ၶႅၵ်ႇ/တွၼ်ႈသိပ်းၸဵတ်း
တီႈၼႂ်းဝဵင်း ၼႂ်းလၢၼ်ႉၶၢႆၶူဝ်းတၵူင်ႇ။
ၸၢႆးသႅင် မႃးႁႃသိုဝ်ႉၶူဝ်းသေ မႃးထွင်ႈတူၺ်းၼႂ်းလၢၼ်ႉၶၢႆယူႇ၊ ဝၼ်းၼၼ်ႉ ၸၢႆးၼွင်ႉၵေႃႈ မႃးဢႅဝ်ႇတူၺ်း ၼႂ်းလၢၼ်ႉၼင်ႇၵဝ်ႇလႄႈ မၼ်းၸင်ႇမႃးထူပ်းၵၼ် တင်းၸၢႆးသႅင်ယဝ်ႉ -
“ ပီႈၸၢႆးသႅင် ... ”
“ ဢေႃး ... ၸၢႆးၼွင်ႉ ... ၵေႃႉလဵဝ်ၵူၺ်းႁႃႉ ... ? ”
“ ၵေႃႉလဵဝ်တႃႇသေႇယဝ်ႉ ...ပီႈၸၢႆးသႅင်လူး မႃးႁႃသိုဝ်ႉသင်”
“ ႁႃသိုဝ်ႉသင်တႄႉတႄႉၵေႃႈ ဢမ်ႇဝႃႈၼင်ႇၵဝ်ႇ ... ၸၢႆးၼွင်ႉလူး ... မႃးႁႃသိုဝ်ႉသင် ...? ”
“ မႃးသိုဝ်ႉ ယႃႈသီၶဵဝ်ႈ ဢေႃႈ ... ”
“ သိုဝ်ႉယဝ်ႉယဝ်ႉႁႃႉ ... ? ”
“ သိုဝ်ႉ ယဝ်ႉ ယဝ်ႉ ...”
ၶႃသွင်ၵေႃႉ သိုပ်ႇပႆဢွၵ်ႇၼွၵ်ႈလၢၼ်ႉမႃးသေ ၸၢႆးသႅင်ၸင်ႇၸူဝ်း ၸၢႆးၼွင်ႉၵႂႃႇၼႂ်းသႅင်ႇၼမ်ႉၼဵင်ႈဝၢၼ် တီႈၼိုင်ႈယဝ်ႉ ၶႃသင်ႇၵိၼ် ၼမ်ႉၼဵင်ႈဝၢၼ်သေ -
“ ဢိုဝ်ႈ ... ဢမ်ႇႁၼ်ၸၢႆးၼွင်ႉၵေႃႈ ႁိုင်ယဝ်ႉ ... ၼႃႈၵၢၼ် ၸွင်ႇသၢင်ႇထုၵ်ႇႁိုဝ် ... ? ၸၢႆးၼွင်ႉ ... ”
ၸၢႆးၼွင်ႉ လွမ်တူၺ်းၼႃႈၸၢႆးသႅင်သေ ဝႆႁူဝ်ၼႄယဝ်ႉ -
“ ဢမ်ႇသၢင်ႇထုၵ်ႇ ... ပီႈၸၢႆးသႅင် ... ”
“ ၵွပ်ႈသင် လႃႇ ... ? ၸၢႆးၼွင်ႉ ... ”
