႃးပၼ်ယဝ်ႉ ၊ ၼၢႆးထဝ်ႈႁွပ်ႇဢဝ်လၢၼ်မၼ်း လူင်းၵႃးမႃးသေ -
“ ၵႃႈၵႃးတေလႆႈပၼ်ၵႃႈႁိုဝ်... လၢၼ်ႇသၢင်ႇ ... ”
“ ဢမ်ႇဢဝ်ၶႃႈယဝ်ႈ ... ၼၢႆး ... ”
“ ယႃႇပေဝႃႈၼၼ်လႄႈ ... ”
“တႄႉၶႃႈဢေႃႈ ... ဢမ်ႇဢဝ်ၶႃႈယဝ်ႉ... ”
“ ၸူမ်းယဝ်ႉ လၢၼ်သၢင်ႇဢိူၺ်း ... ႁႂ်ႈသူၵႃႉဢွင်ႇၶၢႆမၢၼ် ၵႂႃႇလွတ်ႈမႃးလီသေၵမ်း ... ”
ၸဝ်ႈၵႃးၵေႃႈ သိုပ်ႇႁေႃႈၵႃးမၼ်း ပူၼ်ႉၵႂႃႇယဝ်ႉ။
ၼၢႆးလၢၼ်သွင်ၵေႃႉၼၼ်ႉတႄႉ ပဵၼ်ၼၢႆးမူၼ်းလႄႈ ၸၢႆးၼွင်ႉယဝ်ႉ။
တီႈဝၢၼ်ႈယေႇငႄႇၼႆႉ မီးဝႆႉ ၼွင်ႉယိင်းၼၢႆးမူၼ်းလႄႈ မၼ်းၸင်ႇဢွၼ်ၸၢႆးၼွင်ႉသေ မိူဝ်းယူႇၸွမ်းၼွင်ႉယိင်းမၼ်းယဝ်ႉ။
ၶဝ်ၼၢႆးလၢၼ် သိုပ်ႇယူႇၸွမ်းၵၼ် တီႈဝၢၼ်ႈယေႇငႄႈသေသိုပ်ႇလဵင်ႉလူ ၸၢႆးၼွင်ႉၵူႈပိူင်ပိူင်ယဝ်ႉ။ ၸၢႆးၼွင်ႉၵေႃႈ ယူႇၸွမ်းၼၢႆးၶဝ်သေ ယႂ်ႇမႃႈၵႃႈသုင် လၵ်းလႅမ်ဝႃႈငၢႆႈႁူႉၶေႃႈတႄႉတႄႉ ၊ ၼၢႆးၶဝ်ၵေႃႈ ၶႂ်ႈႁႂ်ႈမၼ်း လၵ်းလႅမ်သႅမ်းၵႃႈယူႇ။
ယၢမ်းလဵဝ် ၸၢႆးၼွင်ႉ သမ်ႉပေႃးဢဝ်ထူင်ၵွင်ႉၶေႃးသေ ၵႂႃႇၶိုၼ်ႈႁူင်းႁဵၼ်း သွၼ်ဢဝ်လိၵ်ႈ ၸိူင်ႉၼင်ႇပိူၼ်ႈယဝ်ႉ ။ ၼိုင်ႈပီၼိုင်ႈၸၼ်ႉ မၼ်းၸၢႆးလႆႈၶိုၼ်ႈတၢၼ်း ၸိူင်ႉၼင်ႇပိူၼ်ႈၼင်ႇၵဝ်ႇလႄႈ သမ်ႉပေႃး ပဵၼ်လုၵ်ႈႁဵၼ်းၸၼ်ႉသီႇယဝ်ႉ။
ဝၼ်းၼိုင်ႈ မၼ်းၸၢႆးပွၵ်ႈလူင်းၵျွင်းသေ ဢႅၼ်ႇမႃးၸူးၼၢႆးၶဝ်ယဝ်ႉ -
“ ၼၢႆး ... ၼၢႆး ... ”
“ ဢီႈသင်... ၼၢႆးဝႃႈ ... ”
ၸၢႆးၼွင်ႉ ပဵၼ်ၼမ်ႉတႃဢိူမ်ႈႁူၺ်ႇ ပႃးသဵင်ႁႆႈသေ -
“ ၼၢႆး... မိူဝ်ႈၼႆႉ မေႃသွၼ် ဢဝ်ၶွၼ်ႉႁႅမ်ၸၢႆးဢေႃႈ ... ”
“ ၸၢႆးၵႂႃႇႁဵတ်းသင်လႄႈ မေႃသွၼ်သမ်ႉႁႅမ်လႃႇ... ”
“ ၸၢႆးၽိတ်း ဢၢႆႈဢုတ်ႉၶဝ်ပီႈၼွင်ႉဢေႃႈ ... ”
“ ၸၢႆးၵႂႃႇၽိတ်းၶဝ် ႁဵတ်းသင်လႃႇ ... ၼၢႆးဝႃႈ ... ”
