ၶႅၵ်ႇ/တွၼ်ႈသိပ်းႁူၵ်း
ၵူၼ်းဝႆႈၽြႃးၸုမ်းၼိုင်ႈ မႃးၶၢတ်ႈယိမ်ၵႃးမၼ်းလႄႈ ၸၢႆးၼွင်ႉႁေႃႈၵႃးမၼ်းသေ ၸွမ်းသူင်ႇပၼ် ၽြႃးၼႂ်းဝဵင်းတႃႈၵုင်ႈ တီႈၼိုင်ႈယဝ်ႉတီႈၼိုင်ႈယူႇ၊ ၼင်ႇႁိုဝ် မၼ်းတေႁၼ်ပီႈဢၢႆႈမၼ်းၼၼ်ႉ ၵူၼ်းၸၢႆး ၸိူဝ်းဢၼ်ႁွမ်းမိုဝ်းသေ ဝႆႈၽြႃးၼၼ်ႉ မၼ်းလွမ်တူၺ်းမိုဝ်းၶဝ် ယူဝ်တေလႆႈႁၼ်ႁွႆးၽႃႉတိူဝ်ႉ ၼႆၼၼ်ႉယူႇတႃႇသေႇ။
မၼ်းလႄႇလွမ်တူၺ်း ၼိဝ်ႉၸီႉပိူၼ်ႈယူႇၵူၺ်းလႄႈ မၼ်းဢမ်ႇၶဝ်ႈၸႂ်သင်၊ ၽူၺ်းလႄႈ တႆးၵေႃႉမၼ်း ၸၼ်ႉၸွမ် ဢွၼ်ၵၼ်မႃးတီႈၵွင်းမူးလူင် သူၺ်ႉတၵူင်ႇလႄႈ ၽူၺ်းၸင်ႇႁၼ်ၸၢႆးၼွင်ႉသေ -
“ ႁိူၺ်ႉ ... ၸၢႆးၼွင်ႉ ... ”
“ ဢေႃး ... ၽူၺ်း ... ”
“ ၸၢႆးၼွင်ႉ ... ၵုမ်ႇလွမ်တူၺ်းသင်ယူႇၼၼ်ႉ ... ? ”
“ ဢေႃႈ ... ဢမ်ႇလွမ်တူၺ်းသင် ...ၽူၺ်းၶဝ်မႃးဝႆႈၽြႃးႁႃႉ”
“ ၸႂ်ႈဢိူဝ်ႈ ... တႆးၵေႃႉၽူၺ်းၵေႃႉၼႆႉ ၶႂ်ႈမႃးလူႇမွၵ်ႇၼႆလႄႈ ၽူၺ်းၶဝ် မႃးသူင်ႇမၼ်းဢိူဝ်ႈ ... ၸၢႆးၼွင်ႉသမ်ႉ မႃးႁဵတ်းသင် ...? ”
“ ဢေႃ ... မႃးသူင်ႇ ၵူၼ်းဝႆႈၽြႃးၸုမ်းၼိုင်ႈသေ ၽႅဝ်မႃးၼိူဝ်ၼႆႉယဝ်ႉ ... ”
ၼႂ်းတႆးၵေႃႉၽူၺ်း ၵူၼ်းၸၢႆးၵေႃႉၼိုင်ႈၼၼ်ႉ မိုဝ်းၼိဝ်ႉၸီႉမၼ်းၽၢႆႇသၢႆႉ မီးႁွႆးၸဵပ်းဝႆႉလႄႈ ၸၢႆးၼွင်ႉ ၶဝ်ႈၸႂ်ၵႂႃႇတႄႉတႄႉ၊ မၼ်းထၢင်ႇဝႃႈ တေပဵၼ်ပီႈဢၢႆႈမၼ်း ၼႆလႄႈ မၼ်းၸင်ႇထၢမ်ဝႃႈ -
“ ႁႃႉ ... တီႈၼိဝ်ႉၸီႉ ပီႈၸၢႆးၼၼ်ႉ မီးႁွႆးၸဵပ်းဝႆႉဢိူဝ်ႈၼေႃ”
“ ဢေႃႈ ... ၸႂ်ႈဢိူဝ်ႈ ...”
