ၶႅၵ်ႇ/တွၼ်ႈသိပ်းႁႃႈ
ဝၼ်းၼိုင်ႈယဝ်ႉဝၼ်းၼိုင်ႈ ဝူင်ႈၼိုင်ႈယဝ်ႉဝူင်ႈၼိုင်ႈ ၸၢႆးၼွင်ႉ ႁေႃႈၵႃးတႅၵ်ႇၸီႇသေ သူင်ႇၵူၼ်းႁပ်ႉၵူၼ်း ႁဵတ်းၼၼ် မူတ်းၶၢဝ်းယၢမ်းၵႂႃႇ ဝၼ်းလႂ်ဝၼ်းၼၼ်ႉယူႇ။
ၼႂ်းၵႃႈ ၵူၼ်းၸိူဝ်းဢၼ်မႃးယိမ်ၵႃးမၼ်းၼၼ်ႉ မၼ်းၸွမ်းသူင်ပၼ် ႁႂ်ႈထိုင်တီႈၶဝ်ၶႂ်ႈၵႂႃႇၶႂ်ႈပႆၼၼ်ႉသေ မၼ်းလွမ်တူၺ်း ၵေႃႉဢၼ်တေပဵၼ် ပီႈဢၢႆႈမၼ်းၼၼ်ႉယူႇ။ မၼ်းလႆႈႁူႉဝႃႈ တီႈၼိဝ်ႉၸီႉ မိုဝ်းပီႈဢၢႆႈမၼ်းၼၼ်ႉ မီးႁွႆးၽႃႉတိူဝ်ႉဝႆႉၼႆလႄႈ ၵႂႃႇတီႈလႂ်ပႆတီႈလႂ်သေဢမ်ႇဝႃႈ မၼ်းလွမ်တူၺ်း မိုဝ်းၼိဝ်ႉၸီႉပိူၼ်ႈ ၵူႈၵေႃႉ ၵူႈတီႈယဝ်ႉ။ ပေႃးဝႃႈႁၼ် ၵေႃႉဢၼ်ၼိဝ်ႉၸီႉ မီးႁွႆးၽႃႉတိူဝ်ႉၼႆ မၼ်းၵႂႃႇထၢမ်တူၺ်း လွင်ႈတၢင်းမၼ်းယဝ်ႉ။ ၵူၺ်းၵႃႈ ၵေႃႉဢၼ်ဢၢပ်ႈတေပဵၼ် ပီႈဢၢႆႈမၼ်းၼၼ်ႉတႄႉ မၼ်းပႆႇႁၼ်။
မိူဝ်ႈၼႆႉ ပိူၼ်ႈမႃးယိမ်ၵႃးမၼ်းသေ ၸႂ်ႉႁႂ်ႈမၼ်း ၵႂႃႇသူင်ႇတီႈၼိုင်ႈယဝ်ႉ တီႈၼိုင်ႈယူႇ၊ ၽွင်းမိူဝ်ႈသူင်ႇၵူၼ်းသေ ပွၵ်ႈမႃးၼၼ်ႉ မၼ်းတေႃႇတၢင်းလႄႈ မၼ်းၸင်ႇႁေႃႈၵႃးမၼ်း မႃးဝႄႉ တီႈႁိူၼ်းလႅင်းၶဝ်ယဝ်ႉ၊ လႆႈႁၼ်လႅင်း တိုၵ်ႉဢဵၼ်ႈၼႂ်းသူၼ်ယူႇလႄႈ မၼ်းၸင်ႇၼဵၵ်းႁွၼ်းၵႃးမၼ်း တိတ်း တိတ်း ...ၼႆသေႁွင်ႉဝႃႈ -
“ လႅင်း ... လႅင်း ... ”
လႅင်းထွမ်ႇတူၺ်း လႆႈႁၼ်ပဵၼ် ၸၢႆးၼွင်ႉလႄႈ မၼ်းၸူမ်းသိူဝ်းသေ ၼႅတ်ႈဢႅၼ်ႇမႃးၸူး ၸၢႆးၼွင်ႉယဝ်ႉ၊ ၸၢႆးၼွင်ႉၵေႃႈ လူင်းၵႃးမႃး ႁွပ်ႇဢဝ်လႅင်းသေ ဢဝ်တၢင်းၵိၼ် ဢၼ်မၼ်းသိုဝ်ႉမႃးၼၼ်ႉ ပၼ်လႅင်းယဝ်ႉ၊
“ ၼေႈ ယေႃႈ ... လႅင်း ... ၼႆႉပဵၼ်တၢင်းၵိၼ် ပုၼ်ႈတႃႇလႅင်းဢိူဝ်ႈ ၼႆႉ ... ဢလူဝ်ႉ ... ယူဝ်ဝႃႈ လႅင်းဢမ်ႇတွင်း ပီႈၸၢႆးၼွင်ႉယဝ်ႉၼႆဢိူဝ်ႈ ... ”