“ ၶဝ်ဝႃႈ ၸိူင်ႉႁိုဝ် ... ”
ၸၢႆးၼွင်ႉ တူၼ်ႉသိုတ်ႇႁႆႈသေ လၢတ်ႈဝႃႈ -
“ ၶဝ်ဝႃႈတီႈၸၢႆး ... ဢၢႆႈဢမ်ႇမီးဢူႈမႄႈၸိူင်ႉပိူၼ်ႈ ၼႆဢိူဝ်ႈ”
ၼၢႆးမူၼ်း လႆႈငိၼ်းၼင်ႇၼၼ် မၼ်းပဵၼ်ဢၼ်ၶေႃးၶူမ်ၵႂႃႇတႄႉ တႄႉ ၊ မၼ်းယိပ်းဢဝ်ႁူဝ်ၶႅၼ်ၸၢႆးၼွင်ႉ တင်းသွင်ၽၢႆႇသေ လွမ်တူၺ်းၼႃႈၸၢႆးၼွင်ႉယူႇ ၊ ၸၢႆးၼွင်ႉ ၸင်ႇထၢမ်ဝႃႈ -
“ ၼၢႆး ... ... ဢူႈမႄႈၸၢႆး ဢမ်ႇမီးႁႃႉ ... ... ”
လႆႈႁၼ်လၢၼ်မၼ်း ႁႆႈသေထၢမ်မႃးၼင်ႇၼႆ ၼၢႆးမူၼ်းၵေႃႈ ၼမ်ႉတႃ လႆတူၵ်းမႃးၵမ်းလဵဝ်ယဝ်ႉ ၊ မၼ်းတေလႆႈႁဵတ်းႁိုဝ် တွပ်ႇပၼ် ၸၢႆးၼွင်ႉ။
“ ၼၢႆး ... ၸၢႆးၼႆႉ ပဵၼ်ၵူၼ်း ဢမ်ႇမီးဢူႈမႄႈၸိူင်ႉပိူၼ်ႈႁႃႉႉႉ”
ၼၢႆးမူၼ်းၵေႃႈ ၸဵတ်ႉၼမ်ႉတႃမၼ်းသေ မွၵ်ႇဝႃႈ -
“ ၸၢႆးၼွင်ႉ ပဵၼ်ၵူၼ်း ဢၼ်မီးဢူႈမႄႈၸိူင်ႉပိူၼ်ႈယူႇ... ၵူၺ်းၵႃႈ ... ဢူႈမႄႈၸၢႆး တၢႆၵႂႃႇမိူဝ်ႈၸၢႆး တိုၵ်ႉလႆႈသၢမ်ၶူပ်ႇၼၼ်ႉယဝ်ႉ ... ”
ၶႃၼၢႆးလၢၼ် ၵွတ်ႇၵၼ်သေ ႁႆႈဝႆႉယူႇ ၼၢႆးမူၼ်းၸင်ႇၶိုၼ်းဝႃႈ -
“ ၵမ်းၼႆႉ ... ပေႃးပိူၼ်ႈဝႃႈတီႈၸၢႆး ... ဢၢႆႈဢမ်ႇမီးဢူႈမႄႈၼႆ ယႃႇပေၽိတ်းပိူၼ်ႈၼႃႈ ... ... ”
ၸၢႆးၼွင်ႉငွၵ်းႁူဝ်ၵမ်းၼိုင်ႈသေ -
“ ဢေႃႈ ... ၸၢႆးဢမ်ႇၽိတ်းထႅင်ႈယဝ်ႉၶႃႈယဝ်ႈ ... ၵူၺ်းၵႃႈ ၶဝ်သမ်ႉဝႃႈ ဢၢႆႈဢမ်ႇမီးပီႈၼွင်ႉ ဢၢႆႈၼူတူဝ်လဵဝ် ၼႆလႄႈ ၸၢႆးၸင်ႇမင်ၶဝ်ဢေႃႈ ...... ”
ၸၢႆးၼွင်ႉ ထိုင်ၸႂ်ထိုင်ၶေႃးႁႆႈသေ လၢတ်ႈၼႄၼၢႆးၶဝ် ၸွမ်းၼင်ႇ ဢၼ်မၼ်းလႆႈထူပ်းမႃးၼၼ်ႉယဝ်ႉ၊ ၼၢႆးၶဝ်ၵေႃႈ ပဵၼ်ဢၼ်ၸႂ်လဵၵ်ႉၸွမ်း လၢၼ်မၼ်းယူႇ ၸၢႆးၼွင်ႉၸင်ႇၶိုၼ်းထၢမ် -
“ ၼၢႆး ... ၸၢႆးဢမ်ႇမီးပီႈၼွင်ႉ ၸိူင်ႉၼင်ႇပိူၼ်ႈႁႃႉ ... ?”