ၸၢႆးၼွင်ႉ ထူၺ်ႈၸႂ်လူင် ၵမ်းၼိုင်ႈသေ လၢတ်ႈဝႃႈ -
“ တီႈလဵဝ် ၶႃႈဢမ်ႇႁေႃႈၵႃးယဝ်ႈ ... ပီႈၸၢႆးသႅင် ... ”
“ ၵွပ်ႈသင် ... ? သမ်ႉဢမ်ႇႁေႃႈလႃႇ ... ? ”
“ ၵွပ်ႈပိူဝ်ႈ ... မီးပၼ်ႁႃဢေႃႈ ... ”
“ မီးပၼ်ႁႃ ... ၸိူင်ႉႁိုဝ် ... ? ”
“ ပီႈၸၢႆးသႅင် ... ၶႃႈၵႂႃႇႁေႃႈၵႃးႁိူၼ်းၶဝ်ၼႆႉ ... ၵႃႈၵႃးလႆႈမႃး ၵႃႈႁိုဝ်ၵေႃႈ ၶႃႈပၼ်ၶဝ်ယူႇလူး ... ၵၢၼ်တွၼ်ႈၽၢႆႇၶႃႈတႄႉ ၶႃႈၶတ်းၸႂ်ပၼ်ၶဝ် တဵမ်ထူၼ်ႈယူႇတႃႇသေႇယဝ်ႉ ... ”
“ ၶဝ်ဢမ်ႇလႆႈၸႂ် ၸၢႆးၼွင်ႉႁႃႉ ... ? ”
“ လႆႈၸႂ်ယူႇ ... ၵူၺ်းၼႃႇ ... ၶဝ်လႆႈၸႂ်ပူၼ်ႉၼႃႇလႄႈ ယၢပ်ႇၸႂ်ဢေႃႈ ... ”
“ လႆႈၸႂ်ပူၼ်ႉ ... ၸိူင်ႉႁိုဝ် ... ? ၸၢႆးၼွင်ႉ ... ”
“ ၶဝ် ၶႂ်ႈၸႂ်ႉၶႃႈဢဝ်လုၵ်ႈယိင်းၶဝ် ၼႆယဝ်ႈ... ၼႃႈႁိူၼ်း ဢၼ်ဢမ်ႇပႃးတၢင်းႁၵ်ႉၼၼ်ႉ ၸူဝ်ႈမၼ်းတေဢမ်ႇယၢဝ်းလႆႈလႄႈ ၶႃႈၸင်ႇဢွၵ်ႇၵၢၼ် တီႈၶဝ်မႃးပႅတ်ႈယဝ်ႉ ဢေႃႈ ... ”
“ လုၵ်ႈယိင်းၶဝ် ၼၼ်ႉ ... ႁၢင်ႈလီယူႇဢမ်ႈၸႂ်ႈၸႃႉ ... ၸၢႆးၼွင်ႉ ... ”
“ ဢမ်ႇႁၢင်ႈၸႃႉ ၼင်ႇၵဝ်ႇ ... ၵူၺ်းၵႃႈ ... ပၼ်ႁႃလုၵ်ႈယိင်းၶဝ်ၼၼ်ႉ ၶဝ်ၶႂ်ႈႁႂ်ႈၶႃႈ ၵူမ်ႈၶေႃးသေ သုပ်းဢဝ်လႄႈ ၶႃႈဢမ်ႇၶၢမ်ႇဢဝ်”
“ ပၼ်ႁႃ ... ၸိူင်ႉႁိုဝ် ... ? ၸၢႆးၼွင်ႉ ...”