“ တွင်းဢေႃႈ ... ႁဵတ်းသင် ... ပီႈၸၢႆးၼွင်ႉ ၼၢၼ်းမႃးဢႅဝ် လႅင်းၶဝ်ၵျႃႇလႃႇ ... လႅင်း မွင်း ပီႈၸၢႆးၼွင်ႉ ၵူႈဝၼ်းဢေႃႈ ... ”
“ ၶႂ်ႈမႃးယူႇဢိူဝ်ႈ ... ၵူၺ်းၵႃႈ ... ဢမ်ႇတၼ်းဢိတ်းၼိုင်ႈ... ဢိူဝ်ႈ လႅင်း ... မိူဝ်ႈၼႆႉတႄႉ ၵွပ်ႈပိူဝ်ႈ သၢင်ႇထုၵ်ႇလႄႈ ၸင်ႇတင်ႈၸႂ် မႃးဝႄႉလႄႇလႅင်းၶဝ်ဢိူဝ်ႈ ”
လႅင်းလႆႈႁၼ်ၸၢႆးၼွင်ႉ မႃးဢႅဝ်ႇမၼ်းလႄႈ မၼ်းပဵၼ် ဢၼ်ၸူမ်းသိူဝ်းၸႂ်တႄႉတႄႉ၊ ၸၢႆးၼွင်ႉ ႁွပ်ႇဢဝ်လႅင်းသေ ၶဝ်ႈမႃးၸူး လုင်းၸၢႆးမိူင်းၶႃပူႇဢွၵ်ႇ ၼႂ်းႁိူၼ်းယဝ်ႉ -
“ ဢေႃႈ ... ၸၢႆးၼွင်ႉ ... မႃးဢႅဝ်ႇဢူႈလုင်းၶဝ်ႁႃႉ ...မႃး ... ၶဝ်ႈမႃးၼင်ႈလႄႈ... ”
“ ၸႂ်ႈ ဢေႃႈ ... ”
“ ဢလူဝ်ႉ ... ဝၼ်းၸၢႆးၼွင်ႉၵႂႃႇၼၼ်ႉ မႄႈပႃႈၶဝ် လႆႈၶျေႃးလီၶျေႃးဝၢၼ်လႅင်း သမ်ႉပေႃးႁိူဝ်ႉယဝ်ႉ ... ၸၢႆးၼွင်ႉၶႂ်ႈႁူႉၵေႃႈ ... ”
ၸၢႆးၼွင်ႉ ၸင်ႇၶိုၼ်းထၢမ်လႅင်း -
“ လႅင်း ... တႄႉႁႃႉ ... ? ... ”
“ တႄႉဢေႃႈ ... ၽႂ်ၸႂ်ႉ ပီႈၸၢႆးၼွင်ႉ တေၵႂႃႇၼႆ ႁဵတ်းသင်ဢမ်ႇလၢတ်ႈလႅင်း ဢမ်ႇပႂ်ႉလႅင်း ၶႃႈ ... ”
“ လႅင်း ပႆႇလူင်းႁူင်းႁဵၼ်းၼႃႇ လႅင်း ... ပေႃးဢိုတ်းႁဵၼ်းၼႆ မႃးဢႅဝ်ႇပီႈၸၢႆးၼွင်ႉ ၼႃႈ ... ၸႂ်ႉပီႈၸၢႆးသႅင် မႃးသူင်ႇဢိူဝ်ႈ ... ၼႃႈ ”
“ ပီႈၸၢႆးၼွင်ႉ တေလဵင်ႉသင် လႅင်းၶႃႈ ... ”
“ လႅင်းၶႂ်ႈၵိၼ်သင်ၵေႃႈ တေသိုဝ်ႉလဵင်ႉလႆ မႃးတႄႉတႄႉၼႃႈ ”
လႅင်းငွၵ်းႁူဝ်ၼႄ ၸၢႆးၼွင်ႉယူႇ၊ လုင်းၸၢႆးမိူင်းၸင်ႇထၢမ် -
“ ၸၢႆးၼွင်ႉ ... ၼႃႈၵၢၼ် ၸွင်ႇသၢင်ႇထုၵ်ႇ ႁိုဝ် ... ”
“ ဢေႃႈ ... သၢင်ႇထုၵ်ႇယူႇၶႃႈ ... ”