“ မီးဢိူဝ်ႈ ... ၼၢႆးဝႃႈ ... ”
“ မီးတီႈလႂ်... ... ပဵၼ်ၽႂ် ... ၼၢႆး ... ... ”
“ မိူဝ်ႈ ၸၢႆးၼွင်ႉၵေႃႉလဵၵ်ႉၼၼ်ႉ ၸၢႆးမီး ပီႈဢၢႆႈၵေႃႉၼိုင်ႈ ၸွင်ႇၸၢႆးၼွင်ႉတွင်းႁိုဝ်... ... ”
ၸၢႆးၼွင်ႉ ၶိုၼ်းဝူၼ်ႉတူၺ်း ၽၢႆႇလင်သေတႃႉ မၼ်းၸၢႆး ဢမ်ႇတွင်းလႆႈလီလီ လွင်ႈလႂ်ၵေႃႈ မိူၼ်ၵူၼ်းဢႃႉၼွၼ်းၽၼ်ဝႆႉယူႇ ။
“ မိူဝ်ႈဢၼ် ၶိူဝ်ပီႈၼွင်ႉ ပွၵ်ႇၵိၼ်ဢွႆႈသေ ၽႃႉတိူဝ်ႉၼိဝ်ႉၸီႉပီႈဢၢႆႈၸၢႆးၼၼ်ႉ ၸွင်ႇၸၢႆးၼွင်ႉတွင်းႁိုဝ် ... ဝၼ်းလိုၼ်း တီႈဝၢၼ်ႈၼႃးၶေႃ ပဵၼ်ပွႆးတိုၵ်းၵၼ် ဢူႈမႄႈၸၢႆးၵေႃႈ တိူဝ်ႉမၢၵ်ႇသေတၢႆ ... ပီႈဢၢႆႈ ၸၢႆးၼွင်ႉၵေႃႈ ... ... ”
“ ပီႈဢၢႆႈၸၢႆးၵေႃႈ တၢႆႁႃႉ ... ၼၢႆး ......”
“ မိူဝ်ႈၸဝ်ႉၸဝ်ႉတႄႉ ... ၼၢႆးၵေႃႈထၢင်ႇဝႃႈ ၸၢႆးၸၢႆးတၢႆၵိုၵ်းၽႆးမႆႈၼႆယဝ်ႉ... ၵူၺ်းၵႃႈ ... ဢမ်ႇၸႂ်ႈ ... ”
“ ပေႃးၼႆ ... ပီႈဢၢႆႈၸၢႆးၼွင်ႉ ၵႂႃႇမီးလႂ်လႃႇၼၢႆး ... ... ”
“ မီးတီႈလႂ်ၼႆၵေႃႈ ၼၢႆးတေႃႈဢမ်ႇႁူႉၼင်ႇၵဝ်ႇ ...ဝၢႆးသေၼၢႆး ဢွၼ်ၸၢႆးၼွင်ႉၶၢႆႉမႃး တီႈဝၢၼ်ႈယင်ႇငႄႈၼႆႉ ငိၼ်းၶၢဝ်ႇၵူၼ်းဝၢၼ်ႈၶဝ်မႃး သမ်ႉ ဝႃႈ ... သထေးသွင်ၵေႃႉပူႇဢွၵ်ႇၽူဝ်မေး ႁေႃႈၵႃး မႃးႁၼ်ၸၢႆးၸၢႆး ၸွမ်းတၢင်းသေ ႁွင်ႉဢဝ်ၵဵပ်းလဵင်ႉဝႆႉ ၼႆယဝ်ႉ ... ”
“ ၼၢႆး... ႁႃပၼ်ႁႂ်ႈႁၼ် ၸၢႆးၸၢႆးလႄႈ ... ”
“ ၼၢႆးၵေႃႈႁႃယူႇ ၸၢႆးၼွင်ႉ ... ၵူၺ်းၵႃႈ...ဢမ်ႇပႆႁၼ်လႄႇ”
“ ၸၢႆးၼွင်ႉၵေႃႈ တေၵႂႃႇႁႃၸၢႆးၸၢႆးၼႃႈ ... ၼၢႆး... ... ”
“ ၸၢႆးတေ ႁဵတ်းႁိုဝ်ၵႂႃႇႁႃ... ... ”
“ ပေႃးၸၢႆးၵေႃႉယႂ်ႇမႃး ... ၸၢႆးတေၵႂႃႇႁႃဢိူဝ်ႈ ... ၼၢႆး ...”
“ ပေႃးပိူၼ်ႈဝႃႈတီႈၸၢႆး ဢၢႆႈဢမ်ႇမီးပီႈၼွင်ႉ ... ၼႆ ... ယႃႇပေၽိတ်းပိူၼ်ႈ ၼႃႈ... ... ”
ၸၢႆးၼွင်ႉ ငွၵ်းႁူဝ်မၼ်း ပၼ်ၼၢႆးၶဝ်ယူႇယဝ်ႉ ။