“ လုၵ်ႈယိင်းၶဝ်ၼၼ်ႉ ... ၸွမ်းၵူၼ်းၸၢႆး ၵေႃႉၼိုင်ႈၵေႃႉသွင်သေ ထိုင်တီႈပုမ်လူင်မႃး ၵူၼ်းၸၢႆး သမ်ႉဢမ်ႇၶႂ်ႈဢဝ်သေ ပၢႆႈပႅတ်ႈလႄႈ ၶဝ်သမ်ႉ ဢမ်ႇၸၢင်ႈႁဵတ်းႁိုဝ်သေ ၸႂ်ႉၶႃႈ ၵႄႈလိတ်ႈပၼ်ပၼ်ႁႃၶဝ် ၼႆယဝ်ႉ ”
ၸၢႆးၼွင်ႉ သူတ်ႉၵိၼ်ၼမ်ႉၼဵင်ႈဝၢၼ် ဢိုၵ်ႉၼိုင်ႈသေ -
“ ၼႃႈၵၢၼ်ၶႃႈ ... ဢၼ်မႃးတႃႈၵုင်ႈၼႆႉ ဢမ်ႇၸႂ်ႈတႃႇတေမႃးၵႄႈလိတ်ႈပၼ် ပၼ်ႁႃလုၵ်ႈဢွၼ်ႇ ဢမ်ႇမီးပေႃႈၼၼ်ႉၵူၺ်း ... ၶႃႈမႃးတႃႈၵုင်ႈၼႆႉ ယိူင်းဢၢၼ်းၶႃႈပဵၼ်တႃႇမႃး ... ႁႃ ... ”
ၸၢႆးၼွင်ႉ ဢၢင်ႈလၢတ်ႈဝႃႈ တႃႇမႃးႁႃ ပီႈဢၢႆႈမၼ်း ၼႆသေတႃႉ မၼ်းၶိုၼ်းသတိလႆႈလႄႈ မၼ်းဢမ်ႇပဵၼ်သိုပ်ႇလၢတ်ႈ ၊ ၸၢႆးသႅင်ၸင်ႇထၢမ်ဝႃႈ -
“ တႃႇမႃးႁႃ သင် ... ? ၸၢႆးၼွင်ႉ ... ”
“ တႃမႃးႁႃ ၵၢၼ်ဢၼ်သၢင်ႇထုၵ်ႇၼၼ်ႉ ဢေႃႈ ... ”
“ မိူဝ်ႈလဵဝ် ၸၢႆးၼွင်ႉႁဵတ်းၵၢၼ်သင်လႃႇ ... ? သမ်ႉယူႇလႂ်”
“ ၵႂႃႇယူႇႁိူၼ်းတႆးၵေႃႉ ၸဝ်ႈၵႃးၵေႃႉၼိုင်ႈသေ ႁဵတ်းၵၢၼ်ၸွမ်းမၼ်း တေႃႉၶူဝ်းၸွမ်းမၼ်းယူႇဢေႃႈ ... ”
“ ပေႃးလႆႈၵၢၼ်တၢင်မဵဝ်းၼႆ...ၸွင်ႇၸၢႆးၼွင်ႉတေၶႂ်ႈႁဵတ်းႁိုဝ်”
“ ၵၢၼ်သင်ၵေႃႈ ၶႃႈဢမ်ႇလိူၵ်ႈၼင်ႇၵဝ်ႇ ပီႈၸၢႆးသႅင် ... ”
“ လီယဝ်ႉ ... ပေႃးၼႆ ... ပီႈၸၢႆးသႅင် တေထၢမ်ႁႃပၼ်လႆ ”
“ ၸူမ်းယဝ်ႉ ... ပီးၸၢႆးသႅင် ... ”
“ ပေႃးၼႆ ... ပေႃးဝၼ်းသဝ်ဝူင်ႈတေမႃးၼႆ ၸၢႆးၼွင်ႉမႃးတီႈႁိူၼ်း ပီႈၸၢႆးသႅင်ၶဝ်ၼႃႈ... ”
“ ဢေႃႈ ... ဢေႃႈ ... ”