“ လွင်ႈၵိၼ်လွင်ႈယႅမ်ႉလူး ... ? ”
“ ဢမ်ႇႁၢင်ႈႁၢႆႉ ၼင်ႇၵဝ်ႇၶႃႈ ... ၵၢင်ဝၼ်းတႄႉ ၶႃႈသိုဝ်ႉၵိၼ် တီႈၼႂ်းသႅင်ႇဢေႃႈ ... ၵၢင်ၶမ်ႈမႃးတႄႉ ၵိၼ်တီႈႁိူၼ်း ပေႃႈလဵင်ႉဢေႃႈ”
ၶဝ်သိုပ်ႇဢုပ်ႇၵၼ် တၢၼ်ႇတၢၼ်ႇသေ ၸၢႆးၼွင်ႉၵေႃႈ ၸင်ႇပွၵ်ႈမႃးမိူဝ်းယဝ်ႉ၊ ဝၼ်းၼၼ်ႉတႄႉ မၼ်းဢမ်ႇထူပ်းၺႃး ၽူၺ်းလႄႈၸၢႆးသႅင် မၼ်းမႃးၸူး ၵႃးမၼ်းသေ တူင်ႉတၵ်ႉလႅင်းယူႇ -
“ လႅင်း ... ပီႈၸၢႆးၼွင်ႉ တေၵႂႃႇၵွၼ်ၼႃႈ ... မွၼ်းမွၼ်း ”
လႅင်းၵေႃႈ ၵၵ်းၵႆဝႆမိုဝ်းမၼ်း ၼႄၸၢႆးၼွင်ႉသေ -
“ ပီႈၸၢႆးၼွင်ႉ ... မွၼ်းမွၼ်း ... ၵႆႉၵႆႉမႃးဢႅဝ်ႇလႅင်းၽွင်ႈၶႃႈၼႃႈ ... ”
ၸၢႆးၼွင်ႉႁေႃႈၵႃးမၼ်း ဢွၵ်ႇမႃးသေ ၸွမ်းတၢင်း မႃးၺႃးၵူၼ်ႈယိမ်ၵႃးလႄႈ မၼ်းပဵၼ်ဢၼ်သၢင်ႇထုၵ်ႇၵႂႃႇတႄႉတႄႉ။
+ + + + + + + +
တုတ်း ... ... ... တုတ်း ... ... ...
ငိၼ်းသဵင်ၽူၼ်းမႃးလႄႈ ၽူၺ်း ၸင်ႇၼႅတ်ႈမႃးယိပ်းၽူၼ်းသေ
“ ႁလူဝ် ... လၢတ်ႈၶႃႈလႄႈ ... ”
“ ၸွင်ႇ ... ၸွင်ႇၸႂ်ႈ ... ၽူၺ်း ... ႁိုဝ် ... ? ”
“ ၸႂ်ႈဢေႃႈ ... ပဵၼ်ၽႂ်သိုပ်ႇမႃးၶႃႈ ... ”
“ ၽူၺ်း ... ပဵၼ် ၸၢႆးၼွင်ႉဢိူဝ်ႈ ... ”
“ ဢေႃႈ ... ၸၢႆးၼွင်ႉႁႃႉ ... လုၵ်ႉတီႈလႂ်သိုပ်ႇမႃး ... ? ”
“ လုၵ်ႉၼႂ်းဝဵင်းဢိူဝ်ႈ ... လႅင်းၸွင်ႇမီး ႁိုဝ် ... ? ”
“ မီး ဢိူဝ်ႈ ... လႅင်း တိုၵ်ႉၵိၼ်ၶဝ်ႈယူႇ ... တေလႆႈႁွင်ႉပၼ်ႁႃႉ ... ”
“ ပေႃးမၼ်းၵိၼ်ယဝ်ႉၵွၼ်ႇ ၸင်ႇၵွႆႈႁွင်ႉလႄႈၽူၺ်း ...ၽူၺ်းလူး ... ? ၵိၼ်ယဝ်ႉႁႃႉ ... ? ”
“ ၵိၼ်ယဝ်ႉ ယဝ်ႉ ... ”
“ ၵိၼ်ၽၵ်းသင် ... ? ”
“ မိူဝ်ႈၼႆႉႁႃႉ ... ၵိၼ်ၽၵ်းၵၢတ်ႇၸေႃးဢိူဝ်ႈ ... ၸၢႆးၼွင်ႉလူး ... ”