“ ၵွပ်ႈသင် သမ်ႉမီးႁွႆးၸဵပ်းဝႆႉ ... ”
“ မိူဝ်ႈႁဝ်းလဵၵ်ႉၼၼ်ႉ မႆႉၽတ်ႉၺႃးဢိူဝ်ႈ ... ”
“ ဢေႃ ... ဝႃႈၼၼ်ႁႃႉ ... ”
ယွၼ်ႉပိူဝ်ႈ ဢမ်ႇၸႂ်ႈၽႃႉတိူဝ်ႉၼႆလႄႈ ၸၢႆးၼွင်ႉဝႃႈ တေဢမ်ႇပဵၼ် ပီႈဢၢႆႈမၼ်းၼႆဝေ မၼ်းလွမ်ထူၺ်ႈၸႂ်လူင်ၵမ်းၼိုင်ႈယူႇယဝ်ႉ၊ ၽွင်းၼၼ်ႉ ၸုမ်းၵူၼ်းဝႆႈၽြႃး ဢၼ်ၸၢႆးၼွင်ႉ မႃးၸွမ်းသူင်ႇၼၼ်ႉၵေႃႈ ၽႅဝ်မႃးယဝ်ႉလႄႈ ၸၢႆးၼွင်ႉၵေႃႈ ၸင်ႇဝႃႈ -
“ ဢေႃႈ ... ၽူၺ်း ၸၢႆးၼွင်ႉတေၵႂႃႇၵွၼ်ႇၼႃႈ ...”
ၽူၺ်းဢမ်ႇၶိုၼ်းပဵၼ်တွပ်ႇသင် မၼ်းငွၵ်းႁူဝ်ၼႄၵမ်းၼိုင်ႈ လဵဝ်လဵဝ်ၵူၺ်း ၊ ဝၼ်းၼၼ်ႉ ၽူၺ်းၽႅဝ်ႁိူၼ်းမႃးသေတႃႉ မၼ်းၵုမ်ႇမႃးဝူၼ်ႉတူၺ်း လွင်ႈၸၢႆးၼွင်ႉယူႇ ၊ ၵွပ်ႈသင် ၸၢႆးၼွင်ႉၶဝ်ႈၸႂ်ထၢမ်တူၺ်း လွင်ႈႁွႆးၸဵပ်းၼႆသေတႃႉ မၼ်းဢမ်ႇပွင်ႇၸႂ်၊ မၼ်းထၢင်ႇဝႃႈ တေမီးလွင်ႈတၢင်း သေဢၼ်ဢၼ်ယူႇၼႆယဝ်ႉ ။
+ + + + + + +
မၢၵ်ႇၵႃး ဢၼ်ၸၢႆးၼွင်ႉႁေႃႈၼၼ်ႉ လေႃႈပၼ်ႇၼိူဝ်တၢင်း ၼႂ်းဝဵင်းတႃႈၵုင်ႈ သဵၼ်ႈၼိုင်ႈယဝ်ႉသဵၼ်ႈၼိုင်ႈ တီႈၼိုင်ႈယဝ်ႉတီႈၼိုင်ႈသေ ၸၢႆးၼွင်ႉသမ်ႉပေႃး လႅၼ်ႇၽၢႆသဵၼ်ႈတၢင်း ၼႂ်းတႃႈၵုင်ႈၼႅၼ်ႇယဝ်ႉ၊ ငိုၼ်းၵႃႈၵႃး ဢၼ်လႆႈမႃးၸိူဝ်းၼၼ်ႉ မၼ်းလႆႈၶိုၼ်းမႃးဢၢပ်ႈပၼ် ပေႃႈလဵင်ႉၶဝ်ယူႇ ။