ၶႃသွင်ၵေႃႉ ဢွၵ်ႇသႅင်ၼမ်ႉၼဵင်ႈဝၢၼ် ( ၼမ်ႉလႃႉ ) မႃးသေ ပႆမႃးၸွမ်းၶွပ်ႇတၢင်းလူင်သူးလေႇယူႇ ၊ ၵူၼ်းၸၢႆးမၢဝ်ၵေႃႉၼိုင်ႈ ပႆမႃးသိုဝ်ႈၼႃႈၶႃသေတႃႉ ၸၢႆးသႅင်ဢမ်ႇႁၼ်၊ ၸၢႆးသႅင် ၵုမ်ႇလွမ်တူၺ်းၵႃးသေ ၶၢမ်ႈတၢင်းယူႇ၊ ၵူၼ်းၸၢႆးမၢဝ်ႇၵေႃႉၼၼ်ႉ တၵ်ႉလၢတ်ႈဝႃႈ -
“ ႁိူၺ်ႉ ... ပီႈၸၢႆးသႅင် ... တေၵႂႃႇလႂ် ... ? ”
“ ဢေႃး ... ၸၢႆးၸၢႆး ... တေမိူဝ်းဢိူဝ်ႈ ... ”
ယွၼ်ႉပိူဝ်ႈ ပဵၼ်ၼိူဝ်တၢင်းၵႃးလႄႈ ၸၢႆးသႅင်ၶဝ် သိုပ်ႇၶၢမ်ႈတၢင်းပူၼ်ႉမႃးယဝ်ႉ ၸၢႆးၼွင်ႉ လႆႈငိၼ်း သဵင်ၸၢႆးသႅင်ႁွင်ႉဝႃႈ ၸၢႆးၸၢႆးၼႆလႄႈ မၼ်းၶဝ်ႈၸႂ်ၵႂႃႇတႄႉတႄႉသေ ၸင်ႇၶိုၼ်းထၢမ်ၸၢႆးသႅင်ယူႇယဝ်ႉ -
“ ပီႈၸၢႆးသႅင် ... မိူဝ်ႈၵႆႈၼၼ်ႉ ပဵၼ်ၽႂ် ... ? ”
“ ဢေႃႈ ... ပဵၼ်ၸၢႆးၸၢႆးဢိူဝ်ႈ ... ”
“ ဢေႃႈ ... ၸၢႆးၸၢႆး ... ၼႆႁႃႉ ... ”
“ ၸႂ်ႈဢိူဝ်ႈ ... ၸၢႆးၼွင်ႉႁူႉၸၵ်းယူႇႁႃႉ ... ? ”
“ ဢမ်ႇႁူႉၸၵ်းၼင်ႇၵဝ်ႇ ... ၵူၺ်းၵႃႈ ... ၸိုဝ်ႈမၼ်းမိူၼ် ”
ၸၢႆးၼွင်ႉ ဢၢင်ႈလၢတ်ႈဢွၵ်ႇသူပ်းမႅၼ်ႈၵႂႃႇဝႃႈ မိူၼ်ၸိုဝ်ႈပီႈဢၢႆႈမၼ်း ၼႆသေတႃႉ မၼ်းၶိုၼ်းသတိလႆႈလႄႈ မၼ်းၸင်ႇၼႅတ်ႈၵိုတ်းဝႆႉ ၶေႃႈၵႂၢမ်းမၼ်း ၽႂ်းၽႂ်းယဝ်ႈ ၊ ၸၢႆးသႅင် ၸင်ႇသိုပ်ႇဝႃႈ -
“ မိူၼ်သင် ... ? ၸၢႆးၼွင်ႉ ... မိူၼ်ၸိုဝ်ႈတႆးၵေႃႉၸၢႆးၼွင်ႉႁႃႉ ... ”
“ ၸႂ်ႈ ... ၸႂ်ႈဢေႃႈ ... မိူၼ်ၸိုဝ်ႈတႆးၵေႃႉၸၢႆးၼွင်ႉဢေႃႈ ”