“ ၽၵ်းၵၢတ်ႇၸေႃးတႄႉ ဢမ်ႇၺႃး ... ၵူၺ်းၺႃး ၽၵ်းသူမ်ႈပူႁုင်တိၵ်းတိၵ်းၵူၺ်း ... ”
“ ဝၼ်းၼၼ်ႉ ... ၸၢႆးၼွင်ႉမႃးဢႅဝ်ႇႁိူၼ်းၽူၺ်းၶဝ် ၼႆႁႃႉ ”
“ ၸႂ်ႈဢိူဝ်ႈ ... ”
“ ပေႉၸဵဝ်းမိူဝ်းလႃႇ ... ”
“ ဢမ်ႇဝႃႈၼင်ႇၵဝ်ႇ ... မႃးဢႅဝ်ႇႁိုင်ယူႇၵူၺ်း ၵူၺ်းၵႃႈ ဝၼ်းၼၼ်ႉ ၵႃႈၵႃး ပႆႇပေႃးလႆႈၼမ်လႄႈ ၸင်ၼႅတ်ႈမိူဝ်းယဝ်ႉ ၽူၺ်းၵႂႃႇလႂ်ဝၼ်းၼၼ်ႉ ... ”
“ ၽူၺ်း ... ၵႂႃႇဝႄႉတီႈႁိူၼ်းတႆးၵေႃႉ ၽူၺ်းဢိူဝ်ႈ ... တၢင်ႇပွၵ်ႈ မႃးဢႅဝ်ႇထႅင်ႈၼႃႈ ... ယူဝ် ၸၢႆးၼွင်ႉ လိုမ်းၽူၺ်းၶဝ်ယဝ်ႉၼႆၵႂႃႈ ”
“ ဢိူဝ်ႈ ... လိုမ်း ဢၼ်ဝႃႈၼၼ်ႉ တေလိုမ်းယၢပ်ႇယူႇယူဝ်း”
ၽွင်းၼၼ်ႉ လႅင်းၵိၼ်ၶဝ်ႈယဝ်ႉသေ ၽႅဝ်မႃးလႄႈ ၽူၺ်းၸင်ႇဝႃႈ -
“ ၸၢႆးၼွင်ႉ ... လႅင်းၽႅဝ်မႃးယဝ်ႉ... လႅင်း ... ပီႈၸၢႆးၼွင်ႉ ၶႂ်ႈလၢတ်ႈတေႃႇ လႅင်းဝႃႇ ... ”
လႅင်းၵေႃႈ ၸင်ႇပုတ်ႈယိပ်းဢဝ်ၽူၼ်းသေ -
“ ႁလူဝ် ... ပီႈၸၢႆးၼွင်ႉ ၵိၼ်ၶဝ်ႈယဝ်ႉၶႃႈႁႃႉ ... ? ”
“ ယဝ်ႉၶႃႈယဝ်ႉ ... လႅင်း လူး ... ”
“ လႅင်း တိုၵ်ႉယဝ်ႉ တီႈလဵဝ်ဢေႃႈ ... ”
“ လႅင်း ၵိၼ်ၽၵ်းသင် ... ”
“ ၵိၼ်ၽၵ်းၸေႃး ... ဢေႃႈ ... ”
“ တႄႉ ... ႁႃႉ ... ပီႈၸၢႆးၼွင်ႉၵေႃႈ ၶႂ်ႈၵိၼ်ဢိူဝ်ႈ လႅင်းဢမ်ႇႁွင်ႉပီႈၸၢႆးၼွင်ႉႁႃႉ ... ”
“ ႁွင်ႉဢေႃႈ ... ပီႈၸၢႆးၼွင်ႉ ၶႂ်ႈၵိၼ်တႄႉတႄႉႁႃႉ ... ”
ၽူၺ်းၵေႃႈ ၶႂ်ႈထွမ်ႇလႄႈ မၼ်းၸင်ႇၼဵၵ်းၼဵၼ် ဢၼ်ႁႂ်ႈသဵင်ဢွၵ်ႇတီႈၼွၵ်ႈၼၼ်ႉယဝ်ႉလႄႈ ၶႃသွင်ၵေႃႉလႅင်း လႆႈထွမ်ႇလႆႈလၢတ်ႈ ၼင်ႇၵၼ်ယဝ်ႉသေ -