ဝၼ်းၼိုင်ႈ မၼ်းႁေႃႈၵႃးမၼ်း မႃးသူင်ႇပိူၼ်ႈသေ ၽွင်းမိူဝ်ႈၽႅဝ်မႃး တီႈၸၼ်ႉၸွမ်ပၢႆးယႃႈယႃၼၼ်ႉ လႆႈႁၼ်ၽူၺ်း မႃးႁေႉၵႃးမၼ်းလႄႈ မၼ်းၸင်ႇ ၵိုတ်းၵႃးသေ -
“ ဢေႃႈ ... ၽူၺ်း ... တေၵႂႃႇလႂ် ? ”
“ ၽူၺ်း ... တေဢၢင်ႈမိူဝ်းႁိူၼ်း ၼႆဢိူဝ်ႈ ... ”
ၸၢႆးၼွင်ႉ ၽုၺ်ႇၽၵ်းတူၵႃးပၼ်သေ ၽူၺ်းၵေႃႈၶဝ်ႈမႃးၼင်ႈ ၼႂ်းၵႃးယဝ်ႉ ၸၢႆးၼွင်ႉသိုပ်ႇႁေႃႈၵႃး ဢွၵ်ႇမႃးသေ -
“ ၽူၺ်း ... လႆႈႁၼ်ၽူၺ်းၶဝ် ၶိုၼ်ႈၸၼ်ႉၸွမ်ၼႆႉ ဢၢပ်ႈၵျေႃႇၼႃႇၼေႃ... ? ”
“ ၵျေႃႇၼႆၵေႃႈ ဢမ်ႇဝႃႈလႆႈၼင်ႇၵဝ်ႇ ... ၸၢႆးၼွင်ႉ ... ”
“ ပေႃးဢဝ် တႃၸၢႆးၼွင်ႉၶဝ်တူၺ်းႁၼ်ဝႃႈတႄႉ ... ႁၼ်ၸိူဝ်းပိူၼ်ႈ မီးတႆးၵေႃႉၼမ်ၼမ်သေ ဢွၼ်ႁဵၼ်းဢဝ်လိၵ်ႈၸိူင်ႉၼႆ တႃႉလီၶွႆၶဝ်တႄႉယဝ်ႉ ”
ၽူၺ်းငိၼ်းထွမ်ႇ ၶေႃႈၵႂၢမ်းၸႂ်လဵၵ်ႉ ၸၢႆးၼွင်ႉၼၼ်ႉသေ မၼ်းလွမ်ထူၺ်ႈၸႂ်လူင် ၵမ်းၼိုင်ႈယူႇ၊ ၸၢႆးၼွင်ႉၶိုၼ်းသိုပ်ႇဝႃႈ -
“ ၸၢတ်ႈၼႆႉတႄႉ ၸၢႆးၼွင်ႉၶႂ်ႈၶိုၼ်ႈ ၼႆၵေႃႈ ... ဢမ်ႇထိူၵ်ႈယဝ်ႉ ... ဢမ်ႇႁူႉလႆ ... ပေႃးၸၢတ်ႈတေမႃး ... ”
“ ၸၢႆးၼွင်ႉ ... ၸၼ်ႉၸွမ် ဢၼ်ဝႃႈၼၼ်ႉ ပိူၼ်ႈဢွၼ်ၵၼ်ဝႃႈ ဢၢပ်ႈလီၵျေႃႇၼႃႇၼႆ ၵမ်ႉၼမ်ၼမ်ယဝ်ႉ ... ပေႃးဢဝ်ပၢၼ်ၸၼ်ႉလိၵ်ႈ ထၢၼ်ႈတႂ်ႈမႃးတႅၵ်ႈၼႆတႄႉ ... ၸၼ်ႉၸွမ်ၼႆႉ ပိူဝ်ႈဝႃႈ ပဵၼ်ပၢၼ် ၵူၼ်းဢၼ်မီးတၢင်းႁူႉ တၢင်းတႅပ်းတတ်း