“ ဢိုဝ်ႈ ... မိူဝ်ႈႁဝ်းၺႃးၵၼ်ၼၼ်ႉ သမ်ႉပဵၼ်ၼိူဝ်တၢင်းၵႃးလႄႇ ... သင်ဢမ်ႇၼၼ်တႄႉ တေသိုပ်ႇမိုတ်ႈပၼ် ၸၢႆးၼွင်ႉယူႇ ... ”
“ မၼ်းယူႇတီႈလႂ် ... ? ပီႈၸၢႆးသႅင် ... ”
“ ယူႇတီႈ ပႃႇရမီႇဢိူဝ်ႈ ... ပေႃႈမႄႈမၼ်းတႄႉ ပဵၼ်ၵူၼ်းၶႅၼ်းၸႂ်တႄႉတႄႉယဝ်ႉ ... ပေႃႈမၼ်းပဵၼ် ၶူးမေႃယႃလူင် ဢၼ်မႃးတူၺ်းၸၢႆးၼွင်ႉ မိူဝ်ႈၸၢႆးၼွင်ႉၼၢဝ်ၼၼ်ႉၼႃႇ ”
“ ဢေႃး ... ၸႂ်ႈတႄႉႁႃႉ ... ၶူးမေႃယႃလူင်ၼၼ်ႉတႄႉ ၶႃႈယင်းဢမ်ႇတွင်း ... ၵွပ်ႈသင်ၼႆ မိူဝ်ႈၼၼ်ႉ လူမ်းၼၢဝ်ၶိုၼ်ႈႁႅင်းၼႃႇၶႃႈလူး ... ... ”
ၶႃသွင်ၵေႃႉ ပႆမႃးၽႅဝ် တီႈတႃႈၵႃးသူးလေႇသေ ပႂ်ႉၶီႇၵႃးယူႇ၊ ၸၢႆးၼွင်ႉတႄႉ မုင်ႈမွင်း ၶႂ်ႈႁၼ်ၸၢႆးၸၢႆးၼႃႇယဝ်ႉလႄႈ မၼ်းၸင်ႇလႅၼ်ဝႃႈ မၼ်းလူဝ်ႇသိုဝ်ႉၶူဝ်းထႅင်ႈမဵဝ်းၼိုင်ႈ ၼႆသေ မၼ်းဢမ်ႇပႂ်ႉၶီႇၵႃးၸွမ်းၸၢႆးသႅင်၊ မၼ်းၶိုၼ်း ၼႅတ်ႈပႆမႃးႁႃၸၢႆးၸၢႆး ၸွမ်းလၢၼ်ႉၶၢႆတၵူင်ႇယူႇ၊ ၼႂ်းၵႄႈၵၢင် ၵူၼ်းၼမ်ၼၼ်ႉ မၼ်းၼႅတ်ႈသွၵ်ႈႁႃပီႈဢၢႆႈမၼ်း ၸၢႆးၸၢႆးယူႇလႄႈ မၼ်းသမ်ႉပေႃး လႄႇႁႃၽႃႇၺႃး ပိူၼ်ႈတၢင်ႇၵေႃႉသေ ၵုမ်ႇၶိုၼ်းလႆႈ တွင်းပၢၼ်ႇပိူၼ်ႈယူႇ ။
ယွၼ်ႉပိူဝ်ႈ ဢမ်ႇလႆႈႁၼ်ၸၢႆးၸၢႆး တီႈၼႂ်းလၢၼ်ႉၶၢႆတၵူင်ႇလႄႈ ၸၢႆးၼွင်ႉ ၶိုၼ်းမႃးႁႃၸၢႆးၸၢႆး ၼႂ်းလၢၼ်ႉၶၢႆလူင်ႁိမ်းၼၼ်ႉယဝ်ႉ ၊ ၸၼ်ႉတႂ်ႈဢမ်ႇႁၼ် ၸၢႆးၸၢႆးလႄႈ ၸၢႆးၼွင်ႉၶိုၼ်းၸွမ်း ၶူဝ်လႆလိူၼ်ႈသေ မႃးႁႃထႅင်ႈၸၼ်ႉၼိူဝ်ၼႆႉ ၸၼ်ႉၼိုင်ႈယဝ်ႉၸၼ်ႉၼိုင်ႈယူႇ။