“ ဢႃ ... လႅင်း ... ၶႂ်ႈၵိၼ်ဢိူဝ်ႈ ... ၽၵ်းၸေႃးၼႆႉ ပီႈၸၢႆးၼွင်ႉ မၵ်ႉဝႃႈမၵ်ႉယဝ်ႉ ... တၢင်ႇပွၵ်ႈ ပေႃးႁဵတ်းၽၵ်းၸေႃးၼႆ ႁွင်ႉပီႈၸၢႆးၼွင်ႉၽွင်ႈ ... ၼႃႈ ... ”
“ ဢမ်ႇႁွင်ႉယဝ်ႉ ပီႈၸၢႆးၼွင်ႉ တမ်ႉဢမ်ႇၶႂ်ႈမႃးဢႅဝ်ႇလႅင်းၶဝ် ”
“ ဢူဝ် ... ယႃႇဝႃႈၼၼ်လႅင်း ပီႈၸၢႆးၼွင်ႉၶႂ်ႈမႃးဢႅဝ်ၵူႈဝၼ်းၵွၼ်ႇယဝ်ႉ ... ၵူဝ်လႅင်းၶဝ် ဢမ်ႇႁပ်ႉၵူၺ်းဢိူဝ်ႈ ... ”
“ ပီႈၸၢႆးၼွင်ႉ ... မိူဝ်ႈႁိုဝ်း လႅင်းၶဝ်ဢိုတ်းႁဵၼ်းဢေႃႈ ... မႃးဢႅဝ်ႇလႅင်းတႄႉတႄႉၼႃႈ ... ”
“ ဢိူဝ်ႈ ... ဢိူဝ်ႈ ... တေမႃးယူႇ ... လႅင်းၶႂ်ႈလၢတ်ႈသင်ထႅင်ႈ ... ... ”
“ ဢေႃႈ ... ပီႈၸၢႆးၼွင်ႉ သိုဝ်ႉတၢင်းဢဵၼ်ႈမႃးပၼ်လႅင်းၽွင်ႈၼႃႈ ... ”
“ ဢိူဝ်ႈ ... ဢိူဝ်ႈ ... ”
“ ယႃႇပေသိုဝ်ႉယဝ်ႉ ... ၸၢႆးၼွင်ႉ ... တၢင်းဢဵၼ်ႈမၼ်း မီးၼမ်ၼႅၼ်ႇယဝ်ႉ ... ”
“ ဢမ်ႇပဵၼ်သင် ၽူၺ်း ... လုၵ်ႈဢွၼ်ႇၼႆၼႃႇ ... ”
ၽွင်းၼၼ်ႉ ၸၢႆးသႅင်ၵေႃႈ ၽႅဝ်မႃးသေ ၽူၺ်းၸင်ႇလၢတ်ႈဝႃႈ-
“ ၸၢႆးၼွင်ႉ ... ပီႈၸၢႆးသႅင် ၽႅဝ်မႃးယဝ်ႉ ... ”
“ ဢေႃႈ ... ပီႈၸၢႆးသႅင်ၶႃႈႁႃႉ ... ? ”
“ ၸႂ်ႈဢိူဝ်ႈ ... ၸၢႆးၼွင်ႉ ၼႃႈၵၢၼ် သင်ထုၵ်ႇယူႇႁႃႉ ”
“ သၢင်ႇထုၵ်ႇၵေႃႈဝႃႈ ... ဢမ်ႇသၢင်ႇထုၵ်ႇၵေႃႈဝႃႈလႆႈၶႃႈယဝ်ႉ ... ပီႈၸၢႆးသႅင် ... ”
“ဝၢႆးၼႆႉ ... တေသၢင်ႇထုၵ်ႇယူႇၵႂႃႈ ... ၵႆႉသိုပ်ႇၽူၼ်းၸူးတီႈႁဝ်းၽွင်ႈလႄႈ ... ၼႃႈ ... ”
“ ဢေႃႈ ... ”
“ လူဝ်ႇသင်ၵေႃႈ လၢတ်ႈလႄႈၼႃႈ ... ”
“ ယၢမ်းလဵဝ်တႄႉ လူဝ်ႇၵူၼ်း ဢၼ်တေမႃးယိမ်ၵႃးၼၼ်ႉၵူၺ်းယဝ်ႉ ၼႆႉၵူၺ်းၼႃႉ ... ပီႈၸၢႆးသႅင် ၶွပ်ႈၸႂ်ယဝ်ႉ ... ”
ၸၢႆးၼွင်ႉဝၢင်းၽူၼ်းဝႆႉသေ ပၼ်ၵႃႈသိုပ်ႇၽူၼ်းတီႈၸဝ်ႈသႅင်ႇယဝ်ႉ။