တူၼ်ႈၸႂ်ၽႂ်မၼ်းယဝ်ႉၼႆလႄႈ ၶူးသွၼ်ၶဝ်ၵေႃႈ ဢမ်ႇပေႃးထိင်းၸိူင်ႉၼင်ႇၸၼ်ႉတႂ်ႈၼၼ်ႉသေ လႆႈၶိုၼ်ႈႁဵၼ်း လွတ်ႈလွတ်ႈလႅဝ်းလႅဝ်းၼၼ်ႉလႄႈ တေၶႂ်ႈဝႃႈၵျေႃႇ ... ၼႆယဝ်ႉ ... တီႈတႄႉမၼ်းတႄႉ ... လူဝ်မေႃလိၵ်ႈသေ လူဝ်ႇပူၼ်ႉၸၼ်ႉလိၵ်ႈ ပီလႂ် ပီၼၼ်ႉယဝ်ႉ ... ”
ၸၢႆးၼွင်ႉ သိုပ်ႇႁေႃႈၵႃးမၼ်းသေ ၽႅဝ်မႃးၼႂ်း ဝၢင်းႁိူၼ်း ၽူၺ်းၶဝ်ယူႇ ပေႃးဝႃႈ ၵႃးၵိုတ်းၼႆ ၽူၺ်းလူင်းၵႃးသေ -
“ ၸၢႆးၼွင်ႉ ... ၶဝ်ႈမိူဝ်းဢႅဝ်ႇ ၼႂ်းႁိူၼ်းၵွၼ်ႇလႄႈ ... ”
“ လႆႈယဝ်ႈ ၽူၺ်း ... ၸၢႆးၼွင်ႉ လူဝ်ႇလႆႈၵႂႃႇဝႄႉႁပ်ႉ လုၵ်ႈယိင်းပေႃႈလဵင်ႉၵွၼ်ႇဢိူဝ်ႈ ... ၶဝ်ၸမ်တေလူင်းၵျူႇသျိၼ်ႇယဝ်ႉ ... ”
ၸၢႆးၼွင်ႉႁေႃႈၵႃးမၼ်း ဢွၵ်ႇမႃးသေတႃႉ ၽူၺ်းတႄႉလွမ်တူၺ်း ၵႃးၸၢႆးၼွင်ႉ တေႃႇပေႃးဢွၵ်ႇ ၼွၵ်ႈဝၢင်းႁိူၼ်းၵႂႃႇယူႇ။ ၶေႃႈၵႂၢမ်းဢၼ်ၸၢႆးၼွင်ႉလၢတ်ႈဝႃႈ “ လူဝ်ႇလႆႈၵႂႃႇဝႄႉႁပ်ႉ လုၵ်ႈယိင်းပေႃႈလဵင်ႉ ”ၼႆၼၼ်ႉမၼ်းၼၢင်း လွမ်ထူၺ်ႈၸႂ်လူင်ၵမ်းၼိုင်ႈယူႇ။ လုၵ်ႈယိင်းပေႃႈလဵင်ႉ ၸဝ်ႈၵႃးၼၼ်ႉ တူၵ်းၸၼ်ႉသိပ်းသီႇပီသေ တိုၵ်ႉတေၶိုၼ်းတွပ်ႇၸၼ်ႉသိပ်းထႅင်ႈ ၼႆသေတႃႉ လိၵ်ႈတႄႉမၼ်းဢမ်ႇၶတ်းၸႂ် မၼ်းၵူၺ်းၶတ်းၸႂ်ၸွမ်းမၢဝ်ႇ ၵေႃႉၼိုင်ႈယဝ်ႉ ၵေႃႉသွင်သေ ၵုမ်ႇမူၼ်ႈၸွမ်းၸိူဝ်းၸိူင်ႉၼၼ်ၵူၺ်း။