ၵေႃႉလႂ် တေပဵၼ်ၸၢႆးၸၢႆး ဢၼ်မၼ်းႁႃၼၼ်ႉၼႆ မၼ်းလွမ်တူၺ်း သမ်ႉပေႃးသူၼ်ႈသိၼ်းသၢၼ်ၵႂႃႇသေတႃႉ မၼ်းဢမ်ႇႁၼ်ၸၢႆးၸၢႆး ၊ ၽွင်းမိူဝ်ႈ ၸၢႆးၸၢႆးတိုၵ်ႉသိုဝ်ႉ မွၵ်ႇလႄႈ တဝ်ႈမွၵ်ႇၼၼ်ႉ ၸၢႆးၸၢႆး ႁၼ်ၸၢႆးၼွင်ႉယူႇသေတႃႉ ၸၢႆးၼွင်ႉတႄႉဢမ်ႇႁၼ်ၸၢႆးၸၢႆး၊ ၼႂ်းၸႂ်ၸၢႆးၸၢႆးတႄႉလွမ်ဝႃႈ -
“ ... ဢၢႆႈဢွၼ်ႇ ဢၼ်ၸွမ်းၸၢႆးသႅင်မႃး မိူဝ်ႈၵႆႈၼၼ်ႉ ဢမ်ႇၸႂ်ႈႁႃႉၼၼ်ႉ ... မၼ်းႁႃၽႂ်ၵေႃႈဢမ်ႇႁူႉ ... ”
ၽွင်းမိူဝ်ႈ ၸၢႆးၼွင်ႉ သိုပ်ႇႁႃၸၢႆးၸၢႆးသေ ၶိုၼ်ႈၵႂႃႇၸၼ်ႉၼိူဝ်ၼၼ်ႉ ၸၢႆးၸၢႆးၵေႃႈသိုပ်ႇသိုဝ်ႉ မွၵ်ႇလႄႈတဝ်ႈမွၵ်ႇမိူင်းၶႄႇယူႇ၊ ၸၢႆးၼွင်ႉၵႂႃႇတဝ်ႁႃ ၸၼ်ႉၼိူဝ်ၸိူဝ်းၼၼ်ႉၵေႃႈ ဢမ်ႇႁၼ် ၸၢႆးၸၢႆးလႄႈမၼ်းၶိုၼ်း ၼႅတ်ႈလူင်းမႃးၽႂ်းၽႂ်းသေ ၸွမ်းႁႃၸၢႆးၸၢႆးယူႇ၊ ၶဝ်ႈတီႈၼိုင်ႈဢွၵ်ႈတီႈ ၼိုင်ႈသေတႃႉ ဢမ်ႇႁၼ်ၸၢႆးၸၢႆး၊ ၽွင်းမိူဝ်ႈမၼ်း ဝၢႆႇတူၺ်းၽၢႆႇလင်သေ ဢၢင်ႈတေဢွၵ်ႇမႃးတီႈ ၽၵ်းတူၼၼ်ႉၼႆ မၼ်းၽႃႇၺႃးၵူၼ်းၵေႃႉၼိုင်ႈ ဢၼ်တိဝ်ႈထူင်ၶွပ်ႉၶႅပ်ႉသေ ၶဝ်ႈမႃးၼၼ်ႉယဝ်ႉ၊ ထူင်ၶွပ်ႉၶႅပ်ႉၼၼ်ႉ ၵႂႃႇၽတ်ႉမႅၼ်ႈၺႃး ၸဵင်ႇၽၵ်းတူလဵၵ်းသေ ၶူဝ်းဢၼ်မီးၼႂ်းၼၼ်ႉ လူႉလႅဝ်ၵႂႃႇယဝ်ႈ ။ ၸၢႆးၼွင်ႉၸင်ႇၼႅတ်ႈတူၺ်း ၵေႃႉဢၼ်မၼ်းၽႃႇၺႃးၼၼ်ႉသေ လႆႈႁၼ်ပဵၼ် ၸၢႆးၸၢႆးလႄႈ မၼ်းၸူမ်းၵေႃႈၸူမ်း ဢၢမ်းၵေႃႈဢၢမ်းသေ ၶိုၼ်းယွၼ်းတွင်းပၢၼ်ႇယူႇ -
“ ဢေႃး ... သေႃးရီး ... ပီႈၸၢႆးၶႃႈ ... ၶႃႈၵုမ်ငဝ်တူၺ်းပိူၼ်ႈယူႇသေလႄႈ လႆႈၽႃႇၺႃး ပီႈၸၢႆးၵႂႃႇယဝ်ႈ ... ၶူဝ်းၼႂ်းထူင်ပီႈၸၢႆးၼၼ်ႉ လႅဝ်ႇၵႂႃႇယဝ်ႉယူဝ်ႉ ... ”
ၸၢႆးၸၢႆးလွမ်တူၺ်း ၼႃႈၸၢႆးၼွင်ႉသေ မၼ်းပဵၼ်ဢၼ်သေလၢႆ တဝ်ႈမွၵ်ႇမၼ်း ဢၼ်လႅဝ်ၵႂႃႇၼၼ်ႉတႄႉတႄႉ၊ တဝ်ႈလႄႈမွၵ်ႇ ဢၼ်မၼ်းမႃးသိုဝ်ႉၼႆႉ ယွၼ်ႉပိူဝ်ႈ မီးတဝ်ႈလဵဝ်ၵူၺ်းယဝ်ႉလႄႈ မၼ်းလႆႈလူႉလႅဝ်ၵႂႃႇ ၵွပ်ႈၸၢႆးၼွင်ႉ ၵေႃႉဢၼ်မႃးၽႃႇၺႃးမၼ်းၼၼ်ႉသေ မၼ်းၸႂ်လမ်တေႃႇ ၸၢႆးၼွင်ႉတႄႉတႄႉ ၵွပ်ႈၼၼ် မၼ်းၸင်ႇဝႆႉသဵင်ၶႅင်သေလၢတ်ႈဝႃႈ -
“ မႂ်း ... ဢမ်ႇမီးတႃႁႃႉ ... ? တဝ်ႈမွၵ်ႇၵဝ်ၼႆႉ လႅဝ်ၵႂႃႇယဝ်ႉၼႆႉ ... ”
“ ၶႃႈ ... ၶႃႈ ... တေၶိုၼ်းသၢႆႈတႅၼ်းပၼ်လႆ ... ပီႈၸၢႆး ”
“ ႁိုဝ်ႉ ... မႂ်းတေႁဵတ်းႁိုဝ်သၢႆႈတႅၼ်း... တႃႇတေလႆႈ တဝ်ႈမွၵ်ႇမဵဝ်းၼႆႉ ၵဝ်သွၵ်ႈႁႃတင်းဝဵင်းသေ သိုဝ်ႉလႆႈလုၵ်ႈလဵဝ်ၵူၺ်း ... ဢိူဝ်ႈ မႂ်းၶႂ်ႈႁူႉၵေႃႈ ... ”
“ ပီႈၸၢႆး ... ပဵၼ်တဝ်ႈမွၵ်ႇမဵဝ်းႁိုဝ်... ပၼ်ၶႃႈ ယွၼ်းတူၺ်းၽွင်ႈၶႃႈလူး ... ”
ၸၢႆးၸၢႆး ၸႂ်လမ်ၼႃႇသေ ဢဝ်တႃမိုဝ်းထုပ်ႉပၼ် တႃၸၢႆးၼွင်ႉယဝ်ႉ -
“ တူၺ်း တႃမိုဝ်းၵဝ်ၼႆႉလႃႈ ... ”
“ ဢႃႉ ... ... ”
မၢၵ်ႇတႃၸၢႆးၼွင်ႉ လပ်းသိင်ႇသေ ႁၼ်မႅင်းႁိင်ႇႁွႆႈ ၽူင်ႉၵႂႃႇၽူင်ႉၶိုၼ်းဝႆႉယူႇ ၊ မၼ်းဢဝ်မိုဝ်းမၼ်း တူမ်းတႃၽၢႆႇၶႂႃမၼ်းသေ မၼ်းၵေႃႈၸႂ်လမ်မႃးၵမ်းလဵဝ်လႄႈ ဢၢင်ႈၶိုၼ်းတွပ်ႇသူႈ ၸၢႆးၸၢႆးယူႇ ၊ ၵူၺ်းၵႃႈ ၽွင်း မိူဝ်ႈမၼ်းလွမ်တူၺ်း မိုဝ်းၸၢႆးၸၢႆး ဢၼ်တိဝ်ႈထူင်ၶွပ်ႉၶႅပ်ႉၼၼ်ႉ လႆႈႁၼ်ႁွႆးၽႃႉ တိူဝ်ႉဝႆႉလႄႈ ၸႂ်လမ်မၼ်းၼၼ်ႉၵိုင်ႉၵၢင်ႉႁၢႆၵႂႃႇသေ မၼ်းၶဝ်ႈၸႂ်ၼိူဝ် ႁွႆးၽႃႉတိူဝ်ႉၼိဝ်ႉၸီႉ ၸၢႆးၸၢႆးၼၼ်ႉၵူၺ်းယဝ်ႉ ။ တႃမၼ်းၽၢႆႇၶႂႃ ဢၼ်ၺႃးတႃမိုဝ်းၼၼ်ႉၵေႃႈ ဢမ်ႇပႆႇမိုၼ်းလႆႈလီလီ မၼ်းၸင်ႇၸီႉမိုဝ်း ၸၢႆးၸၢႆးသေ လၢတ်ႈဝႃႈ -
“ တီႈ ... တီႈ မိုဝ်း ပီႈၸၢႆးၼၼ်ႉ ... ”
“ ပေႃးလႃႈ ... မႂ်း ဢမ်ႇလူဝ်ႇလၢတ်ႈသင်ထႅင်ႈ ယဝ်ႉ ... ”
ၽွင်းၼၼ်ႉ တႆးၵေႃႉၸၢႆးၸၢႆးၵေႃႉၼိုင်ႈ ၸင်ႇၽႅဝ်မႃးသေ ၵူဝ်သိုပ်ႇၽိတ်းၵၼ်လႄႈ တႆးၵေႃႉၸၢႆးၸၢႆး ႁွင်ႉဢဝ်ၸၢႆးၸၢႆးၵႂႃႇယဝ်ႉ ၊ ၸၢႆးၼွင်ႉ ၶႂ်ႈၸွမ်းလင်ၸၢႆးၸၢႆးၵႂႃႇသေတႃႉ ၵူၼ်းၵမ်ႈၽွင်ႈသမ်ႉ ၸၼ်သီႈႁၢမ်ႈတၢပ်ႈမၼ်းဝႆႉလႄႈ မၼ်းဢမ်ႇၸၢင်ႈၵႂႃႇၸွမ်းၸၢႆးၸၢႆးယဝ်ႉ။ ၸၢႆးၸၢႆးလႄႈ တႆးၵေႃႉမၼ်း ပႆမႃးၸွမ်းၵၼ်သေ ၽွင်းမိူဝ်ႈၽႅဝ်ႁိမ်း ၵူၺ်ယုၵ်းယၢၵ်းၼၼ်ႉ ၸၢႆးၸၢႆးဢဝ်ဢွမ်မွၵ်ႇလႅဝ်မၼ်း ပႅတ်ႈသႂ်ႇ ၼႂ်းပုင်းယုၵ်းယၢၵ်းသေ ၸၢႆးၸၢႆး ၶီႇၵႃးမိူဝ်းၸွမ်းတႆးၵေႃႉမၼ်းယဝ်ႉ။
ၸၢႆးၼွင်ႉၵေႃႈ ဢမ်ႇၸၢင်ႈႁဵတ်းႁိုဝ်သေ မၼ်းၶိုၼ်းပႆမႃးၸွမ်း ဢၼ်ၸၢႆးၸၢႆးပႆမႃးၼၼ်ႉလႄႈ မၼ်းၸင်ႇမႃးႁၼ် ထူင်ၶွပ်ႉၶႅပ်ႉလႄႈဢွမ်မွၵ်ႇ ဢၼ်ၸၢႆးၸၢႆး ဝိုတ်ႉပႅတ်ႈၼၼ်ႉယဝ်ႈ၊ မၼ်းၸင်ႇမႃးယိပ်းတူၺ်း ဢွမ်မွၵ်ႇ ဢၼ်လႅဝ်ၵႂႃႇၼၼ်ႉသေ ၶိုၼ်းဢဝ်ထိုမ်ႈဝႆႉ ၼႂ်းပုင်းၼၼ်ႉ ယူႇယဝ်ႉ။